Komatma Arnam Aphan Kanghon Atum ke Alangli Akatheang Along si Kaike ta Do Longpo

Keongdung amonit atum Arnam aphan akekroi ke langdam lote dhorom alam akangsai phodetna pu aphan anchot: Latum ke Arnam aphan ta chinghon thekthe lapen “robot” ason si Arnam abe dunchot, ahokpet pen Arnam aphan akar’i ave mate Alangliphan archo thekthe. Alangliphan latum kejoijoi pen si aphiphi dunchot. Penang’an amonit atum Arnam aphan kroilo, bonta Arnam aphan kachinghon abang aphai ke jumpik; latum ke Arnam aphan “man-peng” pichot athema latum kisung kachechakji pherepik, mate latum ke Arnam aphan “aninghang” chepaklangchot athema Alangli ke thedung lapen ingtangrak – bonta alangtum man-peng kipi lapen aningkedok along, kanghon ave mate ahokpet pen akar’idam ave. Alangtum akephoponbom along latum ke masapso akechok ason si richot, mate ajahak ale kave kamanghumeme alam aphan anchot. Ongdung amonit atum ke thangbakbe si abe kidunthap, kisungkrung alang along si hirjume aphan kaparhi; latum ahokpet aphan rire, anparta Arnam ahirjume kelongji aphan ahokpet pen Arnam aphan dengde. Lason amonit atum akai Arnam aphan akekroi ke ale avepinlo, ardi amat si avedetlo, lapen laso along ke alangtum mena jongjung aphan kachematha lapen akenang kelong’i anchotlo; latum ke Arnam aphan kachinghonji aphan puke Arnam aphan kroikredetlo, tebonta hirjume kelongji aphan anchotlo. Penang’an amonit atum ke latum aning chepangsam anchot; latum aninghang aling latum klemlo lapen Arnam kopi si kenangjima langdamdelo, mate latum keklembom doan ke Arnam aninghang atengloma kali pu mathathelo. Lason amonit atum ke ahokpet akekroi longledetji, Arnam aphan kachinghon ke lapu bijoilo. Arnam akithik ke monit atum akekroi aphan anchot kali; lake, anparta, monit atum kanghonji aphan. Bonta penang’an Arnam aphan kekroi amonit atum doan laso “kachepatujoi” alam long thekthedetlo. Monit atum Arnam aphan kanghonji haihe, mate Alangliphan kachinghonji aphan anta bor’i’e. Latum ke Arnam aphan kachinghon meme ason-amung lapuan akeong pu longdamdedet chenamlo; latum ke Arnam henlo monit aphan kanghon a’Arnam lo pu chininedetlo, lapen ke Alangli henlo monit atum kachinghon nangji pu a’Arnam lo. Alangli asai along si Arnam akanghon meme acho ke chepaklangponlo: Alangli sai latum kachiniduntang atum anchot si Alangli akanghon meme amung monit atum longdunpo; alangtum choklim kachomatlongtang pen si latum Arnam akanghon meme amung aphan choro thekpo; lapen non kedobom akai langdam pememe pen ke, Arnam akanghon meme amung madu ta longdam un’edetji. Arnam aphan kanghon meme ason ongdung do, bonta Alangli pen chenam si cheraphet’he pute monit atum longdundedetji. Lake lason pulote, Arnam jongsi monit ason nangchemanmedet asonte, monit atum Alangli pen kacheraphetji pu chenam si un’elo, lapen jongsi latum ke puson Alangli pen cherapdunhet longle pulote, latum ke Alangli sai-amo ta chinidun thekthelo – lapen alangtum Arnam aphan akanghon tame kahenodak kapachobei lapen kamunthidamthap ason si mandetpo. Sining hemrengme along Arnam aphan akanghon ke pirthe athak Arnam aphan akanghon ason kalidet, pima monit atum sining angsong Arnam aputhak kachinidam ke alangtum kamunthidam ateng si pinchonglo, tebonta alangtum amek hini pen ketheklong ateng pen kalidet lapen latum jongjung kachomathalongtang puta kalidet. Pirthe along Arnam kevang ahut, monit atum Alangli sai-amo chenam si thekdun longlo lapen Alangli kanghonmeme amung, lapen latum Alangli keklemver lapen akun amokha kopuson ma puan ta thekdunlong’etlo, sining angsong kedo Arnam aputhak kachinidam ke laheihui doan ke suri sose aphai ahokpet alamlo. Kopuan ma monit atum sining angsong Arnam aphan chinghon tame, tebonta labangso akanghon ke kechoklim amat si kali, lapen