Mondoli Akai lapen Dobom Akai Aphuthak Kachingvai

Mondoli arlo kedo akai ansi halatum pachekirla unchot pusi monit atum matha. Mondoli akai angbong jongsi dodunlongle pulote, halatum pachekirla un-e, dobom akai along ke kachekirla long un-edetji thak thak. Laso along nangtum akesung theklongma? Dobom akai along Arnam aphan kevan alam neli aphrangta chingvailonglo; Arnam aphan kekroi atum aphan ke, Arnam alam hei hei abinong arlo kelut dunji atovar ke, lahelo. Chenam pulote, mondoli akai ke monit atum aphan kapechoklimji atovar ong-e. Monit atum kapechoklimji aphan kedopaphrang nangji avarsai ke, dobom akai helo. Lahelo ebekachinghoi binong lapen kaseke binong nangji alam neli kaningje ke, la pen ajok monit atum aphan kai’ateng monitakhei akai papelong-un lapen arnivang akai along ahokpet abang arje ason reng unji. Ihi anat pen langdamlote, methang kacharli angdeng kepangtuiji aphan tarlip nangji, Arnam alam chini nangji, lapen kedeng unji abidi longnangji. Ihi anatthu pen langdamlote, monitakhei ason kerengji, akarsik alam kelongji aphan lapen kai’ateng monit akhei kedo athe kapelongjisi, inut abang kedovek nangji akachini pen chesikpeme nangji, pi-apotma lahei hei ason an monit atum along ave. La pen anparta, inut abang mondoli akai along pen Arnam alam chomat long nangji, lapen pejo-pejo pensi ahok alam klardak chini unji.

Arnam aphan kekroi pen ajok, inut abang dobom akai along Arnam aphan van vek nangji pu kopi apotsi kepu? Mondoli akai pen chotle monit aphan kapachekirla thekchot kali; akenangsotnei ke, monit atum chenamsi dobom akai along lutdun nangji. Nangtum akarjong akedo-kopuson lapen karjong akam hei hei alam kaiketa chethan, dobom akai along ebekachinghoi aphan mathakrang, lapen dobom akai along kelutdun ta mathakrang. Nangtum arnivang toklo, arnivang arjulo, lapen arnivang ta porhilo. Tun bom ahut setta nangtum ardomlo: “Oh, Arnam! Ne arlo nang’le, ne chethe plangtha. Pini ke damtanglo setta, nephan hirme nepitha lapen nepachinidaktha. Ajat asonle Nang pini alam nepachinidak settame, non apor ne pachinilongtha, la pen ajok Nang lam hei hei ne chethe plangpo.” Ajo a an kecho ahut ta nang ardomlo: “Oh, Arnam! Labangso a an Nang netum aphan pilo. Netum aphan Nang hirjume nepitha. Amen! Nang penle netum pereng longtha. Netum along Nang dotha. Amen!” Ajo a’An chotangdet aphi lapen kasu-harlung kecham bom ahut, nang pasimu pangchenglo: “Oh, Arnam, ne ke laso a harlunglo. Sobar pensi netum aphan klem-parchotanglo lapen laso a harlung asonsi netum aphan enlo lapen lank pen cham etlo. Nang helo lank, lapen Nang lam hei hei helo kereng’et alank, atheke ne chethe aphan pilo.” Nang chinine aphrang penta, mek kejang apor nangleroklo, lapen nang kapasimu pangchengthu tanglo: “Oh, Arnam! Nang nephan ahirjume pilo lapen nerlosoni nejapontanglo. Ne Nangphan chenamsi choroparpiklo. …” Lason henlo nang arni kapethon, lapen ke nang nangli mek janglotlo. Lasonthotsi penang amonit atum arnivang renglo, lapen non anta kelutdunji binong aphan mathakrang, kardom-dom ahutsi halatum angtur pen akam keklempi matha-ebom. Lake halatum aphrang akailo—halatum akai banlo. Lapen penang atum ke lason henlo; halatum kaseke binong ave, lapen halatum kachekirla binong kachetheklong ong-e. Halatum angtur pen kepi akamsi kardom pen klemchot, halatum amethang alam pensi Arnam adung patebokchot, bonta aklong-kele akachini ke ave. Akejoinei arjan ensinang—nangli hem alon kachepi. Nang chetheklonglo nang hem hijikjam, lasi hadak nang ingnilunsi ardomlo: “Oh, Arnam! Nephan Sobar keklem-pharcho langtha. Lason ahem asonthot ne ke ter-banglo. Oh, Arnam! Nangphan ne ahokpet pen Nang nongpethelo lapen akero pilo. Nang akapejok lapen akapachinidak avete, laso ahok-alam ne longledetji apotlo.” Nang hadak ingnilunra pasimu bomnon, ajirdingklui ardom bomnon, lapen aphike thangta nang thangta cheplangpledet asonle donon, inut kapasimu