Komatma Kejok Kelong Abang Henlo Ahok Ateng Keklemji Ninghang Abang
Kecheng ahut pen si, kemesen kardomhem achethe kedo nangji akenangsot puke lam kethan ahut si ningjepon tanglo. Lasi kopi apot si tangte kardomhem achethe tebonta meparpedetlo, lapen nonpu tame hako atengthot si doverlang? Kopi apot si angton pen akimitet lapen keprekjek akai akrong kalidetlo? Tangte lake mesenjima hala arta ningkan throksirkep amonit atum kedamtang akai ahut arecho ason kedo-kethakji? Monit atum kopipi non kecho lapen kijun doan akecho ason kedamtang akai ahut chomattheilo puvoiphit tame, kardomhem akeklem-kedam heihui nonpu anta kenangsot kachelar ke avedet. Lake hala aban ahor le akimi abong along kethaithu pu ason thakthaklo. Kopilo tangte Arnam lapuan alam kaningjepon ke ale kedolang? Keongdung adim akardomhem heihui angton pen chelar thekthelang. Ne mena amek pen si Ne theklong tanglo, lapen lake Ne ning along klardaklo; Ne le kardomhem akai Ne methang chomat longlelang pu sitame, Ne chinilo kardomhem along kachingrum kopuson ma lake Ne ri anung asonthotlo. Latum non anta kachingthurpik kalidetlang. Lake lason aphrang kaningjetang atenglo – lake aban ahor si akimi abong along kethaithu. Thangnat ta kachelar ave, masapso anbak puta avedet! Latum aphan komatne le kiviponbom ahut, latum me ason pacholo, bonta latum aphan madu ta kerap abang avedet ahut ke, latum doan herai athan ason si dolo. Penang an atum keklem-kedam alam chethan thekpetpe, lapen kijumpik aphai atum anchot si laso arpu denghai. Lam kethan le mepiklo puvoiphit tame, kilutdun longji aphan ke masapso aphai jumpik. Ajahak amonit atum si Arnam alam pen chehok thekchot. Latum le Arnam alam enponlo te lahei ke chirumemelo, lahei le ihin anatthu bivet lote chehokmemelo, lapen lamhaklo lapen ke latum le che’obup lote lake ajor duredetpo. Ningjedak pen, nangtum lapu amat ke Arnam alam pen chehokhe, lapen pini arni kabirti acho ason Alangli mena angho pen lamthe kebar nang theklongle. Alangli lam heihui kaporhi ahut pen si nang ningrikraktak keman, lapen la ningkachibi ahut aboi chitikrup nangkok pusi chemathalo, lapen Arnam alam ateng keklem-kedam ahut pulote, lake losei arme pen le chu pen si kesan ra lang kesan’i akor ke’ot adim along kaparting asonlo – nang jonghe le chepedukkrup putame, nang chenam ta jakong dorchit an parting u ‘e. Arnam alam kaporhi pen ajok si nang kaiketa jakong longji, tebonta kekelmji ahut chetengnedet titi. Ahokpet ke, laheihui alam ke chepedukkrup pen ningje aret teng’ai nangne lapen ningding pen pachiruilemdet ta nangne; bonta chenam pima monit atum Arnam alam ateng klem-damde si karjuchot ke Alangli sai keklem along kasiksak mandetlo. Ne laso apot athak van thekthedetlo, Ne laso aphuthak chethan thekthedetlo. Ne lason si keklemvek nangkoklo; lake Ne ningkarong pen si bang akadure doan kapangdakpilo lapu kali. Nangtum mathalo pima nang keklem-kedam ke ongchet mate jumchet sita dengmemelo. Nang tangte mathalo pima kepaklang le akangtui an lelo pulote, pima nangtum kilutdun tame akangtui an si dolo? Lake tangte puan kejoi puhe? Nang kephopon along amat si laso kecheng atiri ke karjaplo pu nangtum kaike langpangchingche! Laso apor ahut anke, nangtum akachingrum aphan ke choklim kardomhem achethelo pu puthip un’e, mate lason ke akijumnei sitame choklim karjong plengset akai puta avedet. Lake isi abitung amonit atum chingrum si lam kachingki lapen lun kilun pu aphan anchotlo. Sodak pen chethan lote, laso along ke thangnat ta mesen ahokpet ave. Klardak pen chethanthu