Monit Nangkacheparje Along Kachepatujoi Alam (1)

Kanghon-Kangjinso Akai ahut, John si Jisu aphan tovar thopilo. John ke Arnam Amethang asai ke klempi thekthedetlo bonta monit arpu ansi chepapleng chotlo. John ke Hemphu atovar kapaklang abang pu sitame, alang ke Arnam aphan cheparjanpi thekthedetlo; alang ke Karjong Kangthir pen asai ke’enpon amonit anchot. Jisu aphan baptisma pidet aphi, Karjong Kangthir si Alanglilong sining angsong pen vothung ason nang’ardonlo. Laso aphi Alangli Amethang asai chechenglo, lake, Alangli Kristo asai kacheklem chenglo. Laso apotsi Alangli Arnam angthek chedenglo, athe ke Arnam pensi Alangli kevang. Laso aphrang Alangli kekroi kosonlone lale langdamde tame – laso apor pen ke jakong duredet, mate apor pen ke ingtangkring tahai – lahei doan ta Alangli thangbakbe amonit akai asonben dosi Alangli sai cheklemkle aphrang akai pen alamlo. Alangliphan baptisma padengdet aphi (lake, pharoidet aphi), Arnam ajakong lapen anong kethe ke Alanglilong menmen dokoklo. Alangli jakong thepik asai klemthek, amonit jongjong keklem thekthe asai klemthek, lapen Alanglilong jakong lapen kelangchari arpu do, athe ke Alangli Arnam Amethang apharman si sai klempiphit pinak; Alangli ke Karjong apharman Alangilarsi sai keklempi lapen Karjong ase si chepado. Lasi, Alangli ke Amethang si Arnam lo; lake kachihiliji amat si avelo. John Karjong Kangthir asai ke’enpon abang. Alang ke Arnam aphan cheparjanpi un’e, mate alanglilong ke Arnam aphan chaparjanpiji ajakong si ave. Alang lapuson klem ingtung tame, Karjong Kangthir lapuson paklem longle, athe alang ke Arnam Amena kepachunji pu asai klem thekthedet. Alam abang ke alanglong monit aning kehang ason si keong munak, mate kopine keprekdak; ajat alam pen pu sitame alang ke Arnam aphan cheparjanpiphit thekthe. Alang kechokche lapen keledamde ke alangphan si parjanchot, bonta alangsai ke Karjong Kangthir apharman si karjappi. Sitame, nangpu un’e alanglong do anta Arnam aphan si cheparjanpi puke. Alanglong keprek lapen keledamde ta Arnam aphan si cheparjanpi pupo ma? Monit aphan cheparjan ahut keledamde lake aronlo, bonta inut abangphu jongsi Arnam aphan cheparjanpi ahut le prekvi, tangte halake Arnam aphan man kipipe kalidetjima? Hala ke Karjong Kangthir aphan nongpajuno kalidetjima? Karjong Kangthir ke masapso anbak ta monit atum Arnam adim kacherai aphan kroi dunde, alangphan kaprek atum le anong pathepik pusitame. Jongsi alang ke Arnam kali pulote, alang ke kiijut ahut arjapthip thekthedetji. Karjong Kangthir ke monit atum Arnam aphan monit aningkehang aling pacheparjan longle! Pudetnang, lake Karjong Kangthir si John aphan hakhi kedodun lapen Karjong Kangthir si alang ke Jisu aphan tovar kethopi abanglo pu alam kapaklang, bonta alanglong Karjong Kangthir keklem asai ke isi apun en pame anchot. John along pen kehang ason ke Jisu aphan tovar kethopi abang kacheman henlo, Alangliphan tovar keranpi. Ladak kipuji puke, Karjong Kangthir alang tovar kaselam asai along si kerapdun lapen alangphan lapuson asai ansi paklemlongchot – alangphan kaprek asai keklem ahovang ave. John si Elijah aphan cheparjanpilo, lapen alang tovar ketho inut lam kethan abang aphan cheparjanlo. Karjong Kangthir alangphan laso along si jakong kipidun; alang sai tovar kepaklangtik ke, Karjong Kangthir alangphan archakdunlo. Bontame, jongsi alang amethang amat si Arnam Amatlo pu chethan lapen alang ke kepajok asai kapatangji aphansi kevang pu kaningje lote, Karjong Kangthir alangphan pere’etpo. John asai jonghele the pusitame, lapen lake Karjong Kangthir pensi karchaklo pusitame, alangsai ke ahoi kave kali. Karjong Kangthir alangsai along archak pidun pu langdam si, alangphan halaso ahut kipi ajakong ke tovar keran aphan ansi ahoilo. Alang un’e, asapso ta, kaprek ajat asai ta klem thekthe, athe alang ke tovar keran abang aJohn chot, lapen Jisu kali. Lahenlo si, Karjong Kangthir alammo ke achabilo, bonta monit aphan Karjong Kangthir kapaklemlong asai si akenangsotlang. John ke choklim kethedung ahakhi longle puhe halaso ahut? Alanglisai ke kethedung kalilangma? Bonta alang keklem asai ke Jisu aphan lit un’edet, athe alang Karjong Kangthir pen asai ke’enpon amonit pen anpar thangnat kali lapen Arnam aphan cheparjanphit thekthe, lapen lasi alang keklem asai ke ahoi dokok. Alang tovar keran asai patangdet aphi, Karjong Kangthir alang lammo archak dundedetlo, alangphi thangnat asai kimi avedetlo, lapen Arnam Amethang asai kecheng pen ke alang damjuilo.

