Asai Keklem Along Ardi Kachipi Atum Ansi Choklim Pacheman Chotji

Kejutsi arni malom, Alangli lamthe asai kacheklemji aphan Arnam ok-vi cheplanglo. Alangli monit anglum sai klem pen Alanglining aphi kedun atum aphan choklim kapinchong aphan monit abang arje pensi vanglo. Kasorjon arni pen pini an, lake kijut arni malom ansi Alangli lapuson asai kedeng. Kijut arni malom anchot si lapuan angkang kethe asai keklemji aphan Arnam cheparjan pen kevang. Alangli monit atum kachechakji sungkrung akisung chechak pu sitame, lapen Alangli jakong thepik a’Arnam bonta kaprek amonit ateng kachepabi a’ot kachepado abang pu sitame, Alangli sai along ajat ahin ta paphihup ave, lapen Alangli kisikmek abidi ke masapbak anta kasiksak apham along klokle. Alangli ke ahokpet pen Alangli kelangmek ateng si sai cheklembom. Alangli monit arje pen kevang isi athe ke monit aphan kacherai, hini abang ke Alangli kachinghon amonit atum aphan choklim kapinchong. Alangli Methang amek pen Alangli choklim kapinchong amonit atum aphan chelang ingtung, lapen Alangli Methang chelang ingtung kosonsi Alangli choklim kapinchong amonit atum Alangliphan hakhi kipi. Lake inut mate banghini amonit aphan le kepachoklimchot lapu kali. Alar ke, lake isi adilung, aphai kijumhek abangphu aphan parlo ponsi. Laso adilung along amonit atum ke pirthe along prekjam adet pensi kevang, lapen pirthe along prekjam adet aphan si kacheparjan. Lapuan asai keklem athe ke laso amonit adilung aphan kepalongji aphan, labangso amonit adilung Alangliphan kachipi ahakhi kachepalongji aphan, lapen lahei along pen Alangli kelongji tahai anong kethe kachepalongji aphan. Alangli ke amo kevangve asai klemkle, mate Alangli ke ador kave asai ke klemkle. Lake pudet tame, lapuan asai keklem pen, Arnam akemang ke Alangli pen choklim kapeman kangtung atum an aphan choklim kapinchong. Laso along pen kelong apor kejoi along Alangli, a’ot chepalonglo atum aphan an Alangli phlungpo. Chinitha Alangli laso asai keklemke hala a’ot kelangno atum ajoine kali; laso alar ke, Alangli doan kachipike hala masapsovet Alangli choklim kapinchong un amonit atum ajoine. Alangli keklem asai, Alangli kaningje alamthe, Alangli kapaklang manghumeme kachepatujoi ason, lapen Alangli kangsai lapen kapakeng lahei doan ta hala masapsovet amonit aphai ajoine. Alangli hala a’ot kelangno atum ajoine penle ok-vi kacheman kali, lapen la ansose si hala a’ot langno atum Alanglilong aning kachoteng kijumlang. Alangli ahokpet si kaningje, lapen kilutdun alam si kipu, hala choklim kapinchongji atum ajoine; alangtum ajoinesi Alangli ok-vi kacheman, lapen lake alangtum ajoine si Alangli ke Alangli mena seme lapen hirjume kipi. Hala ahokpet, kilutdun, lapen Alangli kangningjever monit a’ot along akai doan ta hala a’ot chepalangno atum ajoine penle keklem kali. Alangli a’ot chepalangno atum pen kachingki pen kachingraisi kangtung, alar kar’ithu ke hala Alangli choklim pinchong un abangphu atum along si doan ahirjume ta kapadoji. Sitame Alangli sai aphan kenangji ke, halaso ihutso aphan, a’ot