Komatmatma Ahok Aning pen Arnam Aphan Patepekpe Atum Doan ke Arnam Cheparidengvekpo

Karjong Kangthir asai ke arni pen arni chelarvoi. Lake aphongtin akengkam along si ingtuiponbomlo, penap aphan kepaklang ke pini arni aphan ingtuimulo, karlupon ansose si ingtuilo, akengkamtin along. Lason pen henlo monit aphan Arnam kapachoklim keklempon. Jongsi monit atum laso along pachetondun thekthe, tangte latum aphan ke koloso apor ahut pone varchorji. Jongsi latum along le athikpet aning avedetlo, ha kejut ahut an latum aphiphi dun thekthedetpo. Aban akai ke damtanglo; lake non akimi akailo. Lapen la akimi akai along ke, akimi asai si pachun nangvekpo. Jongdamvet pen kijutsi akai along atheke monit atum aphan kepachoklim along, Arnam ke akimi asai si klemponpo, ansose keprap pen, lasi alangtum aning arlo athikpet avepin pen, monit atum Arnam akengbot aphiphi kidunji aphan kisung dokokpo. Arnam ke ajat aron tame rimponpe, mate Alangli ke ajat angdeng Alangli sai keklem tame kapachelarvoi vive. Alar ke, Alangli keklem asai ke ansose si kiraklo lapen ansose si ingtuiponlo. Asontin angdeng along, Alangli sai ke ansose si klangdak pen klem-dam manbomlo, lapen monit akenangji ateng aren pen si chenam ta batbomlo. Lapuson akepho monit atum chetongpondet aphi pen ansi latum kijutsi akachelar alangtum akun along doji. Monit akachinidam chethe aphuthak ke ansose si akangtui angdeng an arlubomlo, lapen lasi, lasonthot si, Arnam asai lethot tame ansose si akangtui an lebomlo. Laso pen si monit aphan ke pachoklim unji lapen Arnam asai aphan atheng cheman unji. Arnam asai lason si ihin anatthu pen ke klemlo monit kamunthidamthap alam pen kachedan lapen kelarji aphan, lapen ahin kaprek pen ke monit aphan pangtuibom lapen ansose ahokpet angdeng an chejaponbom, Arnam aphan akekroi akangtuinei adim an keponji aphan, laso pen ajok mo kijut ahut, Arnam aninghang ateng chundam unpo. Kadokave komatmatma athikpet kalidet asema kedo pen chinilor si kapatepek atum anke laso angdeng along si Arnam ke panglenlepin lapen ingtangrak kepaphrang asai pen varchorpo; komatmatma chekroidun peme lapen komatma amethang aphan kachepabi ningarong pen kedo atum anke kijut atovar along ke chingthur unpo. Lapuson asai along, kadokave nangtum doan kosonsi kachehodaiji lapen kosonsi nang kamunthidamthap alam arep kachibijima charlivek nangji. Nang cheroktok nangji ajat akengkam nang kedam along. Nang jongsi mathadamkranglo, nang ke chenam si komatma Karjong Kangthir ke’odet kemanji abanglo, komatma Arnam asai pasikdakdun abanglo. Laso asai angdeng along phodunde aphrangjong, monit aron lapen atang aban doan ke puan si akeonglo pima alangphan pangromthiplo, lapen laso angthek ke, alang cheparoka’idetlo lapen amethang aphan chetengnedetlo. Laheihui doan ke kadokave ta pima monit aphan Arnam akimi sai kapadengdun along akisunglo; lahei doan ke Arnam aphuthak monit akachinidam along ahotur saidelo. Lake athe monit atum aphan alangtum aning athikdut kedoji mate ahok aphan kiridunji puke pherememelo. Jongsi nang le kejoike asai lapen alam along pima chehodaidun chotlo, lapen ke akaprek ajat ta akeongpi kedengdun thekthedetlo, tangte nang ke komatma aban akrong si otthipver abanglo lapen Karjong Kangthir asai along pachetondun un’edetlo. Arnam keklempon asai ke akai lapen aove si akacheprekjam do. Jongsi nang le isi angdeng along Arnam asai aphan thedung athikpdut do, bonta adunthu angdeng along ke nang Alangli sai aphan athikdut ke memedetlo, mate nang le athikdutji si thekthedetlo, tangte Arnam nangphan che’ovekpo. Jongsi nang le Arnam pen Alangli laso akengkam kachejor aling pachetondunthek, tangte nang Alangli akaprek adunthu akengkam along antame pachetondun thekver nangvekpo; lason pen anchot si nang ke komatma Karjong Kangthir aphan athikpet kedo abang