Monit Nangkacheparje Along Kachepatujoi Alam (4)

Nangtum Baibel lapen laphan kaselam aphi atomo chini nangji. Labangso agian ke Arnam keklem akimi asai kedengdelang atum aphan kali. Alangtum ke chinine. Nangtum le jongsi lahei alam aphuthak alangtum aphan ingdaiplang pen than nangji pulote, alangtum anpar ke nanglong Baibel aphuthak aron along nirsipselo. Alangtum ke kaike amat hala kethanmek alam si kiphurdamlok: Labangso alam lit’etloma? Halaso kaningje alam lit’etloma? Alangtum birta keme aphan kekroi ke Baibel along ketok ateng, lapen alangtum birta keme kapachetak tame Baibel along ketok ateng. Alangtum Arnam aphan kekroi ke Baibel alamthe ateng; Baibel avete, alangtum Arnam aphan kroikre. Lason henlo alangtum kerengbom a’ot, asap-asap alam along ta Baibel aphan kangsaipon. Lahei atum mo non ephong Baibel along kiphur aphan vang lapen than pajirmitoi lote, nang punoi, “Aphrangsi, itum kaningje asontin ke ingsai’et nangnelo. Alar ke, itum kosonsi Karjong Kangthir asai keklem loma lale langnang. Itum kedambom atovar aphan enlonang lapen bangso atovar Karjong Kangthir asai chenam loma pu kelangji aphan ahokpet pen pangbar sinang, lapen itum Karjong Kangthir asai langpon ra bangso atovar chok-chokche ingsai lonang. Lapen laso kaningje alam mate halaso kaningje alam ke kethanmek ateng lit’etloma litlelang pu alam abang ke, itum monit atum ke bangso along enokan chechutdun nangne. Itum aphan kemeji ke Karjong Kangthir lapen Arnam nangkeklembom asai alam kachethan.” Lahei kethanmek alam ke Baibel along kethanmek abangphu atum halaso apor ahut Arnam alam kapachoilo lapen Arnam asai ke’enpon amonit atum ketok alamthe, ningkirung longlok si. Arnam Amethang anvet si halahei alamthe than pajirmi thekji, Karjong Kangthir anvet si halahei alamthe pachini thekji, lapen Arnam Amethang anvet si hala vaikang throksi beng thekji lapen lothui pur unji. Nang punoi: “Nang ke Arnam kali, lapen neta kali, lasi komat si lapuan pangdaiplang pen Arnam alamthe than pajirmi haipo? Nang halahei alamthe than pajirmi haijima? Jongsi kethanmek abangphu Jeremiah, John lapen Elijah atum le vangji putame, alangtum ta kabor’i haiji lapen kethan pajirmiji pu chomathathe, atheke alangtum ta Birisak Aso kalidet. Birisak Aso anvet si hala vaikang throksi beng unji lapen lothui kipur unji, lapen anut kaprek ke Alangli lamthe than pajirmi thekthe. Ne Arnam amen cherai haihe, ansose si kehaihelang Arnam alamthe kethan pajirmiji puke. Neke inut Arnam alam karju abang si cheman unchotji. Nang Arnam loma? Arnam kasorjon pen keman angbong majok ta lothui pur haihe mate halahei alamthe than pajirmi haihe, lapen lasi neta pajirmiji puke chomatha haihe. Nang ta pajirmiji pu bor’i’edet si kemeji. Majok ta halahei alam kapajirmiji chomatha nangne. Itum Karjong Kangthir asai aphuthak le chethandam lonang; lapuan ke monit atum klemme. Ne Jehovah lapen Jisu asai aphuthak masapso chini, bonta ne jongjung ke lahei kachetongdam ave apot si, neke lahei aphuthak kaningjedam ing’arpik angkang ansi thekji. Lapen hala alanglitum apor ahut Isaiah mate Jisu kaningje alam abang ke, ne thangnat pajirmidamde. Ne Baibel charlidunde, bonta neke Arnam non keklembom asai si langdunbom. Nang ahokpet ke Baibel aphan asapsovet alothui pusi kehok, bonta lake kopine Birisak Aso anvet le kangputhek ason kalima? Birisak Aso pen anpar, anut kaprek komat si kangputhek? Nang ke Birisak Aso kali, lapen la ansose si neke kitintelang nang ke Arnam Amethang amatlo puke, lasi itum Baibel aphan chongsirdam nangne mate asapsap alam penke chotarlipdam nangne. La ansose si akemelang itum Karjong Kangthir alam kachethan, lake, non apor Arnam Amethang keklem asai. Itum langdun lonang Arnam sai keklembom lake kopipi aron penloma lapen Alangli sai atiri kopipi loma, lahei enpen le patini lonang itum non kidunbom atovar chokloma mate chokchelangma, lapen sonsi laso aphuthak itum chinidakpo.” Jongsi monit atum birta keme pachethang ingtung, jatsemet hala nim kekroipik apirthe along, nang Baibel aphan chini nangji lapen arlo kedo atomo aphan kethan thekpame nangji; kalite, nanglong birta keme pachethangji atovar avelo. Ephong jongsi nang hala akethe arjan aphan chini pemelo tangte, lapen asap-sap alam pen Baibel along kedo kithitang alamthe aphan kangsaidam ingtonlo, bonta Arnam asai lapen kai along ahokpet ason alam anvet si ningje, tangte ahokpet aning pen kiri atum aphan nang chepalong thekpo.

Jehovah asai, Alangli kibi tekang aron, lapen mene-mena akai along kerengbom amonit atumphan Alangli keja’i abidi, Aron Akai along Alangli sai keklem ason-amung, Alangli Amethang aron aphan kibi akenangsot ardi, Kanghon-Kangjinso along Alangli sai akenangsot lapen ardi, lapen kijutsi angdeng along Arnam kopipi asai si keklem: lahei henlo nangtum kachini nangji ason. Kechengsi angdeng lake Aron Akai henlo, hini angdeng abang ke Kanghon-Kangjinso Akai, lapen kethom angdeng ke kijutsi arni malom asai. Nangtum lahei Arnam asai angdeng aphuthak klardak pen chini nangji. Kecheng pen kijut an, ladak pangrumpet ingdeng kethom do. Angdengtin asai atiri ke kopilo? Ningkan-suri-throk sik-dang kemangdam asai along ingdeng koan si keklempon? Kosonsi lahei angdeng kedengpon, lapen kopisi lahei angdeng mena isi kejongvet abidi penle kedengpon? Lahei kadokave ta ardi kedoklong akarju saide. Angdentin asai ta isi kacheparjan ardi do. Kopi asai si Jehovah kedeng? Kopi athe si Alangli halaso isi abidi ateng le asai kedeng? Kopi apotsi alangliphan Jehovah pu kehang? Puthot, kopi asai si Kanghon-Kangjinso Akai along Jisu keklem, lapen Alangli kopi a’ot pensi laso asai keklem? Angdengtin mate akaitin along Arnam akun along pen kopi ahin abang si kepaklangpon? Aron Akai along Alangli kun along pen kopi ahin abang si kapaklangpon? Lapen Kanghon-Kangjinso Akai along kolo abang? Lapen kijut akai along kolo abang? Lahei ke nangtum klardak pen kachini nangji atiri doklong alam saidelo. Ningkan-suri-throk sik-dang kemangdam dobom ahut si Arnam akun ingthimlim pen amat pacheklangdaklo. Lake Kanghon-Kangjinso Akai along anvet le kapaklangpon kali, mate Aron Akai along anvet kali, ansose si nangkijum muchotlang kijut arni malom puke. Kijutsi arni malom kedengpon asai ke kangsai, aning kithi, lapen kangsirsi cheparjanlo. Kijut arni malom keklem asai ke Aron Akai mate Kanghon-Kangjinso Akai ahut keklem asai adim en un’e. Sitame, hala ingdeng kethom, chepho-chilit do, isi ingthimlim pinchong, lapen kadokave ta isivet a’Arnam asailo. Thangbakbe ke, Alangli sai keklem ke prekjam akai along kethak do. Kijut arni keklem asai doan pensi kadokave ason aphan kanghap along an kevan; ladak kipudam ke hala Aron Akai along keklem ke kapangcheng asailo; lapen hala Kanghon-Kangjinso Akai along keklem ke pap pen kapajok asailo. Hala ningkan-suri-throk plenglim sik-dang