Batai Hini Aphong Monit Nangkachepharlo pen Bangso Kachepharlopon Akenangsot Papleng Pemelo

Aphongtin ahut Arnam asai angdeng keklempon along ta amena saiklem kenangsot ardi dolo. Kedamtang ahut, Jisu kevang ke, Alangli pinsolo, lapen non aphong Arnam kevangji ke, Alangli arlosolo. Laso pen, nang theklongji pima Arnam ke pinso lapen arloso tame Alangli sai aphan ajoine si pinchong rappetlo, lapen Alangli ateng ke pinso-arloso akethak kacheprek avelo. Alangli Karjong kevang ahut, Alangli ke ajat aok tame Alangli ninghang ateng pen enmelo, lapen pima ok ke Alangliphan pacheklang unlo; pinso tame mate arloso tame, Alangli ok nangkachepharlo dotik anke lake Arnam pu pacheklang unlo. Jongsi Jisu le Alangli kevang ahut arloso ason nangcheklangrong pu asonte, akaprek alam pen ke, jongsi kibihek arlososo pinak, lapen pinsoso kalidet, Karjong Kangthir lut’etpo, halaso asai angdeng ke halaso ahut amat si papleng’etpo. Jongsi lason atenglo pulote, nonjong asai angdeng pinso si adular paplengponpo, bonta asai ke laso ateng pen si angton paplengponpo. Hini angdeng along asai keklem tame kenangsot ardi isinatlo; phongni asai angdeng tame kiruithu kalilo, mate lahinhin angbong kachedaikoi pu tame kalilo. Halaso apor ahut, Jisu le, Alangli sai keklem along, Sopo inutpet pusi hoklo, lapen “Sopo” puke pinso aphan si jongdamlo. Kopi apot si Sopo inutpet pu non kedobom angdeng along ke pupedetlo? Athema sai keklem akenangji doan ta pima hala Jisu pen pinso-arloso angthek kachelarnang dokoklo. Arnam ateng pen ke pinso-arloso angbong kethak kacheprek avelo. Alangli sai Alangli keklem ke Alangli aninghang atenglo, lapen Alangli asai keklem along Alangli ke thangnat akebeng-kephan phophelo, bonta chenam si jokvanlo. Tebonta angdengtin asai along tame la amena saiklem kenangsot ardi dolo. Arnam batai hini ok nangchemanlo, lapen lake pima Alangli ok nangkachepharlo kijutsi arni ahut henlo kapadusi aphonglo pu methang cheklangdaklo. Alangli sai amo kedoan kapachinitheiji si Alangli kevanglo. Jongsi laso angdeng along Alangli ok nangchemanmedet atheke salajong si monit aphan kapachiniji pu ra sai klemkle pulote, pima Arnam ke pinso anchotlo arloso kali puan monit akamathadam si pathirthippo. Laso aphrang, kadokave monit akhei tame kroilo pima Arnam ke pinso anchotpo lapen pima arloso aphan ke Arnam pu hok un’elo, athe kadokave monit akhei tame pinsomar atum henlo soarlo atum aphan kachepahemphupon pusi hoklo. Latum kroilo pima madu soarlo tame kachepahemphuji puke un’elo, pinsomar atum anchotlo. Kopima akeongpi ke, latum lason si pulo pima pinso ke arlso aphulo lapen pima arloso ke pinso alam arjuvek nangpo lapen alangphan palitjet un’elo. Kedamtang apor along, lake pudamlo pima monit ke arloso aphulo, lake Adam lapen Eve aphan si jongdamlo, komatma phurui si latum aphan chomosoidetlo – Jehovah kecheng ahut latum aphan kapinchongpon ke pinso lapen arloso pu kalilo. Ahoklo tema, soarlo ke alang apenan alam arjuvek nangji lapen chinghon nangji, lapen apenan abang tame alang hemtun isi aphan kapangkrang lapen kelana charlivek nangji. Lahei anke Jehovah pen kapathikpontang aron lapen aketoi ahukum saidelo pima monit akhei atum pirthe athak alangtum akai dingpi keklemponvek nangpo. Jehovah arloso aphan pulo, “Sita nang penan aphan si nangning