Komatma Choklim Keman Nangji Atum Doan Kapangthir Angdeng Phovek Nangji

Jongsi nang Arnam aphan kroi, pulote nang Arnam aphan alam arju nangji, ahokpet aphan asai klem nangji, lapen nangdeng kedoan asai chepapleng nangji. Abat tame, nang kopisi kachetong nangjima ason doan chichini nangji. Nanglong sai nangkeklem, nangkepakeng, lapen nangkangsai kachetong ansi nang ke kachetonglongchot, jongsi nang Arnam aphan ale cho’en pen ning cheparongbom bonta komantu si nangphan Arnam nangkepakeng mate nanglong sai nangkeklem pu chichini thekthe – lake kedeng unji ason kalilo. Chenam laso apor along ke, nang nangmena atiri along charjap theklo, bonta lake non amat dordelang; aphrang dambom nangjilang. Arnam aphan kanghon kacharli angdeng ke ingtonte lapen kijut ave. Monit atum Arnam aphan kekroi ke isi akele kejoipik asai pusi kamatha, bonta ephong alangtum asai keklem pen chetong lote, alangtum chini longpo Arnam aphan kekroi asai ke alangtum kamatha ateng kejoike asai kalidet. Arnam monit aphan kapangthirji aphan sai keklem ahut, monit atum kisung chechak nangkok. Koanma inut amonit aphan kapangthir kethe, hala ansi alang Arnam aphan kanghon sitame thepo, lapen hala ansose si alangtum along Arnam ajakong cheklangdampo. Laso ateng si, inut amonit koan si kangthir kelong kijum, hala’an akijum si alangtum Arnam aphan kanghon kekamdunpo, lapen hala ansose akijum si alangtum along Arnam ajakong cheklangpo. Halason amonit atum akangthir lapen kisung koanma kethe lapen koan akethe akesosi alangtum kachechaknang, hala’an akaharnuk si alangtum akanghon sitame kamdampo, alangtum Arnam aphan kekroi ansose si ahokpet nangmanpo, lapen ansose kangthimlim si alangtum along kedo Arnam aphuthak agian nangmanpo. Nang kachetong ason along, nang theklongji ingthirjir amonit atum, kapakeng lapen keman ahut kisung kachetongnang thetan, lapen nang theklongji lake halahei amonit atum henlo lale Arnam kaharnukpik akanghon kedoji lapen Arnam aphuthak kangthimlim lapen aklong an kilutdam agian kedoji ke. Hala alangtum aphan kithip-kepakeng kephophe bonta athak kacheklang agian kedochot atumlo, lapen alangtum isivet alam si kipu thekji alam ke: “Arnam ke mepik, Alangli monit atum aphan kanghon-kangjinso piji atheke Alangliphan aning pahangji aphan.” Jongsi monit atum le kithip-kapakeng lapen alam kaparju abangphu kapaman chetong longlo, pulote alangtum Arnam agian aphuthak lam ningje thekpo. Lasi monit along Arnam asai koanma kethe, hala ansi anam kethe lapen ardi dopo lake. Koan si nangtum aphan arlo kilutdun un’e lapen koan si nangtum kamatha ajakong pen kapaledam un’e, hala ansi Arnam asai ke nangphan kacheraiji, kacheparidengji, lapen nangphan choklim nangpamanji ajakong kedolo. Arnam asai ardi koan kethelo? Jongsi monit aphan lapuson pangthirthe, jongsi Alangli aron ateng penle sai keklem kali, pulo tangte Alangli sai ke ajakong avedetji lapen ardi tame avedetpo. Lake kedamtang arni pen si kaningjetang alamlo Arnam laso amonit asanchom aphan ingvaiji lapen cheparidengji, lapen kijut arni ahut alangtum aphan ingthimlim pamanji; laso along, doan ason pen keprekdak ardi do. Nangtum along Alangli kedengpon asai koanma kethe, hala ansose si nangtum Arnam aphan akanghon kethe lapen kangthir kemanpo. Arnam asai koanma kethe, hala ansose si monit atum Alangli kachini-kethek ajakong lapen hala ansi Alangli phuthak agian kaharnukdampo. Kijutsi arni malom, ningkan suri throk Arnam kelang-chari akisik-kedang nangjutpo. La joike pen nangjut thekjima? Ephong Alangli monit akhei aphan kacherai longlo tangte, Alangli sai jutkokpoma? Lake lapuan joikejima? Arnam asai along pen ajat aphar le nang parnoji ninghang pusitame, la kadokave ta monit atum aklong kapaledam un’e ason saide. Jongsi nang le aklong paledam thekdet pulote, Arnam asai ke thangnat aminu mate ardi avedet si manpo. Arnam keklem asai ke aklong ripdam un’e; lake amutpi pen amat si nang kamatha pen ke kachetonte, lapen la koan si nang kamatha ason pen kachekup damde hala ansi, Arnam asai ke ajor kethe manpo; jongsi lake nang kamatha ason pen chetondet pulote, lake ajor amat si avedetpo. Pini, Arnam asai thepik pusi nang chinilo, lapen koanma nang ketheparpik pu kamatha kedo, hala ansi nang Arnam aphan ke aklong paphodam un’e pu chinipo, lapen Arnam keklem ason kopuan ketheloma nang chematha dopo. Jongsi Alangli monit aphan kacherai pu pen isi-hini athak kacheklangdong, kamathadam un’e asai si klemchot, lapen halaso aphi kaprek thangnat klemkle, pulo tangte amonit atum ke Arnam asai ardi koan kethe pu theklongji ajakong avedetpo. Jongsi non apor ahut nang asapsovet akangthir si longchot pusitame, lake nangphan kai along kethe-kekamdunji aphan ale dopiklo; lasi lake monit atum kachechaknang ke akenangsotlo. Pini ke, nang asapsovet akangthir si kelongchot, bonta mononphi ke nang Arnam asai ahokpet pen theklongpo, lapen padu ke nang ningjepo: “Arnam keklem asai thepik chenam!” Nang ning arlo ke lahei alam si dopo. Ihut aphan Arnam kapangthir asai kachetonglong tangdet apot si (sai keklempi atum aphan kangsai lapen adai ke’en apor), ajahak amonit atum padu ke ningjepo: “Arnam aphan kekroi asai sungpik binong!” Alangtum “sungpik binong” pu alamthe ke’en pen si, Arnam keklem asai ke aklong ripdam un’e pu, Arnam asai ke ardi lapen anam thepik do pu, lapen Alangli sai ke monit atum rim-birtivet nangji binong asonlo pu kapaklanglo. Jongsi, Ne lapuan asai keklemdet aphi ta, nang ke masapso anta agian longdunde pulote, Ne sai anam-aminu dobomjilangma? Lake nangphan nangpaningjepo: “Arnam aphan sai keklempi sungpik chenam, Arnam keklem asai ke theparpik chenam, lapen Arnam ke ahokpet pensi kamatha ajakong ingchopik! Arnam ke kanghon thepik!” Jongsi, isi kachetong apor chechakdet aphi ta, nangtum ke lahei alamthe angbong pen isinat tame ningje thekdetlo pulo tangte, lake nang methang along Arnam asai chepalongdundelo pu angtheklo. Arnisi, mo nang angtan adim along birta keme kapachetakdamlo lapen komatne inutbak nangphan arjulo: “Kosonlo nang Arnam aphan kekroi a’ot kedambom?” nang ningjedun thekpo: “Arnam kedeng asai ke meparpik khangjang!” Alangtum kematha kelongji ke nang lamthe abinong’et kachetong aphuthak si pudamji pu. Lahenlo