kemangdam pen kelangdammek alamm abang ke, majok ta aklong alamm chechardam thekthe mate chini thekthe, lapen lahei kelangdammek alamm ke tomo patar asonsi dokoklo. Kijust arni malom, Khrist Recho Arat Akai along keja ponji aphan pura lamthe asai ansi dengponchot, bonta lake kadokave kedoan akai aphan le cheparjanpilap puke kalidet. Kijut apor arni ke kijut apor arni pen anpar thangnat kalidet lapen Khrist Recho Arat Akai pen anpar kaprek akeong puta kalidet, lapen latum ke Kanghon-Kangjinso Akai mate Aron Akai aphan cheparpipe. Lake lapu henlo, kijut arni malom, hala ningkan-suri-throk sik-dang kemangdam along asai doan nangtum aphan nangpaklangdakji. Lake kachepatujoi alam kapaklang. Lapuson akachepatujoi alam mate ason heihui ke monit atum pacheklang thekthe. Monit along jonghele Baibel aphan kachinidam do pusitame, lake lamthe pen anpar thangnat cheman thekthe, athe monit atum Baibel atiri alam chinine. Baibel kaporhi pen, monit atum ajahak ahokpet alam chini tahai, ajahak alamthe pajirmiji, mate alang methang asap kachinidam pen ajahak chethangklong angkung mate angdengpi, bonta alang mantune ta halahei alamthe arlo pen kedo ajor vung thekthe, atheke monit ketheklong ke kithitang alamthe, hala Jehovah lapen Jisu sai keklemvoi arjan kali, lapen monit along ke bangso kachepatujoi alam kapaklangji aphan puke thangnat atovar avedet. Lahenlo si, hala ningkan-suri-throk sik-dang kemangdam along kachepatujoi alam ke kethedung kachepatu alamlo, kachepatu karnuknei alam, monit atum kachopaphodam un’enei. Majok amonit tame Arnam akemang ripdunphit thekthe, Arnam Amethang amat monit atumphan chethan pajirmi lapen chepaklang an matik; kalite, lahei ason ke kijut un’e apor aphan si tomo patar cheman pen dokokpo, kaiketa kerapphit kachepatu alam si dokhangjangpo. Hala nim apirthe along kedo atumphan ning’oi nangne; jongsi nangtum aphan pini nangthan pulote, nangtum amat ta nepdun thekthedetji. Ningkan-suri-throk kachepatu alam ke hala kethanmek abang atum kethanmek alam doan pen ta kamanghumeme kachepatu alam lang. Lake ha kasorjon arni pen pini an angbong kethenei kachepatujoi alamlo, lapen lapuan akai angbong kedoan kethanmek akethek-kere atum angbong inutbak ta kachinidam pale un’elang, athe lake kijut arni ahut anvet si kapaklang lapen laso aphrang mantune ta paklangklelang. Jongsi nangtum bangso kachepatujoi alam ripdamthek, lapen jongsi nang ingthimlim pen laphan dengthek, tangte doan nim amonit anta bangso kachepatujoi alam along remdun’etpo. Lahenlo kelangmek angbong pen kethenei; lahenlo lale monit atum ar’ipik pen cheparideng kangtung bonta lake monit atum kachini keklarklenei ason ta lo. Monit atum Kanghon-Kangjinso Akai along kedo ahut, nangtum Jisu keklem tekang asai mate Jehovah keklem tekang asai aphuthak chinine. Monit atum chinine kopi apot si Jehovah aron kaselam tekang loma, kopi apotsi Alangli monit atumphan aron kroitu pu kipu mate kopisi kardom ahem kikim nangkok, lapen kopi athesi Israel adet aso aphan Egypt ha kangting adet anat lapen laso aphi Cannan alongri an kejapon loma pu alam la ansose si kachini kijumlang monit atum. Lake laso arni ahut ansi lahei alamthe klardak pen kapaklang.

Kijut arni asai ke kethom angbong pen kijutsi angdenglo. Lake kaprek akimi akai asailo lapen lake langchari asai ingthimlim pen parlo ponpe. Hala ningkan-suri-throk sik-dang kemangdam ke ingdeng kethom asai an kethakdam do. Asitin angdeng ta kai kethom aphan amat cheparjanlap un’e, bonta akangthim along pen ephar anvetji. Jehovah pu amen ta Arnam akun ingthimlim pen cheparjan thekthe. Alangli Aron Akai ahut Alangli sai cheklemlo pu alamm abang ke Arnam ke aron arlo si Arnam man unchotji pule kapaklang kali. Jehovah si monit aphan aron selampilo lapen alangphan kapinkhat alamm pajirlo, monit aphan kardom ahem lapen dovan pakimtoi si; Alangli keklem asai ke Aron Akai si cheparjanchot. Alangli keklem labangso asai ke Arnam ke monit aphan aron kepakroitoi a’Arnam anchot pule angthek kipi kali, mate Alangli ke kardom ahem along a’Arnam, mate Alangli ke dovan athengno kedo a’Arnam puke angthek kipi kali. Lapuson kipudam ke ahok kalidetji. Aron arlo keklem asai ke isi akai aphan si cheparjan unchotji. Lasi, jongsi Arnam Aron Akai along ansi sai klemchot, pulote monit atum ke methang aphan labangso kapajirmi angkang along ansi chebengverpo, kipudamji, “Arnam ke kardom ahem along kedo a’Arnam lo, lapen, Arnam aphan sai klempiji pulote itum kurusar apindeng kachingthang aphan ardi chipi paphrang nangji lapen kardom ahem lut nangji.” Jongsi Kanghon-Kangjinso Akai ahut asai mantune ta dengdepinlang lapen Aron Akai asai jongsi pini anta angthun nangdobomlang pulote, monit atum Arnam ke kangjinso lapen kanghon ta do pu chinipo. Jongsi Aron Akai asai le klemkledet, lapen laso alar ke Kanghon-Kangjinso Akai asai anvet, pulote doan amonit ta chinipo Arnam anvet si monit aphan pap pen pajok thekji lapen monit apap diya unji. Monit atum chinipo Alangli inutvet henlo kangthirvet lapen pap kavepin abang, lapen Alangli monit apharman Alangli methang aphan chipidet lapen thengparpan along apran chipidet pu. Asitin akai ta Arnam akun pen ephar cheparjanpilo. Arnam akun pen kopi ahin abang si Aron Akai along cheparjan, Kanghon-Kangjinso Akai along kopi abang, lapen non kedobom angdeng along kopi abang loma pu alamm ke: kethom angdeng kedoan elongvet adim vang pen isi ingthimlim pinchongdet ansi latum Arnam akun amutpi pen paklang thekji. Monit ta la ingdeng kethom aphan chinidet aphi ansi alang laso aphan ingthimlim pen chini thekji. Ingdeng kethom angbong pen isinat tame pavedet puke henolo. Nang la kethom angdeng aphan chinidet ansi Arnam akun ingthimlim kethek’longji. Aron Akai along Arnam chepatanglo puke Alangli hala arlo anvet si Arnam lo pule kapaklang kali, lapen Alangli ke pap pen kepajok pu Alangli sai chepatanglo pu aling le Arnam mononphi kijut un’e apor aphan ta monit akhei aphan pap pen pajokpo pu kali. Lahei kadokave kedoan ta monit atum si kiripdam alamm saide. Kanghon-Kangjinso Akai kijut along nangkele tangdet apot, Arnam ke thengparpan apharman chot lapen thengparpan anvet si Arnam kejokvan asai keklem aphan cheparjanpi puke nang pu un’e. Lapuson keklem ke Arnam aphan kethan pajirmidam mandetpo. Non kedobom angdeng along, Arnam jasemet ke lamthe asai si klembom, bonta nang pu un’e antame Arnam mantune ta monit aphan kangjinso avepinlang lapen Alangli kevan ke kangsir lapen kangsai anchot puke. Kijut arni asai Jehovah lapen Jisu asai lapen monit kachinidamde kachepatujoi alamthe doan ta klardak pen paklanglo, lasi lason pen kijutsi kapale nangji adim lapen monit akhei kijut kapaklang lapen monit akhei angbong kapajok asai doan kangton. La kijut arni asai kadokave ason aphan ta kanghap along vanpo. Monit atum kachinine kachepatujoi