10. Kuv Tau Pom Vajtswv Qhov Kev Tshwm Sim Lawm
Kuv keev koom nrog neeg Kaus Lim ib pawg ntseeg Plhesanpaisthaliam. Txhua tus hauv kuv tsev neeg puav leej los ntseeg thaum kuv tus ntxhais muaj mob. Tom qab ntawd, nws pib zoo ib hnub zuj zus lawm. Kuv ua tsaug heev rau Tswv Yexus txoj kev hlub tshua. Kuv tau cog lus tias kuv yuav ua lub siab ncaj ncees raws tus Tswv qab txij thaum ntawd mus, rau siab ua hauj lwm kom ua tau ib tug neeg uas Nws cheem tsum thiab ua rau Nws muaj kev xyiv fab. Kuv yeej tsis plam ib teg dej num ntawm pawg ntseeg li, txawm kuv khwv npaum li cas los xij, kuv ib txwm muab khoom pab cuam thiab khoom fij, thiabkoom tej dej num hauv pawg ntseeg yam nquag plias. Kuv siv lub sij hawm feem ntau los nyeem Vajluskub thiab koom tej dej num hauv pawg ntseeg, thiab kuv yeej tsis tshua mus koom tej koom txoos es mus noj hmo thiab tej kev sib sau ua ke uas yog npaj los ntawm kuv tej txheeb ze, tej phooj ywg, tej neeg sib koom ua ke thiab tej uas zoo li no li. Ua rau lawv tag kev cia siab rau kuv vim qhov ntawd. Thaum kuv tso kev haus cawv tseg thiab kev haus luam yeeb tom qab rais los ua ib tug ntseeg lawm, thiab tsis mus koom tej koom txoos nrog lawv ntxiv lawm, ces ib txhia ntawm kuv cov phooj ywg thuam kuv, hais tej yam zoo li no tias, “Koj nyiam mus tim pawg ntseeg heev, yog li ntawd qhia peb seb, kev mus tim pawg ntseeg txhua hnub zoo dab tsi rau koj? Lub hom phiaj ntawm koj txoj kev ntseeg no yog dab tsi?” Yuav qhia qhov tseeb, thiaj li nug tas nug thiab, kuv yeej tsis paub xyov yuav hais li cas tiag tiag. Tab sis nws yog vim lawv cov lus nug kuv thiaj li tau pib ua tib zoo xav hais tias: Kuv txoj kev ntseeg yog txhawm rau dab tsi tiag tiag? Nws puas yog los thov kom Vajtswv kho kuv tus ntxhais, los sis yog ua kom kuv tsev neeg noj qab nyob zoo? Qhov muaj kev ntseeg puas yog kev nyeem Vajluskub thiab mus tim pawg ntseeg txhua hnub xwb? Kuv yeej tsis paub tiag tiag. Kuv coj cov lus nug no mus nug cov thawj coj sab kev ntseeg ntawm kuv pawg ntseeg. Lawv cov lus teb puav leej zoo ib yam tias: Peb txoj kev ntseeg yog txhawm rau txoj hmoov hlub ntawm tus Tswv txoj kev cawm dim, thiab thaum Nws rov qab los Nws yuav coj peb mus rau saum ntuj ceeb tsheej rau txoj sia ntev dhawv mus ib txhis. Hom lus teb ntawd zoo li daws tau qhov kuv paub tsis meej, tab sis nws ua rau muaj lwm lo lus nug hais tias: Ces kuv yuav nkag mus rau hauv ntuj ceeb tsheej tau li cas? Lawv qhia kuv lawm, “Loos 10:10 hais tias, ‘Vim hauv lub siab tib neeg ntseeg rau txoj kev ncaj ncees; thiab lub qhov ncauj lees txim ces yuav tau txoj kev cawm dim.’ Qhov no txhais hais tias tus Tswv twb zam txim rau peb tej kev txhaum lawm, yog li ntawd peb thiaj li raug cawm los ntawm txoj kev ntseeg, thiab tus Tswv yuav coj peb ncaj qha mus rau saum lub nceeg vaj thaum Nws rov qab los. Yog li ntawd, koj tsis tas yuav txhawj txog qhov nkag mus rau saum ntuj ceeb tsheej li tsuav yog koj muaj kev ntseeg xwb.” Kuv xav txog nqe Vajluskub uas hais tias: “Yog tsis muaj kev dawb huv ces tsis muaj tib neeg yuav pom tus Tswv li” (Henplais 12:14). Vajtswv mas dawb huv thiab Nws cheem tsum kom peb dawb huv, tab sis kuv mas ua neej nyob hauv txoj kev txhaum thiab tsis muab Nws cov lus coj los xyaum ua raws li li. Kuv yuav tsim nyog rau lub nceeg vaj tau li cas? Tswv Yexus tau qhia peb hais tias: “Koj yuav tsum hlub tus Tswv uas yog koj tus Vajtswv kom kawg koj lub siab, thiab kom kawg koj txoj sia, thiab kom kawg koj lub tswv yim. Nov yog thawj nqe thiab nqe kev cai uas tseem ceeb. Thiab nqe ob los zoo li ntawd thiab, koj yuav tsum hlub koj tus neeg nruab zog ib yam li koj tus kheej” (Mathai 22:37–39). Tab sis hauv lub neej txoj sia txhua hnub mas, tsuas yog kev cheem tsum yooj yooj yim los muab kev hlub xwb los kuv ua tsis tau li lawm, txawm kuv yuav tas zog siv zog npaum li cas los xij. Kuv hlub kuv tsev neeg ntau dua qhov kuv hlub tus Tswv lawm, thiab kuv yeej tsis hlub lwm tus tiag tiag li kuv tus kheej. Thaum kuv cov phooj ywg thiab cov txheeb ze thab kuv, kuv chim rau lawv vim qhov ntawd, tiam sis tsim nyog kuv yuav tau uv thiab ua siab ntev. Kuv kuj xav txog Henplais 10:26 uas hais tias: “Vim yog hais tias peb txhob txwm ua txhaum tom qab uas peb twb tau txais qhov kev paub txog qhov tseeb lawm, ces yuav tsis tshuav dab tsi theej txhoj tau rau tej kev txhaum lawm.” Kuv paub yam tus Tswv cheem tsum lawm tab sis kuv tsis tuaj yeem ua tau li. Kuv tas zog ua neej nyob rau hauv txoj kev txhaum xwb, yog li ntawd kuv ho tsis pom qhov tshwm sim rau kuv txawv dua qhov tshwm sim rau cov tsis ntseeg. Qhov no ua rau kuv xav hais tias qhov kev nkag mus rau hauv lub nceeg vaj mas tsis yooj yim npaum li tus thawj coj ntawm sab kev ntseeg tau hais, tab sis kuv tseem tsis tau paub tias kuv yuav nkag mus rau hauv ntuj ceeb tsheej thiab tau txais txoj sia ntev dhawv mus ib txhis li cas. Kuv tseem tsis tau muaj ib txoj kev. Kuv tas zog nug tus thawj coj ntawm sab kev ntseeg thiab kuv cov phooj ywg ntawm pawg ntseeg txog cov lus nug, tab sis yeej tsis muaj ib tug twg ntawm lawv muaj ib lo lus teb uas meej li. Lawv tsuas nug kuv tias vim li cas kuv thiaj li nug tej lus nug txawv txawv no xwb, thiab hais tias qhov no yog qhov tib neeg twb xyaum ua raws li txoj kev ntseeg los tau ntau tiam lawm. Kuv yeej tseem paub tsis meej li qub, yog li ntawd kuv thiaj li txiav txim siab rov nyeem tag nrho plaub phau ntawv ntawm Txoj Moo Zoo, xav hais tias yuav tsum muaj ib lo lus teb nyob rau hauv Tswv Yexus cov lus xwb.
