Khristo Arat Kepangri Alongri Akai ke Lamm Akai Henlo

Khristo Recho Arat Akai along, Arnam akimi akai along keponji aphan lammthe si enlo, Alangli keklem asai abidi kachelarponji aphan, lapen angton akai tame sai keklemponji aphan. Lamm Akai along Arnam sai keklempon akekroidam kachepathik ke lahenlo. Alangli ok chemandet si akaprek ahin anatthu pen lamm nangningjelo, laso pen ajok monit atum Arnam aphan ahokpet pen thek’longpo, atheke komat si ok along Lamm nangkacheklangbom loma, lapen Alangli kethek-kere lapen manghumeme ason tame thekl’ongpo. Lason asai keklem ke monit aphan kachepahai ponji pu akemang kichunpon pemeji aphanlo, monit aphan kapachoklim, lapen monit aphan kapavir antalo, athe ke lahenlo Lamm Akai ahut sai keklempon ahokpet lammthe ke’enpo ajor binonglo. Laheihui alamm pen ajok si, monit atum Arnam asai chinidunpo, Arnam akun, monit akedoivet ason, lapen kopima monit kilutdun nangjivek alamm antalo. Lammthe heihui pen ajok si, Lamm Akai ahut Arnam aningkehangdam ateng keklemji pu asai angton pen ale kedo pemepo. Laheihui alammthe pen, monit atum aphan chinidakpo, pavirpo, lapen asat langpo. Monit atum ke Arnam alammthe thek’longlo, laheihui alammthe arjulonglo, lapen laheihui alamthe kedobom pangthek longlo. Laso pen angthek, latum ke Arnam kedover alamm aphan kekroidun longlo, jakong kedopik lapen Arnam akethek-kere along, lasonthot si Arnam akanghon monit aphan lapen Alangli monit aphan kapajokji pu akar’idam along. Laso alamm “lammthe” ke pajoike lapen thangta kalidet ason tahai, bonta Arnam ok kachepharlotang abang angho pen nangkebar alammthe ke somindar paklemhurji, lahei ke monit aning larphun unlo, alangtum kamunthidamthap alamm lapen aban akun an larphun unlo, lapen pirthe kosonsi kacheklangvek nangji ateng si palarphun unlo. Ove ove pen sitame, lapuson ateng pen ke pini arni a’Arnam si klemchotlang, lapen Alangli lasonsi ningjelo lapen laso ateng si monit aphan kapajokji vanglo. Laso apor pen aphi anke, monit akai ke Arnam alammthe akachejapon arum si dolo, vipon pemelo lapen Alangli lammthe pen si padorlo. Monit atum ke Arnam alammthe apirthe along si dodunlo, hirjuno lapen Arnam alammthe ahirjume angbong antame, lapen ansose ongdung amonit atum komatma Alangli lammthe akangsaipon lapen ado kipi arum si kedobomlang atum dopiklang. Laheihui alammthe lapen laso asai anke kadokave ta monit kejok kelongji aphan ajoinelo, Arnam akar’idam kapaplengji pu aphanveklo, lapen hako pirthe kapinchong ahut atengthot arje abinong’et kapachelarthuji aphanlo. Arnam pirthe kapinchong ke lammthe pen si enlo, Alangli monit atum aphan somindar adang kejapon ta lammthe penlo, lapen Alangli latum aphan chepahemphu lapen kepajok sitame lammthe si enponlo. Kapadusi, Alangli angton laso apirthe aban kapajutkokji tame lammthe pen si enponvekpo, laso pen Alangli kisik-kedang kemangdam angton pen patangponpo. Khristo Arat Kepangri Alongri Akai angton pen, Arnam ke Alangli sai keklemji aphan lammthe si enlo, lapen Alangli sai angthek tame chepalongji aphanlo. Alangli kethedung lapen manghumeme asai klemklelo, bonta Alangli sai ke lammthe jongjong pen si klemponlo. Athema laheihui alammthe pen, monit ke chingthur’ipo lapen dorlimpo, lapen gian longpo lapen choklim chomatlongpo. Lamm Akai ahut, monit ke chenam si hirjume longdun pemelo. Alang aok abang keso longlepinlo lapen Arnam alammthe pen kepador ake’ongpi si ningcheparong longbomlo; aphrang anatthu kedam nangji mate kiridamthuji akenang avepinlo, sungsepin pen alang dolonglo, alang Arnam kacheklang thekdun longlo, Alangli Mena angho pen lamm kaningje arjudun longlo, pima Alangli kepador do’an, lapen Alangliphan salajong Alangli sai keklem langdunlo. Laheihui do’an ke pima kedamtang akai ahut monit atum kachehokdam longledet apot saidelo, lapen latum do’an pima kelong un’edetji ahirjume saidelo.

