Asat Kesodak Kepholong pen Anchot si Arnam Kanghonmeme Alam Nang Chinidam Unji

Pini arni nang Arnam aphan koan akanghon dolo? Lapen pima kadokave Arnam nanglong keklempontang doan aphuthak chenam nang kachinidamlo? Laheihui alam henlo nang ningkachibipon nangji. Arnam pirthe athak kevang ahut, kadokave pima Alangli monit along keklempon an lapen monit aphan kepalanglong ke laso ajok monit Alangliphan kanghon kipi lapen ahokpet Alangliphan kepachiniji pulo. Pima monit ke Arnam apharman keso chechak unji aphan lapen ke lapuan akahelo kevang undet ajoine, ihin pen langdam lote, athema Arnam akanghon ajoklo, lapen akaprek ahin pen langdam lote, athema Arnam kepajok apotlo; anpartame, lake athema kangsai lapen ado kipi asai pima Arnam monit along keklempon ajoinelo. Jongsi nangphan le ingsaise, ado pipe, lapen Arnam asat langledet, lapen jongsi Arnam le nangtum aphan pasungsedet asonte, nangtum ke kedokave athikpet pen Arnam aphan ahokpet akanghon avelo. Monit along koanma thedung Arnam sai keklem, lapen koanma thedung monit aphan kepasungpon, lapuan si keklangdak lake koanma Arnam asai ajor kedo pulo, lapen pima monit aning ansose si ahokpet Arnam aphan chinghon thekji. Kopuson si nang Arnam aphan kanghonji koson pu kacharlilo? Kepaduk-kepasung lapen kepacharkle avete, kesodak asat penpete – lapen jongsi, anpar sitame, kadokave pima Arnam monit aphan kangjinso, kanghon, lapen kadiya kipipon – tangte nang ahokpet Arnam aphan kanghonthek angdeng an ledam unjima? Ihin pen lote, Arnam le monit aphan asat kelang ahut alang akeboidet doan chinidamlo lapen theklonglo pima alang ke ardi kedojot kalidet, kapinrem meme, lapen kangdeihek pinak, pima alanglong ke thangnat ta ave lapen thangnat ta kali; ahin kaprek pen lote, Alangli asat kelang ahut Arnam prekjam avarmon monit aphan selampilo pima monit ansose Arnam akanghon meme alam kachomatlongji aphan. Kesung le thedung puvoiphit tame, lapen ahut pen ke chohai un’edet titi anlo tame – ningkiduk thu’it angdeng ansi ledamroklo pu tame – kachomatdamlong pen, monit ke koan si Arnam asai alanglong akanghon meme alam theklonglo, lapen laso along’e kesom athak pen ajoine si monit along ahokpet Arnam aphan akanghon hachelo. Pini arni monit theklonglo pima Arnam akangjinso, akanghon lapen akadiya pen anchot tame, alang ke amethang aphan ahokpet kachichiniji un’edetlo, lapen monit atiri kopima alang kachinidamji durepiklo. Arnam kepacharkle lapen akangsai pasonni pen ajok anchot, lapen laso kepacharkle ahut lethot, monit ke alang akeboidet doan chinidampo, lapen chinipo pima alanglong thangnat ave. Lasi, Arnam aphan monit akanghon kikim ke Arnam kepacharkle lapen kangsai along’e athak henlo. Jongsi nang le Arnam akangjinso chomat longchotlo, hem isi akai monsam pen dolo mate khi-dat ahirjume plengchenlo tame, nang ke Arnam aphan longlelang, lapen Arnam aphan nang akekroi ke kichun pemelo pu hoknolang. Arnam ke isi kangjinso asai angdeng ok along klempon patang’etlo, lapen khi-dat ahirjume monit aphuthak pajir’etlo, bonta monit aphan ke kangjinso, kanghon lapen kadiya pen anchot ke kepachoklimji henodaklo. Monit akachomatdam along, alang ajahak Arnam akanghon chetong longlo lapen Arnam akanghon lapen akangjinso theklonglo, tebonta ihut isi apor kachomatdamlong pen, alang theklonglo pima Arnam akangjinso lapen Alangli akanghon lapen kadiya anke monit aphan pachoklimji un’elang, atheke pima monit along kedo kahenodak kepaklangji un’elang, lapen monit alang kahenodak akun kapache’obupji un’edetlang, mate alang akanghon lapen kachikidam pachoklim un’elang. Arnam akangjinso asai ke isi akai along asai anchot, lapen monit ke Arnam akangjinso kelongji aphan chikidam si Arnam aphan kachinidamji pu chokchelang.

