Ahokpet Amonit pu Kopi Aphan si Kipudamlo?

Monit aphan kelame-kalahon ke kaike tame Ne arpulo. Lapen anparta, monit atum kadokave kachepahemphulong ke Ne pirthe kapinchong ahut pen si Ne kehokpontanglo. Monit atum chininedet tahai meme mo kejut arni ahut Ne si monit aphan angton pen chepahemphu’etji puke, mate la monit akhei angbong pen kachesongdundut atum doan aphan kachepahemphu’un arni ke Sobar aphan Ne si kehai tanglo pu angtheklo. Bonta, Ne hotur atum jongsi Nephan nangkachedan along chetodun lote, Sobar arideng kachingnang’et lapen asomar kapamandet atum doan aphan, hem along kapahonnang athikdut achakri atum, Ne si chepahemphu’etji puke Ne kaningjetang alamlo. Kachepahemphulong pu ahokpet alamjor ke kehai’un pu aphanlo, katheraknangkok alam ansi kapacheman; Israel arat atum alam pen ason si, laso kipudam ke chenam si kehaidet, kaphangnodet, lapen Nephan nangkhamkhe un’edetji aboi kejop si ansose pithupo. Bonta pini, nangtum angbong la klem lote, laso aphan ke kachepahemphu pusi pulo. Nangtum chini nangji pima Ne akamathadam ke kaiketa monit akhei atum along kaheno an ke angton pen kapavirklungji lapen kahingno amonit akhei’an kerem par’iprat henlo, laso pen apot Nephan nangchesongdut anpar ke latum haihelo, nangkhamkhedunji puke achethe masap ta che’en un’elo mate Ne sai along nangpasiksakdundelo. Lasi, monit atum aphan ateng pen lote, labangso alamthe alamjor ke kesung pen kejok aphanlo. Laso alamthe akaprek ajat alamjor le mathadam sita, Ne sai ke monit aphan kaperem henlo. Lapu malomso aphan ke ahoklo Ne kisik-kedang along monit akhei atum ke adunthu kithikpon aphan anchot, klardak pen paklangji pulote, Ne hotur atum pen monit ke kacheprek avelo. Monit henlo kahenonei atum pima nangkhamkhe lapen Nelam dengdedetlo. Monit ke Monit atum ke Ne ahirjuno kipitang kaheno atum asomar-asumar pen isinatlo. Monit atum ke akaprek kalilo Nephan nangkachongthuidet abang Kethenei-Apherangke asomar-asumar atumlo. Monit atum ke madu ta kalilo hi-i atum asomar-asumar angthun abanglo, Nephan nangkedengde ta arjidingklui penlo, halaso ahut pen ta Nephan ke latum kekeng un’edet ahotur atumlo. Monit akhei doan aphan angsong asining ke inghun kebanglu lapen ingtingthir, asapbak akeklar aphan jongsi avete, lapen monit apirthe ke kangtingkuk ahilik along si menmen jangchokpo, laso pen inut akerengji aphan puke mena amahang angden alang kachejot ari tame chethek longledetji mate alang methang aphu le chingthur tame arni theklongledetji. Alang kengpak aber kedo aloti, inghan dopik lapen nahok ta akhurvak saide, kekkek-kangkang henopin khangjang; angton adim amat ta kithitang arpum pen si keter koicho henlo. Kangtingkuk atok anatthu anke kithitang arpum ahin si plengchenlo, lapen kangsamri lapen abin atok along anke hi-i ahur atum si cherai amat dothiplo. Lapen monit atum apirthe along ke nahok tame hi-i atum ahur si damdam-vangvanglo. Asontin ajat api aso-asu, keterbang along si chepatiplo, doan aphan ta ron kachedan along varchor si bengthiplo, lapuson arki kapherememe pen ning along tonglo. Lason apor ahut, lapuson