Komatmat ma Ahok Ateng Keklemkle Atum Doan Aphan Kapacheretoi

Komatmat ma korte lapen ingjir angbong kaiketa kaheno kematha aphan si alangtum ardi chipirong atum doan ke Sobar aban saidelo lapen latum ke mondoli aphan pasiksaklo. Lason amonit atum aphan mo arnisi ke angtan bikok nangji lapen varchor nangji. Alangtum Arnam aphan akekroi along, monit atum jongsi Arnam aphan man-peng kachipiji aning kavedet, latum jongsi Arnam angno kachingkimesen aning kavepin pulote, latum doan ke Alangliphan thangnat asai tame keklempiji kethekthechot kali, bonta alar ke komatmat ma Alangli sai kapasiksakdun atum si manpo lapen Alangliphan kekroikredet atum si chemanpo. Arnam aphan akekroi along bonta Alangliphan man-peng pipe mate alam karjujedet, lapen alar ke Alangliphan kekhanglok, lake inut kekroi abang thedung katherakmemelo. Kekroi atum jongsi alangtum kaningje along mathakrangkrang lapen kachekhang ave lapen kekroikrelang atum akedo-kethak asonthot pulote, latum ke kekroikrelang atum pen anpar si kahenothulo; latum doan ke keprekjek ahi-i saidelo. Komatmat ma alangtum abikar aphan si ardi chipirong, kardomhem along kapasiksaklokji kachingki-chethan, mat ma kapachethangthap, ningkangsam kapavedetji aphan kichutso, lapen korte lapen ingjir atum angbong abe abe kapado – latum aphan ke kardomhem pen amat si angtan bikokvek nangji apotlo. Tebonta athema nonke Arnam asai keklem akaprek akai pinak, laheihui amonit atum aphan khangthiplang, pima latum aphan kevarchorji chetong nangjilang. Kadokave mat si Sobar kaphangnotang atum doan ke kahenodak akun heihui dolo. Ajahak atum ke thangnat ta kali kahenodak akun heihui si dolo, lapen ajahak atum ke kacheprek do: Sobar le alangtum akun heihui kaphangnodak anchot kalilang, bonta alangtum asema doan tame kapasiksaklokji si ongpiklo. Alangtum alamthe lapen keklem-kedam anchot le alangtum kahenodak keklangchot kalilo, hi-i akun heihuilo; laheihui amonit atum ke, anparta, hi-i Sobar binong’et atumlo. Alangtum aot-adur pen Arnam asai aphan patoradunlo lapen pasiksakdaklo, lake korte lapen ingjir atum doan chethe along kilutdunji aphan paboidetlo, lapen lake kardomhem kemesen akai kedambom along phangnodunlo. Prapjin mate mo aphi tame, laheihui biresak areng ason kachingthang amahar doan ke saiplin nangkokpo; kangjinso kavepin aning-angthin pen, kelangseletdet aning-angthin pen, laheihui Sobar aban atum doan aphan lasonsi pinchongdet nangpo. Lapu anchot si Arnam ahin lake karjapdunlo, lapen komatmat ma ki’un’edet atum doan ke Sobar pensi inghan along chilungthutbunglo. Monit atum matma Arnam aphan abinong’et kekroi atum ke alangtum aning along Alangliphan kaiketa doji, lapen latum kaiketa Arnam aphan alangtum angbong si cheponkriji – man-peng kipi aning pen, Arnam – kachinghon aning pen. Komatmat ma Arnam aphan kekroi atum doan ke kachere pen lapen mononphi aphan chematha peme pen si sai klem nangji, lapen kadokave tame pima latum Arnam akenangji ateng pen si asontin ta klem nangji lapen Alangli ning aphan pador thek nangji. Latum ninghang aling chepangtang’oi ke chokchedetji, latum ningkangsam aling asontin ta keklem; pima lason ke kedengmeme kangthirjir pen chetontepinlo. Monit atum ahir kachepatansak pen kat nangne, Arnam alama pajapponbom si kadokave angton adim pen amat nahok tame ane chepathekloi lapen kachongthuipon; lake keklem-kedam along kachedandongji asonveklo. Hemtun atum alangtum aron heihui do, lapen det atum tame alangtum aron-atang heihui do – lapen Arnam ahem along tangte ansose lasi avejilang puhe? Angdeng heihui ansose si kekroivek nangji kali puhe? Tangte kachari ahukum heihui ansose si sodakdeji puhe? Monit atum aninghang aling si latum aphan paklem longlo, bonta ninghang ateng pen ke Arnam kachari ahukum heihui ke chelar un’edetji. Arnam ke monit atum kechokche keklem pen apot kachechakji a’Arnam kali; Alangli ke monit atum aphan kithi along kibi a’Arnam pinak. Chenam ta laso alam monit atum chininelang puhe?