Muaj ib hnub nyob rau xyoo 2008, kuv tau nyeem cov nqe no tias: “Kuv yog qhov tsa sawv rov qab los, thiab yog txoj sia: tus ua ntseeg kuv, txawm tias nws tuag lawm los xij, yeej yuav ciaj rov los: Thiab tus uas tseem ciaj sia nyob thiab ntseeg Kuv ces yeej yuav tsis tuag” (Yauhas 11:25–26). Ua rau kuv paub tsis meej cov nqe lus no thaum kuv nyeem cov nqe lus ntawd. Vim li cas tus Tswv thiaj li hais tias peb yuav tsum ua neej nyob thiab ntseeg Nws? Yog cov ntseeg lawm, tsis yog peb puav leej ciaj sia thiab ntseeg Nws lod? Tus Tswv puas yuav pom peb zoo li tus tuag vim qee lub laj thawj? Nws ua rau kuv muaj lus nug ntau heev. Kuv siv txhua lub sij hawm uas khoom los xav txog qhov no me ntsis, tab sis kuv yeej xav tsis tawm nws lub ntsiab lus tseeb li. Kuv thiaj li tau rov nug cov nqe lus nug no dua rau tus thawj coj ntawm sab kev ntseeg thiab lwm cov tswv cuab ntawm pawg ntseeg, thiab tsuas yog lawv tsis muaj ib lo lus teb xwb, tab sis tseem luag kuv thiab. Tabsis kuv tseem hnov zoo li muaj qee yam ntsiab lus uas tob dua zais rau hauv qhov tus Tswv tau hais.
Ces muaj ib zaug kuv tau nyeem qhov no nyob rau hauv Mathais Txoj Moo Zoo tias: “Thiab lwm tus ntawm Nws cov thwj tim txawm hais rau Nws hais tias, tus Tswv, cia kuv mus faus kuv txiv ua ntej tso. Tab sis Yexus hais rau nws hais tias, Cia li raws Kuv qab mus; es cia cov tuag faus cov tuag” (Mathai 8:21–22). Thaum kuv pom kab lus uas hais tias “es cia cov tuag faus cov tuag,” ua rau kuv tsis meej pem me ntsis. Vim li cas tus Tswv thiaj li muab cov uas tseem ciaj sia thaum lub sij hawm ntawd hu ua cov tib neeg tuag? Tus Tswv puas pom peb zoo li cov ciaj, los sis zoo li cov tuag? Kuv xav txog qhov Vajluskub hais tias tej nqi zog ntawm txoj kev txhaum yog kev tuag. Kuv ua neej nyob rau hauv txoj kev txhaum, thiab qhov ntawd yog qhov tus Tswv txhais tias yog “tus tuag” lod? Yog hais tias yog, kuv yuav ciaj sia tau li cas, thiab kuv yuav nkag mus rau hauv lub nceeg vaj tau li cas? Kuv lub siab mas puv nkaus cov lus nug uas kuv tsis to taub hlo li. Tab sis puag hauv nruab siab mas kuv yeej paub meej ib yam tias: Vim tus Tswv tau hais tej no lawm, ces yuav tsum muaj lo lus teb nyob rau ib qho twg hauv Vajluskub xwb. Yog li ntawd kuv thiaj li tsis tag txoj kev ntseeg, tab sis tas zog nrhiav lo lus teb mus.
Ua tsaug rau tus Tswv txoj kev coj kev, ob peb lub hlis tom qab ntawd, kuv tau nyeem lwm yam uas Nws hais tias: “Tseeb tiag, tseeb tiag, Kuv hais rau nej hais tias, Lub sij hawm tab tom los, thiab tam sim no twb los txog lawm, thaum cov tuag hnov Vajtswv Leej Tub lub suab: thiab cov uas hnov yuav ciaj sia nyob” (Yauhas 5:25). Nws ua rau kuv paub meej kiag tam sim ntawd hais tias cov tuag sawv rov qab los ciaj sia thaum lawv hnov Vajtswv lub suab. Kuv ntseeg tias qhov no yog lo lus teb uas kuv tab tom nrhiav ntag! Tab sis kuv tseem tsis tshua meej pem, xav hais tias kuv twb tau hnov tus Tswv lub suab ntev los lawm, tab sis kuv tseem tsis tau dim plaws tej saw khi ntawm txoj kev txhaum. Puas suav tau tias kuv tseem muaj sia nyob? Qhov uas “cov uas hnov yuav ciaj sia nyob” yog hais txog dab tsi tiag tiag? Tib neeg los tau txoj sia li cas? Thaum tus Tswv rov qab los lawm Nws puas tau hais ntxiv tias peb yuav tsum tau mloog? Yog hais tias yog li ntawd, peb yuav hnov Vajtswv lub suab tau li cas? Peb yuav hnov lub suab nyob rau qhov twg? Kuv xav tsis tawm li, yog li ntawd kuv thiaj li tau thov tus Tswv hais tias, “Au tus Tswv, thov cia kuv hnov Koj lub suab kom sai li sai tau. Kuv tsis xav tuag. Thov pab kom kuv ciaj sia.”
Tom qab ntawd, thaum kuv mus ua tej dej num tim pawg ntseeg, kuv mam pib ua tib zoo mloog seb cov xib fwb puas tau hais ib yam dab tsi txog qhov tus Tswv rov qab los los sis tus Tswv lub suab hauv lawv tej lus qhuab qhia. Kuv tag kev cia siab tiag tiag li tias qhov uas lawv puav leej qhia peb kom ceev faj cov ntseeg lwm hom, thiab saib ntsoov thiab tos, tab sis yeej tsis hais ib yam dab tsi txog qhov tus Tswv rov qab los hlo li. Kuv kuj tau nug qee tus tib neeg tseem ceeb uas saib xyuas pawg ntseeg txog tej no lawm thiab, tab sis lawv hais tas li tias tej lus nug uas kuv pheej nug no mas yog los ntawm qhov tsis muaj kev ntseeg, tias kuv tsuas yog zoo li Thaumas xwb. Lawv pib ntiab kuv tawm. Ces lwm cov tswv cuab ntawm pawg ntseeg uas kuv ib txwm sib raug zoo nrog lawv tus kheej txawm pib txav deb, thiab ib txhia txawm tsis suav kuv lawm. Thaum kawg kuv thiaj li tau tawm ntawm pawg ntseeg uas kuv koom los tau 18 lub xyoo ntawd lawm. Kuv tau saib cov tshooj xov xwm los ntawm cov Ntseeg Vajtswv tag hnub li, cia siab tias yuav hnov Vajtswv lub suab los ntawm cov xib fwb nto moo tej lus qhuab qhia. Kuv ua li no tau yuav luag txog rau lub hlis lawm, saib tej xov xwm ntawd li 10 teev los sis tshaj ntawd txhua hnub, tab sis kuv tseem nrhiav tsis tau cov lus teb uas kuv xav tau li. Cov xib fwb tsuas hais tias tus Tswv yuav rov qab los sai sai yog li peb yuav tsum saib ntsoov thiab tos. Tab sis kuv muaj lus nug ntau dhau li lawm. Tus Tswv tab tom rov qab los, tab sis thaum twg ma? Thiab vim li cas peb thiaj li tseem tsis tau txais tos Nws? Kuv thov tus Tswv tas li thaum lub sij hawm ntawd, hais tias, “tus Tswv! Kuv twb tos ntsoov Koj los tav li no lawm, cia siab heev hais tias yuav tau txias tos Koj thaum kuv tseem muaj txoj sia nyob, kom hnov Koj lub suab. Au tus Tswv, thaum twg Koj mam li los? Thov cia kuv hnov Koj lub suab.”