lake monit atum abidi pen si plengset. Pirthe athak along alangtum Arnam aphan akanghon le amasapsovet sita, laso akanghon ke ahoklo; jongsi masapsovet le do puvoiphit tame, lake ahokpetlang. Alangliphan kachiniji aphan ahokpet asai pen ajok Arnam monit atum aphan paphopon, lapen laso akachinidam pen si Alangli alangtum akanghon chepalong’ilo. Lake Pitor ason thakthaklo: Alang jongsi Jisu pen dorappetpe pu asonte, Jisu aphan aningkedokji alang thekthedet khangjang tahaipo. Lasi, Jisu angno kachingkimesenver ajok si alang Jisu pen akacherap abang chepinchongponlo. Monit atum Alangliphan kapanghonji aphan, monit atum angbong si Arnam avnglo lapen monit atum penpen do-thak rappetlo, lapen kedoan la monit atum aphan Alangli kepatheklong lapen kapachinilong henlo Arnam ahokpet angtheklo.

Monit atum aphan kepachoklimji aphan ke Arnam ahokpet ason lapen kechok alam pen si pavangvang; Arnam alam along tame Alangli monit aphan kapachoklimji pu ephar anke dolo, lapen lake kejapon asai lapen tovar kangpupi heihui henlo. Lapulo tangte, Arnam alam along si nang kecharliji atovar lapen kithikmek aputhak kachiniji aphan chori nangpo. Laheihui ason chinidam’etlo tangte, monit atum alang ahok kacharlipon along atovar lapen kithikmek dopo, lapen Arnam alam pen ajok alang akatheang tame longdunvekpo; laheihui ason doan ke Arnam along pen si kevang saide pu alang chini thekpo lapen pangthek peme thekpo. Chinidamdet aphi lote, monit atum labangso ahok alam along menmen lutdunphit nangpo lapen alang akai kerengbom along Arnam alam akerap pen Arnam aphan aningpangsam nangpo. Arnam nangphan asontin along tame nangjadunpo lapen nangphan kacharliji atovar nangpipo, lapen nangphan Alangli ke kanghonthek abang pu nangpachematha longpo, lapen Arnam asai doan ke nangphan kepachoklimji aphan akemang pen si keklempon saide pu nangphan pachini longpo. Nang jongsi Arnam akanghon theklong akar’i do tangte, jongsi nang ahokpet pen Arnam akanghon chomatji ninghang pute, ahokpet along nang kedam lutsip nangkokpo, ahokpet akai kereng along nang lutsip nangkokpo lapen Arnam keklempon asai doan ke kanghon lapen kejok apharman pu theklongpo, Alangli keklempon doan ke monit atum along kedo aketer ason kapache’oji aphan saide, lapen monit atum along laso keterbang kedokok ajoine Arnam aningkehang ateng papleng un’e apot kapangthir henlo. Monit atum aphan lamthe pen si Arnam pajirlo; monit atum ahokpet kai along akepho nangji aphan tame Alangli ason thikpilo, lapen monit atum jongsi Arnam alam penang’an cho lapen junlo tangte, latum chenam si keklem along pidun lote, latum Arnam alam pen ajok alangtum akai along doan akesung tame chepajok thekpo. Lake pulote, ahokpet along kilutsipji aphan ke nanglong Arnam alam heihui do nangkokpo; Arnam alam heihui jongsi nang choche lapen junje lepute lapenthu Arnam asai pen kali tangte, chenam si nang kai ahok atovar longlelo. Arnam alam heihui nang choche mate junje lepute, nanglong ajat le cheplang tame nang kamanghudet si chemanpo. Nang kachini ke Arnam aphan nang chinghon nangji pu anchot, bonta ajat ta kethakvet ke thekthedetlo lapen kacharli aphan atovar ave; nang ke terbunglo lapen manghudetlo, lapen ahut pen ke ok aphan aning kapangsam henlo Arnam aphan aningpangsamlo pusi kroilo – lapuson kemandet athe ke Arnam alam nang kechoche lapen kejunje apotlo. Lake pulote, nang jongsi Arnam alam akerap nangnepin pen lapen ahok angbong kamanghu akiri anchot tangte, kacharliji atovar akenangsot alam nang kachoridun thekthedetlo. Thangbakbe ke monit atum Arnam aphan akekroi kopusonma puke joike pen chinine, anpar ta Arnam aphan kanghon nangji alam latum kachinidam ing’ar muchotlang. Jongsi, Arnam alam akatheang lapen akeja akerap pen, nang kaike ardomver, lapen