Arnam ke monit aphan kapachoklimji pu chepathik’etlo, lapen Alangli ajat ahin anatthu pen le ningjedam puvoiphit tame, lake kadokave monit atum aphan kapachoklimji pu ajoinelo. Karjong ahin anatthu pen kaningjepon alam doan ke monit atum kachinidamji sungkrunglo; latum keklem-kedamji aphan atovar kiri abidi longledetlo, athe alangtum kethek kachiniji aphan ke chedorchit anchot. Arnam asai angthek kelongdam ke prekjam, lapen asontin asai angdeng Alangli athe kedo pen si Alangli klemponlo. Anpartame, lake prekjam ahin anatthu pen si Alangli kaningjedam sitame pima akenangsotlo, athe lason keklem pen ajok si Alangli monit aphan pachoklim unpo. Jongsi Alangli le Karjong ahin anatthu pen kaningje ase kachepado aphanchotlo pu asonte, Arnam asai laso angdeng kapaplengdetji atovar si avedetpo apotlo. Alangli ajat tame kaningjedam ate’ot along pen, nang theklongji Alangli ke bangso amonit adilung aphan kapachoklimji si chisik pemelo. Lasi kopilo kechengsi akengkam ke komatmatma kechoklimji aningkehang anuttin atum aphan? Kadokave anpar, nang Arnam asai chinivek nangjilang, Pini arni, Arnam asai along akimi adichi chengpon tanglo; laso akai ke kachelar dotanglo, Arnam keklempon akrong tame nangchelar do’etlo, lapen Arnam kaningjedam adichi sitame cheprek tanglo. Pini arni, Alangli sai adichi anchot le kachelar kedo kalilo, bonta laso akai sitame chelar tanglo. Nonke Khristo Arat Kepangri Alongri Akai. Lake kangjinsothek Arnam akai chenamlo. Lake Kai Suri Khristo Arat Kepangri Alongri Akai kevangji aphan kethanmeklo – lake lasonsi Lam Akai antalo, lapen atheke monit aphan kapachoklimji pu Arnam penang abidi pen kaningjepon dolo, lapen monit aphan kapadorji pu prekjam ahin anatthu pen ningjelo. Kaisuri Khristo Arat Kepangri Alongri Akai kilutdun pen, Arnam ke monit aphan kapachoklimji pura lamthe ke’en pangchengpo, chethe ahokpet along monit aphan palutdun longpo lapen kechoklim akrong si alangphan chejadunpo. Arnam asai penang an angdeng chetonglong tangdet pen, monit ke theklonglo pima Arnam asai ke kachelarlepin si dolo, bonta pajo pen chingthurbom lapen parnukbom tame chingtonte. Monit atum arjidingklui pen athe chomatlongdet pen aphi, chirui lemdet pen asai ke klembomlo, puthot nangchelarthubom si dolo. Tebontame koanma akachelar, puvoiphit sita, Arnam akemangdam monit akhei aphan kepajokji puke chelarledetlo. Phong suri kep anle kachelar dolo pu sitame, lake abinong’et akemangdam pen angtan ke dodetlo. Arnam keklem sai adichi kacheprek kosonma dolo puvoiphit tame, laso asai ke ahok lapen chethe pen chekakdundelo. Keklem abidi along kachelar pen asai kepachunpon puke hala sai keklem ahut aron si kachelar kedochot, lapen Arnam kaningjedam ahin akacheprekdam apot; Arnam sai atiri akemangdam along le kachelar kedo kalidet. Arnam ase ate’ot along lapen Alangli sai kapinchong adichi kachelar ke kelong angthek kedo’iji aphan ajoinelo. Asee ate’ot along kachelar kedo pu kipudam ke sai keklem akemangdam mate akekroidam keklemji pu akachelar kedo kalidet. Monit atum jasemetpet ke chethe kiridamji si Arnam aphan kroilo; jongsi nang Arnam aphan kroilo tebonta chethe aphan mate ahok aphan mate Arnam aphuthak kachiniji riredetlo, tangte lake Arnam aphan kekroi lapu kali! Lapen lake tangte kekroi arat kepangri alongri kilutdun pen recho kachemanji pu akiri ahokpetlangma? Arnam aphan ahokpet kanghon chethe kiridun pen ajok kelongdam puke – la anchot si ahokpetlo; kiridam kekhan lapen ahok ateng keklem – laheihui henlo kadokave ahokpetlo. Arnam alam kaporhi, lapen laheihui alam kachepathekpet, nang ke Arnam aphuthak akechok kechomatlong angbong pen kachiniji longpo, lapen lahenlo kopima ahokpet kiridunlo pu kipudam.

