Nang Ahok Apharman Reng Nangji Atheke Nang Arnam Aphan Kroi
Isi kijumput akisung kadokave along ketheklong ke lapuhenlo alangtum ahok alam chini bonta asai klem thekthe. Laso atheke, ihin anat ke, alangtum anam kitu kangtungte, lapen kaprek ahin abang ke, alangtum along kangsai ajakong duredet; alangtum arnivang kephonang penang an akatora kopi apotma pu theklongledet, lapen keklem nangji aron chininedet. Athe monit atum akai ke ingdaiplang, alangtum kamunthi ajakong jumpik, lapen alangtum ahokpet alam kachinidam angkang bipik, alangtum along arnivang kachetong akisung kachepangsamji abidi ave. Alangtum Arnam aphan kekroi ke alam pen chot, lapen Arnam aphan arnivang akai along chevan thekthedet. Pudam lonang, Arnam ke Arnam, kai ke kai, lapen monit atum akai along Arnam pen kachepho avedet ateng. Lahenlo kadokave atum kamatha. Arnam aphan kekroi ke lasi, monit atum, ahokpet pen, Alangli pen pachoklim lapen ale padoji kali. Ahokpet ke, Arnam alamthe keplenglim ase kachelongle kali, bonta lake monit atum Alangli lamthe kedengdun ajakong si kadure. Majok ta ningve ke inutbak ta Arnam ahokpet akemang ateng sai klemkle, bonta alangtum Arnam aphan kekroi ke amethang akemang ateng, kedamtang ahut alangtum Dhorom alam kachini ateng, lapen methang aron ateng sai keme keklem. Arnam alamthe kroi pen kachelarthek lapen Alangli kemang ateng keklem atum ke do’o’e. Alar ke, alangtum mena kechokche akekroi along si nirling. Monit atum Arnam aphan kekroi chenglo te, alangtum dhormo pen kaselamchot aron rip’re, lapen alangtum kedodun lapen chingki-chethan ke methang akai aron ateng. Majok ta pu un’e lake bangkep angbong bang sirkep atum alamlo pu. Arnam aphan kekroi kechenglo te kaprek asai chelang pen aphar kimi kipurthu atum do’o’e. Monit akhei atum Arnam alam aphan ahokpet pu ripthip thekthedetlo, mate, ahok pu enpen, asai keklem’iedetlo.
Langdam sinang, Jisu aphan kekroi. Komatne abang nonjong le kekroi kechenglang tame mate lason keklem ajak ding’o pen non, kadokave ta lapu si doan abidi enlaplo lapen kethek ason doan chepaklang’etlo. Monit atum thangbakbe si methang akai along kangthundun “Arnam aphan kekroi,” bangso lamthe kethom, bonta methang akun along kachelar chevanve, lapen Arnam aphan latum kekroi asapnat ta batbe. Alangtum keklem ke sodak ta kali ingsamhek ta kali. Alangtum Arnam aphan kekroi ingtonpo pupe, bonta latum Arnam arideng doan ason chesot’et ta kali. Latum mantune ta Arnam aphan hokpet kroikre lapen inghonhe. Latum Arnam aphan kekroi ke hokpet lapen kacheparjan akapangvui, latum kapatebokdam ke ihin amek kechar lapen ihin ke kaselok, lapen kekroi asai keklemji aphan matha padikrimkre. Alangtum lapuson kamanghu pen si dambom, lapen kijutsi ke kithiji ta kamanghu akithilo. Halahei kopi ale lo? Pini, asai keklem a’Arnam aphan kekroiji pulote, kechoklim atovar along kengpak chibi nangpo. Jongsi Arnam aphan kroi pulote, hirjume hangchot kalilo, Arnam aphan kanghon lapen Arnam aphan kachini si kenangpo. Alangli kapatheang, methang jongjung kiridam pen si, Alangli lamthe cho lapen jun unpo, Arnam aphan hokpet kachini chepadonoi, lapen Arnam aphan hokpet akanghon nangning aklongsi pen kevang do nangpo. Kaprek ahin pen pudam lote, nang Arnam aphan kanghon ahokpetlo, lapen majok ta phangno un’e lapen Arnam pen nang angbong nang arjap un’elo pulote, laso apor ahut anke nang Arnam aphan kekroi ke hokpet atovar along si dolo. Ladak pen nang Arnam apharman pu angthek klanglo, athe nang aning ke Arnam arideng si kedolo lapen kaprek ajat ta nang aphan nangcherai un’elo. Nang kepho-kachinilong pen, nang kitunang anam pen, lapen Arnam asai pen, nang Arnam apharman hangjokplot akanghon birti po – lapen lason klem lote, nang Hi’i nangkebai pen jokpo lapen Arnam alamthe akatheang along si dodunpo. Kangting kachari angkang pen jokvan dothek ahut ansi Arnam aphan longlo pu kipu unji. Nang Arnam aphan kekroi along, laso akemang kiri bor’i nangji. Lake nangtum doan ta arpulo. Nangtum angbong majok ta non dobom kacheplang ason pen dorlo pu ning matha nangne. Arnam keklem asai aphan ninghini chepado nangne, lapen laso aphan pangkreve nangne. Arnam aphan kaiketa man-peng pensi matha nangji lapen ajat apor ahut ta, lapen Alangli joine si ajat asai ta klem nangji. Mantune le ningje lapen klem sitame, Arnam ahemtun aphan ale si ardi pi paphrang nangji. Lason an pensi Arnam aning aphi-phi dodun unji.