asarpimar asonle. Lason atovar penle nang karjong akai pedam non, kelutdun binong avepin pen, athak-chot keklem jong jong dopik pen! Kaseke binong along kelutdun ke monit dobom akai pen nangji lapen halatum abechinghoi un-e akesung kepho hei hei pen—halatum kachelarji atovar ke la henlo. Dobom akai pen kalite, monit atum chekirla un-e det. Kardom ahut angtur pen keklempi chot ke kopi ale dolo? Monit aot-adur chininepin pen, asontin ta apor phalangno chot, lapen keklem-kedam nangji atovar avete, asontin ta kabor-i phalangno chotlo! kai-ateng akardom pen monit atum akedo aphan akerap do, bonta halatum lason pen chotke pachekirladet un-e. Monit amethang-adhoromi, ane-kachepethe, kachepindak, kacheparoka hei hei kachini, lapen monit klempharcho a’ot hei hei—lahei hei akachini ke kardom penle kevang kali—lahei hei ketheklong ke Arnam alam kachomatlong pen ajok, lapen lahei hei ke dobom akai along Karjong Kangthir akapachinidak pensi chini-un. Non malom monit atum anutinta lam ningje thekser, lapen halatum ingtuipik akethan arjulonglo—kadokave aove an pen kangtuinei alamta arjudunlonglo—bonsetta dobom akai along keklempon binong ke masapsonat. Lason pulote, halatum dobom akai along ta Arnam ave; chekirladet pen aphi monit kimi akai kedonangji ta halatum along ave. Halatum dobom akai along ahokpet pen kereng kali, dobom akai along le Arnam aphan kevan ta kali. Norokot kedo asomar asonsi halatum renglo. La ke kethekdak akesui kalima?

Kai’ateng abang ason kachelongthuji, atheke, kaiateng amonit-akhei kachelongthuji aphan, monit atum alam tekleng pen pu’amat Arnam aphan aning pedok un-e. Lason keklem pen halatum amethang aphan aduksi chinghoi, lapen halatum akelutdun mate kachekirla aphan thang ale ave. La apotsi, kachekirla kelongji tangte, monit atum masap masap abechinghoi pen nangji. Latum pejo-pejo pensi lutdun nangji, rinangji lapen asap pen asap choridunbom nangji, akemesen anathu pen lutdun nangji, lapen kedobom akai along ahok achethe pen kedo abechinghoi nangji; kangthir-abang akai. Hala pen aphike, dobom ason, dobom akeplang, lapen dobom avarsai hei hei pen monit atum abechinghoi akacheseke long. Monit atum angtur pen keklem asai nangnelo; alar, halatum dobom avarsai hei hei alongsi chesekepo. Halatum dukdet atheng pusi monit atum aphrangsi chechinipo, lapen ke halatum kai ateng Arnam alam chobom junbompo, lapen halatum lutdunpo lapen kai ateng ason klempo; lapen lasonsi halatum prap muchot pen kelutdun cheplangpo. Monit kapachekirlaji aphan, kopine keklembom-un ason donangji; latum ahok ason hei hei, dobom akeplang hei hei, lapen dobom avarsai hei hei pensi klemnangji. Mondoli akai aphan chiki pen mane abang ahok akacheseke long unjima? Lason atovar pen chotsi monit atum dobom-akeplang along lutdun unjima? Un-e! monit atum jongsi dobom akai along lutdun un-e pulote, halatum a’ot barim lapen ason ason keklem atovar hei hei chekirla un-e. Lake monit atum kaselet det apot kali lapen kachikilok apot chot ta kali, bonta lake monit atum kerengiji aboi kavedet apot, lapen, la’anparta, halatum Arnam kedo angdeng kai ateng abang arje-ason pu halatum kachini ave. Kedamtang an, monit atum kaiketa kachingki, kaningje, thanparju—lapen halatum “Ningje-thekser atum” cheplanglo—la’anlo seta, baduta halatum akai kamatha a’ot-adur kachekirlaji aphan riredetlo; alar, halatum kachethang-o akethan hei hei aphansi rironglo. La apotsi, pini arni amonit atum dhorom aron pen Arnam aphan kekroi abang halatum akai along kachelar dovek nangji. Isi akeplang, isi ason, inut abang aphan kamatha-e pensi halatum kelutdun abechinghoi nangji. Matha-e pensi latum klem nangji—la’an aphisi latum athe long-unji. Monit atum kachekirla kepangcheng ke latum a’ot kachelar pen ajok. Monit atum a’ot-adur, halatum akai, lapen halatum akaselet, kachikilok, lapen kedopajoi hei hei aphansi arlen nangji—lason atovar pensi halatum chekirla unchotji.