alamm doan hekdak nangkok atheke monit atum halahei aphan aklong an kapamathadam lapen aning along ingthimlim lapen klardak kachini kapadoji aphan. Laso aphi ansi monit akhei aphan alangtum a’ot kachepklang ateng angdeng thakmeji. Hala ningkan-suri-throk sik-dang kemangdam asai jutdet aphi ansi monit ke Arnam akun aphan ingthimlim pen an chini unpo, atheke Alangli kelangchari ke laso ahut anke kijut along lerokpo. Nonke nangtum kijut akai ahut Arnam asai aphan chetong longlok aphi, tangte Arnam akun kopilo? Arnam ke hala lamthe kaningje chot a’Arnam lapen anpar thangnat kali pu kaningje nang’ingthin chepathe haijima nang? Nang lapuson alam kiripdamji puke nang’ingthin chepathe haihedet si kemeji. Ajahak atum ningje Arnam ke kachepatujoi alam kapaklang abang a’Arnam, Arnam ke hala Birisak Aso pu lapen hala vaikang kangtang throksi kebeng Abangphulo. Bonta inutbak ta lapuson alamthe kirip’iji aphan hai vangve. Kaprek atum abang puthu tahai Arnam ke monit nangcheparje henlo, bonta lake akechok kalibomlang. Anparta kaprek atum kaningje dothulang monit nangcheparje a’Arnam ke lamthe si ningjechot lapen angthek lapen jakong kethepik kamanghumeme asai klemkle, bonta lapuson kaningjeji puke kachomatha la ansose pajum nanglang, atheke Jisu ok-vi cheman pen angthek lapen jakong kethepik kamanghumeme asai klemlo, lasi nang Arnam aphan lapuan kaparjangtang pajirmidam nangne. Ningkan-suri-throk kisikmek kemangdam ahut keklem asai doan non ansi kanghap along nangkelelang. Lahei kedoan asai monit aphan paklanglap aphi lapen monit angbong dengpondet aphi ansi monit akhei Arnam akun lapen Alanglilong kopi do lapen kopi chini unji. Mo labangso akai asai ingthimlim pen kichun peme lote, monit atum kachinine kachepatujoi alam doan ta cheklangthaipo, kedamtang apor ahut kachinine ahokpet alam doan ta paklardakpo, lapen monit akhei aphan alangtum apharman kevangji arni atovar lapen kele nangji adim ta pachini’etpo. Lahenlo non akai ahut keklem nangji asai amutpilo. Non apor monit atum kedambom atovar ta thengparpan atovar lapen kisung kachechak atovarlo pusitame, monit atum kopisi pini keklem, lapen alang kopisi kecho, kijun lapen ningcheparong’i lahei ke aron arlo lapen Kanghon-Kangjinso Akai ahut monit atum kachetongnang ason pen kacheprek thepik khangjanglang. Pini arni monit along pen kopisi kehang lake chuhut arni ason kali lapen ansose si Aron Akai ahut monit atum pen kehang ason pen kachingbarbe kethelang. Nonke, Arnam Israel along Alangli sai cheklembom apot ahut monit aphan aron arlo kopisi kehang? Halake abat kali bonta Sabbath arni kangthir lapen Jehovah aron kekroi. Majok ta Sabbath arni ke sai klem longle mate Jehovah aron arkan longle. Bonta nonke lapuson kalilo. Sabbath arni, monit sai klem, chingsom, lapen kai ateng si kardom, lapen alangphan thangnat kebeng-kephan pipe. Hala Kanghon-Kangjinso Akai along atumphan ke baptisma pinangkoklo, lapen alangtum aphan an pase, him kebeng, hor kepajun, amahang pe pen chetelom lapen alangtum apharman anut kaprek aphan akengpak chamnang. Nonke, lahei aron pavelaplo, bonta monit along pen ansose akethe si kehang, atheke Arnam asai ansose kahurnak anat paphrang tanglo lapen monit kilutdun ta ansose si nang’ingtuibomlo. Kedamtang apor, monit aphu along ari chebat si Jisu ardomlo, bonta nonke lahei kadokave ningjedet aphi, ari kachebat akenang kopisi kedolang? Lamthe anvet ta angthek palongtheklo. Alangli kedamtang arni monit aphu along Alangli ri kachebat ahut, lake monit aphan hirjume kipi lapen alangphan alanglong kedoan akeso pen kapajok aphan. Lason henlo halaso apor ahut Karjong Kangthir sai keklem, bonta nonke lason kalilo. Nonke Karjong Kangthir sai keklem lapen angthek chepalongji aphan lamthe si ke’en. Alangli lamthe nangtumphan klardak pen pachinilo, lapen nangtum halahei aphan asai klem nangpo nangtum aphan nangkethan ateng. Alangli lamthe ke Alangli kemanglo; halahei ke Alangli keklem kangtung asailo. Alangli lamthe pensi, nang Alangli kemang lapen hala nang kachepalong kangtung ason chinipo, lapen nang ari nangkachebat akenang avepin pen ta Alangli lamthe aphan asai klem’iphit unpo. Ajahak atum ningje tahai, “Nelong Nangli ri nangchebat noi! Nelong Nangli ri nachebat noi ne hirjume nangkipi lapen ne Nanglilong nangli pen isi nangcheman dunji aphan.” Lahei ke kedamtang apor ahut pen kevang akai kedamtang asai saidelo, nonke bandetlo, atheke akai chelartanglo. Akai ateng si Karjong Kangthir ta sai keklem, pachingvuikung mate aron abitung ateng puta kali. Akai chelar’etlo, lapen isi akimi akai ke akisi asai apeng vanveklo. Lake kadokave asai angdeng aphan ta isivetlo, lapen lasi Alangli sai ke mantune ta chiruithuthe. Kanghon-Kangjinso Akai ahut, Jisu lapuson asai ongdung klemlo, pudam lonang keso kepame, hi’i kiphlung, monit aphu along Alangliri chebat si alangphan kardompi, lapen alangphan hirjume kipi. Sitame, puthot keklemthuvoi pulote non apor along amo vangvedetji. Halapuson abidi penke Karjong Kangthir halaso akai ahut klem etlo, athe halake Kanghon-Kangjinso Akai, lapen halaso ahut monit atum kelongji aphan kanghon-kangjinso dorplup an do. Alanglong pen thangnat anam puta hanghe, lapen alanglong kekroi dotik ke, alang kanghon-kangjinso longbomji. Kadokave aphan kanghon-kangjinsopik pensi kelangpon. Nonke akai chelar etlo, lapen Arnam asai aphrang paphrangpik anlo; lake kangsir lapen kangsai pen anvetsi monit arlo kedo kekhamkhe a’ot lapen aketer ason doan kepakakji. Halabangso angdeng lake pap pen kapajok angdeng tangdet apotsi, lake Arnam aphan halason si paklemdetlo, monit aphan dorplup akanghon lapen kangjinso pi pen, atheke monit atum pap pen chepajokji mene lapen, kanghon-kangjinso akerap pen, alang pap apharman diya longji mene pu aphan. Non kedobom akai lake kangsir, kangsai, lamthe pen kipu pasodak, lapenpen kepakeng lapen lamthe aphan paklangdak pen monit arlo kedo kechokche a’ot kapacheklang, atheke monit akhei mononphi kejok longji aphan. Lake pap pen kapajok aphan mute ansose kaharnuk asai lang. Kanghon-Kangjinso Akai ahut monit atumphan dorplup an akanghon dolo; nonke monit atum kanghon lape kangjinso chomatdet aphi, alang anpar ke kachomatji kalilo. Laso asai ke apor ateng lit’etlo lapen anpar ke keklem nangji kalilo. Nonke lamthe akangsai pensi monit aphan kepajok nangpo. Monit aphan ingsai’et, ingsirdet, lapen pachithingdet aphi, alang kun tame chelarpo. Lahei kadokave ke Ne kaningje alamthe ajok kalima? Asitin angdeng asai ta monit akhei kangthim kapaphrang lapen akai ateng pacheton dunsi kedengpon. Doan asai ta ardi kedo saidelo, lapen lahei kadokave ta kijutsi kejok kelong si apharman saide, atheke monit atum kevang apor ahut kemesen kele nangji adim kelongji aphan, lapen monit akhei aphan kijut apor ahut alangtum a’ot ateng angdeng kethak thekji aphan.