tarlipver, lapen river, lapen ajok nang kacharliji along nang keklempon nangji longponpo, Karjong Kangthir asai keklemji aphan avarsai longponpo, Arnam pen ahokpet kacheraphet dopo, lapen terbungbe lapen manghuhepin si dopo, ahok akai along nang atovar longpo, lapen chenam si Arnam aphan ningpangsampo. Nang le Arnam aphan ningpangsamtang lote, nanglong aklong’et ta Arnam akeja dopo, lapen nang ningkarongchen ason si plangpo: Nang Arnam aphan ningkapangsam longlo pu ajok nang manpeng kelong asonpo, nang aklong’et ta theangplin asonpo, lapen nangning along nang klar’et lapen ingsamjin dopo. Nang akamathadamthek ta domesenpo lapen bang nangkejongdun pen jokvanpo, lapen nang korte lapen ingjir atum aphan chetheklong lote nang aklong’et ta rengmesenpo. Lahenlo ke Arnam akanghon kelong akachehokmeme athe, lapen lahenlo ahokpet Arnam along ningcheparongdun. Kachomatlongtang pen si monit atum Arnam akanghon kelong aningcheparongthekji: Kesung-keboi chechaklongdet si, lapen kacharli along ahok la kachomatponlong aphi, latum Arnam ahirjume longlo. Jongsi nang Arnam nephan hokpet pen nang inghon pu anchot si ningje, monit aphan ajoine Arnam ke chenam si anam kethepik pen namdetlo pulote, kachepaningding lapen ingdukjin pen Alangli monit atum aphan penang’an alam thanbom lapen kaike ta monit aphan pejokbom, nang laheihui alam akaningjedam ke Arnam along kachehokdun ihin aphar anchotlang. Tebonta, thedung aningcheparong – ahokpet kachehokdun – lake kacharli along ahokpet pen alangtum ahok akai along kejokdun henlo, laso aphi alangtum aning along latum klar’et lapen ingsamjinpo. Latum aklong’et along thedung pachelarlo pusi chemathapo lapen Arnam henlo kanghon memenei pu chemathapo. Nang kenamtang anam apot ke anpar ta mesenlo pusi nang chemathadampo. Nang kachepeduk along thedung anam kachipitang lote, nang aklong’et along theangplinpo: Arnam akanghon ahokpet pen chehokdunlong pemelo pusi nang chemathapo lapen monit atum along kepajok asai Arnam patang tanglo pusi nang chinipo, pima Alangli monit atum aphan kapangthirpon ke latum aphan pangthirji aphanveklo, lapen latum ahokpet ta Nephan nangchinghon ma pu monit atum aphan Arnam asat ke’en bor’i. Lapuson ateng le nang jongsi kacharli along laso ahokpet jokdun lote, penang’an Arnam asai nang pajo pen klardak si kachinidun thekdunpo, lapen halaso apor ahut Arnam alam doan nang thengno ke arlong kelokkling ason kachithing si nang chemathalongpo. Ahok alam penang’an nang klardak pen chinidam lote, ajat ason-amung tame kacharli along kipidun joike pusi nang chemathapo, pima nanglong ajat ason ke kephonang ta chepajok unpo lapen asat doan pen tame chepajok unpo, lapen thangnat ta nangphan ke kasiksak kali pusi theklongpo, lalo pulote nangphan ke thedung akejoklo lapen nang jokvan binonglo. Halason apor ahut, Arnam akanghon si nang ke ningcheparong longpo, lapen nanglong Arnam ahok akanghon dovekpo. Kemangdammek kedo atum aphan, ahok kedeng atum aphan, kachini kedo atum aphan, lapen Alangliphan ahok kanghon atum aphan ke Arnam ahirjume pibom. Monit atum jongsi Arnam akanghon kelangji ninghang lepute, latum ahok akai along kacharli ahut ahokpet pipon nangpo, latum keso tame kachechak unji aninghang nangpo lapen Arnam aphan aningkapangsam pen akaprek anke latum che’o’et nangpo, lapen alangtum amekkri le nangbu tame, Arnam aning aphan latum aningpangsamji aphan thek nangpo. Lalo pulote, Arnam chenam si nangphan hirjume dopo, lapen lapuson thakthak nang jongsi kesung chechak lepute, Karjong Kangthir asai aphiphi nangdunvekpo. Ahok akai pen ajok, lapen Arnam alam kachomatlong pen, Arnam akanghon meme abang monit atum theklongpo, lapen Arnam akanghon latum kachomatlongtang atum anchot si latum Alangliphan ahokpet pen inghon thekji.

