Ephong le Ahokpet pu Nang Kachini Lote, Keklem-kedam Along Nang Enponvek Nangpo

Arnam asai lapen alamthe doan ke nangtum akun heihui kelar’iji aphan pusi pulo; Alangli akemang ke nangtum aphan kapachinichot mate Alangli sai lapen alamthe kachinichotji aphan kali. Lake pima dordelang. Nang ke inut kopima kamathadam kethek abang, apot si nang ke Arnam alam kachiniji aphan ke akesung avelo, athema keongdung Arnam alam ke monit atum alamthe pen si tokponlo, lapen Alangli pajoike pen si ningjelo. Langdam sinang, nang ke thekser pen kacharli longlo kopima lake nangphan Arnam aninghang pen kapachini lapen paklemtoi; lake pima aphu mesen abang komat ma kamathadamthek ajakong kedovek pulote klemthek nangji. Jongdamvet pen, lamthe heihui pima Arnam non kedobom angdeng along kaningje ke klardak lapen checharplin chenam, lapen monit atum kedengde penang an ahormu aphan si Arnam ke jongdamlo, anpar tame kadokave monit atum aot-adur angdeng doan. Alangli lamthe doan kadokave ta – pangrompet, lapen klopleng atur asonthot si klardak henlo. Lasi non, monit atum kachinidam penang an aphuthak, bonta ladak kopine kangbodet ason si dolang – monit atum keklem-kedam along Alangli lam enponlo. Monit atum angton pen ahokpet ason kedoan ke charliponthei nangvekpo, lapen ritarlip lapen kiridam angton pen nangkokpo, laso alar latum aphan ajat tame kapaklangpon aphan kedengdunji si kachonghonglok ke nangnelo; kalite latum ke bang ajoine pen kerengdun api ason si masap keongchet chemandetpo. Latum Arnam alam chinilo, tebonta keklem-kedam along enponpedetlo. Lason amonit atum ke ahok aphan inghonhedetlo lapen mo kepajut ke pavirvekpo. 1990 malom aPitor ason, lake athe pima nangtum anuttin tame Arnam alam enponvek nangji, nang keklem-kedam along ahokpet palutvek nangji lapen Arnam pen nang akacherap along ansose thedung theang adak-atur kelongji aphanlo, lason pen ke nang mena akai along akerap kebatbom si kaike manpo. Nangtum jongsi Arnam alam penang porhipiklo bonta lo along ketok ajor ansi chinidamchotlo lapen nang keklem-kedam ateng kachomatlong pen Arnam alam again kelong jumdetlo, tangte nang ke Arnam alam chininejilang. Nang koan ma mathadam peme pen, Arnam alam ke chethe kali, bonta chethe kavedet akido pinak. Lapen nang jongsi laso chethe kavedet akido aphan anchot kelangdam pen si renglo tangte, Arnam alam acho nang dengdun thekthelo, mate Alangli ningkehang nang chinidundedetpo. Nang Alangli lam nang ahokpet keklem-kedam along kephoponlong ahut anchot pen si Arnam alam karjong ajor nangphan nangcheklangji, lapen lake kephoponlong pen anchot si pima nang penang an ahokpet karjong ajor alam longponji lapen Arnam alam kapchepatujoi doan ingpu unji. Nang jongsi keklem-kedam along enponpedet pulote, Alangli lam koan ma keklar pu tame, kadokave pima nang kelongtang anke kangthaidang akido lapen kethan aron-atang saidelo, lake nangphan dhoromi aron-atang ason si pemandetlo. Tangte kopima Pharisi atum lason le keklem kalima? Nangtum jongsi Arnam alam klem-dam lapen phopon longlo, nangtum aphan lake keklemvoi si pemanlo; nang jongsi keklem-kedamji aphan riredet, tangte Arnam alam nangphan ke kethom asining hemrengme athansera pen masap ongchet si manpo. Ahokpet ke, Arnam aphan kekroidun pu kacheklangpon ke nangtum Alangli lam kachomatponlong henlo lasonthakthak si Alangli ale kelong, mate ansose klardak pen than lote, Arnam aphan kekroidun puke Alangli lam aputhak kethek lapen kachinidam henlo lapen kephopon lapen Alangli lam ateng kerengdun; lason henlo chenam ta nangtum Arnam aphan kekroi athelo. Nangtum jongsi kopine nanglong kedotang pen Arnam alam ateng keklem-kedamji rirepin si Arnam aphan kroilo lapen kai apar kai achethe aphan ningthelo pulote, nang ke kilu abanglo. Lake kecho arongaje along kidun pen han-an aphan si kapangthekchot lapen ahokpet chomat longlepin pen tame ningarlo pen kechomeme ahormu kachinidam ason si chemanpo. Tangte lapuson abang ke kilunei kalilang puhe?

