Sai keklem lapen Kelut (1)
Arnam aphan kekroi ahok akrong lo pura monit atum kamatha kecheng ahut penta, ke’ongpi ason aphuthak ke latum keklarkle dolang. Latum Arnam akam aphuthak lapen keongpi latum keklem nangji ason anta manghu’et lang. Lason athe ke, ari ehin anathuke, latum kachinitang ason pen kapaprek lapen latum kedengdun ajakong kadure; kaprek ehin anat penke, Arnam amethang akam pen rat aphan laso angdeng along vanve detlang laso ajoine lo. Lasi, anuttin’ta karjong ason aphuthak thak’thekthe detlo. Nangtum kopisi kelutdam nangji aphuthak anchot le keklarkle kali, Arnam akam aphanta nang ansose si kapanung lo. Lake nangtum angbong kedo thangta kali akechokche anpar ongmulang: Lahenlo Dhorom a’pirthe along do’an atum along’ta kedo thedung akelet. Ladaksi rat atum kopi apotsi Arnam aphan kachinine ma angkir ke bikok lo, lapen laso a’kelet lake Alangli phan keri atum an angbong akechokche si chepachoi rinti lo. Inutnat ta Arnam aphan mentune penta chinine, kalite Alangli ahokpet arje thek longle’pinlang. Laso pen ajoksi Arnam asai ke inglong katerek kalite talopi kapathep lak’huiji ason thakthaksi planglo. Lasi ongdung atumke Arnam asai aphansi alangtum methang chepi detlo; ke’ongdung atum aphanke Alangli sai ajoine phlungjui lo, ke’ongpi, Alangli sai aphan ajoine, pathilot ansi pesung ponlo; ke’ongpi, alangtum Arnam aphan kanghon a’mekri kebu pensi, adai avepin kithi’nang; ke’ongdung atum ke aduk kepi lapen monit-monor aphan kevi nangji kalipin kachenek si chetong nanglo …. Halahei ningduk’meme ason kelit’nang lake monit atum Arnam aphuthak kachini kave ajoine kali’lang ma? Kosonsi komatne Arnam aphan kachinine abang Alangli ingno kevangji aphan amahang chepeklang’po? Kosonsi komatne Arnam aphan kekroi do lapen Alangliphan kachenek’ne lang abang Arnam angno kevang thekpo? Lahei anchot le dhorom apirthe along latum kachedorde kali, bonta nangtum lapen alangtum alongta dovek lo. Monit atum Arnam aphan chinine’pin si Alangli phan kekroi, la esonvet ajoine pen henlo latum Arnam aphan aning arlo along man pipe lapen aning arlo along Arnam aphan phere’re. Ladak latum cheklangdak lapen tengkaijai pen keklem atum angbong penta latum amethang methang kachechar’mek akrong angbong si sai klemlo, lapen laso asai keklemji aphan ke Arnam ahukum lo pusi alangtum aning kehang ateng lapen akele kar’ipik pensi dam lo. Ke’ongdung atum kaphirno pensi keklem, Arnam aphan kamatha pathethe amethang aning kehang aphisi kachedun. Lahei ke monit aning ke’ik lapen kechoklimle keklangdak arjan kali ma? Lahei ke monit atum angbong akele ke’ongdung ahok kave keklangdak arjan kali ma? Monit atum helo ahok kerenei tahai, bonta kosonsi alangtum kepi ason Arnam asai along kacherai thekpo? Monit atum Arnam anghor aphan kamatha dun do tahai mene, bonta latum akele ning ke’ik penke klem nangne. Tangte monit atum Arnam ning kedok ason si keklem lo ma? Komatne inutbak phant pharo chechakthip hai ma? Arnam ahakhi kacheplangji aphan, Alangli a’hir-asang kachepahemphu dunji – lake Arnam kaselam kedeng lapen rat aphan kerung pon; koson si monit atum akenangsot abang plangpo? Arnam asai ke nonjong si kepangcheng chotlang, lapen Alangli lamthe heihei nonjongsi kaningjeji