Kaheno Abang ke Chenam si Adai Phovekpo

Nangmena aphan chelangtha, chenam si nang asontin akeklem along ingthir’et pen klemloma klemkle, lapen nang keklemtang asontin asai along Arnam nanglangdunma nanglangdunde: Lahenlo athepi alam ke Arnam aphan kekroi atum doan alangtum angbong akajalang kapatirpipon. Nangphan ke athikdut abang pusi nangpupo athe nangtum Arnam aphan aningpangsam theklo, lapen athe ke nang Arnam akelana lapen akerai denglo. Arnam amek angden, komatmatma Arnam akelana, kerai, lapen kapachoklim kedeng atum doan, lapen Alangliphan kelong atum an, latum ke athikdut, lapen Alangli latum doan aphan ke anam kesopik amung pusi lakhalo. Koan ma nang Arnam kedobom alam kedengdun, lapuan si nang Arnam aningkehang chini unpo lapen longdun thekpo, lapen lapuan sose si Arnam alam pen ajok nang rengdun thekpo lapen Alangli akenangji doan ta ningpangsampo. Lake nangtum aphan Arnam aketoi alamlo, lapen lahenlo nangtum kadokave ta kachepalongdun thek nangji. Nang jongsi nangmena akamathadam ateng pen lakha si Arnam aphan ardi pipedet, Arnam ke thangbakma kachelar un’edet inghan akumlin pu kitin pen, lapen nang jongsi Arnam aphan angton pen Baibel angkang along an si padolongchot lapen kepathikvet asai angbong si Alangliphan paklemlongchot pulote, lake nangtum Arnam aphan pinremlo pu angthek klangdaklo. Pipotma Jihudi atum Kachejok Abarim akai ahut Arnam aphan ke isi kithiptang akumlin ason pusi latum aningarlo alangtum chibilo, athema Arnam aphan ke Messiah puan si hang unchotji, lapen Messiah ke Alangli henlo komatma Arnam kemanji abang, lapen pima monit akhei atum Arnam aphan sai klempilo lapen archolo athe ke Alangli ke (achethe kavedet) inghan akumlin pusi tinlo, latum halaso akai ahut Jisu aphan thengparpan athak ingchinso pen saklo, Alangliphan pathilotlo – adai kavepin Jisu abang kapinrem pen thinangkoklo. Arnam aphan thangnat adai ta kipiji ave, tebonta monit atum Alangliphan kapajokji kroikredetlo, lapen Alangliphan pathilot nangji pu ahukum si hangronglo, lapen lasi Jisu aphan thengparpan athak pathilo. Monit atum kaiketa kamatha Arnam ke chelarle, lapen Alangliphan eson alo pen anchot si pangbarlo, lake Baibel henlo, athe ke Arnam akisik-kedang asai choklim pen kachinidam monit atum dolo tame, athe ke monit atum Arnam asontin aripak along keklem asai doan cheparideng longlo pule chitin tame. Monit atum akechokche si akele ongpik, mena aphan ardi kachipi akele tanpik, lapen latum doan ta akele ahir kipi ke kethek do. Nang jonghe le Arnam aputhak thedung kachini dolo tame, Ne non ta ningjeji nang Arnam aphan chininelang, anpar ta nang ke Arnam abirudhe kithurnei abanglo, lapen anpar ta nang ke Arnam aphan pinremlo, athema nang ke chenam si Arnam asai along kroidun thekthedetlo lapen Arnam pen kapachoklim atovar along dun thekthedetlo. Kopi apot si Arnam kaike ta monit atum akeklem asai ning ingsamsedetlo? Athema monit atum Arnam aphan chinine, athe ke alang amat ta kamathadam dopik, lapen pipotma alang Arnam aphan kachini ke ahok akereng pen chekroikre, tebonta isinat athepi pen si pachelarlepin pachiruilemdetlo lapen isinat abidi pen si asontin akepho ahut ta klembomlo. Lapen lasi, pirthe along vang tangdet aphi, Arnam aphan ke monit atum thengparpan athak ingchinso pen puthot sakthulo. Kahenopik monit akhei! Joijoi pen kahenodak asai along kacherapdun lapen anut kaprek aphan kapasungji pu bidi kanglim keklem, lahinhin angbong kachithi lapen kachenepbor’i, amen anong lapen keplang-kephi kelongji aphan ketongpik, kachichini’et pen kacheperem seroi – komentu si la kepajut unpo? Suri apharo sose alam Arnam le ningjedet pu tame, inutnat ta alangtum chinidamdelang. Monit atum kacheparjanchot alangtum ahemtun, asopo lapen asopi atum aphan ajoine, alangtum akai along akemang, kevangji mohut akephoji, aman-apeng, ane kachepathe, lapen tangka aphan ajoine, kecho ason-amung, kachingthang ape-ri, lapen ok apharman aphan ajoinechot. Bonta inutbak doma alang keklem asai ke ahokpet Arnam apharmanlo pu? Hala Arnam apharman si keklemlo pu atum angbong amat ta doji ajahak atum Arnam aphan kachini. Bang koan amonit dolo alangtum mena ale apharman le keklem kali pu? Bang koan amonit dolo alangtum mena aman-peng kacheraivetji aphan pura bang aphan keberthip lapen kelangrem klemkle pu? Lapen lasi, Arnam aphan ke aphong aphong saijokje pathinanglo, lapen kalakha un’e angthin kethe kangsai atum Arnam aphan pinremlo lapen puthot Alangliphan thengparpan athak ingchinso saklo. Bang koan atum aphan si ahokpet pu kipudampo athe ke latum chenam si Arnam aphan ajoine sai klemlo?