ahokpet ahakhi kedodun puke. Nang pudunpo Arnam asai ke kechoklim abidi pensi plenglim, lapen Alangli sai nanglong kedo ke nangphan ahokpet pen nangbailo lapen nangning nangcherai’etlo. Nang kaiketa Alangliphan inghonji atheke Alangli ke monit akanghon kelongji aphan abat ansi apun kedo! Jongsi nang lahei ahormu aphan chingkithek, pulote nang monit aning aphan paklemdet unlo. Lahei kadokave ta hakhi kachepadodunlo. Jongsi nangle kacheklangdon ahakhi dodun thek lote, monit aphan amekkri pabuprup an aning kapaphodam, lale nang ke inut Arnam aphan ahokpet ning kedok abangphu pu kapacheklang, atheke nang ke Arnam aphan inghon pu angthek asat chipi thekdet abang, lapen nang pen ajok si, Arnam asai tame angthek pen amat si karjap pathirkluk unpo. Nang angthek pen karjap ajok pensi, kaprek atum aphan ta Arnam asai pariduntoipo, Arnam asai pachetongtoipo, lapen alangtum ajat apor a’ot alongle chetong pusitame, alangtum thirkluk pen arjap thekpo. Lahenlo kechoklim pen ahakhi kachepadodun isivet akrong puke, lapen lahenlo abinong’et jongklok pen nanglong pen kenangji ason. Nang lang nangji Arnam asai ke akele anam kethepik lapen monit atum kirimvet nangji apun do, Arnam ke akele kachinghon memepik lapen akele keongdung; Alangli kaningje anchot le kethek kali, bonta monit aphan ingsaithek, alangtum aning ingsirthek, alangtum aphan ning karong kevan, alangtum aphan cheparideng, alangtum aphan kacherai, lapen alangtum aphan choklim kapinchongthek. Nang kachetonglong alam pen nang chinipo Arnam ke inghonmemepik chenam. Lasi nang Arnam aphan koan chinghonlo? Nang ahokpet pen nangning along pen lahei ningjethekma? Nang lahei alam nangning aklong pen cheharjak theklo pulote, nang hakhi dodun thekpo. Ephong jongsi nang kachini ason laso angdeng an kelelo pulote nang Arnam aphan hakhi dodun thekpo, nang apun-achak dopo. Jongsi nang kachinidun laso angdeng an lele pulote, nangke akele kahelopik ansi dodunbompo. Kangthirjir kaselambom angdeng ahut monit atum jakong kadure kachetongnang lake jongjong kemanver alamlo, bonta kangthirjir kemandet aphi ke nang ningje thekpo: “Arnam ke Alangli sai along chokpik chenam!” Jongsi nang le lahei alamthe aphan asai keklem ateng pen kachinidam ason chepalong theklo pulote, lake nang eson kirimvet nangji ason nangchemanpo, lapen nang kachini ason tame anam dopo.

Nonhut apor nang kopilo kiridun nangji? Nang Arnam asai apharman hakhi dodun thekma thekthe, nang Arnam angthek lapen apharman cheparjan pi thekma thekthe, lapen nang Alangli sai along ke’enponji aphan apun-achak doma avema – lahei henlo nang kiridun nangji. Nanglong kopuan asai si Arnam nangkeklemlo? Nang kopuan si ketheklong lapen kopuan si kepapholong? Nang kopuanlo kachetonglong, lapen asat kachelanglong? Nangphan Arnam asat nang’ennon-en’enon, nangphan nang’ot-nang’ot’e, mate nangpakengma pu langdamdepin pen pusitame, Alangli keklem-kedam ason lapen Alangli sai nanglong nangklem’etlo. Bonta inut Arnam aphan kekroi abang ateng pen lapen inut Arnam arideng choklim keman kangtung abang ateng pen, nang methang sai keklem pen kachetonglong ason chelangdam pen Arnam aphan hakhi pidun thekloma? Arnam alamthe aphan nang methang sai keklem pen kachetonglong ateng kai along kroipon thekpoma? Nang methang sai keklem laong kachetonglong ason pen anut kaprek aphan kenangji ason pithekloma, lapen Arnam asai ahakhi kedo dunji aphan nangmethang akai arjon aphan chepakam thekloma? Arnam asai along hakhi kedopidunji aphan, nang methang kachetonglong ason, gian, lapen nang kitu anam aphan si chiki nangkokpo. Nang inut Arnam aphan hakhi kedopidun abang loma? Nanglong laso akemangdam doma? Jongsi nang le Alangli men aphan hakhi pidun theklo, lapen lapen anparta, Alangli sai aphan, lapen nang jongsi Alangli ahin pen Alangli mena amonit atum along pen kenangji arjan ateng dodun theklo, pulote nang ke Alangli hakhilo. Abinong’et penke kosonsi nang Arnam aphan hakhi kedopidunlo? Nang laso asai keklem ke Arnam alamthe ateng kedunji abidi kiridun lapen kemangdun henlo, lapen, nanglamthe pen hakhi kedodun ajok pen, monit atum aphan Alangli kapachiniji lapen Alangli sai kapatheklongji avarsai kipi. Jongsi nang ahokpet penta lahei kadokave ason ridun, pulote Arnam nangphan choklim nangpinchongpo. Jongsi nang kiridun ason ke Arnam arideng choklim keman lapen kijut apor ahut hirjume kelong pen kaprek thangnat avelo pulote, nang Arnam aphan kekroi kalangdam akrong ke kangthirjir kalidetlo. Nang kiridun nangji ke ahokpet akai along koson si Arnam keklem asai ketheklongji, koson si Alangli nangthengno Alangli kemang ason nangchepaklang along nang Alangli kar’i ason kapaplengpiji, lapen nang kosonsi Alangli kemeparpik lapen kachini angkang ketheparpik ahakhi kedodunji pu akrong si ridun nangji, lapen kosonsi Alangli nangphan nangkepakeng lapen nangke’otloma pu ahakhi si dodun nangji. Lahei kadokave ason henlo non nang kamatha parsikdam nangji ke. Jongsi nang Arnam aphan kanghon ke kaprek aphan kipi ave atheke Arnam nangphan choklim nangpinchongdet aphi nang Alangli kemeparpik along cheronponji aphan, pulote lake duredetlang lapen Arnam kenangji ason paplengdam un’elang. Nang Arnam asai aphan hakhi kedodunthek, Alangli kehang ason kapaplengji, lapen Alangli monit along cheklangdak pen keklem ason chetongdunthek apun donangji. Keso punon, mekkri punon, mate ningduk punon, nang sai kedengpon angthun along lahei chetonglongvek nangji. Lahei kadokave ta nangphan inut Arnam aphan hakhi kedopi abangphu ateng si choklim nangpinchongji aphan saidelo. Kopilo lake, abinong’et pen, lale nangphan kisung nangpachechaknang lapen choklim kemanji aphan nangparidun ke? Nang nonhut kachetongbom akisung ke Arnam aphan kanghon lapen Alangliphan hakhi kedodunji pu ajoine penlo? Mate lake ok-vi arpum aphan hirjume, nangkevangji arni aphan ale mate lekha aphan ajoine loma? Nang kamathadam, ningkirung lapen doan kemang ason doan lale nangkiridun lahei aphan pachoklim nangji lapen nangmethang kamatha penke aphrang pon un’e. Jongsi inut amonit hirjume kachepalongji lapen jakong along kachariji aphan si choklim man ingtung, lapen halapu anut kaprek abang ke Arnam aning kehang ason kapaplengji, Arnam keklem-kedam ason