pupo. Nang ke Arnam aphan kekroi tangdetlo apot, nang ke nang athikpet aot isinat ateng si padover nangvekpo. Nang ke nang ninghanglet aling si jasemet kroichotji lapen nang ninghanghe lote arjujedetji puke chokchelo. Lapuson kachingkime aphan ke Arnam chororedetji. Jongsi nang le Ne kachingrum akimi asai pen pachetondun un’edetlo, tangte kosonsi nang chethe along kachingthur kedopo? Arnam asai ke Alangli lamthe pen nangphan kapadorji henlo. Nang le patepekpe lapen Alangli lamthe dengdunlo, Karjong Kangthir ahokpet si nanglong sai klempo. Karjong Kangthir asai ke Ne kaningjedam atengthot si klemlo; Ne kaningjetang ateng si klemlo, lapen nanglong menmen amat si Karjong Kangthir sai klempo. Nangtum ketheklongji aphan Ne akimi atur nanglo’et tanglo, nonjong ahut nangtum bangso atur katheang along kedoji aphanlo, lapen nang le laso atur along damlo te, nanglong menmen si Karjong Kangthir ke sai cheklemphitpo. Ajahak atum komatma kachedondundedet atum doji tahai, ningjeji, “Ne ke kopima Nangli kaningje ateng ke klemkledetji pupo.” Lason alam along, Ne nangphan thanpo pima nang ke kijut atovar ansi vang tanglo; nang ke kreng’anglo, lapen nang ke akimi achethe avelo. Lasi, nang kun kachelarpon kephoponbom along, thangnat ta pherememenei ke avelo nonjong ahut atur pen kapachetondun pen anpar. Arnam asai ke’entang ajahak amonit atum along anchot le Karjong Kangthir ke asai keklem kali, bonta, anpartame, mondoli along. Alangli ke madu along tame sai klemtheklo. Alangli ke nonjong apor ahut nanglong ta sai klem tahailo, lapen nang ke laso asai chomat longpo. Adunthu kaprek apor ahut, Alangli ke anut kaprek along si klempon tahailo, atheke nang ketongdun penaphiphi dunvek nangji; koanma nonjong atur along nang aphiphi kidun patebokdunthek, lapuan sose si nang chethe chingthurpo. Thangbakma kopi koson amonit abang pu sitame, jongsi latum along Karjong Kangthir sai klemlo pulote, nang ke aphiphi dunvek nangpo. Nang tame alangtum kepholongtang ateng le charlidunnon, lapen nang ta ansose akangtui ahormu longdunpo. Lason keklem pen ajok nang prapjin si chingthurpo. Lake monit aphan kapachoklimji akronglo lapen chethe kachingthurdunji adichilo. Kepachoklim akrong ke nang athikpet pen Karjong Kangthir asai kapaklemlong ajok si nanglelo. Nang chininedetji kopuson amonit pen ajok si Arnam nangphan kapachoklim keklemponji, mate kopi amonit pen ajok si, cheklangji, mate Alangli nangphan kelongji mate kapatheklongji aphan koson ahormu pen lone kepekji. Jongsi nang le laso akechok akrong along kengpak chibiduntheklo, laso kacheklang ke pima Arnam nangphan kaepachoklim longji thedung ningkethedam dolo. Jongsi nang le un’edet, laso kacheklang ke pima nang mohut ke krimsimlo, katheang atur pen duredetlo. Nang le ephongbak kechok akrong along damtheklo, nang ke kadokave ahormu kepaklang alam longtheipo. Kopisi Karjong Kangthir anut kaprek aphan kepangdak dolo pu sitame, jongsi nang le alangtum akachinidam ateng pen si paphrangdunlo nang mena kachomatdun longji aphan, tangte laso kachetongponji ke nang chethe ephar chemandetpo, lapen nang ke laso kechomatlong ateng pen anut kaprek atum aphan padordunthu thekserpo. Komatmatma alam pen monit atum aphan kapadordunchot atum anke thangnat akepho ta chetongtepinlang atumlo; nang la kiriji thekvek nangpo, bang atum akatheang lapen adak-atur pen ajok, nang mena ahokpet kephodam lapen kachinidam alam nang kaningje pangchengche aphrang kecharlidam nangji akronglo. Lake nang mena achethe along thedung ale kedo si chemanpo. Nang lasi chomatdunvek nangji, Arnam pen kevang kadokave ta patepekdundepin. Nang kadokave ahormu along tame Arnam akar’idam si ridun nangji lapen kadokave ahormu along pen charlidunnon, pima nang chethe chingthurji meme. Lason akeklem-kedam ke kachingthur keprapjin si padordunlo.