Nonke Khristo Arat Kepangri Alongri Akai pulo. Nang le laso akimi akai along kilutdun pu kipudam ke nang Arnam alamthe ahokpet along lutdun tanglo pu ateng sitame, mate Alangli lamthe ke nang chethe ahokpet cheman tanglo pu tamelo. Arnam alam ke anuttin abangphu aphan sitame pachinilongpetlo pima laso pen ajok, mo kijut ahut ke, kadokave amonit tame Arnam alamthe apirthe along si dodun longpo, lapen Alangli lamthe ke abangphutin amonit aphan tame aklong’et pen patheangpo lapen adak-atur dopo. JOngsi, laso apor ahut le, nang ke Arnam alamthe kaporhiji mathakranglo, lapen Alangli lamthe along thangnat ninghanghedetlo, tangte laso kacheklang ke pima nang kedobom ke chokchelang. Jongsi nang le Lam Akai alongkilutdun thekthedetlo, tangte nanglong Karjong Kangthir sai klemkledetlo; jongsi nang le laso akai along lutdun etlo, Alangli sai Alangli cheklempo. Lam Akai ahut Karjong Kangthir asai kelongdun thekji aphan nang kopilo keklem paphrang nangji? Laso akai along, lapen nangtum angbong, Arnam ke lahei ahok alam pachunvekpo: pima anuttin abangphu ta Arnam alam pen si rengdunpo, ahok ke asai ateng pen pacheman thekpo, lapen Arnam aphan kar’ipik pen chinghonpo; pima kadokave amonit tame Arnam alam ke kecheng anujok lapen alangtum ahok pemanpo, lapen Arnam aphan man-peng kipi aning si dopo; lapen pima, Arnam alam kacharlipon pen ajok, monit ke tangte Arnam penpen recho ason ajakong otponthip rappet thekpo. Lahenlo Arnam kapaplengponji asailo. Nang Arnam alam porhihepin pen damthekji puhe? Pini arni, penang an atum chematha do komatma latum ke Alangli lamthe porhi longle pulote arnisi mate nini tame dam thekthelo. Latum kearnivang tame Alangli lam porhilong nangpo, lapen jongsi apor le tanglo pute, lahei alam karjulong pen padorphluppo. Laso kachemathadam henlo pima Karjong Kangthir monit aphan kipi, lapen lason akrong pen henlo Alangli latum aphan chejapon. Lake pima, Alangli monit atum aphan charilo alamthe pen, lasi pima latum Arnam alam ahokpet along kilutdun longlo. Jongsi, Arnam alamthe arnisibak chochedet lapen junjedet dolo pulote, nang kangting lapen kangchir si chemathapo, lapen arjap thekthelo, laso kacheklang ke pima nangphan Karjong Kangthir si nangchejaponlo, lapen pima Alangli nanglong pen che’odundelang. Nang ke, tangte, laso aroi along kedodun abanglo. Tebontame, jongsi arnisi mate nini anbak Arnam alam choche lapen junjedetlo, nang thangnat ta chemathathe, jongsi nang le kalang’it ta ave, lapen nangkachejapon ason avedetlo, laso kacheklang ke pima Karjong Kangthir nanglong pen chehelo tanglo. Laso athe ke, tangte, nanglong aklong’et angdeng kopine kechokche dokoklo; nang Lam Akai along lutdundedetlang, lapen nang ke komatma hala kapaphidunhup abang inutlo. Arnam alamthe ke’enpon ke monit atum aphan kachar’iji pulo; nang domesen asonlo jongsi Arnam alam cholo lapen junlo pulote, lapen jongsi nang kalidetlo, nang ke aphiphi kidunji thangnat atovar ta avelo. Arnam alamthe doan ke monit atum kecho a’an chemandetlo, lapen latum aphan pima keklem ajakonglo. Baibel pulo pima “Monit him penlok le kereng’iji kali, bonta Arnam angho pen nangkebar alam athetin pen si reng’iji.” Pini arni, Arnam ke laso asai kapaplengji si vanpo, lapen Alangli nangtum along laso ahok alam ke pachunvekpo. Kosonsi tangte pima kedamtang ahut, monit atum penang an arni Arnam alam porhihepin pen kedo unlo lapen tebonta kai ason thakthak si kecho lapen kijun theklo, bonta lason ke pini arni kalidet? Laso akai along, Arnam alamthe si atiri pemamlo kadokave kechariji aphan. Arnam alam pen ajok si, monit aphan ingsailo lapen pachoklimlo, anke kijutsi ahut ke kepangri alongri along ponlo. Arnam alamthe pen anchot si monit achethe aphan ke padorponlo, lapen Arnam alamthe pen anchot si monit aphan atur pi unlo lapen keklem’iji akrong tame pilo, jasemetpet Khristo Arat Kepangri Alongri Akai along. Koanma arjikiding nang jongsi Arnam alam ahokpet along pen angtan dodedetlo, Alangli lam athetin cholo lapen junlo arnivang, Arnam nangphan kapachoklimji unvekpo.