Kijut arni malom asai ke lammthe kaningje henlo. Lammthe kerap penta monit along thedung kachelar vanme. Lahei alammthe kedengpen lahei amonit atum along non kachelar kevang ke hala Kanghon-Kangjinso Akai ahut angthek lapen ketheparpik ajakong aphan kedeng pen monit atum along kevang akachelar ke apar thepik anlang. Atheke, Kanghon-Kangjinso Akai ahut, monit aphu athak ripak kachebat lapen kardom pensi hi’i atumphan kiplung, bonta monit arlo chongthui-chopanglim akun ke dokoklang. Monit aphan keso pen pamelo lapen alang keklem apap apharman ta diyalo, bonta hala monit arlo kedo alanglong chongthui-chopanglim kapahi’i akun pen alangphan kapajokji pu alamm abang, laso asai ke keklem nangji dokoklang. Monit aphan alang kekroi ajoine si alangphan kepajok lapen pap ta kadiya, bonta monit atum pap keklemver a’ot virvelang lapen alanglong si dobomlang. Monit apap kadiya ke monit nangcheparje a’Arnam keklem asai ajoine pen, bonta lake monit atum along anpar ke pap avelo pule kipudam kali. Monit apap doan ta pap kachehodai pensi diya unji, bonta monit aphan anpar ke pap paklemkledetji pu kapinchong abang ke, lapen kosonsi alanglong pap keklemver a’ot aphan ingthimlim pen kepavirdetji lapen kapachekirlaji, alanglong bangso akisung kapajutji atovar avedet. Monit apap doan diyadetlo, lapen lake Arnam thengparpan along apran kachipi ajoine, bonta monit ke alanglong akeban chongthui-chopanglim kapahi’i akun pensi dodunbomlang. Lason tangdet apotsi, monit aphan alang chongthui-chopanglim kapahi’i akun pen amutpi si pajok nangpo, atheke alang pap kachoklemver a’ot aphan ingthimlim pen kapavirji apharman, mononphi ta kapachanthuthedetji, sonsi monit akun kapachelarji aphan tovar kethopi. Laso aphan monit atum methang akai along kethedunji atovar chiriplong nangji, chethe tovar kirip, lapen akun kachelar abidi kiripdam. Lapen anparta, laso along monit atum laso atovar ateng sai keklem abang akenangsot, athe alang akun pajo pen kachelar lapen keklarbong ame atur arum kedolongji aphan, atheke alang keklem ason doan Arnam akemang pen kachetonji aphan, atheke alanglong kedo kapahi’i akun langno alang chevar thekji mene pu aphan, lapen alang Sobar akangting ajakong pen chepajokvan thekji aphan, laso aphi ingthimlim pensi pap along pen nangketetji aphan. Laso aphi ansi monit ke ingthimlim pen kejokvan kelongji. Jisu Alangli sai cheklembom apor ahut, monit atum Alangliphan kachini ke berbulu lapen klardakde. Monit atum ke kaiketa Alangliphan David asopo pusi kekroilok, lapen Alangliphan jakong kethepik kethanmek abang, monit aphan pap pen kapajok kachingkimepik aHemphu pusi kipu. Ajahak, alangtum kekroi ajakong pen, Alangli kachethang ape akung keotdun penta keso nangmelo; mekve abang chelarlo lapen kithitang abang aphan ta chethe pithuthek. Sitame, monit ke alangtum mena along kapahi’i akun langno lapuan kaharnuk along kachethaphet aphan chiri thekthedet, mate laphan kevarchorji puta thekthedet. Monit penang an kanghon-kangjinso longlo, sonsi ok-vi apharan monsam lapen ning karong, inut abangphu kekroi ajoine hemtun isi aphan hirjume kevan, keso abangphu keme, lapen do’olang. Lapen kaprek kedoan ke monit asai keme lapen alang ingthirjir araje; jongsi komatne inutbak lapuson atiri pen dothek pulote, alangtum aphan ke kedengme kekroi abang pusi hokdetlo. Lapuson kekroi atum anvetsi mo kithi aphi siningrengme kilutdun longji, la kipudam ke alangtum kejoklo. Bonta, alangtum kerengbom ahut, lahei amonit atum kereng nangji abidi chinine. Alangtum keklem ke isi chingtontepin angthun avaikang pen kachopap lapen laso aphi pap kachekobir alangtum akun along kachelar avepin pen: Lason henlo Kanghon-Kangjinso Akai ahut monit atum a’ot. Monit ahokpet tong plenglim kejokvan kelong loma? Kali! Lahenlo si, hala angdeng asai tangdet aphi, kangsai lapen kangsir asai abang dothukoklo. Bangso angdeng along abang ke monit aphan lammthe pen ajok ingthirjir kapinchong, lapen laso aphi alangphan kidun nangji atovar kipi. Bangso angdeng ke athe mate ajor klangkledetji jongsi ladak ta hi’i kiplungsi klembom pulote, athe lake monit along pen pap keklemver a’ot pakak thekthedetji, lapen monit ke alangtum apap kadiya along amat arjapklakpo. Labangso pap kachehodai pen ajok, monit apap diyadetlo, atheke thengparpan along pran kedam asai jut’etlo lapen Sobar athak Arnam si nangdolo. Bonsitame monit a’ot langno akun ke alanglong dobomlang, monit ke pap klembom unlang lapen Arnam aphan khamkheji, lapen monit aphan Arnam cheparidengde longlelang. Laso ajoine si non angdeng asai along Arnam ke monit a’ot langno kapaklangji aphan lammthe akerap si ke’en, laso ajok pensi alangphan tovar keme ateng kepaklem. Bangso angdeng ke kedamtang angdeng penta ardi dochetlang, lapen te angthek mate athe ta klangdong, athe nonke lammthesi monit aphan akai along kenangji ason an palephit tanglo lapen monit akun aphan ingthimlim pen kachekirla aphan avarsai ketho; lasi ansose keplenglim asai angdeng thulang. Lahenlo si, kijut arni monit nangcheparje pen Arnam amen kevang akenang asai plengponlo lapen Arnam monit aphan kepajokvanji aphan langchari asai plenglim pen tangponlo.