Ajahak do latum aphan ke kangthirthe akarjong cheraidet lapen kachechek pensi ase chepathe-sarlanglo, “Neke Arnam!” Bonta, kijut ahut ke, alangtum cheklangdak, athe alangtum ke alangtum kacheparjan along kechokche pinak. Alangtum ke Sobar aphan si cheparjan, lapen Karjong Kangthir alangtum aphan langletle. Nang jonghele methang aphan angsong chirung tame mate nang jonghe ase kethe pen sarlang tame, nang ke kasorjon pen keman arpumbomlang lapen Sobar apharman si kedo. “Ne ke Arnam, Neke Arnam kachinghon Asopo!” pu ne mantune ta sarlangle. Bonta Ne keklem asai ke Arnam asai. Ne hang-taram nanglangma? Ladak angsong kachirungji akenang ave. Arnam Amena asai Amethang si cheklem lapen monit atum Alangphan anghoi pajir nangne mate Alangliphan man kethe arpu pinangji: Alangli sai Alangli angthek lapen anghoi cheparjanlo. Alangli baptisma dengde aphrang, Jisu ke Arnam Amethang amat kalima? Alangli monit abang along Arnam nangcheparje abang kalima? Abinong’et ke ladak pu un’e Alangli hakhi chelong’et aphi si Arnam Asopo inutvet kacheman puke? Alangli Amena sai chengche aphrang ajir ding’o pen, Jisu pu amen pen inut amonit avema? Nangke tovar kimi ta aphrang chevan thekthe mate Karjong aphan ta cheparjan thekthe. Nang ke Karjong asai mate Alangli kaningje alammthe chepangdak thekthe. Nang ke Arnam Alangli methang asai klempi thekthe, lapen hala Karjong Kangthir asai ta klempi thekthe. Arnam along hala kachini ajakong, kamanghumeme ajakong, lapen kipun un’e, lapen Arnam monit aphan kepakeng akun akangthim – kadokave ta nang kachepaklang unji ajakong pen angtan saidelang. Lasi Arnam lo pu kachepachethang ke ale avedetji; nanglong amen si dochotji lapen ahormu ke thangnat aveji. Arnam Amena si kevanglo, bonta majok ta Alangliphan pangthek thekthe, sitame Alangli ke Alangli sai cheklembom lapen Karjong aphan cheparjanpi si laso asai klembom. Alangliphan nang Arnam mate monit pule hang sitame, Hemphu mate Kristo, mate Alangliphan ingjir pule chekam, ladak thang alamm ta ave. Bonta Alangli keklem asai ke Karjong asai lapen Arnam Amena asai aphan si cheparjan. Monit atum Alangliphan kehang’i amen pen ke Alangliphan thangnat chophophe. Halaso amen Alangli sai ingsaidun thekji ma? Nang Alangliphan kosonsi kehangma langdamdepin pen, Arnam aphuthak chethantik ke, Alangli ke Arnam aKarjong monit abang cheparje abang; Alangli ke Karjong aphan si cheparjan lapen Karjong pen si kedengtang. Jongsi nang kai kimi aphan tovar cheselam thekthe, mate akeban aphan kijut along van thekthe, mate kai kimi along chejapon thekthe, mate akimi sai keklem thekthe, pulotangte nangphan Arnam pu nangpuno!

Karjong Kangthir pen asai ke’enpon amonit ta amena ke Arnam pu chekrong un’e. Lake halason amonit ke Arnam pu chekrong un’e pu aphanchot le kipu kali, bonta alang keklem asai ta Arnam aphan cheparjanphit thekthe pu aphan ta pulo. Kaprek ahin pen pudamlote, monit atum kachetonglong ason ke Arnam kisik-kedang arlo biphit un’e, lapen lake Arnam kisik-kedang cheparjanphit thekthe. Arnam Amena kacheklem asai ke ingthimlim penta Alangli Amethang kisik-kedang pen kelangmek ateng pen keklemji pu kemang asailo lapen lake hala kemepik kisik-kedang pen chetonpiklo. Monit pen keklem asai (lake, Karjong Kangthir pen asai ke’en amonit) kaparlopon ke alangtum mena kachini-kachetong ason along kapabatdun. La kaparlopon ke kedam paphrang atum kehatpon atovar pen apar kachini akimi atovar ri pen kapalong, lapen Karjong Kangthir akeja arum dodun si akorte-ingjir aphan kacheja. Lahei amonit atum kachepabat ke jongjung kachini ason mate karjong amonit atum karjong aphuthak ketok. Lahei amonit aphan Karjong Kangthir sai enpon pusitame, alangtum keklem asai ke ningkan-suri-throk akisik-kedang kelangmek asai pen kachepho ave. Alangtum ke Karjong Kangthir alangroi along monit atumphan kepaja ponji pu pura prekjam apor ahut Karjong Kangthir pen kapathe-pading thangbakbe atum, alangtum keklem’un asai kijut angdeng an nangleletik kalite alangtum achethe kijut along leletik. Alangtum keklem asai ke Arnam Amethang aphan amat kachelon atovar kisikpi mate pirthe along Arnam Amethang kisik-kedang asai along ajahak asai angthun kangthundun. Alangtum along amat ke, lahei amonit atum Alangli kisik-kedang asai kethe klem thekthe, mate alangtum tovar kimi ta chiriponbom thekthe, la ansose si kethekthelang kedamtang akai ahut Arnam asai aphan kapajut. Lasi, alangtum keklem asai kacheparjan ke kasorjon pen keman amena asai kacheklem pu anchotlo lapen Arnam Amethang amat Amena asai kacheklem ke cheparjanpi thekthe. Lasi athe ke alangtum keklem asai ke Arnam Amethang keklem ason pen kachingbar avedet. Akimi akai along kejapon asai ke monit le Arnam adim keklempidetme kopine asai kalidet. Lake Arnam Amethang pen anpar anut kaprek klem un’e. Monit keklem asai doan tame alang ke kasorjan pen keman abang pu arpu ansi parloponchot lapen keklem ta alangning along Karjong Kangthir ahin pen prekvi keparodam mate patheang matik. Lahei amonit atum kipi akeja ingthimlim pen kaparlopon ke monit atum arnivang akai along keklem nangji atovar lapen kosonsi alang Arnam pen ning cheme pen sai keklem thekji. Monit keklem asai ke Arnam akisik-kedang parloponpe mate lake Karjong asai ta cheparjanje. Pudet nang, Witness Lee lapen Watchman Nee atum asai ke tovar kejapon henlo. Atovar akimi tame akeban tame, asai abang ke Baibel arlo kedoji aron aphuthaksi kapathir. Alam ke rong amondoli kaprengthu mate rong mondoli kikim tahai