Kachinitang aphuthak
Peter kachinitang angbong, pharo asat alangli kephopon do. Non malom monit atum “asat” pu alamthe aphuthak chini pusita, labangso ahokpet ajor lapen kachephodam heihei aphuthak kamanghu dolang. Monit kar-i kemang ason aphan Arnam pejoi dunke, alanglitum kachiki ahin ingsir pidun, lapen asitin ahin sita pachok pidun, lake asat kepho angbong sita pechun ponlo, joijoi pen Karjong Kangthir asai ta lahenlo. Lason benlo je monit aphan Arnam o’tekangbup lo, lapen jongsi alanglitum chere thekthe pulote, lahei doanke Sobar si sat nangkelang lo pusi mathadam. Ahokpetke, keongdung asat ke satkelang lo, lapen lake Arnam sai heihei keklem along kerimpon a’ot lapen aron-atang lo. Jongsi monit atum ahokpet Arnam aphan kekroi pen do pulote, lahai heihei ke Arnam pen asatlo pusi matha dampo, lapen laso along chepangbo dundelo. Komatne jongsi alanglitum along Arnam do, lasi Sobar patebok damde pule ningje pulote, lake chokche pinlo; jongsi lason pulote, Jisu kajejangtang adim ni phlikep An kehum ahut satkelang kephonang alam kosonsi chethandampo? Lasi monit atum jongsi Arnam aphan kosonsi kekroi nangjima pu kachinidam alam chepakeng lote, keongdung ason alanglitum ansose klardak theklongpo, lapen alanglitum kachinidam sitame kekdangde lapen kepachobei kalilo. Jongsi komatne Arnam pen chepachokji aphan ahokpet pen chisik lote, prekjam angden pen kevang ason doan aphan sita arvi kalite ar’e chingbe dunde detsi alanglitum patebok damvek nangji. Arnam asai aphuthak jongsi nang thangta chinine pulote, Arnam pen kosonsi kajalang nangjima nang chinine lo. Arnam kapatirpi asai aphuthak jongsi nang chinine, lapen monit along Sobar sai keklem aphuthak cheroktokte pulote, nang be-chepado move detpo. Kelang un’e lok penke Arnam kar’i ateng nangliphan angthek nangpaplengpi longle. Lapuson kachinitang aphanke hala Lawrence pen chingbarkri lo: kachinitang ason aphan loksi ardi kepi lapen ajat anathuta akemenei ave, Sobar asai kopima, lapen Karjong Kangthir asai kopima, Arnam chedo dundete det amonit kosonpo, lapen Arnam koson amonit aphansi kepachok ningkehang ma thangta cheroktok ave. Prekjam amonit pen kachingki chethan ahut koson a’ot si cherim nangji, lason ahut Arnam ningkehang ateng kosonsi ke’otthip nangji, Arnam kamatha kosonsi chinithekji, lapen koloso amonit, apor lapen akai ahutsi Arnam akangjinso, ahir asang lapen ahokpet binong heihei alam kethan – alangli lahei isinat ta klardak chechar damdelo. Kachinitang ason kepathir aphan jongsi monit atum along kaprek kaprek kachecharmek ajakong ave pulote, kai aphuthak charjumeme alamsi avedetlo, lapen kachinitang sita lapu’an sose lo; latum jokluhaksi ajatta chepidunbom lapen chechak nangbom tatheklo. Lason amonit atum aphan kepachokji sungpik. Lapuson ningje dam’un je athak kethantang ason pen jongsi nanglilong thangta kachecharmek ave pulote, lake nang kaheno abang pu chedorlim angthek lo, Israel along nonta karjapther ingti arlong asonben lo. Lason amonit atumke a’mo vangve, thangnat aphanta akeme ave! Ejahak amonit atumsi lason mathathe kunke pen kachepi, latum amethang aphan kaiketa chechini lapen akimi ason keklem ahut jongjung keklemver a’ot pensi kaita keklem, kalite pinpur-meme anta kali amo kevangve ason aphanta gyan chepatirpisi latum kesei’i. Lason amonit atumke klardak kachinidam ahin thangta ave, lapen lasonke akoi karvakji along latumke amethang kache’o dun a’ot adur kedo ason nangnaklo, lapen latumke kaiketa lason; latum mentune ta chelarle. Lason amonit atumke kejoklu, masapso anta klardak kachinidam ajakong ave. Latum prekjam amonit kalite ason pen pachetonchit akengkam kedengji aphan mentune ta kabor-i ave. Lasonson amonit atum alongke kachinitang thangta ave. Amethang akethek aphan chiki thuong amat Karjonglangno kachepahemphu amonit atum pen kachetong ahut, arjapthip haihe lapen latum aphan pinrem haihe si, aphu tongki si amethang apap kachekobir neli ejahak amonit atum aphan theklonglo. Lapen Karjong Kangthir vek asai aphan kachetong ahut abangke, latum alam kroi dorde. Karjong langno ta Arnam arideng penlo pusi latum kekroidam, lapen majerso anta karjapthipji aphan angthin chepathe haihe lapen daidunthip haihe. Lapuson amonit atumke Arnam aphansi kapatheraklo, lapen Alangli pharman anghor kardik chechakpi un’eveklo. Lason kajoklu atumke ajat ahin sita akemenei cheman un’e. Lason aphansi kachinitang kepudam lepute, lake chevarchor nangji, athe Arnam amek angden ke chepabin un’e.
