१७८ विश्वासीहरूले अनुसरण गर्नुपर्ने पछ्याइ
१
अहिले तैँले के पछ्याउनुपर्छ? तैँले परमेश्वरको कामको गवाही दिन सक्छस् कि सक्दैनस्, तँ परमेश्वरको गवाही र प्रकटीकरण हुन सक्छस् कि सक्दैनस्, अनि तँ उहाँद्वारा प्रयोग गरिन योग्य छस् कि छैनस्—तैँले पछ्याउनुपर्ने कुरा यिनै हुन्। चाहे परमेश्वरले तँलाई जाँच्नुभएको, काटछाँट गर्नुभएको, वा ताडना दिनुभएको होस्, उहाँका कार्य र उहाँको काम तँमा गरिएका छन्। तर परमेश्वरको विश्वासी र उहाँद्वारा सिद्ध पारिने पछ्याइ गर्न इच्छुक व्यक्तिका रूपमा, के तँ व्यावहारिक अनुभवका आधारमा उहाँको कामको गवाही दिन सक्छस्? के तँ आफ्नो व्यावहारिक अनुभवमार्फत परमेश्वरको वचन जिउन सक्छस्? के तँ आफ्नै व्यावहारिक अनुभवमार्फत अरूलाई आपूर्ति गर्न सक्छस्, र आफ्नो सम्पूर्ण जीवन परमेश्वरको कामको गवाही दिन समर्पित गर्न सक्छस्?
२
परमेश्वरको कामको गवाही दिनका लागि तँ आफ्नै अनुभव, ज्ञान र तैँले चुकाएको मूल्यमा भर पर्नैपर्छ। यसरी मात्र तँ उहाँका अभिप्रायहरू पूरा गर्न सक्छस्। यदि तँ उहाँको नाउँको, र अझ बढी, उहाँको कामको गवाही दिन सक्छस् भने, अनि उहाँले माग गर्नुहुने उहाँका मानिसको स्वरूपमा जिउन सक्छस् भने, तँ परमेश्वरको गवाही दिने व्यक्ति होस्। तँ कसरीचाहिँ परमेश्वरको गवाही दिन्छस् त? यदि तँ परमेश्वरको वचन जिउन, र मानिसहरूले उहाँको काम चिन्न र उहाँका कार्यहरू देख्न सकून् भनेर आफ्नै मुखले गवाही दिन खोज्छस् र तृष्णा गर्छस् भने—यदि तँ साँच्चै यो पछ्याउँछस् भने, परमेश्वरले तँलाई सिद्ध पार्नुहुनेछ। तँ उहाँबाट सिद्ध पारिन र अन्ततः आशिषित हुन मात्रै पछ्याउँछस् भने, उहाँप्रतिको तेरो आस्थाको दृष्टिकोण शुद्ध छैन।
३
तैँले वास्तविक जीवनमा परमेश्वरका कार्यहरू कसरी देख्ने, उहाँले तँलाई आफ्ना अभिप्राय प्रकट गर्नुहुँदा उहाँलाई कसरी सन्तुष्ट पार्ने भनी पछ्याइरहेको हुनुपर्छ, र उहाँको अद्भुतता र बुद्धिको गवाही कसरी दिने, अनि उहाँले तँलाई जसरी ताडना दिनुहुन्छ र काटछाँट गर्नुहुन्छ त्यसको गवाही कसरी दिने भनी पछ्याइरहेको हुनुपर्छ। यी सब तैँले अहिले मनन गरिरहेको हुनुपर्छ। परमेश्वरले तँलाई सिद्ध पार्नुभएपछि तैँले उहाँसँगै महिमा पाउन सक्छस् भनेर मात्रै तँमा उहाँलाई प्रेम गर्ने हृदय छ भने, त्यो अझै अपर्याप्त हुन्छ र त्यसले परमेश्वरका मागहरू पूरा गर्न सक्दैन। तैँले व्यावहारिक रूपमा परमेश्वरको कामको गवाही दिन, उहाँका मागहरू पूरा गर्न, र उहाँले मानिसहरूमा गर्नुभएको काम अनुभव गर्न सक्नुपर्छ। चाहे पीडा होस्, आँसु होस् वा उदासी होस्, तैँले यी सबै कुराहरू व्यावहारिक रूपमा अनुभव गर्नैपर्छ। ती तँलाई परमेश्वरको गवाहीका रूपमा सिद्ध पार्नका लागि हुन्।
—वचन, खण्ड १। परमेश्वरको देखापराइ र काम। सिद्ध पारिनुपर्नेहरू शोधन भएर जानैपर्छ
