Karjong Kangthir Keklem Asai Lapen Sobar Keklem Asai

Kopuson pen si karjong aphuthak angton pen inut amonit kachini unji? Kopuson si Karjong Kangthir monit along sai keklemlo? Kosonsi monit along Sobar sai keklemlo? Kosonsi monit along hi-i akarjong atum sai keklem ponlo? Kopipi ason dolo kachepaklang pon? Nang le kopine kepho dolo tangte, la Karjong Kangthir pen si kevang loma, lapen nang la deng nangjima mate dengdedet nangji? Monit atum ahokpet keklem-kedam along, monit atum ninghang ateng pen si keklem keong’ong pima monit atum kaike ahut tame akekroi Karjong Kangthir pen si vanglo. Ajahak ahormu kevang ke hi-i akarjong pen, tebonta monit atum kamathadam ke Karjong Kangthir pen si kevang puloklo, lapen ahut pen ke aklong pen si Karjong Kangthir monit atum aphan japonlo, tebonta monit atum kaphere ke athe lason akejapon ke Sobar pen si vanglo lapen kekroidunji aphan haihedetlo, ahokpet ke pima Karjong Kangthir akeja ke katheang chenamlo. Lasi, kacheprekjam nang charliletik ke, tangte inut amonit keklem-kedam kephopon kecharliji ke akaprek atovar si avelo; kacheprekjam penpe pulote, chethe kelongji aphan akaprek atovar si avelo. Kopuson si Karjong Kangthir sai keklemlo? Kosonsi hi-I akarjong sai keklemlo? Kopi si monit aninghang along pen kevanglo? Lapen kopi si Karjong Kangthir akeja lapen akatheang pen ale kelonglo? Jongsi nang monit atum along Karjong Kangthir asai keklem adichi heihui otdunthip theklo pute, nang ke nang gian chepangcho thekpo lapen kacheprek kopi doloma thekthekpo; Arnam aphan nang chiniponpo, Sobar aphan chinipo lapen pangthek thekpo; nang athikdut lapen keklempon along kamanghu avedetpo, lapen nang ke hala kamunthidam alam heihui klardak abanglo, Karjong Kangthir keklem asai tame kekroidun abanglo.

Karjong Kangthir keklem asai ke keprangset akejapon lapen kemesen akatheang asonthotlo. Lake monit atum aphan pa’ainiti longledetji. Lake latum aphan ningpangsamlo, kekroi latum aphan pilo lapen pajoikelo, lapen latum aphan Arnam pen kapachoklimji aphan kelongji avarsai pilo. Karjong Kangthir le sai keklem lote, monit atum doan prangset pen lutdun longlo; latum doan ke ainititelo mate ketoi bor’i kalilo, bonta alangtum mena kachepethik pen si klemponlo. Karjong Kangthir sai keklem lote, monit atum ningarong lapen ninghang do, kekroiji lapen mena aphan kachipebi tame ninghang. Latum doan le arlo pen sopiklo lapen sungpiklo puvoiphit tame, latum ke kajalangdunji aphan chepathiklo; latum chehokjok pen kesung chechak, latum doan kekroidunji aphan unlo, lapen latum doan monit aninghang ateng pen kapatertang kali, monit akamatha pen aketertang kali, lapen chenam si monit atum akar’idam lapen ningrungphom pen kepatertang kali. Monit atum le Karjong Kangthir keklem asai chomatdun longlo, latum doan ke arlo pen ingthir’etlo. Komatmat ma Karjong Kangthir asai keklem longdun si Arnam aphan kachinghon pen renglo lapen alangtum kortemar lapen ingjirmar aphan chinghonlo; latum ke Arnam kachehok along si pima ajat along ta chehokdunlo lapen Arnam langselet ason anke pima langseletdunlo. Karjong Kangthir asai keklem kephotang amonit atum doan ke kemesen amonit si dolo, lapen latum kaiketa ahok aphan si rilo lapen monit aot ateng si dopetlo. Monit atum along Karjong Kangthir asai klem lote, alangtum akenangji anta mebom lapen meponbom, lapen alangtum monit aot tame ansose mebom lapen meponbom titi, lapen alangtum ajahak akajalang ke luvok