Sai keklem lapen Kelut (2)

Nangtum keklem lapen kelut ke mara’o; monit atum kosonsi keklem nangjima kenangsot adim chebibe lapen chethe along kelut aphuthak ansose chesenang’ir muchot lang. Kelut dam nangji ning kehang lake isi kacharli ason lo pura monit atum mathathe; laso apotsi, nang kachini’tang along, monit atum ketheklong do’an ke thangta aveve si kapamangkai ateng’lo. Sai keklem aphuthak lok abangke nangtum aphan ke’ong le kehang kali, bonta, inut Arnam along pen kepachoklim ji aphan, Arnam aphan keklempi aphuthak nang kacharli ning kehang do anlote nangtum prapjin angbong Arnam ning kehang along dun thek tahaipo. A’ove ove ahut penta, keklemtang atum aphanke klembang kalite ketoitang atum pusi hang lo, lahei alam heihei Arnam sai ke’en jumhek aphai amonit atum aphansi kejongdam. Bonsitame, pini Ne kaningje dam a’sai keklem lake halahei klembang atum kalite ketoitang atum aphan anvetle kejongdam lok lapu kali, bonta Arnam pen pachoklimji kadokave atum aphansi toilo. Labangso ahin ke’ongpi atumke masapso anvetsi aning kehang dochot tahai, bonta, kelut damji ajoine pen, laso aphuthak abangke ahok alam kachethan dam henlo a’kemenei.

Sai keklem aphuthak, monit atum ke Arnam apharman ehin ehin kekat, alongtin lam kethan, lapen Alangli pharman ajoine kachepedam asai henlo pusi kekroi dam. Labangso kekroidam chok puvoiphit’ta, lake ehinvet chingbe ongchet; monit aphan Arnam kehang lake Alangli pharman ehin ehin kekat nangji anchot kali; labangso pen apar, laso asai ke karjong angbong kethe angdeng keja asai lapen kesikpi aphansi ardi kepi. Ke’ongpi korte lapen ingjir atum, la do’an a’ningkan kachinitang kedo aphi pusitame, Arnam apharman keklempiji aphan mentune ta mathathe, athe monit atum sai keklem pu aning kamathadam ason ke Arnam kopima kehang pen chetonte’lang. Laso ajoinesi, kopima pusitame sai keklem pu ahin ke monit atum a’ning kehang ave, lapen kopi si monit atum kelut dam ke ehin anvet ma pu athe ke lahenlo. Nangtum kadokave ta Arnam aphan keklempi bom pensi kelut pangcheng nangji, anlo tangte asitin kachinidamji ahin nangtum memuchot si klemthek bom tahai po. Nangtum kelut dam nangji kopima ke lason henlo. Sai keklem kejongdam ke Arnam apharman ehin ehin kekat pangtar kali, bonta monit achethe lapen monit atum kerengbom pen Arnam aphan a’ning parong thek loma thekthe ma la henlo. Sai keklem pu kejong dam ke monit atum Arnam aphan kachini pen Arnam aphuthak hakhi kachepi thekji aphan, lapen monit aphan kachariji aphan sita lo. Lake monit atum arpu lo lapen lahenlo monit doan atum kachini nangji. Nangtum kelut henlo nangtum sai lo pu ningje unlo, lapen Arnam apharman keklem bom ahutsi nangtum kelut damji aphanta ripon bom lo. Arnam asai kachini ponbom puke Alangli lam kosonsi kecho lapen kejun nangji ma nang chini’lo pu aphan jongjong kali; akenang muchot ke, Arnam aphuthak kosonsi hakhi kecho nangji ma nang chinivek nangji lapen klempi’un nangji lapen monit aphan pi nangji. La henlo sai keklem, lapen nangtum kelut dam sita lahenlo; anuttin amonit ta kopima kepachun nangji lahenlo. Keongpi lapuson do Arnam apharman ehin ehin kekat lapen alongtin kapachethang aphan anvetsi ardi pichot, non anta alangtum karjong achethe kelut damji aphan mathakrang lapen alangtum a’methang jongjung kachini kedotang aphan chethek’long kei. Lason pen henlo Arnam aphan keklempi atum amatsi Arnam aphan kekhamkhe abang kacheman dam thu. Lahei do’an aningkan Arnam aphan keklempi’bom lapen monit atum along kachari pon bom amonit atum, sai keklembom lapen kapachethang henlo kelut damlo pusi kehokdam, lapen maduta alangtum jongjung karjong ahin