Lammphrang
Penang an amonit atum Arnam aphan kroilo puvoiphit tame, inut-banghini atum ansi Arnam aphan kekroi kopima lapen latum kopuson si Arnam akar’idam pen pacheton nangjima pu chinichotlo. Lake athema, monit atum “Arnam” pu alammthe lapen lason si “Arnam asai” pu alammseng aphan chinidamlo puvoiphit tame, latum Arnam aphan chininelo, lapen nonputa latum ke Alangli sai aphan kachini durepiklang. Lake manghu athai avelo, tangte, pima halahei komatma Arnam aphan kachini pu atum do’an ke Alangli phuthak alangtum akekroi along paterbunglo. Monit atum Arnam aphan akekroi arsikjik kalidet, lapen lake angton pen athema Arnam aphan akekroi ke chinidak kalipin apot, latum aphan kemanghuvong asonlang. Lason pen si, latum ke Arnam akehang along tikukdundetlo. Akaprek ahin pen lote, jongsi monit atum Arnam aphan chininelo, lapen Alangli keklem asai ta chininelo pulote, latum anke Arnam asai ke’enji aphan apun kalilo, lapen latum anke Alangli akar’idam paplengpiji un’e muchotlo. “Arnam aphan akekroi” puke pima Arnam do pu akekroi henlo; lahenlo Arnam aphan kekroidun pu aphuthak akejoinei athepilo. Anpar akeong kopi dolang, pima Arnam do pu akekroi ke ahokpet Arnam aphan kekroidam pen isinat kali; alar ke, lake kangtangkring dhorom ahin kapathe pen akekroi jongjong ajatlo. Arnam aphan ahokpet akekroi puke laheihui henlo: Arnam si kadokave ahormu aphan kepangripon ajakong do pu pima akekroidam ateng penlo, Alangli lammthe lapen Alangli sai do’an kachomatdun abang, kahenodak akun kache’othek abang, Arnam akar’idam kepaplengpidam, lapen Arnam aphan kachinidam. Lason ateng pen akengkam kachejordunbom atum si “Arnam aphan kekroi” pu hokji. Tebonta monit atum kaiketa Arnam aphan akekroi ke pajoike lapen parsikjikje alamm pu ason si langronglo. Monit atum komatma lason ateng pen Arnam aphan kekroi anke kopima Arnam aphan kekroidun pu ajor chepangbodetlo, lapen latum kijut arni antame kroidunverlo puvoiphit tame, latum anke Arnam akedengpon longledet khangjangpo, athema latum ke kechokchedet atovar ahin si damronglo. Nonputa dobomlang pini arni komatma Arnam aphan akekroi ke ahi pen ketok alamm lapen kangkokvang aron kethan alamm ateng penlo. Latum ke chininelo pima latum Arnam apha akekroi akedoivet duredet tanglo, lapen latum Arnam akedengpon longdun un’elo. Nonputa latum akejokvan lapen dorplup akangjinso kelongji aphan ahirjume si Arnam aphan choardombomlang. Ington lonang, itum aning chepadomjoi lonang, lapen methang aphan charjunang: Lake tangte pima Arnam aphan akekroi ke chenam ta pirthe athak akejoinei asai puloma? Lake tangte pima Arnam aphan akekroi puke Arnam pen ongdung akangjinso kelong pen anpar thang ta kali puloma? Tangte monit atum komatma Arnam aphan akekroi ke Alangliphan chininepin mate komatma Arnam aphan kekroi lapen tebonta Alangliphan khamkhedet anke chenam ta Arnam akar’idam paplengpi unjima?