tahai meme, alangtum ningkerungphom ke choklo, alangtum kilutdun tame mesenlo, latum kapasiksakji aphan bor’i’elo, lapen latum along thangnat ta ningkeho avelo. Karjong Kangthir keklem asai ke mesen lapen ahokpet, monit along Karjong Kangthir sai keklempon tame monit atum arnivang kerengbom akai aron ateng pen si klemponlo, lapen monit atum along Alangli katheang lapen kejapon keklem tame monit atum kaike kerengbom ahokpet keklem kiripon atenglo. Monit atum along le Karjong Kangthir sai klemlo te, arnivang monit atum akenangjivek ateng pen si latum aphan Alangli cheja lapen patheang. Latum aphan alangtum kenangji ateng si Alangli padorponlo, lapen alangtum akadure ateng pen si Alangli mesen pen latum aphan cheja lapen patheang ponlo, lapen alangtum keklem un’e ateng penlo. Karjong Kangthir asai ke monit ahokpet akai along kapatheang lapen kejadun helo; jongsi latum Arnam alamm alangtum binong-et kedo-kethak along kachomatpon lote latum Karjong Kangthir asai theklongpo. Jongsi, alangtum arnivang kereng achethe along, monit atum doanta kemesen angdeng alongsi dolo lapen mesen karjong plengset akai si dolo, tangte latum doan ke Karjong Kangthir keklem asai longdunpetlo. Lason angdeng along ke, latum Arnam alam heihui cholo lapen junlo pute, latum along kekroi dolo; latum le ardom lote, latum doan ke ningrunglo; latum le kopine ason khamkhe pulote, latum doan ke ainititelo; lapen lapuson kemanbom ahut, latum doan ke Arnam kopima latum aphan kapacharlitoi ason doan tame kecharli nangji angdeng theklongpo. Latum doan ke ainititelo mate kelak avelo, lapen latum ahok kisung-keboi dolo puvoiphit tame, latum doan ke kadokave Arnam kisikpon doan kekroidunji ninghanglo.

Kopipi angtheklo Karjong Kangthir asai keklem pen kelongponji? Nang ke luvok tahailo meme, lapen kangsaiji aphan kadure dokoklo tahai meme, bonta Karjong Kangthir ke dolo bonta keklemji aphan lapen nanglong la akekroi dopo, lapen nang ke kaike tame chemathapo pima nang Arnam aphan kanghon pi thekthedetlo. Nang ke kajalangdunji aphan ninghangpo, jonghe le thedung akesung aphrang vang pu tame. Nanglong la ajat tame cheplangpo lapen lake lahei kopima Arnam pen si vangloma mate Sobar pen si kevangma nang klardak pen chininedetpo, bonta nang la kanghongji aphan unpo, lapen nang ke ainititelo mate pangkrevevelo. Karjong Kangthir kemesen asai keklem puke lahenlo. Nanglong le Karjong Kangthir asai keklem lote, nang chenam si kesung chetongponpikji: ahut pen nangphan pachiruvong tame doji, lapen ahut pen ke kachepahai un’edet titi ason tame nanglong doji, bonta lake kadokave Karjong Kangthir kemesen asai keklem ahut aphar saidelo. Halahei akesung doan nang haidet un’edetlo puvoiphit tame, lapen penang apor ke nang lakdetlo meme lapen akeongpi kapasimu dokoklo puvoiphit tame, mo aphi ke nang choklim akekroi pen ajok Arnam aphan chinghon thekvekji. Nang keainiti penlok ke nang arnivang kemesen akeklem-kedam along nangkhangdun un’e, lapen bang amonit atum le ajat nangpudun tame, lapen nangphan kosonsi bang tengkheng loma, nang ke Arnam aphan chinghon thekbomverji. Kardom ahut, nang kaiketa chematha athe kedamtang ahut nang ke Arnam aphan kachoro pipik, lapen nang Arnam aphan ningpangsamji si chepathiklo lapen lason ahormu puthot chetongthu lote ok doan che’olo. Laso ajakong kacheklang ke pima nnaglong Karjong Kangthir asai klempon dolo. Lahenlo Karjong Kangthir kemesen asai keklempon angdenglo.

