Arnam Keklem Asai Monit Kemathadam Ateng Puan Kejoike Puloma?

Arnam aphan kekroi atum along ke, nang anuttin tame kosonsi nang ahokpet kemenei aningkarong lapen kejok kelongloma Arnam kijutsi arni ahut keklem asai lapen pima Alangli kemangdam asai pini arni nanglong Alangli keklempon apot chorothek nangji. Arnam laso adilung amonit kaselampon ke kadokave somindar adangpi si Alangli sai keklem’iji pu isinat akemang henlo. Alangli kadokave Alangli ning avi nangtum aphan chepabuthei tanglo; Alangli ke aboi chelongthulo lapen nangtum aphan si kadokave Karjong asai somindar adangpi keklempon apot nangpi tanglo. Laso apot si Ne pulo nangtum doan ke kopai keme atumlo. Anpartame, Alangli nongthe Israel pen Alangli nangcheterek tanglo, Alangli kangvaitang amonit atum, nangtum planglo, lapen Alangli ke Alangli kemangdam athe selam si angton pen laso adilung pen ajok chepaklangponpo. Laso apot si, nangtum doan ke komatma Arnam akhi-adat kedo kelongdunji atumlo, lapen laso pen anpar sose, nang ke Arnam anongthe ahemphu atum saidelo. Chenam ta nangtum kadokave laheihui alamthe ningdoji: “Athe itum atur kero akesung, atheke pima malomso aphan, itum aphrang anat ansose kehelopik lapen kai apar kai anongthe aboi apharman si nangklempilo.” Nangtum kadokave laheihui alam arjulong aphrang, tebonta nang inutnat tame alangtum ahok ajor chininedetlo. Pini arni, nang ke akeongpi si alangtum ahok akenangsot alam chinidunlo. Laheihui alamthe ke Arnam mo kepadusi arni ahut paplengtheipo, lapen latum ke komatmatma dragon thepo ke’er adet along kedo kepangrumchom pen ahir tanrak kesung kephotang atum along si paplengponpo. Dragon thepo ke’er Arnam aphan pasunglo lapen Arnam ahoturlo, lapen lasi, laso adet along, komatmatma Arnam aphan kekroi atum anke laso katheraknang lapen aduk kedonang phovekpo, lapen Arnam alamthe doan ke nangtum along si pachunpo, laso adilung amonit atum, alonglo angthek. Athema lake pima Arnam aphan kekhamkhe adet along si vang tanglo, kadokave Arnam asai doan ongdung kechaknap chetongpo, lapen Alangli lamthe penang an kepaplengponji aphan apor nang’oji; lasi, monit atum doan ke Arnam alamthe pen ajok cham ingthirji, athe ke la kesung kachechak eson apharlo. Lake athe Arnam aphan Alangli sai bangso dragon thepo ke’er adet along asai keklempon along akeongpi akesunglo – bonta lake lason akesung pen ajok si Arnam Alangli sai isi angdeng klemponlo, Alangli kethek-kere lapen Alangli manghumeme asai amo kachepaklangpon, lapen laso avarsai akerap ke’en pen laso adilung amonit atum aphan kapachoklim kepaman. Laso amonit atum akesung chechak pen ajok, alangtum apharan pen ajok, lapen kadokave Sobar akun bangso keterbung adet along amonit atum pen ajok pima Arnam Alangli kepangthir lapen chepahemphu asai klemponpo, lake pima, lason pen si, Alangli anongthe longpo meme, lapen laso pen ajok Alangli komatmatma Alangli sai amo ahakhi kachipidunthek atum an aphan longdampo meme. Lason henlo kadokave pima Arnam laso adilung amonit atum aphan kachehodaidet pen kapinchong angton akenangsot alamlo. Lake, laso pen ajok si komatmatma Alangliphan kekhamkhe atum an pima Arnam kachepahemphupon asai klemlo, lapen lason anchot si kethedung Arnam ajakong ke cheklangdak unpo. Akaprek ahin pen pudam lote, komatmatma kangthirthe adet along kedo atum anchot si Arnam anongthe akhi-adat chepahemphu longji athenglo, lapen lason anchot su Arnam kethedung ajakong pachini unpo. Laso apot si Ne pulo pima lake kangthirthe adet penlo, lapen komatmatma kangthirthe adet along kedo atum penlo, pima Arnam anongthe ke kelongdamji. Lason henlo Arnam akar’idamlo. Jisu asai angdeng ke isinatlo: Alangli ke komatmat aPharisee atum si Alangliphan kachenek loma latum angbong pen si Alangli anongthe’ipo; jongsi Pharisi atum akachenek lapen Judas kachongthuidet athe kalidet pute, Jisu aphan ke patherakre mate kapchobei akoi pidetji apot, thengparpan athak apran ke’en ta avedetji, lapen lasi anongthe tame longledetji apotlo. Arnam asontin akai along sai keklem ahut, lapen ok along Alangli sai Alangli keklempon adim, ke konatma Alangli nongthe kelongji lapen Alangli komatmatma Alangli kelongji pu ninghang doan aphan palongpo. Lake Arnam asai akemangdamlo, lapen lake Alangli kisik-kedang apotlo.