mene, alangtum asai ke mondoli kikim pensi kacheraplok. Alangtum asai ke Jisu lapen Alangli risangho atum keklem patang tekang un’e mate Kanghon-Kangjinso Akai ahut aphrang kepon un’e asai si angthun kangthunponlo. Latum amethang asai along kopima keklem asai lake Alangli kecheng arni malom asai along Jisu le Alangli pen aphi kevangji akai kehang ason puthot kapathirthu, lahei ke pudamlonang aphu pe pen kachetelom, baptisma ke’en, him kachebeng, mate hor kijun. Lake pudetme alangtum asai ke Baibel kirim lapen Baibel arlo pensi tovar kiri. Alangtum lapuson thangnat akimi kapaphrangdam klemkle. Lasi, majok ta theklongji alangtum asai ke Baibel arlo pensi akimi abidi kiri pen kapalong, lapen-pen ansose keme lapen ahokpet keklemme asai. Bonta alangtum asai along majok ta non apor Arnam aningkehang ason longdamde, ansose si kijumlang Arnam le kijuitsi arni malom keklemji pu kemang asai kimi. Laso atheke alangtum kedambom atovar ke akeban tovar pinak lang – ladak thangnat kepami ave lapen thangnat kapaphrangpon ave. Alangtum ke Jisu aphan thengparpan along apran ke’en alam aphan si ripklingbomlang, monit atum ning pacheruitoi lapen methang apap kapachekobirtoi aphan asai kachoklem kelangcharidun aphan, kijut ahut anta komat si kachechakji hala si kejokji pu alamthe aphan kekroi nangji lapen pinso henlo arloso pen akethe, lapen arloso ke alang pinso alam charju nangji, lapen la’ansose jutang barim akamatha ateng ingjirmarli atum ke Arnam alam pachethan longle, bonta kekroi anchot. Jongsi lapuson keja a’ot le kekroi rintibomlang pulote, Karjong Kangthir ke mantune ta akimi asai klem thekthedetpo, monit aphan kesalam aron pen kapajok, mate alangtum aphan isi kejokvan lapen kemepi alongri along kejapo. Lasi, laso angdeng asai ke, lale akai pachelardet, Arnam Amethang amat si klem lapen ningje nangji; kali pulote majok amonit tame Alangli lar klempi thekthe. Lasi non anke, langroiso angtan kedo Karjong Kangthir asai doan ke kesangphrong angdeng si dolo, lapen Karjong Kangthir pen asai ke’entang atum doan ta amethang keklemvoi ajakong chepangbothai anpinlo. Lahenlo si, Karjong Kangthir pen asai ke’enpon amonit atum asai ke Arnam Amethang keklem asai ason kalidet, alangtum kopi aphan si keklempi loma halaso angthek lapen athepi tame lasonsi cheprekjam. Laso athe ke Karjong Kangthir keklem kangtung asai ke prekdak, lapen laso alam langdam pen komatsi chinglitjot asai keklem atum doan aphan ta prekjam angthek lapen anghoi si kipilo. Karjong Kangthir pen asai ke’en amonit atum ta ajahak akimirak asai klem tahai mate kedamtang akai ahut keklem ajahak asai aphan varbom tahai, bonta alangtum keklem asai ke kai kimi ahut Arnam akun aphan pacheklang thekthe. Alangtum keklem ke kedamtang arni asai pen kachepajokji aphan anchot, lapen Arnam Amethang akun kacheparjanphitji aphan pu akemang penle lahei asai keklem kali. Lasi, jonghe apor kilittang keklem asai paprai tame mate jonghe akimi keklem ason le paklang tame, alangtum ke monit lapen kasorjon pen keman amonit si cheparjanbom anchotji. Arnam Amethang le sai cheklem lote, bonta, Alangli paklangdak pensi aban akai ahut akeklem aphan kapavirlo pu pachetakji mate akimi akai kechenglo pu pachetakphitji. Alangli ke Alangli sai along ning isivet lapen kenglep. Alangli ke keklem kangtung asai keklembom along ningjedakji; lake, Alangli kevan asai kopiloma lake Alangli chepaklangdakji, Alangli abinong’et kemang ateng si asai klemdetji, Alangli kun lapen kopi pensi keman chepaklangdetji. Monit atum ketheklong ateng, Alangli kun lapen Alangli sai tame kedamtang akai atum pen cheprekdak. Bonsitame, Arnam Amethang ahin pen ke, lake Alangli sai angthun kangthunpon mate aphrang kepakampon anchot. Arnam Amethang amat sai klemlo tangte, Alangli ke Alangli lamthe chepaklangji lapen sai kimi vanphitji. Laso pen kacheprek, monit le keklem ahut, lake kamatha pangching lapen kaporhi pen, mate kachini ason kapakam lapen anut kaprek keklem asai aron ateng ripdun peme pen keklem. Ladak kipuji puke, monit atum keklem asai alamjor ke isi kithirpi aron-atang aphan kekroi lapen “akeban atovar along keng’op kimi pen kedam.” Laso alamjor ke lale Karjong Kangthir ke’enpon monit atum kedam atovar tame Arnam Amethang pen kepangchengtang athak si kikimlo. Lasi, kadokave tangdet aphi, monit ke monit bomlang, lapen Arnam ke Arnam bomlang.

John ke seme pensi kahache, Issak le Abraham along amahang kethek asonthot si. Alang Jisu aphan tovar thopilo lapen penang an asai klemlo, bonta alang ke Arnam kali. Alar, alang ke lam kethan atum angbong pen inut, athe alang ke Jisu aphan tovar kethopichot. Alang keklem asai ta mepik lapen lake alang tovar thodet aphi si abinong’et ke Jisu Alangli sai chepangcheng. A’ot pen ke, alang ke Jisu aphan kachepadukpichot, lapen alang keklem asai ke Jisu asai aphan kerapdunchot. Alang tovar ketho tangdet aphi, Jisu Alangli sai chechenglo, sai lale mimuchet, ansose kithir, lapen ansose pajirmi. John asai kecheng angthun ansi klemchot; akimi asai along kethedung aphan ke Jisu si keklem. John akimi asai ta klem, bonta alang ke akimi akai along kejapon abang kalidet. John ke seme pensi nangkahache, lapen alangphan ke tekela si amen ki’ir. Halaso apor ahut, ajahak atum ke alangphan apo adun Zechariah pusi ki’irji pu, bonta apei abang ningjesersi pulo, “Laso a’oso aphan laso amen pen hang longle. Alangphan ke John pusi hang nangji.” Lahei kadokave ke Karjong Kangthir kachoningri ajoine. Jisu aphan ta Karjong Kangthir