apirthe along, “pirthe akerengme” along, mat si madunon kai kemesen akethan aphan kiridamjilang? Konat si madunon kai kijutdamji adim aphan kiridamjilang? Monit akhei, aphrang pen ta Sobar akengpak arum si kesung pen donanglo, kechengsi ke cheparjanbang Sobar arje ke’en pen henlo – anpar ta, monit akhei ke Sobar ateng akamatha kedo atumlo, lapen Sobar apharman si sai keklempi ahakhi angthek dolo, arjulongdak lapen cheklangdaklo. Koson si lason amonit akhei atum, lapuan aphu kahenotang ardi kavedet adilung atum, lason kahenotang monit ahemtun aso-asu atum, Arnam ahakhi cheman unji? Konat pen si Ne adak-atur anongthe vangpo? Konat si Ne lam apharman komatne kethan pangcheng unpo? Pima hotur atum ke, kahenotang monit akhei dolo, Ne birudhe si arjappo, monit akhei aphan chenam si pon’etlo – Ne le hako kedamtang ahut kaselam amonit akhei lapen Ne nongthe adak-atur pen keplengsetpi lapen Ne kerenglong – lapen latum aphan paterbunglo. Ne nongthe adak-atur la nangthijoklo, lapen kedoan monit aphan keterklui aSobar abikar penpen ardikhup kok’iraphet si ningperunglo, lapenthu keme pen kaheno kachini’un athengpi arong athe si alang ingsiplo. Kecheng ahut, Ne monit akhei pinchonglo; lake, Ne monit akhei aphusar Adam pinchonglo. Alangphan araje lapen abang arjon anta selam pemelo, okpran ajakong ta akele mepik, kangtang-kangsak ta akele dopik, lapen anpar tame, Ne nongthe adak-atur angkang si dolo. Monit aphan Ne kapinchong halaso arni henlo nongthe pen kachehokmemenei. Laso aphi ke, Eve aphan Adam abang arpum pen ensi pinchonglo, lapen alang amat ta monit atum aphisarlo, lapen lasi Ne kapinchongtang amonit atum anke Nechethe pen si plengsetlo lapen Ne nongthe adak-atur pen si akele longlo. Adam ke Ne rideng pen si ahokpet ke mahang theklo lapen Ne raje apharman ason si pacheklanglo. Lasi ahokpet “Adam” pu alamjor tame Ne si kapinchong abang pulo, Ne okpran ajakong pen si paplenglimlo, Ne nongthe adak-atur pen si dolo, abang arpum lapen araje ta dolo, karjong lapen chethe tame dolo. Alang inutnat aphan henlo kapinchongvek amonit ke, karjong kedotang, Ne pharman adular ason kacheklang ki’unji, Ne raje alanglong dolo, lapen Ne chethe si chodenglo. Kecheng ahut ke, Eve ke chethe kedo Ne kehoktang kapinchong adunthu amonit si pemanlo, lasi ahokpet “Eve” pu alamjor tame Ne nongthe adak-atur keponkriji kapinchong abanglo, Ne kangtang-kangsak pen si paplenglimlo lapen anpar tame Ne nongthe adak-atur pen si padorlo. Adam along pen si Eve vanglo, laso apot si alanglong tame Ne raje dolo, pima pulote Ne raje pen kapinchongvek adunthu amonitlo. Ahokpet “Eve” alamjor ke kereng amonit pulo, karjong, ok, lapen areppi pen, Ne adunthu kai alam kachethan lapenthu ke Ne adunthu monit akhei angbong arajelo. Latum ke monit akhei aphusar-phisar atumlo, monit atum kangthir’et lapen anam kesodak kabirti asonlo, lapen, kecheng pen tame, kereng’et abang aphan karjong pen paplenglo. Tebonta, hi-i abang vang si nangpasungdetlo lapen monit akhei aso-asu atum aphusar-phisar aphan bengponchek pondetlo, monit apirthe aphan katheang kavepin