Karjong Kangthir nangphan kapatheang ke nang keklem-kedam kachomatlong ateng penlo, lapen nangphan kapachoklimji ke nang akekroi penlo. Tangte nang ke ahokpet ninghang loma kechoklimji aphan? Jongsi nang le ahokpet ninghanglo Arnam kapachoklimji aphan, tangte nang ke nang ok aphan kache’odetji angthin kethe dopo, nang ke Arnam alamthe kedengpon thekji aphan unpo, lapen nang ke ainititelo lapen kelak avelo. Nang ke kadokave pima Arnam pen kevang ason anke patepekpeji unpo, lapen kadokave nang keklem amo an, rat angno mate joijoi inutvet ahut si klemlo pu sitame, Arnam aphan chepachinidak haipo. Jongsi nang le kachobeibedet abangphu, lapen kadokave ahormu along ta ahokpet si klempon, tangte nangphan ke pachoklimpo. Komatmatma kachongthuidet titi amonit atum ke bang angno kopine eson si klemji lapen alangtum anung lote akaprek ahin si keklem atum anke kechoklimji ninghanghelo. Latum doan ke kai apar kai ado kepho lapen kivirdet asomar atum saidelo; latum ke Arnam apharman kali bonta Sobarlo. Latum doan ke Arnam pen kangvaipontang amonit atum ason kalidet! Jongsi nang keklem amo lapen ot-dur Arnam angno chepachinidak thekthedet mate Arnam aKarjong aphuthak si cholangronglo, lake angthek ke pima nanglong kopine akechokche dokoklo. Jongsi nang Arnam pen akangsai lapen ado kipi kedeng pen anchot, lapen nang kun kachelarphunji aphan chematha’e kedo, nang ke kechoklimji akrong along kengpak chibidunji thekpo. Jongsi nang le ahokpet Arnam pen kapachoklimji lapen Arnam akar’idam ateng klemji ninghang dolo, tangte nang kadokave Arnam asai an kekroipet nangpo, ethenat tame patepekpepin pen, Arnam asai aphan kangsir-kangchapji lapen kangsaidunji pu mathadamdepin pen si nangpo. Laheihui doan ke masapsap akenanglo Arnam pen kepachoklimji along. Komatmatma Arnam pen kechoklim kelongji kiri atum akenangsot ason anke lahenlo: Kadokave ahormu along pima Arnam aphan kanghon aning si cheparjan nangji. Kopi aphan si tangte pima Arnam aphan kanghon aning si cheparjan nangji pu kipudam? Lake pima kadokave nang keklem amo lapen aot-adur Arnam angno chepachinidak unpo. Lapen athema nang ke akechokpet kamathadam si dolo, nang keklem amo doan le chok mate chokche pu sitame, nang ke lahei doan Arnam aphan mate nang kortemar pen ingjirmar aphan kachepaklangji phererelo, lapen nang Arnam angno seme kedengji anta haipo. Nang asontin ningkehang, kamathadam, lapen bidi antame Arnam angno athe Alangli kangsirji aphan chepachinidak nangpo; jongsi nang klem-damlo lapen lason ateng si lutlo, tangte nang chethe along kachingthur ke pajoike penlo.