kachoningri pensi amen ki’ir, Alangli ke Karjong Kangthir pen si nanghache, lapen Alangliphan ke Karjong Kangthir si seme kipi. Jisu ke Arnam, Kristo, lapen monit Asopo. Bonta, John asai ta mepik tangdet, kopipot si alangphan Arnam pu hanghedet? Abinong’et kopi kacheprek si kedolo John keklem asai lapen Jisu keklem angbong? Hala John ke Jisu aphan tovar keranpi abang pu ethevet henlo ajoine loma? Mate lake Arnam pentong aphrang pen kaselamtang kele nangji adim loma? John ta, “Ningchiruinoi nangtum: atheke siningrengme alongri tebokhetlo,” pu ningjelo pusita, lapen alangli tame siningrengme alongri abirta si pachetaklo pu sita, alang sai ke aphrang an ponpedet lapen kecheng angdeng ansi pinchongchot. Laso pen kacheprek, Jisu ke kai kimi along ta japonlo lapen pensi akeban aphan kijut along an vanlo, bonta Alangli Aban aron alo doan paplenglo. Alangli keklem asai ke John keklem asai pen themulang, lapen anpar kopilang Alangli ke kadokave monit akhei aphan pap pen pakokji aphansi kevang – Alangli halaso angdeng asai chepaplenglo. John alam ke, alang jatsemet tovar si kaselamchot. Alang keklem asai thedung tame, alang lamthe keongdung, lapen keongparpik alangphi kidun atum, alang sai ke monit aphan akimi kecheng along vanvedet. Mantune ta alanglong pen monit atum chethe longle, tovar, mate kaharnuk muchet ahokpet alam longle, mate mantune ta alang pen ajok monit atum Arnam akemang aphan kachinidam longle. John ke lam kethan abang (Elijah) lale Jisu asai aphan tovar kaselampi abang lapen kangvaitang atum aphan kisik; alang ke Kanghon-Kangjinso Akai aphan kejapon abang. Lapuson asai ke monit a’ot ketheklong pu pen papreknodak. Lahei ke ansose si kachelonlang athe John keklem asai ke penang an ning nangpamathameme lapen, anparta, alangliphan ke Karjong Kangthir si seme kipi, lapen alangsai ke Karjong Kangthir si karchakdun. Lake lapuson tangdet apotsi, lake alangtum keklem asai pen si majok tame alangtum angthek angbong kacheprek ketheklongji, athe athak kacheklang penke monit atiri kethanji abidi ave, mate monit atum along Karjong Kangthir angthek kopiloma pu patiniji abidi ta ave. John keklem asai lapen Jisu keklem asai chingbarbe lapen a’ot cheprekjam. Lake lahei pensi majok tame patini unlo John ke Arnam loma kali. Jisu asai ke kapangcheng, angthun kangthunpon, kapajut, lapen angthek kapaklang. Alangli lahei doan angdeng ta cheklemlo, bonta John asai ke kapangcheng pen anpar thangnat kali. Kecheng malom, Jisu birta keme pachethanglo lapen ning chirui abidi pachetaklo, lapen laso aphi chenglo monit aphan baptisma kipi, keso aphan kapame, lapen hi’i aphan arplunglo. Kijut ahut, Alangli monit aphan pap pen pajoklo lapen halaso akai arjon aphan Alangli sai chepatanglo. Alangli alonglong adim damlo, monit atum angbong siningrengme alongri abirta keme pachetak lapen pachethangpon bomlo. Laso ahin ke Alangli pen John ke isivetlo, kacheprekdam ke Jisu ke kai kimi along japonlo lapen monit atum along Kanghon-Kangjinso Akai vanlo. Alangli angho pen vanglo monit atum kopi along si sai klem nangji alamthe lapen Kanghon-Kangjinso Akai along monit atum kopi atovar si dun nangji, lapen kijut along, Alangli pap pen kapajok asai chepatanglo. John ke mantune ta laso asai klem thekthedet. Lapen lasi Jisu si Arnam Amethang cheklemlo, lapen Alangli henlo Arnam Amena amat, lapen Arnam aphan cheparjanphit abang. Monit atum kamatha ateng pulote seme pen nangkahache atum doan ke, Karjong pensi kahache, Karjong Kangthir pensi archak kipi, lapen tovar kimi kangpu atum doan ke Arnam. Laso kangsai ateng pulote, John amat ta Arnam po, lapen Moses, Abraham, lapen David…, alangtum amat tame Arnam po. Lake kapachelai alam binong kalima?

Alangli keklem asai chechengche aphrang ke, Jisu amat tame Karjong Kangthir kopima keklem ateng keklemdun bang ateng amonitlo. Halaso apor ahut Alangli Methang angthek chichini lone chichinine lone pu langdamdedet tame, Alangli Arnam pen kevang alam doan alam kroilap. Alangli keklem asai chengche aphrang ke Karjong Kangthir mantune ta Alangli angthek binong paklangkle. Lake Alangli keklem asai chengdet ansi Alangli halahai aron lapen halahei ajutang kapavir, lapen lake Alangli keklem asai kecheng binong anpen si Alangli lamthe ke ardi lapen jakong pen plengtir kacheman. Alangli kapachethang keklem kecheng ansi akimi akai kevanji pu Alangli sai kecheng. Laso pen aphrangjong, ningkan 29 aphan Karjong Kangthir Alangli arlo chepatujoi, halaso apor ahut si Alangli monit anvet si cheparjanlo lapen Arnam angthek avepin. Arnam asai kecheng ke Alangli kapachethang asai kacheklem kecheng pen, Alangli ke aklong pen kemangdam monit atum Alangliphan koanma kachini pu langdamdepin pensi sai keklem, lapen Alangli keklem asai ke Arnam aphan si cheparjanphit. Halaso apor ahut, Alangli adung-arei kedo atumphan Jisu charjulo, “Nangtum ateng ke Ne komatlo?” Halatum thakdunlo, “Nangli ke lam kethan atum angbong pen kethenei lapen netum aphan ketheknei se kelang abang.” Lapen ajahak atum thaklo, “Nangli ke kurusar kethenei,” lapen lasonsi do’o. Doan prekjam alamthak pidunlo, ajahak atum ke ningjelang Alangli ke John lo, Alangli ke Elijah lo pu. Jisu laso Simon Peter anat chetevarlo lapen arjulo, “Nang kopilo puji Ne komatlo?” Peter thakdunlo, “Nangli ke Kristo lo, Arnam Kereng Asopo.” Halaso pen aphi ke, monit atum chinilo Alangli ke Arnam pu. Alangli angthek pachinidet aphi, lake Peter henlo laso alam kachinicheng abang lapen lake alang angho pen