along paklobuplo, lapen Ne kedo kereng alam ke kapakroikrepinji aphan si aso-asu atum aphan pinchonglo. Lapen anpar akesung muchot abang ke lapulo, monit aphan hi-i abang kephangnobom lapen latum doan aphan kepasungbom ahut, chenam si Ne nongthe adak-atur, Ne kai alammo, Ne jakong-horang latum aphan kipitang doan tame, Ne chethe lapen kereng akai latum aphan ne kivut doan tame, monit apirthe along Ne nongthe adak-atur kedoan, lapen monit akhei aphan pu kedoan Ne ning avi kapadam tame nangthipon bor’idetlo. Monit akhei ke nonke katheang along avelo, Ne latum aphan kopima kipitang ason doan tame chepangbo’etlo, lapen latum Ne kipikang nongthe adak-atur pen cheterek tanglo. Kosonsi latum le Ne henlo kadokave aphan ta kapinchong aHemphu lo pu kachorothekpo? Kosonsi latum le Ne siningangsong along kedo kereng’et pu kekroi thekpo? Kosonsi latum le pirthe along Ne nongthe adak-atur kapachinimek alam kelongdun thekpo? Kosonsi lahei asumar atum le Arnam aphan netum aphusar-phisar lo pu kedengpo lapen latum aphan kapinchong abang aHemphu lo pu karcho thekpo? Lahei kangjinso meme asumar atum doan ke Ne le Adam lapen Eve aphan kipitang nongthe adak-atur, araje lapen kai alammo tame hi-i aphan si aningklarsap pen “chepajirlo”, anchot ta kalilang Ne monit akhei aphan kipitang akai chethe pen ajok latum kereng’i aphan kachiki antalo; lapen latum doan ke hi-i abang kedodunbom ke mathathepinlo, lapen Ne nongthe adak-atur doan tame chipilaplo. Tangte lake “keterbang ardi kavenei” pu alamthe nangkeplang kalilang puhe? Kosonsi lapuson amonit akhei atum, puan hi-i sobar, kedambon kithitang arpum, Sobar asonthot abang, Nephan kelangselet ahotur atum le Ne nongthe adak-atur kelongpo? Monit atum along kedobom Ne nongthe adak-atur Ne che’enthudetpo, Ne kai alammo tame Ne che’enthudetpo, lapen Ne pharman apot monit akhei aphan le aphrang ahut Ne kipitang kedoan ason tame – Ne monit akhei aphan angton pen chepahaidet si chepahemphupo. Tebonta, nang chini nangji athema Ne kapinchongtang amonit atum ke ingthir’et atumlo pima Ne raje lapen Ne nongthe adak-atur dolo. Latum ke Sobar apharman ta kali, mate la kesung kephodun nangji aphan ta kali, bonta Ne pharman ahokpet pen kachepaklang, Sobar abikar pen ke masapbak anta kethek longle kejok atumlo. Lapen lasi, Ne monit akhei aphan pachinilo pima Ne rideng pen kapinchongvek atum apahn si Ne kenangji, Ne kachinghon kangthir’et atum lapen la madu ahormu ta kalidet nangji. Anparta, Ne latum pen ajok ning chepangsamjinpo lapen latum aphan Ne nongthe adak-atur padopo. Tebonta, Sobar kaphangnotang amonit akhei aphan le Ne akenangji kali, pini arni Sobar apharman atum, lapen lason ke Ne kapinchongvek atum kalidetlo. Athema monit atum apirthe along Ne nongthe adak-atur kedobom Ne kache’enthudetji ninghanglo, monit akhei atum angbong kereng atum doan aphan tame Ne si angton chepahemphu’etpo, lake Sobar aphan Ne nongthe adak-atur kehai pu chepaklangdakpo. Ne kai alammo kachethan apot ansi Ne mena aputhak ke paklardak pen che’enchotpo, Ne ningkacheparong’i ason si plangpo. Lake Ne akar’ilo.

