Kopilo Nang Kekroi Aphuthak Kachinidam?

Monit atum along kekroi pu alamthe kethandak thekthe do, tebonta monit atum kekroi along kopipi ason doma chinine, kopi apot si alanglong kekroi dolo puke chinine muchotlo. Monit atum kachinidam durepik, lapen monit amethang amat ta kadure dopiklang, alang Nephan akekroi ke bonta mathakrang lapen langkrang henlo. Alang le kopi aphan si kekroi puloma chinine puvoiphit tame, mate kopi athe si Nephan alang kekroi doloma, alang ke Nephan kekroi ahir chipijot si dobomlang. Ne monit aphan akenangji pu kehang ke kopima alang Nephan ahir chipijot pen nangkepahangji aphan lason kali mate Nephan kekroi kemang avepin si kachepklang’ichot ta kali, athe Ne keklem asai ke pima monit Nephan theklongji meme pu aphan, lapen Nephan kachiniji, pima lason pen monit atum ningdokkhaklo lapen Nephan akimi atur pen ketheklong lapu kali. Ne aphrang penang an angthek lapen thedung asai lapen penang manghumeme ason klem chepaklangpon tanglo, lapen halaso ahut Israel aso atum Nephan thedung ningkedok akar’i chepaklanglo lapen Nelong kedo kethekpin ason pen keso pamelo lapen hi-i heihui aphan keplung apot thedung man-peng nangpilo. Halso apor ahut, Jihudi atum mathalo Nelong keso kapame ajakong ke kethek pemelo pulo, bang apar si kemeneilo – lapen athema penang an Ne keklem amo apot, latum kadokave Nephan thedung kachoro pajirlo, lapen doan Ne jakong heihui apot thedung ningdok akar’idam pen chemathalo, Lasi, kadokave komat ma Ne kamanghumeme asai keklem theklong pen Nelong aphiphi kidun kapatebokdun anke, lason pima suri amuluk atum Nephan komjai si Ne keso kepame nanglangdunlo. Ne penang an angthek lapen thedung amo chepaklanglo, tebonta monit atum Nephan kethek peme selangbang pu nanglangkranglo; lasi, lasonsi, halaso apor ahut monit atum aphan kethanpon penang an alam Ne ningjejelangma, tebonta latum Nephan ke asomar pen anpar akethemulang thanbang pu nanghokkranglo. Pini arni anta, monit atum Ne sai keklem phurkimo kabirti ason doan theklongdet aphi tame, alangtum kachinidam ke non anta pima Ne ke keso kapamethek inut thedung selangbang lapen kachininedet atum aphan athanbang pulo, lapen latum Nephan kipudam ke kangjinso thekparpik Hemphu Jisu Khristo pulo. Komatmat ma Baibel alo alam kethanthek atum ke Ne keso kapame kethek apot ta palit’et tahaipo meme, mate komat ma nonke alangtum athanbang aphan tame kethekmunak aosomar atum tahailo, tebonta lason nong kachethangklong amonit atum, pirthe adang ta amen kachinini’et atum doan, Nephan inut selangbang puan si ardi pavepin pen nanghokpon chotlang. Ne keklem amo doan ke talo akung asangtimili aduk pen anparta aphai ongmulang, lapen Ne kethek-kere ke Solomon asomar doan kadokave aphan tame litmulang, tebonta monit atum ke Nephan inut kethekparpedet selangbang puanchot si mathalo lapen monit atum kachininedet athanbang pulo. Lasi penang an atum Nephan akekroi ke pima latum aphan Ne keso pen pame’unji meme puchotlo. Lasi penang an atum Nephan akekroi ke pima Ne jakong doan pen ajok alangtum abang along pen kangthirthe akarjong Ne kiplungthekji meme pu aphan chotlo, lapen