kelangno atum ta Alanglilong kedo keplang-kerengme kapachetonglong. Ahokpet asai keklemkle atum, Arnam aphan aningkehang kepaplengple atum, lapen Alangli sai along kapasiksak atum doan ke kapahi’i atum saidelo. Latum aphan ke choklim pinchong un’elo, lapen latum aphan ke Arnam lang selet lapen dengde tanglo. Lasonthot si, ahokpet aphan asai along kachepaklang lapen Arnam aning kehang kapaplengthek lapen Arnam asai apharman methang aphan kachepakamthek atum henlo Arnam arideng choklim kemanji atum. Arnam kapaplengji pu amonit atum ke kaprek kali laso amonit adilung henlo, lapen Arnam keklem asai doan ta latum ajoinelo. Alangli kaningje ahokpet alam doan ta hala ahokpet aphan asai pen kapaklangthekji atum ahin si kemang. Hala ahokpet aphan asai pen paklang thekthe atum aphan Alangli ingkike. Alanglile ningkirung nangkebat lapen kangsai nangkekambom pu kaningje ke hala ahokpet aphan asai pen keklemthek atum aphan si kapanongdam. Choklim kapinchongji atum alam Alangli ningje lote, lake lahei amonit atum alam si Alangli kipudam. Karjong Kangthir alam doan ta hala ahokpet aphan asai klem si paklangthek atum ahin si kejongdam. Kachini ason lapen monit a’ot kedo pupu alam ke ahokpet aphan asai keklem pen kapaklang kangtung atum aphan si kepanong. Ahokpet aphan asai pen kapaklangkle atum ke ahokpet alamthe arjulong’o tahai, bontame, alangtum a’ot pensi lapuan kapahi’i lapen ahokpet along aning kehangdun ave apot si, alangtum kachini ke aron lapen lamthe lapen kelangdammek alam pajoi, chethe along kilutdunji puke asatbak ta ardi chipipe. Latum angbong majok ta Arnam aphan ningklarsap pen kekroi ave; latum ke Arnam aphan theklong tame Alangliphan chepalong thekthe atum saidelo; latum doan ta Arnam arideng hirjuno kelongtang saidelo.

Anuttin along ta Karjong Kangthir kedamji atovar do, lapen anuttin aphan ta choklim kachemanji avarsai pi. Nanglong kedo kaheno kamatha a’ot pensi nangmethang along chongthui-chopanglim a’ot chichinipo, lapen kaheno kamatha a’ot chevarchor si nang nangsai keklem pen kapaklangji atovar chelongpo; lahei ke nangphan choklim nangpinchongji abidi saidelo. Anparta, chingtontepin kejapon lapen nangning arlo akeme ason kamatha along kapaklarpon pen, nang prangset pensi nangsai chepachun unpo, kamatha pangching ajakong lapen kangsai ajakong nangbatpo. Nangphan apor mesen ahut, nang jasemet Arnam alamthe kaporhiji ninghang, lapen jasemet Arnam aphan kardom ninghang, lapen nangmena kephobom ason pen nang karjulong alam angbong pachepho thekji. Lapuson apor ahut Arnam nangphan nangning arlo nangpatheang lapen paklarpo, nangphan kamatha keme ahin ajahak ason nangpachekubirpo. Lason henlo nangphan kamatha keme ahin choklim nangkapinchong. Apor kememe ahut, nang jakong duredet lapen dothing; nang nangning arlo Arnam ave pusi chemathaji, sitame Arnam ke nangphan nangpatheang, nangphan sai keklemji atovar kiri nangkerapdun. Laso choklim kachepaman along pen angtan nangketetlo tangte kamatha kememe ahin kedamlo. Arnam ke monit aphan akeme lapen akaheno ahin ta choklim pinchongthek. Lake