do’eji, lapen la nangphuthak pangripo.” Alangli lason kaningjedet ke pima monit akhei an (pima lake, pinso lapen arloso atum) akai dingpi Jehovah kecharipon aber choboche mesenji aphanlo, lapen laso ajok monit akhei atum akai eson kapathikvet aron angbong pen alangtum angtan keklokledetji pu aphanlo. Laso apot si, Jehovah kemesen aron koson si pinso lapen arloso tame keklempon nangjima pinchonglo, lake pirthe athak kereng’et kedoan pinchongtang api aphan anchotlo puvoiphit tame, lapen Arnam ok kacheparje aphan ke thangnat kacherap avelo. Koson si Arnam le Alangli kapinchongtang api atum asonthotpo? Alangli lamthe anke Alangli kapinchong amonit akhei atum aphan ansi toichotlo; lake pima Alangli kaselamtang pinso lapen arloso aphan aron ateng pen monit akhei atum akai choboche kemesenji aphanlo. Kecheng ahut along, Jehovah le monit akhei aphan kapinchong ahut, Alangli pasonni ajat amonit abang pinchonglo, pinso lapen arloso thaklo; lapen lasi Alangli ok kachepharlotang along pinso lapen arloso angbong thakvet dolo. Alangli sai ke Alangli Adam lapen Eve aphan kaningjetang alamthe ateng pen le Alangli lamrai ke’en kalilo. La batai phongni Alangli ok nangkacheman ke Alangli monit akhei aphan kapinchong kecheng apor ahut Alangli kamathadam atengthot pen si angton nangcheplanglo; lake pima, Alangli batai hini aphong ok nangkachepharlo asai papleng pemelo atheke latum aphan kaphangnonedetlang aphrang apinso lapen arloso atum ateng penlo. Jongsi monit akhei le Adam lapen Eve aphan Jehovah kaningje alamthe cheponlo, komatma phirui kachomosoidet atum, lapen ke Arnam ok kachepharlo asai along lahei jokdunlo tangte, Jisu tame Alangli piso aphan Alangli keklem nangji ateng pen chinghonpo kalima? Lapen lasonlo pulote, Alangli nonpu ta Alangli sai kapaplengpon unjilangma? Jongsi Arnam ok kachepharlo abang arloso pule chokche pulote, Arnam arloso kaselampon ke kethenei akechokchedet asai asonlo pu kalima? Jongsi monit atum nonputa kroilo pima Arnam si arloso ason ok nangchepharlo abang puke chokchelo pulote, Jisu sitame komatma kachepangriredet abang lapen ke laso apot si Alangli piso aphan chinghon thekthedetlo, nonjong kachepharlo ateng ke akechokchepiklo pu kalima? Jehovah le Eve aphan kaningjepon alamthe nang ahokpet Arnam ok nangchepharlo nonjong arni along kalakhaji aphan entangdetlo apot, tangte nang ke Jehovah le Adam aphan kipu alamthe enponvek si Hemphu Jisu komatma Kanghon-Kangjinso Akai ahut ok kacheman abang aphan ingsai’i nangpo. Lahei tangte isinat lapen chingbarpet kalilangma? Nang ke komatma phurui kachomosoidet apinso atengthot pen si Hemphu Jisu aphan kipupon ke’en tangdetlo apot, tangte nang ke pini arni ok nangchepharlo komatma phurui kachomosoitang arloso atengthot pen ahok kangsaiji nangnelo tahai. Lake cheton damdevekpo! Arnam aphan lason ateng pen kipundam angthek ke pima nang kamathadam kadure apotlo. Jehovah le batai hini aphong ok nangcheman ahut, Alangli ok pinso ma arloso puke hala pinso lapen arloso komatma phurui kachomosoitang atum pen si pangbardamlo; lake komatma phurui kachomosoitang apinso lapen arloso ateng pen asonthot si pima Alangli batai hini aphong ok nangcheman pulo. Tangte Jisu pinso ason puke pima hala komatma phurui kachomosoidet Adam pen isinatlo pusi nang mathadam loma. Latum banghini