Kethek Angdeng Kachepangtui ke Arnam Kipi Akejok Kelongji Ajoine

Monit atum akethek kebat pulote nangtum kachini’un ajakong ta kachepangtui nangji akenangsot, anlote Arnam alam arjuthekpo, asai keklemji ta thek muchotpo. Akenangsotnei ason ke lahenlo. Nangtum jongsi Ne phiphi nangdunlo sita Ne kipu alam an arjuthekthe pulote, nangtum akekroi ke chingvuikunglo kalima? Ne koanma lam ningje sita, nangtum lahei alamthe aphan chejot un’edet lote, lapen Ne kipu ason an ta nangtum arjuthekthe pulote, lake nangtum ke kethek kangdei pusi pudetpo. Nangtum jongsi kachini’un ajakong ave pulote, Ne kipu alam nangtum ajat ta arju thekthedetji, lapen kenangjivek ateng pen kelongji aphan sungkrungpo; nangtum aphan nangthandakno ason dopik, lapen kemangdam ateng longledet tahai, lasi sai keklem angdeng pa’ong nangkok. Nang kachini’un ajakong, kachechar ajakong, lapen nang akereng ingthimlim kalidet apot si, “kethek angdeng kachepangtui” pu abang nang klem nangkokpo. Lake klemvek nangkokpo lapen klemkle te chokchelo. Ansi ejahak akenang ason pleng unji; kalite, Ne kaningje alam anta thangnat ta kalidetji. Tangte, pap pen keplengset abang pu nangtum cheplangpledetji ma? Nangtum pirthe angbong kahenonei amonit atum cheplangpledetji ma? Nangtum angbong kopi asai si keklem nangtum chinine ma, lapen nangtum akenang chechinine ma? Nangtum akethek kachechini nangji akenangsot: Ne kenangji ason plengplepin chenam. Ante Ne sai nangkapanglendun kali ma? Non amat nangtum akethek lapen nangtum akun ateng pulote, inutnat ta Nelong hakhi kechoji a’ot ave, lapen mo aphi Ne keklemji asai along anghor kardik kanghorji abang ave. Nangtum chetherak’re ma? Nangtum jongsi laso ateng damthorji pulo tangte, koson si Ne kar’i ason nangtum kapepleng thekpo. Nangtum akai achethe plenglim lapen ale kedo ason si reng nangji. Apor padamthapri-lason keklem ke ale kavenei asailo. Nangtum kopi si keklemji ma chechinivek nangji. Ajat ason ta kethek’et abang pu chetinri-nangtum aphrang kedam nangji si ke’onglang! Nangtum along jongsi asapsobak ta monit a’ot ave pulote lapen anpar kopi si dolang? Pakejoinak ason kali ma? Ne kar’i monit a’ot lapen akethek, nangtum angbong inutnat ta apun kechok abang avedetlo. Sai kapeklem meme amonit kelongji aphan akisung thepik binonglo. Ne pharman kethedung asai klem’un lapen akethedung asai Ne nangtum aphuthak nang hodaiji pu pusi nangtum chetin bomlo; tebonta, nangtum amek angden along kachinivek nangji ason anta nangtum chinine-tangte koson si karsikkrung alam nangtum kachini unpo ma? Nangtum kacharli apun choklim lapen lakha peme pensi charli nangji-sai oijoi pen kali-lake mesense. Kangdeinei angdeng penle charli paphrang non: Angton pen langponphlir ra karjuthek pemeji aphan bor’i non. Anuttin akorte-ingjir ta porhi thek nangji. Losei pen kedam ahut mirbiri aphan kelangpon asonse ra, chingbe dun thapri. Mesen akerap kelong alothui ta nangtum porhi nangji (rat angno lam kaningje aphuthak lapen lamtasam alo heihui). Pirthe anat ning kaperung alothui (ningchedok-chehang alamhancha, beisa kapaklem meme aketok alo, lamsai, lapen anong kachethang amonit atum alammo heihui); lahei ke ale ave, lapen monit aphan akaheno aphan si vanchot. Nangtum kacharli nangji ason an ke thek peme nangji. Monit atum aphan pethekserji pulote alangtum akereng, angthek, kedo angdeng lapen amena ador pachechini nangji. Mondoli atum akenangsotnei ke kopilo? Non amat monit akethek ason kirung pangtui kalima? Kecheng’iji aphan ke nang methang ta loh kethekser kenangsot; lapen la nang chevarvedet nangji! Monit atum akethek kopi athe si kirung pangtui nangji nangtum la chini peme nangji, koson