Kopipi asai dolo tangte Sobar pen kevang? Sobar pen kevang asai along pulo tangte, monit atum along kelangdammek tame klardak kalipinlo; monit atum doan ta kemesen monit aot kalilo, alangtum keklem amo heihui aningkirungphom tame kechokchelo, lapen latum le Arnam aphan chinghonji ninghang puvoiphit tame kaiketa latum along si akoi kipithap dolo, lapen laheihui akoi kachipi doan lapen latum along amat si kamatha pen kapasiksakdun doveklo, alangtum akai kachingthur along kekhang dolo lapen mesen pen Arnam athengno kevangji along latum aphan pasangkoklo. Lake pulo tangte, monit atum along Sobar asai keklem kechenglo tangte, alangtum aning doan ke Arnam angno ningkangsam avelo. Lason amonit atum ke mena aphan kopisi keklemji ma pu chichininelo – latum le monit atum kachingrumpet theklong lote, latum ke kekatjuiji si mon’epo, lapen latum doan ke bang atum le kardom lote alangtum amek selokdun thekthelo. Kahingno akarjong keklem asai ke monit lapen Arnam angbong kemesen akachepho phangnolo, lapen monit atum aphrang kelangdammek mate alangtum chethe kilutdun aban akrong aphan ningpaduklo; alangtum aning along ke latum Arnam adung patebok amat si un’elo, lapen lason si kaiketa chemanbomlo pima latum aphan pasunglo lapen khangthiplo. Alangtum aning along ningkangsam longlelo lapen latum doan ke Arnam aphan kanghonji ajakong avedetlo lapen alangtum akarjong tame janglutlo. Lason doan ke Sobar keklem asai kachepaklang angtheklo. Sobar keklem asai kachepaklang angthek heihui: longle athak karjap nang un’edetji lapen hakhi chipi thekthedetji, Arnam angno komatne kechokche abang pusi nangphan pachemanrongji lapen Arnam aphan kekroikre abang si pemanlo. Sobar le nangkachejokdunlo tangte, laso akanghon nanglong kavelo lapen nanglong Arnam aphan athikdut ta avelo, Arnam pen kemesen akachepho tame nanglong pen thijok tanglo, ahok aphan nang ridun thekthedetlo mate nang methang aphan chepachokpon thekthedetlo; nang aban ateng chiruithulo lapen ainiti si manlo, nang methang along si nang dolo, pap kapangdangji aphan ajakong nang joike pen pidetlo lapen ke pap aphan langseletledetlo; anpartame, Sobar nangkachejokdun pen ajok ok aninghang si nangphan pemanlo; lake nanglong Arnam nangkepaphoji pen pahelodet si manlo lapen Arnam aphan si nang pasimutulo lapen Alangliphan khamkhelo, Arnam aphan si kaike karju padover pemanlo; kapherememenei lake pima Arnam aphan nang che’obuplo. Lahei kadokave tame Sobar pen si vanglo.