Arnam lapen monit ke pachingbarkri pen ningje un’elo. Alangli akedoivet lapen Alangli sai anke monit atum kachinidam lapen kepangthekdamdak un’enei asonlo. Jongsi Arnam le salajong ahin pen Alangli sai klemponlo lapen Alangli lamthe monit apirthe along ningjeponlo tangte, monit ke Arnam akar’idam chinidamdedet khangjangpo. Lapen lasi, hala komatma alangtum akai dingpi Arnam aphan chipidet atum antame Alangli akedengpon longdundedetji. Jongsi Arnam sai keklem chengche te, tebontame monit si klemlo pulote, lake thangnat ta kalidetpo, athema Arnam akamunthidam anke kaiketa monit akemathadam pen akangtui si dolo, lapen Arnam gian ke monit akere-kachinidam pen abat si dolo. Lapen lasi Ne ningjelo pima hala komatma Arnam aphan “angton pen chinidamlo” lapen Alangli sai anke ardi kave saide pusi kachehokdam atum anke; latum kea ne chepathekloilo lapen chiniji kangtungtelo. Monit ke Arnam asai aphan pajirmidam nangnelo; anpartame, monit ke Arnam asai aphan pajirmidamji ta un’elo. Arnam amek angden along, monit ke miso asonthot ateng si akenangsot ardi kavelo; lasi koson si monit le Arnam asai aphan mathadam unji? Halahei komatma lam kesoiji ninghang atum, “Arnam ke lason ateng pen klemkledet mate halason asai ateng kalidet,” mate “Arnam ke lapu-lason henlo” – latum ke tangte lam kaningje ingtang’oi kalima? Itum kadokave ta chinilo pima monit, komatma ok along kedo ke Sobar ahin pen si phangno tanglo. Monit akhei asema amat tame Arnam abirudhe kithur henlo. Monit akhei ke Arnam pen chingbarpetpelo, monit akhei ke Arnam asai aphan kapinkhat dunji si ningkethedam puke aveongchotlo. Koson si Arnam monit aphan kapinkhat, laso asai henlo Arnam Amethang keklem asailo. Lake chokvetlo pima monit ke chipidet nangji, lapu mate lason kethekdamlong hokdamdepin pen, athe monit ke bonta aduk anchot. Lake itum Arnam aphan kiri akemang tangdetlo apot, itum akemathadamthap pen Alangli sai aphuthak pasik aret nangnelo atheke Arnam akedengponji aphan puke, itum kahenodak akun pen Arnam asai aphan chinilor pen si kekhamkhedunbom ta itum klem nangne ongchotlo. Lason ke pima itum aphan Arnam birudhe kithur atum pupejima? Koson si lason amonit atum Arnam aphan kekroidunji? Itum akekroi ke pima Arnam do putangdet aphi, lapen itum ke Alangliphan ningpangsamji lapen Alangliphan kelangji si ninghang tangdet aphi, itum ahok atovar si ridun nangpo, lapen Arnam pen kachingbardunkriji akrong si cholangdun nangpo. Itum Alangliphan ane chepathekloi pen khamkhedun arjapsom nangnelo. Kopi akeme si lason asai keklem pen kelongdam unji?
Pini arni, Arnam ke akimi asai klem’etlo. Nang lahei alamthe dengdun thekthedetlo tahai mene, lapen lahei anke nangphan kopine dinghakjak tahai menelo, bonta Ne nangphan pinkhatji ke nang plangmena asema chepaklangdakrinon, athe hala komatma ahokpet Arnam angno akangthirjir aphan kangchir lapen kang’it atum anke ahok longdam unji, lapen hala komatma ahokpet kachehodaidet atum ansi Alanglihin pen patheangdangpo lapen chejapon longchotji. Anbthek kelongji ke karsikjik akangsamjin pen ahok aphan kiri henlo, kachebohongsai lapen kachetontesai pen kali. Ne pima “pini arni, Arnam ke akimi asai klemlo” pu kaningje ke, Ne Arnam ok ahin kachevangthu pu alam aphan le kejongdam kali. Chenam ta lahei alamthe nangphan thang ta kali; chenam ta nang lahei aphan langseletlo; mate lahei anke nangphan thedung ningpahang’e do tahailo. Ajat alam pu tame, Ne ningthelo pima kadokave hala komatma Arnam kacheklangji aphan ahokpet kiridam atum anke laso ahok alam chetongpo lapen alangtum matha peme akangsir-kangchapdam chipipo; tebonta kepadusi alam anke menmen hokdamdelo; lake pima inut kereset abang keklem nangji asailo.