Arnam aphan kekroi along, monit atum kethenei akechokche ke alangtum alam pensi kroichot, lapen Arnam ke alangtum arnivang akai along ave. Doan amonit, ajatnon, Arnam do pu kroi, lapen Arnam ke alangtum arnivang akai along adim ave. Monit angho Arnam aphan penang an akardom ningje, bonta alangtum aning along Arnam adim ke masapsovet, lasi Arnam aphong-aphong bor’ilemdet. Laso atheke monit atum kemanghu ke Arnam along kangvaiji ason avelo alangtumphan kelongji aphan kabor’i pen anpar, atheke alangtum chetherak pen methang aphan bangso akangsai anglum kachechini thekji aphan. Jongsi kali, monit akhei Archangel asomar mandetpo, lapen a’ot kelangno batbom abang cheplangpo. Alangtum Arnam aphan kekroi angthun along, abangphutin ta methang jongjung akemang lapen kamatha doan Arnam pen jutjepin kecham-kangthi ajok che’o lap’lo. Kali pulote, Arnam majok aphan ta asai ke’enji abidi avedetpo, lapen monit along Alangli keklemji asai keklemji aphan atovar ta avedetpo. Arnam kecheng ke monit aphan chamji, lapen lason angthun pensi, alangtum methang aphan chechini unji lapen Arnam ta pachekirlapo. La ansi Arnam alangtum along Alangli sai cheklempo, lapen la ansi alangtum aning ingthimlim pen Arnam anat pangnopo. Lapen lasi ne pulo, Arnam aphan ke monit atum kaningje ateng kejoike kali. Arnam theklong’et, nangtum kachinichot bonta Alangli lamthe aphan chethe ason pen en’e, lapen methang kachini angkang ansi dokok bonta hokpet asai abang klemkle mate Arnam alamthe ateng dodunde, tangte lake angtheklo nangtum along Arnam aphan kanghon aning avelang, lapen lasi paklanglo nangtum aning ke Arnam apharman kalilang. Arnam aphan kekroichot ke inut abangphu Alangphan chini un’e: Lake kijutsi akemanglo, lapen monit atum kiri akemang. Nangtum bor’i’o nangji Arnam alamthe aphan parengsapji aphan athe ke nangtum asai along keplengdam klang nangji. Nangtum jongsi aron-ateng pen akekroi kethan alam kachini do, tangte nangtum Arnam aphan kekroi ke thangnat ta kali mandetpo. Nangtum Alangli lamthe ateng klempen parengsap lote nangtum kekroi ta Arnam aning kehang ateng chetondunpo. Laso atovar along, ongdung amonit atum gian alam ningjepik, bonta alangtum kithi apor ke, alangtum amek mekkri pensi lubui titi, lapen alangtum methang aphan akai kachephalangno pen chepasarnak apot chelangseletpo. Latum aron chini pu anchot, bonta ahokpet aphan asai along van thekthe mate Arnam ahakhi dodunde; alar ke, latum ihin-ihin kekatlok, pejo ason asai keong, lapen mo kithi adung le ansi alangtum ahokpet alammo ke duredet pu chetheklong, alangtum Arnam aphan asap ta chinine pu. Lapen lake derpik kalilang ma? Pipotsi arni cho’en ra nangning kehang hokpet akanghon ridundedet? Penap an pipotsi kanghonglang? Kai along nang ahokpet ajoine mate laphan kiridun penle kisung’i kali, nang mo kithiji apor ahut ningche’oi ta chok puhe? Jongsi lason, tangte Arnam aphan kopisi kekroi? Ahokpet along, penang an ason do monit atum, jongsi alangtum lapusi asapso ajakong pi pen, ahokpet aphan asai along van’un lapen Arnam aphan aning pangsampo. Atheke monit aning kaiketa hi-i atum si kacheraikrim lasi alangtum Arnam apharman sai klem thekthedet, lapen kaike ta methang abang arpum ajoine ketong-sirmong, mo kithi apor ajat chepaklang move. Laso ajoine si, monit atum kaike ta kisung-katora chechak nangverlo. Lahei ke Hi’i nangkachenek kalidet ma? Lake bang arpum akun kaheno kalilang ma? Nangtum nangde marlaktak pen Arnam aphan chongthui nangne. Alar, nangtum angthek keklang asai si klem nangpo. Mena aphan chechongthui nangne – kopi ale lo kevangpo la? Nang bang arpum ajoine kereng lapen ale lapen anong apharman chesong pen kopilo nang kelongji?
