Monit Nangkacheparje Along Kachepatujoi Alam (2)
Jisu le halaso apor ahut Judea along sai keklempon, Alangli paklangdak pen si klemlo, bonta nonke, Ne nangtum angbong joijoi pen si klemlo lapen ningjelo. Kekroikrelang atum doan ke angton pen si nangchinidundelo. Ne sai nangtum angbong keklem ke ingkirhetlo komatmat ma angtan atum aphan anke. Lahei alamthe, laheihui ado kipi lapen kangsai, doan ta nangtum si chinichotlo lapen akaprek atum kali. La kadokave laso asai keklempon ke nangtum angbonglo lapen nangtum aphan si pachinichotlo; kekroikrelang atum angbong ke madu ta laso alam chinine, athe ke apor nanglelechetlang. Laheihui amonit atum anke ladak tebokhetlo athe ke ado kipi chechak’et pen kechoklimji aphan, bonta komatmat ma angtan kedo atum anke laso aphuthak ajat ta chinidundelo. Laso asai ke akeongpi si chepatujoilo! Latum aphan ke, Arnam ok kacheman puke chepatujoilo, bonta komatmat ma laso aroi along kedoan atum, majok ta ningjeme pima Alangliphan ke theklongdak. Arnam along ke kadokave tame theklongdak puvoiphit ta, kadokave sitame paklangdaklo, lapen kadokave tame pajokvanlo, lake komatmat ma Alangliphan kekroidun atum ansi ahokpet chotlo; anpar akaprek atum aphan anke, kekroikrelang atum, alam abang ke, thangnat ta pachininedetlo. Nonjong ahut pima nangtum angbong keklempon asai lapen China along ke sodak pen si ingkirklinglo, latum aphan kapachini longledetji aphanlo. Latum tame laso asai alam kachinidun si keme loma, tangte kadokave latum keklemji ke pinrempo lapen aduk kanghoi along si phovek nangpo. Latum ke anpar laphan kroidundedetpo. Kethedung ake’er dragon api adet along lason asai keklem, kapaphinei adim along ke, kejoike kalipin. Jongsi laso asai le paklangdak pen klempon pulo tangte, lake anpar keklemponji aphan un’edetpo. Laso angdeng along asai keklemji ke laso adim along un’eveklo. Jongsi laso asai le paklagdak pen keklempon pulo tangte, kosonsi latum le aphrang kapadam longjilangma? Lake tangte laso asai aphan kethedung kapherememe along si kibi kalilangma? Jongsi laso asai le dipjoije, bonta Jisu akai apor ahut asonsi klempon, Alangli kemepik pen keso pamelo lapen hi-isarpo plunglo, tangte lake arjidingklui pen si “hemkangsam along kepadoji” aphan hi-isarpo atum pon’et’ejilangma? Latum ke tangte Arnam kedobom apot kachechak unjilangma? Jongsi Ne le nonke synagogue heihui along lam kethan damji aphan lutlo lapen monit aphan thandamlo, tangte Nephan ke arjidingklui pen si achet pemanmelangma? Lapen jongsi lason cheplanglo pulote, kosonsi Ne sai le aphrang keponbom unjilangma? Pima angthek lapen manghumeme ason kapaklangdak pen kapavedetlo pu atheke kadokave kidipjoiji aphan ajoklo. Lasi, kekroikrelang atum aphan, Ne sai ke patheklongledetlo, pachininedetlo, mate paklangdakdedetlo. Jongsi laso angdeng ahut asai le isinat ateng pen klemdet pima Jisu le Kanghon-Kangjinso Akai ahut keklempon ason pulote, lake lapuan akejoike pen kaliji nonjong ahut ateng ke. Lasi, lason joijoi pen keklempon henlo nangtum aphan ke ale kedolo lapen angton pen asai pachun longpo. Arnam asai le pirthe athak keklem kapajut kelelo, lake pima, laso joijoi pen keklempon kangtonlo, tangte laso angdeng ahut asai ke angtan ingbop si nangcheklangdakpo. Kadokave ta chinipo pima China along ajahak kesung pen kehaidong atum do; kadokave tame chinipo pima Arnam ok kacheplang abang ke China along lapen pima Alangli sai kepajut ponlo. Laso pen anchot si monit atum aphan patheangpo: Kopi apot si athe China ke kivirji mate kiruhupji non si ketheklongjilang? Lake Arnam salajong si Alangli sai China along klemponbomlo lapen ajahak asong amonit atum aphan kesung pen kehaidong kapeman si nangcheklangponlo.