Arnam ningkan suri sose aphan kemangdam along, ok kachepharlotang along si sonni asai aphar ke patang etlo: Kechengsi ke pran kachipi asailo, athe laso pen Alangli anong-athang dolo; isi asai abang ke kachepahai lapen kapachoklim mo kijit arni ahut, athe laso pen Alangli anong-athang dolo. Lake Arnam kisik-kedangdam apotlo. Lasi Arnam asai aphan, mate Arnam aketoi ahukum nangtum hokhe nangne, la kejoike alam kali. Nangtum doan kadokave ke Arnam ansose akahelopik lapen kai apar kai anongthe ardi along khi-dat ahemphu saide atumlo, lapen lake Arnam ahin pen si nangpekpon pemelo. Alangli nongthe sonni aphar angbong pen, isi ke nangtum along cheklangponlo; angton Arnam anongthe isi aphar ke nangtum aphuthak si nangpitheilo, pima lake nangtum akhi-adat chepahemphu longji meme pulo. Lake Arnam thedung aningkaronglo nangphan, lapen lake pima Alangli hako ahut kecheng pen kapathikdammek akemang apotlo. Arnam kethedung asai kipi kapachunpon konatma dragon thepo ke’er kedo adet along, jongsi laso asai le akaprek adim pondet asonte, lake arjidingklui ahut pen si thedung athe pathe’etpo lapen monit atum chisikding pen dengdun’etpo. Anpartame, laso asai ke joipik anji apotlo komatmatma Arnam aphan kekroi Nijang anat dhorom asai adeng kepekpon atum aphan ke, athe Jisu asai angdeng keklempon ke apor ateng asonlo. Laso apot si Arnam ke laso anong-athang kethe asai angdeng akaprek nahok ta longledetlo; monit atum kacherapdunpet lapen adet ta kapangthekdun peme pen, lake pasangkok un’e. Lake kemepik akenangsot alam pima laso asai angdeng labangso adet along kesangkok aphuthak klardaklo. Nangtum angbong inutnat tame aron aber kedode abang ke avelo – nang ke, alar bonta, aron pen si ado nangpipo. Anpar kasaiksakdam abang ke pima monit atum nangtum aphan chininedetlo: nang don-rap atum tame, nangpi-nangpo, nang bajar atum, mate nang sai klemrappet atum, latum inutnat tame nangtum aphan chininedetlo. Nangtum doan aphan le Arnam “ke’obup” ahut, nangtum pirthe along laso ahut ke kerengdunbomjilang un’epin asonlo, bonta lapuan tame, monit atum Arnam pen kacheheloji aphan chechak un’edetlo, la atheke Arnam monit atum aphan kachepahemphupon pu akenangsot alamlo, lapen lake Arnam anongkethelo. Nangtum non an kopisi kacheparidengpon ke pima kedamtang akai ahut birta keme athanbang lapen mohut keplangji alam kethanmek atum aphan anta palittheilo lapen ke pima Moses lapen Pitor atum aphan antame kethemulo. Hirjume puke arnisi nini angbong longle; latum thedung kachehodainang pen ajok si long unji. Lake pudam lote, nangtum ke pima kecham pangthir keklem ahut akanghon cheparidengvek nangji, nang ke thedung akekroi dovek nangji, lapen nang ke penang an ahok pima Arnam nangphan kepalongtoi ateng pen dovek nangji; kopilo anpartame, nang ke kangsai ahin chetevarvek nangji, kebai pen kapachehodai mate kachepajok bor’iji pu keklem kalipin pen, lapen ke Arnam aphan kithirthip lapen aboi kijumdet kalipin akanghon dovek nangji. Nang ke chepathik’et tahaipo, nangtum achethe akun along kachelar klangvek nangpo, nangtum kahenodak anta keso melap nangpo, nang ke kadokave Arnam kisik-kedang kemangdam along patepek dundepin pen dengdunthei nangvekpo, lapen nang ke mo kithi ahut anta athikpet si dovek nangpo. Lahenlo kopima nangtum kelongdamji kirivek nangji, lahenlo Arnam asai kijutsi akemanglo, lapen lahenlo kopima Arnam laso adilung amonit atum aphan kehang. Alangli nangtum aphan nangpi tangdetlo apot, lasi nangtum aphan adular ke Alangli nanghangvekpo, lapen ke nangtum aphan atheng choklim akehang ke padovekpo. Laso apot si, kadokave Arnam keklem asai anke athe kedo saide, kopi apot si lasonma pulote, apor lapen apor lethot ahut, Arnam ke pima asai keklem puan si karsikjik pen kepamelo lapen kehang ateng palonglo. Lake athema laso apot si pima nangtum ke Arnam aphan kekroi plengset nangji. Pathihek