kachinitang henlo kenangsot kelut damji aphanlo pura endamde. Alar ke, Karjong Kangthir asai along pen alangtum kelirdam kapathe’ang aphansi kaprek atum aphanta kethanji aphan haladak pensi atiri ason enlo. Kapachethang bom ahut, latum anghor ardikpik lapen Karjong Kangthir asai deng long lo, lapen lason athe pensi alangtum Karjong Kangthir ase pechon ponbom lo. Lason apor ahut, Karjong Kangthir asai pensi alangtum jungjung karjong ahin kachinitang pu ason bensi, sai keklem atum ke aning plenglim lo; alangtum kaningjebom doan alamthe alangtum jungjung asonsi kachematha, tebon sita alangtum methang kachinitang sita latum kapajirmi dam ason thot klardak kalidet ason ben si nangman det. Lapen apar, kaningje’po ahut latum kopisi kaningjeji chechinine, bonta latum along Karjong Kangthir sai klem lote, alangtum alamthe heihei anta kejutje pin asonsi lidungbom. Lapuson akrong pen nang ephongbak pachethang det aphi, nang angdeng ke nang kekroidam bihek asonthot kalilo pusi nang chematha dampo, lapen prekjam aphong nanglong Karjong Kangthir sai keklem ahut asonsi, nangke a’man kedo abang plangtanglo pusi chemathathip lo lapen Karjong Kangthir asai ke nang methang kelut damji lapen nang methang kerengbom aphan pusi kekroi let det lo. Lason a’krong pensi nang kaiketa chechinidam pulotangte, nang kelut damji aphuthak kaselet lapen chechinine pin angbong ka’aini nangdo’po, lapen nang methang kelut damji aphan ajat kenangsot sitame kachebi ington kokji. Laso ajoine henlo, kaprek atum aphuthak nang dhorom asai kepachun ahut nang methang aman lapen Karjong kangthir asai aphuthak kacheprek klardak pen phar nangji. Nang kelut dam aphan la nangpejoi dun muchot thekji lapen nang kachini dam ahin sita ansose ale pedopo. Karjong Kangthir asai aphan monit atum amethang jungjung kachini kedoji apharman si ke’endam pulote, lake, kaheno a’ot-adur nangkeplang atiri lo. Laso ajoine henlo Ne kaningje, kopi arpu ma nangtum cheklem aling sita, nangtum kelutji thedung kacharli’meme asonthot si deng nangji.

Arnam ning kehang kapaplengji aphan inut abang keklem nangji asai heihei lake, Arnam aning kehang keri keri doan atum aphan Alangli kengri kevan, monit aphan Arnam along kevan, lapen Karjong Kangthir asai lapen Arnam a’kapere monit atum aphan kapaklang, laso pensi Arnam asai aphan athe peme ponpo. La apotsi, lake akenangsot pik pu labangso ahokpet asai aphuthak klar peme po. Inut Arnam sai ke’en abang asonsi, anuttin amonit ta Arnam aphan keklembomji a’ot do, halake, anuttin alongta Karjong Kangthir sai ke’enji aphan avarsai keme do. Bonsitame, ladak nang isi alamthe chematha damvek nangji: Monit aphan Arnam ketoi asai keklem ahut pen, Arnam sai ke’enji aphansi monit atum aphan avarsai keme pidun tanglo, bonta monit atum kopima kaningje lapen kachinitang anke angton amatle monit a’kethek kali. Kado kave nangtum keklem’unji ke nangtum sai keklembom’un ahut nangtum methang kedorde kachechini muchotji, lapen vangra themuchot Karjong Kangthir pen kapathe’ang kelongji aphan. Lason atovar pen, nang keklem bom asai along nangtum memuchot kelutdam chepalong unpo. Jongsi monit labangso kapere hala Arnam pen kevang kedeng dun along amethang kelut asonthot lapen latum angbong keplang asonsi chematha, pulote ladak ke monit kethek ajakong paphrang un’e lo. Monit along Karjong Kangthir asai pen kapathe’ang kerodam ke, alangtum mesen pen kedo ahut; lason apor ahut, alangtum methang kethek binong ason si, alangtum kelong laso kapathe’ang aphan monit atum kamatha kelet dover, athema hala Karjong Kangthir kepathe’ang ke prekjek kemesen, lapen Alangli monit kahache ahut pen kedotang