angbong angton pen amat si chephophe, latum ke pinsolo sitame kacheprekjam abang arpum saidelo. Chenam ta Jisu pinso ason puke Alangli henlo soarlo kedoan aphulo bonta kadokave pinsomar atum aphan kalilo pule kejongdam kalima? Tangte Alangli ke kadokave Jihudi akhei (pinso lapen arloso kedoan tame) aRecho kalima? Alangli ke Arnam Amethanglo, soarlo aphu anchot kalilo bonta pinsomar aphu antamelo. Alangli ke kadokave api doan aHemphu lo lapen kadokave api doan aphulo. Koson si nang Jisu pinso aphan soarlo aphu angtheklo pu kejongdam unpo? Tangte lake nongno kejothap kalilangma? Jisu ke pinsolo komatma kahenotangtedet abang. Alangli ke Arnam; Alangli henlo Khristo; Alangli henlo Hemphu. Koson si Alangli le Adam ason apinso komatma kahenotang abang kemanpo? Jisu ke Arnam aKarjong akangthirnei kachepindeng aok abanglo. Koson si nang ningjemeji Alangli ke Arnam komatma Adam ason apinso atheng si cheparidenglo puke? Laso alam along, tangte kadokave Arnam asai anke kechokchedet saidelo kalima? Tangte Jehovah ke komatma phurui kachomosoidet apinso Adam atheng aJisu along si jalangdun rappet unlo puma? Non dobom apor ahut ok nangchepharlo ke Arnam ok nangchepharlo abang komatma Jisu ason pen akecheprek bonta Alanglison atheng asai akaprek kejongdamthu kalima? Nang nonpu ta ningjehai langma pima Arnam ok chepharlo abang ke arloso kalilo, athema soarlo henlo aphrangsi phurui kachomosoidet abanglo? Nang nonpu ta ningjehai langma pima soarlo ke kangthitthenei abanglo lapen monit akhei aphan kaphangnodet atirilo, athe Arnam ke arloso asonthot aok ke chenam si nangcheman un’elo? Nang chikithip pen ningjehai langma pima “soarlo anke kaiketa pinso alam arju nangji lapen Arnam ason cheparjanjelo mate cheklangdak un’elo”? Nang kedamtang along chinidamdedetlo, bonta nang nonke Arnam alamthe aphan nongno kejothap si dambomjima, jasemetpet Arnam ok nangchepharlotang aphan? Jongsi nangphan lake klardakdelang pulote, nang de ching’omhet si kemeneilo, kalite nang akiludet lapen kamathakrang antame pangdaktheipo lapen nang kajokluvok anke pachininetheipo. Nang mathama pima nang angton alam chinipetlo. Ne nangphan nangpulang pima kadokave nang ketheklong lapen kachomatlongtang anke Ne kisik-kedang akemangdam aphuthak asuri an dolang nang kachinidunji aphan. Lasi kopi apot tangte nang ane chepatheoi le kedolo? Laso masspsonat akethek lapen masapsonat akachinidam nanglong kedo pen anke Jisu ke’enpon aportin along Alangli sai keklem aphan chophodundepinlang! Kopuan akethektang si nanglong chenam ta kedolo? Kopilo nang ketheklong lapen kadokave pima nang kai dingpi along nang karjulongtang lapen kopima nang kahemandamtang anke Ne apor-ahuttin along keklempon asai pen aber muchetlang! Nangphan akemenei ke thangbakbe rekroktokte ra kaheno kiriredet henlo. Nang nangninghang aling cheparoka tame, bonta nang ke miso pen anta akibimulang api anpar ke thangnat ta kalidet! Kadokave pima nang pok arlo kachethap anke kopima hala miso apok pen anpar jummulang! Mathadetri, athema nang ajahak chomatlonglo lapen aban muchotlo pu ajoine pen ke, pima lake nangphan cheparjan ahir kachipi lapen kethe-kethe alam kaningjeji nangtoitelo. Tangte nang kachomatlong lapen nang akesar muchot apot si Ne kaningjepon ateng ahormu kalilangma? Nang kroima pima lahei