Chethe kiridun puke kopine pima ketong ason ke chokche; chethe kachingthur puke arnisi mate nini angbong le kemandet lapu kali. Arnam keklem asai ke joike lapen asai ateng penlo, lapen lason along ke pima keklempon angdeng kenangsot dolo. Lake ok kachepharlotang Jisu tame ningkan thomkep ra kethom pen ebeng an Alangli thengparpan athak pran kachipi sai kapaplengpen endetlo – lasi kopu anlo monit aphan kapangthir lapen kapachelarpon alang achethe, laso asai kesungpik dolo? Arnam kacheklangme komatma kemesen amonit kepamanpon ke masap ta kejoike asai amo kali. Lake jongdamvet pen dragon thepo ake’er kedo adet along mahang kethekpon amonit atum along, komatma ajakong keboidet lapen Arnam alam lapen asai keklem arji kidingpik nangji atum along ason. Lasi angthek ketheklongji aphan ke chepaningdingde ke chokchelo. Nang ke Arnam alam kecho lapen kijun along prangsetvek nangpo, lapen Arnam alam along si ansose aboi chitikrup nangpo. Alangli lamthe nang le kaporhi patang longlo te, nang ke lahei choklim asai ateng pen klemthekvek nangpo, gian ahin, kamathakarsik, me-heno kangsai pemethek, lapen Arnam alam along kethek-kere chanbom nangpo. Lason pen ajok si, nang ke chichininepin pen kachelar dopo. Jongsi nang le Arnam alam athetin kecho lapen kijunji pu nang keklem akekroidam chepon theklo, lahei kaporhi pen, latum aphuthak kachinidam, lahei keklemponthek, lapen lahei kacharliponthek lote, nang ke chichininepin pen si kamatha kangtangdam along lepo. Komatmatma pulo pima latum ke Arnam alam asai ateng klempon thekthedetlo lahei porhidet pen aphi sitame pu atum dolo. Kopilo nang aketongdam kedo? Nang le elong angdeng an lelo, nang Alangli lam asai ateng pen klempon ta thekpo. Ningkan phli mate pho arta aoso pima latum ke alangtum api-apo aphan man kipi lapen kacherapdun thekthedetlo pusi ningjepoma? Nang chichinivek nangji kopuan thedung loma nang non kedobom aman adeng. Kopima nang asai ateng keklem thekji apot doan ke asai ateng klemponnon, lapen komatma Arnam kisik-kedang along kapasiksakdun abang ason ke che’onon. Arnam alam chonon lapen junnon, lapen lake nang keklem kekroidamlo non pen ke pule cheponvernon. Ningbi nangne, athe malomso apor ke, nangphan Arnam pachoklim thekjima thekthema puke. Laso kiridam along ke dun nangnelang. Arnam alam le chotha lapen juntha lahei nanglong kosonsi kevang ateng pen, lapen Arnam chenam si nangphan pachoklimvekpo. Tebontame, lake eson kachepathikdam akekroi do nangji athe ke nang Alangli lam athetin cho lapen junvek nangji. Mek kavedet pen ke la klemdetri. Arnam alam kecho lapen kijunpon along, ihin pen ke, lason alamthe le rinon pima nang kachinidamvek nangji – lake pima, kelangdammek pen kacheton heihui an – lapen ihin anatthu abang ke, rinon pima nang choklim asai ateng pen keklemponvek nangji – lake pima, nang kilutdunvek nangji alonglo. Ihin abang ke gian pen si cheraplo lapen ahin kaprek abang ke kilutdun penlo. La sonni tame nang ke’otlonglo – nang le kopima nang kachinivek nangji lapen kopima nang asai ateng keklemvek nangji ke’ot longlo – nang ke Arnam alam athetin kecho lapen kijun kosonma chinipo.

Aphrang kedambom along, Arnam alamthe kachethanpon ke nang kaningjepon kachepathik akekroi akeklem nangpo. Kejoike pen ke, nangtum le kadokave vang rappetlo, nang ke Arnam alamthe aphuthak si chingrum nangpo, nang kachingki-chethan athepi sitame Arnam alam si enpon nangpo, kopima laheihui alamthe nang kachinidam aphuthak kachethanpon, lahei kopusonsi asai ateng nang keklemponji, lapen kosonsi Karjong Kangthir sai keklemlo. Arnam alamthe pen nang koanma arjikiding kachingrum kedo, Karjong Kangthir nangphan katheang adak-atur pipo. Arnam alamthe apirthe kachepalongpon along ke monit akajalangdun rappet dovek nangji. Jongsi nang le laso along lutdundedet pulote, Arnam ke akaprek akrong avedetpo sai keklemji; jongsi nang le ingho chinghipthiplo lapen Alangli lamthe aphuthak ningjejedetlo, ALangli ke nangphan nahok pen tame katheang adak-atur pi thekthedetpo. Nang le lason akaprek ahin nangcheraithipthedetlo pulote, Arnam alam aphuthak le chethannon, lapen apor kapadamthap kachingki-chethan along ke dodunrinon! Nang chethe ke Arnam alam penle paplengset lonang – lason pen anchot si nang ke kekroi thirklong abang chemanpo. Lake jongsi nang kachingrum le kachobeijai ason nangnak pu langdamdelo. Kachinidam ajakong le avete akarnuk tame avelo. Laso along ke keklempon angdeng nangkok. Nang cheseke ponbom pen ajok si, nangphuthak Karjong Kangthir katheang adak-atur nang longdunpo, lapen kosonsi Arnam alam athetin kecho lapen kijunji kemesen pen thekpo. Adak adak apor pen kiridam chepedukdet aphi, nang Arnam alamthe ahokpet along lutdun longpo. Jongsi nang le jalangdun rappetji pu chepathikdet aphi ansi nang ke Karjong Kangthir asai longdun thekji.