ahakhi kemanji aphan si choklim keman kangtung, pulote hini angbong pen koloso akrong abang si nang chongvaiji? Jongsi nang aphrang abang si chongvai nangji, pulote nang ke Arnam kibi apun-achak pen ke helopik an adim si dokokji. Ne ephong ningjelo Ne keklem-kedam asaon doan tame cheklangdak pen mindarsong angkang anta chiniji lapen Ne mo ke Recho ateng si mindarsong aphan chariji. Halapu ihin anat abang ke, nangtum aphan nangketang adeng abang ke Arnam asai aphan hakhi kedodun, recho cheplang ra mindarsong adang kacheklang nangji pu kalidet. Arnam keklem-kedam ason le sining lapen longle kachetangplup lonang. Kadokave amonit doan ta lahei aphan patheklong lonang lapen padeng lonang. Lahei alamthe ke Arnam Amethang pen pachephodam si kaningje, lapen monit atum keklem nangji ason ke Arnam apharman hakhi kachepadodun. Arnam along pen koanbak si nang non kachinidam? Arnam along pen koanbak aphan si nang hakhi dodun thekji? Arnam monit aphan choklim kapinchong kopi athelo? Ephong jongsi nang Arnam akemang kachini lote, koson si nang Alangli kemang aphuthak kopuson si kamathaparsik chepaklangji? Jongsi nang kerengdunbom a’ot pen ajok choklim cheman ingtung lapen Arnam asai ahakhi dodun ingtung, jongsi nanglong laso aphrang kepon ajakong do, pulote ajat ason ta kisung parpik avelo. Non apor monit atum kenangji ke kekroi. Jongsi nanglong laso aphrang kepon ajakong do, pulote ajat ningkirun ason, kithiklak a’ot, kaselet lapen ok-vi arpum aphan kachematha, kerengji aphan keongpik abidi, kachedandong akun, ning aklong pen kamatha’it ason, lapen lason si dopik ason an keloplotji aphan joikeji.

Lahei akangsai kephobom ahut, monit atum jakong duredet keman, mate ningkibi akamatha kedo, mate Arnam akemang aphuthak mate sai keklem nangji akrong aphuthak klardak kachinidam kadure lake keprekjek ason kalilo. Bonta ajat alam along tame, nang Arnam asai along ningchethe donangji, Job keklem ason. Job ta jakong duredet lapen amahang kethek arni amat si hirjuno kelong pusitame, monit akai along kedoan ason ta Jehovah si kipilo, lapen Jehovah anutvet henlo halahei kache’enthuji abang pu alang khinde dunde. Alangphan ajat pen le asat langlo pusitame, alang bangso akekroi aphang chelangkri pensi kedo. Nang kachetonglong ason along, Arnam alam pen nang ajat akangthir le chetonglonglo pusitame, monit along pen Arnam kenangji ason, pathihek pen, lake alangtum akekroi lapen Alangliphan alangtum akanghon. Alangli lapuson asai keklem pen choklim kapaman ke monit akekroi, akanghon, lapen akemang. Arnam si monit aphan choklim kapinchong asai keklem athe alangtum ke laso aphan theklongle, lapen akamatha chelongle; lapuson apor a’ot ahut, nangtum akekroi ke akenangsotlo. Monit akekroi akenang kedo ke kopine ason mek renglor pen kachecharche ahut, lapen nanglong akekroi kenang ke nang mena akamatha ason kachevar thekthe ahut. Nanglong Arnam asai aphuthak klardak kachini kave ahut, nanglong pen kenangji asonke kekroi kedo lapen isi thirklong atiri ke’en lapen hakhi karjapdun. Job labangso adim kele ahut, Arnam alang thengno cheklanglo lapen alangphan chingkilo. Atheke, lake nang ning arlo pen kekroi kedo pen anchot si nang Arnam aphan ketheklong unji, lapen nanglong kekroi dolo te Arnam nangphan choklim nangpinchongpo. Nang kopine kachepalong ninghang ason doan nangphan Arnam nangpipo. Jongsi nanglong kekroi avedet pulote; nangphan choklim nangpinchong henolo lapen nang Arnam asai theklonglelo, ansose si ketheklonglejilang Alangli ketheparpik ajakong. Jongsi nang Alangli keklem asai aphan nang sai keklem ahut kachetonglong ason pensi theklongpo pu kroilo, pulote Arnam nangthengno nangcheklangpo, lapen Alangli nangphan arlo pen si nangpatheang lapen nangja ponpo. Jongsi nang le Arnam along kekroi chepangbo’etlo pute, nang koson si Alangli sai ketheklonglang? Lahenlo si, nanglong kekroi kedo ahut ansi lapen nang Arnam ahin thangnat kahonthe chepadode, Alangli ajat le klem sitame nang Alangliphan kekroi kedo ahut ansi, nang kachetonglongtang ason doan pen Alangli nangphan kapatheangji, lapen halaso ahut ansi nang Alangli sai aphan theklongji. Lahei kedoan ason ta kekroi pen si kelong. Kangthirjir keman pensi kekroi ke kevang, kekroi ke amethang amat nangchingthur thekthe. Labangso, “kekroi” pu alamthe kopi aphan si kejongdamlo? Kekroi puke monit atum kopine ason ketheklongle mate kepapholongle ahut abinong’et pen ning kachethe lapen ahokpet a’ot kedo monit along aning, Arnam asai ke monit kamatha ason pen chetondam un’e, monit akhei atum kapaledam unji angkang pen angtan si kedokok tangdet aphi le. Lahenlo Ne kaningjebom akekroilo. Monit atum kisung apor lapen kapangthir kachetongnang ahut kekroi nangvekji, lapen kekroi puke aphi kapangthirjir keman padunphit asonlo; kapangthir kepaman lapen kekroi aphan pachekakdak un’e. Arnam ajat a’ot penle sai klem pusitame, lapen nang kedo avarmon kopusonlone puke alam langlepin pen, nang ke chethe aphi dun thekpo lapen ahokpet aphan ridun thekpo, lapen Arnam asai agian ridun thekpo, lapen Alangli keklem-kedam aphuthak kachini chepalongpo, lapen nang ahokpet ateng sai klem thekpo. Lapuson keklem henlo ahokpet akekroi kedo puke, lapen lapuson keklem si nang Arnam along kekroi chepangbobelang pu chepaklangpo. Nang Arnam ahokpet kekroi kachepadopji ke ahokpet ason aphan kangthirjir keman pen kiridun ajok anchotji, jongsi Arnam aphan ahokpet pen chinnghonthek lapen Alangli phuthak thangnat kahonthe chepadodelo, jongsi Alangli ajat le nangklem pusitame nang Alangliphan ning pangsamji aphan keklem ingtonte, lapen jongsi aklong an pen Alangli kemang aphan ridun ingtunglo lapen Alangli kemang ason aphan matha parsiklo. Kedamtang apor ahut, Arnam le nang recho ateng chariji pu kipu ahut, nang Alangliphan chinghonlo, lapen Alangli klangdak pen Amethang aphan nangthengno chepaklang ahut, nang Alangliphi dunlo. Bonta nonke Arnam chepatujoisi do, nang Alangliphan theklongle, lapen nanglong ongdung akisung nanglong vanglo – tangte nonke nang Arnam along ningchethe avedetloma? Lasi, ajat apor ahut tame chethe aphi dun nangji lapen Arnam aphan ning pangsamji si rinangji. Lahenlo abinong’et kekroi, lapen lahelo ahokpetnei lapen along kedonei akanghonlo.