Nang arnivang kereng akai along jongsi kopine nangphan pholo pulo tangte, koson si nang lake Karjong Kangthir keklem asai mate Sobar keklem asai pen si kevanglo pu kethakpon thekji? Monit atum kedo-kethak le mesen, tangte alangtum karjong akai lapen alangtum ok akai along kerengdun do’an tame mesenpo lapen alangtum kematha anta mesen lapen choklimpo. Latum doan le lason atengthot si dover, kopima latum kephopon lapen methan along amat si chichiniponpo anke lason le pudet tame athe Karjong Kangthir kepaphotang pen si vanglo (aklong alam kachini mate latum Arnam alam cholo lapen junlo tangte ajahak joike anke gian kelongpon, mate ajahak ahormu along athikpet kedo, mate ajahak ahormu along Arnam apah kanghonthek – lahei kadokave kevang ke Karjong Kangthir penlo). Monit along aKarjong Kangthir ke chenam ta mesen; monit atum si la kachemathadam thekthe, lapen lake monit pen amat si kevang pu chitinbom, tebonta lake chenam si Karjong Kangthir keklem asai pinak. Arnivang kereng akai along, anuttin along tame Karjong Kangthir ke thedung lapen bihek asai klemponbomlo, lapen lake laso asai keklem angdeng akacheprek pu aphanchotlo. Ajahak amonit atum ke aboi mesen do, lapen latum ke ajat ta kachinidun prapjinlo, lapen latum along ke Karjong Kangthir pen kelong akatheang ta thedunglo. Bontame, ajahak amonit atum ke kethek boidet do, lapen lake latum kachinidunthek apor nangchetlo, bonta latum along tame Karjong Kangthir ke papholo lapen latum, lethot tame, Arnam aphan kekroidam long unlo – komatmat ma Arnam aphan kiri kadokave atum along ta Karjong Kangthir asai klemlo. Arnivang kefreng akai along, monit atum Arnam aphan khamkhekhe lapen chedandundongde pulote, Arnam kisik-kedangdam along kisungdetji aphan ke ajat tame klemkledetlo lapen Arnam asai along chejokdundedetlo, tangte latum anuttin along tame Arnam aKarjong asai thedung mate jumhek an pu sita klemponlo; Alangli latum aphan otlo, latum aphan patheanglo, latum aphan kekroi pilo, latum aphan jakong pilo, lapen keprangsetji along latum kilutdunji aphan ponlo, kaselet kalipin mate ok aningkehang asai kache’o, laso ahok ateng keklemji ninghang, lapen Arnam alam aphan kar’idun. Lahei kadokave tame pima Karjong Kangthir asai pen si vanglo.

Monit atum angdeng le mesen kalidet tangte, latum doan aphan Karjong Kangthir si che’o buppo; alangtum aphu along latum doan ke kapasimuturji si kaike sikdinglo, alangtum ningrungphom antame chokchelo, latum doan selethuilo, latum ke ok aninghang along si chetolo, lapen alangtum aning ke ahok aphan kachedandong si dolo. Lahei kadokave ke Sobar pen si vanglo. Monit atum kedo-kedam le mesen kalidet, latum doan ta arlo pen ingtingkuk lapen alangtum mesen kamatha ingbodetlo, lalo pulote Karjong Kangthir che’odun tanglo, lapen ke alangtum along Arnam aphan chemathadam longlelo, lason pulote latum along Sobar si sai klembomlo. Monit atum jongsi latum along kaiketa ingtangrak lapen kaiketa Arnam aphan inghon, tangte lake, latum along ajat le cheplang tame, halahei ason dona ke Karjong Kangthir pen si vanglo, lapen latum madu aphan le chetong, laso kachetonglong ke Arnam pen si sik-dang angtheklo. Lake lason le pudet tame pima nang le kemesen kedo-kedam longbom pulote, nang le Karjong Kangthir thedung keklem asai angbong si dobom, tangte lake Sobar nangphan pabopdetji puke un’eveklo. Laso atiri anujok pen lote lake lason le pudet