Arnam alam athetin kecho lapen kejun pu kachepathik akekroidam along ke, isi ke gian aphan si jongdamlo, lapen akaprek abang ke kilutdun aphan. Koloso alamthe si nang kachinidamlo? Nang la kelangdammek (lason si, koloso akai si Arnam asai non kilutdam pen kacherap kedoloma, kopi si non Arnam kapaplengji ninghang doloma, kopilo ok kachepharlotang puke, lapen dopiklang; laheihui kadokave ke kelangdammek aphan si jongdamlo) pen kacherap alamthe si pima chinidam nangji. Kopilo pima monit kilutdun nangji atovar pu kipudam ke? La kejongdam ke Arnam alamthe pima monit atum keklem lapen kilutdun nangji. La athak sonni akrong henlo Arnam alam kecho lapen kejun kipudam. Non pen anpar ke, Arnam alamthe kecho lapen kejun laso ateng pen le klemnon. Jongsi nang le Alangli lamthe kelangdammek pen kachephodam aphuthak klardak chinidamlo, tangte kai amat apor ke kaporhiverji akenang avelo. Muthe akenangsotnei ke kilutdun ahut aphan lamthe kecho lapen kejun henlo, lason si nang ning kosonsi Arnam ahin cheponji, kosonsi nang ning Arnam angno chepadojoi thekji, lapen kosonsi ok aphan kache’o thekji. Laheihui doan ahormu henlo nang asai ateng keklempon nangji. Arnam alammthetin kecho lapen kejun le chininedet, ahokpet kachingrum ke un’elo. Alangli lamthe nang le kosonsi kecho lapen kejunji thekdetlo tangte, nang le kopisi akenangsotma otthip theklo, kachingrum ke joipikpo, lapen ajat alam le nangklang tame, nang kachingrum lapen ahokpet alam kachiniji thekpo. Jongsi, Arnam alamthe pen kachingrum ahut, nanglong ahokpet avelo, tangte nang ke kopima akenangsot alam longdamdelang, laso kacheklang ke pima nang Arnam alam kosonsi kecho lapen kejun thekthelang. Ajahak amonit atum ke Arnam alam kaporhi kelakdet si longji, atheke la kemesen angdeng kalilo. Kopima kemesen puke Arnam alam kaporhi kaike tame kelak kelongledet henlo, kaiketa lahei aphan kalang’it kedo, lapen kaiketa Arnam alam athetin tame akeme si kiridam henlo. Lason henlo komatma kilutdunlong chenam abang ke Arnam alamthe kecho lapen kejunji. Nang le pima Arnam alamthe doan ke keklem-kedam abatpik anlo lapen ke chenam si kopima monit kilutdun nangji henlo pu chemathadam; nang le chemathalo pima Alangli lamthe doan ke thedung akerap do lapen monit aphan ale dolo, lapen pima lahei doan ke monit achethe aphan ketoi ahukum saidelo – lake Karjong Kangthir si pima laso pachemathatoi nangphan pilo, lapen lake Karjong Kangthir si pima nangphan chejalo. Laso angthek ke pima Karjong Kangthir nanglong sai klembomlo lapen pima nanglong pen Arnam che’odunde pulo. Ajahak amonit atum, theklonglo pima Arnam ke kaiketa ningjekong, Alangli alamthe pen lakdet mantanglo, lapen latum lahei porhi mate porhihe sitame thangnat ta kacheprek avelo pu mathalo – lake pulote kemesen angdeng kalidetlo. Latum ke ahokpet along kilutdunji aphan kalang’it aning ke duredetlo, lapen lason amonit atum ke kalang’it ta avelo mate kechoklimji aphan tame ardi chibibe atumlo. Nang le Arnam alamthe kalang’it avedet pu kachichini arni ahut lote, laso kacheklang ke pima nang kemesen angdeng along le kedo kalidetlo. Kedamtang ahut, Arnam nanglong pen kache’odunlo pu kelangdamji ke nang aklong’et pen ningkangsam doloma avema puji. Non ahut ke nang Arnam alam kalang’it doloma avema, Alangli lamthe doan ke nangphan ahoklo pu kalima kalangma, nang athikpet loma kalilang, lapen nang ke kadokave pima Arnam aphan keklempi unji nang unloma un’e pen henlo. Akaprek alam pen, monit ke Arnam alam ahokpet pen si ingsaidamji. Arnam ke Alangli lamthe pen si kadokave monit akhei aphan chotoilo. Jongsi nang le lahei kaporhiji ninghang do, Alangli nangphan katheang pipo, bonta jongsi nang le ninghanghedet, Alangli nangpipelo. Arnam ke komatmatma kangthirpet aphan si kangchir lapen kang’it kedo atum aphan anke patheanglo, lapen Alangli ke komatmatma Alangliphan kiri atum aphan anke patheanglo. Ajahak pulo pima Arnam ke latum Alangli lam porhi tangdet aphi anta latum aphan patheang’edet. Bonta nang koson ahin pen si laheihui alam kaporhidamlo? Jongsi nang le Alangli lamthe kaporhidam ke monit losei athak kardon ra mir kiridam pu ateng, lapen ahokpet along ke ardi pipedet pulote, kosonsi nangphan Arnam akapatheangpo? Kosonsi komatma Arnam alamthe acho kabirtitedet abang aphan le Alangli kapachoklim thekpo? Jongsi nang le Arnam alamthe acho birtitedetlo, tangte nang ke ahok mate laso ateng kacheklang tame avelo. Jongsi nang le Alangli lamthe birti pemelo, tangte nang ke ahok ateng pen si keklem-kedam thekpo, lapen lason pen anchot si nang laso