Kopuan ma ahok aphan nang kacharlipon along kejokpon keong, lapuan sose si nanglong laso ahokpet akachini cheparidengpo; kopuan ma ahok aphan nang kacharlipon along kejokpon keong, lapuan sose si Arnam akanghon nanglong dopo; lapen kopuan ma ahok aphan nang kacharlipon along kejokpon keong, lapuan sose si nanglong Arnam ahirjume longpo. Lapuson ateng jongsi nang sai klembom lote, Arnam nangphan akanghon pen ajok nangphan pajo pen nangpatheklongpo, Arnam aphan Pitor le kachini ason thakthak: Pitor pulo, Arnam along sining lapen pirthe lapenthu ajat ason kedoan kapinchong akethek-kere anchot le kedo kali, bonta, anpar tame, monit atum along ahokpet asai keklemji akethek-kere ta Alanglilong do. Alangli sining lapen pirthe lapenthu ajat ason tame kapinchong apot Alangliphan monit atum kanghon nangji ador kedo lapu anchot kali, bonta, anpar tame, monit aphan kapinchong, monit aphan kepajok, monit aphan kapachoklim kepaman, lapen monit apharman Alangli akanghon kachipidet henlo. Alangli akethek peme ajoine. Lasi, lason thakthak, Alangli ke monit atum akanghon kelong nangji ador kedo abang pen anparta pu Pitor ningjelo. Jisu aphan Pitor pulo: “Monit atum akanghon Nangli kelongvek nangji apot si sining lapen pirthe lapenthu ajat ason doan tame kapinchong athe puchot ma? Lapuan sose Nanglong ke kanghon meme ason dolang. Ahok akai kereng along Nangli ke klembom lapen chejabom, aklong’et nephan Nangli Karjong nangpapholo, Nangli nephan athikpet pemanlo, Nangli nephan nethanthuvoilo – monit atum akanghon kelong nangji pen anpar laheihui ason ador dolang.” Nnag jongsi Arnam akanghon theklong lapen chomatji aninghang do lepute, nang ahok akai along rivek nangpo lapen ar’i nangpo lapen nang ok aninghang kedoan ke kapadarji chisikkoi nangpo. Nang laso alamrai dengdet nangkokpo. Asontin along tame Arnam aphan aningkapangsam unji abang si nang ke kachemanthek plang nangpo, kaseletlepin mate ok akerengmesenji aphan akar’i kavepin pen, ok aninghang aphan kali bonta Arnam apharman si kereng. Arnam aphan aningpangsamsedet ahut apor dokok tahai meme. Lake pima pulote Arnam akar’i nang kachininedet apotlo; mononphi, chepeduk muchot nangkok tame, Alangliphan si nang ningpangsam nangji lapen ok aphan kalidetvek nangji. Lason le nang kephopon longlo te, Arnam aphan nang chini unpo. Arnam ke sining lapen pirthe lapen asontin tame pinchongthek pu nang theklongpo, pima monit atum Alangliphan kapatheklongji aphan Alangli ok nangchemanlo lapen Alanglilong kacherapdunji aphanlo; Alangli monit atum angbong ta damthek pu nang theklongpo, lapen Alangli karjong ke ahok akai along monit aphan pachoklim thek, latum aphan Alangli akanghonmeme lapen Alangli athikdut kacharlidunlong pen ajok paklanglo, Alangli akangsai lapen Alangli ahirjume doan. Lapuson jongsi nang kaike phopon longbom lote, nang kai kereng along Arnam pen nangpachehelo un’elo, lapen jongsi mo arnisi nang pen Arnam akacherap kechoklim aphan jutkok lepute, nangkethanthuvoi kachechak lapen kechokche apot kachematha nang unpo. Arnam pen le nang akacherap choklim do pulote, Arnam aphan ke’oji ar’i’elo nang, lapen jongsi mo arnisi Alangli nangphan nang’opo pu Arnam le ningje lote, nang ke pheredukpo, lapen Arnam nangke’okangdet aphan mute ne thilot si kemepo pusi nang ningjepo. Lapuson aningkerengno heihui nanglong kedodet pen lote, Arnam aphan kache’oji ke nang un’elo pusi chemathapo, lapen lapuson pen si, nanglong anujok thirponpo, lapen Arnam akanghon ahokpet chehok’long pemepo.