Monit atum along Arnam ahoksi keongdung sai klemlo, ahut penke kabor’i pidun, ahut penke kapejoikeji aphan kaselampi, lapen ahut penke lamthe kaningje pen kethan dun, lapen kechokche anta pakengpi. Ahut penke Arnam kesikpitang apor along’an monit aphan Karjong Kangthir japonsi latum keongdung kadure ason sita chechininepin pen pachelong. Monit atum kosonma kaningje lapen keklem, lapen kosonsi monit atum kaprek aphan kevi lapen prekjam ason kesei aphuthak, alanglitum aphan pachechininepin pen, aphrangta kachinidam un’e keongdung ason sita latum aphan Karjong Kangthir paklangdaksi, monit atum aphan lapen keongdung ason aphan ansose klardak pen pethek longji, latum aphrang ardi kepipe ason aphansi jasemet pachethek longji. Pirthe asai nang kaparpu ahut, laso apirthe along kedo ason aphan nang kachini pangchengpo, lapen nang kenangji ateng chepapleng longle angkosi: “Inut amonit keman ahokpet joike kali” pusi nang ningje tahai. Jongsi nang Arnam aphan kachiniji aphan apor chepi, lapen Arnam asai lapen Alangli keklem a’ot aphuthak chinidamlo pulote, nang cheputhekthepin angbong ansose klardak chini unpo, lapen nang nongme sita pajo pen batbompo. Karjong ason aphan ansose nang chinithu muchotpo, lapen jasemet Arnam asai aphuthak nang kachinidam klarpo. Arnam alam heihei, Arnam asai, Arnam keklem ason an, Arnam aning kehang asai, lapen nangmethang achethe along Arnam ke kopi lapen kosonma sita nang dengpo. Jongsi nang keklem do’an pirthe along ajongjong chot pulote, nang arveng keparji ansose si sungpo, lapen nang Arnam aphan kekhamkhe ajakong sitame ansose nangthepo; kosonsi tangte Arnam nangphan sai nang ke’en thekjilang? Athe nanglong “ne kamatha ateng pen” akele thupik ajok, Arnam nangphan sai nang en’e detlo. Nang koan ma Arnam pen kedorap, lapuan sose si nanglong kepho-kachinitang dopo. Laso apirthe along jongsi nang kelangremmeme amonit asonsi rengbom – nang ingho ke Arnam aphan kekroi alamsi kaningje bonta nangning ke kaprek ahinsi kamatha dam – lapen jongsi pirthe aron-atang pen kerengji aphansi nang non anta charlibomlang pulote, kedamtang ahut nang keklem ason doan thang ale ave plangpledet jima? Lasi, koan ma monit atum Arnam pen kedo rappet, la’ansi Arnam along pen kepachoklimji aphan sita akejoi dopo. Karjong Kangthir lahei ahin pen henlo Alangli kam kacheklem. La jongsi nang chini damde pulote, ahok akrong kedunji nangliphan akesung do, lapen Arnam along pen kepachoklim kelongji pu abangke karjuji alam amatsi avelo. Mesen karjong akai nang long un-e detpo; lason ben si manpo je nang ke tekok detlo, lapen nang jongjung kachepaduk ason ansi longchot lapen Arnam penke ke thangta ave. Lake nang kachinidam ahin kopine kechokdamde kali ma? Arnam nangkachedo dunverji aphan nang ardom vek ting’ai nangne, nang Arnam aphan kamathaver kalite Alangli sai aphuthak kamatha pangching ahut, mentune ke kopine ason nang keklem along, lapen mentune ke nang Arnam alongsi kevanglo pura isi apor kepaklang pen henlo. “Ne ardom ver apotsi, Arnam amek angden si ne kedo kalilang ma?” pusi penang an atum kaningje. Keongdung amonit atum abangke “Arnam amek angden” along kardom ingtontepin sitame do. Latum angtur along kaiketa Kardom si theklong tahai, bonta ahokpet latum Arnam pen chelang rappet le kedo kali. Lason amonit atum Arnam amek angden keklembomthekke lason anvetlo; Latum Arnam aphan ajat apor ahut sita aning arlo pen kachingkiji un’evek, kachini thekji aphan pu pen sitame latum Arnam athengno vang un’e, kamatha pangching pen punon, matha joijoi pen punon, kalite Arnam anghor kardik matha dunsi alangtum aning arlo along Arnam pen kachingkiji aphan sitame mathathe. Angho pen anchotsi latum sining athak kedo Arnam aphan Kardom chot. Penang amonit atum Arnam aphan aning arlo pen chepangbodet, lapen latum Alanglong kapatebok damthu ahut ansi Arnam ke kacheklangthu; keongdung aporke, latum along Arnam ave detlo. Tangte lake isivet aning pen Arnam aphan kamathathip kave angthek kalilang ma? Latum aning arlo along jongsi Arnam do asonte, kanghu lapen kaheno atum keklem asai ason latum klemhai jima? Jongsi inut amonit ahokpetsi Arnam aphan manpi pulote, latum ahokpet aning pensi Arnam aphan kachingkiji asai klempo, lapen latum akamatha lapen abidi along kaiketa Arnam alamsi plengsetji. Latum lam kaningje kalite asai keklem along sitame kelet avelo, lapen Arnam aphan kekhamkhe ajat asai sitame latum klemklelo. Kekroi abang akeme angdeng ke lason henlo.