Alongtin akardomhem along tame kardomhem kapasiksakdun amonit atum doveklo mate Arnam asai along kachejokdun bor’i doveklo. Latum ke kadokave ta Sobar saidelo lapen ke Arnam ahem arlo nanglutpak si akeme ason cheparjanlo. Lason amonit atum doan ke kacheparjan thekpik: latum ke Nelong kevang thedung aman-peng nangpi, angphun chepatongki lapen nangchithiji, pharkalu kacho’et amethan atum ason si doji, lapen alangtum “asontin” tame alangtum mena ale kelongji aphan si apor chipilo – bonta akorte lapen angjir atum athengno ke, alangtum aketer ahin anatthu si latum chepaklanglo. Latum le ahok ateng keklem amonit atum aphan theklong lote, latum aphan tengkheng dunpo lapen atok anat ingdoichorpo; latum le alangtum pen anpar kethek aman-peng keong amonit atum aphan theklong lote, latum ke rodunthappo lapen latum aphan kachemesen ason si dopo. Latum kemesen pen kardomhem along chari ponpelo. Lake lason le pudet ta melo pima lason “bang aphan kapatheraklok atum,” lason “bang anut kaprek ketoi aling keklem atum,” akeongpi akardomhem along do’et. Latum angton pen si dojoi thekthedetji, lahinhin aphan mek chepasirip pen angthek heihui chelovoiji, lapen inutnat tame ahok ateng klemkle. Komat ma abi keongnei abang ke “hi-i aphulo,” lapen komat ma kangtuinei aman-peng kedo atum ke, alangtum lama aphu angsong kapangjar si latum kelmponpo. Laheihui amonit atum ke kardomhem along phangnotheipo, alangtum akeheno ason an pangdangpo, kithi aphan si ardi piponpo, latum ninghang aling klemponpo, latum aningkangsam aling ningjepo, lapen latum aphan madu ta kekhangji haihe. Latum Sobar akun heihui pen si kachingbarpet saidelo. Latum un’an akeprap pen kapasiksak vanlo te kardomhem along kithi atomon si nanglutpo. Kardomhem along komatmat ma ahok ateng keklem atum doan aphan ke padarchorji, alangtum angton pen chipi un’edet, tebonta komatmat ma kardomhem aphan kapasiksak lapen hadak kithi kaphangno si kapachethang – lapen, kopipi dolang, latum along si ongdung amonit atum abe dunlo. Lason akardomhem heihui aphan ke Sobar si chariponlo, joike lapen thandaklo; hi-i si alangtum arecholo. Jongsi kachingrum amuluk atum thurthedet lapen hi-i aphu aphan plungpledet pulote, latum ke tangte, chenam si, prapjin pen kalite akeder sitame kivir phopo. Non pen anpar ke, lason akardomhem heihui atum aphan langchari peme nangkokpo. Jongsi kardomhem along kachingrum amuluk atum masapsobak anta ahok ateng keklem undet bonta riredet lote, laso akardomhem ke padarchor khangjangpo. Jongsi isi akardomhem along ahok ateng keklemji abang inutnat ta avedetlo lapen Arnam apharman ahakhi kachipiji inutnat ta avedetlo, tangte laso akardomhem ke kapadolongji si angton pen pemanpo, akaprek akardomhem heihui doan pen laso akachepho ke sungkrungpo. Laso aphan kipu ke kipip pen kithi pu aphanlo; lake lahenlo Sobar aphan kapadar pulo. Jongsi isi akardomhem le hadak amat bang aphan kapatherakji atum do’o, lapen latum le “masapsap abituso” aphiphi kidun pen latum kopima pu kachethan thekthedet – lapen jongsi kachingrum amuluk atum, ahok aphan theklongdet aphi tame, laheihui kapatherakdet atum kephangpon lapenb kachongthuipon padardun thekthedetlang pulote – kadokave halahei akilu atum aphan ke mo kijut ahut amen ingthan’etpo. Laheihui masapsap abituso atum kapasiksakdunpik thangnat ta klemkledet tahai meme, bonta latum ke kachongthui theknei atumlo, ansose si resetlang lapen kachini un’edetlang, lapen lason atum anuttin aphan tame lake amen pavedetpo. Inutnat tame kedo longledetpo! Komatmat ma Sobar abe atum doan ke Sobar along si chedamthupo, lapen ke komatmat ma Arnam abe atum doan ke ahok aphan kiri damji si dampo; lake alangtum asema pen si chingvaipo. Komatmat ma Sobar aphiphi kidun atum doan ke pavirkoknang! Laso amonit atum doan aphan kangjinso avedetpo. Komatmat ma ahok aphan kiri atum doan ke padornang, lapen latum Arnam alam heihui alangtum aning along pangsamjinnang. Arnam ke ingthir’et; madu aphan tame Alangli ke abe abe dundedetji, Nang jongsi inut ahi-i pulote, nang ke ahok ateng keklem-kedamji un’edetpo; nang jongsi inut ahok aphan kiri abang pulote, lake chenamlo pima nangphan Sobar nangneppon un’edetpo. Lake kadokave ningbidam athai avepinlo.