Laso ahok pima monit atum akenang kacheparideng nangji ke Arnam alam along si dolo, lapen laso ahok ke pima monit akhei aphan ale kedonei lapen akerap keongneilo. Lake nangtum abang kenangji adovai lapen kepamesenji aphanlo, kopima monit atum amena choklim monit ateng kedothuji aphan cherapdun’ilo. Lake laso ahok pima monit atum chelongvek nangpo. Koan ma nangtum Arnam alam ateng keklem, lapuan si nangtum akai prapjin pen chingthurpo, lapen laso ahok ansose si klardak chemanpo. Nangtum le man-peng angdeng thebom lote, karjong apirthe ahormu ansose si klardak pen nang theklongpo, lapen Sobar aphan keparemdetji aphan ansose si nang jakong chelongpo. Keongdung ahok alam pima nnagtum kachininedet kedoan tame nangtum Arnam alam ateng klem lote paklardakpo. Ajahak penang an amonit atum ke Arnam alam lo along ketok apot anchot si kachinidam kedorlo pulo lapen amethang aphan kethan aron-atang along si ardi pimunak alar ke alangtum keklem-kedam kephopon aphan paklong ponpedet, bonta lake tangte Pharisi atum asonthot kalilang ma? Lasi koson si laso alamseng, “Arnam alam ke chethe” pu latum aphan ke akechokpo? Inut amonit akai Arnam alam kaporhi pen anchot ke chingthurthedetji, bonta laso Arnam alam keklem-kedam along ke’enpon pen anchotji. Lake jongsi nang kekroidam ke Arnam alam chini lote kadokave pima chethe lapen man-peng tame long’etpo pulo tangte, nang kachinidam ke chokchepiklang. Ahokpet Arnam alam kachinidam kedoji ke nang laso ahok ateng keklem ahut henlo, lapen nang la chinivek nangji athe “keklem-kedam along ke’enpon pen ajok si laso ahok chini unji.” Pini, Arnam alam porhidet aphi, nang ningje melo tahai nang Arnam alam chinilo puke, bonta nang pima aklong alam chini pemelo puke ningje un’e. Ajahak atum ningjelo pima ahok ateng klem-damji aphan atovar ke kachini paphrangsi anchot henlo, bonta lake masapso anchot si kechok, lapen ke chenam si angton pen choklim kalilang. La ahok aputhak nang chinidamde aphrang, laso ahok aphan nang chomat longlelang. Arnam alam kethan ahut nang karjudunlong pen nang ajahak chinidunlo pu kachematha ke ahokpet kachinidam kalipinlang – lake ahok aputhak lamthe athak damprui anchot si nang cheparidengpon longlo, lapen halaso along ahokpet ajor ateng pen lake kachinidam chingbarbe. Ahok aputhak chobeibei kachinidam kedochot ke pima nang chenam si chini pemelo mate aklong alam longlo pu aphan kalidet; laso ahok aputhak ahokpet ajor kelongji ke keklem longtang pen nangji. Laso apot si, la ahok ateng klem-dam long’etlo tangte nang chini unpo, lapen lapu ansi kachepatujoi aphar nang longpon thekchotji. Nang akeklem-kedam kaparnuk pen akrong anchot si laso ajor akenangsot alam longpo, lapen laso ahok ardi chini longpo. Laso apot si, nang nahok tame laso ahok pen dam longpo, bonta jongsi nanglong laso ahok ave tangte, nang hemtun isi atum aphan anta kebaipon bor’iji puke mathadetri, dhoromi amonit atum aphan ke aphi alamlo. Laso ahok nanglong kave ke athir kavedet amonit atumlo, bonta laso ahok dolo te nang ningarongpo lapen jokvanpo, lapen madu tame nangphan tengkheng un’elo. Koan ma la kethan athepi ingtangrak tame, lake laso ahok aphan chohai un’elo. Ahok pen lote, pirthe amat si kachari joikeji lapen inglong lapen talo tame cheterekji, tebonta laso ahok kadure lote kangtangrak rongsopi arpong tame ingthan atum aduk pachemandetji. Lake chenam-chenumlo.

Nonjong angdeng along, laso ahok aphan kachiniji aphrangsi akenangthepik anlo, lapen lote keklem-kedam along ke’enpon lapen aphi ke laso ahok ahokpet alamjor nangmena along kacheparidengpon. Nangtum la kelongji aphan si rivek nangji. Alar ke nang lam heihui anut kaprek atum aphan kapakroi le kiri nangji kali, latum aphan nang keklem-kedam ateng pacharlidunji si nang pakroi nangji. Lason pen anchot si nang kopine angthek mesen longponpo. Nanglong kopi akesung le vang tame, nang madu pen le chetonngponlong pu tame, nanglong la ahok dotik ke, thirkluk pen si nang arjap thekji. Arnam alam henlo pima monit aphan chethe vanpiji, kithi kali. Jongsi, Arnam alam porhidet aphi, chethe along nang vangvelang tame bonta kithi atum angbong si do, tangte nang kopine akechokche dokoklang. Jongsi aphithu nang Arnam alam ongdung porhipik tanglo lapen kecharlimeme lam kethan karjudunlong penang an dolo, bonta kithi atengthot si nang dobomlang pulote, lake cheklangdaklo pima nang ke la ahok aphan ardi kipi abang kalilang, mate nang ke la ahok aphan kenangji abang ta kalidetlo. Nangtum jongsi Arnam kedengji aphan ahokpet kiri, nangtum methang aphan kekroi aron-atang pen kachingvuikungji klemklelo lapen bang anut kaprek aphan ane kachepathe kekroi aron alam thanthelo, bonta alar ke Arnam alam kecharliponji si ardi pipo lapen keklem-kedam along ahok si enponpo. Tangte lahenlo nangtum kopima nonke kirivek nangji kilutdunji aphan kalilangma?