lasi penang an atum Nephan akekroi ke thang apot ta kali pima Nelong pen latum ningkarong lapen ningkangsam longji meme puchotlo. Lasi penang an atum Nephan akekroidam ke akeongpi hormu-hortar akhi-adat Nelong kehangji aphan puchotlo. Lasi penang an atum Nephan akekroi ke laso akai ingsamjin pen lapen joike lapen ke jokvan pen kevangjilang apirthe along kedodun longji aphan puchotlo. Lasi penang atum Nephan akekroi ke meherang akesung pen kejok longji lapen sining hemrengme ahirjume kelongdunji aphan puchotlo. Lasi penang an atum Nephan akekroi ke lomso akerengme aphan anchot, tebonta kevangjilang apirthe along pen thangnat ta kelongji aphan riredetlo. Ne le monit aphuthak Ne ningkithi vanlo pulo tangte lapen kadokave ningarong lapen ningkangsam alang pacheparidengtang an thithulaplo tangte, monit ke ningbiri si chemanpo. Ne le monit aphan meherang akesung pilo tangte lapen sining hemrengme ahirjume che’enthulaplo tangte, monit atum akatherak ke ningkithi si chemanpo. Monit atum alangphan keso pametha pu Nephan hanglo te, Ne alangphan langledetji lapen alangphan ke kelangselet asonsi mathaji; Nelong pen monit kache’odet alar ke kaheno adovai lapen mekbin langno akrong si choridunlo. Ne le kadokave pima Nelong nangkehang pen kipi monit along doan ason cheponthulaplo tangte, anuttin tame kangbolapji angden thekthedetji. Lasi, Ne pulo pima monit ke nephan kroilo athema Ne kangjinso kipi ongchetlo, lapen akeongpi kelongji aphan ta helo ongchet si dolo. Jihudi aso atum Nephan kekroi ke Ne kangjinso apot lapen Ne kedam aling si Nelong nangdunlo. Laheihui gian keong’edet lapen kepholongledet kachinikrang amonit atum ke Ne angthek lapen thedung asai keklem kachepaklang ketheklong aphan anchot si rilo. Latum Nephan ke Jihudi aso atum ahem along ahemphulo pusi nanghokponlo athe ke thedung manghumeme asai keklemthek apot. Lapen lasi Ne le monit atum along pen hi-I phlunglo pulote, latum angbong penang’an kachingvai padodolo: Latum pulo pima Ne ke Elijah, pima Ne ke Moses lo, pima Ne ke kadokave thekkere atum angbong pen abarimneilo, pima Ne ke kadokave selangbang atum angbong pen kethenei abanglo. Ne henlo chethe, tovar, lapen ahok pu pima Ne Methang kaningje pen anpar tame, madu ta Ne bang mate Ne angthek aphan chininedetlo. Ne Po kedo adim henlo sining hemrengmelo pu pima Ne Methang kaningje pen anpar tame, madu ta Ne ke Arnam Asopo, lapen ke Arnam Amethang amatlo pu pima nangchininedetlo. Ne ke monit akhei kadokave aphan kadiya vanpo lapen monit akhei aphan pajokpo pu pima Ne Methang kaningje pen anpar tame, madu ta pima Ne henlo monit akhei aphan Kapajok Abang pu nangchininedetlo, lapen monit atum Nephan kachinidam ke ningkemesen lapen kanghon-kangjinsothek amonit puchotlo. Lapen Nelong kadokave kopima kedo aphuthak Ne Methang kethanthek pen anpar tame, madu ta Nephan nangchininedetlo, lapen madu ta nangkroikredetlo pima Ne ke kerengver Arnam Asopo puke. Lason henlo monit atum Nephan akekroidam, lapen latum Nephan kapaluji puke lason pen henlo. Kopuson si latum le Nephan karjappi thekpo latum along Nephan lason kamathadam alam otthip pulote?