Arnam angno kangthir’et amonit mate ahokpet abangphu pu kapachoklimji aphan lapuan kejoikejima? Lake ahok alam si paklanglo pima “bangso apirthe along ahokpet pu amat si ave, ahokpet pu atum ke bangso apirthe along ave.” Nangtum le Arnam angno vanglo te, nangtum kopisi kachingthang, nangtum kaningje alamthetin lapen keklem amo, nang asontin akamatha lapen abidi-sore, lapen anpar ta nangtum arnivang kaheman amangmun doan ta chelangtha – latum nangmena jongjung ale aphan anchot. Lake tangte ahokpet kacherap angdeng kalilang puhe? “Ahokpet binong” pu kipudam ke bang aphan kerapdun puchot kali, lake nangmena aphan asonsi nang tebok-terai aphan kachinghon pu anchot ta kali, lapen lake kachebohong lapen lamki-lamphong mate chonghu-chonghi pen kachepahelo anchot pu kali. Ahokpet binong puke Arnam aketoi alam nangdenglo pu ke’endun lapen Arnam akemangdam doan lapen kemesen apor kijuidamlong avarsai akisik-kedang heihui, apor lapen adim aphan langlepin pen, Hemphu Jisu le keklem tekang asonthotlo. Lahenlo ahokpet binong pu Arnam kaningjetang alamlo. Lot aphan ahokpet abangphu pu hok’un athema alang Arnam pen nangketoi banghini atekala aphan pajoklo pima alang amena ale kelong lapen kelongle alam chemathadamdepin; lake halaso ahut apor alang keklem ke kemsen ajok ahokpet abangphu pule ningjedet tame, bonta alangphan ahokpet amonit pu hokdet un’e. Lake pipotma pulote Lot abang Arnam aphan ketheklong ke alang asopi banghini tekela pen chelardundet, bonta alang kedoan aot-adur kedamtang ahut pen pangbardam lote ahokpet binong abang pu hok un’e. Lapen lasi ne pulang “bangso apirthe along ahokpet atum pu ave.” Komatmat ma kachepekengthuji pu aroi along kedo atum angbong ta, madu aphan ta ahokpet pu hok un’e. Nang keklem amo le mepik tame, Arnam amen anong pethebom pule nang cheklang tame, bang aphan pasungse lapen aduk inghoihe, mate chonghuhe lapen bang amar thidunde tame, nang ke chenam si ahokpet pu hok un’elang, athe ke lahenlo monit jongjung atum kelong unji. Tangte nonmat kopilo kenangsot alam ke nang Arnam aphan chininelang. Nonjong amat kipudam unji ke nanglong masapso ke monit aot-aning mesen dolo, bonta ahokpet binong abang pu Arnam kaningjetang ateng amung ke avedetlo, lapen lasi nang asontin le klem pen nang Arnam aphan chinilo pu angthek kachepaklangji thekthe.

