Kahenodak Amonit ke Arnam Ason Cheparjan Un’e

Monit atum nonpu an tame kapamanghudet akangting angbong kephunghet aber si dobomlang, Hi’i arideng kachingnanghet si dolang, kachepajok un’edet, lapen amethang akun, Hi’i aninghang ateng si klembom, laso ajoine kaheno ansose si batbom. Monit atum nonpu kaike ta kahenodak hi’i ben akun angbong si dobom pule pudet sita choklo lapen Arnam aphan ahokpet kachinghonji pu un’edetlo. Laso abang arpum le, jongsi monit atum Arnam aphan chinghonji pulote, amethang along pen kechoklim pu kacheparoka, mena aphan si ardi kachipi, kethek kachekrong, ane kachepathe, lapen lason si – Hi’i aot-adur heihui doan pen chehek’lap nangkokpo. Jongsi lason kali pulote, alang akanghon ke kangthir’et kalilo, lake Hi’i akanghon asonlo, lapen lason henlo Arnam ke kelangseletnai lapen kedeng un’edetji. Kengset kechoklim kalipin pen, ningkethe kavepin, kekroimorem abang, athikdut, kemesen, lapen Karjong Kangthir pen kapamithu, laheihui ateng pen kali pulote, madu tame Arnam aphan ahokpet chinghon thekthedetji. Jongsi nang kun angbong pen ephar ke Arnam ason cheparjanlo lapen laso apot si Arnam aphan ahokpet chinghon theklo pulote, lake nang inut kacheparokachot alamthe si ningjelo, lapen nang ke ardi kavepin abang lo. Lason amonit atum doan ke archangel lo! Monit atum amahang kethek ahut pen kedokok asema amat si Arnam ason cheparjan un’e; hala kechoklim Arnam along alang amena asema aber chepachongdam pen si lapen laso aphi – Arnam aningkehang aling kachemathadun, Arnam kopima akeja ateng kapaplengdun, lapen ansose si Karjong Kangthir asai amo ateng keklemdunbom lote – kopima alang akerengbom along Arnam si asontin dengponpo. Madu tame methang ok aninghang ateng pen kedobom atum ke Arnam ason cheparjan un’e, jongsi Karjong Kangthir alangphan thangnat cheraplokle pulote. Tebonta, lason abangphu atum aphan tame, alang akun lapen alang kerengbom ke Arnam ason si kacheparjanlo pu puthip un’elang; puthip unji un’e ta Karjong Kangthir ateng pen alang doloma dodema lapu ansi chiniji. Lason akun amonit atum ke Arnam ason kacheparjanji un’e.

Monit atum akun le Arnam pen si apun-achak kedeng peme lote – lake karju dunji avelo lapen laso aphan ke kemesen asonlo pusi hokpo – lake Hi’i si kacheparideng ponlo, lapen kadokave monit along akun doan ke Hi’i akun chenamlo. Ajahak amonit atum pulo Arnam akun pulote asontin asai keklem along tame kengsetji, lapen lason thakthak si alangtum along ta dolo, anpar ta latum aot-adur ta lasonthotlo, lapen laso apot si latum kaningje ke alangtum akun Arnam ason si cheparjanlo pulo. Kopuson amonit atum lo lahei ke? Koson si kehenodak hi’i ben akun le Arnam ason cheparjan thekpo? Madu le alangtum akun ke Arnam ason si kacheparjan dunlo pu kachehok atum anke Arnam aphan si chechobailo lapen Karjong Kangthir aphan kapinremlo! Karjong Kangthir akeklem kedam asai ateng pen pirthe along Arnam keklempon ke jasemet kehaidongji aphan asai henlo. Lason si, monit along kahenodak hi’i ben akun kedoan kapangthir nangji dolang, alang non kerengbom ke Hi’i araje ateng si dolang, la henlo monit atum ke akechok pu kekroidam, lapen lake monit ok aninghang ateng pu cheparjanlo; ansose klardak pen, lake Hi’i si cheparjanlo, lapen chenam si Arnam ason ke cheparjan un’elo. Jongsi komatne le Arnam aphan kachinghon kethe do’et pen alangtum pirthe along si sining angsong thakthak akai akerengme longdunlo pu tame, latum lasonsi alamthe chepaklangji ke: “Oh Arnam! Ne Nangliphan chinghon’o thektehdetlo,” lapen kangtuiving aninghang adim anle keletang tame, chenam si non anta latum Arnam pen si rengbomlo mate Arnam ason si cheparjanponlo pu puthip un’e, athema monit atum abang ason ke Arnam ason kali, lapen monit atum ke Arnam penpe te reng un’e lapen Arnam asonthot ta cheman un’e. Kopi si Karjong Kangthir monit aphan kerengji aphuthak akejapon ma lake Arnam le monit aphan kepaklemtoivek asai atengthotlo.

