Kapachoklimtang Atum Doan Aphan Alamchak
Monit atum kechoklimji aphan Arnam kopi atovar pen si keklemlo? Kopipi ahin heihuilo kedo? Arnam pen nangphan kapachoklimji pu nangninghang doma? Alangli akangsai lapen akangchek nang kedengji aphan ninghang doma? Laheihui akarju aphuthak kopilo nang kachini? Jongsi kaningjeji aphan thangnat kethek avelang pulote, Arnam asai heihui nang kachini avelang pu angthek cheklangdaklo, chenam si nangphan Karjong Kangthir pen akatheang adak-atur longdundelang. Lapuson amonit atum aphan ke kepachoklimji puke un’edetji. Latum malomso ningkarong aphan pura masapso akangjinso ke piji, lapen lake arji kiding aphan kali. Monit atum aphan Arnam pachoklimle jongsi latum Alangli akangjinso si longdunchot pulote. Ajahak atum ke alangtum ok aningkangsam lapen ningkarong kelong anta kedorlo, alangtum akai kedo mesen lapen kesung-keboi mate kopai kelangno kavepin pen, alangtum hemtun isi ta rengdok-rengni pen si do, kachetonte lapen kachebohongsai kavepin pen – lapen latum Arnam ahirjume dolo lake pusi kroidam tahailo. Ahokpet ke, lake Arnam akangjinso apot anchot. Arnam akangjinso masap kelongdunchot pen ke nangtum kedor’ilo pu nangne. Lason akamatha kedo ke kemesak kalilo. Nang jongsi arnivang tame Arnam alam heihui porhi, lapen arnivang ta ardomver, lapen nang karjong ke thedung ningkarong dolo lapen chenam ta ingsamjin pen si dolo, jongsi nang le Arnam aphuthak kachinidam lapen Alangli sai heihui alam kijut ahut thangnat ningje thekthedet pulote, lapen ajat ta charlidun longlepin, lapen nang Arnam alam jonghe le cholo lapen junlo tame, jongsi nang le karjong ningkangsam lapen ningkarong longlo pu matha tame, lapen Arnam alam ke kaprek pen anpar kedokjin pinak, labangso alam kenangji an chodengdun longlelang tame, bonta Arnam alam heihui ajat tame keklemponlong akacharli le kave lapen Alangli lam heihui ahokpet kacheklang pen chenam ta keledundelo, tangte lapuson Arnam aphan akekroi pen nang kopilo ale kelongdunpo? Nang jongsi hala kangchoklong Arnam alam heihui ateng rengdundelang lepute, tangte laheihui alam nang akecho lapen kejun lapen ke nang akardom doan tame thangnat ta kalilo alar ke dhorom kekroi anchotlo. Lason amonit atum aphan ke Arnam pen pachoklimle lapen Alangli ale longdundelo. Arnam pen ale kelongdun amonit atum ke ahokpet aphan aphi kehungdun atumlo. Kopima Arnam ale kelong ke monit a’ok lapu kali, alang pharman ahormu lata kali, tebonta Arnam apharman masap aphar alanglong kedo henlo akenangji. Laso apot si, Arnam le monit aphan kapachoklim ahut, Alangli kepachoklim ke alangtum a’ok aphan kali, bonta alangtum aning, alangtum aning Arnam pen ale kelongdunji aphan kepek; ningjedamlo te, Arnam pen monit aphan kapachokdam ke, acho ateng, monit aning Arnam kapachokpon ke labangso aning Arnam ahin kapachingbedunji lapen Alangliphan kanghon thekji aphanlo.