Lason alam karju patertokji aphan akisung k eave, bonta laso along itum anuttin tame eson ahok alam chinidam nangji akenang do: Alangli komatma Arnam Monit nangchepharlo abang ke Arnam akedoivet cheparidenglo, lapen Alangli komatma Arnam Monit nangchepharlo abang ke Arnam kaningje alamm si cheparidenglo. Arnam ke Monit cheman tangdetlo apot, Alangli keklemji ningkehang asai sitame klemponphitpo, lapen Arnam ke Monit cheman tangdetlo apot, Alangli ke kopima Alangli kedo an ningjepo, lapen monit aphan ahok alamm vanpi theklo, alang aphutgak chethe pajir thek’lo, lapen alangphaan atovar jongpi thek’lo. Monit ta pima Arnam akedoivet kavedet puke Arnam monit nangchepharlo abang kaliveklo; laso along abang ke kahontheji athai ave. Jongsi monit le lake Arnam monit nangchepharlo abang kalima-kalangma pu arjuji ninghang do pulote, alang ke Alangli kaningjedam lapen Alangli kipu alammthe an pen laso along patinivek nangji. Atheke pudam lonang, Arnam monit nangchepharlo abang kalima-kalangma pu kapatini lapen lahenlo ahok atovar kalima-kalangma pu kapatini pulote, Alangli akedoivet ateng pen si thakdak nangvekpo. Lapen lasi, lake Arnam monit nangchepharlo abang kalima-kalangma pu kelangdam along, laso ajor ke Alangli akedoivet (Alangli sai, Alangli lamm kaningje an, Alangli akun, lapen penang an akaprek aphar) along si dolo, alar ke athak kachepaklang arjan pen kali. Jongsi monit le Alangli athak kachepaklang arjan pen si ingsirdam chotlo, lapen laso ajok Alangli akedoivet aphan ke langplotlo pulote, laso kacheklang ke pima monit ke akangting lapen luvok si dolang pulo. Athak kacheklang arjan pen ke akedoivet jongdam un’e; anpar sitame, Arnam asai ke monit kapahanchathap alamm pen ke chingbarbeveklo. Jisu athak kachepaklang arjan ke monit akamathadam alamm pen kachetontedet kalima? Alangli abang arpum lapen kachepindeng anke Alangli ahok angthek kachiniji aphan thangnat ta nangkerapji un’ema? Kedamtang ahut Pharisi atum Jisu abirudhe kithur ke athema latum Alangli athak kacheklang arjan ansi langchotlo, lapen Alangli angho pen nangkebar alammthe ning arlo cheponpedet apot kalima? Lake Ne ningkethelo pima anuttin-abangphutin kortemar lapen ingjirmar komatma Arnam kacheklang aphan kiri anke phurkimo along ningkiduk ason ke ruithuthelo. Nang non lirmi akai ahut aPharisee atum ke cheman nangnelo lapen puthot Arnam aphan thengparpan athak sak nangnelo. Nang koson si Arnam kachevangthu kedengdun pemeji si chisik nangpo, lapen nang akamathadam klardak si nangpo atheke koson si komatne ahok aphan kachipidundet abang. Lahenlo anuttin komatma Jisu le inghun aphar athak an kachevangthu aphan kachonghong atum arpulo. Itum karjong amek chehenot peme si paklarsap nangpo, lapen kabondathap mangmun alamthe along chingvuidunkung cheman nangnelo. Itum Arnam asai ateng keklem aphuthak si mathadam nangpo, lapen Arnam asai ateng keklem aphar ahin si langdun nangpo. Anarlo amang along methang aphan kachingbodundet mate abe kidunrup ke nangnelo, kaiketa Hemphu Jisu kevangji arni aphan akar’idam, inghun ephar athak an nangkisun, menmen nangtum angbong kevang, lapen nangtum komatma Alangliphan chininepin mate theklonglelang atum, lapen komatma Alangli akar’idam ateng koson si keklemji kachininedet atum aphan kepondet. Akemenei ke ansose asai ateng aphuthak alam kamathadam si akenangsotlo!
