Kapeklang angthek 1: Arnam Kacheklang Pen Kai Kimi Along Japon Pemelo

Arnam ningkan suri throk kisik-kedang kemangdam ke kejut nangle tanglo, lapen Khristo arat kachepahemphu dunlongji aphan Alangli kacheklang kiri atum an aphan ke donri ingpupi’etlo. Kachinghon korte lapen ingjir atum, kopilo nangtum kachonghong dolang? Kopilo nangtum kiri kedolang? Nangtum Arnam kacheklangji aphan si kachonghong ma? Nangtum Alangli kengbot si kiri ma? Arnam kacheklang aphan koan nang ningkehang! Lapen Arnam akengbot kelongji aphan koan akesung ma! Nonjong akai ahut lapuson si, non ason apirthe along, kopilo ili keklem nangpo Arnam kacheklangji arni aphan kapangthek nangji? Kopilo ili keklem nangpo Arnam akengbot ateng kedun thekji aphan? Lahei akarju alam ke Arnam kacheklangji aphan kachonghongprong atum do’an ke pholo. Nangtum ephong akepho pen anpar keongdung si kroilo – tebonta kopilo kelongdam ke? Konatlo Arnam kacheklang? Konatnatlo Arnam akengbot heihui? Nangtum akethak longloma? Keongdung amonit atum ke lasonsi nangthakji: “Arnam kacheklang ke Alangli phiphi kidun atum an along lapen Alangli kengbot heihui ke itum angbong si dolo; lapu an joikejima!” Madu tame kaningjechot alam akethak ke pi thekji, bonta nangtum la Arnam kacheklang mate Arnam akengbot aphuthak chini peme loma? Arnam kacheklang pu kipudam ke pirthe along Alangli kevangthu pen Alangli sai monit atum along keklem henlo. Alangli mena angthek lapen akun pen, lapen Alanglilong kedotang ateng si, Alangli monit atum angbong vang si kai along asai dengponlo lapen labangso akai ta pajutponlo. Lapuson akacheklang ke ningarong kachipi amei ason kali. Lake isi kejongdam angthek, arjan, manghumeme ason mate thedung amang ason puta kali, lapen lake kijumnei isi dhorom asai kedengpon henlo. Lake ahokpet lapen kapaklangdak asonlo jasemet madu ta paphome lapen theklongprong. Lapuson kacheklangpon ke keklem nangji dokok apot si keklemchot lapu kali, mate malomso aphan le keklemvoivoi kali; lake, pima Alangli kisik-kedang kemangdam along keklempon angdenglo. Arnam kacheklang ke kaike ta ale dolo lapen Alangli kisik-kedang kemangdam pen kaita kachepho doveklo. Kopi si “kacheklang” pu kipudam pen Arnam monit aphan keja, kethan lapen kapaklarpon “kacheklang” ke kacheprek pemelo. Alangli mena aphuthak kachepachini aphongtin tame Arnam ke Alangli keklem thedung asai angdeng ateng si klempon. Lasi sai ke akaitin tame akacheprek doveklo. Lake monit atum mathadam un’e, lapen lason ke monit atum phophepinlang. Labangso asai ke kai kimi kapangchenglo lapen aban akai ke kangtonlo, lapen lake monit akhei kejokvan kelongji aphan isi akimi lapen keme muchot asai asonlo; anpar ta, labangso asai ke monit akhei aphan akimi akai along kevan’ilo. Lahenlo Arnam kacheklang puke kethandam.