Kedamtang apor ahut, monit atum methang lamrai ke’enji aphan si Arnam athengno kevangvang, lapen alangtum pupo: “Majok le Arnam aphan kanghon abang avedetlo pusitame, Neke Alangliphan inghon nangji.” Bonta nonke, kangthirjir keman asai nanglong nangleroklo, lapen lake nang kamatha ason pen chetondamdedet apot si, nang ke Arnam aphan kekroi chepavedetlo. Lake abinong’et akanghon loma? Nang Job keklem-kedam asai aphuthak ongdung aphong porhi longlo – nang halahei aphuthak chetengnelap loma? Ahokpet akanghon ke kekroi arlo pen si arje nangcheklang thekji. Nang kangthirjir kemanji aphan kepho asai pen ajok si nang Arnam aphan ahokpet akanghon chepado chengji, lapen lake nanglong kedo akekroi ajok pen si nang keklem-kedam along Arnam akemang aphan kamatha ardi pipon thekji, lapen lake kekroi pen ajok si nang ok-vi aphan che’o thekpo lapen chethe aphan ridunpo; lahenlo nangtum keklem nangji asai. Jongsi nang lason klemlo pulote, nang Arnam keklem-kedam ason theklongpo, bonta jongsi nang kekroi duredet, pulote nang ke Arnam keklem-kedam ason theklonglelo mate Alangli sai aphan chetong thekthelo. Jongsi nang le Arnam ahin pen asai along nangpa’enpon ingtung lapen choklim man ingtung, pulote nanglong kadokave ason dopet nangji: kisung kachechakji akar’i, kekroi, kachechak ajakong, kapinkhat ateng keklem a’ot, lapen Arnam asai aphan kachetonglongji aphan abidi, Alangli kemang aphan kiripdun, Alangli ningduk alam kamatha parsikdun, lapen lasonsi dopiklang. Inut amonit aphan choklim kapaman ke kejoike kali, lapen nang kachetong asitin kapangthir asai tame kekroi lapen kanghon ke kenangsotlo. Jongsi nang Arnam arideng pen choklim cheman ingtung, lake nang aphrang kedam atovar along kapaphrangduntong aret pen anchot ke dorde, mate thangbakbe Arnam apharman methang aphan chepakamchot anvet le kechokji kali. Inut Arnam arideng pen choklim kapinchong abang kachepamanji aphan nanglong ongdung ason donangji. Nang kisung kachetong ahut, nang methang ok-vi apharman kachematha aphan saivet thek nangji lapen Arnam aphuthak kakhindedam pavedet’un nangji. Arnam nanglong pen kachepatujoi ahut, nang kekroi chepadothip pen Alangliphan ridun nangpo, pavir longle lapen pachethak longlepin pen nanglong aphrang kedo akanghon aphan chelang-charibom nangpo. Arnam ajat le nangklem sitame nang, nang ke Alangli kisik-kedang along chehodaidun nangpo lapen nangmethang ok-vi aphan hirjuno kachipiji chisikding nangpo Alangli aphuthak kakhinde kachepaklang alar ke. Nang kangsai pen kachetongnang ahut, nang Arnam aphan aning pangsam nangpo, nang le ningdukpik pen chirunang mate nang kachinghon ahor pen kachekak ning hanghedet pusitame. La anvetlo ahokpet akanghon lapen kekroi puke. Nang abinong’et abang atheng ajat le do pusitame, nang aphrangsi ke kisung kachechakji aning kehang lapen ahokpet akekroi dovek nangji, lapen nang ok-vi aphan kachekakji aphan akemang ta dovek nangji. Arnam aphan ning kapangsamji aphan nang kisung kachechakji aphan ninghang nangji lapen nang jongjung aning kehang ason along kanahok tame chingtang ingtung nangji. Nang ning arlo pen methang aphuthak ning chirui nangdothek nangji: Kedamtang apor ahut, nang Arnam aphan ning pangsam thekthedetlo, lapen non abang ke, nang methang aphan ningchedonopiklo. Nang lahei alam aphuthak masapsobak anta kaduredam avedet nangji – lake lahei pen ajok si Arnam nangphan choklim nangpinchongji. Jongsi nang lahei apun-achak chepaledam thekthe pulote nangphan ke choklim nangpinchong un’elo.

