Laso Akrong… (4)

Pima monit atum Arnam akanghon meme aot ketheklongji aphan, pini arni akai ahut Arnam koson si akanghon loma kiridunji aphan, lapen pima latum pini arni Arnam kepangri alongri aseke kedeng kachekroidun henlo – la kadokave tame Arnam akangjinso apotlo, lapen anpartame, lake Alangli monit akhei aphan kangthurlo. Laso apot le Ne mathadam lote, Ne Arnam akanghon meme aot aphan ingtangkring pen mathalong. Itum aphan Arnam nangchinghon binong; jongsi Alangli lasonse pute, komat si Alangli kanghon meme aot ketheklongji mati? Lasi Ne ketheklong pima kedoan tame laso asai ke Arnam Amethang jongjung si klempetlo, lapen pima monit atum aphan Arnam si chejalo lapen paredunlo. Ne Arnam aphan laso apot akero pajirlo, lapen Ne kortemar lapen ingjirmar doan aphan tame Nelong Arnam aphan akero kipi along nangchelangduntha pusi Ne choningrilo: “Nangphan le kedoan anongthe tame padopetnang, kethenei Arnam Amethang! Nang anongthe ansose pabatthu lonang lapen komatmat si Nang kangvaitang lapen kelongtang doan atum along pachethang lonang.” Nephan Arnam patheanglo: Alangli Nephan paklanglo pima itum aphan ke penang an ajak dingklui arni pen si nangingvai tanglo, lapen pima mo kijut arni ahut Alangli itum aphan kelong’iji aphan ninghanglo, lasi somindar adang lapen kadokave ahormu aphan itum pen ajok Arnam anongthe angton pen kepatheklongji pu chekroilo. Itum, tangte, doan ke ningkan suri throk Arnam kisik-kedang kemangdam kapanei mate kapaklar asonlo; itum doan ke ahormulo, somindar adangpi along Arnam asai keklem’i ahormulo saidelo. Non ansi Ne chinilo Arnam akanghon itum aphan kopuan loma, lapen pima itum along Alangli keklem lapen Alangli asontin kaningjedam doan ke suri suri sose aphong kedamtang aban akai ansoselo. Israel along mate Pitor along amat ta kali Arnam jongjung lapuan asai keklempon ke mate penang an alam kaningje – athe cheklanglo pima itum, laso asong amonit atum, chenam si kemepik ahirjume longlo, kedamtang arni ahut akurusar kangthir atum anparta chepangbardun une’lang ahirjume kelong. Laso apot si Arnam ke kaiketa ningjelo pima kijutsi akai ahut amonit atum ke ahirjume dolo. Bang le ajat tame paningjenang, Ne kroilo pima itum doan ke Arnam pen ahirjume kelong ongneilo. Itum aphuthak Arnam pen ajok kelong ahirjume apot deng nangji; ajahak atum ke Arnam aphan sorsardet dokok tahai meme, bonta Ne kroilo pima jongsi laheihui ahirjume Arnam pen kelong doan, tangte lake cheklanglo pima itum doan ke kelong nangji atheng atumlo. Jongsi bang atum le sorsar tame mate itum aphan ningdokdedet tahai, Ne nonpu ta kroilo pima Arnam ahirjume itum aphan kipitang doan ke itum along pen madu ta nangthi un’e mate paprei un’elo. Athema itum along Arnam asai ke klempontanglo lapen Alangli itum aphan pathengnono si chingkilo – itum aphan, lapen akaprek atum aphan kali – Arnam ke Alangli ninghang ateng si klemlo. Lapen jongsi monit atum doan chekroikredet tame, latum doan ke tangte emethang aphan si chepasunglo kalima? Tangte latum ke lason keklem pen ajok amethang aphuthak ahir ave chevanlo kalima? Kopi apot si Ne lason alam kaningjelo? Atheke Ne laso apot aklong pen kachorodam dolo. Arnam Nelong asai keklem apot