Arnam monit aphan kepachoklim keplengdam puke kopuson aphanlo? Laso keplenglimji puke Alangli kangthirjir akun pen ajoklo. Arnam akun jasemetpet kangthirjir, ningkithi, jakongthe adak-atur, kangsai, lapen hirjuno heihui si dolo, lapen Alangli monit aphan kepachoklim aphrangsi ke Alangli kangsai pen ajoklo. Ajahak amonit atum chinidamdedet, lapen kopi apot si pima Arnam ke kangsai lapen hirjuno kipi pen ajok le monit aphan kepachoklim keklem unchotlo pu arjulo. Latum pulo, “Jongsi Arnam le monit aphan hirjuno kipiji pulote, monit thilotledetjima? Jongsi Arnam le monit aphan kangsaiji pulote, monit aphan pinremredetji kalima? Tangte kopuson si alangphan nonputa kepachoklim unpo?” Lapuson henlo monit atum alammthe komatma Arnam asai kachinidunde atum an along kedo. Kopima Arnam hirjuno kipi ke monit amo kevangvedet apotlo lapen kopima Alangli akangsai anke monit apap apotlo. Alangli kaningje sedengkak lapen chingtontepin puvoiphit tame, Alangli ke kadokave pima monit along kedo paklanglo, lahei kesodak alammthe pen ajok si pima atheke monit along kithirthip alamm paklangdaklo, tebonta lason akangsai pen ajok, Alangli monit aphan keongdung gian ok atiri aphuthak piponlo, lapen lasi monit ke Arnam angno chehodailo. Monit aok ke pap plengset lapen Sobar pinaklo, lake amo vangvedetlo, lapen lake Arnam ado kipiji ajaton chemandetlo. Lasi, monit aphan amethang kapachichiniji pu aphan lote, Arnam kangsai alammthe ke alanglong klovek nangpo lapen asontin ajat kepacharkle paphotheivek nangpo; lason pen anchot si Arnam asai ke chun pemepo.

Arnam alamm kaningje pen lake thekdam longlo pima Alangli ke monit a’ok aphan kapinremtanglo. Lahei alammthe tangte hirjuno kipi alamm kalilangma? Arnam kaningjetang alamm anke monit ahokpet alir paklang’etlo, lapen lason kepaklang pen ajok alangphan ke ingsailo, lapen alang kethek’long pima alang ke Arnam akar’idam kepapleng un’edet ahut, alang aning arlo ningduklo lapen ningrengnolo, alang mathalo pima alang ke Arnam along preng dopiklang, lapen Arnam akar’idam longdamdedetlo. Karjong Kangthir le nangphan aklong’et pen kepakengpon apor ahut, lapen laso kepakengpon ke Arnam akangsai pen si vanglo; Arnam nangphan ningkedokde chepaklangponlo lapen Alangli arje nanglong pen chepatujoi ahut, Alangli nangphan ardi pipedet lapen nanglong sai klemkledet ahut, joijoi ingsamri si nangphan ado kipi pen nangphan pacharklebomlo. Arnam asai monit along ke aphrangsi Alangli kangthirjir akun kepangdeiplang pemanji aphan henlo. Kopiching ahakhilo monit kepadusi Arnam aphan karchakpiji? Monit hakhi kachipi ke pima Arnam ke kangthirjir a’Arnam, pima Alangli akun ke kangthirpetnei, ningkithi, ado kipi, lapen kangsai henlo; monit ke Arnam kangthirjir akun aphan si ahakhi chipilo. Arnam ke Alangli akangsai monit aphan kepachoklimji si enlo, Alangli kachinghontang amonit, lapen monit aphan pajoklo – bonta kopuan si Alangli akanghon along keplengchen dolo? Laso along kangsai, jakongthe adak-atur, ningkithi lapen hirjuno dolo. Arnam le monit aphan kedamtang ahut hirjuno pidetlo puvoiphit tame, Alangli ke angton pen amat monit aphan karnuknei aherang arlo joktheithelo, bonta laso akerap enpon pen si monit akekroi kepacharkle klemlo; Alangli monit aphan kepathitoiji kalilo, bonta monit aphan kepachoklimji si laso ateng pen klemponlo. Ok atiri ke pima atheke Sobar henlo – Arnam kipudam ke akechokpet chenamlo – bonta laso ahok alamm Arnam kaningjepon anke Alangli lammthe ateng pen angton plenglim kalilang. Alangli nangphan hirjuno kipi pen ajok nang Alangliphan inghonji mene pulo, lapen laso ajok nang ok atiri chinidamji mene pulo; Alangli nangphan ado pilo laso ajok nang ke mek kephrangdak thekji aphanlo, nangphan nanglong kedo akeboidet doan pachichiniji aphanlo, lapen monit apun-achak kalidet aphuthak kachiniji aphan pulo. Lasi, Arnam ahirjuno kipi, Alangli akangsai, lapen Alangli jakongthe adak-atur lapen ningkithi anke – lahei doan ta monit aphan kepachoklimji pu ajoinelo. Kadokave pima Arnam pini arni keklempon, lapen kangthirjir akun pima Alangli nangtum along kepangdeihek tame – lake kadokave ta monit aphan kepachoklimji pu ajoinelo. Lason henlo Arnam akanghon ke.