aphan kecheng’lang. Laso along ke, monit atum amethang aphan a’keme si chematha, bonta lake ajongjong kachingki kelangrem kalilang ma? Latum heloving ajak kachinidam majerso anvet. Hala tokjir aron ketheknei abangta, kepakroithek ade pen kethanthek abangta, keplangpik Arnam alam kadokave than thekthe, tangte ko’an akejum si nangtum than thekji? Nangtum amethang ke sining apar ador keso chepinchong nangne, bonta laso alar nang methang ke hala Arnam aphan kanghonji aphan kiri kejumhek atum angbong penta kangdei asonsi chethek long nangji. Lahelo nangtum kelut dam aphan atovar lo: nang methang aphan a’kaprek kadokave penta kangdeimu’nei kachethek long henlo. Kopi apotsi nang methang lapu’an kangtui kachethek longlo? Kopi apotsi nang methang lapuson man kedo kangtui adim kangni lo? Ajak kedingpi kedambom akai along, nangtum dunbomlo, bonta masapso kecheng akengkam chotlang. Nangtum ketheklong’an ke Arnam aphang anchot, kado kave Arnam abang arpum kali. Nangtum aphan kenangsot lake Arnam asai aphan ansose kethek longji, kopi si nangtum kelut dam nangji ma ansose keri kepalong nangji henlo, athe nang kachelar masapso anvet.
Arnam pachoklim amonit lapen alang a’ot-adur kelartang asonsi, Alangli sai ke kaiketa sangse, athema monit ke akeongpi ahin kadure do lapen Alangli kehot’tang ke’un nangji angdeng penta ingdeipik alongsi keklo. Lapen lasi lason ta pudam’un, Arnam amek angden, nangtum ke kaike aphan amahang kethekmi oso thi’i ason, masapso ason pensi Alang phan aning kapangsam, athema nangtum ke thangta kali bonta Arnam ari pen kapinchong amar chot. Jongsi inut monit amethang plenglim kachematha alongsi klochok lote, Arnam latum aphan aning thithe ji ma? Pudamji pulote, nangtum Arnam aphan ning kapangsamji ke nang kachetheklong kejumhek a’ok arpum alam kaningje pen; jongsi nang Arnam pen cheparje dun chenam lepute, nangtum kaiketa kerem abangsi bangso akai along manpo. Monit a’ok ke ephongta kehai pu chinidam longle lang. Hala Karjong Kangthir akam pen anchotsi monit aphan kejok’long abang papleng chot. Ahokpet ke, Arnam kapinchong amar akeongpi angbong pen, monit helo kangdeinei. Sitame alang henlo pinchong amar do’an pen ahemphu, monit henlo lahei pinchong amar pen Sobar kepalu kephodun, jutje’pin atovar pen Sobar kephangno dun ke monit aphan henlo. Monit ke mentune ta amethang aphuthak jakong ave. Ongdung atum ke Sobar kepater adim alongsi rengbom lapen katherak pensi donangbom; lason atovar pensi latum aphan chomosoi bom lapen halatum akai achitim anchot lo pupetik an, kaike chelarvoi, monit akhei apirthe kesung aphongtin along. Lasonsi latum aphan jui’i det aphi, Sobar ke latum ke’ang atovar pajutkok po. Lasi monit akai dotik kamanghu pen mongloi si dam nanglo, ephong’ta Arnam kesikpi’tang kemesen amar pen ning cheparong longle, bonta alarke Sobar phangno’et lo lapen achet-abet si bi tekanglo. Pini latum lapuson akelak lapen ke’aini lo halatum Arnam asai aphan kepangthekji anta akar’i avedetlo. Jongsi monit atum Arnam asai kepangthekji aphanta kar’i avedet tangte, latum kachetongji ke kaike akevir kephangno’tang lapen akeplengple, lapen latum kelutdam ke kaita kangthaidang adim lo. Penang a’suri aningkan Arnam pirthe athak vangdet pen