Ningkan suri kep an aphurkimo monit akhei apharman apor ensi non pini arni nangkele adim an nanglelo, bontame ha kecheng ahut Ne kapinchong amonit akhei atum koan ne arji kiding pen si kahenotang along jangrut’etlo. Monit akhei ke nonke Ne kar’i amonit akhei kalilo, lapen laso apot si, Ne mek angden, monit atum monit akhei pu amen kachehangji chokche tanglo. Latum doan ke, pima, Sobar kebengtang keterbang ardi kavenei amonit akhei atumlo, Sobar kabochetang kanem’uitang kedambon kithitang arpumlo lapen laso along Sobar si kachingchoi telomhetlo. Ne kerenglang alam monit atum akekroi avelo, mate Ne kevangji aphan ta kachonghong avelo. Monit akhei atum ke Ne akachoningri along aninghanghepin pen nangkethakdun puchotlo, latum malomsovet aphan kedengchotlo, lapen Nelong si kai aningkarong lapen ningkeoi doan mesen pen kachepachoiji puke klemklelo. Athe monit atum Nephan ke kachidam un’edet pusi nanglangronglo, latum aninghanghepin pen akangnek si nangpilo, alangtum ajakong pen apot methang ningkehang si ningchepangsamlo, pima monit atum Ne sai keklem aputhak kachini avepinlo, non kedobom Ne ningkehang alam ta kachini masapsovetlo. Nangtum aphan ke Ne ahokpet si ningjeji: Jongsi laso arni nangle lote, Nephan kangduk-kardom abang madu tame akesung kepho nangtum pen anpar kachechakji joimuchotpo. Nang Nephan akekroi aphant ke, ahokpet pen ke, Job aphan anpar palit un’e – Jew akhei Pharisee atum akekroi ta nangtum aphan nanglitplotlang – lapen lasi, me nangkisun arni jongsi nangle lote, Pharisee atum pen anpar nangtum akesung ansose si arnukkrungpo pima Jisu le kedengdedet, anparta Moses aphan le bang 250 kejabang atum abirudhe kedam, lapen anparta Sodom along le kesoang me akar pen kaphangnodak ansose si manpo. Moses le arlong along thengder pen, lapen Jehova pen kipi ajok lang menmen nangkili, pima lake alang kekroi ajoinelo. David le Nephan nangkero pen ari kedo akum kardeng ahut, Jehovah – alang aning along ningkarong si plengsetlo – pima lake alang kekroi ajoinelo. Job le inglong isi adang abiresak kalana adim kangbodet lapen kachethan un’edet akhi-adat, lapen alang abang arpum le kekru’ang karklokbok kebanghet keman, pima lake alang kekroi ajoinelo. Ne se jongsi alang karjulong pulo tangte, Jehova, lapen Ne nongthe adak-atur le theklong lote, Jehova, athema lake alang kekroi ajoinelo. Jisu Khristo along Pitor le abe kidunthek ke alang kekroi aber si dolo. Pima alangphan thengparpan along Nephan ajoine gojal chesaknangji aphan lapen nongtheklong kai alammo kipi tame alang kekroi aber si dolo. Adak-atur pen keklarchen Arnam asopo araje aphan John le ketheklong ahut tame, lake alang kekroi aber si dolo. Kijusi arni kemanji apharman alang kethekdamlong ahut tame, lake alang kekroi aber si dolo. Kopi apot si Gentiles alongri amulukpi atum kedoan Ne kapaklang alam kelongdunloma pu athe ke, lapen monit atum angbong Ne sai keklemji aphan Ne ok ason kevangthu alam kapachini’ilong ke, alangtum akekroi ajoinelo. Ne kesodak alamthe kephodun atum kedoan ke tebonta alangtum mena si ningkangsam