Penang ason anke mondoli akai pen athe long unji tema, alam akrok binong ke dobom akai pen monit atum aphan pachekirla unnangji. Dobom akai avete monit a’ot barim chekirla un-e. Bisar alam, Kangjinso a’Ove ahut Jisu keklem akam lang sinang. Aron ban an Jisu pevirtanglo lapen akimi aove a hukum hei hei pethirlo, Alangli dobom akai arjan hei hei binong enponsi ningjelo. Jisu Alangli ri’asangho atum aphan Kesang-arni soktepli a hidi ajo kejapon unsi, Alangli risangho atum an ingchirlo lapen sok tepli kechoji aphan abu vaidetlo. Pharisi atum la theklongsi pulo atheke halatum Kesang-arni kroikredetlo. Kesang-arni ke hilik kejangchok a chainong aso ta monit atum pejoklongle pusi halatum lata pulo, Kesang-arni ahut ke ajat akam ta klemlongle pusi pubom. Jisu lahei hei hei akeplang ke’enpon ke akimi a’ove ahukum hei hei pejo pen kapachethang ponji aphanlo. Halabangso ahut, monit atum kachiniunji aphan kerapji lapen kapachekirlaji aphan Alangli ong-o kaiplangbom ason hei hei enponlo. Labangso aron-atang pen henlo Karjong Kangthir asai kacheklem-i, lapen laso atovar anchot henlo monit atum aphan kapachekirla unji. Kaiplangbom ason hei hei avete, monit atum tokjir lapen amethang aning’kere mate aphu’kangcho pen kachini ansi long chot—lake kachekirlaji aphan ale kedo-oji atovar kali. Tangte kosonsi mane abang akethek’kere lapen lam-acho kaseke pen long-unpo? Karju jong jong pen, kaporhi pen, lapen kachini kape’ong pen, monit atum kian lapen lam-acho long unjima? Kosonsi lason plang unji? Dobom akai along monit atum chini nangji lapen chomatlong nangji! Tangte, mane abang cheseke nangji, lapen dobom akai pen katkedet nangji. Prekjam prekjam ahin aphan monit atum matha nangji lapen prekjam prekjam ahin along lutdun nangji: kacharli angdeng, kachethanpemethek, ason ason aphan kelang abidi kedo, Arnam alam kachini unji abidi, monit akhei kethekhur ason lapen aron hei hei, lapen ason kaprek kaprek monit akhei pen kacherap kedo, atheke monit atum pachesik’et si donangji. Kachini dodet pen aphi, monit atum kelutdun aphansi matha-e nangji, lapen laansi kachekirla ke long unji. Mane abang jongsi kachini dotanglo pulote, bonta abechinghoi abang mathakrang lote, kopusonsi kachekirla nang dothekjima? Non ahut, monit atum kachini do’pik, bonta halatum abinong ateng reng thekthedet; laso apotsi, halatum along Arnam alam kachini masapso si dochot. Nang achisosi kachinidak longchot; masapso si Karjong Kangthir akapeklar nang longchotlo, bonsetta nang dobom akai along lutlelang—mate nang kelutji aphan anta bor-i-elang tahai—lasi nang kachekirla ke, ong-e detlo. Lapu’an ajir keding aphi si, monit atum kachini dopiklo. Halatum tokjir alam kachingkiji unpik, bonta halatum angtan kedo ahut akamatha a’ot hei hei ke eboi ateng, lapen halatum hakopen aot-adur eboi ateng dover, asapta paphrangpre pinlo. Lason cheplanglo tangte, kejut komantusi nangtum arlo lutdun poma?