Nang laso alo kangpudam ke kiritarlipji aphan tahailo mene, mate kedengji akemathadam pen tahailo; nang akamathadam ajat tame, Ne ningthelo pima nang kepajutsi an porhidampo, lapen ke joike pen nangrei chibikokkelo. Chenam ta, lahei alamthe porhidam pen aphi, nang akamatha tame chelarpo, bonta lake nang ningkirungdam lapen nang akachinidam aphant ateng pen si langpo. Ladak, tebontame, eson ahormu ke pima nang chinidam nangji: Arnam alamthe aphan ke monit alamthe henlo pu pinchongno, lapen monit alamthe aphan ke Arnam alamthe henlo pu pinchongno muchotlo. Arnam ke’enpon amonit ke Arnam ok nangchepharlotang abang kali, lapen Arnam ok nangchepharlotang abang ke Arnam ke’enpon amonit kalilo. Laso along, kenangsot akacheprekdam dolo. Chenam ta, lahei alamthe porhidamdet pen aphi, nang lahei aphan Arnam alamthe henlo pu pangthekthedetlo, bonta pima monit kelongdam akatheang pu anchotlo. Lason alam along, nang ke kachinine pen si mek bangthiplo. Kopuson si Arnam alamthe le pima monit kelongdam akatheang pen isinatpo? Arnam ok nangchepharlo abang alamthe ke akimi akai ingpudanglo, monit akhei do’an aphan chejaponlo, kachepatujoi alam an paklanglo, lapen akimi akai along alang kidun nangji akrong tame monit aphan pachinilo. Monit kelongdam akatheang ke bonta asai ateng keklemji mate kachinidamji aphan kejoike kapinkhatlo. Lake kadokave monit akhei aphan akimi akai along akejapon kali mate Arnam Amethang aphan kachepatujoi kachepaklang kali. Kadokave ningjedet lapen klem patangdet pen ahut, Arnam ke Arnam lo, lapen monit ke monitlo. Arnam along ke Arnam akedoivet dolo, lapen monit along ke monit akedoivet si dolo. Jongsi monit le Arnam kaningje alamthe aphan akejoike akatheang Karjong Kangthir ahin pen pu langdamlo, lapen lahei alamthe aphan risangho lapen kamontri atum kaningje henlo Arnam salajong kaningje ponlo pu endun lote, pima lake monit akechokche thektiklo. Ajat alam punon, nang akechok lapen akechokche pangvuikung nangne, mate akangtui apot akangdei peman nangne, mate kechokchedet akeongpik aphan ingdeihek matha nangne; ajat punon, nang kopima ahok aphan nang kachinidam apot nang theklor pen kechokche pu nangne. Anuttin tame komatma Arnam so pu kekroi atum anke akechok ahin karjap pen si kisung-keboi do’an ingsirdam nangji, lapen Arnam akimi asai lapen Alangli akimi alamthe Alangli sorjontang api akamatha ahin pen si dengdun nangji; kalite, latum aphan ke Arnam pavirdetpo.
Jehovah asai tangdet aphi, Jisu monit nangcheman si Alangli sai monit angbong nangklemlo. Alangli sai ke kedojoi inutvet pen si klemponlo, bonta Jehovah asai keklem aphuthak si kim-ranglo. Lake akimi akai aphan asai pulo pima Arnam Alangli Aron Akai patangdet pen aphilo. Lasonthot si, Jisu asai patangdet pen aphi, Arnam ke Alangli sai akaprek akai aphan klemponlo, athema angton Arnam kisik-kedang ke kaiketa aphrang ahin si dambomlo. Aban akai jongsi damjuilo pulote, laso adim ke akimi akai vangthupo, lapen ephong le aban akai patangdet lote, laso along ke Arnam kisik-kedang keklembomji aphan akimi asai dopo. Laso nangkachepharlo ke Arnam adunthu ok nangchepharlo pulo, atheke Jisu asai aphuthak aphi kengkenglo. Ahoklo, laso ok nangchepharlo ke amethang jongjung pen le kevang kalilo; lake Aron Akai lapen Kanghon-Kangjinso Akai aphi kethom angdeng asailo. Aphongtin Arnam le akimi asai angdeng pangchenglo te, ladak ke kaiketa akimi doveklo lapen