anke nang mena kachepeduk lapen kekhansip apot adular kelonglo? Pini arni, nang theklonglo pima Ne ok nangchemanlo, lapen laso along ateng pen nanglong keongdung athepi dokoklo, lapen ladak pen kamathathap jutjedetlo. Jongsi Ne ok nangchepharlo aphan kali, jongsi nang le bang pen anpar kereset abat cheparidenglo pu tame, nanglong ke penang an athepi dopo; lapen lake lahei along pen si pima nang kamathathapo kithurlo kalima? Jongsi Jisu le pima kechengsi abatai ok nangchemanme asonte, nang ok kachepharlo aphuthak chinidunji puhe? Tangte lake athema kechengsi ok nangchepharlo ajoine si nangphan kachini nangpilo laso ajok nang adunthu aphong ok nangchepharlo aphuthak kangsaiji aman longlo kalima? Kopi apot, athikpet pen aphiphi kidun abang adular, nang ke kacharli nangji le pekronglo? Komentu si nang laso aroi along kilutlo lapen Arnam ok chepharlo athengno kevanglo, Alangli ke nangphan Alangli phuthak ritarlipnon pu nangpekma? Nang mena ahemtun aphurkimo le nang ke ritarlip klemme, bonta jongsi nang le Arnam “ahemtun aphurkimo” kiritarlipji bor’ironglo tangte, pini arni a’Arnam nangphan lason kacharliji aphan nangpekponji puhe? Nang mek avedetma? Nang mena aphuthak kapinrem nang kachevanlo kalima?

Jongsi Jisu asai keklem anchot si patanglo, lapen kijut arni ahut keklem asai angdeng ke patangtedetlo pulote, monit ke kai apar kai si pima Jisu anutpet henlo Arnam aSopo inutpet abanglo pu akamatha pen si dothippo, pima lake, Arnam ke asopo inutvetlo, lapen pima komatma laso aphi akaprek amen pen kevang abang aling ke Arnam aSopo pu kalidetpo, Arnam Amethang puke dure ongchotlo. Monit ke akamatha do pima madunon komatma pap athok-ajir kipipon mate komatma Arnam adular si jakong ke’enpon lapen kadokave monit akhei aphan pap pen pajoklo pulo, lahenlo Arnam aSopo inutpetlo. Ajahak atum ke komatma kroilo pima Inut abang kevang pinso dotik anke, Alangliphan ke Arnam aSopo inutpet lapen Arnam apharman bangphulo pusi hokdetpo tahailo. Lasonsi komatma kaningje atum dolo pima Jisu ke Jehovah aSopo abanglo, Alangli inutpet aSopo. Tangte lahei kamathadam anke abatpik kalilangma? Jongsi laso asai angdeng ke kepadusi akai along klemkledet te, Arnam ahin angton monit akhei si kangting aharchi arum nangpangrompontheipo. Jongsi lason henlo alam ke pulote, pinso amethang aphan soarlo pen ingtuimulang pu chemathapo, lapen soarlo ke alangtum angphun chingthur amat si thekthelo, lapen anke inutnat soarlo tame jokjedetpo. Monit atum kaiketa mathalo pima Arnam ke pinso, lapen anpartame pima Alangli ke kaiketa soarlo aphan aningdokdelo lapen labangpi aphan kejok hodaidelo pulo. Jongsi lason henlo alam ke, pima kadokave asoarlo atum komatma Jehovah si kapinchongtang lapen komatma kaphangnotang anke kejok kelongji avarsai amat si avelo pu ahokdetpo kalima? Tangte lake Jehovah aphan soarlo kapinchong pima atheke Eve aphan kapinchong apot kejongdam thangnat ta ale avedet asonpo kalima? Lapen kai apr kai aphan si soarlo ke virdetpo kalima? Laso athe si, kijut arni ahut asai angdeng ke kadokave angton monit akhei aphan kapajok rappetji si klemponpo, soarlo aphan anchot kalilo. Jongsi madunon pima arloso ason si Arnam ok nangchepharlo nangji pu mathalo, lake soarlo aphan kepajokji aphan ajoine chotlo pulote, pima bangso abang ke chenam si kiluneipo!