Monit atum Nephan kroilo, bonta latum doan Nephan hakhi kachipiji aphan ke un’edetlo, mate latum ke Ne Methang aphan pachinine aphrang Nepharman asat paklangji ta thekthedetlo. Monit atum ketheklong ke pima Ne api doan lapen kadokave kangthir amonit atum doan aphan palittheilo puchotlo, lapen kelang ke pima monit atum Ne keklem ason ke klem un’edetji puchotlo. Lasi, Jihudi aso atum pen chenglok nonjong pini arni amonit atum kedoan, kadokave komat ma Ne nongthe asai amo ketheklongtang anke Nephan akeongpi kar’idun pen anpar akeong ke thangnat ta avedetlo, lapen isinat api angho pen tame Nephan hakhi nangkarjappi puke un’edet saidelo. Ne Po anchot si Nephan ke hakhi chipi ponlo, lapen Nephan atovar pinchongpilo kadokave api atum angbong; jongsi Alangli le pemanme, ne koan ma sai klempon pu tame, monit atum ke Ne henlo kapinchong aHemphu pu nangchininedetji apotlo, athe monit atum ke Nelong pen keponji aphan ansi chinichotlo lapen Ne sai keklem apot pen puke Nephan akekroi ta ave. Monit atum Nephan kachini ke athema Ne ke chingkimepik lapen thangnat aphar pen ta pappi kali puchotlo, athema Ne ke akeongdung kachepatujoi alam than theklo, athema Ne ke akeongpi ason pen anpar ingtuimulo, mate athema Nelong pen monit atum ongdung ale longlo, tebonta ajahak atum anchot si Ne henlo kapinchong aHemphu puke kroilo. Kopima lasi Ne pulo atheke monit atum Nephan kopi apot si kekroi kedolo puke chinidamde; alang Nephan akekroidam ke ajat ta ajor ave mate ale ave pusi chinidamlo. Monit atum ahokpet ke durepiklo, lason si pima alang ke Nephan hakhi karjappiji ta bor’ichotlo. Nangtum along ke ahok akekroi jumpik anlo, lapen kelongdam ta durepik anlo, lasi nangtum along ke hakhi tame durepik anlo. Anpar tame, nangtum ke kachinidam jumpik anlo lapen kadure si ongmunaklo, lason ke pima nang Ne sai amo ahakhi karjappiji atheng kalidetji anbaklo. Nangtum kacheparai ke chenam ta dengdet unji, bonta nangtum chenam-chenum si pima nang Arnam akenangsot ason aphuthak asat kachipiji un pemepoma? Kopima nangtum kachomatlongtang lapen ketheklong ke pima kedoan akai ahut kangthir akurusar lapen thanmek atum aphan anta palittheilo, bonta la kedamtang apor ahut laheihui kangthir akurusar lapen thanmek atum kaningje alam pen anpar thedung ahakhi kachipiji nangtum unjima? Kopima non Ne nangtum aphuthak kipipon ke Moses aphan ta palitjetlo lapen David aphan ta pabinkuklo, lasi lason thakthak Ne kenangji ke pima nangtum ahakhi ke Moses aphan ta kilitjet lapen pima nangtum alam ke David aphan ta kethemunak henlo. Ne nangtum aphan batai pharo anbak nangpilo – lasi Ne ason thakthak kenangji ke Nephan nangtumphan keklempi ateng kachituthu henlo. Nang chinivek nangji Ne henlo monit akhei aphan chethe kipi Inut abang, lapen lake nangtum henlo Nelong pen chethe kelong lapen Nephan hakhi arjappivek nangji. Lake nangtum adenglo athe ke Ne nangtum aphuthak si toilo lapen Nephan nangtum keklempivek nangji asailo. Ne ke kadokave Ne nongthe doan nangtum aphuthak si pajirtheilo, Ne ke kangvaitang amonit atum achethe si pima nangtum aphuthak ke pajirlo, Israel aso atum ta, kelonglepinlang. Keklemvek nangji ateng pulote, nangtum ke Nephan hakhi arjappivek nangpo lapen Nephan si nang pariso arta ke chipidet nangpo lapen nang kai chehodaidet nangpo. Madu aphan le Ne nongthe Ne pajir tame Nephan hakhi arjappi nangji