kaiketa akimi akai vanveklo. Lason si Arnam akun along lethot tame kachingbar-kachetonpon akachelar doveklo, Alangli sai keklem adichi along antalo, Alangli sai keklemji adim tamelo, lapen Alangli men antalo. Manghu nangne, athe pima akimi akai along Arnam asai kedengdunji monit aphan sungkrunglo. Bonta Alangliphan koson pen si monit atum kekhamkhe pu tame, Arnam ke kaiketa Alangli sai cheklembomlo, lapen ke kaiketa monit akhei aphan aphrang ahin chejaponbomlo. Jisu le monit atum apirthe along kevang ahut, Alangli Kanghon-Kangjinso Akai nangpangchenglo lapen Aron Akai ke pajutkoklo. Kijutsi arni ahut, Arnam ke puthot ephong ok nangchepharlo, lapen laso nangkachepahrlo pen Alangli Kanghon-Kangjinso Akai ke pajutkoklo lpaen Khristo Kepangri Arat Akai pangchengponlo. Kadokave hala komatma adunthu Arnam ok nangchepharlo abang aphan kedengdunthek atum anke Khristo Kepangri Arat Akai along chejaponpo, lapen anpar sitame Arnam kapinkhat alamm salajong ahin pen kedengdunthek abang chemanpo. Jisu le monit angbong ake’ongpi asai klemlo puvoiphit tame, Alangli ke kadokave monit akhei pap pen kadiya kelong ansi patang unchotlo lapen monit apap athok-ajir chemanlo; Alangli ke monit aphan kadokave alang kahenodak akun apot pajokjelo. Monit aphan angton Sobar akebaipon pen kapajokplotji puke Jisu pap athok-ajir kachemandet lapen monit apap karchakdet anchot kali kenangji, bonta lake Arnam aphan ansose asai thedung keklem nangji dolang atheke monit aphan paplenglim pen kahenodak kapahi’ipik akun kepajokplotji along, Lapen lasi, nonke pima monit ke alang pap do’an apot kadiya longtanglo apot, Arnam ke ok along chevangthulo atheke monit aphan akimi akai kachejaponji aphan, lapen ado kipi lapen kangsai asai pangcheng tanglo. Laso asai ke monit aphan kangtuiving ahavar along an vanlo. Kadokave komatma Alangli kepangripon aber kachipidundet thek atum anke akangtui ahok chehoklongpo lapen kethedung ahirjume longdunpo. Latum anke ahokpet kathe’ang atur along si dopo, lapen latum ke ahok, tovar lapen chethe aphan longdunpo.
Jongsi monit atum Kanghon-Kangjinso Akai along ansi chingthangpring dover pulote, latum ke alangtum kahenodak akun chepadar thekthedetpo, Arnam along kedovek akun aphan chininedundelo. Jongsi monit atum kaiketa kangjinso akeongpi angbong si dolongverlo, bonta Arnam aphan kachiniji mate Alangliphan ningpangsamji aphan pima chethe atovar ke avedet pulote, latum ke alangtum Alangliphan akekroi along Alangliphan ahokpet pen longdamdelo. Lason ajat akekroi ke chingjinsomeme chenamlo. Nang le laso alo porhi patangdet aphi lote, nang le Arnam ok nangchepharlotang abang asai keklempon asontin akengkam Khristo Kepangri Arat Akai along chomatdun longlo pute, nang chemathapo pima penang an aningkan pen nang akar’idam ke kijutsi kichundamji angdeng anlo. Nang chemathapo pima non ansi nang ahokpet Arnam aphan chepathengnono pen ketheklonglo; non ansi nang Alangli bang arpum aphan ketheklonglo, Alangli salajong kaningje do’an arjudun longlo, Alangli sai gian aphan chorodunlo, lapen ahokpet koan si Alangli ahok lapen jakongtheparpik loma pu mathadam longlo. Nang chemathapo pima nang ke penang an ahormu longtanglo pima monit atum kedamtang apor ahut ketheklongle mate cheparideng longle doan. Laso apor ahut, nang ke kardak pen chinipo kopi si lake Arnam aphan kekroi puloma, lapen kopi si Arnam akar’idam pen kapacheton