Monit atum a’ok ke thivek nangji. Monit atum a’ok kelongdun ke Arnam aphan thangnat ale ta avelo, pipotma monit atum a’ok ke kangjirdet kephovek nangji ason pinak lapen Alangli pharman akhi lapen hirjume longdun un’elo. Jongsi monit atum a’ok le ale longdundet, lapen labangso ahor along monit atum a’ok le dodun, tangte amen chot sita bangso ahor along monit atum dodun tame, alang ning ke Hi’i apharmanlo. Laso alam henlo, monit atum Arnam ason kacheparjanpon kacheklang ki’unji kali, bonta latum ke Alangli anghor si chemandetpo, lapen Arnam monit atum aphan kangvai ke ale kavenei si manpo. Komatmat aphan ma Arnam kapachoklimji aningkehang atum anke Alangli hirjume lapen Alangli pharman akhi longdunpo. La tangte, Arnam along kopima kedo latum endunlo lapen lasonsi alangtum along aklong’et kopima kedo laso ateng pachemanlo; latum Arnam alam heihui do etlo pima alangtum aphan si panong pen vanpilo; Arnam ke ajatnon, nangtum ke kopima la kedotang ateng doan endun’et theklo, lapen ahokpet along kedo si mandetlo. Arnam ta lapuson amonit atum aphan kapachoklim keklem lapen latum henlo Arnam ale kelong’iji. Arnam pen ahirjume nangkepapajir along kachodengdunlong amonit atum ke lason henlo:
1. Arnam akanghon doan ale kelongdun.
2. Ajat ason along tame Arnam aninghang ateng pen keklemdun.
3. Arnam akethan-pare ale kelongdun, Arnam akatheang along kerengdun, lapen Arnam katheang adak-atur along ale kelongdun.
4. Arnam aningkehang arje ke pirthe pen angtan kerengdun; Peter asonthot Arnam aphan ahokpet kachinghon, Arnam apharman thengparpan athak pran kachipi lapen Arnam akanghon apreng kachitu’iji aphan pran kachipidet’un; Peter ason thakthak anongkethe kelongdun.
5. Pirthe along madu tame nangphan nangpanghonri, man-peng nangkipi lapen ningpahangri henlo.
6. Chom arong lapen kithi akangnangthip heihui do’an pen kehai un, Sobar asai keklemji aphan avarsai kepekpedet, Arnam si kacheraidet abang keman, akimi lapen kereng’et akarjong arlo kedodun, lapen kelak kavedet henlo.
7. Kai dingpi along ajat apor tame elam pen kethan un’edet aningkarong lapen kachehok kedover henlo, Arnam anongthe arni nangle tanglo pu kethekdunlong thakthak kedo.
8. Arnam penpen anongthe kelong raprap lapen Arnam kachinghonnei arisangho kecheman’un araje kachingbarthek henlo.
9. Pirthe along kopuson aphan si Arnam kachinghon ma halason kemandunthek, la tangte, Arnam kachinghonnei aso henlo.
10. Arpum kachelarphun lapen Arnam pen ajok kethom asining hemrengme an kebatdunbom lapen ok aphan kehai undet keman henlo.
Arnam ahirjume kacheraidunlongvet amonit atum anchot si choklimji lapen Arnam pen ale longdunji. Nonjong ahut nang kopine ale longdun doloma? Koloso angdeng an si nangphan Arnam pachoklimlo? Mathadam pememe pen ke monit aphan Arnam kapachoklim asai klemkle; monit aphan kapachoklim asai Alangli keklem ke akenangsot dokok apot, lapen klardak, theklongdak angthek do. Lake lason kali, monit atum kamunthidam pen, alang jongsi Arnam aphan akekroi dotik ke, alang ke choklimpo lapen Arnam pen ale longpo, lapen pirthe along Arnam ahirjume lapen akhi-adat alang longdunpo. Lapuson ke kesung kebatpik ason pinak – monit atum arpum akachelar pen thangnat ta kalilang. Nonjong ahut, nangtum aphrangsi akemang kedo nangji ke ajat ason along tame Arnam nangkepachoklim, lapen nang kachetongtang doan amonit atum, ason-amung, lapen hormu heihui Arnam kapachoklim, lason pen ajok nangtum along Arnam kopima asai keklemji kelongdunji aphanlo. Pirthe along nang aphrangsi ke Arnam akhi-dat longdun nanglang; laso aphi si nang ansose khi-dat kelongdun unji aphan chemanthupo, lapen thedung an, Arnam pen ahirjume longpo. Laheihui ahormu henlo