lapen alangtum akai Nephan si chipidet nangji. Lake arjidingklui pen si Ne kepathikmek alamlo. Lake nangtum kemesen akopailo pima Ne nongthe nangtum aphuthak Ne kapajirpon, lapen nangtum adeng ke Ne nongthe apot asat chepaklangpon. Jongsi nangtum le hirjume kelongchotji aphan si Nephan kekroi pulote, Ne sai ke ale kedopik kelong kalidetpo, lapen nangtum tame nnagtum adeng chepachun thekthedetpo. Israel aso atum Ne kangjinso, kanghon, lapen kethedung ason, lapen Jihudi aso atum ke Ne ningkiding lapen kadiya anchot si chetonglonglo. Latum ketheklong ke, Ne Karjong keklem asai ke masapso anchotlo, latum chinidam unchit angdeng anlo bonta nangtum kopima karjulong lapen ketheklong angbong suri pen phant kep anlo. Kopima nangtum ketheklong ke latum angbong pen kethenei akurusar aphan ta litplotlo. Pini arni nangtum kachini ahok ta alangtum aphan palitjetlo; kopima nangtum pini arni ketheklong ke Aron Akai ahut kopima ketheklong ta palittheilo, lapenthu Kanghon-Kangjinso Akai aphan antalo, lapen kopima nangtum kachomatlongtang tame Moses lapen Elijah aphan palitplotlo. Athe kopima Israel aso atum kachinitang ke Jehovah aron aphan anchot, lapen kopima latum ketheklong ke Jehovah aphi arjan anchotlo; kopima Jihudi aso atum kachinidam ke Jisu pap kadiya anchotlo, kopima latum kelong ke Jisu pen kangjinso kipi anchotlo, lapen kopima latum ketheklong ke Jisu arje anchotlo Jihudi aso ahemtun along amat. Kopima nangtum ketheklong pini arni ke Jehovah anongthe adak-aturlo, Jisu pap kadiyalo, lapen kadokave Ne sai amo laso arni anlo. Lasi, lasonthot, Ne Karjong alamthe ta nang arjulongloma, Ne kethek-kere apot ta choro longloma, Ne kemanghumeme apot ta chinidam longlo, lapen Ne kun heihui charli longloma. Ne ke nangtum aphan nangthan’etlo kadokave Ne kisik-kedang akemangdam doan. Kopima nangtum ketheklong ke kanghon lapen kangjinsothek a’Arnam anchot kali, bonta lake kangthir keplengset a’Arnam. Nang ke Ne kethedung asai theklonglo lapen chinilo pima Ne ardi doklong ajakong lapen ningkithi peme pen si paplengchenlo. La anchot ta kalilang, nang chinilo pima Ne ephong Ne ningkithipik Israel aso atum ahem aphuthak along van tanglo, lapen pima pini arni, lake nangtum aphuthak si vang tanglo. Nangtum Ne kemanghumeme chepatujoi sining hemrengme along alam ke Isaiah lapen John pen anpar si kachinilo; Ne kanghonmeme lapen man-peng kethepik atheng ke kadokave kedamtang akai ahut kangthir akurusar atum pen anpar si nangtum kachini keonglo. Kopima nangtum kedeng longtang ke Ne ahok, Ne tovar, lapen Ne chethe pu anchot kalilo, bonta John pen anpar pima kethepik kelangdammek lapen kapaklanglo. Penang ansose chepatujoi alam nangtum chinidamlo, lapen Ne ahokpet arje kacheklang tame theklonglo; nangtum ke Ne kangsai ta ansose si denglo lapen Ne kangthirpet akun tame chini muchotlo. Lapen lasi, nangtum le kapadusi arni ahut si mahang kethek puvoiphit tame, nangtum kachinidam ke pima abarim lapen kedamtang atenglo, lapen nang ke pini arni ahormu apot anta chomat longtheilo, lapen lake kadokave Nehin pen si jongjung keklemponlo. Kopima nangtum aphan Ne karju ke abat do’o kali, athe Ne nangtum aphan ongdung pitanglo, lapen nnagtum ta Nephan ongdung theklonglo. Lasi, Ne nangtum aphan kehang ke Nephan hakhi karjappi hala kedamtang akai kangthir akurusar atum angno, lapen lahenlo Ne ning akar’ivek.