pen, kadokave Arnam keklem kapatang asai doan ke nangtum aphan ajoinelo, laso pen ajok nangtum Alangli khi-dat chepahemphu longji atheng kelongji aphanlo. Lake Arnam methang anongthe apharman puanchot ajoine lapu kalilo bonta nangtum kejok kelongji aphan ajoinelo lapen laso adilung amonit atum komatma kangthirthe adet along puan si akeongpi kesungnang apot kapachoklimji pu ajoainelo. Nangtum Arnam akar’idam alam chini nangji. Lapen lasi, Ne penang an komatma thangnat ta aklong alam kachinine mate kemathadun thekthe kiludet amonit atum aphan choningri padikrimlo: Arnam aphan asat langri, lapen anpar ke khangrinon. Arnam ke madu amonit ta kachechakchedet akeso-kesung chechak’et tanglo, lapen hako ahut monit adular si lapuan sose kethedung katherak chechak’etlo. Kopi ason si nang kache’o un’edet kedolang? Kopi si Arnam akar’idam pen anpar akenangsot ason kedolang? Bangso kangthirthe adet along Alangli sai keklemponji Arnam aphan ta lake akesung dokoklo; jongsi, laso along anpar ta, monit atum chinilor lapen aninghang ateng si abat langplotlo, Arnam asai keklem ke ajak pading nangkokpo. Pathihek pen, lake madu tame kemenei ningkehang kalilo, lake inutnat aphan ta ale kedoji kalilo. Arnam aphan ke apor rakhet un’e; Alangli sai lapen Alangli nongthe si aphrang dolang. Laso apot si, Alangli ke Alangli sai apharman ajat anam tame pipo, la koanma ajak dingnang tamelo. Lahenlo Arnam akunlo: Alangli sai chunchetik ke Alangli sangsedetpo. Alangli sai kijutji ke Alangli adunthu aphar Alangli nongthe longdet aphilo. Jongsi, kadokave somindar adangpi along, Alangli anong-athang kethe adunthu angdeng Arnam pajutjedetlo pute, Alangli laso arni vangvedetpo, Alangli rideng pen Alangli kangvaitang amonit atum aphan che’o’edetpo, Alangli nongthe ke Israel aphuthak inghuhedetpo, lapen Alangli kemangdam ta jutjedet khangjangpo. Nang Arnam akar’idam alam kelangdun thekvek nangji, lapen pima Arnam asai ke sining lapen pirthe lapen kadokave ahormu kapinchong ason puan kejoike kali pu thekdamlong nangji. Lake athema pini arni asai ke komatmatma kahenotang atum aphan kapachelarphun henlo, komatma kematha thekthedet aphant keongnei atum, lake komatmatma pinchong tanglo bontame Sobar katevarponphit atum doan aphan kapangthirji pulo. Lake Adam mate Eve atum aphan kapinchong pu apot kali, lake katheang atur kapinchong pu apot ke durepik anlo, mate asontin athengpi-thengphang lapen marat-mareng kapinchong pu apot ta kalilo. Arnam ke ahormutin aphan tame pangthirjirlo tame Sobar si phangnodaklo lapen ke latum aphan puthot akimi paplanglo; latum ke pima Alangli pharman ahormu saidelo, lapen latum ke Alangli nongthe si cheman’ilo. Lake monit kemathadam atengthot kali, lake sining lapen pirthe lapen laso along asontin kapinchong ason puan akejoike kalilo, mate Sobar aphan meherang aklong’et along ketoi ahirjuno kipi asai; bontame, lake monit aphan kapachekirlaphun asai henlo, kahenodak ahormu antame puthot kelarthuvoilo, lapen Alangli pharman kalidet ason an, kemesen ahormu si pima pamanthulo, lapen Alangli pharman dolo. Lahenlo ahokpet alam ke labangso Arnam asai angdeng along. Nangtum laso alam chinidamvek nangji, lapen asontin alam tame kapajoi aret pen che’onon. Arnam asai ke kejoike asai keklem pen thangnat ta kacheton ave. Laso kemanghumeme ason lapen kethek-kere doan ke monit atum aphu tarlok pen abatlang. Arnam kadokave ahormu laso asai angdeng ahut pinchongche, mate Alangli latum doan aphan tame phangnone. Alar ke, Alangli kadokave ahormu kapinchongtang doan aphan Alangli pachelarphunlo, lapen kadokave ahormu pima Sobar le kaphangnotang apot an cham pangthirtheilo. Lapen lasi Arnam thedung asai keklemji aphan pangchengpon tanglo, atheke angton pen Arnam asai akenangsot alam ajorlo. Tangte Arnam asai pima nang ketheklong laheihui alamthe along chenam si puan akejoike puloma?