Arnam ok kachemanpon ke Amethang aphan masapso amonit atum along ansi chepaklangchotlang athe komatma Alanglilong aphiphi kidun atum Alangli salajong si Alangli sai keklemponbom apor ahut doan, lapen kadokave api aphan kalidet. Alangli ok kacheman ke Alangli sai isi angdeng kapatangji aphanchot, lapen Alangli arje monit aphan kachepaklangji pu ajoine kalidet. Tebontame, Alangli sai ke Amethang si klemponvek nangkokji, lasi lake Alangliphan akenangsotlo ok cheman pen keklempon nangji. Laso asai le ketanglo pulote, Alangli ke monit atum apirthe pen damjuipo; Alangli ke monit akhei atum angbong atheke kevangjilang asai keklem akrong along karjapji kaphere pen ke arji kiding aphan dodelo. Kopima Alangli mulukpi aphan chepaklangpon ke Alangli kangthipet akun lapen kadokave Alangli asai-amo anchotlo, lapen Alangli batai hini aphong ok kachemanpon arje kalidet, athe ke Arnam arje kacheklangji ke Alangli kun pen anchotji, lapen lake Alangli ok kachepharlotang arje pen ke larplot un’e. Alangli ok kemantang arje ke kejongvet amonit aphai atum aphan ansi cheklanglo, komatmat ma Alangli ok kacheman ahut asai keklem along Alangli phiphi kidun atum aphan anchot. Laso apot si atheke nonjong keklempon asai ke joijoi pen si pachunlo. Lason thakthak si, Jisu tame Amethang aphan Alangli sai keklem ahut si Alangli Jihudi atum aphan chepaklang chotlo, lapen akaprek adet arat aphan anke Amethang chepaklangdakdelo. Lasi, Alangli le ephong Alangli sai pachuntang lote, Alangli menmen si monit atum apirthe pen chedamjuipo lapen ladak dodelo; laso aphi ke, Alangli kalidetpo, monit along laso arje, komatma monit aphan Amethang kepacheklangpon, bonta Karjong Kangthir si pima asai klemponphitpo. Ephong le Arnam ok kachemantang abang asai keklem angton pen patanglo te, Alangli ke bangso kivirdetji apirthe pen damjuipo, lapen Alangli ok kedobom ahut Alangli keklemtang asai asonthot ke Alangli ajat asai tame anpar ke klemkledetpo. Laso aphi ke, laso asai ke kadokave ta Karjong Kangthir si klemponphitpo. Laso apor ahut an, monit ke Alangli ok kachemantang abang arpum ke arje ketheklongrimji ason si dopo; kadokave Amethang aphan monit atum angno Alangli cheklangklelo, bonta kaiketame chepatujoi si dokokpo. Arnam ok kachemantang abang keklem nangji asai ke kithikvet apor anchot. Laso asai keklempon ke isi kejongvek akai ahut, apor, adet, lapen kejongvet amonit atum angbong. Laso asai apharman kacheklangpon ke Arnam ok kachepharlopon apor ahut anchotlo, lapen ke isi kejongvet akai ahut; laso apharman kacheklang ke isi kejongvet akai ahut Arnam aKarjong asai anchot, lapen Alangli sai angton pen kalidet. Laso apot si, Arnam ok kachemantang abang arje ke kadokave amonit atum aphan chepaklangklelo. Kopima mulukpi aphan kachepaklangpon ke Arnam kangthirpet lapen Alangli kun angton pen anchotlo, alar ke Alangli arje Alangli batai hini aphongok kacheman apot kali. Lake isinat arje le pima monit aphan kaike kacheklang kali, mate hini arje pangrompet apot ta kali. Laso apot si, lake tongsekot akenanglo pima Arnam ok kachepharlotang abang ke Alangli keklemvek nangji asai patangdet aphi lote pirthe along