Arnam Aphan Nang Kachinidam Kopusonlo?

Koan lone ajir kiding pen monit atum Arnam aphan kroilo, bonta ke’ongdung atum ke “Arnam” komat ma pu chininedet si, ning kehang aling klem-damlo. Kopi athe si Arnam aphan kroi nangkok ma mate Arnam komat ma pu latum chinine. Monit atum jongsi Arnam aphan kroi thekchot, bonta Arnam kopima jongsi chininedet pulote, lapen Arnam aphan chinine pulote, lake ingnekmeme ason kalima? La an arni vangdet aphi ta, monit atum sining pen kamanghu meme ason theklongbom, lapen monit atum matha un’epin ason lapen agian arjulongbomlang, monit atum komentune pen kamatha un’epin ke’ongdung ahok alam latum chinine. Ejahak atum pu tahai, “Netum Arnam aphan kekroi aningkan ongpiklo. Koson si netum Arnam aphan chininedetpo? Lason netum aphan nang karju ke netum aphan nangkelangrop kalima?” Ahokpet abang ke, monit atum pini anta Nephi nangdunbomlo, sita, pini arni keklem nangji asai latum chinine, lapen bang karju kejoinei ason anta latum nepdun thekthe lapen thakdun thekthe, Arnam alam karsikkrung ason karju along kethak dunthek ke aphi alamlo. Chini iktha, nang marek ta kitinte akarju alam, nang kapangthekthe alam, lahenlo nangphan akenangsot kachinivek nangji alam, pima nang ke armu aphi kihungdun si thekchot, nang methang aphan kopi si kachisik nangji ma ajat ta chemathathe. Kopi athe si Arnam aphan kroi nangkok nang ahok pen chinipeme loma? Arnam kopi ason nang chini peme loma? Monit kopi ason nang chini peme loma? Nang Arnam aphan kekroi abanglo pulo tangte, lahei alam nang chini pememe pulote, Arnam aphan kachiki abang pu sita nang man avedetlo kalima? Pini arni ne sai ke la henlo: monit atum amethang aning angthin chechiniji te, Ne keklem ason an chini nangji, lapen ahokpet Arnam arje chini nangji. Lake Ne sai keklem akemang angbong kiripdam alamlo, Ne sai angbong kapadusi angkunglo. Lasi kecheng pen nangtum aphan Ne kisung alam nang chethanmek’etlo, nangtum Nelong pen nang kedengdun thekji aphan. Lake kijutsi akai ahut keklem asai apot si, nangtum komentune pen ta kacheme thekthepinlang ahokpet kereng alam Ne nangtum aphan nangthanvek nangji, nangtum chechak un’edet mate arju thekthedet tahai pima lake kepleng damde, kechok damde alam pinak. Ne sai keklem ingtonpo; kangting nang kihir ahut hi-i arideng keklokledetji lapen kivirvedetji aphan, Ne keklem nangji asai an chepetangpo, lapen nangtum aphan nang kisikpi ason an nangthan’etpo. Nang kachinine atovar ongpiklang, lapen kachinine ason ongpiklang. Nangtum kachinineso kali; nangtum abang arpum lapen nangtum akelet an Ne chini peme. Lasi, nangtum kachini un’e alam ongpik pu sitame, aphrang pen nangtum kachininepin alam Ne nangtum aphan nangthan ingtunglo, pima, non kedobom arpum pen Ne pharman nangtum arjapthip unji ma pu Ne mathaduklo. Ne nangtum aphan ning nangbipik lapu kali; bonta nangtum ke pi asonlo lapen Ne rideng pen nangtum seke envek nangji, lapen nangtum aning arlo ko’an ingcho ma Ne chinine. Nangtum aphuthak sai keklem penang an Ne jakong damlo pusitame, akeme ason nangtum along pen klangkledetlo, lapen akaheno ason ta eri chimun pen chelakha un lapen lake hi-i aphan kapatherak pu anchotlo. Nanglong kedo ason an ke hi-i abikar saidelo. Nangtum ke kejoktang amonit atum ason si Nephan nanglanglo. Lasi, lahai pen ajok, nangtum athak