Monit abarim akamathdam along, alang akekroi ke pima Arnam akanghon henlo monit akeboidet apharman Alangli akangjinso, kadiya, lapen ningkarengno pulo. Lahei ahormu antame Arnam akanghonlo puvoiphit tame, lahei anke ihin anatthu anvet, lapen lahei ke aphrangsi akrong kali atheke monit aphan Arnam kepachoklimji along. Ajahak amonit atum Arnam aphan kekroidam kepangcheng ke athema kesodet apotlo. Laso kesodet ke Arnam nangphan akangjinsolo; laso penpete, nang ke Arnam aphan kroidundelo, lapen jongsi nang le Arnam aphan kroikredetlo pulote nang ke lapuan akahelo nangle un’elo – lapen lasi laso akangjinso sitame Arnam akanghon amatlo. Jisu aphan kekroidun apor ahut, monit atum pima Arnam kanghonhedet ason klempiklo athema latum ahok alam chinidamdedet, tebonta Arnam along kanghon lapen kangjinso do, lapen Alangli ke monit aphan lapuan kahelo vanlo, lapen monit le thangnat chininedetlo puvoiphit tame, nonputa Arnam ke Alangli phiphi monit aphan padunbomlonglo, lapen anpar sitame, Alangli ke pini arni an monit aphan nangchejalo. Tangte lake Arnam akanghon kalilangma? Atheke pima Arnam akun along kechethanpon doan henlo Arnam akanghonlo – lake chenam ahokpetlo! Mondoli kikim le aphuchong an keledam ahut, Arnam ke sai keklembang atum asai angdeng klemponlo lapen monit aphan kaharnuknei aherang arlo varchorlo. Sai keklembang atum apor ahut alamthe anke kadokave hirjuno saidelo: nang ok ahirjunolo, nang kahenodak kapahi’ipik akun ahirjunolo, lapen nang phuthak pima Arnam akar’idam paplengpi thekthedet ason kedoan ahirjunolo. Arnam keklemtang asai laso angdeng along ke jakongthe adak-atur si chepaklangponlo, laso aphijong atheke ado kipi asai angdeng Arnam klemphitlo, lapen kithi asat kelang vanglo. Lason asai along, monit ke Arnam aningkithi, kangsai, lapen ado kipi theklonglo, tebonta alang ke Arnam akangjinso, Alangli akanghon lapen Alangli akadiya tame theklonglo. Kadokave pima Arnam keklem, lapen kadokave pima Alangli kun chepaklangpon anke, monit aphan Arnam akanghonlo, lapen kadokave pima Arnam keklem anke monit akenangji kepachunpon longlo. Alangli keklem ke monit aphan kepachoklimji pu ajoinelo, lapen Alangli monit aphan kepajirpon ke alang aman angdeng atheng atenglo. Jongsi Arnam le lason klemkledet, monit ke Arnam angno kevangji un’edetpo lapen Arnam ahokpet arje kachinidun thekji akrong avedetpo. Monit atum Arnam aphan kekroidun kecheng arni pen pini an, Arnam ke pajo pen monit aphan monit aman angdeng atheng ateng pen padorbomlo, laso ajok, arlo, monit ke pajo pen Alangliphan chinidamlo. Pini arni an nangkele pen anchot si monit ke Arnam akangsai ke koanma akeme pu alam chinidamlo. Sai keklembang atum asai angdeng ke kasorjon apor arni pen pini an ahirjuno kipi asai aphrangsi kepholo. Monit aphan ke karnuknei aherang arlo ahirjuno si pilo. Jongsi Arnam lason klemkledet asonte, pini arni monit ke Arnam aphuthak ahok alam longdamdelo; lake Arnam ahirjuno kipi pen ajok si pima monit ke chenam-chenum Alangli kun chetongponlo. Monit aphan ke sai keklem atum asat kelang pen ajok cheklanglo. Alang chetheklonglo pima alang asotdut ke dengmeme apun kali, pima alang aman angdeng ke biheklang, pima alang ke Arnam akar’idam ningpangsam un’edetlo, lapen pima alang Arnam aphan ningkepangsam pu anke kadokave ta alam champlangchot anpar thangnat ta kalilo. Arnam ke monit aphan sai keklem atum asai angdeng along si ahirjuno pilo puvoiphit tame, aphrang alam chelangdamthu lote, halaso Arnam asai angdeng ke mesen: Lake monit aphan thedung akachelar angdeng an vanlo, lapen thedung akachelar alang kai akun along pemanlo. Sai keklembang atum apor aphrang ke, monit