Hi’i keklempon asai-amo kedoan ta monit atum along si cheklang pemelo. Pini arni, monit atum keklem-kedam asai-amo heihui doan ke Hi’i kaningje-kethan alam saidelo lapen laso apot si Arnam ason ke cheparjan un’e. Monit atum ke keklangdak Hi’i ben asonlo, lapen monit atum akun ke Arnam akun pen kacheparjan dunji un’elo. Ajahak amonit atum aot-adur mesen; Arnam lason aot-adur kemesen amonit atum pen ajok ajahak kemesen asai deng tahaiji, lapen latum keklemji asai ke Karjong Kangthir akajalang atenglo. Tebonta alangtum akun Arnam ason cheparjan un’elang. Arnam latum aphuthak keklempipon asai ke akacheprek avepinlo lapen arlo kedotang apot lethot si kapangdang pu anatlo. Kedamtang akai ahut kethanmek kethek akurusar atum mate Arnam ateng keklembom atum tame, madunon Arnam ason ke cheparjan un’elang. Monit atum Arnam aphan kachinghon puke keklang ke saijokje pen keklemnang pu anat, lapen inutnat tame amethang ningkehang ateng pen si keklem kachepeduk puke ave. Kopipi dolo tangte kemesen ahormu ke? Arnam along pen kevang asontin ahormu ke akeme saiselo; monit atum akun, tebonta, Hi’i arideng pen si paklembom, lapen Arnam ason cheparjan un’e. Kanghon pen, kachechak’un aboi, ingthir’et akechoklim, kachehodaidet, lapen kachepabihekthek lapen kachepatujoi Arnam kachepahemphuvet pen anchot si Arnam ason cheparjan unji. Pima lake Alangli kevang ahut, Alangli kevang ke pap pen ason kali lapen Arnam along pen si kevang peme, Hi’i aninghang ateng keklem pen apot kali. Jisu ke pap pen kedokok a’ok ason anchot lapen lake pap le cheparjanpon kalidet; laso apot si, Alangli keklem-kedam, asai-amo, lapen alamthe doan, Alangliphan thengparpan along apran kachipi (Alangli thengparpan along apran kachipi ahut anta do’etlo) asai kapachundet ahut aphrang apor pen si doan tame Arnam chepaklangpon pemelo. Jisu aphan kelangdam pen si cheklang pemelo pima madunon pap pen keplengset abang ke Arnam ason cheparjan un’e, lapen monit atum apap ke Hi’i si cheparjanlo. Laso atengthot si, pap ke Arnam ason cheparjan un’e, lapen Arnam along pap ave. Monit atum along Karjong Kangthir le asai keklempon ke Karjong Kangthir akejalang atengthot si keklemlo pule pudet ta chok, lapen Arnam aphraman si monit atum keklemlo puke jongdam un’edetji. Bonta, monit atum aphan kelangdam ateng, alangtum apap lapen alangtum akun tame Arnam ason cheparjan un’e. Karjong Kangthir monit atum aphan keklempitang ateng langdamlo pute pini pen ha kedamtang apor an, monit atum aphuthak keklempi akeongpi ke Karjong Kangthir saide, lapen laso apot si monit atum ke rengdunbom longlo. Tebonta, lake ihin anat anchotlo; Karjong Kangthir akajalang lapen ke kachariponvet dolo puvoiphit tame ahok alam akijumhek aphai atum si dengdun thekchotlang. Lason pulote, Karjong Kangthir keklempon asai si dochotlo; monit atum kajalangdun puke avedetlo. Nang laso aphuthak theklong pemelo ma? Laso abang arpum, kopuson si nang kedoan pen Alanglilong kajalangdun thekpo lapen Karjong Kangthir sai cheklem lote nang deng doan kapachundunpo?