Monit atum alangtum akai along Arnam aphan si chibiji pu kaningje ahut pen do, bonta lapuson adim along an alangtum kephopon non anta ledamdepinlang. Arnam ke nang kai along dolo, pima Alangli nangphan arnivang nangjabom, pima Alangli lamthe si arnivang ta nang kecho lapen junbomlo, lapen kaike ta Alangliphan nang ardomverlo, apot si Alangli ke nang kai chemandetlo puke nang kaningjethap puchotlo. Lahei kaningjedam atum akachinidam ke kachepaklang’i aphan chotlo. Penang an amonit atum along kecheng anujok ave; latum along Arnam alam ke ke’etanglo, bonta latum achili vangvepinlang, athe kapatheji aphan puke durepik’lang. Pini, kopuan angdeng si nang kachomatlong tanglo? Pini anat, puan akahelo Arnam nangphan nangpavang bor’idet aphi, Arnam aphan chekak un’elo pu nang chematha loma. Arnisi, elong an adim nang kecharliponlong ledamlong lote, jongsi Arnam le nangphan nangpache’otoi lote, nang chenam si un’edetji. Nang aklong’et along Arnam penpete do thekthe pu nang kaike chematha’everpo; nang penan, piso, mate osomar, don-rap avepin, pei mate po kavepin, ok aningkarong kalipin pen tame nang dothekji, bonta Arnam penpete nang dothekthelo. Arnam pen kavelo pulote nang kai kachepangbo asonpo; Arnam pen kalite nang do amat si thekthedetpo. Lapuson angdeng anle nang kepho longlo pulote, Arnam aphan nang akekroi along nang angthek kachibi longlo, lapen lason pen si, nang kai ke Arnam si chemanlo, nang kereng along Alangli si anujok chemanpo. Puthot nang ke Arnam pen che’o un’eveklo. Lapuan angdeng le nang pho’etlo pulote, Arnam akanghon ahokpet pen nang chehok longvekpo, lapen Arnam pen si kachetebok’het akacherap nang dolote, Alangli si nang kai, nang kanghon chemanpo, lapen halaso ahut Arnam aphan nang ardompo lapen pupo: “O Arnam! Ne Nangliphan nangche’o un’e. Nangli ke nekai. Ne akaprek asontin pen cheterek’un – bonta Nangli pen ke un’e, kerengbomji puke ne un’elo.” La henlo monit atum ahok angthek; lahenlo ahok akai. Pini arni an kedo ke penang an amonit atum aphan puan akahelo kepavangtoi chenam: Latum ke damvek nangpo latum aninghang mate hanghe tame, lapen arlong lapen akangtang adim angbong si latum chingthangloklo bon pu latum ke kaike chemathapo. Arnam ke nangkai pusi nang phoponlongvek nangpo, jongsi Arnam le nangning along pen nangponpidet pu ason lote, lake nang kai kachepangbo atenglo; Arnam ke nang kai nangpo, lapen Alangli pen nang kache’o un’evek nangpo. Lapuson pen si, chenam nang Arnam aphan chinilong pemepo, lapen lason apor ahut, nang Arnam aphan puthot chinghonthu lote, nang ahokpet Arnam aphan chinghonpo, lapen lake isinat si plangpo, kangthirjir akanghon. Arnisi, nang kai kepholong pen nang elong an adim ledamlo pulote, nang Arnam aphan ardom lote, lapen Arnam alam cho lapen junlo tangte, arlo pen si nang Arnam pen che’o un’elo, lapen ke Alangliphan nang tengne thekthelo jongsi nang ninghang tame. Nang kai Arnam si chemandetpo; pirthe aphan nang tengne unji, nang piso, penan, mate osomar aphan tengneji, bonta Arnam aphan katengneji puke nanglong kasiksak doji – lason keklemji puke un’eveklo, lake nang ahokpet akai chenamlo lapen Arnam aphan ahok akanghonlo. Monit atum Arnam aphan akanghon jongsi elong an adim ledamlo pute, alangtum Arnam aphan akanghon asonthot ke kaprek aphan akanghon chingbar dundelo; alangtum akanghon Arnam aphan si kechengsi dopo, lapen lapuson pen si latum akaprek ason kedoan kache’o’et thekbompo, lapen Arnam pen akeja lapen akangphai doan ta kedengji aphan chekroidunpo. Kaprek aphan anpar kemenei Arnam akanghon le nang kelong tanglo pulote, nang ahokpet akai si dopo lapen Arnam akanghon along si rengdunpo.