Pini arni asai ke Kanghon-Kangjinso Akai ahut asai aphan aphrang an ingdoiponthulo; lake athe, angton ningkan suri throk kisik-kedang akemangpon aber asai si aphrang keponthulo. Kanghon-Kangjinso Akai ke kijutlo puvoiphit tame, Arnam asai along kachingthur ke dolo. Kopi apot si Ne puthot ningjethuloma pulote laso angdeng asai ke Kanghon-Kangjinso Akai lapen Aron Akai athak le kikim pulo? Athema laso arni asai keklem ke Kanghon-Kangjinso Akai along keklemtang asai angthunlo, lapen ke hala Aron Akai along pima keklemtang doan abat keponthulo. La sonthom angdeng tame chiphet pen si lahinhin cherappetlo, isi pen isi angthun chepethet pen ari kihing kokraphetlo. Kopi apot si Ne lason pulo pima laso angdeng asai ke pima Jisu keklemtang athak le kikimlo? Langdam lonang pima laso angdeng ke Jisu keklemtang asai athak le kikimpon kalidetlo, tangte laso angdeng along adunthu thengparpan athak pran kachipi padothu nangkokpo, lapen kedamtang angdeng along pap kadiya asai tame puthot klem pachiruithu nangkokpo. Lake ajor kavenei ason si chemanpo. Lapen lasi lake pima asai kepleng pamelo pu kalidetlo, bonta akai ke pima aphrang si damthulo lapen asai tame angdeng kedamtang ahut pen abat ingtui muchotlo. Lake pudammelo pima laso angdeng asai ke Aron Akai anujokpi athak si kimdunlo lapen Jisu asai kithiklong arlong athak’lo. Arnam asai ke angdeng pen angdeng si kimponlo, lapen laso angdeng ke akimi kachechengthu lapu kalilo. La pasonthom angdeng along asai jalang rappet pen anchot si ningkan suri throk kisik-kedang kemang hokdampo tahai. Laso angdeng asai ke Kanghon-Kangjinso Akai ahut asai anujokpi athak si pachunponlo. Jongsi lahei hini angdeng along asai anke kachepho ave, tangte kopi apot si laso angdeng along thengparpan athak pran kachipi dothuvoivedetlo? Kopi apot si Ne monit apap doan chechakchedetlo, bonta alar ke kangsaiji lapen monit aphan ado kipiphitji si vanglo? Jongsi Ne sai ke kangsai lapen monit aphan ado kipi henlo lapen Ne kevang non ke Karjong Kangthir akamamathadam ateng pen thengparpan athak pran kachipi avedet pulote, Ne tame monit aphan kangsai lapen ado kipiji aphan apun-achak kalidetpo. Lake klardaklo athema Ne ke inut Jisu pen si pima Ne monit aphan kangsaiji lapen ado kipiji kevangphit abanglo. Laso angdeng ahut asai ke angton tame kedamtang angdeng along asai athak si kimponthulo. Laso ajok si monit aphan angdeng pen angdeng kepajokji aphan kevanji ke lason asai pen anchotlo. Jisu lapen Ne ke isinat aKarjong pen si vanglo. Netum le Netum aok angbong kachepho avedet puvoiphit tame; Netum aKarjong ke isinatlo; kopima Netum keklem athepi lapen pima Netum keklem asai anke cheprekjamlo puvoiphit tame, Netum akedoivet anke isinatlo; Netum aok ke arpum cheprekdaklo, bonta lake akai kachelar pen ajoklo lapen Netum keklem asai akenangji tame kacheprek apotlo; Netum birta keme pachetak tame chingbarbelo, lasi Netum non kevan asai lapen akun doan tame Netum monit aphan kepakang anta kacheprek saidelo. Laso apot si kopima laso arni monit ketheklong lapen kachinidam anke kedamtang ateng kalidetlo, atheke pima akai kachelar pen ajoklo. La kadokave athe si pima Latum angbong pinso-arloso abang arpum lapen Alangtum aok abang antame kachepreklo, lapen pima Latum anke elongvet ahemtun pen le mahangthek rappet kalilo, ephongvet akai apor ahut ke kali ongchotlo, Alangtum aKarjong anke ajatnon isinatlo. La kadokave si pima Alangtum aok anke phisar-phusar atum aok mate avi chephophelo tame, lake patepek un’elo pima Latum anke keprekjam apor akai along batai phongni Arnam ok nangkachepharlo atumlo. Pima Latum anke Arnam ok nangchepharlo atumlo puke kroikre un’e ahok alamlo, Latum le phisar-phusar avi angthun chingbarbelo lapen kedobom monit alam (inut ke pinso komatma Jihudi alam si kaningje lapen kaprek