Kecheng ahut Khristo pen Kethanpon Alammthe – Ingkung 2

Philadelphia amondoli ke chingthur tanglo, atheke angton ta Arnam akangjinso lapen akerap pen ajoinelo. Ongdung kangthirjir asangho atum aning arlo Arnam aphan akanghon thurlo, komatma alangtum karjong akai kedambom along boidetdelo. Latum ke alangtum akekroi chepathirthiplo pima inutpet ahok Arnam ke ok cheman tanglo, pima Alangli henlo somindar adang aHemphu lo, komatma kadokave ahormu hokum kipi abang: Lake Karjong Kangthir ahin pen si pachetak pemelo, lake inglong aphan ason si terekphitji un’elo! Lapen lake chelar un’elo!

Oh, Jakongtheparpik Arnam! Pini arni lake Nangli henlo komatma netum aphan karjong amek pachingpulo, mekve aphan pachecharlo, kengkok aphan akeng pachejorlo, lapen si’i akeso kechodet aphan pamelo. Lake Nangli henlo komatma sining hemrengme anghap kangpu, netum aphan kemanghumeme karjong plengset ahavar nangpatheklonglo. Nangli kangthirpet alamthe pen kapachetak ajok si netum monit atheng pen pajoklo, atheke Sobar kephangno tanglo – lason henlo Nangli kelakha un’edet kethedung asai lapen Nangli kelakha un’edet kethedung akangjinso. Netum anke Nangli hakhi kecho atumlo!

Komentune pen Nangli chepatujoi, chepabihek lapen ingsamri si dolo. Nangli ke kithi pen kithurthu tanglo, thengparpan athak akisung chechaklo, monit akai aningkarong lapen ningkeoi pholo, lapen kachenek-keholo lapen kisung-keboi chetonglo; Nangli ke monit apirthe along akeso phopetlo lapen chomat long’etlo, lapen Nangliphan ke aove amat si che’obuplo. Arnam ok nangcheparje abang ke Arnam Amethanglo. Arnam akar’idam ajoine aphan, Nangli ke netum aphan hi arbi pen nangpajoklo, Nangli rijak ar’e pen nang’othetlo, lapen Nangli akangjinso akejoi pen pajirlo. Ajat keso tame chechak si Nangli ke Nangli chethe netum aphan vanlo; Nangli vi, ang’i, lapen mekkri pen Nangli kachipi anam ke kangthirjir asangho atum aphuthak pacharklepetlo. Netum anke Nangli kachepedukkrup asai amolo^[a]; netum anke Nangli kachipidet anam saidelo.

Oh, Jakongtheparpik Arnam! Lake athema Nangli akanghon lapen akangjinso kethepik, Nangli akemepik lapen adak-atur, Nangli kangthirpet lapen asotdut ajoklo pima kadokave amonit tame Nangli ingno ingkupdi nangpo lapen kai apar kai Nangliphan si archo nangpo.

Pini arni Nangli kadokave amondoli tame pachoklimlo – Philadelphia amondoli – lapen lasi Nangli 6,000 aningkan kisik-kedang akemang pachunponlo. Kangthirjir asangho atum chepabihek pen amethang si Nangli ingno chehodailo, karjong pen cheraphetlo lapen kanghon along si chingbedunlo, kangbop alang along si chetodunlo. Kerengver chethe alang ke sangsepin si libomlo, inghan doan lapen mondoli along aketer alang doan pontheilo lapen chamtheilo, puthot Nangli kardomhem cham pangthir’etlo. Netum asai ateng keklem ahok Arnam aphan chinidunlo, Alangli lamthe angbong si chejorlo, netum mena keklempon nangji adeng an chepangtheklo, lapen asontin tame klemlo pima netum mondoli apharman si methang aphan apor chipidet unlo. Nangli ingno ingsamri dolo, netum Karjong Kangthir asai aphan ardi chipivek nangpo, kalite Nangli ke netum along rambeng-ramphanpo. Kangthirjir asangho atum angbong lahinhin kachinghon dolo, lapen ajahak atum ajakong ke anut kaprek atum kachingkoi adular chemanpilo. Latum doan karjong pen si ajat apor sitame kengkam chejor theklo, Karjong Kangthir pen si patheanglo lapen keklar atur pilo. Latum ahok aphan asai ateng menmen chinidamdet aphi klemponlo. Latum akimi akatheang pen keklem pachingbardunlo, lapen Arnam akengbot aphiphi dunlo.

Arnam pen si chitingkrup jalang rappetlo; Alangliphan nangpacharipon ke Alangli pen chejor rappetji aphanlo. Netum mena abidi, kapahancha, kamathadam lapen pirthe ason kachingvuinok kedoan tame inghun ang’ui along praidundetlo. Netum akarjong along Arnam aphan si kapacharipon akehoi netum pemanlo, Alangli pen dam rappetlo lapen lasi ingtui muchot ardi longlo, pirthe aphan chepahaiponlo, lapen netum akarjong tame joike pen ingjarlo lapen kejokvan longlo: Jakongtheparpik Arnam le Recho keman lote pu angthek lahenlo. Kopuson si netum kero akekan lapen kilunledetpo, netum akero pajirjedetpo, akimi alunjir pen hodaidedetpo?

Ahokpet penang an Arnam aphan kachoro nangji akrong do: Alangli men aphan kehang, Alanglidung kapatebokdam, Alangliphan kachemathadam, kardom-kaporhi, kachingrum along kedodun, ningkachibi lapen kachikimodam, kardom, lapen kero alun. Laheihui ason akero kipi along ke ningkarong kachehok do, lapen kangthir nanglutlo; laso akero along ke ajakong do, lapen anghor tame dolo. Laso akero along akekroi do, lapen akimi aklong alam kachinidam ta dolo.

Chitingdunkrup si Arnam pen jalang rappetlo, kiru-kethai along cherap-chetodunlo lapen dodun rappet si isinat manlo, Jakongtheparpik Arnam akamathadam doan paplengpilo, kangthirjir karjong plengset abang arpum chemanduntanglo, Sobar aphan pachet’ilo, lapen Sobar alekha aphan pajutkoklo. Philadelphia amondoli ke Arnam kedobom along ingjardun tanglo lapen Alangli anong-athang along pacheklang pemelo.

Kapachini:

a. Abinong’et alamjir along ke “amolo” pu alamthe ave.