thangnat ta chethe kiri kekhandun aphuthak chininelo, kopuson si Arnam aphan kekroidun nangji, mate Arnam asai gian anta avelo, lapen mate alang ke pima Arnam asai monit aphan asat langthek pu tame chininelo. Sai keklembang atum apor ahut pen pini arni an, monit ke Arnam asai koanma akemepik alam theklonglo – lake monit atum mathadam un’elo. Monit ke koson si Arnam alang aphu tarlok akerap pen sai keklempon mathadun un’elo, lapen alang ke koan si alang aman angdeng atheng kibi loma theklonglo lapen pima alang phuthak ke amo kevangve kedopik chichinilo. Monit aphan Arnam ahirjuno kipi ahut, lake angthek kelongdamji aphan ajoinelo, lapen Alangli monit aphan kithi along anke bibedetlo. Alangli monit aphan hirjuno pilo puvoiphit tame, Alangli alamthe pen ajok si klemlo, lapen Alangli hirjuno kipi ke monit along chenam kloklelo, athe kopima Arnam hirjuno kipi ke monit athikpetpedet apot, lapen lasi Alangli hirjuno kipi alamthe anke monit aphan kepachoklimji pu ajoine penlo. Arnam monit aphan kangsai mate alangphan hirjuno pilo-pipe pu tame, sonni ta monit aphan pachoklimlo: Pasonni tame kepachoklimji aphan ajoine pen si klemlo pima atheke monit along ingthirthedetlo. Laso akrong pen ajok si monit aphan pacharkleplan unji, lapen atheke pima monit along akadure anke Alangli lamthe lapen asai pen ajok pachoklim pemanlo. Arnam asai asontin angdeng tame – lake kangtangrak alamthe, mate kangsai mate ado kipi pu sitame – monit aphan pachoklimlo, lapen ke chenam-chenum akechokvet asailo. Kedamtang akai along Arnam lason asai klemponpepinlang; pini arni, Alangli nangtum angbong si sai klemlo laso ajok nangtum Alangli kethek-kere aphan chorodunlo. Nangtum aklong’et le nang ajahak kesodet chechaknanglo puvoiphit tame, nang ning arlo ke chepabiheklo lapen monsam kelong si chemathalo; lake nangtum ahirjumelo laso angdeng along Arnam asai keklempon ahut kelongji aphanlo. Mohut along nang kopi si kelongdamji pu langdamdepin pen, kadokave pima nang Arnam asai nangtum along pini kethekdamlong ke kanghon henlo. Jongsi monit le Arnam akangsai lapen kepacharkle chomat longledetlo pulote, alang keklem-kedam lapen akar’ipik kamatha anke kaiketa athak angdeng si dopo, lapen alang akun ke kaiketa chelarle si dopo. Tangte lake Arnam aphan longtanglo pusi lakhapoma? Pini arni, nonputa monit along pima ane kethe lapen cheparoka dobomlang puvoiphit tame, monit akun ke aphrang pen non masap memuchetlo. Arnam nang pen kachepho ke nangphan kepajokji ajoine si klemponlo, lapen nang laso apor ahut keso ajahak chechaknang tame, nang kun along kachelar arni tame dopo. Halaso apor ahut, nang ke aphi chelangpo lapen theklongji koanma Arnam asai ke akereset, lapen halaso apor ahut nang ke ahokpet Arnam akar’idam chinidam peme thekpo. Pini arni, ajahak amonit atum komatma kaningje latum Arnam akar’idam chinidunlo pu do, bonta pima inutnat tame asai ateng klemkle. Ahokpet alam ke, latum don kapachobai alam si ningjelo, athema nonjong ahut latum Arnam akar’idam ke monit aphan kepajokji puloma mate monit aphan hirjuno kipiji puloma non si kachinijilang. Chenam nang ke non klardak pen theklongle, bonta nang theklongji pima Arnam anong kethe pen kevang arni nangle tanglo pu ahut, lapen koan alamjor kedo Arnam akanghon ke pu nang theklongji, laso ajok nang ke monit akai aphuthak chinidampo lapen nang ok ke pirthe along Arnam akanghon pen si dodunpo, laso ajok nang karjong ke jokvanpo, nang kai ke ningkarong pen si plengsetpo, lapen nang ke kaiketa Arnam pen si chetebokhetpo lapen Alangliphan si langpo. Halaso apor ahut, nang ke ahokpet chinipo koan si Arnam asai pini arni akenangsot ale kedo alam.