abang ke arloso komatma Chinese alam si kaningje) pen isinat kalidetlo puvoiphit tamelo. Lake lahei athe apot si pima Latum ke cheprekjam adet along si dolo tame pima anuttin aphan adeng kipitang ateng pen asai cheklemlo. Latum ke aKarjong isinatlo, chingbarpet akedoivet si cheparidenglo pu alam pima ahoklo sitame, Alangtum athak kacheklang aok abang ke thangnat ta kachinglit latum angbong avedetlo. Kadokave Latum ke isinat monit atheng si enrappetlo, bonta Alangtum athak kacheklang aok abang lapen Alangtum mahang kethek ahut akepho alam ateng langdamlo pulote, Latum angbong chingbarbelo. Lahei ahormu ke Alangtum kacheparidangrep asai along mate pima Latum aphan monit akachinidam along thangnat ta chophodundelo, athe, kepajutsi akangchapdam along, Latum anke isinat aKarjong lo lapen Latum aphan kethakdakji madu ta un’elo. Latum le avi pen ke chephosap atum kalidet puvoiphit tame, Alangtum angton abang arpum anke Alangtum aKarjong along si chepahemphulo, atheke Latum aphan kaprekjam apor akai ahut prekjam asai paklemtoilo, lapen Alangtum aok ke keprekjam phisar-phusar avi angthunlo. Jehovah aKarjong ke Jisu aKarjong apo kalilo lapen Jisu aKarjong ke Jehovah aKarjong asopo kalilo: Latum ke inutpetlo lapen isinat aKarjong lo. Lasonthot si, pini arni Arnam ok nangchepharlo abang lapen Jisu angbong ke avi pen kachepho avelo, bonta Latum ke inutpetlo, lake athema Alangtum aKarjong anke isinatlo. Arnam ke kangjinso lapen kanghon ningme plengset asai klem unlo, lason thakthak si pima akechoklim akangsai lapen monit aphan ado kipi tame unlo, lapen pima monit aphuthak hirjuno kipi kepaklodetji ta unlo; lapen kepajut along ke, Alangli pirthe aphan kapavirklungji lapen kaheno doan aphan kepasungdetji asai ta klem unlo. Tangte Alangli la kadokave Amethang amat si keklem kalima? Tangte lake Arnam ajakong theparpik apot kalima? Alangli ke monit aphan aron kapathikdet lapen alangphan hokum kipidet sonni tame unlo, lapen Alangli ke aphrang ahut Israel aso atum aphan pirthe athak alangtum akai kapabocheji aphan chejapon unlo, lapen ke latum aphan kardomhem lapen dovan kikim along paredunlo, Alangli kachepahemphu aber si kadokave Israel aso aphan an chibilo. Athema Alangli kepangripon apot, Alangli pirthe athak renglo Israel amonit atum penpen atheke ningkan suri hini apharman. Israel aso atum Alangli birudhe kithurji haihelo; kadokave ta Jehovah aphan si archolo lapen Alangli kipi ahukum ateng klemponlo. Lason henlo Alangli kepangripon lapen Alangli ajakong theparpik pen ajok pima keklempon asai. Anke, Kanghon-Kangjinso Akai ahut, Jisu ke pap pen keklodet amonit akhei angton aphan kadiyaji si vanglo (Israel aso aphan anchot kalilo). Alangli kangjinso lapen ningme akanghon plengset monit aphan chepaklanglo. Jisu aphan pima Kanghon-Kangjinso Akai along monit ketheklong ke ningme akanghon keplengset lapen kaiketa monit aphan kachinghonpik dolo, athe Alangli ke monit akhei aphan pap pen kepajokji si vanglo. Alangli ke monit atum aphan alangtum apap apot diya unlo atheke Alangli thengparpan athak pran kachipi ahut anke monit akhei aphan pap pen pajokvanlo. Laso apor ahut, Arnam monit angno kangjinso lapen ningme akanghon plengset pen si cheklanglo; pima lake, Alangli monit apharman pap athok-ajir chemanlo lapen ke monit apap ajoine si thengparpan athak thilo, laso ajok latum kai apar kai tame kadiya longji meme pulo. Alanglilong kadiya, kangjinso, ningkiding, lapen kanghon plengsetlo. Lapen halahei kadokave komatma Jisu aphiphi Kanghon-Kangjinso Akai along kidun atum anke lasonthot si ningkiding lapen kadokave ahormu aphan anta kanghonthek si nangpo. Latum anke arji kiding kachechak’un, lapen areng sodet, hirjuno pidet, mate arlong pen vardet tame adular kachedandundedet si nangpo. Bonta kepadusi angdeng along lake