tame pima asontin ta Karjong Kangthir pen si vanglo, lapen nang kamunthidam along kechokche dokok tahai meme puvoiphit ta, nang ke lahei che’odet unlo lapen lahei doan aphiphi nang dundedetlo. Lahei kadokave ke Karjong Kangthir keklem asai pensi vanglo. Tangte kopuson ahut pen si Sobar nangpasiksakdundunlo? Nang kedo-kedam le mesen kalidet pulote ladak Sobar nanglong sai keklemji aphan joikelo, Arnam le nangphan nangotthip longlelang lepute lapen Arnam asai pen kalilang tangte, nang le arlo kreng’ang lapen ingthaivang pulote, nang jongsi Arnam aphan ardomlo bonta thangnat ta otthip longle pute, lapen nang le Arnam alam cholo lapen junlo bonta katheang lapen keklardang longledetlang pulote. Akaprek ahin pen langdamlote, Karjong Kangthir le nangphan che’obuplo pulo tangte lapen Arnam aphan nang chematha un’elo, tangte nanglong asonson ahormu pho’opo pima lake Sobar asat kelang pen si vanglo. Karjong Kangthir sai klembom along si, Sobar tame sai nangcheklemdun bomlo. Monit along arlo Karjong Kangthir nangpapholo tangte, lason apor ahut si monit along Sobar ta nangpasiksakdunpo. Tebontame, Karjong Kangthir keklem asai si aphrang damdong doji, lapen monit atum matmat kedo-kedam si kemesen anke haidongpo; lake athe Karjong Kangthir keklem asai Sobar asai pen kehaidong apotlo. Karjong Kangthir asai cheklembom ahut, monit atum along kahingnodak aot-adur dobomji; ajatnon, Karjong Kangthir cheklembom ahutke, lake monit atum joike pen alangtum kapatepek, kedo-kedam keprek, lapen kechokche do’an ta kachiri lapen chichini joike lo. Ansi monit atum ning aklong-et pen ningcherui thekpo lapen ningkacheruiji aphanta aninghangpo. Lapuson pensi Arnam asai angbong pajo pen alangtum kekhamkhe lapen kahingnodak aot-adur ta pavirpo. Karjong Kangthir keklem asai ke chenam ta mesen; monit atum along Alangli sai keklem ahut, latum along kesung-keboi ke doveklo, latum chiru nanglo, latum aduk donanglo, latum doan boidetlo lapen latum along nonpu anta keklarkle akeongpi dolang, tebonta laso angdeng along latum doan methang aphan aphi kachiruiji pen chekhangtheklo, lapen latum Arnam aphan chinghon theklang, lapen latum chiru puvoiphit tame lapen ke aning aduk dopiklo tame, latum doan Arnam aphan kero pibom theklang; Karjong Kangthir keklem asai ke chenam ta mesen, masapsonat pu tame kopine amekbin pu kalipin. Ongdung amonit atum la kroilo, Karjong Kangthir le sai keklem kapangchenglo tangte, monit atum angdeng along kachelar klangpo lapen latum along kenangji ason doan pima avelappo. Lason akekroidam ke kapachobailo. Karjong Kangthir le monit along sai keklem lote, monit atum along keainiti ke dobomjilang lapen alang aman-apeng ke kedotang ateng si dolang, bonta Karjong Kangthir kepaklar lapen akatheang alang longpo lapen lasi alang angdeng abang ansose prangset dopo, alang kedo-kedam along tame mesen chemanpo, lapen alang kachelar prapjinpo. Monit atum ahokpet kephopon along ke, latum chenam ta Karjong Kangthir kalite Sobar keklem asai si phoponvekpo, lapen jongsi latum doan le laheihui angdeng nepdun peme thekthedet lapen thakdunvet thekthedet lote, ahokpet keklem-kedam along kilutdunji puke alam chethan teng’ai nangnelo, akun heihui along thangnat ta akachelar avedet pule pudet ta choklo. Lasi, Arnam asai kechomatdunlongji pu abidi ke lahei ason doan kelangdunthek henlo; lason pen ajok si, latum aphan joikepo la kephopon longji.