kachepeklang a’ot nanglang si, nangtum aning angthin anta Ne nangchini pemelo. Laso apot si Ne nangtum aphan nang mathaduk titi: monit atum, amena aning kehang aling si kai achethe renglo, tangte, monit atum memuchot jima mate pini akereng pen pangbar unji ma? Osohek ason kamatha aning angthin pen chelangdam ra mathavive ma? Nangtum kangvaitang akhei – Israel aso atum ason – Ne inutvet aphan – kaike amat – nangkroithip unji ma? Nangtum along pen keklang ke avi kave aosomar ason api-apo along pen chongvirjui pu a’ot kalidet, bonta anem kave, kahenodak amarat, ahemphu anem ke’en un’e amarat ativi ason. Nangtum aning-angthin chechini peme nangji, nangtum akechokche anke chingripetlo; lake nangtum angbong akeso api lo. Ne nangtum aphan eson nang kekhangji ke pini Ne men pen hakhi karjap along dothip non. Ajat ason pen sita, keso barim nangpapekhailong rinon. Hakhi karjap henlo akethenei asonlo – lake Ne sai avibonglo. Mary le amang along Jehova kapeklang alam kekroi, lapen karju ason thakthak, nangtum ta Nelam arjunon. Ingthirjir pu apun kechok ke la anvetlo. Pima, Ne lam karjulongnei ta nangtum henlo, lapen Nelong pen hirjume kelongnei ta nangtum henlo. Nelong kedo ador keso an nangtum arideng nanghodailo, Nelong kedo ason an nangtum aphan nangpilo, bonta Israel atum pen nangtum cheprekpiklang; hini apirthe le kacheprek ason an. Bonta, halatum pen pangbardam lote, nangtum si ke’ong muchot ason deng longlo; latum ke Ne raje kacheklangji aphan si chonghong phronglo, bonta nangtum ke Ne pen mesen arni dorap longlo, lapen Ne kelong anam nangtum pen chethak longlo. Laso akacheprek pen, nangtum Nephan nang kehang charbu lapen nang kachebohong a’ot konat pen si kelonglo? Nangtum ale longpiklo kalima? Ne nangtum aphan ke’ongdung ason nangpilo, bonta, nangtum ke Nephan ning ke’oi, matha kiduk, kekhang un’epin aning kipung lapen ning kangsam un’e si nangpilo. Nangtum a’ot nang hijim memelo – bonta nang ingjinso ta memelo, lasi, Nangtum aphuthak abatai batai ning kithi, ning kejangje kedoan joilut pen anpar ajat ta klemthekthedetlo. Ningkan suri sose Ne sai keklem angbong, monit atum pen Ne chetorkoke, pima, monit atum akai angbong “kachongthui” litpik, lapen lake hako akai ahut aphusar arideng pen kedenglong ason lo pu Ne chinilo. Monit alon anta kavedet aphak lapen methan aphan ne hijimpiklo. Nangtum kachinine ta lit ongchotlo! Nangtum a’ot adur heno ongchotlo! Nangtum aning ingtang onglo! Ne jongsi lahai alam lapen asai Israel along le pale ason te, komentune pen Ne nong thepikpo. Bonta, nangtum angbong la long un’elo; pima nangtum along kelangrop, nangkachelangmo, lapen kachepalamtap pen plengsetlo. Nangtum aning ingtangkoilo, lapen amo vangvepiklo!

Nangtum Nesai apharman doan pen chehodaidet nangji. Nephan ale kevanji le nangtum sai klemnon. Nangtum along kadure ason an Nelong pen kelongji aphan nangtum kachinine ason an Ne nangkachethanji aphan Ne ninghanglo. Nangtum akechokche ake’ongpi do sita, Nelong pen nangtum ale kelongji aphan, pirthe ketheklonglepin adak atur kelongji aphan, nangtum aphuthak keklem nangji ason an Ne klembomji, kangjinso padu Ne nangtum aphan nangpiji. Ne la an sai keklem aningkan keong aphi anta, monit atum Nephan nangchinine. Badu aphan kethanthepinlang alam Ne nangtum aphan nangkethanji ninghanglo.