pensi sai ke’enji aphan kapinchong. Rat atum keklem lapen kaningje ahut, kalite latum kardom lapen karjong chehodai keklembom ahutsi, ahok si alangtum aphan menmen paklarji. Abinong along ke, setame, monit ketheklong lake Karjong Kangthir pensi kapathe’ang chot plangmena ke, labangso kathe’ang monit kachelang pen cheraplok lapen monit ahok a’kethek ladak ave. Penang an ajak kachinitang, laso along monit penang kesung lapen a’sat heihei chetong det aphi, monit kethek binong lapuson ahut si nang cheklang’po. Laso ahut ansi alang kethek ke the’o kali pu monit chethek longji, lapen kachingchom, jongjung kachematha, lapen monit amek plengple anta nangklang’po. Lason prekjam ave chetongdet aphi ansi penang atum ke latum amek prangpo karjong pen ajok halaso ahutsi chechiniji kedamtang latum kachetongtang anta latum amethang jongjung kali, bonta Karjong Kangthir ahin pensi malomso kapakhalan lapen monit ke bonta laso kathe’ang kedenglonglo. Ahok kachiniji aphan Karjong Kangthir monit aphan pathe’ang lote, lake ahut pen klardak lapen theklongdak a’ot pen, kosonsi lahei kevang kalite konatsi latum kedambom thanphlir ave. Hala ke, labangso kapaklangji along monit aphan kacherap pen kachepasung aparte, Alangli ahok paklangdak lo. Monit kelutji asai keklembom along kesung heihei pen kachedan ahut, lapen Karjong Kangthir kapathe’ang chelang ponpe lote, lasi abinong’et monit kachetong’long plangpo. Kepangbarme ason, inut penan kedode lang ingjir lasonsi kachingrum ahut ningje lo: “Netum ke a’dak-atur lapen keplang kephi kalite penanso angbong kachinghon pen ningkarong kar’i aphanle kiri kali; netum kiri ke Arnam aphan ingthir’et lapen eson-mathaket aning pen kachehodaiji an’chot.” Alangli ningje ponbom lo: “Ephong monit chepangri lote, ladak ke ongdung latum prekjam katora chetongpo lapen latum Arnam aphan kanghon aning ke aklong pen kali tanglo. Latum aning heihei ke aphrang pensi latum apiso lapen a’hemtun atum aphan kaike chepitanglo, lapen latum arlo apirthe ke ansose kachini sung muchot po….” Alangli kaningje’un ahut, lake alangli ning arlo along kopima kamatha alamsi angho along pen nang kebar ason ben lo; alangli lam ta pangthekme lapen jakong thetan, jongsi lasonthot aning aklong pen kevang alam si kaningje pulote, lapen lasonthot le alangli kar’i ason Arnam aphan chepi chehodaidet lapen alangli ning kethe ke korte lapen ingjir atum alangli son thakthak lapuson alamsai chepi seroi po. Lason ta pu un nang kamunthi pen alamsai lapen nang keklem bom’un laso apor ke angton ta Karjong Kangthir pen kevang asai. Arnam asai keklem aron kachelar ahut anke, nang mamat ta asapso arta ahin batpo; nang kachetheklong nang pen charli rappet lapen jirpo-jirpi do’an nang pen arta isivet atum penan dotanglo, kalite la-pen-la chepangri pangdon alam si nang arju longpo, apenan si alangli phan ha rongsopi cheponlo lapen hadak si voreng ta longlo. Nang alangli phan theklong lote, nang cho’arju dun meme ason kamatha pangchengpo, alang kosonsi abolon kedo ketheklong lapen apindeng aphu pen ha akengti an, lapen koson lo, nang pen kachingki ahut ke hala kethedung arongsopi akethek asonsi do po, alang phuthak anpar ke rong kedo kilu ason theklongle pinpo. Laso ketheklong pen nang kamunthi pachekom ahut. Nang, nang methang si Arnam apharman chepadam lo, hemtun ave kalite kemang ave, lapen nang ke ning chepading pen thedung kechun aphan matha bom lang; Nang penang apor aphrangjong ke achitim arta lut tanglo, lapen nang kapariso ke ajak dingklui aphrang pensi palit bin po, lason jongsi nang mang heman pulote. Non, nang kai kedam lapu’an ajak dinglen pen non’an, nang