pen kedamvek nangpo, athe Alangli kevang ke Alangli keklem pachunvek nangji asai keklem aphan anchotlo, lapen Alangli arje monit atum aphan kacheklangji kali. Monit arje kacheparje akenangsot alam le Arnam batai hini aphong ok kacheman pen pachunlong’etlo puvoiphit sitame, nonpu ta Alangli ke Amethang aphan thekdak chepaklangklelo pima Alangliphan ketheklonglelang majok adet aphan anke. Jisu ke Amethang aphan puthot Jihudi aso atheke kangthirpet Arni atum aphan chepaklangkleveklo, mate Alangli Olive Anglong along nangsunthu si lapen kadokave amonit atum aphan cheklangklelo; kadokave Jihusi aso doan ke Jisu arpum Alangli Judea along kedo apor ahut si thekdun longlo. Lake athema Jisu keklempon asai ke Alangli ok kachemanpon ningkan suri hini aphrang si patang’etlo; Alangli puthot Judea along vangvelo Jihudi aso arje ason, Amethang aphan Jihudi aso arje ason peman si doan Gentile adet angbong kacheklangji ke durepiklang, athe Jisu ok kacheman arje ke thangta kali lake Jihudi aso arje, lapen John le ketheklong monit Asopo arje kalidet. Jisu le Alangli phiphi kidun atum doan aphan pima Alangli puthot vangthujilang pu lamchak chipidet puvoiphit sitame, Alangli ke Amethang aphan thangbakbe pen Jihudi aso arje ason ke kadokave komatmat ma Gentile adet an aphan ke chepaklangklelo. Nangtum kachinidamvek nangji ke pima Arnam ok kachepharlotang abang asai ke isi akai ahut ansi chingpudang chotlo. Laso asai ke masapso aningkan aphan ansi dochot, lapen Alangli kadokave angton pen Arnam aKarjong asai patangdet un’e. Lason thakthak si, Jisu arje ke Jihudi aso atum le Arnam arje pen kapangbardam anchotlo athe Alangli Judea along sai klemlo, lapen Alangli ke thengparpan athak apran kachipi asai anchotlo keklemthek. Jisu le ok kacheman apor ahut anke, Alangli labangso akai kijut an kevanji mate monit akhei aphan kapavirji puke klem un’edetlo. Laso apot si, Alangliphan thengparpan athak pathidet aphi lapen Alangli sai patangdet pen, Alangli angsong an ingjarthulo lapen monit along pen Amethang aphan kaike aphan chedipjoilo. Halaso ahut pen ke, komatmat ma kekroi thirklong atum an Gentile adet pen ke Hemphu Jisu kachepaklangpon an thekdun longlelo, bonta Alangli arjan anchotlo pima latum paisong along ketar apot an. Laso amohor ke bonta monit si arjan kihichot, lapen lake Arnam Amethang monit aphan kacheklang arje kalidet. Arnam ke Amethang aphan mulukpi along Alangli batai hini aphong ok kacheman arje ke chepaklang ponpelo. Alangli keklempon asai monit akhei angbong ke latum aphan Alangli kun kapachiniji aphanlo. Kadokave laso kacheklang monit aphan ke kaprek-kaprek akai ahut keklempon asai ajoine penlo; lake Alangli kapachinitang akun pen ajok si pachunpon longlo lapen Alangli keklemtang asai pen ajoklo, alar ke Jisu kachepaklangpon pen apot kali. Lake lapule pu tamelo, Arnam arje monit aphan kapachinipon ke ok arje pen apot kalidet, bonta alar ke Arnam ok kachepharlotang abang komatma arje lapen arpum hini pen ajoklo; lapen Alangli sai pen ajoklo, Alangli arje cheklangponlo lapen Alangli kun tame pachinidaklo. Lake athe Alangli ok ahut keklem aningkehang akenangsot asai ardilo.