Aphrang kedamtang, Arnam sining angsong kedobom ahut, monit atum kapachobei akrong pen si Arnam along cheparjanlo. Pini arni, Arnam tame monit atum angbong si dolo – koan aningkan damtang lone madu ta chinine – tebonta keklem-kedam along monit atum nonpu ta ephong ateng si dobomlang lapen Alangliphan kachongthuiji si bor’ibomlang. Tangte lake monit atum akamatha aphi kachiruipik kalilang puhe? Judas tame lasonthot si kelmlo: Jisu vangve aphrang ke, Judas tame akorte lapen angjir atum aphan kachongthuiji pura pachobei alam thanlo, lapen Jisu vangdet aphi ta, alang chelar thekthedetlo; masapso ta Jisu aphan alang chininedetlo, lapen kapajut ke Jisu aphan alang chongthuidetlo. Tangte lake alang Arnam aphan kachininedet apot kalilang puhe? Jongsi, pini, nangtum Arnam aphan non anta chininelang, tangte lake nangtum ta anut Judas ason thakthak chemandet tahaiji, lapen lason ateng le klemlo pulote, Jisu aphan thengparpan athak kapathi alammo la Kanghon Kangjinso Akai along ningkan suri aphi tame puthot cheplangthudetpo. Nangtum la kroikre ma? Lake kapachobei kalipinlo! Non kedobom ahut, keongdung amonit atum ke lason thakthak akepho along si dobomlo – Ne laso alam kaningje masap prapchetlo tahai meme – lapen lason amonit atum doan ta Judas keklem-kedam ason si klembomlo. Ne la kaningje pangtarthap kali, bonta ahok alam langdam pen si pulo – lapen nang un’e bonta nangchekroidun anchotlo. Penang an amonit atum mena aphan chepabihek ason si chepaklangklang do tame, alangtum aning arlo ke kithi alangtuk alang, kanemthuprung anordong alang pen anpar akaprek avelo. Non ahut lason thakthak atum kardomhem along dopik, lapen nangtum kamatha ke Ne ajat ta laso aputhak chinine pulo. Pini, Ne karjong si Nephan nangthanlo, lapen Nepharman alammo paklanglo. Nang kamatha ke Ne ajat ta chinine pulohe? Nang kamatha ke Ne nangtum aning arlo abidi kanglim kemathadam alam, nangning aklong kapatu ason kedoan alam ajat ta chinine pulohe? Arnam pen kemesen kelongji aphan lapuan si kejoi aret puma? Nang ning kehang ateng pen si Alangliphan vi aling tame pusi nang kamathalo he? Kedamtang ahut, Ne ningkibidam ke nangtum jokvanvedetna pu, lasi Ne nangtum aphan akejovan kaita nangpilo, bonta Ne ke alangtum aphan mesen pu monit akhei atum than thekthedetlo, lapen Ne le echak kamlo te latum ke angrup sose enthupo. Nangtum angbong charju seroitha: Ne madu pen ta chephophepinlang, lapen masapnat ta madu aphan ingsir dundepinlang – tebonta Ne ke monit atum akemang lapen akar’idam alam chinidun peme. Nang kamatha ke Arnam Amethang si, Arnam alammo chepaklangjilang puhe, lake kilu lo? Lason ahutlo te, Ne pulang nang mek kachecharche binonglo! Ne nangphan ingchekche, bonta langdam sinang nang koan keheno abang pu longjima. Langdam sinang nang kereset masap abidi pen nangphan pajok unjima, mate Arnam aphan chinghon pu kabor’idam tirlap pen nangphan pajok unjima. Pini, Ne nangphan pinremrelo; nang kechokchedet apot Alangli adai-areng nangke’en kosonjima Arnam nangkelang apor ahut aphan le chonghong lonang. Ne ke nang pen kaseletjin kachingkiji aphan nonke apor avelo, lapen Ne kethedung asai chibikok si nangphan inut ajoine ke kapanglenji ninghanghelo. Nang ason ingthan ke Arnam nangphan nangkelangji ahut apor anta ale kavenai si manpo – lasi nang koan laso along kiliut’it longjima langdam sinang. Lapuson amonit atum ke masapsonat ta Arnam aphan kachiniji ninghanghelo, anparta latum masapso ta Alangliphan kanghonji pu avelo, lapen latum aphan ahokpet abang pusi Arnam pahok nangji pu akar’i dolang – lake tangte kapachelai kalilangma? Athema kemesen amonit ke aphai masapso jumhek, Ne ke monit aphan chethe kipi asai anchot si cheklempon bompo. Ne ke pini kopima kapachun nangji la anchot si pachunchotpo, bonta mohut arni Ne ke adai-areng ke’enji aphan vangvekpo latum anuttin akeklem asai amo ateng penlo. Ne kopima kaningje nangji alam doan ningje tanglo, pima lahenlo klardak pen Ne keklem asai. Ne ke kopima Ne keklem nangji asai ansi klemchot, lapen Ne keklem nangne anke klemkle. Ajatnon, nangtum kamatha pangching si apor padampo pusi Ne ningthelo: Chenam ta koan si nang Arnam aphan kachinidam ahoklo? Nang ke tangte non aphong Arnam aphan thengparpan athak ingchinso kesak abangma? Ne kapadusi alam ke lahei henlo: Arnam aphan thengparpan athak kapathi atum doan thedung ningduk-ninglak padonang.