Monit atum along Arnam le akai kacheman tangdet lote, monit atum Arnam aphan che’o un’edetpo. Tangte lake Arnam keklem asai kalilang puhe? Anpar kethedung alammo kachethan avelo! Arnam ke penang an angdeng an sai klem tanglo; Alangli ke monit atum aphan sai kapaklemji si thanlo, kangsai pen lapen kithi pen kejokji aphan, lapen monit atum aphi chiruiredetlo, lake pima latum aphan Arnam si chepahemphu long tanglo. Monit atum along ahokpet kedo atum abang ke, alangtum ahok kephopon along, alangtum alammo kachethan ahut karjap thirkluk, alangtum adim along charjapthipji, Arnam adung si arjapdunji, aphi ananthu chiruirepin pen, lapen Arnam kanghon amonit atum pen mesen akacherap kedo abang, komatji, latum aphan ajat ason pho tame, Arnam alam angton pen karjuji ta unlo, lapen mo kithi anta Arnam aphan si kroithippo. Nang akeklempon lapen ahok akai along kepaklangpon doan ke Arnam alammo kachethanlo, latum ke monit atum akereng along si Arnam alammo kethanpon paklanglo, lapen lake ahokpet Arnam akanghon aningcheparong’ilo; lapu an angdeng le nang phoponlong’etlo tangte, kephoji meme kedoan ta longpontheivekpo. Nang ke ahok akereng along longponveklo lapen nang asontin akeklem tame anut kaprek aphan ke ningkaperung si patheklongpo. Nang kachingthang lapen athak kacheklang doan meparpikpedet, bonta nang kereng ke kangthirnei akai si renglonglo, lapen Arnam alam pen nang chingki-chethan longlo te, Alangli si nangphan nangjalo lapen katheang pilo. Nanglamthe pen ajok Arnam akar’i aphuthak nang ningje theklo, ahok along chingki-chethandunlo, lapen karjong pen sai keklemji alam nang chini muchotlo. Nang lam kaningje along prangset do, nang kemesen abang lapen athikdut, chedandundongde lapen chepabidunhek, Arnam akisik-kedang chekroidun peme lapen ajat le nang phonang tame nang lammo kachethan along charjapthip, lapen nang ingsamjin lapen ajat le chetongponbom pu tame pahanchathapthe. Lason amonit atum ke Arnam akanghon ahokpet theklong pemelo. Ajahak amonit atum ke arta avelang, bonta latum arta kedo’o atum ason si cheplangji; latum ke akesarlo, ahok ta kelongtanglo, lapen kaprek atum aningdok’rilo – lapen lahei amonit atum henlo alammo kachethan do lapen Arnam kethanji pu kachepaklanglo. Lason pulote lake, latum le elong angdeng anbak phoponlong tanglo te, arlo latum along Arnam aphuthak kachini akarnuk dolo, lapen alangtum athak kacheklang akun tame chekirlalelo. Penang an amonit atum ke ahok apot asai along klemponpe lapen alangtum alammo kethan along charjapthipthe. Lason amonit atum along ke Arnam akanghon, mate Arnam aphan alammo kachethan ta avelo, lapen laheihui amonit atum ke Arnam aningkedokdenei atumlo. Arnam alam si latum cho lapen junlo, tebonta latum kaningje keklang ke Sobar pinak, lapen latum Sobar aphan si Arnam alam pen