Kopi Akamathadam si Kekroi Amuluk Atum Kacheparidengpo
Monit atum Arnam aphan kekroi kechengsi arni pen alang kopi si ale kelonglo? Kopilo nang Arnam aphuthak kachinidamtang kedo? Kopuanlo nang akachelar kedo pima Arnam aphan kekroi pen? Pini, nangtum kadokave ta chinilo monit atum Arnam aphan akekroi ke karjong kejok kelong lapen ok akerengme kelong aphan anchot, mate Arnam akanghon pen apot alang kai kapachingthur aphanchot lapu kali, lapen kaprek do’olang. Lason ke, nang jongsi Arnam aphan akanghon ke ok akerengme lapen tangka pen aningkangsam aphan anchotlo pulote, mo kijut ahut an pu tame, Arnam aphan nang akanghon ingtuiving angdeng an dolo lapen akaprek nang thangnat akenang avelo, labangso nang kiri akanghon ke kapachobeidet akanghon si chemanlo lapen Arnam aphan aningpangsam un’e. Komat ma Arnam akanghon pen ajok alangtum ardi kachepavepin akereng aphan kapachingthur’i si klem lapen alangtum aning along kangtheidang kedo amonit atum an henlo kisung kavepin akai aphan akele kar’i, latum ke ahokpet Arnam aphan kanghon kiri atum kalilo. Lapuson akanghon ke ketoi bor’i, lake phutarlok kerengmesenji aphan kepalong puchotlo, lapen Arnam aphan ke akenang avelo. Kopuson akanghonlo, tangte, lake nang? Kopi ajoine si nang Arnam aphan kachinghonlo? Nonjong amat nanglong kopuan ahokpet akanghon Arnam aphan aklong’et pen dolo? Nangtum akanghon keongdungpi aphai ke la athak kepaklangtang asonthot henlo. Lason akanghon ke isi angdeng kachibi’i aphan pu anchotlo; lake kachelar un’epinji pu long un’e, mate monit atum along angkur chesakji ta un’e. Lapuson akanghon ke kapapuchot amir apu anatlo lapen la athe pathethepin si kridetpo. Kaprek alamthe pen, lason si Arnam aphan nang kanghon doetlo, jongsi nangphan kevangjilang atovar along nangkejapon abang pulote, nang chingthuphunji. Arnam aphan kachinghonbom ahut anchot si nang Arnam aphan kanghon kedochot bonta laso aphi ke nang kai akun ke chelarle si dopo, tangte nangphan ke kangting akeja akarnuk si nangtelomhet pen chepajok un’edet si dopo, Sobar akacheraphet lapen la kachongthui pen nang chenam si chepajokplotji un’elo. Lason atum doan ke inutnat ta Arnam aphan angton pen longdundelo; kepajut ahut ke, alangtum akarjong, lapen abang arpum anta Sobar si ahemphu chemanbompo. Lake kamanghudamji alam amat si avelo. Komatmat ma Arnam aphan angton pen kelongdun peme kalilang atum an ke alangtum kevang kecheng adim si cheledamthupo, lake, Sobar alonglo, lapen latum ke Arnam along pen angdeng kaprek akangsai kephoji aphan kangboppret ame kereng atalo arum si damnangpo. Arnam aphan kelongdun atum an henlo Sobar aphan kache’o lapen alang kacheparideng pen chepajokponlo. Arnam arat kemandunji aphan latum henlo ahokpet pen amen kachethapdunlong atumlo. Lason pen si Arnam arat kacheman henlo. Nang lapuson amonit kachemandunji ninghang ma? Arnam nangphan kelongji aningkehang doma? Sobar kacheparideng pen kejokji aphan lapen Arnam along kacheruithu nang ningkehang doma? Sobar apharman si doma mate Arnam arat aso angbong pen inutlo pusi nang non doloma? Laheihui alam ke klardak’et nangji, lapen puthot kachethan nangji ta akenangsot avelo.
Kedamtang ahut, penang an atum kahenodak akemang lapen akamathadam pen si rilo, latum akiri ke alangtum mena aningkethedam pen pu anchotlo. Laso aputhak non amat ke ihin anat padovet lonang; kopi si non akenangsotnei ke keklemponji aphan ke atovar kiri pen ajok Arnam angno kechoklim kibi ra nangtum anuttin tame kedo peme thekji aphan lapen pajo pen Sobar akeja along akerakhet pen kachepajokvanji henlo, laso pen ajok nang Arnam aphan longdunji meme, lapen Arnam kopima nangphan nangkipu ateng pirthe along kedodun. Lason pen anchot si Arnam akemathadam heihui nang paplengpi unji. Penang an atum Arnam aphan kroi, tebonta Arnam akenangji kopima ta chinidamde lapen Sobar akenangji kopima ta chinidamde. Latum akekroidam ke kiludet lapen aphu kahenodak ason ben, kopima kedambom along si chingbedunbom, lapen lasi kechoklim Christian akai puke avepinlang; kopi si akeongnei, latum mena jongjung akacherap choklim longlepinlang, lason si Arnam pen choklim akacherap tame durepiklang. Lason pen si lake monit atum akesung lapen kephoji meme ason theklongpo, lapen akaprek ason pen ajok Arnam aningkehang kekhangji ta ki’undet penang an do. La pen anta monit atum ke akechok atovar along longdundepinlang pu angthek peklangdaklo, lapen ke alang monit akai ahok kopuson ma pu lutdun longlelang. Tangte kopilo kechok atovar along kidun pu aphan kipudam ke? Kechok atovar along kidun pu kipudam ke Arnam angno ajat apor ahut tame nang ning chepajoithek lapen kechoklim Arnam pen akajalang akachehok, monit atum akadure kopima pu pajo pen kachinidam lapen masapsap Arnam aphan kachinidam akarnuk kelong henlo. Laso pen apot si, nang karjong akimi aklong alam lapen akimi adak-atur katheang arnivang longponpo; nang akar’i thebompo, nang ahok along si kilutdunji aphan ripo, lapen arnivang ta akimi atur lapen akimi akachinidam dopo. Labangso atovar pen ajok, nang pajo pen Sobar arideng pen chepajok unpo lapen nang kai thedingpo. Lason amonit atum ahok akrong along lutdunlo. Nang mena ahokpet keklemlongtang heihui ingsirdam non lapen nang akekroi along nang kedengpon atovar langchari pemenon. Laheihui kadokave aphuthak nang mena che’otthipnon: Nang ahok akrong si doloma? Kopi ajoine pen si nang Sobar nangkatelomchen lapen Sobar akejapon pen kachepajokplot longlo? Nang jongsi ahok akrong non si kelongdunjilang pulote, nang Sobar pen akacherap chehekjok longledetlang. Lahenlo alam ke, Arnam aphan nang kanghonji kiri along nangphan laso akanghon choklim, inut aphan kamathavet, lapen ingthirjir plangjima? Arnam aphan nang akanghon ke chepharlep un’e lapen arnukkrung pusi nang ningjelo, tebonta Sobar katelomchen along pen nang ke jokjepinlang. Arnam aphan tangte lake nang kachongthui kalilang puhe? Nang jongsi Arnam aphan kanghon along akeheno kapajujepinji angdeng an si akar’i do lepute, lapen Arnam aphan angton pen kelongdunji nang ninghang lapen Arnam arat aso aphai kelongdunji aphan, tangte aphrangsi nang ahok akrong along nang mena aphan chepathir nanglang.