Inut Arnam aphan sai keklempi abang ke Alangli pharman koson si kisung kachechakjima pu chini nangji; laso pen anparta, alangtum chini nangji Arnam aphan kekroi atheke Arnam aphan akanghon kiridun. Arnam nangphan asai nangke’en ke nangphan nangkapangthirji anchot aphan mate nang kisung nangpachechakji pu aphan anchot kali, bonta alarke Alangli nangphan asai nangke’enpon ke nang Alangli keklem-kedam kachinidunji, monit achethe ahokpet ardi kachiniji, lapen jasemetpet, atheke nang Arnam aphan sai keklempi puke kejoike asai kali pu kachini thekji aphan. Arnam asai aphan kachetonglong puke kanghon-kangjinso pen ningcheparongchot pu aphan kali, bonta alar ke nanglong kedo Alangli pharman akanghon ajoine kisung kachetong. Nang Arnam akanghon-kangjinso chodenglong tangbom apot si, nang Alangli nang adai nangke’en tame chodeng nangpo; nang lahei kedoan ason chetong nangpo. Nang nangmethang along Arnam kapatheang chetong longji, lapen Alangli kosonsi nangphan kopi a’ot pensi sai nangkeklem lapen nangkangsai pu ta chetonglongji. Laso abidi pen si, nang kachetonglong ason ke plenglim manpo. Arnam nanglong Alangli kangsai lapen adai nangkepakeng asai nangdeng’etlo. Arnam alamthe nangphan sai nangklem’etlo, bonta hala anchot kali; lake nangphan nangparjang lapen nangpatheang’etlo. Nang keme ason mathadamde lapen jakong kavedet ahut, Arnam nangpharman nangmatha. Lahei kedoan asai tame monit pen kacheho kedoan ason tame Arnam kapakan-kapaklem angkang along si do pu nangphan nangpachini aphan. Nang matha tahai Arnam aphan kekroi puke kisung kachechak aphan, mate Alangli pharman kedoan a’ot asai keklem; nang matha thai kekroi atheke nang ok-vi arpu monsam pen kedo longji aphan, mate nangkai along kadokave ason tame neilim pen si kedamji aphan, mate ajat kedoan ason along tame rengmesen lapen chepaduk nangnepinji pu. Bonsitame, lahei kedoan akemang pen isibak tame monit atum Arnam aphan kekroi pen kacherapdam nangji ave. Jongsi nang lahei akemang aphan si kekroi pulote, nang kelangdammek ke kechokchelo, lapen choklim kemanji pu aphan ke un’epin khangjanglo. Arnam keklem-kedam, Arnam kechokpik akun, Alangli kachini parpik, Alangli lamthe, lapen Alangli jakong ketheparpik lapen aklong an kachechardamde akaharnuk lahei henlo monit atum kachini nangji ason-amunglo. Lahei ason aphan kachini pen, nang laphan nangmethang jongjung akenangji ason, ning kachethe, lapen kamatha pen chepajokji aphan asai enpon nangpo. Lahei ason aphan kepavedet pen anchot si nang Arnam pen kehang a’ot chepapleng unji, lapen lake lapuson keklem pen anchot si nang chethe chepado thekji lapen Arnam aphan ning pangsam unji. Arnam aphan kekroi akemang ke Alangliphan aning kapangsam lapen Alangliphan kenangji akun ateng kerengdun, atheke Alangli keklem-kedam lapen anong labangso adilung amonit atum pen hala apun-achak kave amonit atum along cheklangdamji pu aphan. Lahenlo Arnam aphan kekroi kechokvek kelangdam ason, lapen lake lahenlo nang kiridun nangji akemanglo. Nanglong Arnam aphan kekroi aphuthak akechok kelangdam donangji lapen nang Arnam alamthe kachepalongji aphan ridun nangji. Nang Arnam alamthe cho lapen jun nangji lapen nang ahokpet aphan kerengdun pen chepaklang nangji, lapen jasemetpet ke nang Alangli keklem asai aphan, Alangli mindarsong the-bi adang keklem kemeparpik asai aphan, lapenpen Alangli ok-vi along keklem asai aphan langdunthek nangji. Monit atum, amethang jongjung kachetong ason pen, alangtum along kosonsi Arnam sai keklem lapen alangtum ahin Alangli kemang kopuson pu aphan anchot si chorodam thekji. Lahei kadokave akemang ke monit along kedo kapahi’i otlangno akun doan kapavirji aphan. Nanglong kedo kangthirthe lapen kechokche ason pavirdet aphi, lapen nang kamatha kechok damde aphan plungjui aphi, lapen Arnam aphan ahokpet kekroi pathurdet aphi – ahokpet akekroi pen anchot si nang Arnam aphan aphokpet pen chinghon thekji. Nang Arnam aphan kekroi atiri pen si Alangliphan abinong’et ingthimlim pen inghon thekji. Nang Arnam aphan kroikrepin pen Alangliphan inghon thekjima? Nang Arnam aphan kekroi tangdet apot si, nang lason aphuthak kamatha chepangvuikung thekthelo. Ajahak amonit atumke Arnam aphan kekroi ke alangtum along hirjume vanji pu ketheklong lote jakong nangplengset titi, bonta alangtum kapangthir asai chechak nangji pu ahut lote doan ajakong ta chepangbolap titi. Lake Arnam aphan kekroi puloma? Kijut ahut ke, Arnam aphan kekroi chepalongle aphrang nang amutpi lapen akangthim pen amat si pinkhat ateng keklem a’ot chepalong nangji. Nang Arnam aphan kroi bonta nang Alanglilong kehang ason chepadobom, nang kache’o thekthe kamatha ason, kelophlot thekthe jongjung aning kehang ason dopiklang, lapen antame nang ok-vi arpum aphan hirjume chohangbom lapen nang ok-vi aphan Arnam nang pajokji nangji, nangkarjong aphan pajok nangji pusi ning kehang – lahei kadove ta kechokche kelangdam amonit atum a’otlo. Dhorom aphan kekroi amonit atum Arnam aphan kekroi lapen ning chethe do pusitame, alangtum methang akun kachelar’i akar’i ave lapen Arnam agian kachepalongji aphan ridunde, alar ke alangtum jongjung ok-vi akar’i aphan si ridunchot. Nangtum angbong pen ongdung atum dhorom aphan ning kehang angdeng along kedo akekroi dolo; lake Arnam aphan ahokpet ningchethe kalidet. Arnam aphan kekroiji aphan ke, monit atum Alangli joine kisung kachechakji aphan kachisikding aning lapen methang abat kache’obup unji akar’i dovek nangji. Monit atum la sonni alam chepaplengdamdet un’e te, alangtum akekroi choklim kalilo, lapen alangtum amethang akun along kachelar chepavang thekthelo. Ahokpet amutpi pen ahok aphan kiridun, Arnam agian kiridun, lapen chethe aphan kiridun atum anchot si Arnam aphan ahokpet kekroi atumlo.