ahokpet cheparideng longpo. Laso apot si nang ajat apor sitame Arnam alamthe cho lapen jun nangvekji pu kipudam, nang le sai chingkhan-chingkhankhe tame, kesung kepho sungpiklo mate sungsedet ahut tame, lapen nang le chepeduk-chepedukde ahut tame. Ajat ahut tame, Arnam alamthe ke monit kerengdun aphan kecheng anujokpi saidelo. Alangli lamthe pen inutnat tame chepahelo un’edetji, bonta latum le arnisi angbong batai kethom kecho-kejun ason si Alangli lamthe chovek nangji. Arnam pima nangphan kapachoklim lapen kelongdunji puke lapuan akejoikeji puhe? Nang non ahut chiniloma chininelangma, lapen nang Arnam asai aklong’et alam chiniloma chininelangma, nang Arnam alam ke un’an thek’an pen si cho lapen junvek nangpo. Lake apor ahut ateng pen kilutdunthek pu akronglo. Arnam alam porhidet pen aphi, kopima nang kilutdun unji along asai ateng keklem le paprapnon, lapen kopima nang keklem un’edet doan ke nonmat angtan bikoknon. Penang an Arnam alamthe pima kecheng ahut ke nang kachinidamdedetji ason dokok tahailo, bonta chiklo jonni mate jonthom aphi anlote, chenam ta ningkan isi anbak aphi, nang chinipo. Kosonlo la cheplangpo? Lake athema Arnam monit atum aphan arnisi mate nini angbong pen ke pachoklimledetji. Akeongpi apor ke, nang le Alangli lam kaporhi ahut, nang menmen amat chinidamdedet tahailo. Halaso apor ahut, lahei ke ketokchot alam saide anchotlo pusi jongdam tahailo; lahei nang chinidamde aphrang apor pen si lahei nang chomatdamvek nangpo. Arnam ke ongdung alam ningje’etlo, nang Alangli lamthe kecho lapen kejunji aphan nang chepedukkrup nangpo, lapen tangte, nang chemathathepin pen si, nang ke lahei chinidam unpo, lapen chichininepin pen si, Karjong Kangthir nangphan patheangpo. Karjong Kangthir le monit aphan kapatheanglo pute, lake monit atum methang chichininepin pen ahutji. Alangli nang kalang’it lapen kiri ahut si nangphan patheang lapen chejadunlo. Karjong Kangthir keklempon kekroidam chepathik ke pima nang Arnam alam kecho lapen kejun angkang angbong pen henlo. Kadokave komatmatma Arnam alamthe aphan ardi kipipe lapen ke kaiketa Alangli lamthe aphan kamunthidamthap kacheprek dover atum anke – kekroi, alangtum kamathadam along klardak kalilo, lake latum Alangli lam porhi porhihe tame kacheprekdam alam avelo – latum doan ke ahokpet kacheparidengdun longledetji atumlo. Karjong Kangthir asai mate Alangli adak-atur kapatheang tame lason abangphu along ke theklonglelo. Lason amonit atum doan ke aboi avepin pen kedamthap, ahokpet atheng ki’undun avepin pen kachekrongchot, tomo alamlir along Nangua pu amonit asonlo.^[a]

Nang ahokpet along Arnam alamthe ave pulote, nanglong ke choklim angdeng avelang. Kachepedukji apor nangkele ahut lote, nang ke chenam-chenum si klovekpo, lapen anke nang ahok angdeng ke cheklangdakpo. Bonta komatmatma ahok along kilutdunji pu kiri lemdet atum doan ke, asat le dothip pu sitame, Arnam asai akemang aphuthak chinidampo. Komatma keme-kaheno kangsaithek, lapen komatma Arnam aphan kalang’it kedo abang, Arnam aphan Alangli akanghon apot asai ateng pen klempi nangpo. Komatmatma ahok cheparideng longledet atum anke masapsonat alam le chetong tame karjap pathir thekthedetji. Lason henlo komatmatma ahok angdeng lapen komatmatma kavedet atum angbong akacheprek. Kopi potlo lason, latum banghini ta Arnam alam cholo lapen junlo puvoiphit tame, ajahak atum ke karjap pathir theklo asat angbong tame, tebonta akaprek atum ke katlo? Chenam-chenum akacheprek ke pima ajahak atum ahok angdeng duredetlo; latum along ke alangtum ahok kachepaklangji aphan Arnam alamthe avedetlo, lapen latum aklong’et along Alangli lamthe aphan angkur pemanmedetlo. Latum le chepedukpo pu ahut lote, latum ke alangtum kijut akrong si lerong titilo. Kopi apotlo, tangte, pima akaprek atum ke laso alam along karjap pathir thekdet? Lake athema latum ke thedung kelangdammek dolo, mate, latum along amat, Arnam alamthe ke alangtum kachetongponlong chemandunlo, lapen alangtum asai ateng keklempon akarsikjik ke alangtum kereng kecheng anujok chemanlo. Lason pen si, latum doan ke asat anglum tame karjap pathir theklo. Lahenlo ahokpet angdeng, lapen lake, chethe pulo. Ajahak atum Arnam alam porhi tahailo meme, bonta la asai ateng klem-damdedetlo, lahei aphuthak parsikjik pen en’edetlo, komatmatma lahei alam arsikjik pen enponpe atum anke asai ateng keklemji tame ardi pipelo. Komatmatma alangtum ahok kachepaklang along Arnam alamthe kavedet atum anke ahok angdeng ta avelo, lapen lason amonit atum ke sat kelang ahut karjap pathir thekthelo.