Ne Po henlo lake Nephan hakhi karjappi kecheng abang, bonta Ne kethepik anongthe kedengji ninghanglo, lapen athe ke kapinchongtang api doan angho pen hakhi kachipi alamthe kechon aphan – lasi nangtum aphan Ne kedoan chipilo, pima nangtum adeng nangtum pachunji aphan, Ne sai monit angbong akijut kevanji aphanlo. Nangtum kopi si Nephan nangtum kekroi pu chinidamvek nangji; jongsi nangtum le Nelong chongdat abang mate Nelong se kachelang abang ansi manji, mate sining hemrengme along inut Ne kangthir akurusar si kemanji ninghanglo, tangte nangtum Ne phiphi kidun ke ale avepinlo. Ne phiphi kidun lapuson an akejoike pen puke jakong chepadamthap puchotlo; lason ateng pen Nephan akekroi puke nang arni thangbakbe apor kapadam chotlo, nang pariso arta chephalangnothap chotlo. Lapen mo kijut ahut ke, nangtum ke thangnat ta longlelo. Lapuson ke tangte kachepaduknakji kalilang ma? Ne ke arjidingpik anlo Jihudi aso atum along pen kachekak lapen monit aphan selangbang ta kalidetlo mate monit apharman adovai ta kalilo. Ne ke monit apharman ninghang aling kepon mate kangthan anghor api ta kalidetlo; tebonta, monit atum angbong Ne kevang ke kangsaiji lapen ado kipiji aphanlo, laso ajok monit Nephan chini’ipo. Nang chinivek nangji pima Ne ephong pap kapajok asai klem’etlo; Ne halaso ahut ke Jisu, bonta kaike aphan ke Ne Jisu chemanver un’e, ephong ke Ne Jehovah chemanlo bonta aphithu ke Jisu pulo. Monit akhei aphan Ne ke Arnam lo, kapinchong aHemphu lo, bonta kaike aphan ke Ne Jisu mate Jehovah chemanver un’e. Ne ke kopima monit atum nangkehokpon selangbang cheman etlo, bonta lake laso puno pima Arnam ke monit akhei apharman selangbang anchotlo. Lasi, nang jongsi Nephan nang akekroi along hakoko alam le che’otthipver, tangte nang thangnat ta longlelo. Nephan pini arni nang kopi-koson pen le choro tame: “Kopuan kanghon do Arnam ke monit aphan; nephan Alangli keso pamelo lapen nephan hirjume, ningkangsam lapen ningkarong pilo. Kopuan akemelo Arnam ke monit aphan; jongsi itum le Alangliphan kroichot antame, tangka lapen khi-dat aphan itum jat ta mathadam nangne…,” Ne abinong’et asai aphan nonpu ta Ne pasiksakdun un’e. Jongsi nang pini arni Nephan kroilo, nang ke Ne nongthe ansi longchotpo lapen Nephan hakhi kachipi arjappiji atheng manpo, lapen akaprek doan ke ardi kave si mantheipo. Lake nang klardak pen chinivek nangji.

Nonke tangte nang ahokpet chinilo kopi apot si nang Nephan kekroilo? Tangte nnag ahokpet chinilo Ne sai akenangsot lapen akemangdam alam? Tangte nang ahokpet chinilo nang deng doan? Tangte nnag ahokpet chinilo Ne hakhi doan? Jongsi nang Nephan kroilo puanchot, tebonta nanglong Ne nongthe mate hakhi thangnat ta avedet, tangte nangphan koan lone arji kiding pen si Ne pavir tanglo. Komatmat ma kadokave la kachinitang doan, latum ke Ne mek along ansose si ingsulo, lapen Ne hem along, latum doan ke Ne tovar along kisung pen anpar akaprek thangta kalilo, latum doan ke Ne sai along kesodakji abap angton pen nangparamdunthiplo, latum ke asai avelo, latum ke ale kaveneilo, lapen arjidingklui pen si latum aphan ke Ne langseletlo. Komatmat ma kadokave hakhi kachipi kethekthedet atum doan aphan Ne ningkithi chepaklangverlo, lapen Ne ingchin latum along pen kaiketa cheterekrelo. Ne ke arjidingklui pen si latum aphan kahenodak atum arideng along toi’etlo; latum doan ke Ne hirjume pen angtan si dolo. Mo arnisi nangle lote, alangtum aphan ado kipi apot ansose si hala kiludet soarlo pen anpar arsikjik pemanpo. Pini arni, Ne deng keklem nangji ateng anchot si Ne asai cheklemlo; Ne kadokave asok doan ta abutung thitpo, halahei kesodak abap