Nang Arnam aphan kroi tangdetlo apot, nang kadokave Arnam alamthe along an lapen kadokave Alangli sai along an kachikidam akekroi dovek nangpo. Lake pudamlo te, nang Arnam aphan kroi tangdetlo apot, nang Alangliphan patepekpeveklo. Jongsi nang le lason klem thekthedetlo, tangte lake nang Arnam aphan kroi mate kroikre pu tame langdamdelo. Jongsi nang le Arnam aphan penang an aningkan pen kroithiplo, lapen tebonta Alangli lam ateng arjujedetlo, lapen Alangli lamthe angton pen dengdundedetlo, lapen alar ke arjulo pima Arnam si nanglong chehodai nangji lapen nang kamunthidamthap ateng si klempon nangji pulo, tangte nang ke kadokave pen kachedandongnei abanglo, nang ke kekroikredetlang abanglo. Kosonsi lason amonit atum le Arnam asai lapen alam ateng kekroidunpo pima monit akamunthidam alam ateng pen chetontedetlo? Komatmatma kachedandonghai doan ongdung atum anke Arnam aphan chinilor si patepeklo lapen khanglo. Latum doan ke Arnam ahotur saidelo, Khristo aphan kekroikre atumlo. Alangtum along ke kaiketa akimi Arnam asai along kachedandunji aningkematha si doverlo; latum ke masapsonat tame kachehodaidetji pu kachisik avedetlo, mate latum ke ningarongchen pen chehodaidet mate amethang aphan chepabihek pu avedet chenamlo. Latum ke amethang aphan si bang angno anong chepathelo lapen madu along ta chehodaidedetlo. Arnam aphrang, latum ke amethang aphan si birta keme alam kethan kemeneilo pu chekamlo, lapen bang along keklempon akechokneilo pulo. Latum ke alangtum akun along “kabirti acho” chehekhelo, bonta lahei aphan ke athe hemtun along phisar-phusar pen karchover ason pulo, athe bang aphan birta keme kethan’iji, lapen komatmatma latum aphan kardomrip kiludet atum aphan kethan si latum klem’ilo. Chenam-chenum si ajahak penang amonit atum ke lason si kardomhem along ningkehang dolo. Lake ningjeme pima latum doan ke “keremredet anokbe” atum saidelo, ove aphi ove tame Arnam ahem along si dobomlo. Latum ke laso alam (kekroi’iji aron alam) kethan si alangtum kangtuinei adenglo pusi pubomlo. Ningkan aphi ningkan, ove aphi ove, latum ke alangtum “kangthirjir dhorom alam lapen kapatepek un’edet” adeng si jakong pen tame pachethangponbomlo. Inutnat tame latum aphan papho haihedetlo; inutbak amonit tame latum aphan cheklangsak pen chedondunde pu abang avedetlo. Latum ke Arnam ahemtun along “recho” si chemanlo, akai pen akai anta latum bang aphan chekhangkhepin pen chepahemphupon cheneklo. Laso adilung ahi-isarpo atum chelang rappetji si rilo lapen Ne sai phangnodunji pulo; kosonsi Ne laheihui kereng ahi-isarpo atum aphan Ne mek angdeng kapadoji kelongpo? Komatmatma ebeng ansi athikpetchot pu atum anta kijut ahut an dambom un’edetji, laheihui alangtum aning arlo masapsonat ta athikpet aot kavedet chepahemphupon kachenek atum un’e muchotjilang! Arnam asai ke monit atum lapuan kelong kejoi aretji kali. Latum along ajakong doan che’enthei pu sitame, monit atum ke masapso anchot si longdun unji, kepadusi ke latum aphan kapachoklimji si peklo. Kopilo, tangte, tekela akehoi asomar atum anke, komatma Arnam asai kaphangnodunji si kiri atum an? Latum ke tangte Arnam pen kechoklimji aphan ningkethe avepinlo kalima? Ne kachepahaiji pu keklem asai akemangdam ke salajong chepahaidet si chepahemphuji pu ajoine kali, bonta kangthirpet lapen kangthirthedet atum aphan chepahemphu si kapangdakji aphan, monit aphan ado kipiponji angthek kelong’iji aphan, kahenodak atum aphan kapinremji, lapen, anpartame, komatmatma kekroi pen kapatepekpedet atum aphan chepahemphu si kapachoklimji pu ajoinelo. Mo kijut ahut ke, kadokave ta amethang keme-kaheno ateng si pachethakreppo, lapen komatma kechoklim atum doan ke komatmatma kamathadam alam lapen bidi doan ta athikpet saidelo atumlo. Laso asai henlo pima kepadusi ke kapachunponji. Komatmatma asontin keklem amo ta chedandong, lasonsi, ado pivekpo lapen me akar along si toiplotpo, kai apar kai ahirjuno ahormulo. Laso apor nangle lote, komatmatma kedamtang akai “thedung lapen keremredet anokbe” atum doan ke kememenei lapen ke “keboidet lapen ale kavedet kiluneinei” bang ke’otang atumlo. Laso alam asontin ahin pen kapachinidak kethekji ke Arnam akangthirpet pen anchotji, lapen Alangli kun ke pima monit aphan pasungdet lapu kali, lapen Ne ning arlo akelangselet laso pen anchot si ningpangsampo. Tangte nangtum pima lake angton pen kroimeme alamlo pu chedondelangma?