henlo laso alam kaningje. Laso aphi Jisu pulo, “Nang kopima kipuke ok lapen vi penlo kapaklang kali, bonta Ne Po pen.” Alangli baptisma dengdet aphi, kaprek atum chini tame chinine tame, Alangli keklem asai ke Arnam ahin penlo. Alangli kevang ke Alangli sai keklempi aphan, Alangli angthek chepaklangji aphan kali. Lake Peter ningjeser aphi ansi Alangli angthek ke ingjaidak pen kacheklang. Nang Alangli ke Arnam pu chininoi chininenoi, apor nangkele ahut, Alangli ke Alangli sai chechenglo. Lapen nang laso alam chininon chininenoi, Alangli ke aphrang ateng si sai cheklemponbom. Jongsi nangle kroikredet tame, Alangli ke keklem aporlo pulote Alangli sai cheklempo. Alangli kevang ke Alangli sai kacheklem lapen Alang pachethang asai keklemji aphan, monit atum Alangli ok-vi abang aphan chini nangji pu aphan kali, bonta monit atum Alangli sai kepadengji aphan. Jongsi nang laso arni angdeng asai ke Arnam Amethang asailo pu pangthekdun thekthedet pulote, lake nang kachechardun ajakong kave apotlo. Antame, nang laso angdeng asai aphan dengde un’e; nang kapangthek thekthe puke Karjong Kangthir sai cheklemkle pule kapaklang kali mate Alangli sai ke chokche puta kali. Ajahak atum do latum ke non dobom asai anta hala Baibel along kedo aJisu pen pangbarset an lapen kopine esonbak kachingbarbe ensi non angdeng asai aphan khindepo. Laso asai ke mekve ason kalima? Baibel along ketok ason ke ahoi do; halahei ke Arnam asai aphan ingthimlim pen paklang thekthe. Hala Phli Birta Keme pangrumpet pen ta ingdengpi pharo isi pen akijumlang, lahei along si kalakha’un ason ketokpon, sonsi Jisu thebo arong aphan hirjuno kipi, Peter Hemphu aphan sonthom kachekroi dunde, Alangli thengparpan along apran damjui lapen cherengthudet aphi Jisu hala kacharlidun athengno kacheklang, kecho-kijun kesi aphuthak kethan, kardom aphuthak kethan, penanso kachekak aphuthak kethan, Jisu amahang kethek lapen donrap aphurkimo, Jisu kacharlidun atumphan kedengpon, lapen laso aphi. Sitame, monit atum lahei aphan anam sodak ahormu pusi ardi kipi, pini asai aphan halahei pen pangbarset an. Alangtum ke Jisu Alangli kai arjon keklem asai koan ta halapuanvetlo pusi kroilo, thangbak Arnam ke halapuan si klem unchotpo hala pen abat kalilo anbak. Lake kopine chokchedet ason kalima?

Jisu pirthe along apor kelong ke ningkan thomkep-ra-kethom ra achitim, lake, Alangli pirthe along kedo ke ningkan thomkep-ra-kethom ra achitim. Laso apor angbong ningkan kethom ra achitim anvet si Alangli kapachethang asai along kepadam; anpar apor ahut ke Alangli bang ateng monit a’ot pensi kedodun. Kecheng ahut, Alangli synagogue along si kardom along dodunlo lapen hadak si Alangli kurusar atum ketok kangthir alam kapaklang lapen anut kaprek atum kethan arjudunlo. Alangli Baibel aphuthak penang ason charlidunlo: Alangli halahei agian penle mahang kethek’iphit kali, lapen kaporhi lapen karjudun pensi chepalong. Lake Baibel along ta tokdaklo Alangli ningkan krehini ahut synagogue along thandam atum aphan lamthe arjudun: Pirthe kangduk ahut pachethang abangphu atum kopisi kethan tekang? Moses kaselam aron kopuson? Aron Barim Alo kopuson? Lapen kurusar apindeng pen kardom ahem along Arnam aphan sai keklempi atum kopuson? … Alangli ongdung alam arju, atheke Alangli gian ta ave lapen kachini ta ave. Alangli ke Karjong Kangthir pensi keman pusitame, Alangli ke ingthimlim pen bang thangbakbe amonit ateng si kahache; Alangli ajahak keprekjek a’ot do puvoiphit sitame, Alangli ke thangbakbe amonit. Alangli kamatha ajakong ta Alangli arpum lapen Alangli arta ateng si chingbarchit pen batdunbomlo, lapen Alangli thangbakbe amonit atum akai angdeng doan chetongpon si damlo. Monit atum kamatha along, Jisu ke paklimso lapen patharedun angdeng chetongte; Alangli mahang kethek pensi ningkan thomkep arta abangphu akai si dodunphit, lapen Alangli sai ketang pen Alangliphan thengparpan along apran endetlo. Alangli thangbakbe amonit akai ateng le kachetongpon kali tahai; Alangli kaprek amonit atum along chodunde mate chelangdunde, lapen amonit atum Alangliphan ephong kelang longji anta sungpik. Alangli abinong’et ke cheprekdunvi, lale Alangliphan kethelong abang aling aphan ta papheredukji, athe Alangli ke Arnam. Monit atum kekroi ke Arnam monit a’ot along kevang ke kaprek amonit atum ateng dodunde; alangtum kitin ke Alangli so chingthithe mate amahang chingmurmepin pen ta Alangli ke ingthirpik, athe ke Alangli ke kangthirjir abangphu. Lahei ke ahokpet monit atum kamatha ason kalima? Baibel along ke Jisu monit ason dobom ahut alammo birtite, Alangli keklem asai aphuthak anchot, bonta lapen ke Alangli kaprek amonit atum ateng monit a’ot ave mate Alangli ningkan thomkep aphrang ke kaprek amonit atum ateng akai ave pule hakhi kipi kali. Alangli abinong’et ke ningkan 29 arta ahut si Alangli sai chepangcheng, bonta halaso aphrang monit ason kedo Alangli kai kangthim aphan nang papraidak un’e. Baibel ke halaso apor alam kabirti along ketok ponpejong; athe ke hala ke Alangli thangbakbe amonit ason kedo akai lapen Alangli kangthirjir asai apor kalidet, lasi laso aphan ketok pen kibiji akenang avedetlo. Jisu baptisma en’e aphrangjong, Karjong Kangthir ta sai cheklemphit, bonta Alangliphan ke thangbakbe amonit ason si Alangli kai along padodunbomlo ha Jisu Alangli kapachethang asai kechengji apor nangkele an. Alangli ke monit nangcheparje a’Arnam pusitame, Alangli ke kaprek thangbakbe amonit atum asonsi kethe-keding angdeng chetongponlo. Baibel