nang chinithek-thekthe, lapen nang Arnam arideng choklim kemanji avarsai ri-rire atenglo. Jongsi nang ahokpet Arnam arideng pen choklim kemanji ridun, tangte kaheno matha ason nangphan kanahok nangpipelo, bonta nang ansose ahokpet ahormu si nangvanpipo, lapen ansose nanglong kopisi kadure ason doma ansose nangpachini thekpo, ansose nang ahokpet kedobom angdeng nangparipthekpo, lapen nangpatheklongpo monit along ke thangnat ave, lapen thangnat ta kali; jongsi nang satlang chetongte, nang ke chininelo, lapen nang ke kaiketa bang kaprek doan pen athak si dolang mathapo nang ke. Lahei pen si nang theklongpo aphrang kevang doan ason ta Arnam si keklem lapen Arnam si keraikom. Satlang along kilut ke nangphan kanghon mate kekroi nangpavedetpo, nanglong kardom durepo lapen kero-karcho alun lun thekthepo, lapen lasonlo pu chipu thekthepin pen, lahei angbong si nang nangmena aphan chichinipo. Arnam along nangphan choklim nangpinchongji abidi dopik. Alangli varmon along doan a’ot aphan ta monit akun kaheno pen kachedanji aphan sai pekpo, lapen prekjam ason asai enji monit aphan kehek’akji aphan; ihin pen lang lote, Alangli monit along sai klem, kaprek ahin abang ke Alangli monit aphan hek’ak, lapen kaprek ahin abang ke monit aphan pacheklangdak, angtan phur pen pacheklangpo monit aning arlo along kedo “manghumeme kapatujoi alam”, lapen monit aphan alang non kedobom angdeng pachichini pen a’ot binong kapaklang. Prekjam abidi pen si Arnam choklim kaselam – kapatu alam pacheklang pen, monit along sai keklem pen, monit aphan kangsir pen, lapen kapakeng pen – monit atum keklemme Arnam asai kachiniji aphan.

Kopilo nang non kiri ke? Arnam arideng choklim keman, Arnam aphan kelong – mate nang mena aphan 90s akai ahut Peter ason si kacheponji kiri ma, mate nang Arnam pen kechoklim pu nangpapunang pu tahai lapen Arnam anghoi kethe athengno kele kangtung tahai, mate pirthe along Arnam aphan kapaklangthek lapen thirkluk pen Arnam aphan hakhi kedodun thek. Nangtum kopisi kirima langdamdepin pen, amutpi kelang pen, nangtum kiri ke Arnam arideng kejoklong. Nang kechokpik abangphu le cheman ingtung pu langdamde tame, jongsi nang Peter a’ot ridam, mate Job akekroi, mate Arnam arideng choklim kacheman, lahei ke Arnam monit along keklem asai saidelo. Kaprek alamthe pen pudamlo tangte, nang kopisi kirima langdamde tame, lahei kadokave ta Arnam arideng choklim kachemanji aphanlok, lahei doan ta Arnam alamthe methang akai along kachetong longji aphan, Arnam aning kapangsamji aphan; nang ajat le ritame, lahei doan ta Arnam along kanghon meme doan kachiniji aphanlok, nangmena along pen kekhamkhe akun kachevar thekji pu akemang pen sai keklem si kapaklangji atovar binong kachiri, nangmena arlo kemesen angdeng kachepalong, Arnam akemang ateng amutpi pen kapachetondun, akechok amonit kacheplang, lapen nang keklem ason doan along kelangdammek akemesi kedo kabor’i. Nang lahei ason kachetong nangkok athe ke Arnam aphan kachini along kele lapen kai along kethedun kelongji aphan. Nang kachetong ke Arnam alamthe