entha, langdam sinang: Ne anchot si laso asai klemthekji – komatne la klem thekji puhe? Ne laso aketoi Arnam pen kelong ke kopai thepik anlo – komatne lason menmen pen klemdet thekji puhe? Lake Ne ningkethedam, tebontame, pima korte lapen ingjir doan atum Ne ning alam chinipo. Ne ke Nelong kedo akethek-kere apot le kacheparokapik kali, bonta laso aphuthak si kethalo. Ne ke kadokave tame Arnam si anongthe do nangpo, lapen pima itum along anuttin aning tame Arnam kepalangji aphan pulo, laso pen ajok itum aning Alangli thengno kecham’etji aphanlo. Ne ning along, Arnam si angton pen kelongji Ne ke ninghanglo, ok kachepharlotang aphan kachehodaitang keter kavepin akangthir abang kemanji aphan, lapen anpar tame, kachingkimesen ameresak kedoji aphan, angton amonit akhei atum angbong kangthir’et karjong abang cheklangponlo. Lake Ne lamchaklo, Arnam angno Ne laso aseme dengponlo. Ne la kapaplengji ninghanglo lapen laso pen ajok Arnam akanghon chitupo. Tangte nang la klemji ninghang loma? Ne kroilo pima laso Ne lamchak ke ansose kortemar lapen ingjirmar doan aphan jakong pipo, lapen pima lake paovemi amonit atum aphan ningkethe vanpo. Nephan lake piloma akenangsotnei pusi Arnam pariso amonit atum aphan langlo. Anparta lake Ne jongjung kachekroidunde, bonta Ne kaiketa mathalo pima pariso amonit atum along kamathadam lapen ningkethe dolo; lake pima Arnam pariso amonit atum along sai keklem ongchet asonlo. Latum arlo alam kachini lapen gian jumdet tahai, lapen latum ke hala kiphi mirak achainong aso ason ingtangrak lapen phereju tahai, tebonta Ne kroilo latum doan ke alangtum akeme apot pen kalidet. Nang theklongji pariso amonit atum ke latum adai avepin lapen latum doan ke prapjin pen akimi ahormu dengdunthek. Riso amonit atum ane kachepathe, kasedengkak, lapen mathathepin pen keklemdet dokok puvoiphit tame, lake alangtum akimi atur kedengji akethek along thangnat siksakse, pima riso amonit atum ke aban ason, arni kilittang ahormu ke’ot ke jumpik an. Laso apot si Ne theklong riso amonit atum along kijut un’e alamchak, lapen alangtum aboi ajakong; laso athe si pima latum aphan Ne ingduk’op akamathadam dolo. Ne abarim akorte lapen angjir doan aphan kelangselet si ave, bonta Nephan latum thangnat ninghang ta avedetlo – laso pen si Ne latum aphan Ne chepabihek kadiya chohanglo. Lasonsi kopima Ne kaningjetang ke aren pen angtanlo mate lake kedengmeme kalidetlo, bonta Ne ningthelo pima kadokave nangtum doan Ne akechokchepik apot diyatha, athema Ne ke arta ave ariso apot si koan ma Ne kaningje ke ardi pidun’o thekthedetlo. Bonta ahokpet alam ke, abarim akorte lapen ingjir doan keklem, ajatnon, eson angdeng do – latum doan ke ale kavepin atum kali. Lake athema latum doan asonson kirim-kibi kethektang dolo; latum doan ke asonson kirim-kibi parjangvet pen si klemlo, lapen latum ke penang an akechokche klemponpe. Tangte laheihui ke alangtum ajakong kalilangma? Arnam angno itum kadokave ta ningjenang: “Oh Arnam! Netum kadokave tame methang jongjung angdeng ateng pen methang prekjam adim along pachun thekji aphan lapen netum kadokave tame Nang ninghang ateng netum klem peme thekji aphan!” Ne kroilo lake Arnam aningkehang chenampo!