Arnam alamthe le aphrang vanglo tangte, nang ke lahei menmen si dengdunphit nangpo, lapen lahei cho lapen jun nangpo. Koanma nang chinidamlo puvoiphit sitame, isi alam ningchibidingver kenangji ke nang paprapjin pen cho lapen jun nangpo, chini nangpo, lapen Alangli lam asai ateng klem nangpo. Lake kopima nang klem unvek nangpo. Koan kethe nang man-peng angdeng cheman puvoiphit sitame; Alangli lamthe kecho lapen kejunji le jasemet mathanon. Lahenlo kopima monit atum kajalangdun nangji. Nang karjong plengchen akai ke jasemet Arnam alam kecho lapen kejun ahok kacheklang along kilutdun henlo lapen lahei asai ateng keklempon. Lake akaprek ahin anatthu kamathadun nangji ke nang sai kalilo. Mondoli keja atum kadokave alangtum kortemar lapen ingjirmar aphan chejapon thek nangji laso pen ajok latum Arnam alam kecho lapen kejun nangji kosonma thekpo. Lake alongtin mondoli keja atum arpu che’enrep nangpo. Latum le ariso mate akesar pu tame, kadokave ta Arnam alam kecho lapen kejun ke thedung ardi kedo akenangsotlo pu hok nangpo lapen ke alangtum aning arlo Alangli lamthe si do nangpo. Laso ahok along kilutdam pu kipudam ke Khristo Arat Kepangri Alongri Akai along kilutdun pulo. Pini arni, ongdung amonit atum chemathalo pima latum Arnam alam choche lapen junje te reng thekthelo, lapen chemathalo pima Alangli lamthe doan ke cham’e ajat apor ahut tame pulo. Laso kipudam ke pima latum doan kechoklim akrong along kengkam kachejordunji kechenglo. Arnam alamthe pen si Alangli sai klem’ilo lapen monit aphan padorlo. Anuttin tame Arnam alam aphan ar’isiplo lapen kalang’it dolo pute, monit akhei ke Alangli lamthe apirthe along lutdun longpo.

Arnam ke thedung aphuthak ningjelo. Koan si nang la kachinidunlo? Koan si nang la kilutdun longlo? Jongsi isi amondoli kejapon abang le alangtum akortemar lapen ingjirmar aphan Arnam alamthe ahok along chejaponpedetlo, tangte latum ke alangtum adeng along kapangkre litpiklo, lapen ke alangtum arpu doan chepachunponji along un’edetlo! Nang Arnam alam athetin kecho lapen kejun along akeongpilo mate athak dampruichotlo, nang kachinidam aphant koanma pu langdamdepin pen, nang Alangli lamthe along thedung apor chipidunvek nangji, lapen kenangsot ardi lapen lahei kecho lapen kejunvek nangji alam chinivek nangpo. Arnam lapuan kaningjetangdet aphi, jongsi nang le Alangli lamthe choche lapen junje lepute, mate kiriji bor’i’edetlo, mate Alangli lamthe asai ateng klemkledetlo, lake Arnam aphan kekroidunlo pu hoknodakji. Nang Arnam aphan kroilo pu tangdet ke, tangte nang Alangli lamthe tame cho lapen junvek nangpo, Alangli lamthe charlivek nangpo, lapen Alangli lamthe pensi reng nangpo. Lason pen anchot si Arnam aphan kekroilo pu pudamji! Jongsi nang ningjelo nang ingho pen nang Arnam aphan kroilo lapen tebonta Alangli lamthe athetin tame asai ateng klem-dam ke thekthedetlo mate laso ahok angthek paklangkledetlo, lake Arnam aphan kekroidunlo pu hoknodakji. Bontame, lake “kangchir chepameji aphan him kachori” pulo. Masapsap hakhi kachipidam kaningje, ale kave ahormu, lapen chobeibei alam aphuthak, ahokpet ke masap ta cheparidengdundedetlo: laheihui pen ke Arnam aphan kekroilo pu kalidetji, lapen nang ke Arnam aphan kekroidunji kechoklim akrong otthip longledetlo. Kopi apot si Arnam alamthe nang un’an thek’an pen kecho lapen kejun nangji pulo? Jongsi nang le Alangli lamthe choche lapen junje bonta sining kidunji aphan ansi richotlo, lake tangte Arnam aphan akekroi puloma? Kopilo kechengsi akengkam komatma Arnam aphan kekoidun abang kachejorpon nangji? Kopi akrong pen si monit aphan Arnam kapachoklimlo? Nang tangte