lapen kachepaklang binong asai, monit jokjak, lamki, lapen nangdung-nangrai ahormu pusitame, kapadu ke nang Arnam aphan chinilongpo lapen Arnam arideng pen choklim chemanlongpo. Kechokpik abangphu atovar along kedam kangtung mate Arnam alamthe aphan asai pen kapaklang kangtung: lahei ke kengkam kachejor akronglo, halapu Arnam aphan kachini lapen Alangli pen ajok choklim keman ke kele nangji adimlo. Non amat nang Arnam pen choklim kachemanlong ning hangnoi, mate Arnam aphan hakhi dodun ingtungnoi, lake kapadu ke Arnam aphan kachiniji aphanlo; lake Alangli nanglong nangkeklem asai ale vangvedet chemandetna pu aphan, lake kijut ahut Arnam abinong’et kopiloma kachiniji aphan, Alangli nongnam kethe kachiniji aphan, lapen lake ansose Arnam kachepabi a’ot lapen kachepatu a’ot kachiniji aphan, lapen Arnam nanglong kopuan si kemepik asai keklem loma kachiniji aphan. Arnam Amethang aphan lapuan angdeng ansi kachepabilo Alangli ke aketer lapen chongthui-chopanglim a’ot kedo amonit atum along sai klem, lapen Alanglitum aphan kechoklim pinchongji aphan. Arnam ok-vi kacheman ke monit atum anglum kecho-kedoji aphan, monit aphan kiviponji, lapen monit atum kopi kenangjima kipiji aphan. Ansose akenangsot ke Alangli Amethang kepajok sai thepo kacheklem lapen chechaknosi anpin chongthui-chopanglim amonit atum aphan kacheraiji aphan. Alangli hala akethepi dragon ke’er aning along kevang ke lahei chongthui-chopanglim a’ot kethenei kedo amonit atum aphan keraiji aphan, lake monit doan ta chelirsi akimi kaselamthuji aphan. Arnam kachingtang ketheparpik akisung ke hala monit arje pen kevang a’Arnam kachechak akisung anchot kali, bonta doan pen kilitdong ke Arnam Akarjong katheraknang – Alangli chepabilo lapen Amena aphan lapuan si chepatulo Alangli monit jongjong chemandet khangjang. Arnam nangcheparjan lapen ok-vi arpum ke’en ke monit atum Alanglilong bang ateng monit achethe do lapen kaprek amonit atum akenang do pu chepaklangji aphan. Amethang aphan Arnam chepabipiklo pu angthek kipiji aphan la anvet ta choklo. Arnam Akarjong ke ok-vi along pen si chinidam un. Alangli Karjong ke thepik lapen ingtuipik, sitame Alangli thangbakbe amonit arje si ke’en, kapangkrepre amonit, lake Alangli Karjong asai keklemji aphan. Nangtum ajakong, ningkirung, kamatha ajakong, monit a’ot, lapen chethe pen kacheklangke nangtum ahoket pen ta lapuson a’ot kedo Arnam asai kedeng apun kali. Nangtum abinong’et pen ta Arnam aphan nangtum apharman lapuan akisung kapachaknang apun kali. Arnam ke ajakong manghumeme. Alangli adim ingtuipik kangtang, lapen monit atum ke adim ingdai, sitame Alangli latum along sai klembom. Alangli pirthe along monit nangcheparjan ke monit atum akenang kepapleng aphan, monit pen kachingki aphan anchot kali, bonta Alangli monit atum pen dorappet. Arnam ke chepabi’o, inghon meme’o. Jongsi, Arnam akanghon alam ke’en pen, Arnam kanghon-kangjinso alam ke’en pen, kero-karcho alam ke’enpen nang mekkri chepaklo, jongsi nang laso angdeng along nangle, tangte nanglong Arnam aphuthak ahokpet kachini dolo.