Muaj ib hnub nyob rau lub Peb Hlis Ntuj xyoo 2013, ntawm lub qhov rooj nkag mus rau peb lub tsev, ib tug txiv neej laus uas zoo li nws muaj 70 xyoo lawm tau los rau ntawm kuv, nug seb kuv puas xav tso npe los mus txais Tshausam Ainpom cov ntawv xov xwm. Kuv yeej tsis xav kiag li, vim tab tom xav hais tias tam sim no txhua tus puav leej muaj xov tooj ntawm tes thiab khoosphistawj lawm, leej twg thiaj li yuav nyeem ntawv xov xwm ma? Yog li ntawd kuv hais ncaj qha rau nws hais tias kuv tsis txais. Tab sis tau ntau hnub lawm txhua zaus nws pom kuv, nws pheej hais kom kuv tso npe los mus txais. Kuv los pheej tsis txais li thiab. Tab sis ua rau kuv ceeb tag, ib lub hlis tom qab ntawd kuv tau nrog tus txiv neej ntawd nce ntaiv hluav taws xob ua ke. Zoo li nws tseem tos ntsoov kuv xwb. Thaum nws pom kuv, nws luag ntxhi thiab hais nyob zoo, ces hais kom kuv tso npe los mus txais. Kuv xav tsis thoob li tias vim li cas tus txiv neej no thiaj li tas zog thab muag ntawv xov xwm rau kuv los ntev ua luaj li. Sim ua neeg zoo, thaum kawg kuv thiaj li tau tso npe mus txais yuav, tab sis vim muaj ntau qhov laj thawj, kuv thiaj li tsis muaj sij hawm los nyeem tej ntawv xov xwm ntawd tau ib ntus. Ces muaj ib tag kis thaum nyuam qhuav pib lub Tsib Hlis Ntuj tom qab cov ntawv ntawd tuaj txog lawm, kuv tau muab los nyeem tsuag tsuag cov ncauj lus xov xwm li qhov kuv ib txwm ua. Ces txawm muaj ib lub ncauj lus uas ua rau kuv nyiam kiag tam sim. Lub ncauj lus ntawd hais tias, “Tswv Yexus Twb Tau Rov Qab Los Lawm—Vajtswv Tus Uas Muaj Hwj Chim Loj Kawg Nkaus Twb Tau Nthuav Tawm Cov Lus nyob rau Tiam Lub Nceeg Vaj Lawm.” Ua rau kuv ceeb tag—dab tsi ne? Tus Tswv twb tau rov qab los lawm lod? Vajtswv Tus Uas Muaj Hwj Chim Loj Kawg Nkaus? Tiam Lub Nceeg Vaj? Qhov ntawd puas muaj tseeb tiag tiag ma? Kuv xav tsis thoob rau lub sij hawm ntawd kiag li—kuv xav paub heev. Thaum kawg kuv thiaj li nrhiav tau qhov xov xwm ntawm qhov tus Tswv rov qab los lawm. Tab sis tom qab ntawd kuv xav tias nws puas yog xov xwm cuav ne. Kuv saib hauv qab kawg ntawm nplooj ntawv no ces txawm pom ib tug xov tooj thiab chaw nyob ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, thiab ib co npe ntawm cov phau ntawv tuaj ntawm Pawg Ntseeg tuaj. Kuv xav tias nws mas tseem ceeb uas yuav tau los ua tib zoo tshawb xyuas qhov no, vim hais tias qhov tus Tswv rov qab los mas yog ib qho uas tseem ceeb heev. Kuv tau hu mus rau tus xov tooj uas kuv pom nyob rau hauv daim ntawv ntawd kiag tam sim ntawd. Kuv hnov ib tug muam lub suab teb xov tooj ces kuv txawm nug nws yam kub siab lug hais tias, “Kuv nug puas tau, qhov luam tawm nyob rau hauv daim ntawv xov xwm no puas muaj tseeb tiag? Tus Tswv twb rov qab los lawm lod? Cov lus no puas yog cov lus los ntawm Vajtswv los tiag tiag?” Nws hais tias, “Yeej yog tiag tiag.”
Tus Muam Khev Tim thiab Zignas uas tuaj ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus tuaj tau teem ib lub sij hawm tuaj sib sau ua ke nrog kuv thiab nkawv tau sib qhia nrog kuv txog peb theem ntawm Vajtswv txoj hauj lwm. Khev Tim tau hais tias, “Txij li thaum Adas thiab Evas raug Ntxwgnyoog muab ua lwj liam tag lawm, tib neeg tau nyob rau hauv txoj kev txhaum, hauv qab Ntxwgnyoog lub zog, raug Ntxwgnyoog siv ua si thiab ua kom raug mob. Vajtswv thiaj li tau ua peb theem ntawm txoj hauj lwm los cawm tib neeg ntiaj teb kom dim ntawm Ntxwgnyoog txoj kev tswj kav tag nrho, uas yog Tiam Muaj Kev Cai, Tiam Hmoov Hlub, thiab Tiam Lub Nceeg Vaj. Cov no yog peb theem sib txawv ntawm txoj hauj lwm, tab sis peb theem no puav leej yog tib tug Vajtswv ua tiav. Txhua theem ntawm Vajtswv txoj hauj lwm yog ua raws li qhov xav tau rau cov tib neeg qias vuab tsuab, thiab txhua theem raug tsim ua los ntawm theem tag dhau los, los ua kom tob thiab txhawb tsa txoj hauj lwm ntxiv.” Ces nws txawm nyeem ib nqe lus ntawm Vajtswv Tus Uas Muaj Hwj Chim Loj Kawg Nkaus cov lus: “Qhov kev npaj cawm tib neeg rau-txhiab-xyoo ces raug muab faib ua peb theem ntawm tes hauj lwm. Tsis muaj ib theem twg uas yuav sawv cev tau rau tag nrho tes hauj lwm ntawm peb tiam, tab sis tsuas yog ib ntus ntawm qhov tag nrho ntawd xwb. Lub npe Yehauvas tsis muaj peev xwm yuav sawv cev tau rau tag nrho Vajtswv tus moj yam. Qhov tseeb uas Nws ua Nws tes hauj lwm nyob rau hauv Tiam Muaj Kev Cai mas tsis tau yog pov thawj qhia hais tias Vajtswv tsuas yog Vajtswv nyob rau hauv txoj cai nkaus xwb. Yehauvas tsim muaj kev cai rau tib neeg thiab muab cov kev cai cob kiag rau lawv, hais kom tib neeg tsim tsa lub tuam tsev thiab cov thaj; tes hauj lwm Nws ua ces tsuas sawv cev rau Tiam Muaj Kev Cai nkaus xwb. Tes hauj lwm uas Nws ua mas tsis tau yog pov thawj qhia hais tias Vajtswv ces tsuas yog ib tug Vajtswv uas hais kom tib neeg ua raws tej kev cai xwb, los sis hais tias Nws yog tus Vajtswv hauv lub tuam tsev xwb, los sis hais tias Nws yog tus Vajtswv nyob ntawm lub thaj xwb. Hais li no ces yuav yog qhov tsis muaj tseeb. Tes hauj lwm ua nyob hauv qab txoj kev cai ces tsuas sawv cev tau rau ib tiam nkaus xwb. Yog li ntawd, yog Vajtswv tsuas ua tes hauj lwm nyob rau hauv Tiam Muaj Kev Cai xwb, ces tib neeg yuav muab Vajtswv kaw cia nyob rau hauv qhov lus tshab txhais nram qab no, hais tias, ‘Vajtswv yog tus Vajtswv hauv lub tuam tsev, thiab yog yuav tiam Vajtswv, ces peb yuav tsum hnav tej khaub ncaws pov thawj thiab nkag mus rau hauv lub tuam tsev.’ Yog tes hauj lwm hauv Tiam Hmoov Hlub tsis raug ua li thiab Tiam Muaj Kev Cai tau muaj txuas ntxiv los txog rau tam sim no, tib neeg yuav tsis paub hais tias Vajtswv kuj muaj siab dawb siab zoo thiab muaj kev hlub. Yog hais tias tes hauj lwm hauv Tiam Muaj Kev Cai tseem tsis tau raug ua tiav, thiab tab sis tsuas yog tes hauj lwm hauv Tiam Hmoov Hlub nkaus xwb, ces tag nrho tib neeg yuav paub hais tias Vajtswv tsuas txhiv tau tib neeg thiab zam txim rau tib neeg tej kev txhaum nkaus xwb. Tib neeg tsuas yuav paub hais tias Nws dawb huv thiab tsis muaj kev txhaum li, thiab hais tias vim yog tib neeg es Nws thiaj li muaj peev xwm muab Nws Tus Kheej los theej txhoj thiab muab ntsia rau saum tus ntoo khaub lig. Tib neeg yuav paub txog tej no nkaus xwb tab sis yuav tsis muaj kev to taub txog lwm yam li. Yog li ntawd ib tiam twg sawv cev rau ib ntus ntawm Vajtswv tus moj yam. Hos hais txog qhov uas kis twg ntawm Vajtswv tus moj yam raug sawv cev nyob rau hauv Tiam Muaj Kev Cai, kis twg nyob rau hauv Tiam Hmoov Hlub, thiab kis twg nyob rau theem tam sim no: tsuas yog thaum tag nrho peb theem raug muab coj los sib txuas ua ke ua ib qho lawm xwb ces lawv thiaj li nthuav tawm tau tag nrho Vajtswv tus moj yam. Tsuas yog thaum uas tib neeg tau los paub tag nrho peb theem lawm xwb mas lawv thiaj li to taub nws tag nrho. Tsis muaj ib theem twg ntawm peb theem ntawd uas yuav cia li muab hla tau li. Koj tsuas yuav pom tus moj yam ntawm Vajtswv nyob rau nws qhov uas muaj tag nrho ntawd tom qab uas los paub peb theem ntawm tes hauj lwm no lawm xwb. Qhov tseeb uas Vajtswv ua Nws tes hauj lwm tiav hlo nyob rau hauv Tiam Muaj Kev Cai tsis tau yog pov thawj hais tias Nws tsuas yog tus Vajtswv nyob rau hauv txoj cai nkaus xwb, thiab qhov tseeb uas Nws ua Nws tes dej num ntawm kev txhiv dim tiav hlo ntawd tsis tau txhais hais tias Vajtswv yuav txhiv tib neeg mus sib txhis. Tej no mas tag nrho ces yog tej lus xaus los ntawm tib neeg xwb. Tiam Hmoov Hlub tau los rau qhov xaus, ces koj hais tsis tau hais tias Vajtswv ces yog tus ntoo khaub lig tug xwb thiab hais tias tus ntoo khaub lig nkaus xwb los yeej sawv cev rau txoj kev cawm dim ntawm Vajtswv. Yog ua li ntawd ces yog kev xov vaj ncig Vajtswv. Nyob rau theem tam sim no, Vajtswv mas feem ntau ces yog ua tes hauj lwm ntawm txoj lus, tab sis koj yuav hais tsis tau hais tias Vajtswv ces yeej tsis tau ua siab dawb siab zoo rau tib neeg li thiab hais tias tag nrho tej Nws coj los ces tsuas yog kev rau txim thiab kev txiav txim nkaus xwb. Tes hauj lwm nyob rau tiam kawg ces nthuav tawm tag nrho tes hauj lwm ntawm Yehauvas thiab Yexus thiab tag nrho tej lus zais tob uas tib neeg yeej tsis to taub li, yog li ntawd thiaj nthuav tawm txoj hau kev kawg thiab qhov xaus ntawm noob neej thiab xaus tag nrho kev cawm tib neeg rau noob neej. Theem no ntawm tes hauj lwm nyob rau tiam kawg coj txhua yam los rau qhov xaus. Tag nrho tej lus zais tob uas tib neeg tsis to taub yuav tsum muab nthuav tawm kom tib neeg thiaj li muab tshawb xyuas tau txhua yam ntawm lawv thiab muaj ib qho kev to taub meej meej nyob rau hauv lawv lub siab. Tsuas yog thaum ntawd xwb mas tib neeg thiaj li yuav raug cais tawm raws li hom. Tsuas yog tom qab txoj kev npaj cawm tib neeg rau-txhiab-xyoo raug ua tiav hlo lawm xwb mas tib neeg thiaj li yuav to taub tag nrho Vajtswv tus moj yam, vim Nws qhov kev cawm tib neeg ces yuav los rau ib qho chaw xaus thiab” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Lus Zais Tob ntawm Kev Yug Los Ua Neeg (4)). Ces Khev Tim tau qhia ntau yam heev ntxiv rau kuv thiab kuv tau kawm paub tias Vajtswv txoj kev npaj cawm tib neeg 6,000 xyoo mas tau muab faib ua peb tiam, peb theem—Tiam Muaj Kev Cai, Tiam Hmoov Hlub, thiab Tiam Lub Nceeg Vaj. Nyob rau Tiam Muaj Kev Cai mas, Yehauvas tau tsim kev cai los coj tib neeg ua neej nyob rau hauv lub ntiaj teb thiab qhia kom lawv paub tias kev txhaum yog dab tsi. Nyob rau Tiam Hmoov Hlub, Tswv Yexus tau ua tiav tes dej num ntawm kev txhiv dim lawm. Nws raug ntsia rau saum tus ntoo khawb lig tam rau tib neeg ntiaj teb, txhiv peb dim ntawm txoj kev txhaum. Tsuav yog peb ntseeg tus Tswv, lees peb tej kev txhaum, thiab lees txim hloov dua siab tshiab xwb, ces peb tej kev txhaum yuav raug zam, thiab peb yuav tsis raug teem txim thiab raug txim vim txoj kev ua txhaum raws li txoj kev cai mus ntxiv lawm. Nyob rau Tiam Lub Nceeg Vaj, Vajtswv Tus Uas Muaj Hwj Chim Loj Kawg Nkaus tab tom nthuav tawm ntau qhov tseeb, ua tes dej num ntawm kev txiav txim, los yaug tib neeg tus moj yam qias vuab tsuab kom dawb huv, cawm tib neeg los ntawm Ntxwgnyoog txoj kev tswj hwm, los ntawm txoj kev txhaum, kom peb thiaj li zwm tau rau Vajtswv thiab pe hawm Vajtswv, es kom txhob ua lub neej nyob rau hauv txoj kev txhaum mus ntxiv lawm, es thiaj li raug Vajtswv qaws mus rau hauv lub nceeg vaj saum ntuj ceeb tsheej. Peb theem ntawm txoj hauj lwm uas tshwm sim nyob rau ntau tiam uas sib txawv ntawd mas, Vajtswv lub npe hloov lawm, Nws tshwm los rau tib neeg ntiaj teb rau hauv ntau txoj kev, Nws tes hauj lwm suav nrog txhua yam sib txawv, thiab Nws ua tes hauj lwm ntawd nyob rau ntau qhov chaw uas sib txawv, tab sis tej ntawd puav leej yog tib tug Vajtswv ua tiav xwb. Nws yog tib tug Vajtswv ua hauj lwm sib txawv nyob rau tiam sib txawv. Kev to taub qhov no mas qhia rau kuv paub tseeb tiag tiag li.