Komatmatma Karjong Kangthir asai kadokave ta chomat long’etlo, mate laso aroi along komatmatma dolo pu atum, chethe longdunde. Chethe ke kadokave monit akhei atum kachirimvet kachepachoi rappet akhi kalidet, lapen akun along kachelar puke kadokave amonit atum kelong kejoike kali. Arnam asai along kachehodaidun puke ahokpet lapen choklim nangji, lapen laso ateng si rengdun nangji. Chobeibei kachehodai jongjong pen ke Arnam akero longle, lapen Arnam alam aphuthak chobeibei si thangbakbe kekroidun puke, Arnam aning aphan kalilo. Arnam aphan atikpet pen lapen Arnam asai along kachehodaidun puke chingbarpet isinatlo. Komatmatma Arnam aphan ansi chipidetchot bonta Alangli sai along ke kalidet, komatmatma ahokpet chehodaide bonta athak kacheklang ke athikpet si kopine ale kelong’iji atum anke athikpet binonglo pu hok un’edetji. Komatmatma Arnam aphan ahokpet chehodaidet atum anke kadokave ta asai along pen ale longji lapen Arnam asai lapen akun aphuthak kachinidam longji. Lason amonit atum doan ke akimi gian longdun unpo, lapen akimi akachelar tame dopo, akimi asai along pen. Laheihui amonit atum anchot si Arnam ahin pen choroji, laheihui amonit atum aphan ansi pachoklimji, lapen laheihui amonit atum anchot henlo akun kachelartang pulo. Komatmatma Arnam le kachoro atum doan ke komatmatma Arnam aphan ningarongchen pen chehodaidet atumlo, lapen Alangli lamthe lapen asai along. Lason amonit atum anchot si akechoklo, lason amonit atum anchot si Arnam kenglep pen akenangji, lapen Arnam arsikjik pen rilo. Lasonsi komatmatma alangtum Arnam aphan akekroi alangtum angho pen kaningjechot atum anke, bonta Alangli chenam si hirjuno pilo, latum doan ke amethang aphan amahang chekuphetlo, komatma abi kedo aphirui atum saidelo; latum doan ke kadokave pen kahenonei atumlo. Keprap mate keder tame, laheihui amo kevangve atum kahenodak amahang kachekup ape alangtum along pen hekjokpo. Lake pima pini arni asai keklem kalilangma? Kahenodak amonit atum ke kaiketa tame honoverpo, lapen ado kipi pen ke chenam si chepajok un’eveklo. Mesen amonit atum ke kaiketa mesenverpo, lapen ke Arnam sai kepajut nangle lote nong’e longdunpo. Kaheno atum inutnat aphan tame kangthirpet binonglo pu hok un’edetji, mate kangthirpet atum inutnat aphan tame kahenodak pu hokhedetji. Ne tangte madu amonit aphan ta ahokhedet kapinrem along parjapji puhe?