lasonthot kalidetpo. Jisu lapen Jehovah asai ke angton pen isinat kali Latum le isinat aKarjong lo puvoiphit tame. Jehovah asai ke akai kepajutsi vanvelo, bonta kai aphan chejadunlo, pirthe athak monit akhei aphan chethe along pajirdunlo, lapen pini arni asai ke halahei Gentile adet kedoan komatma kahenopik atum aphan kachepahemphupon henlo, lapen China along Arnam kangvaitang amonit atum aphan kachejapon anchot kali, bonta angton somindar adang lapen kadokave monit akhei doan aphan penpenlo. Lake nangphan kapatheklong pima laso asai ke China along ansi klemponchot tahai pulo, bonta ahokpet lake angtan adet antame ingdangbom’et tanglo. Kopi apot si pima China pen angtan amonit atum ahok atovar kirilo, aphong aphonglo? Lake athema laso aKarjong ke asai chisik’et tanglo, lapen pini arni kaningjepon alamthe anke monit aphuthak si somindar angkangpi ta toiponlo. Laso pen si, ebeng an asai ke chenam si klemponbomlo. Ha pirthe kasorjon kecheng ahut pen non ahut an, Arnam aKarjong ke laso kethedung asai angthun ateng pen chisik’etlo, lapen anpartame prekjam akai along prekjam asai lapen prekjam adet angbong klem’etlo. Akaitin along amonit atum tame Alangli kun prekjam si theklonglo, atheke Alangli prekjam keklem asai ateng pen si pima amethang amat pangdakponlo. Alang henlo Arnam, kangjinso lapen ningme akanghon plengset abang; Alangli ke monit apharman pap athok-ajir manlo lapen monit aphan viponlo; bonta Alangli ke monit aphan ingsailo, ado pilo, lapen hirjuno ta pilo. Alangli monit aphan pirthe athak ningkan suri apharman kerengji si chejaponlo, lapen Alangli kahenodak amonit akhei aphan pap pen pajokponlo. Pini arni, Alangli ke monit akhei aphan chepahemphu unlo, komatma Alangliphan kachinine atum doan, lapen Alangli kapangripon aber latum aphan pangrom’etji pulo, laso ajok kadokave ta Alangliphan angton pen chehodai’etji aphanlo. Kijutsi ahut, Alangli kadokave pima somindar angkangpi monit atum along keterbung lapen kangthirthedet doan ke me pachotheipo, latum aphan paklangpo pima Alangli ke kangjinso lapen kanghonthek a’Arnam anchot kali, gian lapen manghumeme ahir-asang kedo a’Arnam anchot ta klai, kangthir’et Arnam anchot kali, bonta anpartame, komatma monit aphan kangsaithek a’Arnam. Monit akhei anglum kahenodak atum an aphan, Alangli ke me pachopo, ingsaipo, lapen ado piponpo; halahei komatma kepachoklimji atum anke, Alangli kesung vanpo, cham pangthirpo, lapen asat langpo, lasonthot si parengmepo, padorlimpo, hokum kipi alamthe dolo, langcharipo, lapen ingchai’etpo. Lapen hala komatma kivirdet an atum aphan ke, Alangli ado pipo lapen kechokche apot adai enpo. Nephan nangthantha, Arnam ke ingtangrakrema? Alangli ke ajat tame lapen kadokave asai ta klempet unlo, thengparpan athak pran kachipi anchot kalilo, nang kahemandam ateng. Nang Arnam aphuthak kamathadam ajam biongchotlo! Nang kroima pima kadokave Alangli angton monit akhei aphan Alangli thengparpan athak pran kachipi pen ajok si pap kadiya klem unchotlo? Lapen laso aphi ke, nang Alangliphan sining angsong an aphiphi dunpo atheke chethe athengpi arong pen athe kechoji lapen chethe alangroi alang kijunji aphan pulo? … Lake pima puan akejoikejima? Nephan nangthantha, kopilo nang kelongdamtang? Nanglong Jisu achethe doloma? Nangphan chenam ta Alangli pap anam tu’etlo, bonta thengparpan athak pran kachipi ke Jisu Amethang asailo. Kopi adenglo nang monit ateng pen kachepaplengdun? Nanglong ke athak akangjinso chotlo, bonta nang ke Alangli tovar aphan chinidundedetlo. Lason henloma nang Alangliphan kachepaklangpon? Jongsi nang le Arnam achethe longdundelang mate Alangli akangthirpet akun angton pen theklonglelang pulote, nang ke pima chethe kelong abang inutlo pu hoknolang, lapen nang ke sining arat adonri pen kilutdun longji aphan atheng kalilang.