non an, penang an monit kangtui a’bidi pen Arnam alangli sai apharman penang an aningkan aphan enlo; bonta Alangli kam kachini dun atumke ongparpedet si kethek-longdetji anbak lo. Laso ajoine, chethan un’epin abangphu atumke Alangli akam keklem angbong seta Arnam aphan kepatepek si klemthurong lo. Atheke, latum Alangli kam keklem aparte, abinong-et ke monit akhei akam si hala Arnam kahodai akam alar klemrong lo. Tangte lake Arnam akam pu’unji ma? Kosonsi arlo kelut dun’un po? Monit akhei atum Arnam akangjinso deng dunsi pipjoi lo. Laso ajoine si, penang an a’ove damdet aphi ta, Alangli kam keklem atum ong’e atum si lut dunchot, latum Arnam akam aphan kachini alam jongjong anta ningje je, atheke latum Arnam a gian aphan kachini masapso anvet, lasonta pu’un, ladak Arnam akam keklem atum ke keongpi do seta, latum Alangli kopu’an ahir-asang kethe pu theklongle, laso apotsi latum kadokave ta amethang si athak along kedo Arnam ason akaprek atum kangdukji aphan.
Keongdung aningkan penta Arnam kapinchong atum angbong cheklangkle pensi dolo; Alangli ake’ongpi ningkreng lapen barla abotor vangbarbar anghun abin pen langpangching lo; Alangli sining kethom angdeng pen ajo lapen anerlo nanglang lo; Alangli ongdung a’cheklo lapen a’ningkan monit angbong halat tanglo. Alangli monit kado kave apar a’kangtui adim si ingni lo, ingsamri pensi a’keongpi ningkreng kangsam angbongta inghong bomlo. Mentune ephongnat ta Alangli amethang badu aphanta chepaklangkle’pin lang, ephongnat ta arki chepadode, lapen Alangli angthek avepin lapen ingsamri pensi cheterek lo. Komatlo Alangli ahok arje kachini’un? Alangli ephongta monit along lam ningjeje’lang, aphongta monit athengno cheklangkle’pin lang. Kosonsi rat atum Arnam ketoi asai keklem kejoike po? Latum asapso kachechini dam lake Alangli phan kachini helo kadokave ason pen apar kesungnei. Pini Arnam ke monit atum aphan than’et tanglo, bonta monit Alangli phan chenine, atheke Alangli chethe angbong kelut dun aphan a’kele kadure lapen a’kangdei. Alangli nang ketheklong an penta, rat atum kado kave ta Arnam angno kacheklangji a’ot ave. Latum Arnam aphan a’kachini asapso’vet lapen Alangli pen kachekak ta akele helopik tanglo. Anparta, latum aning pen Arnam aphan kekroi ta akele kachini sungpik lapen latum joike pen Arnam Arje aning aklong along chebi thekthe. Laso apotsi, Arnam akam ke Ser angkleng le Sangti aklong kepipjoi asonlo, la keklarbor atur pathek longle detlo. Arnam aphan lahei amonit ake’un, kematha lapen ketheklong anta akele langplot meme lo. Kachodeng dun ajakong kepabop, kamatha’krang pen kacheni nangji adim thangnat chepu thekthe, kepangdei, lapen a’ot kephangno, akele kelangrem, jakong kave lapen thangnat ning kehangthek ajakong pave’pin. Latum aphan Bi, Meresak ahur lapen Losei atum aphan asonsi japon nangji. Latum Karjong anat kelut damji aphan kalite Arnam akam aphan seta asapta ardi pipe, Ahok aphan ajoine kachepasungji aphan isinat akamatha ta chebibe. Lapuson abangphu aphan Arnam pen kepachoklim kapinchong ke kejoike kali, setame la kethedung alam ke nangtum kelutji anghap nangtum ladak pen chesik ponsi hala nangtum keklem angbong lapen nangtum kelut dampen Arnam asai aphan kachini pangchengpo.