nangtum kirivek nangji, lapen doan kaprek pen anpar nangtum kachinidam nangji. Ajat ason along tame Arnam nangkapachoklim aphan koan ma nang kiri, ajat ason along tame la ansose si Arnam ari nang thek longpo, laso angthek nanglong kacheklangji ajok, keprekjam abidi mate atovar lapen keprekjam ason-amung tame, Arnam alam along amat si kilutdunji aphan kirisip dopo lapen Alangli lam kacheklangdak along lutdunpo. Lapuson kedojoi akedover pen ke nang ningkangsam long un’e pima pap le klemkledet tame, mate thangnat kekroidam ason ta ave, monit akai aphuthak ta chinine, lapen monit atum akar’i ta avedet. Monit aphan Arnam kapachoklim ke keongdung akrong do; doan ason-amung angbong tame kapachoklimji aphan ke’unji avarsai dolo, lapen kemesen along anchot le Alangli nangphan kapachoklimji kali bonta kechokchedet along antalo, nang kopima ale kelong keongpikji aphanlo. Arnivang arni ahut tame kechoklimji aphan mesen avarsai dopiklo lapen Arnam pen ale kelongji aphan prekjam athe dopiklo. Ephongbak labangso chomatlongtang aphi tangte, nang thedung akachelar doji, lapen aphrangphrang kelangselettang apot penang an ahormu joike pen si chini longpo. Bang atum nangthandun jokplot tame chokdetpo; nang kachichininepin pen si, Arnam nangphan katheang adak-atur pipo, laso pen ajok ajat ason along tame laso katheang adak-atur longpo lapen arsikjik pen doan kachomatlong along lutdun longpo. Arnam chenam si nangjadunpo nang ar’e punon mate arvi tame nang kachelarledet aphan, lapen Alangli pen kapachoklimtang atovar ahin si nang kengkam chejordunpo.
Arnam nangphan kepachoklim ke Arnam alam doan kecho lapen kejun anchot le kechok’idamlo pu aphan kalilang. Lason kachomatlongchot ke ihinvet anatpo, lake masapsovet si dochotpo, lapen monit atum along masapsovet angkang an si khangchekpo. Lason pulote lake, nangtum aphan akenangji karjong akelame-lahon ke monit atum along duredet chenampo. Nangtum jongsi Arnam nangpachoklim kenangjivek lepute, kedoan ason-amung tame kosonsi nang kacharliponlongji ma lale charlinon, lapen nanglong ajat ason le nangpho tame katheang adak-atur kelongji le bor’inon. La keme mate keheno tame, nangphan ale kedo si nangvanpi nangpo, lapen nangphan kehenodak ke paman longledet nangji. Arnam along arep karjapdunbom ahut lote ajat ason aphan tame kethakvetthek nang dovek nangji, lapen laheihui aphan kangsir mate kacharli ke monit atum akamatha ason pen kalidet nangji (lason ke nangkacharlipon along ahin kaprek si suirongpo). Chenam ta jongsi nang charlilongtanglo pute, nangning along ke nang kai anghor si plengsetpo; Arnam nangkacherapdun akatheang atur along si nang kaita doverpo, nang keklempon along kaprek ahin kisuiji aphan kachisikding avelo. Lapuson amonit atum along ke kevangjilang arni kiturbong akai si plangpo. Arnam pen nangkepachoklimji aphan penang an kemesen avarsai do. Laso kichun kelongji aphan ke nangtum arideng si dolo, Arnam aphan ahokpet kachinghon abang kalima kalangma lapen nangtum Arnam nanagkepachoklimji aphan alamrai ke’en che’otthip kalima kalangma puchotlo, Arnam pen ale kelongdunji aphan, lapen Alangli ahirjume lapen akhi-adat kelongdunji aphan. Thangbakbe alamrai ke’enchot ke chokche; nangtum kachinidam nangji akenangsot dolang, kali pulote nangtum keklempon along kaiketa kaprek ahin suirongpo. Nangtum anuttin-abangphutin aphan tame Arnam ke kepachoklimji si aning kehanglo. Non le lapu karjapbom, penang amonit atum ke Arnam keklem asai arjidingklui pen kedengduntang aphai do’olo puvoiphit tame, latum ke Arnam akangjinso angkang along ansi kachodengdunprong pen anpar ke nahok ta leledetlo, lapen Arnam aphan alangtum ok aphan masapso akerengme kipiji