Tom qab ntawd Zignas qhia rau kuv txog qhov Vajtswv Tus Uas Muaj Hwj Chim Loj Kawg Nkaus yaug tib neeg kom dawb huv thiab hloov tib neeg los ntawm Nws tes dej num ntawm kev txiav txim li cas. Nws tau qhia zaj lus ntawm Vajtswv cov lus no hais tias: “Khetos ntawm tiam kawg siv ntau yam kev tseeb los qhia tib neeg, los qhia tshwm tib neeg qhov tseem ntsiab, thiab phua tawm tib neeg cov lus thiab lawv tes dej num. Cov lus no suav nrog ntau txoj kev tseeb, xws li tib neeg lub luag dej num, tib neeg yuav zwm rau Vajtswv li cas, tib neeg yuav tsum npuab siab rau Vajtswv li cas, tib neeg yuav tsum ua neej nyob li cas ntawm txoj kev ua neeg nyob, nrog rau Vajtswv txoj kev txawj ntse thiab tus moj yam, thiab lwm yam ntxiv. Cov lus no puav leej raug hais ncaj qha rau qhov tseem ntsiab ntawm tib neeg thiab nws tus yam ntxwv lwj liam. Tshwj xeeb, cov lus uas qhia tshwm txog qhov tib neeg tsis kam txais yuav Vajtswv li cas raug hais tawm rau qhov uas tib neeg yog ib tug duab ntawm Ntxwgnyoog, thiab yog tus yeeb ncuab lub zog tawm tsam Vajtswv. Thaum ua Nws txoj dej num ntawm txoj kev txiav txim, tsis yog Vajtswv cia li tshaj tawm meej meej txog tib neeg tus yam ntxwv yam yooj yim ua ob peb lo lus hais xwb; tiam sis Nws nthuav tawm thiab cob qhia rau ncua sij hawm ntev loo. Tag nrho cov hau kev nthuav tawm thiab kev qhuab qhia uas sib txawv no yeej muab tsis tau cov lus uas niaj hnub hais los hloov, tab sis muab qhov tseeb ntawm qhov uas tib neeg tsis muaj kiag li los hloov tau. Tsuas yog cov hau kev zoo li cov no xwb thiaj tuaj yeem raug hu tias yog txoj kev txiav txim; tsuas yog los ntawm txoj kev txiav txim li yam no xwb thiaj li tuaj yeem ua kom tib neeg yeem swb thiab ntseeg Vajtswv tag nrho, thiab ntau tshaj ntawd kom tau txais qhov kev paub tseeb ntawm Vajtswv. Qhov ua txoj dej num ntawm txoj kev txiav txim coj los qhia yog kom tib neeg nkag siab txog qhov tseeb ntawm Vajtswv thiab qhov tseeb txog nws tus kheej txoj kev tawm tsam. Tes dej num ntawm txoj kev txiav txim ua rau tib neeg muaj kev nkag siab ntau txog Vajtswv tej kev xav, lub hom phiaj ntawm Vajtswv tes dej num, thiab ntawm tej yam kev zais uas nws tsis tuaj yeem to taub. Nws kuj cia kom tib neeg xeev pom thiab paub txog nws lub ntsiab tseeb uas qias vuab tsuab thiab lub hauv paus ntawm nws txoj kev qias vuab tsuab, nrog rau kom tshawb pom txog tib neeg lub siab phem qias thiab. Cov txiaj ntsig no tau txais los ntawm tes dej num ntawm txoj kev txiav txim, rau qhov lub ntsiab tseem ceeb ntawm tes dej num no tseeb tiag yeej yog txoj dej num qhib tawm qhov tseeb, txoj hau kev, thiab txoj sia ntawm Vajtswv rau txhua tus neeg uas muaj kev ntseeg rau hauv Nws. Qhov dej num no yog tes dej num ntawm txoj kev txiav txim ua los ntawm Vajtswv los” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Ua tes Dej Num ntawm Txoj Kev Txiav Txim Nrog Qhov Tseeb). Tom qab ntawd Zignas qhia kuv hais tias, “Vajtswv Tus Uas Muaj Hwj Chim Loj Kawg Nkaus siv qhov tseeb los txiav txim thiab yaug tib neeg kom dawb huv. Nws tau nthua tawm ntau plhom lo lus uas nthuav tawm txog tej lus zais tob ntawm Vajluskub thiab ua tim khawv rau Vajtswv txoj hauj lwm, thiab cov lus ntawd qhia tshwm txog tus cag ntawm tib neeg txoj kev txhaum thiab qhov tseeb ntawm peb txoj kev qias vuab tsuab. Muaj qee cov lus hais txog qhov yuav dim ntawm txoj kev txhaum li cas es thiaj li hloov pauv tau tus moj yam, thiab muaj qee cov lus hais txog kev txiav txim rau tib neeg qhov tshwm sim, thiab lwm yam. Nws puav leej yog qhov tseeb thiab puav leej los ntawm Vajtswv los. Vajtswv Tus Uas Muaj Hwj Chim Loj Kawg Nkaus tau nthuav tawm txhua qhov tseeb uas tib neeg tim tsum muaj es thiaj li yaug tau kom dawb huv thiab cawm dim tau tag nrho, thiab kuj qhia Vajtswv tus moj yam ncaj ncees thiab Nws txoj kev muaj hwj chim loj kawg nkaus thiab txoj kev ntse. Txhua tus uas nyeem Vajtswv Tus Uas Muaj Hwj Chim Loj Kawg Nkaus cov lus ntawd yeej hnov tau qhov muaj cai thiab muaj hwj chim ntawm cov lus ntawd. Vajtswv pom txhua yam, thiab tsuas yog Vajtswv xwb thiaj li paub cov tib neeg ntiaj teb qias vuab tsuab yav dhau los thiab yav tom hauv ntej. Vajtswv qhia tib neeg txhua txoj kev xav, kev xam pom, tswv yim thiab tus yam ntxwv qias vuab tsuab tshwm, daws tau tib neeg ntiaj teb txoj kev txhaum thiab kev tawm tsam Vajtswv los ntawm tus keeb cag tag nrho. Los ntawm txoj kev txiav txim, tej kev nthuav tawm thiab tej kev lim tib neeg kom dawb huv ntawm Vajtswv cov lus, peb tau txais qee yam kev to taub txog qhov tseeb ntawm peb txoj kev qias vuab tsuab phem. Ces peb mam li pom tias peb mas khav theeb thiab coj nkhaus npaum li cas, tias txhua yam uas peb hais thiab ua mas yeej nthuav peb tus moj yam qias vuab tsuab tawm. Peb txeeb lub koob npe thiab lub meej mom, koom tej kev phem, dag thiab coj tsis ncaj, koom tej kev sib khib uas cov nyom heev, thiab tsis zwm rau Vajtswv li. Peb tsis ua neej zoo thooj li tib neeg kiag li. Thaum ntawd peb yuav muaj kev tu siab heev thiab ntxub peb tus kheej, ces peb yuav muaj peev xwm los lees txim hloov dua siab tshiab, lees txais Nws txoj kev txiav txim thiab kev rau txim, thiab ua raws li Nws cov lus. Peb yuav maj mam dim txoj kev txhaum tej hlua khi thiab muaj qee yam kev hloov pauv nyob hauv peb tus moj yam qias vuab tsuab. Yog tsis muaj Vajtswv cov lus muab peb qhia tshwm thiab txiav txim rau peb, tab sis tsuas vam khom rau cov lus taij thov thiab kev lees txim xwb, ces peb yeej yuav daws tsis tau tus cag ntawm peb txoj kev txhaum li. Vim txoj kev ntsib kev pom no es peb kuj pom tau hais tias yog tsis muaj Vajtswv txoj kev txiav txim thiab txoj kev rau txim, ces peb tus moj yam qias vuab tsuab yeej tsis raug yaug kom dawb huv thiab raug hloov pauv li. Vim li ntawd kev lees txais Vajtswv tes dej num kev txiav txim ntawm tiam kawg thiaj li yog tib txoj kev mus rau hauv lub nceeg vaj xwb.” Ces ob tug muam ntawd qhia kuv txog nkawv tus kheej cov lus tim khawv txog txoj kev ntsib kev pom ntawm txoj kev txiav txim thiab kev rau txim ntawm Vajtswv cov lus. Tej ntawd puav leej muaj qab hau heev. Kuv hais tau hais tias Vajtswv Tus Uas Muaj Hwj Chim Loj Kawg Nkaus txoj hauj lwm mas yog kiag qhov kuv xav tau rau sab ntsuj plig ntag, tias Vajtswv txoj hauj lwm ntawm tiam kawg yeej hloov tau thiab yaug tau tib neeg kom dawb huv tiag tiag, thiab tib txoj kev uas nkag tau mus rau hauv lub nceeg vaj ces tsuas yog lees txais Vajtswv txoj kev txiav txim ntawm tiam kawg nkaus xwb.