Pini arni, akeongpi amonit atum laso aphuthak alam chinidamdedet. Latum akekroi ke pima kesung kachechak ke ale ave pulo, latum aphan anke pirthe si che’obuplo, alangtum ahem akai ke sungkrunglo, latum anke Arnam kachinghonnei atum kalidetlo, lapen alangtum mohut kachetongdamji anke ingtingrimlo. Ajahak amonit atum kesung kachechak arsikjik ansi ledamlo, lapen alangtum akamunthi anta kithi ahin si chelarlo. Lake Arnam aphan ahok akanghon kalilo; lason amonit atum anke aphon ketan atumlo, latum ke kachepadukkrup avelo, latum anke boidet lapen ajakong avelo! Arnam ke monit aphan Alangliphan kepanghonji si ar’idamlo, bonta koanma monit Alangliphan kanghon, ansose thedung si monit kisunglo, lapen koanma monit Alangliphan kanghon, ansose si monit asat thedunglo. Jongsi nang Alangliphan chinghon tangte, asontin akisung nanglong nangklo tame – lapen jongsi nang chechak jokplot pulote, chenam ta asontin tame nangphan ke joike pen chemanpo lapen kadokave tame nangdung-nangrei ke monsam dopo. Nang le Arnam aphan inghon lote, nang ke chemathapo pima nangdung-nangrei ke lakhadam un’edet an dopo, lapen athema nang man angdeng ke biheklo nangphan kepacharkleji; anpartame, nang ke Arnam aphan ningpangsamji un’edetpo, lapen nang ke kaiketa mathapo pima Arnam akar’idam ke ingtuipik anlo, pima lake monit keledam un’edet ansi dolo. Athema la kadokave nangphan kepacharklepo – athema nanglong akeboidet ongpiklo, lapen pima Arnam akar’idam nang paplengpi thekthedetlo, nangphan ke arlo pen si pacharkle’etpo. Tebonta nangtum ke klardak pen lang nangji pima kepangthir asai ke kepacharkle pen anchot si unji. Lasi, lahei kijutsi arni ahut nangtum Arnam ahakhi chovek nangji. Koanma kethe akisung nangle pu sitame, nang kijutsi an kengkam chejorvek nangji, lapen nang chethe kijutsi anlo, nonpu tame nang Arnam aphan kekroi thirklong nangji lapen Arnam akangjinso along si donangji; lason pen anchot si Arnam aphan ahok kachinghon pulo, lapen lason anchot si kangtangrak lapen ardi doklong ahakhi pulo. Nangphan le Sobar asat nangkelang ahut tame, nang ningje nangji: “Ne ning ke Arnam apharman, lapen Arnam si nephan ke nanglong’et tanglo. Ne nangphan ningpangsam un’e – Ne kadokave tame Arnam aphan ningpangsamji si chehodai nangji.” Koanma nang Arnam aphan ningpangsam, ansose si nangphan Arnam pahirjumeji lapen thedung ajakong pen Arnam aphan chinghon thekpo; lasi, lason henlo, nang kekroi lapen kacheparai dopo, lapen chemathapo pima Arnam akanghon angbong akai kepathondun pen ardi kedo anpar ke akaprek ale thangnat avelo. Lake pudam melo pima monit ke mekkri-meklang kavedetji aphan Arnam aphan si chinghon nangji. Nang ok keboidet apor ahut dolo lapen nangphan ke penang an akisung-keboi si somhetlo puvoiphit tame, lahei apor ahut nang ke ahokpet Arnam along charchungpo, lapen nang karjong along nang chenomvetpo, lapen nang chenam-chenum mathapo, lapen pima nang kopine kachiki athai dolo. Lason pen si, nang ke penang an avarmon chepahai unpo, lapen lasi nang ke Arnam aphuthak lamhoi avelo athema nang kesung kachechak nangphu arlo nangkilut’it