anongno paklemtoilo. Lapuson amonit atum along ke Arnam akanghon angthek amat si ave; latum kaningje alam doan ta Sobar saidelo. Arnam angno kaike ta nang ning jongsi ingsamjinver pulote, lapen nangdung-nangrei kedo amonit lapen ajat ason tame aphan si nang kaike apor chipidun, lapen nangdung-nangrei kopisi chemanbom ma, lapen Arnam anghor le nang jongsi chemathapeme lote, lapen kaike ta Arnam aphan man-peng kipi aning le dover, tangte aklong pen si nangphan Arnam nangpatheangpo. Kardomhem along ke “kethan-keparedun abang” amonit atum do: Bang kaprek atum ake’un’edet ason kelangdun aphan si latum chisikding lapen la endundetpo lapen lasonthot si pachingbarponpo. Latum kapacheprekjek ke thekthelo, pap aphan latum langseletle lapen Sobar ahormu doan aningdok mate kachekroidunde pu ave. Lason amonit atum along ke Sobar ason-amung si plengsetlo, lapen latum aphan ke Arnam alam kaningje pen amat si kapajut ke o’buppo. Arnam angno nangning ke kaike amat ta man-peng piver nangji, nang lamthe kaningje lapen sai keklem along nang ardi chepadoklong nangji lapen Arnam aphan aningpaduk lapen kekhamkhedun akar’i avedet nangji. Arnam asai nanglong hala thangnat ta kalipin aphan kapaklemji pu ke nang ninghanghedet nangji, mate nang kachechaktang akesung doan ta pachechak longledet nangji lapen nang keklempon along kachipidun doan ta thangnat aphan kalidet nangji. Nang sai keklem kachepedukji si ninghang nangji lapen kevangjilang atovar along Arnam aphan ansose kachinghonpon si kenangji. Laheihui amonit atum henlo alangtum anujok ke kelangdammek akemang kedo. Laheihui amonit atum henlo kachingthur aningkehang.

Monit atum jongsi Arnam aphan kekroi do lapen Arnam aphan man kipi aning pen Arnam alam kachomatlong pulote, lason amonit atum along ke Arnam akejok lapen Arnam akanghon theklong. Laheihi amonit atum ke Arnam ahakhi chipidun unlo; ahok along latum rengdunlo, lapen latum kopima ahakhi kachipi anta ahokpetlo, Arnam kopima lapen Arnam akun doan. Latum ke Arnam akanghon angbong si do lapen Arnam akanghon theklongtanglo. Monit atum jongsi Arnam aphan chinghon ingtung, latum Arnam akanghonmeme ason chomat nangji lapen Arnam akanghonmeme ason lang nangji; lason pen si Arnam aphan kanghonji aning latum along chingthurponji, Arnam apharman mena chepebihek pen kachipidet aning si monit aphan aningkeperungponpo. Arnam ke monit atum Alangliphan alam lapen kaningje pen chinghon nangji mate alangtum kamathadam pen tame pu pemanme, lapen Alangli monit atum Alangliphan chinghon nangji pu ke toi bor’i’e. Alar ke, Alangli alangtum aphan mena aningkehang ajakong doan pen si Alangliphan panghonlo, lapen Alangli sai lapen kethan alam along si Alangliphan kanghonmeme ason latum aphan Alangli patheklonglo, laso aphi si latum along Arnam akanghon pachelongponlo. Lapuson pen anchot si monit atum ahokpet Arnam alammo kethan chechak unpo. Monit atum Arnam aphan kachinghon ke latum aphan bang atum ketoi bor’i pu apot kali, mate lake tangka pen kebai ra aningkapahang bor’i kali. Latum Arnam aphan kanghon ke latum Alangli akanghonmeme ason ketheklong apot, Alanglilong monit atum akanghon kipi nangji atheng kedo’o binong pu latum theklonglo, athe ke latum Arnam akejok, kethek-kere