Ob peb hnub tom qab ntawd ob tug muam ntawd kuj tau qhia kuv tias vim li cas tam sim no txoj kev ntseeg sab yeeb ceeb thiaj li kho siab zim thiab cov xib fwb tej lus qhuab qhia thiaj li qhuav zuj zus lawm. Nkawv kuj qhia ib zaj lus muaj tiag uas txhawb phau Vajluskub thiab tej lus zais tob thiab lub ntsiab lus ntawm Vajtswv qhov kev yug los ua neeg thiab. Kuv mloog zoo li Vajtswv Tus Uas Muaj Hwj Chim Loj Kawg Nkaus cov lus muaj ntau yam heev thiab tau qhib kuv ob lub qhov muag kom pom ntau lo lus zais tob txog qhov tseeb no lawm. Tom qab saib lo lus ntawd tag lawm, kuv thiaj li paub tseeb hais tias Vajtswv Tus Uas Muaj Hwj Chim Loj Kawg Nkaus cov lus yog Vajtswv lub suab ntag, hais tias Nws yog tus Tswv Yexus uas rov qab los lawm thiab kuv zoo siab hlo lees txais Vajtswv Tus Uas Muaj Hwj Chim Loj Kawg Nkaus txoj kev cawm dim ntawm tiam kawg.
Tom qab ntawd, ob tug muam ntawd tau muab ob peb phau ntawv uas hais txog Vajtswv cov lus rau kuv. Kuv tau nthuav ib phau ntawm cov ntawv ntawd thaum kuv los txog tsev lawm, Thooj Ntawv Uas Muab Qhib los ntawm Tus Me Nyuam Yaj. Thawj yam uas kuv pom yog qee yam ntawm Vajtswv cov lus uas nyob hauv Qhov Qhia Ua Ntej uas hais tias: “Txawm hais tias muaj neeg coob tus ntseeg Vajtswv, los tsawg tus xwb thiaj li to taub hais tias kev ntseeg Vajtswv yog txhais li cas, thiab qhov uas lawv yuav tsum tau ua xwb xwb kom tau raws nraim li Vajtswv tej kev xav. Qhov no yog vim tias, txawm hais tias neeg yeej paub txog lo lus ‘Vajtswv’ thiab kab lus xws li ‘tes hauj lwm ntawm Vajtswv,’ los lawv tsis paub Vajtswv, thiab lawv haj yam tsis paub Nws tes hauj lwm. Tsis tas xav li, tom qab ntawd, tag nrho cov uas tsis paub Vajtswv ntawd ces thiaj li feeb tsis meej rau lawv qhov kev ntseeg Nws. Neeg tsis saib qhov kev ntseeg Vajtswv tseem ceeb, thiab tag nrho qhov no mas yog vim ntseeg Vajtswv mas yog ib qho lawv tsis swm li, txawv tshaj plaws rau lawv li. Nyob rau qhov no, lawv thiaj ua tsis tau li qhov Vajtswv txib. Muab ua lwm yam lus hais, yog neeg tsis paub Vajtswv, thiab tsis paub Nws tes hauj lwm, ces lawv yeej tsis zoo rau Vajtswv siv li, thiab lawv haj yam yuav ua tsis tau kom haum raws li Vajtswv txoj kev xav li. ‘Kev ntseeg Vajtswv’ txhais tau hais tias ntseeg hais tias muaj ib tug Vajtswv; qhov no yog qhov ntsiab lus uas yooj yim tshaj plaws txog kev ntseeg Vajtswv. Qhov tshaj ntawd, qhov kev ntseeg hais tias muaj ib tug Vajtswv tsis yog ib yam nkaus li qhov kev ntseeg Vajtswv tiag tiag; tab sis, nws yog ib yam kev ntseeg yooj yooj yim uas muaj lub tseem ntsiab zais tob rau sab kev ntseeg. Kev ntseeg Vajtswv tiag tiag mas txhais tau li nram no: Nyob rau qhov hauv paus keeb cag ntawm qhov kev ntseeg hais tias Vajtswv muaj hwj chim kav tag nrho txhua yam, yus tau ntsib tau pom Nws tej lus thiab tes hauj lwm, ntxuav yus tej moj yam uas qias vuab tsuab kom dawb huv, ua kom haum li Vajtswv txoj kev xav, thiab los paub Vajtswv. Tsuas yog tib txog kev taug ntawm hom zoo li no xwb mas thiaj li hu tau hais tias ‘kev ntseeg Vajtswv’” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv). Vajtswv Tus Uas Muaj Hwj Chim Loj Kawg Nkaus cov lus mas hais ntxaws thiab muaj qab hau, thiab qhia txog lub ntsiab lus tseeb ntawm txoj kev ntseeg Vajtswv. Kuv ras dheev tias kev ntseeg mas cheem tsum kev ntsib kev pom Vajtswv cov lus thiab txoj hauj lwm yog li peb thiaj li tso tau txoj kev qias vuab tsuab tseg, tau txais qhov tseeb thiab paub Vajtswv. Tsuas yog qhov ntawd xwb thiaj li yog txoj kev ntseeg tiag. Kuv keev xav hais tias kev ntseeg yog kev thov Vajtswv txhua hnub thiab mus tim pawg ntseeg kom ntau xwb. Tu siab, kuv yeej xav tsis tawm li tias xyov kuv taug txoj kev ntseeg yog lawm los tsis yog li, yog li kuv thiaj li dawm ntog txij thaum ntawd los lawm. Thaum nyeem Vajtswv Tus Uas muaj Hwj Chim Loj Kawg Nkaus cov lus lawm, kuv thiaj li paub tias txoj kev uas kuv tau taug hauv kuv txoj kev ntseeg yav dhau los ntawd mas yuam kev tag nrho lawm. Tom qab ntawd kuv pom hauv cov txheej txheem ntsiab lus lub ncauj lus hais tias “Koj Puas Yog Ib Tug Neeg Uas Tau Los Muaj Txoj Sia?” Nws ua rau kuv nyiam thiab kuv xav nyeem nws kiag tam sim ntawd. Nws muaj cov lus ntawd los ntawm Vajtswv los tias: “Vajtswv tsim tib neeg, tiam sis tom qab ntawd tib neeg raug coj tsis ncaj los ntawm Ntxwgnyoog, cov tib neeg xws li no tau dhau los ua ‘cov neeg tuag lawm.’ Yog li, tom qab koj tau hloov lawm, koj yuav tsis zoo li ‘cov neeg tuag lawm’ no. Nws yog Vajtswv cov lus uas ua rau tib neeg tus ntsujplig cig thiab ua kom lawv rov yug dua tshiab, thiab thaum tib neeg tus ntsujplig rov yug dua tshiab, ces lawv tau los muaj txoj sia. Thaum Kuv hais txog ‘cov neeg tuag lawm,’ Kuv hais rau cov cev tuag uas tsis muaj ntsujplig, rau cov neeg uas cov ntsujplig tuag rau hauv lawv lawm. Thaum lub txim taws ntawm lub neej tau cig hauv tib neeg cov ntsujplig, ces tib neeg los muaj txoj sia. Cov neeg dawb huv tau hais ua ntej sauv yog hais txog cov neeg uas tau los muaj txoj sia, cov uas tau nyob hauv Ntxwgnyoog txoj kev haub ntxias tab sis tau kov yeej Ntxwgnyoog lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv). “‘Cov neeg tuag lawm’ yog cov uas tawm tsam thiab tig tawm tsam Vajtswv; lawv yog cov uas fab ntsujplig loog thiab tsis to taub Vajtswv cov lus; lawv yog cov uas tsis muab qhov tseeb coj los xyaum siv thiab tsis muaj lub siab ncaj tshaj plaws me me rau Vajtswv li, thiab lawv yog cov neeg uas nyob hauv qab Ntxwgnyoog lub hwj chim thiab raug ntxias los ntawm Ntxwgnyoog. Cov tuag tshwm lawv tus kheej los ntawm kev sawv tawm tsam qhov tseeb, los ntawm kev tig tawm tsam Vajtswv, thiab los ntawm kev saib qis, saib tsis taus lwm tus, ua lim hiam, ua tsis ncaj, dag ntxias, thiab ntxias dag. Txawm hais tias cov neeg zoo li no tau noj thiab haus Vajtswv cov lus los, lawv tsis muaj peev xwm ua neej nyob nrog Vajtswv cov lus; txawm hais tias lawv muaj txoj sia nyob, lawv tsuas yog lub cev tuag uas tab tom mus kev, ua pa xwb. Tus neeg tuag tsis muaj peev xwm dab tsi tag rau ua tau zoo raws Vajtswv txoj kev xav, haj yam tsawg dua ntawd yog tsis mloog Nws lus. Lawv tsuas yog ntxias dag Nws, thuam Nws, thiab ntxeev siab rau Nws, thiab txhua yam uas lawv coj los ntawm lawv txoj kev ua neej qhia tshwm txog Ntxwgnyoog tus yeeb yam. Yog tias tib neeg xav los ua neeg nyob muaj sia thiab kom ua lus tim khawv rau Vajtswv, thiab raug pom zoo los ntawm Vajtswv, ces lawv yuav tsum lees txais Vajtswv txoj kev cawm dim; lawv yuav tsum zoo siab hlo los zwm rau Nws txoj kev txiav txim thiab kev qhuab ntuas thiab yuav tsum zoo siab hlo lees txais Vajtswv tej kev qhuab qhia thiab raug saib xyuas los ntawm Nws. Tsuas yog tom qab ntawd xwb lawv thiaj muaj peev xwm muab txhua txoj kev tseeb uas Vajtswv xav tau coj los xyaum siv, thiab tsuas yog tom qab ntawd xwb lawv thiaj yuav tau txais Vajtswv txoj kev cawm dim thiab dhau los ua neeg nyob muaj sia. Cov ciaj yog raug cawm los ntawm Vajtswv; lawv tau raug txiav txim thiab raug qhuab ntuas los ntawm Vajtswv, lawv zoo siab hlo zwm lawv tus kheej thiab zoo siab tso lawv lub neej rau Vajtswv, thiab lawv zoo siab hlo muab tag nrho lawv lub neej fij rau Vajtswv. Tsuas yog thaum tus neeg ciaj ua lus tim khawv rau Vajtswv xwb thiaj li ua rau Ntxwgnyoog poob ntsej muag; tsuas yog cov neeg ciaj xwb thiaj li tuaj yeem tshaj tawm tes hauj lwm txoj moo zoo ntawm Vajtswv, tsuas yog cov neeg ciaj xwb thiaj raws Vajtswv lub siab, thiab tsuas yog cov neeg ciaj xwb thiaj li yog cov neeg tiag tiag” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv). Tom qab nyeem qhov no tag lawm, kuv paub hauv kuv lub siab tias qhov no yog lo lus teb uas kuv tau nrhiav los tau npaum li no lub xyoo lawm. Thaum kawg kuv mam paub tias “tuag” los sis “ciaj sia” yog txhais li cas lawm. Thaum Vajtswv tsim Adas thiab Evas, nkawv mloog Vajtswv lus, qhia tshwm meej thiab ua rau Nws tau yeeb koob. Nkawv yog cov tib neeg uas ua neej nyob nrog ntsuj plig. Ces Ntxwgnyoog tau sim nkawv siab kom ntxeev siab rau Vajtswv thiab nkawv txawm pib ua neej nyob hauv kev txhaum, nyob qab tswj Ntxwgnyoog lub hwj chim, thiab qhov ntawd yog qhov ua rau tib neeg ntiaj teb qias vuab tsuab ntau zuj zus, los ntawm Ntxwgnyoog cov kuab lom txhua hom uas nkag rau hauv peb. Peb yim tsau tob rau txoj kev txhaum, tsis lees txais Vajtswv, tsis mloog lus thiab tawm tsam Nws, ua neej raws li tus moj yam phem. Peb yeej tsis muaj ib yam dab tsi li zoo ib yam li qhov Vajtswv tsim peb thaum chiv keeb. Vajtswv pom txhua tus uas ua neej nyob rau hauv txoj kev txhaum thiab hauv qab tswj Ntxwgnyoog lub hwj chim zoo li cov tuag lawm, thiab cov tuag yog Ntxwgnyoog tug, lawv tawm tsam Vajtswv. Lawv tsis tsim nyog mus nyob Nws lub nceeg vaj. Cov ciaj sia yog cov uas Vajtswv cawm lawm. Lawv txoj kev qias vuab tsuab raug yaug dawb huv dhau los ntawm Vajtswv txoj kev txiav txim thiab kev rau txim lawm. Lawv tso txoj kev txhaum tseg, tso Ntxwgnyoog lub zog tseg, thiab tso txoj kev ntxeev siab thiab tawm tsam Vajtswv tseg lawm. Txawm Vajtswv yuav hais lus thiab ua hauj lwm li cas los xij, lawv yuav mloog lus thiab ua raws. Cov ciaj sia tuaj yeem ua tim khawv rau Vajtswv thiab qhuas Vajtswv, thiab tsuas yog lawv xwb thiaj li yog cov uas tuaj yeem tau txais Vajtswv qhov pom zoo thiab nkag mus tau rau hauv Nws lub nceeg vaj. Yuav dhau los ciaj sia, peb yuav tsum lees txais qhov tseeb uas Vajtswv Tus Uas Muaj Hwj Chim Loj Kawg Nkaus nthuav tawm thiab muaj kev ntsib kev pom Nws txoj kev txiav txim, thaum kawg thiaj li dim ntawm txoj kev txhaum, raug yaug kom dawb huv thiab rov tau txais peb txoj kev txawj xav thiab kev muaj laj thawj, mloog tus Tswv Tsim lus thiab muab Vajtswv cov lus coj los xyaum ua raws, thiab pe hawm thiab ua tim khawv rau Vajtswv. Qhov no yog tus uas rov ciaj sia los tiag tiag, tus uas nkag tau mus rau hauv lub nceeg vaj thiab tau txais txoj sia ntev dhawv mus ib txhis. Thaum txog theem ntawd kuv to taub tiag tiag txog lub ntsiab uas tus Tswv hais tias “Kuv yog qhov tsa sawv rov qab los, thiab yog txoj sia: tus ua ntseeg kuv, txawm tias nws tuag lawm los xij, yeej yuav ciaj rov los: Thiab tus uas tseem ciaj sia nyob thiab ntseeg Kuv ces yeej yuav tsis tuag” (Yauhas 11:25–26). Kuv lub siab kaj lug thaum kuv to taub txhua yam ntawd lawm.