Kachingthurji aphan kachitingkrupkredet amonit atum doan ke kaiketa amethang ason kaselet lapen kechokche akamatha atengthot si kapamanji aninghanglo. Komatmat ma ahok ateng keklemkledet atum doan ke matmat si keklem atum aphan aningsodunpo, lapen kaiketa komatmat ma keterbung aphu kedo lapen kangsai thekthedet atum aphan kapaludetji si bor’ilo. Laheihui ahormu aphan si monit atum ardi pironglo pulote lake nangphan pajutlut unlo, aber nangpacheruirongpo, athir kavedet angdeng si pemanpo, lapen kangting pen si plengsetpo. Latum ke nangphan Arnam pen kapacheheloji si pemanpo, lapen ok aphan si pachehokpo lapen nang mena along si lutsippo. Ahok aphan monit atum matmat si kachinghonhedet kedo lapen matmat si kaiketa Arnam aphan ninghang binong kalidet atum doan ke mena aphan chichinine, lapen laso amonit atum akun ke mena apran kacharmutji si bang aphan baiponlo lapen Arnam aphan khanglo. Latum ke ahok ateng klemkle, mate latum bang aphan tame kapaklem longji avarsai pipe. Latum ke pap aphan si chehoklo lapen mena aphan ke kachehijim ave. Latum ke mena aphan chichininedetlo, lapen ke latum bang atum mena aphan kachichiniji along tame khangdunthiplo; latum ke bang atum ahok aphan aning kehangdun antame khangthiplo. Latum matmat si kachongthui atum doan ke katheang theklonglelo: Latum ke kangting along si klopo, lapen Arnam pen kachehelo ke batbom si manpo. Latum ahok ateng ta klemkle lapen ahok ateng keklemji pu bang atum aphan tame latum khangdunthiplo, kedoan matmat si kiludet atum aphan latum angno vanlo. Tebonta latum Arnam aphan kroilo pu kaningjechot pen anpar alangtum aphisar-phusar aphan si latum kekroi pu ningjerong memunaklo, mate pima latum ke alangtum kekroidam ke aning arlo akumlin saidelo. La akemenei ke komatmat amonit atum si Arnam aphiphi kidun pu kehokdun pen alangtum amek kapangpuji aphan lapen latum komat aphan si kekroi ma pu choklim ketheklong kemesenji aphanlo: Tangte la nang kekroidam chenam Arnam loma, mate Sobar? Nang jongsi nang kopima akekroidam ke Arnam kali pu chinilor aphi, bonta nang mena akumlin aphan, tangte la akemeneiji ke nang jongsi kekroi abang pu kachekrongkredet henlo. Nang jongsi komat aphan si nang kekroi ma pu kachinine binong, pulote, puthot, la akemeneiji ke nang jongsi kekroi abang pu kachekrongkredet henlo. Lason ke lasi nongno kejothaplo! Arnam aphan kekroi madu tame nangphan nangtoi bor’i’e. Nangtum Nephan kroilo pu ningjedetri; Ne lason alam kaningje arjuloilo, lapen puthot arju ta ingtungtelo, athe kopima nangtum akekroi along ke nangtum aning arlo kumlin dolo lapen nangtum angbong si hadak pasiksak abang dolo. Komatmat ma latum ahok alam arjulonglo te alangtum aphu kachihijukdun, mat ma latum kithi alam arjudunlong lote kangnek ase pathedun, doan tame Sobar aso-asu saidelo, lapen latum doan ke kivirdetji atum saidelo. Penang an kardomhem along mesen kangsaithek ave: Ajahak kaheno kejaponrong pima nangklang lote, latum chichininepin pen si Sobar ahin arjapdunlo; latum ke Sobar aban saidelo pu kipu tame charju ingtungtelo. Latum along kemesen kangsaithek ave pule monit atum ningje tahai meme, latum ke kaike ta ahok ahin si arjapdunverji, latum kaiketa kisungkrung apor ahut ahok ahin anatthu arjapdundedetji, latum ahok apharman arjapdunde lapen chedamdunde. Tangte latum chenam si kemesen kangsaithek duredetloma? Kopi apot si latum chichininepin pen Sobar abe dunrong titilo? Kopi apot si latum ahok abe ahin kemesen lapen akechok alam ethenat ta ningjejedet titilo? Tangte lason kemandet ke ahokpet