lote, nang jongsi ahok ateng pen klemkledet, tangte ahokpet ke konatlo? Tangte lake pima nanglong ahokpet dolo pu kacheparoka aphan puchotlo kalima? Komatmat ma sai klembom atum anke mena akethek aphan si ardi chipi lapen cheparokaver, bontame komatmat si kedojoi pen kaiketa kekroiver lapen alangtum aphu patongkiver, seke kelong avarsai avepin tame. Monit atum sai klemklepin si keklem pu bonta alam ningjechot, lapusi alangtum lam kethan ase chepathepik pen dambom dambom, lapen abe kidun atum ke karjudunlokchot. Chethan lote lason ke kachelar puke thangnat ta ave; laheihui doan ke hakoko kedamtang asonlo! Pini arni, nang bang chehodai thek nangji lapen kachejokdun mate cheparjan haihedet jonghe le kar’i do tame lake Arnam kachari-kachalon aron kevang pen ajoklo; lake nang keklem-kedam pen le kachelarponlo pu kalidet. Ahokpet ke pima pini arni nang penang an ahormu klemkledet nangji athe ke nang patumi si klem’et nangji apotlo athema lake Arnam keklem asai ke cheklangdak pima lake monit atum aphan hai tanglo. Ne inutbak amonit aphan arjulang, Kopuan si nang pini arni kedorplup an kelongponlo nang mena kachepedukkrup ang’i chepaklo pen? Kopuan si la Arnam pen nangphan thanpondak kedolo? Kopusonlo nang kethak dunji? Tangte nang ke manghuvongjima lapen lamthe avedetjima? Nang so joktheijima? Kopi apotlo pima akaprek atum ke alangtum ahokpet kephopon alam nangphan kereng’iji ason-amung pen kepajir aphuthak chethan thekdet, tebontame nang ke bang kituntang a’an-ahan si lapu kecho ningcheparongdunchot? Nang chetherakrema? Nang tangte man damphakphema? Nangtum ahokpet alam kiri asatlang endet tahai meme, komatmat ma akaprek atum pen kemesen aphan an kangsirdam: Kopuan ahok si nang kachinidam dolo? Kopuan si nang keklem-kedam along kepajut ke kipidunlo? Komat aphan si nang kanghon keonglo, Arnam mate methang aphan? Tangte nang kipi si keongma, mate kedengdun si keonglo? Kopuson ahuthut si nang kamunthidam kechokche chichinidet pen nang mena abang aban nang che’odet si Arnam aninghang ateng kachetongdun dodolo? Laheihui masapso akarju pen anta penang amonit atum aphan ke pamanghuji. Athe ongdung amonit atum, jongsi latum chichinilo pima alangtum kamunthidam alam ke chokche putame, latum ke chinilor si kechokche klemji, lapen latum doan ke alangtum mena a’ok nahok tame che’o’e. Ongdung amonit atum pap aphan pekplot latum along amat kekat pangdangji aphan, alangtum keklem amo along pap aphan kepajaji si pekplot. Latum ke alangtum apap heihui aphan chehai un’edetlo, lapen latum ke pap pen si nonpu ta rengbomlo. Laso nonjong angdeng along nanglerok aphi, komat si kachinine dolang latum penang an kaheno asai klem tanglo puke? Jongsi nang pulo nang ajat ta chinine, tangte Ne kaningjeji ke pima nang ka pachobailo. Chethandak pen lote, lake kadokave nang mena aban abang aphan kache’oji ningkehanghe apotlo. Kopi athe dolang penang kachekobir alam “ningarlo pen kaningje alam” kaningjepon pima lahei ardi avepin? Tangte lake nangphan nang kai along pachingthurdun thekjima? Lake lapule pudet tame pima nang mena aphan kachichiniji ke nang sai angton apor kachipidet henlo. Ne monit atum aphan kapachok ke alangtum kachehodai pen lapen alangtum Arnam alam ateng keklem pen. Nang ke nang choi kachingchoi asonthot si Arnam alam tame kachingchoi pu aphanchot, arong kachipi lapen kelangmesenji aphan puchotlo; tangte nang ke methang lapen bang aphan kachongthui kalilangma? Nanglong kedoan ke lam kaningje lapen nang keklem-kedam along chipidunde, tangte nang kopilo kelongdunpo?