Arnam batai hini aphong ok kachepharlopon abang asai keklem pajutdetlo pulote, Alangli ke Alangli kangthirpet akun Gentile adet angkangpi chepaklangponpo, Alangli arje mulukpi doan atum aphan patheklongpo. Alangli ke Alanglimkun pachinidakpo lapen laso pen ajok monit atum keprekjam angdeng doan kapajutpon paklardakpo, laso pen si aban akai ke angton pen pajutkokpo. Laso athe ke kopima Alangli sai ok ahut keklempon pen ongdung apor an ingdang ponlo (Jisu le Judea along keklem asonthot, lapen pini arni Ne le nangtum angbong keklem ason) ke athema Alangli sai ok along ke ahoi dokok lapen kithikvet anchot. Alangli ke jongjung lapen kemesen aok arje pen si kithihek apor an aphan asai ke klemponlo; Alangli ke laso ok kachepharlotang pen si angton asai klemponpe mate Gentile adet along amonit doan aphan kachepaklang asai klemkle. Ok along keklempon asai ke kithivet angkang aphan anchot (lason si Judea along lapen nangtum angbong keklempon), lapen tangte, laso asai keklempon pen ajok laheihui ahoi angbong an, laso angkang ke laso aphi pangdangme. Chenamlo, laso asai kapangdang ke Alangli Karjong jongjung si klemponpo lapen ke Alangli ok kachemantang abang keklempon asai anpar ke kalidetpo. Ok ahut keklempon asai anke athe ahoi dokok lapen somindar adangpi atok-ano along an ingdangdam un’edet – lake pachundam un’edetji. Ok ahut keklempon asai pen ajok, Alangli Karjong si adular mate angthun sai klemponpo. Laso apot si, ok ahut keklem kapatangpon asai anke kapangcheng asema asonlo pima lake kithikvet ahoi ansi klemponchotlo; laso aphi, lake Alangli Karjong si pima laso asai klemponpo, lapen Alangli ke koanma kapangdangpon angkang an klemponpo.
Arnam pima bangso apirthe along kevang pen keklempon asai ke isi akai aphan kejachot, akimi akai kangpuji aphan lapen aban akai ke kapajutvenji aphanlo. Alangli ke pirthe along monit atum achethe kedambom ason si kerengdunbomji aphan le kevang kali, monit atum apirthe along Amethang aphan ningkarong lapen ningkeoi doan kachomatji aphan kali, mate Alangli ri pen inut abangphu aphan kapachoklimji mate salajong pen inut abangphu aphan alang kachingthur kelangdunji aphan kali. Lake Alangli keklem asai kali; Alangli sai ke akimi akai kapangchengji aphan lapen aban akai ke kapajutpon henlo. Lake athe, Alangli henlo abangphu akimi akai pangchengji, abangphulo akaprek aphan ke kapajutpon, lapen abangphu amatlo Alangli sai keklem pen Sobar aphan kaparempon. Aphongtin sitame Alangli sai inut abangphu pen Alangli klempon lote, lake pima Alangli si ron kachedan alongklam along akengpak kachibidam asonlo. Kechengsi, Alangli pirthe aphan haidetlo lapen ok ahut si Sobar aphan ke paremdetlo; Alangli ke doan anongthe cheraitheilo lapen ningkan suri hini asai keklempon alam angton pen pacheklangdaklo, laso pen ajok pima kadokave amonit atum pirthe along kechok atovar dolo kedamji aphan lapen ningkarong lapen ningkangsam achethe dolo kerengdunji aphan. Tebontame, Arnam ke arji kiding aphan ke monit penpen dorappet un’edetlo, athe Arnam ke Arnam lo, lapen monit pen ke chingbarbedetlo. Alangli ke monit jongjong ason ke akai dingpi donolo, pima lake, Alangli pirthe along inut abangphu ason komatma thangnat ta kalidet pen ke rengdun un’elo, athe Alangli ke masapsonat aphar anchot monit atheng jongjong hala monit jongjung abangphu ason Alangli monit akai kerengdunji aphan. Akaprek alam pen, kosonsi Arnam le hemtun choboche pangchengpo, akai akemangdam dopo, lapen osomar kepadopo pirthe along? Lake tangte Alangliphan man-peng kapadam kalima? Pima Alangli ke jongjung monit atheng si padolo athe ke kemesen pen sai keklempon thekji aphan puanchotlo, Alangliphan hemtun kachobocheji lapen akai kemangdam kelongji aphan hala jongjung abangphu atum ason ke kalidetlo. Alangli plenglim