vanlo, lapen kejoktang atum anke – alangtum la keklem ke alangtum akekroi pen apot kalima? Komatma Nephan kekroi atum bonta kesung-keboi kachechaknang, tangte latum aphan ta pirthe along panungkuk kalilang puhe? Ne lamthe pen angtan kedo atum doan, kangsai akesung pen kekat atum, pirthe along si latum doan kachingbe dun’et kalilangma? Chung-phang’ok abotor ahut arvo heihui asonthot si lahin-lahin kangjarthap pen latum isinatlo, kesangji adim kave, Ne ningkapangsam alamthe kelongdun duredetlo. Ne kangchek lapen kapaklar le latum along aphiphi dunde tame, tangte latum ke kachorek atum ason si along pen along kedam kalilangma, sining angsong hemrengme pen angtan atovar along kijuijam ason? Bangso apirthe ahokpet nang kesangji adim loma? Chenam si nang, Ne akangchek panungkuk si pirthe along pen ainihak ningkangsam akangnek longjima? Chenam si nangning kangthaidang adim along, kapatujoi ki’un’edet akangthaidang, la malomsonat aningkarong pen nang pador unjima? Nang hem isi aphan nang chechongthui undet tahai meme, bonta nang Nephan ke nangchongthui un’e. Athema nang akekroi ke masapsonat anchotlang, nang ke nonpu ta, pini arni an, ajat tame kerengmenei akai kelongji aphan kiriji ajakong longlepinlang. Ne nangchoningrilo nangphan: nang kai dingpi ok aphan ajoine ardi kavedet lapen sai kapachingkhandun aphan mute Nepharman athikdut pen nangkai ebeng an sai nangkeklempi si memulang, monit atum kachechak ki’un’erem kisung ason doan kachechak. Kopi ajor dopo nang mena aphan ongdung kachebirti aphan anchot lapen Ne akangchek pen kekatjui pulote? Kopi ajor dopo Ne la malomso akangchek pen nang kachepatujoi ra kijut un’epin katheraknang le kachodengnang, kijut un’epin akangchek? Ne klemkle, chenam ta, Ne ninghang ateng along madu aphan ta inghumhe. Komatne jongsi Ne kemangdam ateng along ahokpet pen kachipidundetji akar’i dolote, Ne latum aphan aningpaoi’edetji. Bonta Ne kenangji ke kadokave amonit ta Nephan kroi nangji, Job le Nephan akekroi ason, Jehovah. Nangtum akekroi jongsi Thomas aphan litmunak, tangte nangtum akekroi aphan Ne akero binong longdunpo, nangtum akekroi along si Ne aningkangsam nang longdunpo, lapen nangtum arni heihui along Ne nongthe adak-atur nang longdunvekpo. Tebonta, monit atum pirthe aphan kekroi lapen hi-i aphan kekroi atum doan ke alangtum aning chepangtangdetlo, Sodom arongsopi amuluk atum ason thakthaklo, tomon kejap asangti aduk-abet si latum amek along dolo lapen latum angho along hi-i pen kelong adan-adi si longlo, pima pulote hako pen kebangthip anghun aphu si alangtum along hi-i atum cheparidenglo lapen pirthe along aronre pen cheraidetlo. Alangtum akamatha ason doan ta penang anke hakoko arni ahi-i si angton pen bengthiplo, Lapen laso apot si, monit akhei akekroi ke tomon pondetlo, lapen latum Ne sai aphan ke chenam si pangthek thekthedetlo. Ne sai aphan aningkehang kalipin pen ainihak si kelangji aphan keklem kabor’i pen anpar ke latum thangnat klemklelo mate athak langpruiprui akangsirdam anchotpo, athema latum aphan hako pen si Sobar abikar cheparidengdetlo.