Karjong Kangthir asai ke monit akeme anat paphrangdunji aphansi klemponji, bonta Soitan ke latum aphan kechokche lapen aphi kacheruiji, Arnam abirudhe kethur lapen Alangliphan kekhamkhe, Alanglilong kekroi kachepangbodun, lapen alangtum asai keklem along jakong kadure. Ajat asonta Karjong Kangthir pen kapatheang anke abinong-et; lake nang phuthak kebat bor-i kali. Jongsi nang chehodai dunlote, tangte nang ningkangsam longpo; lapen nang jongsi chehodai dundedet, tangte nangke kachedandong si dopo. Karjong Kangthir akatheang pen ajok, nang ajat le klem-dam tame pasiksakdundelo mate kekhangdun avelo; nangphan pajokvanpo, nang sai amo keklem along isi akrong dopo, lapen ajat tame akekhang pen nanglong thangnat ta avelo, bonta Arnam aninghang ateng pen si klem thek nangji. Sobar asai ke nang keklem-kedam ajat along tame nangpasiksakdun dolo; lake nangphan kardomji ningpahanghelo, Arnam alam kecho lapen kidunji tame paseletdet khangjangpo, lapen kardomhem akai kerengdun pen ningpahanghedetpo, lapen lake karjong akai pen nangphan pachemesensedetpo. Karjong Kangthir asai keklem ke nang arnivang kereng akai along pasiksakdunde lapen mesen karjong achethe akai nang kilutdun along tame pasiksakdundelo. Nangke ongdung ason menmen keplang’un ahut pangthek thekthedetlo, bonsettame, pinang’an arni aphi, nang ning klar-et chemanpo lapen kamatha klardakpo. Nang Karjong ason aphuthak pinang’an kachinidam dopo, lapen pajo pen nang lason akamatha Arnam mate Soitan pensi vanglo ma pangthek thekpo. Pinang’an ason ke Arnam aphan khamkheji si nangphan klardak pen pemanlo lapen Arnam abirudhe si thurlo, mate Arnam alam ateng keklemji along nangphan nangpasangkoklo; laheihui ahormu kadokave tame Sobar pen si vanglo. Ajahak ahormu ke chinidakde, lapen nonjong lahei atum kopi-koson loma pu nang than thekthe; aphithu ke, alangtum kacheklang angthek heihui nang theklongpo lapen ke kangsaithek klemthekpo. Nang jongsi klardak pen ingsai theklo koloso ahormu si Sobar pen kevang lapen Karjong Kangthir akeja ateng epn si kevang loma, tangte nangphan ke kechok atovar nang keklempon pen pache’oji joikeke. Ahut pen ahut, nang kedo-kedam le kemesen kalidet, tangte nanglong kopine akamunthidam doji lake nangphan kaainiti angdeng pen nanghekjokji. Lake cheklanglo pima nang kedo-kedam le henodak pu tame, ajahak nang kamunthidam ke Karjong Kangthir pen si kevanglo. Lake lason pu kalidetji pima nang le ainiti pulote, kadokave nang kamunthi alam doan ta Sobar si nangtoilo; jongsi pima ahokpet tame, tangte komentu ahut si nang kemesen angdeng along kachelarpon thekji? Penang an apor ahut ainiti kedotanglo, Karjong Kangthir si nangphan avarsai pipo kechoklim kemanji aphan; Alangli nangphan papholo lapen nang ke’ainiti angdeng pen nangphan vandetlo, lapen nang mesen angdeng along lutdun lo.

Karjong Kangthir keklem asai ke kopima chini tanglo lapen Sobar asai ta kopima chinilo, laheihui doan nang mena angdeng nang keklem-kedambom ahut nang pachingbarmelo, lapen nang jongjung akephopon along, lapen laso pen si nang kecharlipon along ongdung ahok pen kachingbar aron-atang penang an dopo. Laheihui ahok aphuthak aron alam chini tangdet pen, nang kechoklim angdeng aphan nang chepakeng thekpo, monit atum lapen jaimek heihui angbong tame nang kethak thekpo, lapen Karjong Kangthir keklem asai kelongdunji aphan nang lapuan apor chepedukdedet ta chokpo. Chenam ta, laso kepho ke nang ningrungphom kechok alinglo lapen nang kiriji lapen keklemji ningkehang ateng penlo. Lam lason ke lapulo – aron-atang pen kachingbardam alam – nang keklem-kedam along la cheklangpon nangji. Kali pulote, nang keklem-kedam along ke Sobar kapasiksakdun si plengsetpo lapen kiluvok agian si longpo. Nang jongsi Karjong Kangthir asai kopuson si keklem chinidundelang tangte nangke Arnam kardomji ta chinine mate kosonsi kelutdunji ma ta chinine, lapen nang jongsi Sobar nangphan monit pen nangkachomosoi chechinine te, tangte nangke Sobar aphan khinde thekthedetpo lapen hakhi kepiji aphan arjapthip thekthelo. Kosonsi Karjong Kangthir sai keklem ma lapen monit atum along Sobar keklem ma chini nangji, lapen lahei ahormu ke monit atum Arnam aphan kekroi along pensi chomat longnangji.