Monit atum along Arnam tame Alangli sai keklemji aphan isi kehotvet apor do, lasi kopi angthek si kedopo jongsi nang le Alanglilong cherapdundedet pulote? Kopi athe si nangtum ephong le kachini tangdet aphi Arnam ke kaiketa nangphan Alangli lam ateng paklemvertoilo? Lake athema nangtum aphan Alangli lam heihui Arnam chepaklang tanglo, lapen nangtum adunthu akengkam ke laheihui chenam si keklempon nangpo. Laheihui alam ateng nang klem-dam lote, Arnam tame katheang adak-atur lapen kejapon asai chepachunponpo. Pima lason henlo lake kapachunpon nangji. Arnam alam pen ajok monit aphan akai pachingthur unlo lapen monit atum kachelarledetji mate kedothing kemanmedetji aphan ajat amung ta cheparidengdedetlo. Nang pulo nang Arnam alam porhilo lapen klem-damlo, bonta Karjong Kangthir pen thangnat asai ta nang ke nonpu longlelang. Nang lamthe ke oso aphan si chongthui unchotji. Kaprek amonit atum ke nang kemathadam alam heihui choklo pu tame chininedet tahai, bonta nang chematha loma Arnam tame nangchinidundedetji puhe? Kopuson si anut kaprek atum Arnam alam ateng klem-dam lapen Karjong Kangthir katheang adak-atur ta longlo, tebonta nang ke Alangli lam ateng klemlo lapen Karjong Kangthir katheang adak-atur longdundedetlo? Arnam tangte aning aduk dodoma? Jongsi nang kamathadam le chenam akechok lapen nang ke klem cherapdunthek, tangte Arnam aKarjong nanglong si dopo. Kopi apot si ajahak amonit atum kaiketa alangtum mena alama ke’eji mon’e, lapen tebonta Arnam latum aphan pangthur longle lapen kardomhem cheja longle? Kopi apot si ajahak amonit atum alangtum ateng si cheklembomlo lapen, thangnat munthidamdepin pen, latum Arnam akedeng ale enbomlo? Kopuson si chokpoma? Arnam kangsirdam ke monit atum aklong’et aning henlo, lapen komatmat amonit atum si ahok aphan kiri pulote akechok akamathadam ateng si klempo. Kechok akamathadam kavedet amonit atum doan ke karjap pathir un’e. Atiri alam ke, nangtum akemang ke Arnam alam nangtum along kachepaklangji aphan. Akaprek alam pen pulote, lake nangtum Arnam alam ateng akeklem-kedam along ahokpet kachini pulo. Lasonsi nangtum Arnam alam aphan akachinidam kethek ke durepik’lang, bonta nangtum le Arnam alam ateng klem-damlo te, Alangli laso akechokche apot peme’un, lasi nangtum penang an ahok alam anchot le kachini nangji kali, bonta laheihui nang klem-dam’i nangji. Lahenlo kethenei alamlo pima lake patepek un’e. Jisu tame penang an aduk donanglo Alangli ningkan thomkep ra kethom ra ebeng an athema Alangli laso ahok ateng klem-damlo. Kopi apot si kaiketa Alangliphan ke kachenek-kaholo pule kabirti alo along toklo? Lake kopuan si Alangli kesung chechak nanglo pusi kepaklang aphanlo. Alangli thedung akesung chechaklo athema Alangli ahok ateng klem-damlo lapen Arnam aninghang ateng si klemlo. Lake kesung binonglo pima Alangli chechak nangnedetji apotlo jongsi Alangli le laso ahok chini bonta ateng klemkledet ason pulote. Jongsi Jisu le Jihudi atum akethan kroidunbom lapen Pharisi atum aphiphi si dunbom tangte, Alangli kesung chechak jokplotji apotlo. Nang tame Jisu akeklem-kedam pen charlidunme pima monit along Arnam asai keklem akemenei ke monit atum kacherapdunpet pen si vanglo, lapen lake nangtum kapangthekvek nangji asonlo. Alangli thengparpan athak keklem asonthot si Jisu kesung kachechak nanglo puhe jongsi Alangli la ahok ateng klemkledet asonte? Tangte Alangli lapuan ningduk akardom ardomji puhe jongsi Alangli Arnam aninghang ateng pen klemkledet asonte? Laso apotsi, laso ahok ateng ajoine keklem-kedamji aphan nangtum kesung chechakvek nangji; lake lason akesung henlo monit atum kachechakvek nangji.