Arnam alam choche lapen junjepin tame kechoklim unjima? Nang tangte Arnam alam avepin pen nang ahok kacheklangji aphan rat kepangri alongri along abanglo pu nanghok unjima? Kopilo chenam ta Arnam aphan kekroi pu kipudam ke? Arnam aphan kekroi atum ke, akijumnei sitame, athak pen aot-adur mesenji; kadokave pen akenangsotnei ke Arnam alam kacheparideng nangji henlo. Kopima ajat alam tame, nang ke Alangli lamthe pen angtan dam un’edetji. Arnam aphan kachini lapen Alangli kar’idam an kapaplengpi puke kadokave Alangli lamthe pen ajok si longpo. Mohut ke, adettin, kekroi asongtin, adhoromtin, lapen asontin ahin along tame Arnam alamthe pen ajok si chepahemphutheipo. Arnam jongdak si ningjepo, lapen kadokave amonit atum alangtum arideng along Arnam alamthe si otpo, lapen laso kipudam ke, monit akhei atum choklimpo. Arlo lapen athak tame, Arnam alamthe si angton pen kedo ingdangtheipo: Monit akhei atum alangtum angho pen Arnam alam si ningjepo, Arnam alamthe ateng pen si asai klempo, lapen aklong’et Arnam alam si chibipo, arlo lapen athak sitame Arnam alamthe pen si plengchen dopo. Lasi monit akhei atum ke choklimpo. Komatmatma Arnam akar’idam kapaplengpi lapen ke Alangliphan hakhi kachechakpithek atum anke, laheihui amonit atum henlo komatma Arnam alam cheparideng alangtum ahokpet along.

Khristo Arat Kepangri Alongri Akai – Kaisuri Khristo Arat Kepangri Alongri Akai along kilutdun puke – pima pini arni kapachunpon asailo. Non pen anpar ke, Arnam alam aphuthak le asai ateng kachingrum along donon. Arnam alam kecho lapen kejun penpen kacharliponbom pen ajok si nang ke Arnam alam ateng rengdun thekpo. Bang aphan kebaiponji pulote nang ajahak asai ateng keklem-kedam chepaklangthek nangkokpo. Jongsi nang le Arnam alamthe ahok ateng pen rengdun thekthedetlo, madu aphan tame nangpakroidun thekthelo! Kadokave komatmatma Arnam ke’enpon atum anke Arnam alamthe ahok ateng pen rengdun thekpo. Jongsi nang le laso ahok ateng paklang thekthe lapen Arnam ahakhi chechak thekthe, laso kacheklang ke pima nanglong Karjong Kangthir sai klemkledetlo, lapen pima nangphan ke pachoklimledetlang. Lahenlo Arnam alamthe ardi akenangsot alam. Nanglong tangte pima Arnam alam aphan kalang’it aning doma? Komatmatma Arnam alamthe aphan kalang’it atum anke ahok aphan si ing’itlo, lapen lason amonit atum anchot si lake Arnam pen ahirjume longji. Mohut ke, penang an alamthe pima Arnam kaningje doji kadokave adhorom lapen kadokave kekroi asong atum aphan. Alangli se nangtum angbong aphrangsi ningjelo lapen thanlo nangtum aphan pachoklim pen Alangli Gentile aso aphan kachepahemphuji pu Alangli se ningjelo lapen thanlo. Alangli lamthe pen ajok, kadokave tame athikdut ingsamjin lapen chekroidun pemepo. Arnam alamthe pen ajok lapen Alangli kepaklangdam pen, monit kahenodak akun avedetpo, alang inut monit arje abang ateng si chelongpo, lapen alang kachedandong akun jumhekpo. Monit aphan lamthe asai vang’ilo Arnam akatheang atur along monit aphan charilo lapen chepahemphulo. LLaso asai pima Arnam nonjong akai ahut keklem, lason thakthak si Alangli sai keklem kachelarpon kedo, kadokave tame Alangli lamthe along si thekdam longpo. Jongsi nang le Alangli lamthe porhihe, nang thangnat ta chinidamdelo. Nang mena Alangli lamthe kecho lapen kejun pen ajok si, lapen nang kortemar lapen ingjirmar atum penpen kachingrum rappet lapen nang kechoklim kachetonglongtang pen ajok, nang ke Arnam alamthe plenglim gian longdunpo. Laso pen ansi nang ke alangtum ahok kacheklang ateng chenam rengdun thekpo.

Kapachini:

a. Abinong’et alamjir along ke “tomo alamlir along” pu alamseng ave.