Arnam ke Karjong anchot kali, Alangli ke ok tame cheman unlo. Alangli ke, anpartame, anong theklong abang arpumlo. Jisu, nangtum Alangliphan theklonglelang puvoiphit tame, Israel aso – halaso ahut Jihudi atum ke theklong’etlo. Alangli ke aphrangsi ok abang arpum si dolo, bonta Alangliphan thengparpan athak pran endet aphi ke, Alangli anong theklong abang arpum chemandetlo. Alangli ke angton kepangrom’et aKarjong lo lapen nahok adim along tame sai klemtheklo. Alangli ke Jehovah ta man unlo, mate Jisu, mate Messaih tamelo; kijutsi along, Alangli ke Kajongthepar Arnam ta cheman unlo. Alangli ke ingthirpetlo, ingsaitheklo, lapen ado tame piponlo; Alangli ke hirjuno lapen ningkithi vanlo; bonta Alangli ke kangjinso lapen ningme akanghon tame dolo. Kadokave asai Alangli keklamtang anke Alangli apharman pacheklangdak unlo. Kopuson a’Arnam pulo Alangliphan ke nang kipuji? Nang than pajirmi thekthelo. Jongsi nang ahokpet than pajirmi thektheklo pulote, nang Arnam aphuthak akijutdam alam ta ningjenolo. Nang pima Arnam ke kai apar kai kangjinsothek lapen ningme akanghon kedo a’Arnam lo athema Alangli isi angdeng along pap kapajok asai klemdetlo pu apot anchot si kapajutlo puke ningjerinon. Nang ahok-ahak pima Alangli anchot si kangjinsothek lapen kanghonpik a’Arnam pu puthit unjima? Jongsi Alangli le kangjinsothek lapen ningme akanghon kedo a’Arnam jongjongchot pulote, kopi athe si Alangli kijut arni ahut bangso akai kapajutji aphan vanlo? Kopi athe si Alangli penang an kephalangno ason nangtoipo? Monit atum akamathadam lapen kachinidam ateng ke, Arnam ke ingjinsothekpik lapen kijut anta kanghonthekpik abang nangji pulo, laso ajok monit akhei along kijutsi abangphu tame kejokji aphan. Bonta kopi apotlo, kijutsi arni along, Alangli lason thedung kaphalangno atheke laso amonit akhei aphan kapavirji pu ra chiklithepi, keso avur-akrem, lapen akhim kithur nangtoilo, anke Arnam aphan hotur pusi chekamlo? Kopi apot si Alangli monit aphan lahei kephalangno pen kisung pachechaknanglo? Athe kopuson a’Arnam pulo Alangli ke tangte, nangtum angbong inutnat tame ningjehaihelo, lapen inutnat tame than pajirmi thekthelo. Nang tangte puthip unjima pima Alangli henlo Karjonglo? Nang ningjehaijima pima Alangli ke madu ta kalilo bonta Jisu aok abanglo? Lapen nang ningjehaijima pima Alangli henlo Arnam komatma kai apar kai ta monit apharman si thengparpan athak pran kachipiverji abang?