Mondoli akai ke lason akai, atheke, monit atum hadak chingrumsi Arnam alam cholong po, lapen lake inut akai along machiso echet anchot. Monit atum dobom akai ateng jongsi mondoli akai ta lason cheplang pulote—kai’ateng karjong akai jokta, kai’ateng Arnam alam chobom pen, kardom lapen kai’ateng Arnam adung kedo, asontin ta Arnam aningkehang ateng keklem-kedam, lason dobom akai pen kedo, dobom akai pen kedobom asontin ta ahokpet pen keklem-kedam, kardom lapen Arnam angno ingsamri abechinghoi pen dolote, lun kelun lapen kekan abechinghoi bom—anlote lason akai helo atheke halatum aphan Arnam alam akai along van unpo. Penang amonit atum kamatha ke mondoli arlo koansi apor pedamlongloma aphansi matha-e chot, angtan along ko’an apor damloma “mathathe” pin pen, kamatha nangji thangta akenang avedet asonsi dolo. Penang amonit atum ke Arnam alam kechobom lapen kejunbom tiksi kangthir atum akai along lut dunchot, lun kelundun, mate kardom dun, lapen ke hong damlote halatum aphrang asonsi halabangso apor ahut ke chepharlo thudet. Lason akedo ke monit aphan kirla un-e; latum Arnam aphan kachini ave muchotpo. Arnam aphan kekroi ahin ta, jongsi monit atum a’ot barim pen kachekirlaji aning hang pulote, alanglitum dobom akai pen chepaheloledet nangji. Dobom akai along ke, nang methang chechini nangji, methang aphan che-o-bup nangji, ahokpet abechinghoi nangji, lapen ke aron-atang hei hei charli nangji, bang kethek’hur ason mathathek nangji, lapen pejo pen kachekirla longle aphrang, asontin along ta methang-aning kachekhang aron hei hei charli nangji. Nang jongsi tokjir alam akachini aphan matha-e chot lapen non kedobom akai along kamatha parsiksepin pen dhorom ajutang hei hei angbong dodunlote, dobom akai along lutdun de pin pen, nangli, nang methang kaiketa chechini un-elo, ahok aphan, mate Arnam aphan chininelo, lapen nang kaiketa checharchelo lapen kachininedet abang cheplangpo. Arnam monit aphan kapejok akam ke thihek apor dochot aphi non kai’ateng dobom akai ason kedolongverji aphan kali, halatum kechokche akekroi lapen kekroi-alamthe kakirlaji aphanta kali. Alar, Alangli kemang athe ke monit aot barim hei hei kelarji aphan, halatum aban akai atovar an kelar etji aphan, lapen halatum ke-en nodak atovar hei hei akamatha lapen aning arlo akamatha kelarji aphan. Mondoli akai aphan kamatha-e pen ajok monit akai aban asema hei hei chelarle mate halatum ajirdingklui pen kereng-i aban atovar hei hei chelar un-e. Ajat alam setame, monit atum aHok akai pen che-o-edet nangji. Monit atum dobom akai along kai’ateng monit akhei reng nangji pusi Arnam ke nang kehang, mondoli akai along an chot kali; lapen ke halatum dobom akai along adeng hei hei cheklem dun pepleng peme nangji, mondoli akai along anchot kali. Kedobom akai along kelutji pulote, inut abang dobom akai anat asontin ta tevarpon nangji. Jongsi, Arnam aphan kekroibom pen ajok, dobom akai along kelut pen monit atum amethang chechinine pulote, lapen dobom akai along kai’ateng monit akhei reng thekthe pulote, halatum ake-un avedetpo. Arnam aphan kekroikre amonit atum an ke dobom akai along ta lutdun un-e. Halatum monit akhei alam kaningje amonit atumlo, bonta hi-i atum aot pensi kereng pinak. Halatum kadokave ta ahokpet alamsi kaningje atumlo, bonta alar amethang kekroi-alamthe aphan pensi rengchot. Ahokpet aphan pen kereng thekthe atum an Arnam aphan kroitema, bonta Alangli pen halatum aphan aningdokdepik lapen dengde. Nangtum dobom akai along kelut dun abechinghoi nangji, nangtum akedorde alam chechini nangji, kekroithekthe, lapen kachininedet, lapen kai’ateng kalidet monit akhei lapen ake-un-e hei hei chechini nangji. Lason lote, nang akachini ke nang kosonsi kedo lapen nang akesung hei hei pen pacherapdetpo. Lason akachini binong lapen la pen ajok nang methang akedo koson lapen aning kamatha a’ot kachekirla longpo pu nang nep un.

Monit atum aphan kapechoklimji aphan non chenam chengtanglo apotsi, nang dobom akai along lutdun vek nangji. Tangte, kachekirla kelongji ke, nang dobom akai along kelut dun pen pangcheng nangpo, lapen masap masap pen chekirla unpo. Nang jongsi kemesen monit binong achethe aphan o-bup lote lapen karjong ason hei hei alamsi chethan chot pulote, ajat ason ta krengtaipo lapen lerhappo; hala hei abinong-kalidet cheplangpo, lapen lason pulote kopusonsi monit atum chekirla unjima? Non nangliphan aHok achethe along kelutdun pen ebekachinghoiji aphan nang thanlo, lapen ajok dim’aklong pethir pen ahok anat kachinidun pen kelutdunji aphan lo. Lake monit atum keklemvek nangji eson angdenglo. Karjong Kangthir asai binong ke kejapon helo, ason kaprek anke monit atum kacheke pen abekachinghoi lapen kelutdun henlo. Prekjam akrong pen abangphutin ta aHok aKai along lutdun un, lasonsi halatum dobom akai along Arnam aphan van un, lapen aHokpet aMonit binong cheman unpo Lason ajor-kedo akai ke lapu’anchotlo!