Ne monit akhei aphan chepahaidetpo athema Ne si monit aphan kapinchong lapen ke, penang latum Ne kapinchong keongdung ahormu an pen ningcheparong’ilo. Bonta monit atum Nephan nangpanungkuklo; Ne ke alangtum aning along pen avedetlo, lapen Ne ke alangtum akereng along anghor ason si nangtheklongronglo, lapuan angdenglo, Nephan nangtheklong peme tangdet aphi ta, latum Nephan nangpanungkuklo, lapen Nephan koson pen si nangkehaiji aphan doan atovar kiri alangtum aphu tarlok chephangno’ilo. Nephan monit atum alangtum aphan arsikjik pen nangpalang longledetlo mate alangtum apharman kenangsot aphan ta thikpi longledetlo, mate alangtum kechokdamde heihui anta Nephan latum pangsai longle lapen ingchek longledetlo. Laso along kacherapdunhetji ke helopik alamlo, latum aphan ke palangselet ronglo. Lapen lasi Ne sai ke Nephan nangchininedet tame Nelong si kecho, kejun, lapen ningkacheparong amonit atum aphan kepon, lapen latum aphan kachepahai henlo. Monit akhei aphan Ne arisim thipon’etpo, lapen tangte, Ne tekela doan ta cheponthupo, Ne nongthe adak-atur ta cheponpo, Ne kedo adim along si Ne puthot chedamthupo. Pipotma monit atum keklem kechokche apot arjidingklui ahut pen si Nephan ning aduk nangpidetlo lapen Ne sai tame phangnodet si achet pemandetlo. Kahenodak atum le kepondet aphrang ke ningarongset pen kedamdamlo anongthe adak-atur Ne kacheponthudetji si mathalo, monit akhei aphan alangtum akai ason si parengdunverlo, “ningkangsam lapen dorplup aningkarong pen si kedo lapen keklemverlo,” “alangtum amena ajaidi si pachotikiverlo,” lapen Ne alangtum akai along anpar ke thangnat ta pasiksak dundelo. Kahenodak atum along pen bonta nonke Ne nongthe adak-atur kachepondetji si Ne mathalo, pirthe kapinchong along monit apharman Ne kevanpi angton anongthe adak-atur doan cheponthudetpo. Anpar ke pirthe along monit akhei aphan puke Ne la pipedetpo. Pima monit atum Ne nongthe adak-atur kirimvet thekthedet anchot ta kali, bonta Sobar araje pen si latum chelar’idetlo. Ne kevangthuji aphan ke monit atum birtivetve, mate Ne nongthe adak-atur arni apharman ta latum anong’e thikthe. Latum doan ke Ne akangchek ta ningkarong pen dengde, Ne nongthe adak-atur Nephan kachipithuji anta latum masap ta ar’i’edetlo, mate kahenodak atum abikar pen ta latum chepajokji ninghanghedetlo. Monit akhei atum Nephan kachongthuji si aphrang ateng klembomlo, monit atum nonpu anta keklardang akangnek lapen ningkarong arje si aphrang ateng chedothot bomlo. Latum ke Ne nongthe adak-atur latum along pen chepondet aphi monit akhei along akarnukkrung akangting nangkisunji puke chemathathepinlo. Jongdamvet lote, angton monit akhei apharman Ne arni kevangji puke latum chichininepinlo, Noah arni ahut monit atum akesung aphan pen anpar latum ke chechak nangpo, pima Ne nongthe adak-atur Israel along pen chekakdet aphi koan akangting chemanloma latum chichininepinlo, athema monit atum koan si ajo akangting akarnuk kesung kedoji alam katheang ahut chetengnedetlo. Arni chedamthu si chepatudamjoi aphi ke monit atum along kangting nangsunpo, alang puthot chiru-charnapji lapen aso chingkritji bangso akangting along. Nangtum chetengnedetloma, Israel along pen Ne nongthe adak-atur kachekak ahut, koan si Israel arat atum halaso arni malom kesung kachechak nangloma? Non apor henlo nangtum Ne nongthe adak-atur ketheklong, lapen non apor ahut henlo nangtum Ne nongthe adak-atur arni kapachethang nangpo. Ne nongthe adak-atur bangso keterbung alongle pen che’odet lote kangtingkuk angbong monit atum chiru-charnapji. Non henlo nongthe adak-atur arnilo la Ne sai keklembom ahut, lapen monit akhei aphan kisung pen Ne adai kepatu jokplotji aphan arnilo, pima Ne latum pen kesung-keboi lapen katora-khamkhe apor ahut pachethang ingtungte. Ne ninghang ke monit akhei aphan angton pen kachepahai’etji anchot, lapen monit akhei atum angbong pen kahingnodak atum an aphan angton pen kaparem henlo.