Nanglong kangsai nanglerok apor ahut, koson si nang laso akangsai kachechakji aphan Arnam asai ale ke’enpo? Nang akaheno si matha damjima, mate nang Arnam akangsai lapen kapangthir asai aphan akeme ahin pen si langdamjima? Arnam akangsai lapen kapangthir asai pen ajok nang kopilo kelongji? Arnam aphan nanglong kedo akanghon nangthejima? Nang kapangthir asai kachechak apor ahut, nang lahei Job kachetong akangsai asai enponjima lapen Arnam nanglong nangkeklem asai along si ning chipidunvetpoma? Job akangsai pen ajok Arnam monit atum aphan kopuson si satlang ke’en nang theklongloma? Kopuson aning kirung si Job akangsai nanglong kevan thekji? Nangphan nangkapangthirbom anglum nang Arnam aphan hakhi kedodunji aphan ninghangjima, mate nang methang ok-vi arpum aphan kerengme avarmon along ning pangsamji? Arnam aphan kekroi pu aphuthak ahokpet nang kelangdam ke kopuson aphanlo? Lake ahokpet pen ta Alangli pharmanlo, lapen ok-vi arpum aphan kaliloma? Nang ahokpet pen ta kiridunvung along aphi kidunbom kopine akemang do chenamloma? Nang Arnam arideng pen choklim kemanlongji aphan pura kangthirjir kapaman asai kachechakji aphan ninghangloma, mate Arnam arideng adai kepho lapen hirjuno kelong si chechakjima? Arnam aphan hakhi kedodun pu aphuthak ahokpet pen nang kelangdam ke kopilo? Monit atum kejongvet avarmon along Arnam aphan hakhi kedodunji pulote kopisi klem nangji? Sai keklemvoi Arnam abang Alangli nanglong sai keklem ahut keongdung ason nangpaklang tangdet le, kopi apotsi nang kaiketa kedamjui aphan aning kamatha kedoverlo? Nang Arnam aphan kekroi ke Arnam apharman loma? Nangtum angbong pen ongdung atum ke, nangtum akekroi nangtum mena keklem alakha along pen isi aphar anchot, nangmethang jongjung ale kachepalongji pu kiridun aphan. Kijumpik aphai amonit atum si Arnam apharman Arnam aphan kekroi; lake kachedandon a’ot kalilangma?

Kangthirjir kapinchong asai kechengsi akemang ke monit atum akekroi aphan choklim kapinchong. Kijut ahut ke, kopima kelong lake nang kelo kangtun asonlo bonta, laso apor ahut si, nang lo thekthe; ajahak amonit atum ke ahonjeng dakjir anle ning chethe avedet apor ahut pusitame kekroi chepadothek; lapen monit atum amethang akai along kevangji arni apharman kelangdam aphuthak ke anpar thangnat ning chethe avelo. Laso apor ahut anchot si Arnam kapangthirjir kapinchong asai ke kangtonji. Monit atum non amat ke labangso kereng lapen kithi adak kahelatvoi apor ledamdelang, lapen alangtum kithi chomat longlelang, lasi kangthirjir kapinchong asai ke ketang kalilang. Hala sai keklempi abangphu angdeng along kedo amonit atum ta amutpi pen amat le kangthirjir kalilang. Job abang ahir kangtangpik kapangthir asai angdeng chetongponlo, lapen ajat ason ta kachikiji aphan avedetlo. Monit atum ning chethe lapen kachikiji adim avedet angdeng an kapangthir asai chingtang nangji – la anvet si ahokpet kangpangthir asai pu kipudamji. Hala sai keklempi atum akai ahut ke, jongsi nangning le kaiketa Arnam athengno ke dojoi, lapen Alangli ajat le klem pusitame lapen Alangli nangphan ajat le kemangdam dolo pusitame, nang kaiketa Alangli nangpinkhat ateng klemlo, pulote kijut atovar along ke nang Arnam keklem ason doan chinilapji. Nang Job akangsai chetongji, lapen halaso aporthot ahut si nang Peter akangsai tame chetongji. Job aphan asat kelang ahut, alang hakhi dodunkoklo, lapen kijut ahut ke, alang thengno Jehovah cheklanglo. Alang hakhi dodundet aphi ansi alang Arnam aphen kelangji apun kedolo. Kopi apot si kipulo: “Ne keter apirthe pen chepatu bonta kangthir alongri aphan ke Methang aphan cheklang”? Ladak kipudamji puke nang ingthirjir kedo lapen hakhi kedo ahut anchotsi nang nang Arnam aphan chepathengnoji apun kedoji. Jongsi nang Alangliphan hakhi dodun thekthe, nanglong Alangli raje ketheklongji apun ave. Jongsi nang kangthirjir kapinchong asai chetongbom ahut aphi chirui lapen Arnam aphuthak kakhinde alam chepaklang, lason pensi Alangliphan hakhi kedodun thekthe lapen Sobar apharman kangnek ahanmi abor chemandet, pulote nang ke Arnam nangpacheklangji aphan avarsai cholongdundelo. Jongsi nang ke Job asonthot, lale kangsai kedobom angbong methang a’ok-avi aphan hirjuno kachipi lapen Arnam aphuthak thangnat kakhinde chepaklangkle, lapen thangnat kakhinde pavepin mate alang lamthe pen pap sai dengdepin pen methang ok-vi aphan chepahelo thekdet, pulote nang ke hakhi dodunpo. Nang isi angdeng an kapangthir asai kachingthang ahut lapen Job ateng manthekbom, amutpi pen Arnam athengno kapinkhat ateng keklemthek lapen Alangli along pen kaprek thangnat akenang chepadode mate nangmethang kamatha ason ave, pulote Arnam nangthengno nangcheklangpo. Nonke Arnam nangthengno nangcheklangkle atheke nanglong nangmethang kamathadam ason, jongjung aphan kachelangvong ason, ning kelangno alam kamatha, jongjung akenang lapen ok-vi akar’i dopik, lapen nang ke Alangli raje kelang apun ave. Jongsi nang Arnam aphan kelang longlo pute, nang ke Alangliphan nangmena kamatha alam pensi pundampo lapen, laso keklem along, nanghin pen si Alangliphan thengparpan along sakdampo. Jongsi nanglong keongdung nang kamatha pen kachetonte ason vangdet bonta nang halatum aphan ihin saivet thekdetlo lapen lahei ahormu along pen Arnam keklem-kedam agian longlo, lapen jongsi kapangthir asai angbong nang Arnam aphan kanghon apharman nangning chepurdaklo, pulote lake hakhi kedodunlo. Jongsi nanghem le monsam pensi plengthip, nang ok-vi akarengno chingtangbom, majok ta nangphan nang nangchenek abang ave, lapen mondoli along nang korte lapen ingjir atum nanglam nang arjupik pulote, nang Arnam aphan kanghon apharman nangning chepaklang thekjima? Bangso apor a’ot nangphan nangpangthir unjima? Kapangthir asai pen anchot si nanglong kedo Arnam aphan akanghon kacheklang unji, lapen lahei nang kamatha pen kachetonte ason nangkeman pen anchot si nangphan choklim nangpinchong unji. Keongdung kachingbarbe lapen keme ason asai pen si, lapen Sobar kachepaklang ason kedoan asai ke’en pen si – alang keklem-kedam, alang akoi kipi, alang kapasiksak lapen kachongthui – Arnam nangphan Sobar along kedo abolon kavepik araje klardak pen nangpaklangji, lapen laso pen si nanglong Sobar aphan kethak’un abidi nangpachoklimpo, atheke nang Sobar aphan langseletji lapen alangphan ke’obupji aphan.