Nang chethe kachingthurbom along, nang kaiketa akimi kilutdun lapen akimi, akangtui kachinidamthek, athe ke akengkamtin along karnukkrung kelongpon dovek nangji. Lahenlo kopima kadokave monit akhei atum kilutdunvek nangji. Kachingki-chethan seroi, lam kethan karjudun, Arnam alam kaporhidam, mate ajahak alam aphuthak langcharidun pen ajok si, nang akimi kachinidamthek lapen akimi akatheang longdunpo, lapen ke aban aron lapen aban apor angkang along ke dodedetpo; nang kaiketa akimi atur along si dodunpo, lapen Arnam alam pen angtan ke dodedetpo. Lahenlo kopima akechok akrong along kengkam kachejordun pu kipudam. Thangbakbe angdeng an kepale pen anam kachipi puke ale vaedetpo; arnivang, Arnam alamthe ke akangtui adim an lutdambomlo, lapen akimi ahormu arnivang si klangbom, lapen monit ke, lasonsi, arnivang ta akimi kilutdun nangvekpo. Arnam ningjelo, lasi Alangli kadokave pima Alangli kaningjetang doan apot ale kedo paplangpo, lapen jongsi nang le pachetondun thekthedet, tangte nang ke aphi anat klovekpo. Nang kardom along nang akarsik an dam nangji; Arnam alam kecho lapen kejun along ke padakjaijai ke chokche. Nang kelong akatheang lapen adak-atur cheparnukkrungnon, lapen nang kamunthidamthap lapen kahemandam alam anke pajo pen avebompo. Nang kangsaidamthek aboi nang chepangtangkringvek nangpo, lapen ajat le nang chetongpon, nang mena kamathathek aphuthak lapen nang mena kachinidamthek ason dovek nangpo. Karjong along nang ajahak alam kachinidam pen, nang athak ahormu alam aklong’et chinidamvek nangpo lapen ajat aphuthak tame aklongsi pen si otdun nangpo. Jongsi nang le laheihui ason pen chepa’okthip kalidet, kosonsi nang mondoli aphan kachejapon kethekpo? Jongsi nang ke ahi pen ketok lapen kekroidam nangji aron alam thangnat ahok kavedet lapen asai ateng pen akeklem kavepin apot ansi ningje thekchotlo, kithihek apor aphan anchot si nang lahei kelong an apot longponchotpo. Lake akimi kekroi atum aphan kethanpon ahut ke masapso ansi dengdunji meme, bonta apor dambom aphi, la akimi kekroidun atum ajahak ahokpet chomatdam longlo te, nang ke latum aphan anpar padordun thekthedetpo. Tangte kosonsi nang le Arnam asai aphan athengpo? Akimi akatheang avepin pen, nang ke klem un’e. Komatmatma akimi akatheang kavepin pen atum anke komatmatma kosonsi kacharlilongjima pu kachininedet atum saidelo, lapen lason amonit atum ke akimi gian lapen akimi kacharliji aphan longdundelo. Lapen, chethe kapador along alam aphuthak, latum ke alangtum asai angdeng cheklem thekthelo, mate latum ke Arnam asai aphan atheng ta kalilo. Lason amonit atum anke thangnat ale ta ave’ilo, kekoitang asonlo. Ahokpet ke, lason amonit atum anke alangtum asai angdeng kacheklemponji angton pen un’elo, latum doan ke thangnat aphan ta ale avelo. Latum ke alangtum asai ateng kacheklemji le un’edetchot kali, bonta latum ke mondoli along akenangnene ajakong ansose kibidunthaplo. Ne choningrilo laheihui “aban kivirrangrang amonit atum” mondoli along pen paprapjin ra kache’odetji aphan, laso pen ajok anpar ke nangphan akaprek atum kelang jokplotji aphanlo. Lason amonit atum ke akimi asai aphuthak jat ta chinidundelo lapen ke jutjedet kamunthidamthap alam si plengsetlo. Latum ke ajat pu tame mondoli along asai akenang avelo; bontame, latum ke chelottotpo lapen nahok tame keheno si pachethangpo, anpartame mondoli along puan si angton pen akechokchedet asai klemdunpo lapen pasiksakdunpo, laso pen ajok komatmat ma kethakdunvet thekthedet atum doan aphan pamanghupo lapen paterbunglo. Laheihui kereng’ak ahi-isarpo atum, laheihui hi-i akarjong atum anke mondoli along pen prapjin si cheterek nangpo, nang joine pen ajok mondoli ke kalite ruhup si chemanpo. Pini arni asai nang ke phereredet tahai meme, bonta penap arni ahut kangthirpet ado kipi kephoji aphan nang pherereloma? Mondoli along ongdung amonit atum ke komatma bang along pen ale kacho’edunlok atum dopik, lapen ongdung amonit atum ke pima Arnam kemesen asai keklem along kapasiksakdun asirung atum do’o. Laheihui asonson doan ke kadokave Sobar arecho nangketoi ahi-isarpo saidelo, kachininedet abiresak aso atum aphan kecheodetji pu kiri kahenodak asirunglo. Jongsi laheihui amonit atum aphan le padarchorchedet, latum ke mondoli along bang ajoine pen kerengdun api, dan doan kechothei angki heihui si chemanpo. Keprap kalite keder tame, mo arnisi nangleji laheihui kelangseletmeme, kiluvok, kangthirjirjedet, lapen amo kevangvedet angthan anke ado kipi phovekpo!