Penang an amonit atum keklem-kedam aphuthak masapso ke chethan theklo lapen latum alangtum mena jongjung kachinidam alam tame latum chethan theklo, bonta keongdung atum ke bang kachethan alam pen katheang kelongdun ajoine puchotlo. Lake kadokave alangtum mena jongjung keklem-kedam pen apot pu thangnat ta avepinlo, mate kopima latum ketheklong alangtum kephopon along puta kalilo. Ne laso alam ke aphrang ta thakvetlo; mathadetri pima Ne thangnat ta chinine puke. Nang ke thangbakbe kot ateke chot, tebonta nang ke Sobar aphan kehaidongji si ningjelo, kachepahai alammo che’otdong pen, lapen Arnam arje pen kedolin chot? Lake doan tame amo vangvelo! Nang chemathalo pima kadokave Arnam pen kaningjetang alam doan pini arni ke nangphan ningpadokji aphanlo? Nang ingho ke nang mena aban abang kache’oji si ningjelo lapen ahok ateng keklemji pulo, tebonta nang ri ke akaprek asai si klemronglo lapen nang ning ke kaprek abidi si selambomlo – kopuson ajat amonit mati nang? Kopi apot si nang ning lapen nang ri isinat kalidet lapen chingbarbedet? Lapuan birta keme pachetak tame kangtheidang alam chemanlo; tangte lake ningrunhup kalilangma? Nang jongsi Arnam alam ateng klem-dam thekthe lepute, lake cheklangdaklo pima nang ke nonpu ta lutdun thekthelang pima Karjong Kangthir keklem akrong along, nang ke nonpu tame Karjong Kangthir keklem asai nanglong longdundelang, lapen nang ke Alangli akejapon non anta longdundelang. Nang jongsi pulo pima nang ke Arnam alam ansi chinidamchotlo bonta asai along ke enpon thekthedetlo, tangte nang ke ahokpet aphan kanghon thekthedet abanglo. Arnam ke lason ajat amonit atum aphan kepajokji le kevang kalidet. Pap plengset amonit doan aphan kepajokji pu ajoine Jisu thedung akeso-kesung chechak tanglo Alangliphan thengparpan along kesak ahut. Alangliphan thengparpan along kesak pen ke pap athok-ajir si vanlo. Nang jongsi Arnam alam ateng klem thekthe, tangte nang un’an akeprap pe nang damjui si kemelo; Arnam ahem along akejoi pen ale kacho’en atum ason ke juijamrinon. Penang amonit atum ke amethang aphan pima Arnam aphan klardak pen kekhang asai keklempon pen kachekhangji anta kisung dolo. Tangte latum ke kithi le kachohang kalima? Koson si latum le Arnam kepangri alongri along kilutdunji alam ningje thekpo? Tangte latum ke Arnam arje kelangji aphan haijima? Arnam pen kepadorbom an-han kechodun, Arnam kekhamkhe keheno ason an si keklem, bang aphan kapasiksakji mon’e, pajo pen kepasung lapen bidi kanglim keklem, Arnam nangphan Alangli pen nang phuthak kipitang ahirjume kapachehokji aphan apor kipi ahut tame – tangte nang chemathathema lahei kechodengdun ahut nang ri so’ang’ema? Nang mahang ke’ertan kacheman pu nang chemathathema? Arnam abirudhe kopine asai keklemdet ke, bidi kanglim pen klempon si “athikpetpe pen kedamji” aphan, tangte nang kaphere avema? Nang jongsi thangnat chemathathe, koson si mohut ajat alam ta nang ningje thekpo? Kedamtang ahut pen si nangphan ke mohut thangnat ta ave’etlo, lasi kopi thedung ningkethedam nanglong kedobomjilang? Jongsi nang kopine therakmeme alam ningjelo tebonta kedengdedetji aphan mathathedetlo, lapen nang ning along ajat ta than chepare avedetlo, tangte lake Arnam nangphan nangke’otanglo pu aphan kalilangma? Kaningje lapen thoplot pen keklem kacheparjan lapen kachekhang kavedet puke nang sema si cheman tanglo; koson si nangphan Arnam lason le kapachoklimji? Nang bangso apirthe along kengkam chejor unjima? Komat si nanglong abe kidun abang doji? Komatmat ma nang ahokpet asema kachini atum an ke alangtum chepahelopo. Tangte lake Arnam ado kipi kalilangma? Angton pen tame, jongsi alam ningjechot lapen asai klemkledet, lake kachingthur avelo. Nang kaningjebom ahut nanglong le Karjong Kangthir sai klemlo puvoiphit tame, jongsi nang le asai klemkle, Karjong Kangthir sai keklem ingtonkokpo. Nang jongsi lason ateng le dambomlo, kosonsi mohut aphuthak alam kachethanji kedopo mate nang angton abang arjon Arnam asai aphan kipipo? Nang ke nang bang arjon angton pen kipiji puke alam ningjechotlo, tebonta nang ke nang ning ke Arnam aphan chipipedetlo pima Alangliphan ahokpet kanghon nangji. Angton pen pima Arnam kelongtang ke nang ning alam anchotlo, lapen nang keklem-kedam aning kalidetlo. Tangte lake nang ahokpet athengji puhe? Jongsi nang le lason atengthot si dambomlo, komentu si Arnam nangphan kapachoklimpo? Tangte nang mohut akai kangtingthir lapen keoplu aphuthak ningrikraktak pen chemathathema? Tangte nang mathathema athe Arnam nanglong pen ningkethe ingbodet tanglo? Nang chichininema athe Arnam ningkehang ke ansose akimi amonit atum aphan si kapachoklimji pulo? Aban ahormu doan alangtum cheparidengver longjilangma? Pini arni nang Arnam alam aphan matha parsik dundedetlo: Tangte nang ke penap aphan si kanghongma?