Arnam monit aphan kepajok asai ke Karjong keklem adichi lapen Karjong angthek le endunphit kali, atheke Alangli Karjong aphan ke monit atum ari pen papho un’e mate theklongle, lapente monit atum adung pet un’e. Jongsi Alangli Karjong adichi penle monit aphan pajokphitji aphanle bor’i, monit atum Alangli pen kejokvan dengdun thekthedetji. Jongsi Arnam le athak pen kasorjon pen keman amonit araje chepindengde asonte, monit atum labangso kejokvan kelongji atovar si avelo. Athe Alanglilong kapatebokji aphan monit along tovar ave, hala Jehovah kedo anghun along kapaleji aphan le majok along ta tovar avedet asonthot. Kasorjon pen keman amonit kacheplang pen anvet si, lake, Alangli lamthe Alangli kemanji ok-vi pen keman arpum along chibi ansi, Alangliphan kekroi atum doan aphan Alangli jongjung sai klempi unji. Laso aphi ansi monit atum jongjung Alangliphan theklongji lapen ase arjulongji, lapen anparta Alangli lamthe kachari arlo lutdun longpo, lapen laso akerap pen ingthimlim akejokvan longpo. Jongsi Arnam le ok-vi chemanme asonte, ok lapen avi kedo atum inutbak ta kethedung kejokvan denglongledetji, mate inutbak ta jokjedetpo. Jongsi Arnam Akarjong le monit angbong sai klemphit asonte, monit akhei amutpi aphan ta arum paklolappo, kalite, Arnam adung kapatebok aphan tovar kavedet pen, alangtum doan aphan ingthimlim si Sobar bengponlapji. Kechengsi monit nangcheparje ke monit aphan alangtum keklem apap pen kapajok, alangtum aphan a’ok kedopik Jisu abang pen kapajok, lake, Alangli monit aphan ke thengparpan along pensi kepajok, bonta monit along kapahi’i akun langno ke dokoklang. Hini aphong monit nangcheparje abang ke pap kachehodai asai keklemji aphan kalidetlo bonta alar ke mena apap pen kachepajoktang atum doan aphan ingthimlim pen kapajokvan asai. Lapuson keklem atheke diya kelongtang doan atum aphan kepajok longji lapen amutpi amat kapangjang, lapen kachekirlatang akun chepalong pen, Sobar ajakong akangting pen kejok lapen Arnam anghoi athengno kachirui. Lapuson abidi pen anvet si monit atum aphan kapangthirvet pinchong unji. Aron Akai kijut along nangle’et aphi, lapen Kanghon-Kangjinso Akai kecheng penke, Arnam ta kapajok asai chengphitlo, lake kijut arni anta dambompo mo, monit akhei aphan kehamkhe a’ot apot kangsai lapen kangsir ahut, Alangli monit akhei aphan ingthimlim pen pangthirpo. Laso aphi ansi Arnam Alangli kapajok asai chepajut unpo lapen kesang along lutpo. Lahenlo si, hala kethom asai angdeng along, batai hini ansi Arnam ok-vi cheman pen Alang mena amat Alangli sai chedeng ponlo. Laso atheke kethom angbong pen isi angdeng along anvet si monit aphan alangtum akai along kejapon asai dochot, halapu kaprek hini angdeng along abang ke kapajok asai si dolo. Ok-vi cheman pensi ansi Arnam monit atum adung kedodun, pirthe akisung chetong, lapen jongjong ok-vi arpum akai pen rengdun unji. Lason pen anvetsi Alangli monit atumphan isi kasorjon pen keman pupen kenangji keklem ason pithekji. Lake monit nangcheparje a’Arnam ahin pensi monit atum Arnam along pen plenglim kejokvan kelong, lapen siningrengme penle alang kachardom alamvoi kevangphit kali. Atheke, monit ke ok-vi pensi keman tangdet apot, alang ke Arnam Akarjong aphan ketheklongji atovar avelo, ansose si kijumlang Alangli Karjong adung kapatebok. Monit atum kachepatebok unji ke monit nangcheparje a’Arnam a’ok aphan anvetlo, lapen laso abidi pen anvet si monit ke doan atovar lapen doan ahokpet ason ripdunpo lapen kejokvan akangthim denglongpo. Hini abatai monit nangcheparje ke monit along pen apap kepakakji lapen alangphan kapangthirji aphan dordedetji. Lasi, hini abatai monit nangcheparje penke, ok-vi along Arnam asai kangthilim pen kanghap angdeng an vanpo lapen Arnam monit nangcheparje akenangsot asai ta patangdetpo. Halaso aphi ke, ok-vi along Arnam asai ke ingthimlim pen kijut along nanglepo. Hini abatai monit nangcheparjedet aphi, Alangli sai apharman kethom aphong ke Alangli ok-vi cheman thuthelo. Atheke Alangli langchari asai ingthimlim pen amat si kijut along nanglerokpo. Kijut arni malom monit nangcheparje ke Alangli kangvaitang amonit aphan ingthimlim pen cheparideng’etpo, lapen kijut arni malom ke monit akhei aphan ta a’ot ateng pen thak’etpo. Alangli kapajok asai ke klembombelo, mate Alangli kopine asai keklemji aphan putame ok-vi along chiruithuthelo. Kijut arni malom asai along, angthek lapen manghumeme asai keklem aphan mute lamthe si ardi do muchet, lapen lapen ajakong si hala angthek lapen manghumeme asai aphan ta lit’etji. Lamthe si monit aning arlo aklongsi along kedo a’ot langno doan angtan pacheklangsakpo. Nanglong nangmethang amat lahei aphan kapangthekji abidi ave. Mo lamthe akerap pen lahei nangthengno nangpurdak ahut, nangmena amat si halahei aphan nang ta chinidundetpo; nang halahei aphan kroikre un’edetji, lapen nang kroidun pemeji. Lake lamthe ajakong kalima? Lake pini arni lamthe keklem asai pen kelong angtheklo. Lehenlo si, lake keso kapame lapen hi’i karphlung pen ajok le monit aphan alang pap pen ingthimlim kapajok thekji kali, mate alangphan ingthimlim kapingchongji aphan ke angthek lapen manghumeme asai penta kali. Keso kapame lapen hi’i kaprhlung ajakong ke monit aphan kanghon-kangjinso ansi pichot, bonta monit a’ok-vi ke Sobar apharman si dokokjilang lapen kapahi’i chongthui-chopanglim a’ot langno ke monit abang arlo si doverbomjilang. Kaprek alamthe pen pudamji pulote, hala kapangthirthe ason doan ke pap lapen aketer pensi chephosaplang. Lamthe ajakong pen alangphan pangthirdet aphisi monit aphan Arnam cheparideng thekji lapen ingthirjir kemanji. Monit abang arlo pen hi’i aphan phlungdet lapen pap pen alangphan kapajok, lake alangphan Sobar arideng pen pajoklo lapen Arnam along nangchiruilo pusi kipudamchot. Bonsitame, Arnam pen pangthirthe mate kirlaletik, alang otlangno amonit ason si dobomji. Monit arlo aketer, kakhinde, lapen kekhamkhe a’ot dobomlang; monit ke Arnam along Alangli pap pen kapajok ajoine si kachiruilong, bonta alang ke Arnam aphuthak asapbak ta kachini ave