abidi, lapen manghumeme amo – lapen laso pen ajok si, latum Arnam aphan ahokpet archo peme lapen ahokpet Alangliphan akar’i do peme, lapen latum Arnam aphan longle lote reng un’e pu latum along akar’ipik do pemelo. Kopi apot si ahokpet Arnam ahakhi kachipilong atum pachoklim pen Alangliphan alammo kethanlong ki’undet athe ke alangtum alammo kethan kachaharjak anujok ke ahok akachini lapen Arnam aphan ahok akar’i kedo apotlo. Lason alammo kethanpon along ke kepadok’i pen aningkepahang lapu kalipinlo, bonta Arnam aphan lapen Alangli kun doan alangtum kachini atenglo. Athe ke, latum Arnam aphan chinilonglo, latum Arnam ahakhi kachipijivek nangji pu latum chemathalo lapen Arnam aphan kar’i kedoan atum Arnam aphan kachini, lapen Arnam akanghonmeme ason lapen Alangli ahok kechoklim aputhak kapacheroktok kepaman henlo. Monit atum Arnam aphan akanghon ason si, alangtum alammo kethan ta kechaknap kalipin penlo; lake ahokpet lapen la ahok akenangsot ardi lapen ador kedo. Lake kedojoi mate kakhurungvang lapen alamjor kavepin lapu kali. Komat ma Arnam aphan ahokpet kachinghon atum henlo athe ke alangtum akai along ale lapen alamjor peme kedo, latum Arnam aphan akekroi kedo athe ke, laheihui amonit atum Arnam akatheang along kedodun thek pemelo lapen Arnam asai lapen akisik-kedangpon along dodunthek pemelo. Lake pima pulote latum akangting along le kedo kalidet, bonta akatheang along si kedo; latum ke alamjor kave akai le kaboche kalidet, bonta Arnam pen ahirjume kelong akai si dobom. Komat ma Arnam aphan kanghon atum anchot si Arnam ahakhi ta pi’unji, latum anchot si Arnam aphan kachinidun peme, latum anchot si Arnam ahirjume kelongdun, lapen latum anchot si Arnam doan alamchak kelongdun unji. Arnam aphan kanghon atum an ke Arnam ason thakthak keklem atumlo; latum ke Arnam akachinghonnei amonit atumlo, lapen Arnam penpen si latum ahirjume chedenglonglo. Lason amonit atum anchot si mo kejut anta rengdunji, lapen latum anchot si Arnam akelana lapen akerai angkang along kaike ta renglongpo. Arnam ke monit atum kapanghonji aphan, lapen Alangli ke monit atum doan akanghon kelong nangji atheng do, bonta kadokave amonit le Arnam aphan kachinghon thek’etji kali, lapen doan amonit le Arnam ahakhi kipi lapen Arnam pen jakong cheparideng unji kali. Athe ke latum Arnam ahakhi chipi thek peme lapen alangtum akeklem doan Arnam asai aphan si apor chipi’et, komat ma ahokpet Arnam aphan kanghon atum anke sining arum latum aphan kapasiksakdunhai abang avepin pen nahok tame damlong, lapen latum pirthe along jakong otlong lapen Arnam amonit doan aphan chejalong. Laheihui amonit atum doan ke pirthe adang pen si vang rappetlo. Latum alam kaningje cheprekjam lapen cheprekjam areng alir, bonta alangtum kereng ke ajor chingbarpet; latum doan tame Arnam aphan kanghon aning si do’et, latum doan tame alammo kethan kacheprekjam kali, lapen isinat kepachun, lapen isinat akar’i. Komat ma Arnam aphan kanghon atum anke pirthe adang nahok tame siksaksepin pen damlong, lapen Arnam ahakhi kipi atum doan ke somindar adang nahok tame damlong. Laheihui amonit atum henlo Arnam kachinghonnei, latum along Arnam ahirjume kedotang, lapen latum Alangli katheang along kaike ta rengdunlongpo.