Non malom monit atum kiri along isi keprekdam do; alangtum kiri ke Arnam aphan kanghon lapen Arnam aning kehang kepapleng aphan anchot, lapen alangtum arlo Karjong Kangthir akatheang lapen atur aphan tengnebup. Alangtum along Arnam aphan kachini atiri avedet. Lapuson pen, alangtum kachini ason nangbatbom si ning kirung chepangbopo. Arnam aphan ahokpet kachini kelong kangtung atum, kedamtang arni mesen angdeng along le kedo kali sitame, lapen kaheno lapen jakong kave amang chingbedun, lapen penang an apor mekkri chepabu, ning kirung kadure along janglo, lapen ning chethe chepangbolo pusitame – non, alangtum kachini ason nang ongbom lote, alangtum angdeng ta nangmepo. Alangtum along sai keklem lapen ninng kiphuk kachetonglong aphi, lapen satlang lapen kangsir angkang along hatput aphi, alangtum paphrangpik anlo. Hala kaheno ajakong abang ke nangjumpo, lapen alangtum akai akun along asapbak anke kachekirla nangdopo. Alangtum ansose satlang chetongbom ahut, alangtum aning Arnam aphan kanghon chengpo. Arnam monit aphan choklim kapinchong along isi aron do, lake Alangli nanglilong pen kachelonchit ahin aphan asai ensi nangphan nangpatheang, laso athe ke nang sai keklemji aphan tovar kachelong lapen kaheno angdeng doan pen nangmethang aphan kachepajok thekji aphan, nang karjong aphan kejok kelong along kerapdun, lapen nangphan la ansose Alangliphan kanghon thekji aphan jakong nangkipi. Lason pensi, nangmethang along pen nang Sobar ason chongthui-chopanglim a’ot chevar thekpo. Nang ke cheparjan thapthe lapen chepaklangdak, nangmethang aphan chichini inigtung lapen ahokpet aphan asai keklem pen paklang ingtung. Arnam nangphan hirjume nangpivekji, athe nang mo jakong duredet lapen ning kirun ahut, Alangli nangphan batai hini apharman an nangpatheangpo, nangphan ansose nangmena aphan kachichiniji along nangrapdunpo, ansose methang along ningchirui kachepado kangtung aphan, lapen ansose ahokpet aphan sai keklem pen kapaklang thekji aphan kerap. Arnam aphan kachiniji aphan thangbakbe ta apor aning kachibi, amethang aphan kachichiniji aphan aning kachibi, alang methang keklem ason along aning kachibi, atum ke Arnam asai, lapen Alangli keja lapen kapatheang pen pen kedenglong lemdetji apunlo. Lapuson amonit kaheno angdeng along le do pu sitame, alang ke menmen lam tevarphit theklo, me-heno kachinithek ajakong pen tame mate Arnam alamthe pen kelong akatheang ajoine pen tame. Alang mena ahokpet angdeng lapen Arnam akun lapen asai kachini pensi kaiketa monit atum methang akun along kachelar chepavang thekji. Inut methang aphan kachichini kangtung lapen methang aphan kachepaklangdakji aning kehang abang ke ahokpet aphan asai pen paklang thekpo. Lapuson amonit ke Arnam aphan ning kangthir pen kekroivet abanglo, lapen Arnam aphan ning kangthir pen kekroivet abangphu ke Arnam aphan kachini dolo, labangso kachini harnuk tame ingdai tame, masapso mate dopik tame. Lake Arnam keme-kechok a’otlo, lapen lake monit atum kachepalong nangji asonlo; lake alangtum mena aphan alelo. Arnam aphan kachini kedo abang ke inut atiri kedo abanglo, amang kedo abanglo. Lapuson amonit atum ke Arnam abang aphuthak klardak chinilo, lapen Arnam alamthe lapen Arnam asai aphuthak ta klardak chini. Arnam kosonsi keklem lapen kaningje pu langdamdepin tame, mate kosonsi kaprek amonit atum kapasiksak, alang methang aklong along charjapthek, lapen Arnam aphan hakhi dodunthek. Kosonsi monit lapuson kacheman, hala ansi alang kachinitang ahokpet ason aphan asai pen paklangthekpo. Atheke alang kaiketa Arnam alamthe si asai keklem, apot si alang Arnam aphan ansose chinipo, lapen kijut un’e apor apharman Arnam ahakhi kedodunji alamrai chedengpo.