lapen Alangliphan kedengde lapen kachongthui asai klem unlang. Monit aphan pap pen pajokje aphrang, penang an Sobar abikar ke alanglong aklim e’etlo lapen, ningkan suri Sobar arideng ot chepalangnodundet aphi, alang mena abang arlo Arnam aphan kekhamkhe a’ot cheseng etlo. Lahenlo si, monit aphan pap pen pajokdet aphi, lake monit aphan anam kesodak pen kenam si pap pen kapajok pen anpar kaprek thangta kalilo, bonta alanglong pen abikar kedo a’ot abang ke pavirdetlo puke kalilang. Lapuan ot kelangno amonit ke methang kachekirla chevandet ansi Arnam aphan sai keklempi apun longji. Bangso kangsai lapen kangsir asai pen ajok, monit ta amethang arlo kedo aketer lapen otlangno atiri aphan chichini peme unpo, lapen alang ingthimlim pen chekirla thekpo lapen ingthirvet manpo. Lason abidi pen anvet si monit ke Arnam anghoi athengno kachiruiji apun kemanji. Non laso arni along keklem asai doan ta monit aphan kangpangthir lapen kakirla unji aphanlok; lammthe pen kangsai lapen kangsir, lapenpen kapangthir pen ajok, monit methang a’otlangno chevarpo lapen ingthirjir selam unpo. Bangso angdeng asai aphan kapajok pu kitin aphan mute, lake kapangthir asai pule hokthu te chelonchetji. Ahokpet pudamlote, bangso non kedobom ke kacherai angdeng lapen te kapajok asai aphan adunthu mate hini angdenglo. Lake lammthe akerap pen kangsai lapen kangsir pensi monit atum Arnam pen kacheparideng adim an nangleji, lapen lake lammthe ke’en pensi kapangthir asai, kangsai asai keklemji lapen hala kedoan aketer, kamathathap, kemangthap, lapen jongjung akar’i monit aning along kedoan tame amutpi pen paklang’etji. Atheke monit aphan alang kachoklem apap doan pen pajok etlo tahai mene, sitame lake Arnam monit kachomatha kechokche doan aphan aning kachibibe lapen monit aphan alang halahei kechokche kachomatha ateng penle kangsai mate kivi kali pusi pudam unchotji. Bonsitame, mo monit atum, ok-vi arpum along kedo atum, pap pen pajokjelang pulote, alang pap klemthubom ta thek, ingtontepin pen alang kapahi’i a’otlangno chepaklangbom si. Lahenlo monit aphrang cheja ponbom akailo, kijut kave pap kachoklem lapen aphi kadiya avaikang. Keongdung amonit akhei atum ke adap pap choklemji arnikangsam kachekubirthuji aphan. Lapuson si, pap kachehodai ke monit aphan kijut un’e apor aphan anta ale doji pusitame, lake monit aphan pap pen pachingrai un’edetji. Pap pen kapajok asai achitim anvet si ketangchotlang, athe monit along nonta chongthui-chopanglim akun dokoklang. Pudam lonang, monit atum Moab pensi nang pensi nangkeplang pu chichinidet pen, alangtum ningkephophe alamm chepaklang tanglo, chethe kiri ingtonkoklo, lapen abat akaheno kamatha chengdetlo. Ladak pen tangte monit atum ke nonpuan ta Arnam kachari angkan along ingthimlim pen kilut kalilang pule kacheklang kalima? Lake thihek pen pudam lote alangtum kapahi’i otlangno akun kalima? Nangphan kangsir along nangthapthe aphrang, bang pen apar akangtui si nangri ke kachirung, Jisu penta akangtuilang. Lapen nang ase thedung pensi sarlanglo: “Arnam kachinghonnei asopo cheman noi! Arnam pen chetebokhet abang cheman noi! Sobar athengno kangkup aphan mute netum kithi si ninghangji! Kebantham aSobar aphan khamkhenoi! Hala ketheparpik dragon ke’er aphan kekhamkhe ra chesong noi! Ketheparpik dragon ke’er jakong along pen ningdukmeme an pen paklonang. Arnam itum aphan ingthimlim nangpapinchongnang!” Nang kasarlang ase ke bang anut kaprek doan atum pen akethelang. Bonta laso aphi masapso kangsir vanglo, puthot ephong, monit akhei a’otlangno cheklangsak’lilo. Laso aphi, halahei kehangjo ingtonlo, lapen alangtum kacheparai alamm ta plengpledetlo. Lahenlo monit atum a’otlangno; pap pen ta kaharnuk an keledam, lake Sobar pen ke’e arong lapen monit along angkur kachesak harnukpik an. Monit atum mena apap aphan kachichini kejoike kali; alanglong angkur kachesak kaharnukpik a’ot aphan kachichiniji atovar alanglong ave, bangso angthek kachepalongji aphan alang lammthe pen akangsai aphan si chiki nangkokji. Laso aphi ansi monit atum aphan halaso apor penke pajo pen kirla unji. Kedamtang arni monit atum lasonsi hang-sarlang lo atheke alangtum mena abinong otlangno aphan kachichini ave. Lahei henlo monit arlo kedo aketer ason. Kangsai lapen kangsir apor esek, monit ke monsam kave avarmon along si dolo. Lahei kadokave ke lamthe ajakong pen ajok le kachepalong kalima? Nang ta sai klembang atumphan kangsai aphrang ke nang ta ase chepathedung pen sarlang dunde puhe? “Khrist kepangri arat arlo lutdun noi! Bangso amen aphan kedeng atum doan ke bangso arat lutdun longpo! Kadokave ta Arnam along arpu deng dunpo!” Sai-klembang atumphan kangsai nangkele ahut ke, nang ta anparke hanghedetlo. Kechengsi ahut, kadokave ta hanghurlo, “Oh Arnam! Nangli nephan nahok le nangbi, neke Nangli nangkatevar along aling si nangchehodai dunpo.” “Komatlo Ne Paul kemanji?” pu Arnam alamthe kaporhilong pen, monit atum pulo, “Ne nening hanglo!” Puthot latum lamthe thekthulonglo, “Lapen Job akekroi aphuthak ke kosonlo?” lapen pulo, “Ne methang along Job akekroi kachepadoji ninghanglo. Arnam, kanghon pen nephan satlang nang’en iknoi!” Sai-klembang atumphan satlang nangkele ahut, alangtum menmen si ingrai etlo lapen karjap anta ning’oimeme anlo. Halaso aphi, asap aphi asap, ning arlo aketer pajo pen nangvirlo. Lake lamthe pen ajok le kepleng kalima? Lasi, nang pini kopima kachetong lake lamthe pen ajok si kelonglo, hala Jisu angthek lapen manghumeme keklem pen kachepalong heihui penta akethelang lake. Nang ketheklong Arnam anong kethe lapen Arnam Amethang ajakong nang le ketheklong lahei ke thengparpan along aprang kedam pen, keso aphan kepame pen ajok lapen hi’i karplung pen anchot le ketheklong lapu kalidet, bonta lapen ansose si lamthe akangsai pen ajoklang. Lasi nangpaklangpo Arnam atirijung lapen jakong ke angthek, keso aphan kepame, lapen hi’i kiphlung anchot le kaparlo ponchot kali, bonta laso Arnam alamthe akangsai ke ansose si kemesen pen Arnam atirijung lapen Alangli jakong ketheparpik aphansi kapaklangsaklo.