anchot si ar’idamchotlo, keongdung kaprek kachodengji ke kar’i avedetlo, lapen kangtuiving, kethan kepaklang. Lake nonpu ta monit aning ke angtan si doverlang pusi cheklangdaklo. Monit atum asai, alang keklem along, lapen Arnam aphan alang kanghon aning doan tame masap kangthirthe asonsi dokoklo, alang aklong’et alam lapen alang kapaphihup akamatha ateng le langdamlo lepute, kaiketa monit atum ke ok aphan aningkapangsam lapen aningkarong si choribomlang, lapen Arnam monit atum aphan kepachoklimji pu kopisi akemangdam lapen kithiktang alam ke munset ta mathadamdedetlo. Lapen laso apot si, keongdung amonit atum akai along ke kehenodak aning lapen kemesen pen kachekak si dobomlo. Masapso ta latum akai along kachelar avelang; Arnam aphan kekroi alam ke latum chenam si ardi kipi meme pu mathathe, bang aphan ajoine si kekroidam kedo pu ason si lake chepaklanglo, kepon aling kachingbedun lapen kedodun kamathadampla pen, kemang kavedet akerengdun si doronglo. Ajat ason along tame Arnam alam arlo kilutdunji kachorivung kedothek amonit atum ke aphai jumpik, ale kelong keong lapen ason-amung kangcho, pini arni Arnam ahemtun along keongdung akhi kelong amonit si chemandunlo, lapen Arnam ahirjume ongmuchot si longdunbomlo. Ajat ason along tame jongsi Arnam nangphan kepachoklim si kiri pulote, lapen pirthe along kopima Arnam alamchak kachodengdun longji aphan ke, ajat ason along tame Arnam akatheang adak-atur jongsi nang kiri lepute lapen aningkan ningkan lapu ale kavepin pen padambom ninghanghe tangte, lahenlo non kechoklim atovar mesen pen kilutdun nangji. Laso pen si Arnam kapachoklimji along apun kechok lapen kelongdun unji abang nang chemandunpo. Arnam nangphan kepachoklimji aphan nang ahokpet akiri doma ave? Ajat ason along tame nang ahokpet akar’idam doma ave? Pitor le keklem asonthot nang tame Arnam aphan kachinghon aboi doma ave? Jisu ason thakthak Arnam aphan kachinghon nang ningkehang doma ave? Penang an aningkan pen Jisu aphan kekroi kachiki nang dolo; tangte koson si Arnam aphan Jisu kachinghon theklongloma? Nang kekroibom ke ahokpet Jisu aphan loma? Pini arni nonjong amat keklem kachepaklangdet titi a’Arnam aphan si nang kekroi; tangte nang theklongloma koson si menmen keklem kachepaklangdet titi a’Arnam ok jongjong along Arnam aphan kachinghon dolo sining hemrengme along? Hemphu Jisu Khristo aphan nang kekroi dolo; lake pipotma monit akhei aphan pap pen kapajokji pu ajoine pen Jisu thekngparpan athak apran kachipi lapen Alangli manghumeme asai keklemkang apot anke lapu ahokpet alamlo pusi kroihurlo. Tebonta Jisu Khristo aphuthak kachinidam lapen ahokpet katarlipdam kavepin pen si monit atum akekroi vanglo. Jisu amen aphan anchot si nang kekroidam, bonta Alangli Karjong aphan le kekroidam kali, athema kosonsi Jisu le Arnam aphan kachinghon alam nang chenam si ardi pipelang. Arnam aphan akekroi nang ke keheloving kamathakrang si dolang. Jisu aphan penang aningkan pen kekroi kachikidam dolo puvoiphit tame, Arnam aphan koson si kanghon nangji ma thekthelang. Tangte la nangphan pirthe athak pen thedung akilunei abang kemandet kalima? Ningkan damtang doan angthek ke lahenlo, Hemphu Jisu Khristo a’an-ahan nang kecho ke thangnat ale avepinlo. Lason amonit atum aphan Ne ningdokde anchot ta kali, Ne kroidam do Hemphu Jisu Khristo – nang le thedung aman-peng kipi abang tame – latum aphan langseletji. Koson si lapuson amonit atum aphan ke kapachoklim unji? Katheraknang ajoine nang’om erlap kalilangma tangte nang? Katherak amek avema nang? Hemphu Jisu Khristo aphan angno kacheklang haiji aboi nang nonpu dojilang ma? Tangte nangtum aphan la Ne kopima nangkethan doan alam ajor chinidam loma?