Ne kachinipontang ke, penang an atum mat si laso arioso aphan cheklangsak pen kekhamkhe ma – mat si Arnam aKarjong aphan jongklok pen kekhamkhe – doan ta abarim saide. Laheihui amonit atum along ingtangkring dhorom akamunthidam alam do; kachetevar aling, latum Arnam alam pen kedamtang aban ahormu si pachingbar titi, lapen kedamtang ahut kedengpon ahormu pen si Arnam alam kapachingbar titi klemlo. Tangte latum doan ke kamatha thekthe kalilangma? Laso amonit atum Arnam asai klem thekji puhe? Lason amonit atum aphan Arnam Alangli sai paklemji puhe? Karjong Kangthir ke isi abidi do Alangli sai asitin arni aphan tame; monit atum jongsi aban ahormu si che’otthipverlang pulote, lapuson arni nangleji latum doan aphan phurkimo angdeng along pen pavedetpo. Alangli keklem asai asontin angdeng pen, Arnam akimi amonit aphan enbom. Tangte halahei mat si aban ahormu pen lam kethan’ibom atum monit aphuthak kivir vanvedetjima? Lapen tangte latum ke Arnam asai kapanglendun kalilangma? Lapen jongsi lahenlo pulo tangte, komentu si Arnam asai ke kapatang longpo? Ne nonhetjong kopi si kaningjetang aphuthak ajahak amonit atum ke nangmathadunthap dokok tahaiji. Latum doan ke chekroi pememelang tahai meme. Bonta Ne ke nangphan pamatha pasungji kali: Arji kiding aphrang ahut, penang an ahormu lason ke phoji, lapen lahei ke angthek cheklangdak pen si than thekchotpo. Ajahak ardi kedo amonit atum along chetongdam lonang, ajahak man-peng kethe kurusar mate Baibel alam kethanthek atum lapen latum aphan laso alam si pachetaklo. Latum ke cheklangdak pen kecheng ke khangkhe, pima lake chekokvekpo – bonta latum ke Baibel chihum si nangphan chedan’ipo. Latum ke Isaiah Alo lapen Daniel Alo along ketok apot nangphan pachelangtoipo, lapen latum ke Kepaklang Alo apot nangphan than pachinipo. Lapen jongsi nang la ningje thekthe, latum ke nangphan panungpo, lapen nangphan ke kapachobai aKhristo pupo, lapen lasonsi ningjepo pima nang ke kapachobei akrong si pachethanglo. Akeong apor aphi lote latum ke nangphan kapachobai akoi nangpipo anke la nangphan chethe pavangnopinpo. Tangte lake cheklangdak pen kekhang kalilangma? Bonta lake kecheng anchotlang. Latum ke Arnam keklem asai adunthu akengkam aphan panglendun un’e, lapen arji kiding aphrang, Karjong Kangthir si latum aphan kapadengdetji si toipo. Lake kekhang un’edetji alamlo, lake pima monit atum keklem un’edetji asai lapen ke monit atum pima mathadam ta un’edetji. Ne kroilo pima Arnam asai ke somindar adangpi atok-ano ta kekhang un’edet si pachethangponji. Lake Arnam aningkehanglo, lapen madu tame khangdun une’detji. Arnam itum aphan nangpatheang lonang lapen akimi atur ansose kedeng thekji le itum palongnang, lapen laso asai along Arnam akisik-kedang pasiksakdun nangne. Itum aphan Arnam akangjinso padonang laso pen ajok itum doan kadokave tame Alangli anongthe arni nangkele ahut kethekdun longji aphanlo. Somindar adangpi tame Arnam anongthe kacheklang dolo pu arni henlo Alangli pen ajok itum tame anongthe kelong dunji arni si chemanpo. Lake pima laso apor henlo atheke Nelong pen matmat si kedamrappet atum pen Ne ke chelangpo. Ne ningthelo athe Ne kortemar lapen ingjirmar atum ne pen jokjak Arnam aphan kachoningri along alangtum ase chepathepo: Arnam kethedung asai prapjin pen