Monit atum non kachepalongtang – alangli non kedobom arje, kachini, kanghon, ning ingthirjir pen kekroi, lamthe ateng kekroi pen keklem, lapen aklong alam kachini – lahei ke lamthe pen ajok kelong angtheklo. Nang thirthip akekroi chepadothek lapen pini arni an arjapthip kedothek puke lake lamthe ajakong pen ajoklo. Nonke monit atum monit nangcheparje a’Arnam asai ke chenam ta prekjek meparpik, lapen halaso along penang an monit atum kachepalong un’e dopik, lapen hadak kachepatujoi lapen manghumeme do. Lasi, ongdung atum ke chehodai’etlo. Ajahak atum ke amahang kethek penta majok amonit athengno ta chehodaidepinlang, bonta alangtum pini arni Arnam alamthe theklong pen, alangtum ingthimlim pen si keklem thekdunlorlepin penta chehodailo, lapen alangtum kangsai mate kopine kaprek kaningjeji pu nangbar haihe. Monit akhei ke lamthe aber klo’etlo lapen lamthe akangsai arum si pangthaitanlo. Jongsi Arnam Akarjong monit aphan chingkiphit pu ason te, monit akhei doan ta halaso ase along chehodaidun etpo, kapaklang alamthe avepin penta keklolo, Damascus kedam atovar akatheang along Paul le longle athak kititan pu asonthot si. Josngi Arnam lapuson klembomlang pulote, monit ke mantune ta lamthe akangsai pen ajok amena along kedo otlangno aphan kachichini lapen halaso aphi kejokvan pu angdeng ke leledetpo. Ok-vi kacheman pen anvet si Arnam jongjong amut Alangli lamthe anuttin amonit ano along palethekji, laso atheke ano kedo atum an Alangli lamthe kaparju lapen Alangli lamthe pen kangsai asai kepadengdun aphan. La anvetlo Alangli lamthe pen kelong angthek puke, Karjong amat cheklangdak pen monit atum aphan kepakroiji pura kepaphere alar ke. Lake labangso keklem’un lapen sitame keprekpik asai pensi mont akun akeban, ongdung aningkan angbong aklongsi kachepipjoi, aphan ingthimlim pen paklangsak unpo, atheke monit atum halaphan chichini pen chekirla thekji mene pu aphan. Lahei kadokave ta monit nangcheparje a’Arnam asai saidelo, bangso along le, kaningje lapen keklem a’ot pen kangsai kedeng, Alangli lamthe pen ajok si monit aphuthak kangsai angthek palongji. Lahenlo monit nangcheparjan a’Arnam atirijung lapen Arnam monit nang kacheparjan akenangsot. Laso keklem ke monit nangcheparje a’Arnam atirijung kapachiniji aphan, lamthe asai pen kelong angthek kapachiniji aphan, lapen Karjong ok-vi along vanglo lapen lamthe pen monit aphan ingsai si Alangli tirijung chepaklanglo pu kapachiniji aphan. Alangli arpum le athak kacheklang ke monit jongjong arpum araje lapen bang ateng monit a’ot pusitame, lake Alangli lamthe kepalong angthek si monit atumphan Alangli ke tirijung pen plengset pu paklangpo, Alangli ke Arnam Amethang amatlo pu, lapen Alangli lamthe doan ta Arnam Amethang kachepaklang ason saidelo pu. Bangso ajok pensi doan monit akhei aphan Alangli ke Arnam Amethang amatlo pu paklanglo, Alangli ke Arnam Amethang amat si ok-vi nangkacheman pu, Alangliphan ke majok ta ning padononedet nangji pu, lapen majok ta Alangli lamthe pen akangsai aphan litplot un’e pu, lapen ajat akangting ajakong ta Alangli tirijung aphan binthip un’e pu. Monit Alanglilong chehodai atheke Alangli henlo ok-vi kachemandet Alamthe, atheke Alangli tirijung ajoine, lapen Alangli lamthe pen kangsai ajoine. Alangli nangcheparje abang kevan asai henlo Alanglilong kedo atirijung. Alangli ok-vi kacheman atheke ok-vi along ta tirijung do’un pu ajoine, lapen Alangli ke sai doan keklem’un a’ot pensi monit akhei angbong sai keklem, lapuson abidi pen monit atum aphan ta paklangdak lapen paphomedet ajat. Bangso asai ke Arnam Akarjong, kadokave atirijung kedopet abang keklemtang asai penta ansose ahokpet muchet, lapen bangso angthek tame klardak. Laso atheke monit nangcheparje a’Arnam a’ok-vi ke lam ningjethek lapen kadokave keklem’un a’ot pen klemthek. Alangli athak kacheklangsak arpum along ke tirijung ave, lapen majok amonit ta patebokdam’un, bonta Alangli tiri along ke tirijung dovek, bonta Alangli tirijung ke mojok ta checharche. Alangli ningje lapen klem lote, monit atum ke Alangli tirijung kedo nepdun thekthe; lasi Alangliphan keklem kejoi mate ki’un a’ot pensi sai kepadeng ponlo. Lahei doan keklemvoi asai doan ta angthek vanthek. Alanglilong tirijong do pu majok amonit ta matha abang pusitame, mate Alangliphan ke khamkhekhedet nangji pule theklongle tame, mate Alangli ningkithi theklongle tame, Alangli lamthe pen ajok Alangli kachedipchek atirijung pen, Alangli kachedipchek ningkithi pen, lapen Alangli kaningjedak alamthe pen kemangdam angthek ke chepalong. Kaprek alamthe pen pudamlote, Alangli se arno pen, Alangli lam along akasedeng pen, monit ke amutpi pensi kroidundetpo. Lapuson pensi, monit atum monit nangcheparje a’Arnam alamthe along chehodaipo, lale ketheklong ke atirijung ave, sonsi Arnam monit aphan kepajokji pu akemang paplengpo. Lake Alangli monit nangcheparje along ason kaprek ardi abanglo: ansose ahokpet pen kaningje lapen Alangli lamthe along ahokpet ason aphan monit atum along kepaphodam, atheke monit atum Arnam alamthe ajakong kepatheklongji aphan. Lasi, lahei asai monit nangcheparje abidi penle keklem kali asonte, lake ing’arveng angthek anta longdamde lapen pap keklem atum aphan ingthimlim pen pajok thekthedetji. Jongsi Arnam le ok-vi cheplangple asonte, Alangli ke monit atum ketheklongle lapen kepapho along aKarjong si doverpo. Monit ke ok-vi kedo kasorjon pen keman abang pinak apotsi, alang lapen Arnam ke hini kacheprekdak apirthe along kedo atum lapen prekjam a’ot kedo atum. Arnam aKarjong ke monit, lale ok-vi pen keman abang, pen chemerap un’e, lapen latum angbong kapachetebokji atovar ta ave, monit ke karjong kachemanji ajakong ave puke chethanthedet tamelo. Lapuson tangdet si, Arnam aKarjong si kasorjon pen keman ason cheplang nangkokpo Alangli sai binong kacheklemji aphan. Arnam ke kangtuinei adim ta arludamthek lapen lasonthot si Alangli mena aphan kasorjon abang an chepabidunthek, monit akhei angbong sai keklem lapen alangtum anglun kedodun, bonta monit ke kangtuinei adim an karlu lapen karjong kacheman thekthe, lapen ansose si kethekthelang kangdainei adim an kisun puke. Lahenlo si Arnam Alangli sai kachedengji aphan pura ok-vi kacheplang nangkoklo. Hala isivet alo achet pensi, kechengsi aphan monit nangcheparje ahut, monit nangcheparje a’Arnam anvet si Alangli thengparpan along pran kachipi pen monit aphan pap pen pajok unchot, bonsitame Arnam aKarjong along monit pap apharman kachehodai pura thengparpan along pran kachepiji puke atovar amat si avedetji. Monit apap kachehodai apharman Arnam ok-vi cheplangphit tame un, bonta monit ke Arnam alangphan kaselampi pap kachehodai keponji aphan siningrengme arluphit thekthe. Lapuson tangdet apotsi, ki’unji ke Arnam aphan si siningrengme pen pirthe angbong ephong-phongnibak kedam lapen kepavangthu anchotlo, monit aphan le alang kejok kapache’endunji aphan siningrengme keparlu kalilo, athe ke monit ke keklotang lapen, anparta, monit ke thangbakbe penke siningrengme arlu thekthe, ansose si ki’un’elang pap kachehodai kachepalong puke. Lahenlo si, lake Jisu amat si monit jongjong pen kapapleng un’e asai kepatangji aphan monit akhei anglum vangnangkoklo. Arnam ok-vi kacheplang aphongtin ta, lake akenangsot chenam ajoine pen. Jongsi isibak angdeng le Arnam aKarjong pen klemphit undet pu asonte, Alangli kasorjon pen keman an katherakmeme anke chehodaidedetji apot.