pen alangtum aphan tangka le kapamanghudet angthek kalima? Kemesen kangsaithek kave amonit atum along ke, ahok ahin karjapdun unji aphan antame latum un’edetpo. Kopilo la tangte keklang ke? Tangte la keklang ke kemesen kangsaithek kavedet amonit atum ke hi-i aphan si inghonlo kalima? Tangte lake latum Sobar aso-asu angthikdut atum le kacheklang kalima? Kopi apot si latum kaiketa Sobar ahin karjapdunver unlo lapen laso ateng alam ningjedunlo? Alangtum asontin alam lapen asai, alangtum araje along kacheklangpon angthek, doan tame dorphluplo pima latum ke ahok aphan kachinghon atum ke kaliveklo; alar ke, latum doan ke ahok pen kachehelodet amonit saidelo. Pima latum ke Sobar ahin karjapdun pen ajok Sobar laheihui masapsap ahi-i atum aphan ahokpet chinghon pu cheklang pemelo atheke alangtum akai Sobar apharman si chesongpidetlo. Tangte laheihui kadokave angthek pen klardak kacheklang kalilangma? Nang jongsi chenam pen ahok aphan kanghon abang pulote, kopi apot si ahok ateng keklem atum aphan nang chorodundedetlo, lapen kopi apot si nang halahei ahok ateng masap ta keklemkledet atum doan abe menmen le kidunrong titilo? Kopi akesung ason lo lake? Ne ke nanglong kemesen kangsaithek do ave mathaletle. Ne ke nang koan kethedung anam chipi tanglo puta mathaletle. Ne ke nanglong koan thedung ajakong doma mathaletle, lapen Ne ke nang hadak amat kapasiksakver abang mate lam ke’otponver akejabang pu tame mathaletle. Jongsi nang jakong heihui le thetan, tangte lake Sobar ajakong akerap pen si dolo. Jongsi nang man-peng le ingtuiving, tangte lake athema nang tebok-terai ahok ateng keklemkledet atum kedo’o ajoineveklo. Nangphan jongsi angtan bibelang tangte, lake athema non amat apor ke angtan kibiji asai klemklejilang; tebonta, non apor ke kapavirji asai si klemlo. Nonmat ke nangphan angtan kibiji ketong kalidetlang. Ne ke halaso arni aphan si chonghongdinglo mantu si nangphan pavirdet aphi Ne nangphan ado kipi longjima puloklo. Madu tame ahok ateng keklemkledet atum doan aphan ke pavirdetvekpo!

Komatmat ma choklim pen Arnam aphan kekroi amonit atum doan ke Arnam alam heihui keklem-kedam along kipiji ninghang atumlo lapen ahok ateng keklemji si ninghang atumlo. Arnam aphan alangtum ahakhi kachipi ahokpet pen karjapkluk amonit atum doan ke matmat ma Alangli lamthe keklem-kedam along kipiji ninghang atumlo lapen ahok ahin anatthu si choklim pen arjapdun thekpo. Kasalak lapen kahenodak kabirti amonit atum along doan tame ahok ke duredetlo, lapen latum doan ke Arnam aphan si patheraklo. Komatmat ma kardomhem along pachebohongsai keklem atum doan ke Sobar aban saidelo, latum doan ke Sobar amung saidelo. Lason amonit atum anke kapasung thekpiklo. Komatmat ma kemesen kangsaithek kavedet atum doan lapen ahok ahin anatthu karjapdun thekthedet kedoan atum ke hi-i akamatha si pangsompetlo lapen ahok aphan ardi pavedetlo. Lapen anpar tame, latum doan ke kacheprekjek Sobar apharman keklempi saidelo. Latum doan ke kejok kelongji helopiklo, lapen chenam tame pavirdetvekpo. Arnam ahemtun along komatmat ma ahok ateng keklemkledet atum doan ke dodun longledetji, mate matmat si kardomhem kaphangnodakji kabor’iver atum tame dodun longle. Tebontame, nonke angtan kibiji asai keklem apor kalilang; lason amonit atum aphan anke pacheklangdakpo lapen kijut ahut ke pavirdetpo. Laheihui amonit atum along thangbakbe ale kaveve asai keklemji chepadamthapthelo; komatmat ma Sobar abe kedo atum anke ahok ahin anatthu arjapdun un’elo, tebonta komatmat si ahok aphan kiri atum anke unji. Ahok