Arnam Kangvaitang Amonit Atum Khristo Kepangri Akai Along Kekroi Nangji Sonkep Kachari Alamtoi

1. Monit amethang aphan chepakam nangne, mate chepangtui ta nangne. Alang Arnam aphan si ardom lapen anong pangtui nangji.

2. Arnam asai aphan ale kedoan ason ke klemnon lapen Arnam asai aphan kapahenodun ajat asai ta klemdetri. Arnam amen, Arnam angthek lapen Arnam asai raikomnon.

3. Arnam ahemtun along tangka, hormu-hortar, lapen kedoan keplang-kephi ason henlo monit atum kachipi nangji adanlo. Lahei adan ke Arnam lapen kardom abang pen anpar majok ta denglongle, atheke monit atum kipi adan ke Arnam aphan ningparong apharman. Arnam lahei adan ke kardom abang pen si chebakchot; anpar ke majok ta lahei adan along pen epharbak anta kedenglongji apun mate aron ave. Monit adan kedoan ta (ning cheparong’ime ason tangka lapen hormu-hortar pen pen) Arnam aphan si kipi, monit aphan kali lapen lasi lahei ahormu pen ke monit atum le aning kacheparong’i nangne jongsi monit atum lahei pen aning cheparongji, pulote alang ke dan kachonghu pupo. Komatma lapuson keklem abang ke Judas lo, atheke, kachongthui asai kedeng pen anparta, Judas ke amena aphan thija arlo kedo atangka pen ning cheparongme’idet.

4. Monit along ke chongthui-chopanglim akun do lapen seng kirunvi ason pen si kedokok. Lapuson apot si, Arnam aphan sai keklempi ahut anut kaprek adung kavedet ahut pinso-arloso kacheprekjam banghini amonit sai keklemrap puke kertanglo. Komatne jongsi kachoklem thekdunlok pulote phlungphitpo, keplak avepin pen.

5. Arnam aphan ingsaidetri mate thangbakbe pura Arnam pen kachepho alam chingveidetri. Monit keklem nangji ason le klemnon, lapen monit kaningje ason le ningje, lapen adui arkandetri mate ahoi pen abat cheplangdetri. Nang de chelangtu lapen nang konat si kengpak chibiji ma cheretu, lake Arnam aphan aning kepadono asai keklemkledetji aphanlo.

6. Monit ahin pen keklem nangji ason klemnon, lapen nang’arpu ateng sai chedengnon, lapen nangdeng cheripthipnon. Nang Arnam aphan kekroi tangdet apot, nang Arnam asai along si cherapdun nangpo; jongsi kalidet, pulote nang ke Arnam amen pen kechoji lapen kijunji apun ave, lapen Arnam ahemtun along kedoji apun-achak kalidetji.

7. Mondoli asai lapen alam along ke, Arnam kapinkhat ateng keklem pen anparta, ajat ason along ta Karjong Kangthir asai ke’enpon amonit alam arjutu. Asapsobak alam karkan anta deng un’edetji. Nang kapapleng along ingthimlim nangji, lapen kechok mate kechokche lindun nangne; kopisi kechok mate kopisi kechokche pen ke nang thangnat kachepho ave. Nang ke methang aphan kosonsi alam ateng keklem thekji pusi mathachot nangji.

8. Arnam aphan kekroi amonit atum ke Arnam alam arju nangji lapen Alangliphan ardom nangji. Komatne anut kaprek aphan ke anong ingthur nangne lapen ning chethe nangne; Arnam aphan kechengsi bidetri, nangning kachethe abang ingdeng hini, lapen nangmethang ingdeng kethom. Majok abangphu ta nangning along adim cherairedet nangji, lapen nang monit atum – jatsemet ke nang man kipi atum – Arnam pen ingdeng isi padodetri mate Alangli pen pachingbar longdetri. Lake Arnam chechak un’elo.

9. Nang kamatha ason ke mondoli asai alongle chibinon. Nang ok-vi apharman kachemathamek ason ke chesaivet ra bikoknon, hemtun alam aphuthak ardi dojot alamrai endun pemenon, lapen Arnam asai aphan aphrangsi binon lapen nang methang arnivang akai ke ingdeng hini. Lahenlo kangthir’et abangphu along kedo a’ot keme.

10. Hem isi abangphu angbong pen kekroikre atum (nangtum asomar, nang penan mate piso, nangtum angjir mate nangtum apo-apei, lapen kaprek) atumphan kardomhem along pon bor’i nangne. Arnam ahemtun along abangphu kadure kali, lapen ale kave amonit atum pen aphai kepaplengji akenang ave. Komatma kekroikre atum an aphan ke aningkehang ateng si kardomhem arlo japon nangne. Labangso alamtoi ke kadokave aphan antalo. Nangtum ingchap nangji, langchari nangji, lapen methang hejan angbong cheparnobom nangji; majok ta arkan nangne. Hala nang hemtun abangphu angbong pen kekroikre atum le ninghanghepin pen kardomhem lutdam sitame, alangtum aphan kitap pinangne mate amen kimi ir nangne; lapuson abangphu atum ke Arnam ahemtun amonit kali, lapen lapuson amonit atumphan ajat kenangsot abidi pen tame kardomhem arlo kilut pen khang nangji. Jongsi hi’i atum nangkatumpra pen kardomhem aphan kisung vandet, tangte nang nangmena amat aphan ta nangplungphitpo mate nangphan ta nangkekhamkhe dokokji. Thihek pen, anuttin ta labangso along arpu dolo, nang le chepameme pusitame, mate nangle komatne aphan alar kachehuiji aphan le asai endet tame.