kethirklong ji adim kamatha nang chinine. Non laso apor ahut nang kamonthi ke tomon parting along kachingthang lo, lason jongsi nang, nang kere chepangbodet ason. Nang enutpet lapen nang mek kejang thekthe, nang mek prangjang pen ajo ajak kedingpi angbong, nang la chinine ako nang kematha pangching lo nang lamrai aphuthak lapen nang Arnam aphanthirklong ji alamchak, lapen kopi si lason adim along keklo nangkok ma? Chechini ne si, ingsamri pen mekri nang chepabu bom lapen nang kamunthi aning kahonduk pen sido. Arnam angno kardom kevang pen, nang chikimo po, nang hala Arnam pen kedorap pet arni heihei alam, kopu an kachepho lapen chekak un’e pin kachetebok ahut isi nangtum angbong. Theklong lethot lethot nangmek angden nang keklang arjan lapen nang halabangso arni kedeng aseme puthot nang no along ephong angke nangdo lo. “Arnam penchot le ne kachepho chot kalima?” laso apor ahut nang kachiru pen jasemet chematha lo; Arnam! kanghon Arnam! Nang phan ne ning do’an chepi tanglo. Ne nangphan lamchak kachepi ning kehang ke kaike kaike aphan, lapen ne Nangphan ne kai dingpi prekpre’pin si nang inghonji pu … halabangso akesung aphan nang menmen kachesong ahut ansi nang ahokpet chinipo. Arnam ke kopuan akanghonmeme loma lapen la’ansi nang klardak chechinipo: Ne kedo anta Arnam aphan kedamtang ajak dingklui aphrang pen si chepi’et tanglo. Lahei nang’kejap nang chechak undet aphi, nang kopu an ma lahei aphuthak kematha kahelo la an si nang la’ansose kematha ingching muchot po, lapen nang theklongpo Karjong Kangthir asai ke halaso ahut pen lake monit pen kelong amar ason kali. Lahei alamthe pen nang chinilong det aphi ke, nang anpar ke labangso kelut a kachechar along kepabin ason ave lo: lake reng amek angpram barim pen puthot ale thedung kelong ason si nang kelut along ale longpo. Lason thakthak akatorah mentune nang phan katengkheng ahut seta, nang tongsekot pen hala nang mekri kachepabu halaso arni aphan chematha dampo. Lason jongsi nang Arnam pen chekakdak aphi si kachetongthu, lapen kaike kaphereju pen Arnam pen puthot ningrungphom pen kachelang (kai ateng kachelang) nang pen Arnam angbong heno thudak seta. Lake nang methang asai lapen nang si kelut. La apotsi, nang Karjong Kangthir asai kedenglong ahut pensi nang kelutji aphanta ansose akenangsot chebi thekji ke, lasi nangtum aphan akaprek akrong heihei alongta Karjong Kangthir pen nang pachok dun po lapen si ahokpet Karjong asai nangtum along pen klem tahai po. Karjong Kangthir asai aphan nangtum kachini angbong si Karjong Kangthir aphan ta nang chini longpo, nang methang aphan asonthot lapen anparta, laso angbong pen Alang henlo nang thepik akesung aphuthak kachini, nang kai ateng Arnam pen akachelang paphrangji, lapen halaso arni pen nang pen Arnam angbong kachetebok ta theponpo. Lakha un’e aphong kangchai lapen pangthir det aphisi, nang ahok Arnam aphan akanghon thedingji. Laso apotsi nangtum chechinimek nangji Hala kesung kephobom, kephangnobom, lapen kesung thepi anta kaphere nangji kali; kaphere nangji kedo ke Karjong Kangthir asai aphan anchot. Bonta nangtum kelut dam aphan kali. Halabangso arni nang keledam anke Arnam asai ke kepleng lo, nang thangnat kachepaduk ji ason ave: Bonsetame nang Arnam asai kachinitang do’an pen ke Karjong Kangthir aphan chinine, kalite nang methang lut dam’et po ke. Karjong Kangthir pen monit along kapathe’ang asai lake kangjinso pen kachechakpi ji aphan kali, bonta monit kelut atovar kangpuji aphan lapen Karjong Kangthir aphan kachini thekji aphan talo, lapen laso alamthe pen si Arnam aphan man kepi lapen anong kepathe ji aphan kamonthi paphrang ponpo.