puloma. Ahoklo, jongsi nang kedamtang alam along le dothipverlo, lapen adunthu Arnam ok nangchepharlo abang ahok aphan patepekbom mate che’obom pulote, nang ke ri angse si chemanpo, thangnat ta longlelo, lapen kepadusi nang ke Arnam abirudhe kithur apot adai kedo abang pusi hokdetpo. Hala komatma ahok alam karjudunthek lapen Arnam asai along chehodaidunthek atum anke adunthu Arnam ok nangchepharlo abang – Jakongtheparpik amen aber si hokponpo. Latum anke Arnam salajong kapinkhat dengdun thekpo, ansose lapen akangtui ahok alam longpo, lason thakthak si ahok achethe antalo. Latum ke monit atum kedamtang ahut ketheklonglepin kelangdammek si theklongpo: “Neliphan nekangki abang aphan ketheklongji si neli chetevarlo lapen neli hongthroksi Ser amelur archok theklonglo, lapen archok angbong monit nangnak inut aphan theklonglo. Alangli akengpak an kephorok achoi keding chingchoilo, lapen alangli ning angden Ser achepan chingtinlo. Alangli chu kelok biresak angmi ason thakthak, mate ar’e kelok ason thakthaklo, lapen amek ke me ade ason thakthaklo; alangli keng ke kepherangtang lapen kangthitang abitoi ason si klarbong lapen as eke langsun arki asonlo. Ar ar’e along chiklolongso throksi do, lapen alangli ingho pen rangso hini kedo kereset anokjir barlo, lapen alangli mehang ke nerlo chitim a’arni ason thakthak si turanglo” (KEPAKLANG 1:12-16). Laso kelangdammek ke Arnam angton akun kachethanponlo, lapen Alangli angton akun kachethanpon ke Alangli nonjong ok nangchepharlo along Arnam asai kachethanponlo. Ado kipi lapen kangsai ahir ketanrak along, monit aSopo Alanglilong kedolor akun lam kaningje pen ajok chethanponlo, kadokave hala komatma Alangli ado kipi lapen kangsai kedengdun atum an aphan monit aSopo ahok arje patheklonglo, atheke John le kethekdamlong monit aSopo arje pen kekroithirklong atengthotlo. (Ahoklo, kadokave lahei anke hala komatma Arnam asai Khristo Kepangri Arat Akai along kedengdundedet atum aphan ke patheklonglelo.) Ahokpet Arnam arje ke monit alam kaningje pen paplenglim than un’e, lapen lasi Arnam tame monit akerap pen atheke Alanglilong kedolor akun Alangli chethanpon si monit aphan Alangli ahok arje chepaklanglo. Atheke pudam lonang pima kadokave hala komatma monit aSopo along kedolor akun aphan chorodunthek atum anke monit aSopo ahok arje tame theklong tanglo, athe Arnam ke thedung khangjang lapen monit alam kaningjedam akerap pen ke paplenglim than un’elo. Monit le ephong Arnam asai Khristo Kepangri Arat Akai along asontin akengkam chomatdam longlo pulote, alang John alamthe do’an alang le melur archok angbong monit aSopo aphuthak kaningje ahut alam chindunpo: “Alangli chu kelok biresak angmi ason thakthak, mate ar’e kelok ason thakthaklo, lapen amek ke me ade ason thakthaklo; alangli keng ke kepherangtang lapen kangthitang abitoi ason si klarbong lapen as eke langsun arki asonlo. Ar ar’e along chiklolongso throksi do, lapen alangli ingho pen rangso hini kedo kereset anokjir barlo, lapen alangli mehang ke nerlo chitim a’arni ason thakthak si turanglo.” Laso apor ahut, nang ke pima laso jongjongchot aok pima kepatepek un’edet adunthu Arnam ok nangchepharlo abanglo pu honthedam athai avepin pen chinidampo. Anpar sitame, nang ke ahokpet kopuan nang ke hirjume kelong abang pu chemathapo, lapen methang aphan kopai kelangmenei abang pusi chemathapo. Tangte nang laso ahirjume kachodengdunji aphan ninghanghema?