along ke la kethe-kiding angdeng palutponpe. La parlo ponpedet atheke la monit atum akai along kekamdunji along akerap thetan pithekthe. Alangli baptisma dengde aphrang apor ke kachepajoi apor, laso along Alangli thangnat angthek lapen jakong kethepik asai klemkle. Jisu baptisma dengdet aphi si Alangli monit akhei aphan pap pen kepajok sai kecheng, lale angkang ketheparpik lapen kanghon, ahokpet lapen kanghon lapen kangjinso pen keplengtir asai. Laso asai kecheng jatsemet ke Kanghon-Kangjinso Akai kepangchenglo; laso ajoine si, lake tokdet pen kevangji akai apharman bi pitekanglo. Lake tovar kangpuji aphan lapen Kanghon-Kangjinso Akai atovar lapen thengparpan ahin atovar along kepadamji aphan Kanghon-Kangjinso Akai along kadokave aphan ta angthek keme kelong along kevan. Lake monit atum ketok pen kabirti alam angtan penle kevang pusitame, kadokave ta ahokpet, muthe elong-longni asapsobak kechokche longlok puchot. Lapuan aphi tame, lahei kabirti alam ke chokche pu pu un’e. Lahei kabirti alam ke ingthimlim pensi ahok binong, hala ketok along si monit atum kepachokche anchot. Ajahak atum do alangtum kaningje ke, jongsi Jisu le monit jongjong lapen bang ateng monit a’ot do, tangte kosonsi Alangli angthek lapen manghumeme asai keklem thekdetlo? Jisu ni phlikep asat kelang kachechaknang ke jakong kethepik angthek, inut monit jongjong ke chepalong un’edetji asonlo. Alangli ni phlikep asatlang ke Karjong Kangthir keklem a’ot pen; kosonsi tangte madutame Alanglilong asapbak anta ketheparpik ajakong ave pu kipu unpo? Alangli angthek kepaklang lapen jakong kethepik asai keklem’un ke Alangli inut ningkirung’un abang lapen monit jongjong kali pule kapaklang kali; lake muthe Karjong Kangthir Alangli ason-son amonit jongjong along ta sai keklem pu, lasi Alangliphan jakong kethe asai kedeng thekdetlo lapen ansose kethedung asai keklemtalo. Jisu Alangli kapachethang asai chengche aphrang, mate Baibel kethan ateng, Karjong Kangthir Alanglilong sunse aphrang, Jisu ke bonta inut monit jongjong lapen ajat ahin penta prekdunde. Alanglilong Karjong Kangthir sundet ansi, lake, Alangli kapachethang asai kepangcheng ahut ansi, Alangli ketheparpik ajakong pen plengtir keman. Lasonsi, monit atum Arnam monit nangcheparje a’ok along ke monit jongjong a’ot ave; lapen anparta, alang kamatha kechokche ke Arnam monit nangcheparje abang ke kangthirjir ason anvetsi dochot, monit a’ot ave. Abinong’et ke, Alanglisai kacheklemji aphan Arnam pirthe along kevang ahut, kedoan amonit tame ketheklong ke jakong ketheparpik ason. Alangtum kopima amek pen ketheklong lapen kopima ano pen karjulong kadokave ta jakong ketheparpik ason saide, athe ke Alangli sai lapen Alangli lamthe aphan kachiniji un’e lapen alangtum ke chepalongta un’e. Jongsi siningrengme pen kopine pirthe along van pulote, kosonsi lake jakong ketheparpik pen kaprek kopi jilang? Siningrengme alongri along kachepatujoi ason pirthe along kevan ahut, monit atum kachinidam un’e lapen kipundam un’e kachepatujoi ason, lale apar kemepik lapen kechokpik – lahei ke manghumeme kalilangma? Bonsitame, nang chini nangji, jonghele mamghumeme pusitame lake, kadokave asai ta Alanglilong kedo monit jongjong a’ot pensi keklem. Arnam monit nang cheparje a’ok ke monit a’ot pensi plengtir; jongsi Alangli lapuson kali, tangte Alangli ke Arnam monit nangcheparje a’ok kalidetpo. Alangli kedobom ahut Jisu ongdung jakong kethe asai klemlo. Laso apor ahut Isreal aso atum ketheklong ke manghumeme ason saide; alangtum tekela lapen birta kevan abang thekdunlong, lapen alangtum Jehovah ase arjulong. Lahei kadokave ke manghumeme kalima? Abinong’et ke, pini ta jakong kethe pen monit aphan kachongthui asai keklem penang an kapahi’i akarjong do; lake kaprek le keklem kali bonta alangtum ahin pen kacheparjanthap, non apor Karjong Kangthir keklem asai kalipin pen. Penang an amonit atum jakong kethe asai klem lapen keso aphan pame lapen hi’i aphan phlung; lahei ke thangta kali bonta kapahi’i akarjong asailo, atheke non apor ahut ke Karjong Kangthir lapuson asai keklem ington’etlo, lapen komat-matma halaso apor aphi Karjong Kangthir asai kacharlidun pen kacheparjan atum anke kapahi’i akarjong chenamlo. Halaso apor ahut Israel along keklem asai doan ta a’ot pen manghumeme saide, Karjong Kangthir ke lapuson a’ot penle keklem kali pusitame, lapen halapuson asai doan nonke kacharlidun lapen Sobar aphan kacheparjan lapen laso pen ajok akasiksaklo. Bonta kamanghumeme ason doan ke kapahi’i akarjong pensi kevanglo pu nang puno – lake Arnam asai kopi akai ahut loma pusi lang nangkokpo. Monit nangcheparja Arnam nonhut keklem asai aphan mathadamtha: Laso along kopi ahin si manghumeme kali? Alangli lamthe ke chinidun thekthe lapen chepalongdun un’e, lapen Alangli keklem asai ke majok ta klem thekthe. Kopima Alangli kamathathek lake monit atum kamathadunji abidi amat si ave, lapen Alangli kachini ason tangte, monit atum chinidunde konat pentong kevanglone. Ajahak lapuson kaningje atum do, “Neta Nangli sonthot si jongjong amonitlo, bonta kopisi ne Nangli komatma chini thekthedet? Kepho ason le langdam lote ne si arta lapen kachetong ason ta keong, sitame kosonsi Nangli ne kachinine ason kachinidam thekdet?” Lahei kadokave ta, monit alam le lamdam lote, monit atum chepalong unji abidi kave ason saide. Laso aphi lapuson kaningje atum ta dolang, “Majok ta Israel along keklem asai chinidunde, lapen Baibel alam kethan atum ta kethan pajirmi thekthe; kosonsi Nangli