ateng keklemkledet amonit atum doan ke ahok akrong alam karjuji ta a’ot avedetlo lapen ahok apharman hakhi kachipiji ta aot avelo. Ahok ke alangtum ano aphan anchot kalidet; tebonta, lake matmatma keklem-kedam atum aphan anchot. Anuttin abangphu atum akijut klangdakde aphrang, matmat ma kardomhem along kapasiksak lapen Arnam asai along kekhamkhedun anke non pen si ihin anatthu kecheng pen bivetpo, derklui aphi si asai ke klempo. Asai le ketanglo pulo tangte, laheihui amonit atum anke cheklangdakpo, lapen tangte latum ke virdetvekpo. Nonmat aphan anke, ahok kapajirbom patangdet anke, latum aphan langkranglo. Monit akhei aphan angton ahok alam klangdak lote, halahei amonit atum an aphan ke pavirdetpo; pima halaso apor ahut henlo kadokave amonit aphan tame alangtum kopi-koson ma laso ateng kethakvetji. Kemesen kangsaithek kavedet pen masapsap kasalak ajoine lahei kahenodak arideng pen alangtum mena aphan si kivir cheponpo, latum aphan ke bairuppo, aphi nangpachiruirelo. Lapen lason kebaipon henlo kopima latum kachelon tame, atheke latum ahok aphan inghonhedetlo, athema latum doan ke ahok ahin anatthu karjapdunji un’edetlo, athema latum ke kaheno amonit atum aphiphi si dunlo lapen kaheno amonit atum ahin si arjapdunlo, lapen athema latum ke kaheno amonit atum pen si chelangraplo lapen Arnam alam arjujelo. Latum ke kachini pemelo atheke halahei kahenodak amonit atum ke kaheno si cheklanglo, tebonta latum alangtum aning chepangtanglo lapen alangtum ahok aphan panungkuk si halatum aphiphi dunlo. Tangte laheihui amonit atum ahok ateng ke klemkledetlo bonta mat ma kaphangno lapen kangthirthe asai keklem atum an angton pen kahenodak le keklem kalima? Latum angbong ajahak atum amena aphan recho ason si alon chipi lapen latum aphiphi si kaprek atum dunlo pu tame, tangte alangtum Arnam alam karjuje ke isinat ateng kalilang puhe? Kopi kachepajokji alam si latum ningjepoma athe ke Arnam latum aphan pajokjedet pu? Arnam ke ingthirthedet pu latum kopi kachepajok alam si pupoma? Alangtum mena akaheno apot si latum kachepavirlo kalilang ma? Alangtum mena kachedandong aot pen ajok si meherang along latum aphan kivungpon kalilang ma? Ahok ateng keklem amonit atum, mo kijut ahut an, jok longpo lapen ahok ateng pen apot pachoklimpo. Komatmat ma ahok ateng keklemkledet atum anke, mo kijut ahut an, ahok pen apot amena aphan si kivir chevanpo. Laheihui henlo kijutdam kanghong ke matmat ma ahok ateng keklem lapen matmat si keklemkledet atum aphan. Ne nangparelo matmat ma ahok ateng keklemkledetji pu atum anke kardomhem che’o’etnon paprapjin pen atheke ansose apap keklemji pen kachepajokji aphan. Mo apor nangle lote, lake ningkacheoilakji aphan anta derkluipo. Jongdamvet pen, komatmat ma isi asanchom along kedovet lapen abe abe kedo cheselam atum, lapen matmat ma hadak amat kardomhem along kapasiksak atum, prapjin pen che’ovek nangpo. Lason amonit atum, pima kaheno asirung asema si dolo, kachelarji ta un’eveklo. Lake mesenpo latum jongsi prapjin pen avarsai cho’en ra kardomhem che’o nangpo, kemesen kedambom akorte-ingjir akai along anpar ke pasiksakdun nangnelo, lapen Arnam ado kipi pen tame chepajok longpo. Komatmat ma nangtum angbong pen latum along kidun atum an ke laso avarsai cho’en pen amethang aphan chepangthek peme thekpo. Nang ke tangte kaheno atum along kardomhem pen che’odunpo ma, mate do si athikdut pen abe dunpo? Laso alam aphuthak nang chematha peme nangpo. Ne nangtum aphan la eson avarsai nangpilo kachongvaiji aphan, lapen Ne nangtum akethak chonghongpo.