Nangtum jongsi ephongbak Arnam kacheklang pu kopima chini peme lote, nang koson si Arnam akengbot kiri nangpo? Labangso akarju ke kethan sungseji: Konatma Arnam kacheklang, hadak Alangli kengbot ta longpo. Lapuson akethandam ke kenglep ongchet, bonta la keklemji kejoike kali, penang an amonit atum ke Arnam konat si kacheklangma chininelang, Alangli konat si aningkehangma puke jum muchetlo, mate Alangli konat nangji, kacheklang. Ajahak atum mathadammekme si konatma Karjong Kangthir asai keklem, hadak ke Arnam cheklanglo pusi kekroidam do. Mate anchot ta kali konat ma karjong pen kacheklang along ke Arnam ta cheklanglo pusi kekroidam do. Anpar ta konatma monit atum aman-apeng akangtui kedo along ke Arnam ta cheklangdunlo pusi kekroidam do. Malomso aphan, lahei akekroidam alam ahok ma chobai ma ili che’o’et sinang. Laso akarju kethanji pulote, ili klardak kejongdamvet dovek nangjilang: Itum kiri ke Arnam akengbot henlo. Itum ke karjong pen cheparjan aphan le kiri kali, nongnam ketheklong aphan le kehung ta kali; itum akenangji ke Arnam akengbot henlo. La apot si, Arnam akengbot si ili ke aphrang penta kiri, lasi Arnam akar’i si itum ke kiri nangji arpu ta dolo, Arnam alam aphanlo, Alangli kaningje alam aphanlo – athema konatma Arnam akimi alam kaningje lote, Arnam ase ta dodunlo, lapen konatma Arnam akengbot heihui kedo, Arnam asai keklem ta hadak dolo. Konatma Arnam lamthe kaningje lote, Arnam hadak cheklanglo, lapen konatma Arnam kacheklang lote hadak si ahok, tovar lapen chethe ta dodunlo. Arnam akengbot kiri along, nangtum “Arnam ke ahok, tovar lapen chethe” pu alam dengdedet. Lapen apot si, penang amonit atum, alangtum ahok pu longlok tame, latum Arnam akengbot long’etlo pu kroikredetlo, lapen nonpu Arnam kacheklang aphuthak kachoroji ardi kipi jumdetlo. Lahenlo arsikjik akechok damdedet! Monit atum kopima akamathadam pen aling ke Arnam kacheklang pachingbardam unˈe, monit atum kipu aling si Arnam kacheklang nangji puke jumthu’ongpo. Arnam ke Alangli sai keklem ahut Alangli mena si ingvai’lo lapen Alangli mena kemang atengsi klemlo; anparta, Alangli ke Alangli mena akemang lapen Alangli mena adichi do. Asontin asai le Alangli klem tame, Alangli monit atum pen chingvailin nangne mate keparedun nangne, Alangli sai do’an ta madu amonit aphan tame pachiniponpe. Lake Arnam akun lo, apot si, chenam ta, madu tame kapangthekvek nangpo. Nangtum jongsi Arnam kacheklang angthek long nangji pu akar’i do pulote, Arnam akengbot aphiphi dunji pulote, aphrangsi nangtum jongjung akamathadam alam pen che’odettha. Arnam lason mate lapu si keklem pu nang hangdetri, nang ningkehang aling lapen nang kamathadam alam ateng puke Alangliphan masapso ta pedori. Alar ke, nangtum kosonsi Arnam akengbot kiri thekji, Arnam kacheklang pu kosonsi kedeng thekji, lapen Arnam kelempon akimi asai along kosonsi kachingbedundet thekji, laheihui si arju nangpo: Lahenlo monit atum keklemvek nangji. Pima monit ke ahok kali, lapen ahok le kacheparidengdet kali, alang ke kiri, kedeng lapen kekroi si kenangpo.

Lake nang American, British, mate prekjam akhei pu aling kalilo, nang mena akhei angbong alam pen angtan kengkam chibi nangpo, nang mena jongjong aphan pen chepahelo nangpo, lapen nangphan nangkapinchong ateng pen Arnam asai aphan si lang nangpo. Lason pen si, Arnam akengbot aphiphi kidunji pen nangphan nangkhangkhepo. Pima athe ke, non malom, penang amonit atum Arnam kacheklangji ke konatne kejongvet adet along mate komatne abangphu alongji pusi aphu along ki’un’edetji alam chibilo. Koan kethedungji ale kedopo Arnam asai, lapen koan akenangsot dolo Arnam kacheklang nangji! Kosonsi monit atum akamatha-kamunthidam alam alakha pi unpo? Lapen lasi Ne pulo, Arnam kacheklang ketheklongji aphan ke det-longri lapen khei akamathadam alam che’opon nangkokpo. Lapu pen si nang jongjung akamathadam alam pen chepajok unpo; la ansi Arnam kacheklang ketheklongji aphan denglongpo. Kalite, kijut un’epin akangting alomng si nang do nangpo, lapen Arnam aphan kedengji avarsai longlelo.