kachinidet?” Halahei ke jakong kethe ajok kalima? Alangli manghumeme asai keklem abe ave, sitame Alangli chinilap; Alangli chepajoipik khangjang pensi ahokpet alam kaningje lapen kachepaklang. Lahei ke jakong kethe asai kalima? Alangli sai ke ok-vi tame chepalong’un ason pen athak si dodong. Lake ok-vi pen arpum kedochot amonit atum ke chepalong thekthe lapen monit atum kamatha’i aphu along ke amutpi amat nangcheklang un’e. Alangli ke mantune ta Baibel porhihelang pusitame, Alangli ke Israel along Arnam keklem asai chinipeme. Lapen Alangli kaningje ahut pirthe along si arjaplun pusitame, Alangli kaningje ke hala kethom angdeng siningrengme along kachepatujoi alam si kaningje. Monit jongsi lahei alam porhi lote, laso kachemathadam alangphan haidetji: “Lake kethom angdeng asiningrengme alam kalima?” Lahei kadokave ason ta monit jongjong atum kachepalong’un ason pen apar saide kalima? Halaso apor ahut, Jisu ni phlikep aphan kecho-kijun kese aphan kedam, hala ta jakong kethe ason kalima? Jongsi nang ni phlikep aphan kecho-kijun kese ke ajat pen tame jakong kethe asailo, hi’i akarjong asailo pusi puji, pulo tangte nang Jisu aphan kapinrem kalima? Alangli kapachethang asai cheklemkle aphrang, Jisu tame monit jongjong asonlo. Alangli lo charlidunlo; kalite kosonsi Alangli ta kaporhi lapen ketok kethek jilang? Arnam ok-vi chemandet aphi, Karjong ke ok-vi arlo si chepatujoipo. Bonsitame, monit jongjong pinak apot, Alangliphan kethe-keding lapen apun kele along kedoan angdeng kachetongpon ke akenangsotlo, lapen Alanglilong kamatha ajakong apun chokchetik an, lapen Alangli ajat ason ta thak theklo, Alangliphan monit jongjong pusi hokme langma? Lake Alanglilong monit a’ot apun-achak kele ansi Alangli kapachethang asai keklem un. Kosonsi Alanglilong monit a’ot apun-achak lele aphrang lapen Alangli kangsai ajakong mesense apharang le Alangli kapachethang asai kechengpo? Ahoklo lake Alangli arta ningkan throk-throksi ahut ke Alangli kapachethang asai kechengji puke ning chethe un’e! Kopi apotsi Alangli monit a’ok along kevangcheng ahut pen Methang aphan chepaklangkledet? Laso atheke Alangli ok-vi along monit a’ot apun-achak chokchedetlang; Alangli ok-vi along kamatha angdeng angthun dambomlang, lapen te labangso ok-vi along monit a’ot jongjong doan, ingthimlim pen Alangli cheparideng longlelang. Laso ajoine si, Alangliphan monit a’ot jongjong arideng arlo kedo lapen monit jongjong atum akamatha adichi arlo kedo ke akenangsot mandetlo – ok-vi along sai keklemji aphan konatsi Alangli kachisik kadure dolangma kejongji aphan – Alangli sai cheng thekthe aphrang. Jongsi Alangli arpu pen chingbardunde ason te, lake Alangliphan the-dingdun pen apun-achak chepaledunji angthun along kedodun akenang dokokpo. Jisu le ningkan throksi-nerkep arta ahut pen Alangli sai chengdet asonte, monit atum Alangliphan arta jum’ong pupedetji ma? Kadokave amonit atum Alangliphan oso lang pupedetji ma? Komatsi Alangliphan alam arju meme pu tinpo? Inut arta ningkan throksi mate nerkep a’oso ajon ningke Alangli anung karjap achatai adon pen chingbarkri pile – Alangli lam kethan chelongjitang? Alanglilong monit a’ot jongjong apun-achak lele ako, Alangli ke keklemji asai pen chingbarbelang. Alanglilong monit a’ot lale apun-achak kele nangjilang ahut malom alam, halaso asai along isi kemesen aphar kachepalong ke un’edetji. Monit a’ok along Arnam Akarjong asai ta amena aron pensi chelangbom. Alangli amonit jongjong a’ot pen cheparisimlong ansi Alangli asai klem unji lapen Apo arpu dengpon unji. Halaso ahut ansi Alangli Amethang asai checheng unji. Alangli parongro arta ahut, Jisu ke pirthe kangduk ahut kacheman ongdung ason aphuthak ke chinidun amat si un’e, lapen hala synagogue along thanbang atumphan karju anvet si Alangli chinidunlo. Alangli lam kaningje kethek penle Alangli sai chechengphit asonte, kosonsi Alangli kechokche klemkledet ki’unpo? Kosonsi Arnam le lapu amat kechokche akengkam kedengpo? Lasi, lake Alangli keklem thekpo pu ahut ansi Alangli sai kachecheng; Alangli ingthimlim pen asai cheklem thekthe aphrang ke Alangli asai chengche. Ningkan 29 arta ahut ke, Jisu inut apun kechok abang man’etlo lapen Alanglilong monit a’ot tame Alangli kedengpon asai kacheklemji aphan ke dorpemelo. Lake halaso ahut ansi Karjong Kangthir binong’et pen Alanglilong sai kecheng. Halaso ahut, John si ningkan throksi Alangliphan tovar kethopiji aphan sik-danglo, lapen alang sai kijut pen, alangphan phatek bengchoklo. Anke amutpi arpu ta Jisu along si vangjuilo. Jongsi Alangli ningkan 21 mate 22 arta ahut le sai chengdet asonte, Alangli monit a’ot along kadure dopiklang ahut, Alangli parisodunchit ahut, lapen Alangli kachini dunde ason kedopiklang ahut, tangte Alangli arpu kedengji ajakong avedetji. Halaso apor ahut, John ke Jisu asai chechengche aphrang ta malomsobak aphan amena asai cheklem tanglo, halaso apor ahut alang ke pangbongchit arta le etlo. Halaso arta ahut, Alangli monit jongjong a’ot along Alangli kedeng nangji asai keklemji aphan jakong duredetlang. Nonke monit nangcheparje Arnam along ta jongjong amonit a’ot dolo lapen, nangtum angbong arta ke’ong atum pen pangbardam lote apun-achak pen helopiklang pusitame, laso monit a’ot ke Alangli sai kedengji aphan ke kedorlim chenamlo. Pini arni asai aphan kekomchen varmon ke ha Jisu apor ahut kachetongnang ason pen isivetlo. Kopi apotsi Jisu hala bang krehini kacharlidun atumphan kangvai? Lake kaprek kali bonta Alangli sai along