Bangso kijutsi angdeng along, angthek doan ta lamthe asai pensi kepalong. Alamthe pen ajok si, monit atum ongdung kachepatujoi lapen kedamtang akai ahut Arnam keklemtang asai doan kachinilong; alamthe pensi, monit ke Karjong Kangthir arideng katheang longlo; alamthe pen ajok si, kedamtang akai along kapaklangkle kachepatujoi ason doan ta monit atum chinilonglo, lapenpen kethanmek atum lapen kacharlidun atum kedamtang arni asai, lapen alangtum sai keklem atiri; alamthe pen ajoksi, monit atum Arnam Amethang akun aphan chini longlo, lapenpen monit atum along kakhinde lapen kekhamkhe a’ot, lapen alang amethang atiri chichinilo. Lahei asai akengkam lapen hala kaningje alamthe kedoan pensi, Karjong asai monit atum chinilonglo, monit nangcheparje a’Arnam keklem asai, lapen anparta, Alangli amutpi akun. Ningkan-suri-throk arjon Arnam alang kechari aphuthak nang kachinidun ta alamthe pen ajoksi nang kelongdunlo. Kedamtang apor ahut nang kamathathap lapen nang halahei aphan kesaivet asai kepapleng undet aphuthak nangle kachichinidam ta alamthe pen ajok kali puhe? Nonjong kedamtang angdeng along, Jisu angthek kipi lapen jakong manghumeme asai klemlo, bonta non angdeng along ke angthek kipi lapen jakong manghumeme asai avelo. Kopi apot si Arnam angthek kipi lapen jakong manghumeme asai paklangdakdedet pu nang kachinidam ta alamthe pen ajok kelongdun kali puhe? Lahenlo si, bangso angdeng along kaningje alam ke kedamtang akai ahut kacharlidun atum lapen kethanmek atum keklem tekang asai aphan aphi bilaplo. Hala kethanmek atum kethan tekangmek alam doan ta bangso angthek chepalong thekthe. Kethanmek atum ke sanglang ason si kethanmek anchot, alangtum ke mohut kevangji arni kopi manji pusi kethanchot, bonta Arnam halaso apor ahut keklem kangtung asai le kethan kali. Mate alangtum monit akhei aphan alangtum akai along keja ponji pule kaningje ta kali, mate alangtum aphan kachepatujoi asonle kapaklang ta kali, ansose si kijumlang chethe kipiji puke. Bangso angdeng along kaningje alam pen, ladak kethanmek lapen ahokpet ta do, bonta lahei alamthe jasemet keklem asai ke monit aphan chethe kipi. Non dobom akai alamthe ke kedamtang arni kethanmek atum alam ason kali. Lake monit akai achethe aphan sai keklempi angdeng, monit akun kelar aphan, lapen kethanmek alam kiriji aphan kalidet. Kechengsi angdeng ke Jehovah asailo: Alangli sai ke monit atum pirthe along Arnam aphan kardomji atovar kaselam. Hala ke pirthe along keklemji asai aphan mahang kepathekji adim kiri kapangcheng asailo. Halaso apor ahut, Jehovah hala Israel adet aso aphan Sabbath arni kirim nangji pu thanlo, pi-po aphan man chipi nangji pu thanlo, lapen anut kaprek pen monsam pensi donangji pu thanlo. Laso atheke halaso akai amonit atum ke monit kopi-koson pensi keman pu chinine, mate alangtum pirthe along kosonsi donangji puta chinine. Kechengsi angdeng along ke Alangliphan monit atumphan kai along kejapon ke akenangsot mandetlo. Jehovah alangtum aphan kethan alam doan ta halaso aphrang ke monit akhei atum chinine mate alangtum along avedet. Halaso apor ahut, Arnam ongdung kethanmek atum aphan pathe si kevangji alam paningjemeklo, lapen alangtum bangso asai Jehovah akeja pensi klemlo. Lake Arnam asai along isi achetso anvet. Kechengsi angdeng along, Arnam ok-vi chemanme, lapen lapen lasi Alangli akhei doan lapen adet doan aphan kethanmek atum akerap pen than pachinilo. Jisu Alangli apor along sai kacheklem ahut, Alangli non kedobom arni anke ningjeje. Bangso kijut arni angdeng alamthe asai lake komantune ta kedamtang aningkan lapen akai along ke klemklepinlang. Isaiah, Daniel lapen John le jongsi ongdung kethanmek alam ningjelo pusitame, alangtum kethanmek ason ke non kaningje alamthe pen amutpi si cheprekdak. Alangtum kaningje ke kethanmek anchot, bonta non kaningje alam ke kalidet. Jongsi Ne doan kaningje ason ta kethanmek le pinchonglap pulote, nangtum nangchinidun thekjima? Pulonang Ne kaningje jongsi Ne damjui aphi alam pinak, koson si tangte nangtum kachini unpo? Alamthe asai ke Jisu apor ahut mate Aron Akai ahut ta klemklepinlang. Chenam ta ajahak atum ningje tahai, “Jehovah ta Alangli sai apor ahut lamthe ningjema? Jisu tangte, keso kapame, lapen angthek kapeklang lapen jakong kethekpik asai keklem pen anpar, Alangli sai klembom apor ahut lamthe ningjeje puhe?” Lamthe kopusonsi kaningje laso along kacheprek dopik. Jehovah kaningje alamthe heihui along amutpi alam kopilo? Alangli ke monit atumphan pirthe along kosonsi akai kachejapon nangjima pusi kethan-pare, lake kai karjong aphuthak puke thangnat ledamde. Kopi apot si, Jehovah lam kaningje ahut, hala ke kedoan adim amonit aphan ta kethan-pare aphan pu kipu? “Than-pare” pu alamthe alamjor ke thandak lapen pinkhatphit. Alangli ke monit aphan chethe pipe; alar ke, Alangli ke monit aphan ari otponlo lapen monit atumphan Alangliphan kosonsi man kipi nangjima pusi kethan, tomo ahin abang dam’o’epin pen. Jehovah Israel along keklem asai ke monit pen kachephoji mate monit aphan kapakengji mate kangsai kipi lapen kangsirji pu kali, lake alangphan keja aphan. Jehovah si Moses aphan alang rat pachingrum pen ingnam ajo manna paridamtoilo. Adapvang ta arni klangkle aphrang, alangtum ke manna pangrumdam nangpo, alangtum halaso arni chodorchit aphan anvetji. Manna ke puthot arni an binodak, athe lake bilote thuvokji. Alangli monit atumphan than-parere mate alangtum a’ot pacheklangkle, mate alangtum abidi lapen kamatha ason ta Alangli paklangkle. Alangli ke monit aphan kirlale bonta alar ke alangtum aphan kosonsi kai along kedo nangji ahin kejapon. Halaso apor ahut amonit atum ke osomar ateng, thangta chinine lapen isi-hini amena pen amat kethek ason ansi klem unchot, lapen lasi Jehovah ke keongdung amonit kejaponji aphan si aron kaselam anchot.

Birta keme kapachethangji aphan pura, atheke ahokpet aning pen kiri atum doan pini arni keklem asai aphuthak pachinilongnang lapen ingthimlim pen pakroilonang, nang arlo atomo along klardak pen kachini adim ledam nangji, ajorpi along, lapen angdengtin along keklem asai akenangsot alam. Pinchongdetnoi atheke, nang kachingrum ahut alamthe nang’arjudun pen, anut kaprek atum ta Jehovah asai, Jisu keklem asai lapen, anparta, pini arni Arnam asai kedoan, lapenpen lahei sai angdeng kethom angbong kachepho lapen kacheprek kedoan pachini lonang. Pinchongdetnoi atheke, alangtum arju tangdet aphi, anut kaprek atum ta chinipo la ingdeng kethom asai ke methang angbong kachehili ave, bonta la kedoan ta inutvet aKarjong asailo pu. Alanglitum prekjam akai along si keklem, Alanglitum kedeng asai along ason-amung prekjam, lapen Alanglitum kaningje alamthe prekjam, sitame Alanglitum sai keklem aron ke isivetlo lapen cheprekprelo. Lahei kelangdam kangtuinai ason henlo Arnam kapinkhat ateng keklem amonit atum kachinivek nangji.