si rung nangji, lapen koson pensi kilut pangchengji. Monit a’ot ason kereng athe, kopi apot si keklem nangkok, lapen monit atum keklem nangji ason nangtum chini peme nangji. Jongdamme, loh kethek pen ajok, kopi koson anatthu si nangtum lo kacharli nangji ma, lapen koson si kacharli kecheng nangji ma chini peme nangji. Loh kethekji aphan kopi si kemang nangji ma nangtum chinivek nangji. Arnam alam kachini lapen ahok alam kachiniji aphan kapatini parsik kalima? Pini arni mondoli along kopi si manlo? Monit atum kethek kihung ajok Arnam alam kechoji aphan tengnedet ason manlo, lapen loh kethek pen anpar latum narlosini-sini ta ajat ta klemkledetlo. Nang jongsi latum aphan monit a’ot ateng reng nangji pu pulote, amena ahem kachepangthir, kitun-kedang lapen kitun-kedang’i ajaton kenam ansi klemchotpo. Lahei ason aphan ansi aning dochotpo; lapen mondoli along kerengdun nangji koson ma anta chechininedetpo. Nang jongsi non amat lason si rengbom pulo tangte, nang keklem nangji pen sui tanglo. Tangte kopi apot si nangtum kangthir’et achethe pen kerengji aphan nangtoilo? Lahei nangtum charli lote nangtum keklemvek nangji ason pleng un’edetpo. Akenangsotnei ke kereng henlo; lapen laso ajoine si lahei asai klembomlo, lapen non amat ke, monit atum keklem angbong kisung kepho pen kapejokdun henlo. Nangtum akethek aphan kirung kachepangtui pen monit atum aning angthin lapen kereng achethe aputhak chinilo, lapen ajok monit atum karjong anatthu kereng achethe lapen aning angthin theponbom lapen kachelar thekji aphan si kemanglo. Nang pe ri kachepindeng lapen kachepalangme ke thek tahai, thekser lapen reset tahai, bonta, nang sai keklemji arni nangle lote, nang un’edetji. Lasi nang akethek aphan kirung kachepangtui ahut kopi koson si keklem nangji ma chini peme nangji. Nangtum aphan nangkelarphunji lapen nangtum akethek kapechoklimji si kemanglo. Nangtum akethek kere jongsi batponbombe pulote chokchedetji, lapen nangtum aning-angthin jongsi chelarle te, henothu muchotpo. Lake pevir un’elo. Monit a’ot nanglong do peme pu alingle nang kai akereng mesenlo lapu kali-nanglong kenangji ason ke joike lapu kali.

Monit apun-achak pen kereng atum ason akereng, kedo-kethak thekdun peme lapen kereng angdeng chepangtuidun thek peme ansi-lam kaningje lapen ahok ahakhi kecho ta chelar thekji. Mo nangphan hakhi karjap arni nanglelo tangte, nang kai achethe kereng kachelar aputhak lapen nanglilong Arnam agian kedo aputhak si nang ningje nangji. Ahokpet nang lamthe lapen nang athe kerotlong ke la sonni alam pacheroppet pen henlo. Athak kachepaklang ke monit apun-achak ateng ason kereng chelar dunlo bonta nang ning arlo thang kachini ave, lapen nang ning arlo ke ahok alam chini peme bonta athak ke kachinine ateng monit a’ot dode pulote chokchelo. Nang phuthak kam keklem ke rat angno kapeklang chot aphan kali, bonta nangphan nang kelarphunji si klemlo. Nang keklem nangji ke nang mena kachelarji aphan kabor’i anchotlo. Arni vang pen rap ketok lapen karju, lapen anpar nang kai along thangnat ta ave pulote chokche; ajat angdeng along ta kapangchengdun pu thek nangji. Monit kangthir atum ason ben kereng charlidun nangji. Keongdung angjir atum man kedo asoarlo ason chepindenglo lapen pinso atum arleng kethe ason do-thaklo, bonta monit kangthir ativi latum along avedetlo. Monit kedo-kethak ativi kachelar-lake akejoi kelong ason. Arnam alam kecho-kijun puke lata isi lo-atovar nang ketho asonlo. Nang kedo-kethak ativi chelarlo bonta Arnam alam kecho-kijunje ajok thangnat ta asai chepado thekthe pulote, nang charlinak ason kalidet jima? Lasi, la sonni ta pacherap nangji. Nanglong pen