doan penpenlo. Lake pini arni Ne keklem asailo. Halahei kesodakji abap doan tame Ne kangkrung apor ahut si ingkrungpontheipo, anke sok amu ansi puru along ke pangrumchotpo, lapen halahei abap langno pima kangkrungtang anke me prindun’et si aduk-abet pachemantheipo. Ne sai nonke kadokave amonit atum aphan abutung kapinchong anchotlo; lake, latum aphan chepahemphupon aphanlo. Laso pen ajok si Ne ingkrung pen kadokave amonit atum akijut alam pangdakpo. Lapen lasi nang chinidamvek nangji koson si nang Nephan nonke ningpangsamji, lapen koson pen si nang Nephan akekroi along choklim akrong along nang kengkam kachibi thekji. Kopima Ne akar’idam ke nang kachepabithek lapen athikdut henlo nonke, nang kanghon lapen nang hakhi kachipilo nonke. Jongsi nang le laso apor ahut kopi ahakhi mate kopi akanghon lone chininedet pu tame, nang kadokave Nephan si nang chevanthei nangpo, lapen nanglong kopi ason acho si kabirtipon Nelong si chepharlo’et nangpo: nang kachepabithek lapen athikdut. Nang chinivek nangji pima Ne Sobar aphan kehaidet pu ahakhi ke monit atum kachepabithek lapen athikpet along si dolo, lasonsi monit aphan Ne angton pen kachepahemphu ahakhi antalo. Nephan nang akekroi adeng ke Nepharman hakhi kachipithek henlo, Nephan kachepabithek lapen akaprek thangnat kali, lapen mo kijut ahut anta athikpet pen kedothek. Ne sai adunthu angdeng Ne pangchengche aphrang, koson si nang Nepharman hakhi karjappithekpo? Koson si nang Nephan chepabithek lapen athikpet pen kedo thekpo? Tangte nang kachepabithek aot kedoan asai along nang chipidun’et loma, mate nang klem un’edetji asonma? Nang tangte Ne ajat tame kepathikpon (jongsi kithi mate kapavir pu sitame) along chipidet unjima, mate Ne ado kipi kachechak selet tovar ebeng pen katjuijima? Ne nangphan ado pilo pima nang Nepharman hakhi kachipi thekji aphan, lapen chepabihekji lapen Nephan athikpet thekji aphanlo. Kopi dolang, nonjong ahut ado kipi ke Ne sai puthot angdeng along cheklangponpo lapen kechaknap kavepin pen sai kapaprangpon kelongji aphan. Laso apot si, Ne nangphan ningpethedunlo keresetji aphan lapen nang chethe mate nang kerengbom akenangsot athe aphan thangta ale kave asangti puke pemanlongdetri. Nang chenam ta chinijima kopi si Ne sai kevangjilang kedoji? Tangte nang chinilo kosonsi Ne sai kevangjilang arni keklempo, lapen kosonsi Ne sai kachingpuponpo? Nang chinivek nangji Ne sai aphuthak nang kachomatlong akenangsot alam, lapen anpar tame, Nephan nang akekroi akenangsot alam antalo. Ne keklem dopik anlo; kosonsi Ne le tovar ebeng ke’o tekangpo, nang kamathadam ateng? Ne sai keklem chimitmepin pen dopik anlo; kosonsi Ne kaphangnodakji? Chenam ta, Ne laso akai kepajutji aphan si vang tanglo. Lake ahoklo, bonta anpar tame nang chinivek nangji pima Ne akimi akai kapangcheng ponpo, akimi asai pangchengpo, lapen, akeongpi ke, bangso Arnam kepangri ahavar birta keme kapachetakpo. Lasi nang chinivek nangji pima nonjong keklem asai ke akimi akai kechengji aphanchot lapen kevangjilang arni birta keme kapachethangji aphan kecheng anujok ke’eponlo lapen mohut aphan bangso akai kepajut kevanlo. Ne sai ke nang kematha ateng puan kejoike kali, mate lake nang kekroidam ateng pen puan ale kave lapen ajor kavedet kali. Laso apot si, Ne nonpu tame nangphan pulo: Ne sai aphan si nang chethe ke chipidetvek nangji, lapen anpar tame, Ne nongthe apharman si nang methang aphan chipidet nangji. Nephan hakhi karjappiji aphan si Ne nangphan nangkar’idam arjidingpik anlo, lapen lapuan sose si Ne birta keme kapachethangji aphan Ne kar’idam dolo. Ne ning arlo kopi si kedoma nang la chinidamvek nangji.