Nang kachetongnang sai kapachun un’e, jakong kadure, nang kamatha kememe apor, lahei kadokave ta Arnam asatlang pule pudet tamelo. Atheke kadokave ta Arnam along pen si kevang, lapen kadokave ason ta Alangli ri along si do. Nang sai pachun un’edet punon mate nang jakong duredet punon, lapen nang chingkoi punon, lake kadokave Arnam along si chikilo lapen lake Alangli chikip arlo si dolo. Arnam nangkelang ateng pen si, lake nangphan satlanglo, lapen jongsi nang laphan pangthek thekthe, lake nangphan bai-palu mandetpo. Monit atum kapangthek nangji sonni angdeng do: Isi abang ke Karjong Kangthir pen si kevang, lapen hala akaprek abang nangkabar adim meme ke Sobar. Isi angdeng abang ke Karjong Kangthit nangphan nangpatheang lapen nangphan methang aphan kachichini, kachekak lapen methang aphuthak ning kachedonoji aphan avarsai nangkipi lapen Arnam aphan abinong’et amutpi akanghon kedothek, nangning aphan Alangliphan ningpangsamji akrong along kibi. Hala kaprek abang ke nang methang aphan chichiniji, bonta nang kamatha kememedet lapen jakong duredet. Laphan ta Arnam kapangthir asai angdenglo pule pudet tame, lapen Sobar kebai-palu asai puta pume. Jongsi nang lake Arnam nangkapajoklo pu pangthek thek lapen jongsi nang nonke Alanglilong harnukpik apreng dolo pu akamatha chelong, lapen jongsi nonpen ke nang Alangliphan kachituji bor’ipo lapen anparke halapuson kelanglevong along klodunde, jongsi nang Arnam alamthe kechoji lapen kijunji along jakong chipipo, lapen jongsi nang methang aphan duredet pu kachematha pasikpo lapen isi kar’i padikrim kedo aning chepadopo, pulote lake Arnam asatlanglo. Mo kisung jutdet aphi lapen nang puthot aphrang kedambom ahut, Arnam nangphan nangjaponpo, nangpatheang, nangpaklar, lapen nangpangkrangpo. Bonta jongsi nang laphan pangthek thekthe lapen jongsi nang ke kedomeme si kamatha, methang aphan thangbakbe ningchethe athai kave along kache’odam, jongsi nang lapuson akrong pen si mathadam, pulote Sobar kebai-palu ke nanglong vang’etpo. Job satlang kachetong ahut, Arnam lapen Sobar ke kachedak loklok, lapen Arnam abang Sobar aphan Job aphan kisung kipiji ahovang pilo. Alam le Arnam si Job aphan satlang ke’en pusitame, lake Sobar is Job apharman kevang. Atheke Sobar, lake Job aphan kebai-palulok, bonta Job ke Arnam ahin si kedokok. Jongsi alam abang lapuson kalidet, pulote Job ke kebai-palu along jangdun’etpo. Monit atum kebai-palu along keklo lote, alangtum pherememe akesung along keklolo. Kapangthir asai kachingtang aphan ta Arnam ahin pen satlang pudetme, bonta jongsi nang angdeng keme alongle kedo kali pulote, lake Sobar ahin pen bai-palu pudetpo. Jongsi nang mang kelangdam aphuthak klardak kalilang, Sobar nangphan mang aphuthak nangkoipo lapen nangpamanghupo. Nang laso aphan chinine aphrang, nang kebai-palu along klo’etpo.

Jongsi nang Arnam asai chetonglongle, pulote nang ke mantune ta choklim chepaman longlelo. Nang kachetonglong ason along, nang angton pajirmi pen ta lutdam nangji. Langdam sinang, kopi ason si nangphan kamathathap lapen isi akele kemangdam nangpachebirti longlo, lapen kopuson kacheton asai keklem si lahei akisung kapajutsi aphan kirimlo? Jongsi nang Arnam asai chetonglongthek pulote, lake nanglong atheng dolo. Jongsi nang ajakong kedo ason si cheklangchot, pulote lake atheng kali lapen nang ke amutpi pensi karjap pathir thekthelo. Nang Arnam asai aphan chetonglong thekdet ahut ansi lapen nang laphan ajat apor lapen nahok adim along tame chetonglongthek lapen matha parsik thekdet ahut, mo nangtum kivi abang aphan kache’o thekdet lapen Arnam aphan kachiki kangton nangji ahut, lapen nangtum Arnam abinong’et keklem asai ketheklong thek ahut – halaso apor ahut anchot si Arnam akemang ke chepalong’etlo puji. Non amat ke, keongdung amonit atum kosonsi kachetong nangjima chinine, lapen kopine esonbak alamki pholok ahut, alangtum kosonsi halaso aphan kachere pen kelang nangjima chinine; alangtum Arnam asai kachetongji aphan abidi ave, lapen alangtum isi kangthirjir karjong akai kedodunji aphan thekthe. Nangtum Arnam alamthe enpen si methang choklem-chodam akai along chevan nangji.

