Anuttin amethang amo kacheklembom aphuthak

Non kedambom akai lake, Arnam aphan kanghon binong atum do-anke Alangli pen pachoklim avarsai keme longji. Alangtumke Ovekimi arta kalite kesar arta atum pusita, aning aklong pen Arnam ahukum aphan kroithip lapen Alangliphan amanpitik’an, latum aphan Alangli pachoklim unji. Monit atum along prekjam amo do laso ateng pensi Arnam pachokpi. Ajak keding nang jakong doan cheharjak si, lapen Arnam asai aphan chepi lote, nangphan Alangli nang pachoklim un. Non amatke nangtum maduta choklim avelang. Ahut penke, nang esonbak amo klembom unji, akaprek apor ahut sonni amo ta nang klem unji. Lasonsi un-an pen Arnam apharman nang methang keklem apor chepadamtik anke, nangliphan Alangli nangpachoklim po.

Ovekimi atum along kerengji aphan kachini ajakong jumhek, lapen alangli tum abidi lapen kamatha parsik ajakong kadure do. Monit atum abidi lapen kamatha kaparsik ajakong kapachoklimji aphansi Arnam ladak kevang. Alangli lamthe pensi latum kachedorde paplengpi. Bonsitame, ovekimi arta amonit atum kamatha lapen a’ot-adur ke thirthe, lasi Arnam pen kepami dovek nangji. Ovekimi arta atum dhorom aphan hung parpe lapen kerengji aphan kachini ajakong sita jumhek, asontin alongta alanglitum kamatha dam panglang-o, lapen alanglitum keklem sitame pharlep-pharlo kali, lahei ke alangtum mesen a’ot kedo amonit ason keman dundelang apotlo, lapen lake choromeme angdeng; bontame, ovekimi atumke mathakrang lapen bidi-sore jumhek. Lahenlosi Arnam along pen kapachoklim nangji akenang dokok. Arnam nangkepachoktang ke nangtum ingsai thek pame thekpo. Ke’ongdung karjong ason sitame klardak pen nang chinidam unpo, lapen Arnam aphan sai ke-enme atheng ahin si pangnopo. Kesar mate arta kedotang akorte lapen ingjir atum alongta keklemji amo do, lapen Arnam alanglitum aphan tekangbupbe. Kesartang akorte lapen ingjir atum along sita, ning kehang lapen ning kehanghe a’ot do. Alanglitum dhorom ahin kehung lapen kerengji aphan kachini ajakong ingcho. Latum akam along, ke’ongdung ason aphrang atengsi matha kroidamthip, aron ateng kedunkriji ning kehang atengsi keklem lapen chelarvoi thekthe. Lake monit atum ning kehanghe asonlo. Bonsitame, lahei kesar akorte lapen ingjir atum ajat pho sitame ning cheberthip pen sido lapen arjapkluk; alanglitum kamatha ajakong lapen a’ot-adur thirthip, lapen latum along sedengkak ason a’ot ave. Latum ason ason kedeng inglen tahai, sita lale kethedung kechokche kali. Nangtum chehodai un lote, Arnam alam nang non dengthek lote lapen Arnam alam kechok kechokche ingkrungkre ra; kachepi lapen aphi kedunji aphansi nang kamatha, lapen Arnam alam phuthak jongdun alam ningjeje kalite kaprek atum lahei alam aphan kaheno kapamathaji aphan phaphe; Alangli lam heihei denglo lapen abe kachepado – lahei do-an asonklem-etlo pulote, nangphan nangpachoklim un.