kamunthithek, kemesen aning, lapen Alangli ok aphan kemesen kapacho lapen kapachingthang doan pen dor’ilo kethandakji aphan pima Alangli ke jongjung monit atheng si dolo; Alangliphan hemtun choboche mate akai akemangdam ke nangneveklo angthek chepaklangji aphan ke pima Alangli ke jongjung amonit atheng pen si padorpluplo. Lake tangte angton pen si akenang avepinpo! Arnam pirthe along kevang ke Lamthe si ok kacheman henlo; Alangli ke monit aphan Alangli lamthe pachiniji aphan lapen Alangli lamthe patheklongji pulo, lake pima, monit aphan laso asai ok ahut keklempon an pathekdunlongji aphanchot. Alangli kemangdam ke monit atum Alangli ok aphan keprekjek akrong pen kapalanaji pu kali, bonta monit atum mo kijut antame athikdut pen kedoji aphan, lake pima, kadokave alamthe pima Alangli ingho pen kebarvek alam an kekroidunji aphan, lapen Alangli keklempon kadokave asai along kachipidundetji aphan. Alangli ke ok along si sai klemponchot; Alangli ke chinilor pen monit aphan Alangli ok kethedung lapen kangthirpet apot kaparchoji aphan le kehang kali, bonta alar ke monit aphan Alangli sai akethek-kere lapen kadokave Alangli kachepahemphupon keotthip chepaklangji pulo. Laso apotsi, Alangli ke kemeparpik amonit atheng puvoiphit sitame, lapen ke pima Alangli keklemvek nangji asai aphan ansi ardi chipivetlo. Nangtum chini nangji kopi athe si lake Arnam ok kacheman loma lapen tebonta rat aphan pangdakde mate Alangli jongjung monit atheng aphan asat paklangkle, bonta alar ke Alangli keklemji ningkehang asai doan si klemponbomlo. Laso apot si, kadokave pima nangtum ketheklong Arnam ok kachepharlotang abang pen puke kopima Alangli Arnam henlo; lake athema Alangli pachethangthe kopima Alangli monit atheng kedo monit atum kedengdun nangji. Monit le monit aphan chejapon ahut ansi alang kopima ningjelo alang koan monit atheng puke, alangtum man-peng kipi lapen kachehodai kelongdunji si keme lapen laso pen ajok bang kaprek aphan kejabang keman longji aphan. Laso kacheprek ke, Arnam monit aphan haidetlo Alangli sai salajong keklempon pen ajok (lake pima, monit atum kelong un’edetji asai); ladak ke karjudunji athai si avelo Alangliphan monit atum ningkedok alam ke, mate Alangliphan kanghon pen man-peng monit kipipon. Kadokave Alangli keklempon ke monit along Alangliphan man-peng kipi pamathekji aphan kethap henlo mate Alangliphan kachinidam un’edet apot pamathaji aphan. Arnam ke monit aphan aningpadok pen baipon nangne; kadokave Alangli kenangji ke nang Alangliphan man-peng kipi henlo Alangli kun nang theklongdet pen aphi lote. Arnam keklem asai ke Alangli methang penlo; Alangli adular ke monit atum klem-dam thekthedetji, mate monit atum ke longdamdedetji. Arnam Amethang anchot si Alangli methang asai klemthekchot lapen akimi akai pangcheng si monit aphan akimi achethe japonlo. Alangli keklem asai ke monit aphan akimi achethe kedengdun longji along kilutdunji lapen akai kimi along kilutdunji aphan. Ahin doan asai ke komatmatma anut kaprek aphan aningkedokdun pen jongjung monit atheng kedo atum aphan ansi pekpondetlo. Laso apot si, Kanghon-Kangjinso Akai along, Alangli ningkan suri hini keklempon asai ke Alangli ningkan thomkep ra kethom ok kachepharlo ahut ansi ningkan kethom ra ebeng pen patangdetlo. Arnam pirthe along kevang ke Alangli sai keklemji aphan, Alangli kaiketa ningkan suri hini mate angton pen akai keklem asai ke masapso aningkan kedo thihek angbong si patangdet titilo. Alangli ke panglenle, lapen Alangli ke sangkokke; Alangli ke penang an aningkan asai si kaike ardi chipithip laso pen ajok lake masapso thihek aningkan angbong kapatang thekji aphanlo. Lake athema Alangli monit ateng pen asai keklempon ke angton pen akimi atovar kangpu ponji lapen akimi akai kachejaponji aphan ajoinelo.