ajoine. Alar ke, nang kilun, kekan, lapen kardom si ninghangpo, kachingrum lapen kedo rappetji aphan, Arnam aphan kamunthidamvetji, lapen nang ke mathapo pima kadokave amonit atum, asonson alam, lapen hormu-hortar doan nangdung-nangrei anke pima Arnam kisiktang anke chetondamvetlo. Jongsi nang Arnam aphan kanghon ave, kadokave pima nang kelangdam anke nangphan padosojo chemanpo lapen thangnat ta nang mek angden ingsamjinjelo; nang karjong along nang ke jokvanve si bonta sung’itpo, nang ning ke kaiketa Arnam aphuthak lamhoi piverpo, lapen nang ke kaiketa mathapo pima nang ongdung akesung chechak tanglo, lapen pima lake aron kalipin pupo. Jongsi nang ningkarongji aphan ajoine chori dundedet, bonta Arnam aphan ningkepangsamji ajoine lapen Sobar nangphan akoi pijokplot pulote, lason keklempon ke Arnam aphan kanghon along nangphan thedung ajakong dopo. Monit ke kadokave pima Arnam kaningjetang doan alam ateng klem-dam thekpo, lapen kadokave pima alang keklempon anke Arnam aphan ningpangsam unpo – lahenlo kopima ahok asai ateng kacheparideng pu kipudam. Arnam aphan ningkepangsamji pu kachepeduk ke nang Arnam aphan akanghon akerap pen Alangli lamthe ateng asai keklempon henlo; ajat apor pu sitame – akaprek atum le ajakong avedet tame – nanglong amat ke nonputa atheke Arnam aphan kanghon aning dolo, atheke Arnam aphan si ongparpik pen chingtung-char’idam dolo. Lahenlo ahokpet aman angdeng athenglo. Koanma nang aman angdeng atheng kethe ke koanma nang Arnam aphan akanghon kethe pen si langdampo, nangphan asat kelang ahut arjapkluk dunma-un’ema, nang phuthak kopine avarmon kevang ahut nang boidet kalima-kelangma, lapen nang kortemar lapen ingjirmar atum nangphan kedengdedet ahut nang ke kedo adim chepathirthip unma-un’ema; ahok alam kevang ahut ke nang Arnam aphan akanghon kopi loma pu cheklangpo. Lake Arnam asai akeongpi pen thekdam longji pima Arnam ke chenam ta monit aphan inghonlo, monit akarjong amek le non ansi angton pen chingpudangjilang puvoiphit tame lapen alang ke Arnam asai lapen Alangli akar’idam akeongpi klardak pen theklongledetlo pu tame, mate penang an alam atheke Arnam akanghon meme aphuthak; monit along ke Arnam aphan akanghon masapsonat anvetlo. Nang Arnam aphan kadokave lapuan apor ahut tame kroi tanglo, lapen pini arni Arnam ke kadokave kachepajokji abidi ingthantheilo. Asai ateng pen langdam lote, nang ke thangnat ta chongvai athai avelo bonta akechok atovar ke’en henlo, akechok atovar pima nangphan karsikjik akangsai lapen Arnam ahin pen kangtuinei akepajokpon kacheja along dunvek nangpo. Kesung-keboi lapen kepacharkle chomatlongdet pen aphi ansi monit ke pima Arnam akanghon meme alam chinidamji. Pini arni an chomatdam longlok pen aphi, lake ningjemelo pima monit ke Arnam akanghon meme aphar chinidam longlo, bonta lake nonputa dordelang, athema monit ke puan si akadure dolo. Monit ke ansose Arnam akemeparpik asai chomatdamlong nangjilang, lapen ansose Arnam ahin pen kisiktang kisung kachechak pen kadokave kepacharkle nangjilang. Laso aphi ansi monit achethe akun ke kachelarplot unji.