kacherapdun lapen keklem rappetji aphan. Ihin anat ke, Alangli sai aphan halaso apor ahut along’e kesom aphan, lapen kaprek ahin abang ke kevangji arni apharman Alanglisai along’e kesom. Halaso apor ahut asai pen pachingbar si, lake Jisu aningkehang pensi hala bang krehini charlidun atumphan kangvai, lake Arnam Amethang amat aningkehangtalo. Alangli kekroi ke Alangli bang krehini charlidun atum aphan ingvaisi nahok adim ta lam kethandam aphan dam nangji. Bonta pini ke nangtum angbong laso aphan akenang avelo! Monit nangcheparje a’Arnam ok-vi along sai keklem ahut, hadak penang an aron do, lapen monit atum thangbakbe kachinidunde ason penang an do; monit atum methang kamatha ateng pensi jasemet Alangliphan pundunji, mate Arnam along pen abat kehang kapadodun. Sitame pini arni, ongdung amonit atum ke alangtum kachini ke alangtum kamatha ason anvetsi jasemet cheraidet puke chichinine. Monit nangcheparje Arnam ajat arta mate adim along punoi, Alangli ok-vi along keklem asai aron ke cheprekpresi doverji. Alangli ok-vi chemandet aphi Alangli sai along kacheraplok abang aphan aman pabat aret un’e; lapen ansose si Alangli ok-vi mandetlo lapen sitame monit jongjong a’ot ateng sai keklemkledetji pu. Kalite, Arnam monit nangcheparje pen kevang ke thangnat asai vangve along si ingjirdetpo, lapen hala Lamthe ok-vi kacheplang ke amutpi amat si thangnat ajor avedetpo. Bonsitame, siningrengme along kedo Apo (Karjong) anvet si Arnam monit nangcheparje pu alam kachini, lapen kaprek kalili, hala ok-vi Amethang amat ta kali mate siningrengme atekela atum ta kali. Lapuson tangdet apot, ok-vi along monit asai ke ansose si jongjong kacheman lapen ansose si Lamthe ke ok-vi nangchemandetlo pu kachepaklang thekthu muchotlo, lapen ok-vi puke isi thangbakbe lapen jongjong amonit.

Ajahak atum mathadam tahai, “Kopi apotsi Arnam Amethang amat le akai kejapon nangkok? Inut kasorjon pen keman abang Alangli dular arjappi henoma?” Nangtum chinilo Arnam ok-vi kacheman ke kaprek aphan kali kai kimi along kejapon aphan, lapen, ahoklo, Alangli kai kimi along japon lote, Alangli aphrang akai abang ke halaso ahut amat si pajut etpo. Arnam henlo Kecheng lapen Kijut; lake Alangli Amethang amat si Alangli sai aphrang anat padampo lapen lasi lake Alangli Amethang amatlo hala aphrang akai kepajutji abang. Lake Alangli Sobar aphan kaparam lapen Alangli pirthe kacherai angtheklo. Alangli aphongtin le monit anglum kengkam chejor ta, lake isi akimi aron kechenglo. Akimi asai kecheng avepin pen, hadak lapu amat tame akeban abang akijut avedetpo. Lapen jongsi akeban kijutdam ave pulote, lake Sobar pen kachedam jutjelang pu angtheklo. Arnam Amethang amat chevangve si, lapen monit angbong Alangli sai cheklem ansi, monit atum Sobar angkang pen amutpi kejokvanji lapen akimi akai lapen akimi kecheng kelongji. Kali tangte, monit ke kijut un’e apor aphan si akeban akai along doverpo lapen kijut un’e apor aphan Sobar alam kekroi pensi doverpo. Arnam kejapon akaitin pensi, monit along ephar aphan ke pajoklo, lapen lasi monit atum Arnam along kai kimi anat paphrangdunpo. Arnam si kehai pulote lake Alangliphan kekroi atum anta kehailo pulo. Jongsi kasorjon pen keman amonit akhei aphan si akai kapajut arpu kipi, pulote lake monit ahin pen punoi mate Sobar ahin penle langdam punoi, lake Arnam aphan kekhamkhe lapen kachongthui pen anpar thangnat kalidetji, Arnam alam karju kalidet, lapen monit keklem asai ke Sobar arisim chemandetpo. Monit atum Arnam alam ateng keklem lapen Arnam Amethang pen kejapon akai aphi kidun pen anvet si Sobar ke ingthimlim pen kekroiji, athe lake kasorjon pen keman atum keklem nangji asailo. Lasi, Ne puji nangtum aphi dun nangji lapen lam arju nangji, lapen nangtum pen anpar thangta nangne. La henlo anuttin ta methang asai kachibi lapen anuttin ta methang asai cheklemrep puke. Arnam Amethang asai ke Amena si cheklemdetji lapen Alangli dular monit keklempi nangji akenang amatsi ave, mate Alangli kasorjon pen keman atum asai along chejok dunde. Monit atum ke methang asai cheklem lapen Arnam asai along ta chepatedun. La anvet si alam karju puji, lapen Sobar kerem angtheklo. Arnam Amethang amat kai kimi along kejapon jutdet aphi, Alangli anparke monit atum angbong sai keklemji aphan Amethang nangsunthuthe. Lake halaso aphi ansi monit ke ahokpet pen alang asai cheklem lapen alangphan kasorjon athepi asai cheklemlo. Lahei henlo Arnam sai keklem aron-atang, lake majok ta arkanke si keme. Laso ateng pen keklem henlo keme lapen kechoklim. Arnam asai ke Arnam Amethang pen amatsi cheklemji. Lake Alangli amatsi Alangli sai aphan aphrang padamji, lapen lake Alangli henlo Alangli sai kepajutji abang. Lake Alangli henlo asai kisikji, lapen Alangli si chelang-chariji, lapen anparta, lake Alangli henlo sai aphan mesen angthek mate athe kapaklangji. Baibel along ketok ateng, “Ne henlo Kecheng lapen Kijut; Ne henlo Kenong lapen Kerot abang.” Alangli chelang-chari asai along kachepho asai doan ta Arnam pensi klemdetji. Alangli henlo ningkan suri throk kelang-chari abidi Kachari abang; majok ta Alangli sai Alangli dular klempi thekthe lapen majok ta Alangli sai kijut along van thekthe, atheke Alangli henlo Alangli rideng along kadokave ason kachikip abang. Pirthe sorjondet aphi, Alangli si pirthe amutpi aphan Alanglilong kedo atur along kedoji aphan japonpo, lapen Alangli si akai amutpi aphan pajutpo, lasonsi Alangli amutpi kisik-kedang aphan angthek mate athe kapaklang angdeng an vanpo!