Monit akhei do’an aphan Arnam ke Arnam chenamlo. Alangli mena aphan konatne adet mate amonit atum jongjung ahormu pu chelakhakhe, tebonta Alangli sai si cheklembom Alangli akemangdam ateng pen, ajat ason tame, det-longri mate monit atum madu ta khang un’e. Chenam si nang lason ke mathadamdepinlang tahaiji, mate nang laso akamathadam ason ke kekroikrevekji asonlo, mate chenam si konatma Arnam amethang aphan kachepachini adet along lapen Kodak amonit atum along si Arnam amena aphan kachepachini ma lahei along kadokave angbong kelangrem si manlo lapen laso adim ke pirthe along kiduknei si chemanlo. Tebonta Arnam ke Alangli akethek-kere do. Alangli ajakong kethe pen, lapen Alangli ahok ateng pen lapen Alangli kun keme pen, Alangli isi adilung amonit atum aphan ke long’etlo jasemet halatum ke Alangli akamatha ason si isivet dolo, lapen laso adilung amonit atum aphan Alangli akar’i ke pachoklimji – isi adilung, Alangli si cheparidengpo, asat lapen kesung-keboi do’an tame kachechaktang lapenthu bang kelang un’e pen antame kephotang, lason atum si kijut anta Alangli phiphi dunlongpo. Arnam kacheklang akemang ke, ason do’an lapen det-longri pen kekhang kavedet, lason si Alangli sai Alangli kemangdam ateng pen Alangli kapachun unji aphanlo. Lake Judea along Arnam amena le ok kapachemandet asonlo: Alangli akemang ke kadokave angton monit akhei do’an aphan amethang apran kachipidet asai pachun si pap kepajokji pulo. Tebonta Jews atum ke Arnam labangso asai keklemji un’edetji pusi kroidamlo, lapen latum kamatha ke Arnam ok jongjong kachemandetji puke un’e lapen Khristo Jisu ason cheparjeje pulo. Latum laso “un’e” pu ajoine pen si Arnam aphan pinremlo lapen khamkhe’ilo, lapen laso apot Israel adet padu ke kesungpik si chemanlo. Pini arni, penang amonit atum laso akechokche si klemthu lethotbomlo. Latum methang aninghang ateng pen si Arnam kacheklangji pu alam kapachethang, tebonta Alangli kacheklangji aphuthak ta pinremthulang; alangtum laso “un’e” pu pen apot si Arnam kacheklangji alam ke alangtum amang along ansi do’ichotlo. Lapen laso apot si Arnam alam kevanglo pu pen ke penang amonit atum kekhangkavepin akangnek sarlang si dolo. Bonta laso akangnek Jews atum kapinrem lapen kelangrem pen akacheprek do puhe? Nangtum la ahok angno karjap arsikjik aman-apeng pi thekthelang, anparta kar’i binong aning-angthin ta chenam avelang. Nangtum kadokave kacharli ke athe kavepin lapen thang kachini kavepin pen mathaplot akachonghong si klemlo. Lason kacharli lapen kachonghong pen ke kopilo ale kelongpo? Arnam pen nangphan kai along akethan-pare alam longji pusi mathama? Arnam kaningje alam jongsi nang pangthek thekthe lepute, kopuson aloti pen si nang Arnam kacheklang kethekdunlongji aphan apun kechokpo? Konatma Arnam kacheklang, haladak ahok ta akethan dolo, lapen hadakthot si Arnam ase ta doveklo. Komatma halabangso ahok aphan kedengthek Arnam ase tame arjudunlongpo, lapen lason amonit atum si Arnam kacheklang ta kethekdunlongji apun chokpo. Nang jongjong akamatha ateng pen che’onon! Nang mena aphan chepadojoi non lapen laheihui alamthe lang pemenon. Nangtum jongsi ahok aphan akar’i dolo te, Arnam nangtum aphan patheangpo lapen Alangli aningkehang lapen Alangli lam do’an aphuthak chini unpo. Nangtum la “un’e” pu kekroidam che’onon! Koanma monit atum un’e pu akekroi kebatma, lapu ansi lake chemanthupo, athema Arnam akethek-kere ke sining pen anpar akangtui si kangjarlang, Arnam akamunthi alam ke monit atum akamatha pen akangtuilang, lapen Arnam keklem asai ke monit atum akamathadam lapen abidi kachiki aphan anpar litmuchetlang. Koanma un’e pu ason kedo lapu ansi haladak ahok ta dolo kiriji meme aphan; koanma monit atum abidi aphan kachiki lapen amangmun kahemandam kedo lapu ansi Arnam aninghang ason ta kedodunlo. Lake pima pulote, Alangli ajat le amethang aphan chepachini tame, Arnam ke Arnam si doverlo, lapen kopine adim lapen Alangli kacheklang prekjam ason ateng pen ke Alangli komat-kopima lake kachelar avelo. Arnam akun ke Alangli kengbot nahok le do tame chelarle isinatlo, lapen nahok le Arnam akengbot do tame, Alangli ke monit akhei aphan ke Arnam binonglo, Hemphu Jisu le Israel arat aso a’Arnam anchot kali asonsi, tebonta Asia, Europe lapen America adet amonit atum a’Arnam chenamlo, lapenthu lahei pen anpar sosedet tahaijilang, Alangli henlo labangso somindar adangpi inutnat a’Arnam. Lasi Arnam aningkehang le rihurnang lapen Alangli kaningje alam along le Aalngli kacheklang pangthek lonang, lapen Alangli kengbot alingle aphiphi dunlonang! Arnam henlo ahok, tovar lapen chethe. Alangli lam lapen Alangli kacheklang ke kaike doverlo, lapen Alangli kun lapen akengbot tame kaike amat ta monit akhei aphan ingpupidanglo. Kachinghon korte lapen ingjir atum, nangtum laheihui alamthe along Arnam kacheklang theklonglo pusi Ne ningthelo, kai kimi along nang kengkam kachejordun kepaphrang along Alangli kengbot ateng aphiphi dunnon, lapen Alangli kacheklangji aphan kachonghongprong kedo atum anke hala kemepik akimi asining lapen apirthe Arnam kisikpontang along lutdun lonang!