Ovekimi kalite kesar akorte kalite ingjir pusita, keklemji kamatha amo nang chichini. Ovekimi arta ahut ane chepathethe atum; kesar arta ahut chechaklun thekthe atum, latum kaheno ahin cherui thuthe. Alanglitum ajakong kebop kangthurji aphan lahin lahin jakong cheharjaksi cherap seroi-un, lapen kachelang selet avepin si alanglitum cheraps eroi unpo. Ovekimi lapen kesar akorte lapen ingjir atum adak kajalangthek adondon kimlo, lapen Arnam akanghon pen ajok, nangtum lahin lahin ansose chichini seroi unlo. Ovekimi akorte lapen ingjir atum kesartang akorte lapen ingjir atum aphan langrop detri, lapen kesar akorte lapen ingjir atumke ahokpet pu kachekrongchot atum kali: Tangte lake chedon meme akajelang kali ma? Nangtum doan along lapuson kacherai dolote, nangtum a’ove along Arnam aning kehang amo plengvekpo.

Pini nangtum akam lapen ot-adur atengsi kevangji arni ahirjuno kalite ahirjume sita longpo. Nangliphan jongsi Arnam nang pachoklim nangji pulote, nonsi nang klemvek nangji, laso akai; kevangji arni akaprek avarsai keme vangthuthe lo. Ahokpet pen Arnam nangtum aphan non henlo nang pachoklimji kar-i, lapen lake alamjir a’ot pen kali. Aphrang kevangji ahut, ajat asatle nangphuthak nangklo, kopi angdeng le nangle, kalite kopi akesung le nangchetong tame, nangtum aphan pachoklimji aphansi Arnam kar-i; lake sakhit lapen hili un-epin ahok angthek. La konatsi theklongpo? Hala Arnam alama hokpet angthek alongsi theklongji, kedamtang a’ove ove lapen arta ahut pen sitame pini lapu’an kangtuiving angdeng along kedo ason dolonglepin lang. Kangtuine ialongri alongsi kelut lo, lapen pini monit akhei do’an along Karjong Kangthir kam keklem ke aphrang lapuson avepin lang. Kedamtang a’ove pen lapuson kachetong longtang abang jumheklang; Jisu akai ahut sita, non akai kapeklang mate ketheklong anke avelang. Nangtum athengno si lahei alam kaningje lo, kopi ma nangtum kachinidam, lapen nangtum kephotang anta akimi angdeng si ledamlo. Asat lapen aduk kephobom angbong, rat nangtum damjuije, lahenlo lakha un-epin an Arnam sai keklem plenglim angthek ke. Lake kopine monit atum klem un ason kali, lapen monit atum cheparje dun un-e; athema, lake Arnam amethang asai binong. Ke-ongdung Arnam asai angthek angbong pen, monit aphan Arnam kapachoklimji aning kehang lata thekdam long, lapen Alangli nangtum aphan nang paplengpi unvekji. Jongsi nangtum la kamatha parsikthek, lapen akimi kiri pelongthek lote, Jisu puthot kevangthuji aphan nang chonghong nangnelo; alarke non akai si Arnam plenglim nang kapinchongji aphan nangtum aporchipi po. Lasi, nangtum anuttin ke-un an, palomle pinpen klemnon, lalo tangte nangliphan Arnam nang pachoklimpo.

Nonke, nang kaheno ason aphan ardi pipedet nangji. Aphrangsi ke, nangliphan kaheno pamatha ason anke che-o nangji. Arnam aphan kachepi aning penle, kopine keklembom ahut, kapaphrang aphan kamatha lapen kiri lapuson ning aklong pen klem non. Nang methang along jakong kebop kachetheklong ahut bonta la nang pavidet longri, nang panahok longri, nang kepachunji ning kehang halaso amo lale cheklem non, nang aphrang akeme akeng kamsi kachejor lo. Pangbar alam, kesar akorte lapen ingjir nangtum ke dhorom ahin kehung do, lapen nangtum ardom un, chehodai un, kecho lapen kejun ahut sita Arnam aphan kimo lapen kero alun ta lun… La kepu damjike, nang jakong doan pen ko-an ma nang keklem thek chehodai nangpo, kopi amo si nang keklem pachun unjima klem non. Chonghong lun nangne. Nang arpu kachepachun along Arnam aphan aning kapasang un lahenlo kechengsi akengkam lo. Ephong jongsi ahokpet alam nang chini pame unlo lapen Arnam alam ahok angthek longlo pulote, nangphan Alangli nangpachok ponlim-po.