Kangsai thek ajakong kedo, kachehodai a’ot kedo, lapen nang nangkarjong pensi kar’i kepadoji aphan ajat ason along ta arlo an langdamthek pulote lake nang ajat ason penle chetong pu sitame nangphan arlo pen Arnam alamthe nangpatheangdun lapen nangpaklardun abang dolo. Lake karjong along pen kar’i pulo. Arnam keklem ason kedoan ta monit akarjong puthot jakong kapachelong apharman. Kopisi Arnam kaiketa monit atum ke ase ave lapen kamatha ajakong jumpik puverlo? Athe ke monit atum akarjong thilaplo, lapen latum ke lapuansi ase kavelo alangtum akarjong ke amutpi pen amat si aphir avedetlo. Arnam asai ke monit akai aphan aphrang kepadam’un lapen monit akarjong aphan kepareng un aphan kerap, athe ke alangtum karjong arlo kachelangthek, lapen alangtum kaiketa ning arlo pen Arnam aphan kanghonthek lapen Arnam aning kapangsam thekji aphan. Labangso angdeng along kele ke monit akarjong cherengthulo pusi cheklangpo, lapen puthot aphong alang kopine chetonglote, alang menmen methang kamatha chepaklangphit thekpo. Alang ke lam kethan ateng sai chepaklangdun, lapen prapjin pen ajat along ta methang alam chepaklangdun. Lahenlo karjong along kar’i a’ot kachepalong pu kipu. Angtan kacheplang ason aphan prapjin pen ning alam kachepaklangdun atum penang amonit do, bonta abinong mate kapajirmi along kilut alam kaparnolo tangte, alangtum ase avelo lapen matha thekthelo. Alangtum ajat ason ta amek athengno cheklangdak ahut si chinithekchot. Lahei doan ta karjong pen ase kave lapen kamatha thekthe pu angtheklo, karjong pen kacherap ason kachini kijum angtheklo. Ajahak amonit atum ke karjong pensi kar’i do lapen kangsai ajakong do. Alangtum kachechakbom aphan kejongdam alam karjulonglo tangte, alangtum apor padamdepin pen ketoklo. Ephong jongsi alangtum sai keklem aron aphuthak karjuonglo, tangte alangtum ke kedenglo lapen adunthu kevang kachetongnang ason along asai ke’enlo, lasonsi amethang aphan kachelarlo. Lahenlo karjong pen kar’i padikrim abanglo. Kopi athe si alangtum lapuan lam chepaklangtong thekdet? Laso athe ke alangtum jo-pedap akai along ta lahei ason aphan si aning kachibi. Alangtum Arnam alamthe kaporhi ahut, alangtum halaso along methang kechobom ason pen pachingbardun si chingsaidunji lapen methang along kachevanji aphan klemji. Alangtum kachingrum lapen lam kethan arjulonglo lapen alangtum along katheang lapen atur kevan alamthe arjulonglo tangte, alangtum menmen si dengphit theklo. Lake kangchir abangphu aphan an kipi atenglo; alangtum menmen si chophit theklo. Jongsi nang kangchirche abang aphan le an pi pulote, alangtum ajat ta keklem paprapjinje. Nang Arnam aphan cho’ardomver, lapen laso aphi nang kachetong ason aphuthak prapjin pen ning alam chepaklangthek: laso alam along Arnam kopilo kenangji, lapen nang kosonsi sai deng nangji. Arnam si kedamtang lapuson alam ahut nangja dunlo; nang pini lasonthot ason pensi chetonglo tangte, amena amat si nang chichinipo Arnam aphan aning pangsam nangji pulote koson asai si kedeng nangji. Jongsi nang kaiketa lasonsi sai klem lapen kaiketa lapusonsi chetongbom, isi apor ahut lake nanglong joike pensi vangdetpo. Arnam alamthe kaporhi ahut, nangchini Arnam kopuson amonit aphan si kimindam, nang chini karjong kopi kephobom