papachun lonang, laso pen ajok netum akai dingpi along Alangli nongthe arni netum kethekdun longji aphan. Ne nonpu ningthelo Ne kai dingpi Arnam aninghang ateng kelongji aphan, lapen Ne ningthelo pima Arnam sangsepin si Alangli sai aphuthak klemponpo, lapen athe ke ladak kekhang ason thangnat ta avelo. Lahenlo Ne kijut un’epin akemangdamlo. Itum angbong le Arnam kaiketa padonang, lapen Alangli akanghon itum angbong adondon pacheman lonang laso pen asjok itum angbong jirpo keme acho peman lonang. Ne ningthelo athe kanghon ke kevangjilang ahut itum angbong pachinipo lapen pima itum aphan kanghon si patebok vanpo, itum angbong kachehelo pavedetpo, lapen pima itum angbong akanghon arnukkrung, kangdang’o, lapen kedokjin pemanpo. Ne kroilo athe lake Ne Arnam aningkehang ateng pen nangji. Ne ningthelo athe Ne kortemar lapen ingjirmar atum Ne pen ansose si kachepho chetebokpo, lapen pima itum doan ta itum kedorappet malomso apor chibirti pemenang, athe lahei itum aphan mo kemepik arni kachikimodam palongnang.

China ahavarpi along Arnam asai keklem angdeng ongdung penang dokok tahailo, bonta latum doan ke akesungpik kali. Mathadam lote, Alangli keklem asai doan angdeng along mathadun meme do; asontin tame Arnam amethang jongjung pen si klemlo, lapen anuttin tame bangso asai along cherap-cheto dunlo. Asontin “angkung” ta ahokpet ingnekmeme, lapen komat si lason mathajima athe laheihui amonit atum lapuson alamkan cheparjanji puke, alangtum kacheparjan doan asontin akepho angbong tame kai pen chinglitpik, angton prekjam abangphu atum tame paklardak pen cheparjanponlo lapen Arnam ketok aber si angton dolo, anuttin ta katheang arni along ansose cheklanglo? Bonta lason pen, Ne matha damde pima Arnam si Alangli sai pen ajok monit atum along kapathu puke. Lason ke masap ta kamathadam meme alam avelo; Arnam asai ke akemang do, lapen Alangli keklem along ke ajat ta jongdun meme lapen akenang ave pupelo. Asontin le Alangli keklem tame monit aphan kapachoklimji si klemlo, latum aphan kelongji pulo. Laso ateng pen Ne chenam si theklonglo pima Arnam aning ke monit atum angton pen akeme apharmanveklo. Ne laso alamkan aphan pu tahailo, bonta lake lason le pu tame athe laso alamkan ke ahokpet akai pen si ke’enpon. Lake pima Arnam pen anchot – bangso alamkan kacheparjan kethan-kemum akehoi, Alanglilong si monit atum doan ke cherap-chetodunlo laso asai kapachunji aphan. Ahin kaprek pen langdam lote, tebontame, Arnam lason ke’enpon ke monit aphan kelongji aphan, Alangliphan ansose kapanghon thekji aphan. Tangte lake Arnam aninghang kalilangma? Lasi Ne ningthelo athe madu tame thangnat ta ningkibidam avelo. Tangte nang ke Arnam aninghang ateng angton pen kapatepek kalilangma? Ne penang an ningje tanglo – Ne ningthelo athe korte lapen ingjir atum doan ta angton pen chinilo lapen Ne ning aphan kalili-kalanglang thanthapthelo. Ne thangnat ta ningkibidam avelo pima monit atum aphan Arnam si kadokave longpo. Anuttin tame akrong kedam cheprekjam. Nangtum akengpak aber kedo abang Arnam le papangpu lonang, lapen nangtum Alangliphan pardomnang lapen papunang: “Oh Arnam! Ne nangphan kelongji si ar’ilo, laso pen ajok ne karjong Nanglong pachiruithunang. Tangte nang ke nang karjong aklong’et along Arnam akeja kiriji si chisik loma?