Monit atum angbong ke, Ne ke latum mek pen kethek longle aKarjong, lapen laso Karjong lake monit atum pen chingvuisaise. Pirthe athak ne sai keklem phurun kethom (pirthe kithip, pap pen kelang, lapen kapanahok) dokok ajok, latum angno ke kaprek kaprek apor cheklanglo (rat angno kali) latum angbong sai keklemji aphan. Monit atum angbong ne kacheklangcheng ke Pap pen kapejok akai ahut. Kalang, Ne Jihudi ahemtun along pen si vanglo; laso ajok, pirthe athak Arnam kevang ketheklong ke Jihudi akhei atum henlo. Labangso asai Ne methang amat keklem athe lake monit aok ason cheparjan si pap pen kapejok asai along kacharkliji aphan. Labangso ajok, Nephan nang ketheklongcheng ke Jihudi atum henlo lapen lake Kangjinso Akai ahut henlo. Pirthe aok pen sai keklemcheng halaso ahut henlo. Recho kapangri akai ahut, kechoklim pen ron kehai, lasi pirthe aok pen si biresak kivi asai Ne klemlo. Lake, Ne pirthe aok pen batai hini aphong pirthe asai keklemthulo. Padusi asai ingdeng hini along ke, monit atum keklem asai an checharchedet lapen chini un’epin akarjong lapu kali, bonta inut amonit karjong pen si ok ason cheplanglo. Lasi, monit amek angden along ke, Arnam arje lapen aning angthin ason avepinpen monit ason si planglo. La anchot kali si, monit atum kachechardam a’Arnam ke pinso anchot kali si, arloso ason ta theklonglo, lapen latum manghuloi ason si planglo. Abatai batai, Ne kamanghumeme asai keklem pen apot ke’ongdung atum aningkan ningkan kekroi barim aron paphukpilo. Monit atum manghuphrong! Arnam ke Karjong Kangthir, Karjong, aphan throksi an kangtangkring aKarjong mate pangrompet un aKarjong anchot kali si, lake monit-eson thakthak amonit, lapen monit binong. Alangli ke pinso anchot kali arloso ta lo. Latum kachingbarkri lake banghini ta monit along si hachelo, bonta kachingbarbe ke inut abang ke Karjong Kangthir ajakong pen si inghulo lapen inut abang ke monit along hachelo, bonta Karjong pen si manlo. Latum kachinglit lake banghini ta Arnam aok pen si planglo lapen Po Arnam asai si klempilo, kachetonte ke, inut abang ke pap pen kapejok asai klemlo, bonta inut abang ke adim kacherailok. Banghini ta Po Arnam amen pen si arjappo, inut ke pap pen kapejok abang, kanghon, kangjinso pen plengset, lapen inut abang ke ahokpet aning-angthin pen keplengset a’Arnam, aning kithi lapen kangsai aning plengset. Inut ke pap pen kapejok asai keklem abang lapen kijut un’e Keja Abang, bonta inut abang ke ahokpet a’Arnam lapen ron kachepehai a’Arnam. Inut ke Kecheng, lapen inut ke Kijut. Inut ke pap kavepin monit aok, bonta inut abang ke pap pen kapejok asai keklemtang abang, asai cheklembom, komentune ta apap-apun ave. Banghini ta isivet aKarjong lo, bonta banghini ta kaprek kaprek aok along si dolo lapen kaprek kaprek adim si hachelo, lapen suri suri aningkan adak dolo. Bonta latum keklem asai anta chetonpik lapen isivet, chetorkoseise, lapen isivet achethe pen ta ningje un. Banghini ta monit, bonta inut abang ke sopinso lapen inut aoso abang ke arloso. La an aningkan angbong, monit atum ketheklong ke karjong, monit lapen pinso pu anchot kali si, monit atum akamatha ateng pen kachetondamde ason ke’ongdung theklonglo. Lasonsi, monit atum komentune ta Nephan nang chinidak un’elo. Latum ke Nephan nangkroi bonta aning ta nangthethe – Ne dovek ason si latum mathalo, bonta alangtum akai along Neke mang ason si cheplanglo – laso ajoine, non anta Arnam kopilo pu Monit atum chininedetlo. Lamthe isi pen nang Ne phuthak tok nangji pute kosonsi tokpo? “Jisu henlo ahok Arnam, lapen Arnam ke Jisu anvet,” pu nang tokhai ma? “Arnam ke Karjong, lapen Karjong ke Arnam lo” pu nang ningjethiphai ma? “Arnam ke monit aok chipindengchot abang,” pu nang kipu nang ning rengme ma? “Jisu araje ke Arnam kethe arajelo” pu nang ningjekhut hai ma? Nang ning arlo pen Arnam akeme aphuthak ningjethip hai ma? “Arnam ke amethang araje ason pinso aphan si pinchongchot bonta arloso aphan pinchongche,” pu nang ningje hai ma? Nang jongsi pudet pulote, pirthe kedo amonit angbong arloso avedet loma, mate soarlo atum monit pu lakha ponji ma? Arnam kopi ason ma pu nang chini peme loma? Arnam ke monit ma? Arnam ke Karjong ma? Arnam ahok ahak pinso ma? Ne keklemji pu asai Jisu si papleng unchotji ma? Nang jongsi la an alam angbong pen isinat si chongvaichot abang pulote, nang ke thangnat ta kachininepin pen kekroithip abanglo. Ne jongsi monit aok pen ephongvetnat si sai klemchot pulote, nangtum nephan akeme nangmathaji ma? Ephong nang langphli penta Nephan nang nangchini unji ma? Nang kereng un akai ahut Ne phuthak kachini ko’an ma pen nang Nephan nangchinipet unji ma? Ne jongsi batai hini aphong monit nang cheparjan te, nang Nephan koson si nang chini unpo? Nephan thengparpan athak nesakverji ma? Arnam ke nang kamatha ason joike ason ma?