kenangsot alam chethanji pulote kopi aphan si Arnam agian alam kachethan nangjilang? Sai amo kichun ale kelong ajoine le kachethanji kalima? Mo nang ron haidet lote, nang kepho kachetong ason an aphuthak nang asakhi arjap nangpo. Nang jongsi athak kachepaklang ke kakirlatang amonit a’ot ason dolo, bonta nang kepho kachetong ason chethanjir thekthe pulote chokchedetpo. Nang jongsi Karjong Kangthir keplengset asonben rengji pulote, monit a’ot ateng do-thak nangji, lapen keongdung ason ke charlilepin pen sita thekdetji. Mate, hem karkok ta charli le te thekthe pu tong nang pupo ma? Lapen anpar, kaibongso pen an kachophinji aphan ta ghonta isi anbak charli nangji puke lam ta kali! Monit apun-achak choklim nangji pulote kopi nanglong do nangji? Kachini’un ajakong, kamathadunthek, keme-kaheno kephlakthek lapen a’ot-adur. Nanglong jongsi la sonphli a’ot dolo pulote, monit a’ot kedo peme abanglo. Nanglong monit ativi dovek nangji, lapen Arnam aphan kekroi amonit ason chinglit nangji. Nang kangtuiving ason chepalong bor’i teng’ei nangne, kalite thekpik-repik nangji lapu kali, bonta monit ateng a’ot-adur mesen, kachecharmek kedo lapen monit kereng nangji ateng anke rengdun thek nangji. Lapu an ta chok. Nanglong pen Ne kenangji ason an ke nang nangklem unchit ason saide; vokak aphan ha thengsong kapangjartoi pu ason ke kali. Amo kevangve alam lapen asai nangputhak klemkle. Nangkai along kacheklangdak kahingno ason an che’o non. Nangtum aphan ke Sobar nang pater tanglo lapen Sobar abi pensi plengsetlo. Nangphan nang kar’i ke keterbang Sobar aning-angthin che’o non. Nang akangtuiving angdeng an le nangji, mate anong kachethangklong lapen arleng kethe man nangji pu nangpupe. Lahei ke thangnat akenang ave. Nangtum aputhak sai keklem lake nangtum along kedotang ason pensi klemji. Nangtum aphan Ne nang kar’i lake isi angdeng anchot. Non jongsi monit aphan sorkar akehoi atum ason pacheplangtoilo-mate sorkar akethe kiding atum ase ason lam paningje toilo, akethe kiding atum ason lam kaningji pacharlilo, lapen lamjir lapen lamhancha ketok atum ason si lam paningje toilo tangte-lake chokchedetpo, lapen; pleng ta un’edetji. Nang’ot-nangdur ateng pulote, gian plengset pen lapen choklim pen lam ningje thek nangji. La an le thek anta chokji. Jongsi, lapen akijum pulote, kachecharmek lapen kachini’un ajakong dolote la anta choklo. Non amat akenangsotnei ke kahenodak Sobar ativi kache’o henlo. Nangphan nang kanghutang kahingno ason an chevar’etnon. Nang jongsi lahei akahingno ason chevarve pute koson si kechoklim kachini’un ajakong lapen kechoklim akachecharmek koson si ke’ot longpo? Kai kachelar ajok, keongdung amonit atum ke kachepabi lapen ning kiding ave tanglo, lapen monit kangthir atum ason apun-achak lapen akanghon ta avedet tahailo. Lason amonit atum ko’an amo kevangve loma! Latum kachethanji alam dobom langma? Latum ke kachecharmek lapen kachini’un ajakong kave atumlo. Kalang, ejahak amonit atum keklem asai amo kevangve lapen kechokche anke pakengvek nangji; kedamtang alangtum akereng kangtangkoi lapen kithipla lapen kilu arje, jongdamme-lahei ke chelarphun nangji. Kachelar puke amo kevangve lapen ok aning kehang aling keklem, lapen ning kehang aling kaningje pu aphan kali. Nang ingho dolo pu amat ningjethap ningjephruri. Kemesen amonit alam kaningje lapen a’ot-adur puke choklim angdeng pen lam kaningje, kalang pulote kalang lapen kali pulote kali pu thek nangji. Ahok aphan nirket pen lam ningje peme non. Chongthuiri, chobeiri. Kemesen amonit aning-angthin kachelar isi angdeng an do la munthi dunthek nangji. Kali pulote, ahokpet ason kopima nang chini un’edetji.