alam si Alangli kaningje, lapen nang achopi alam aphan nepthekpo lapen laso aphan asai pen klem si paklangthekpo; ladak pensi klangpo nang charli theklo pu. Kopisi ajahak amonit atum laso along duredun aretlo? Laso athe ke alangtum laso ahin asai keklem along kabor’i jakong chipi peme kalidet. Alangtum ahokpet aphan asai klemji aphan ninghang tame, alangtum along sai keklem aphuthak, alangtum akai along ahokpet angton pen kachini nangji binong ason avedet. Kopine esonbak cheplanglote alangtum manghudet titi. Lasonsi, kapachobai akapachethang abang mate ahokhe kekroi abang kevang ahut nangphan kaprek atovar suiponrong tahai. Nang Arnam alamthe lapen asai aphuthak kachingrum dolot nangji – lason pen anchot si nang ahokpet alam chini unpo lapen kangsaithek ajakong chepadopo. Jongsi nang ahokpet alam chini thekthe, nang kangsaithek ajakong chepado thekthelo. Pudam lonang, Arnam kopilo kangje, Arnam kosonsi keklem, monit along Alangli kopipilo kehang, kopuson amonit pensi nang kachetong nangji, lapen kopuson amonit atum pensi nang kachekak nangji – lahei aphuthak nang kachingrum dolemdet nangji. Jongsi nang kaiketa lapusonsi Arnam alamthe pen chetonver pulote, nang ahokpet alam chinipo lapen ingthimlim pen penang an alam chinipo, lapen nanglong kangsai abidi ta dopo. Karjong Kangthir pen kapere puke kopi, monit akemang pen kahache akoi kipi puke kopi, Karjong Kangthir pen keja puke kopi, varmon pen kisik ason kopi, Arnam alamthe aklong pen kopisi kapatheang? Jongsi nang lahei aphuthak klardak kali pulote, nanglong kangsai thekji ajakong avelo. Karjong Kangthir pen kopisi kevang loma, kekhamkhe akun puke kopi, Arnam alamthe ateng kosonsi keklem nangji, lapen kosonsi nanglong kedo kekhamkhe a’ot kachevarji, lahei nang chini nangji; jongsi nang lahei aphuthak kachetonglong pensi kachinitang dolo pulote, nanglong atiri dopo; kopine cheplanglo tangte, lasopen kipun-kapangbarji aphan nanglong chingbarchit ahok alam dopo lapen chelonchit amang atiri ben dopo. Nang ajat le klem ta nanglong keklem aphan archok dopo, lapen ahokpet ateng sai keklem thekpo. Anlote nangkai ke Arnam akatheang, Arnam ahirjume pen plenthirpo. Alangliphan ningklarsap pen kiri atum, mate Alangli kethan ateng kedo-kethakpi lapen Alangliphan hakhi kedopi aphan Arnam langpememe puke klemkle, lapen ningklarsap pen ahokpet apharman chepalang’it atum aphan Alangli hirjuno pipe. Jongsi, nang Arnam alamthe kechobom lapen kijunbom ahut, nang ahokpet nangmena kedobom angdeng kachichiniji aphan ningchibi, nangmena keklem ason aphan ningchibi peme, nangmena kachini ason aphan ningchibi, tangte, nang kopine kisung kachetong ahut, nang katheang denglongpo lapen keklemvoi ason kachini ta longpo. Anlote nanglong ajat ason along ta asai keklemji atovar lapen kangsai abidi dopo. Alanglong ahokpet kedo amonit aphan ke chongthuidetji puke sungkrungji meme, bang aphan kapasiksak mate bang apar cheplangdetji puke cheman sungkrungji meme. Ahokpet ajoine, alangliphan ke raikomdetlo, lapen ahokpet ajoine si, alang ansose kachini longpo. Ahokpet ajoine si, alanglong ansose sai keklemji atovar dopo, ansose si alanglong Karjong Kangthir sai keklemji avarsai alang longpo, lapen ansose si choklim kacheman longji avarsai dopo.