Ahut pen ke Arnam nangphan isi angdeng akamatha nangpi, nangphan arlo kedo aningkarong nangpachepangbo lapen Arnam do pu kachepangbo nangpaman akamatha, puanpinji nangphan ke kangting along nangpajangchok an. Lake isi kapangthirjir kapaman ajatlo. Mantune nang ajat le klem tame, lake kaiketa kekveng si damjui titi, mate nang isibak arpong parong damrong. Lake Arnam kapakeng asailo. Ahut pen ke, nang kopine kapinkhat alam ateng kalidet asai keklem ahut lapen Arnam ahin kachedandong asai keklem ahut, anut kaprek majok ta chininedet tahai – bonta Arnam chini. Alangli nangphan nanglole, lapen Alangli nangphan nangpakengji. Karjong Kangthir asai ke pajirmi pame an. Alangli chere peme pen si monit atum alamthetin lapen asai, alangtun asitin kachetevar lapen keklem tame kelangdun, lapen alangtum kamatha lapen abidi kelangdun atheke monit atum lahei ason aphuthak arlo pen kacheroktok kelongji aphan. Nang kopine kekekveng asai ephong le keklem lote, nang kopine kaprek ason puthot choklemthupo lapen lake kevek ahin si damlethotlipo, lapen te nang pajo pen Karjong Kangthir asai chinilongpo. Keongdung aphong kapakeng kephonang pen ajok si, Arnam pen kachekeng aren along kedoji aphan kopisi klem nangjima nang chinipo lapen Alangli kemang ason pen kopi si kachekengke loma ta chinipo. Kijut ahut ke, nang mena arlo pen si Karjong Kangthir akeja aphan kachelon lapen akechokvek alamthak chepadodun thekpo. Ahut pen ke nanglong kachedandon a’ot ta doji lapen nangphan arlo pensi Arnam nang ingchekdunpo. Lake Arnam nangkepakeng pen si kevanglo. Jongsi nang Arnam alamthe rim-birtite, pulote Alangli nangphan masap ta kamatha ning nangchipipelo. Nang Arnam alamthe aphan koanma ardi kipi pen kelang, hala ansose si Alangli nangphan nangpatheangpo. Non amat ke, mondoli along ajahak amonit atum lale kachingvuinok lapen kamanghu akekroi si dorong, lapen alangtum keongparpik kachelonle ason klem aret lapen thangnat aron kekroi avepin pen si kedo-kedam, lapen lasi alangtum along Karjong Kangthir asai ke klardak pen chechardamdelo. Ajahak amonit atum ke alangtum adeng aphan chepanungkuk titi atheke tangka kachepalongji aphan, hong dam pen thangnat aron ateng kapakengdun avepin pen beha choklem damji; lasonsi inut amonit ansose kapherememe along si damrong. Alangtum non amat Karjong Kangthir asai anchot le kave pu kali, bonta mohut along, alangtum choklim kemangji ke sungkrungpo. Keongdung amonit atum do alangtum along Karjong Kangthir kedeng asai thekdam longle lapen Arnam kapakengdun pu angthek ta thekdam longle. Alangtum ke hala Arnam akemang aphuthak klardak kachini kave lapen Alangli sai aphan kachinine atumlo. Komat atum si kapangthir asai angbong karjapthip thekji atum, Arnam ajat le klem pusitame Alangliphi kidun atum, lapen akijumnei along ke’obup thekthe, mate Peter mesen pen keklem along kachepalong adim pen 0.1% anta chepalong, bonta alangtum aphan Arnam asai ke’enpon ahin along ke alangtum thangnat anam ave. Keongdung amonit atum ke ajat ason aphan ta kachini prapjin, Arnam aphan ta ahokpet akanghon do, lapen Peter angdeng aphan litphlotthek, lapen Arnam choklim kapinchong asai alangtum along klem. Aron ateng kedo lapen katheangdang keman ke lapuson amonit atum along si kevang, lapen jongsi alangtum along Arnam aning kehang pen kopine kachetonte ason dokok pulote, alangtum menmen ephongvet amat si phlungphit theklo. Lapuson amonit atum ke ser, rup, lapen ador kesopik arlong saidelo – alangtum anam ke aketheneilo! Jongsi Arnam le keongdung asai klemdet aphi ta nang ke sangti mate arlong chedapdaplang pulote, nang ke thangnat ale vangvelo!

Hala kethepik dragon ke’er adet along Arnam asai ke kemeparpik chenam lapen aklong paledam un’e. Alangli isi amonit adilung aphan ke choklim pinchongpo lapen akaprek aphan abang ke plungphitpo, atheke mondoli along ajat amonit tame do’et – hadak ahokpet aphan aning kedok atum do, lapen aning kedokde atum ta do; hadak Arnam asai kachetonglong atum ta do, lapen kachetongte atum ta do; hadak alangtum methang adeng kacheklem atum do, lapen kacheklemkle atum ta do; hadak Arnam aphan asat kachepaklang atum do, lapen kachepaklangkle atum antalo – lapen isi asanchom amonit atum ke kekroikre atum lapen kapahi’i amonit, lapen alangtum aphan ke pavirdet chenampo. Jongsi nang klardak pen Arnam asai chinine, pulote nang ke kamatha kechokche along si dopo; laso atheke Arnam asai ke hala aphai kijumdet amonit atum along ansi cheklang thekchotji. Laso apot ahut, klardak pen komatsi Arnam aphan kanghon lapen komat si kanghonhe cheklangdakpo. Arnam aphan ahokpet pen kanghon atum along ke Karjong Kangthir asai dopo, lason ahut si komat si Alangliphan ahokpet pen kanghon kali atum ke pacheklangdakpo Alangli asai kedeng akengkamtin pen ajoklo. Alangtum ke kivirdet nangji ahormu si chemanpo. Lahei amonit atum aphan ke kacherai asai klembom angdeng along si pacheklangponpo, lapen lahei amonit atum ke choklim kemanji aphan apun-achak kave amonit atum saidelo. Choklim kapamantang atum ke amutpi pen si Arnam kacheparideng tanglo, lapen alangtum ke Peter asonthot si Arnam aphan inghon theklo. Kacheraitang abangphu atum ke angthun chimitmepin lapen kerengsap pen kanghon avelang, bonta isi kithiklak akanghon anchot, lapen alangtum aphan ke Arnam aphan kapanghon bor’i. Angthun kimitmepin akanghon nangkebar ke asai keklem pen kelong kachinidam kachepalong pen ajok. Labangso akanghon monit aning cheraidetji lapen alangtum aphan amethang amat si Arnam aphan kapachipidetji; Arnam alamthe si alangtum atiri chemandetpo lapen alangtum Arnam apharman kisung kachechakji undetpo. Chenamlo lake, lahei ason ke inut Arnam arideng pen choklim kemanji amonit along si dochot. Jongsi nang nangpacheraidetji aphan ansi ridunchot pulote, nang ke Arnam aphan hakhi dodun thekthelo; jongsi Arnam le monit aphan kacherai pen si Alangli kapajok akemang kachepaplengdet, pulote hala sai – keklem atum angdeng si asai patangdetpo. Bonsitame, monit aphan kacheraile Arnam kijutsi akemang kalidet, hala ke monit aphan choklim kapinchong. Lasi laso angdeng asai ke monit aphan kacherai pu alar ke, monit aphan choklim kapinchong lapen kapavedet angdeng pule punon. Ajahak amonit atum ke amutpi penle kacheraitang kalidetlang, lapen alangtum aphan kacherai angthun along si, isi amonit adilung aphan ke choklim pinchongdetpo. La chetni asai aphan ke kapacheton pen si keklem. Monit atum lapuanpin asai angdeng arjikiding anta cheterekjui kalidetlo, lapen lake kacherai asai abang ke pleng’etlo pusi paklanglo – lake kacheraidet keman along abinong’et alamlo. Kapangthir asai ke kacheraidetji pu aphan kali, bonta choklim kapamanji apharman. Kapangthir asai avepin pen ke, monit atum aphan choklim pinchong un’e. Lasi kapangthir asai ke anam thepik khangjang! Pini arni isi adilung amonit atum aphan ke choklim pamanlo lapen cheparidengdetlo. Kedamtang apor ahut kaparno son kep ahirjume ke hala choklim kapinchongtang atum aphan si kimindam. Alangtum aphan pirthe along arje kelarji pu pen kacheraplok ason doan tame hala choklim kapinchongji amonit atum aphan si kemangdam saidelo. Hala choklim kapinchongchelang amonit atum doan ke Arnam aseme kedeng longji aphan apun-achak avelang.