Nangtum akekroi ahokpet sitame, nangtum inutbak ta Ne phuthak kechoklim alam than thekthe, lapen inutbak ta ketheklong an ason chethanplir thekthe. Mathatha: pini, ke’ongdung atum, nangtum keklembom asai ke amo vangvedetlo, lapen ok aphan ri ronglo, ok aning kehang peplengronglo, lapen ok pensi ning cheparong’ilo. Ahok pu ason nangtum along jumpiklo. Tangte, koson si, nangtum ketheklong ason an nangtum kethanji aphan karjap haipo? Ne lar karjapji aphan nang ning cherotkhut hai ma? Nang pini ketheklong ason an than haihedet pu arni nanglerok lote, nang ke inut Arnam kithiptang ajatonlo pu nang chepangbodet si, amo kevangve amonit ason si nang cheplangdetji, lapen nang kereng ale avedetji. Nang ke monit kalidetpo pule pudet sita me! Ne nang phuthak lakha un’epin asai nangklemlo, bonta non anta nang ajat ason ta charlile, ajat ta chinine, lapen nang kachepeduk athe ta pathethe, Ne sai keklem angkang pathepo pu apor nangle lote, nang ke manghuvong si, nanglam ta chonche lapen ale kave abang mandet. Nang lason dinghak ajok nang pappi plangpledet jima? Mo halaso apor nangle lote, nang nangning che’oi’ejima? Ning kithu’it abang manme jima? Sai avedet lapen kedo pangtar ajok le ne pini lahei asai keklem kali, bonta mohut Ne sai keklemji apiri si elo. Ne sai avedet ajok pine esonbak akimi asai pangcheng nangpo pu kali. Ne keklem asai nangtum nang chinidun nangji; lake oso rongbong kijui asai ason kali, bonta Ne Po asai si ne klempilo. Lahei asai ke, Ne le Ne ning kehang aling keklem asai kali pu nangtum chinivek nangji; bonta, Ne po alar si Ne arjaplo. Non nangtum keklem nangji asai ke, kengset pen Nephi kidun, lam karju, kachelarthek lapen ahok alam kethan henlo. Nangtum kachini nangji ke kopi apot si nangtum Nephan nangkekroi nangkok ma; lake nangtum anuttin ta kacharju nangji akenangsotlo Ne Po ke, Alang nong ketheji aphan, pirthe kithip ahut pen ta nangtum aphan Nelong kapevangjisi thailo. Lake Ne sai keklem, lapen Alang nong ketheji aphan, Alang nangtum aphan ingvai paphranglo. Ne po ajoine si pini nangtum Nephan nangkroilo; Ne po nangkangvai ajok si pini nangtum Nephiphi nangdunlo. Lake nangtum si kachongvai apot kali. Nangtum kachini nangji akenangsotnei ke, Ne pharman karjapji aphan si Ne Po nangtum aphan nang ingvailo. Nangtum aphan Po nelong nanghodailo apot si Ne nangtum aphan nangkipi aron, lapen Ne nangkethan alam an kroi nangji, pima Ne kereng aron an kekroi ke nangtum asailo. Nangtum Nephan nangkekroi athe ke la henlo. Lasi, Ne nangtum aphan nangpulang: nangtum ke Ne Po Ne rideng nang kahodai amonit lapen Ne kereng aron nangkekroidunji atumchot. Bonta, nangtum ke Nephan si nangkroi chotlo; nangtum ke Nelong pen keklang atum kali, pima nangtum ke Israel ahemtun amonit kali, bonta hako aphirui asonchot. Ne nangtum aphan nang kar’i ke Ne men aphan asakhi arjap nangji pu aphanchot, bonta non ke Ne keklem asai anat si nangtum nangdun nangpo. Lahei ke mo nangtum Ne pharman karjapji aphanlo. Nangtum jongsi Ne kethan aling karju abangchot pulote, nang ke ale kave abang ason si cheplangdetpo, lapen Ne po nangtum aphan Ne rideng nang kahodai ke ale avedetpo. Ne nangtum aphan nangputhu lethotlo: nangtum Ne keklem atovar anat si kengkam nangchejordun nangji.