Tom qab ntawd, kuv tau nyeem lwm tsab ntawv xov xwm, “Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg.” Nws ua rau kuv txaus siab tiag tiag li. Vajtswv cov lus hais tias: “Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug tswj los ntawm tej kev cai, los ntawm tej lus, thiab raug keeb kwm tej sawv hlaus khi cia ces yuav tsis tau txoj sia los sis tsis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los. Cov uas tsis tau txais cov dej cawm siav ces tsuas yog lub niag cev tuag, yog Ntxwgnyoog tej nyuag khoom ua si, thiab yog tub ki ntawm dab teb mus ib txhis xwb. Yog li ntawd, yuav ua cas es lawv thiaj yuav pom Vajtswv? Yog koj pheej xav tuav rawv rau yav tag los, tsuas sawv twj ywm es tuav txhua yam cia kom zoo li qub xwb, es tsis kam hloov qhov uas muaj tam sim no thiab muab keeb kwm tso pov tseg, ces tsis yog koj pheej yuav tawm tsam Vajtswv tas zog li los? Cov txheej txheem ntawm Vajtswv tes hauj lwm mas dav thiab loj heev li, zoo ib yam li nthwv dej nphau npog thiab nthwv xob nroo nrov deeg daws—tab sis koj tseem zaum twj ywm nyob tos kev puas tsuaj, khawm rawv koj txoj kev ruam thiab tsis ua ib qho dab tsi li. Nyob rau qhov no, yuav ua cas es thiaj yuav xam tau hais tias koj yog ib tug uas taug tus Me Nyuam Yaj tus hneev taw mas? Yuav ua cas es koj thiaj yuav ua pov thawj hais tias tus Vajtswv uas koj cia siab rau ntawd yog ib tug Vajtswv uas tshiab tas li xwb es yeej tsis txawj qub li? Thiab yuav ua cas es cov lus hauv koj phau ntawv daj ntawd thiaj li yuav coj tau koj hla mus rau tiam tshiab? Yuav ua cas es thiaj yuav coj tau koj mus nrhiav tej kauj ruam ntawm Vajtswv tes hauj lwm? Thiab yuav ua cas es thiaj coj tau koj mus rau saum ceeb tsheej? Qhov koj tuav ntawm koj txhais tes ces tsuas yog tej lus uas muab tau kev kaj siab ib nyuag pliag rau koj xwb, tsis yog tej qhov tseeb uas yuav muaj cuab kav muab tau txoj sia rau koj. Tej lus ntawm tej nqe Vajluskub uas koj nyeem ntawd tsuas pab tsim kho tau koj tus nplaig xwb, thiab tsis yog cov lus ntawm lub tswv yim uas pab tau kom koj paub tib neeg lub neej txoj sia, haj yam tsis yog txoj kev uas yuav coj tau koj mus rau qhov kev zoo tag nrho. Qhov uas zoo tsis sib xws no tseem tsis ua kom koj tig rov los xav txog koj tus kheej thiab los? Qhov ntawd tsis ua rau koj ras txog tej lus to taub nyuaj nyob rau hauv thiab los? Koj puas muaj peev xwm coj tau koj tus kheej mus saum ceeb tsheej mus ntsib Vajtswv? Yog hais tias Vajtswv tsis los, koj puas yuav coj tau koj tus kheej mus rau saum ceeb tsheej mus ntsib txoj kev zoo siab li tsev neeg nrog rau Vajtswv? Koj puas tseem npau suav toog tam sim no mas? Yog li ntawd, Kuv xav hais kom koj tsis txhob npau suav toog lawm thiab tig los saib tus uas tab tom ua hauj lwm tam sim no—saib kom pom hais tias leej twg tab tom ua tes hauj lwm cawm tib neeg nyob rau tiam kawg. Yog koj tsis ua li, koj yuav tsis muaj hnub tau txais qhov tseeb, thiab yuav tsis tau txoj sia” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv). Qhov no mas muaj cai thiab muaj hwj chim heev, thiab cov lus ntawd tsuas yog los ntawm Vajtswv los xwb. Kuv nco tau Tswv Yexus hais tias, “Kuv yog txoj hau kev, qhov tseeb, thiab txoj sia: tsis muaj leej twg mus tau rau ntawm Leej Txiv, tab sis mus ntawm Kuv mus” (Yauhas 14:6). Dua ntawm Vajtswv lawm, leej twg thiaj li yuav tswj kav tau lub rooj loog ntawm lub nceeg vaj? Yog hais tias peb xav nkag mus rau hauv lub nceeg vaj saum ntuj ceeb tsheej thiab xav kom tau txais txoj sia ntev dhawv mus ib txhis, peb yuav tsum lees txais txoj kev ntawm txoj sia ntev dhawv mus ib txhis uas Khetos ntawm tiam kawg tau coj los. Qhov ntawd txhais hais tias lees txais qhov tseeb uas nthuav tawm los ntawm tus Tswv Yexus uas rov qab los lawm, thiab qhov ntawd xwb thiaj li yog tib txoj kev los paub txog peb tej kev cia siab ntawm txoj kev nkag mus rau hauv lub nceeg vaj thiab txoj kev tau txais txoj sia ntev dhawv mus ib txhis. Kuv hnov zoo li kuv muaj hmoo heev uas kuv muaj peev xwm nrhiav tau txoj kev mus rau hauv lub nceeg vaj. Kuv mas zoo siab tshaj. Kuv tau nyeem Vajtswv Tus Uas Muaj Hwj Chim Loj Kawg Nkaus cov lus zoo li cov lus ntawd yog zaub mov rau ib tug tib neeg tshaib nqhis, thiab cov lus ntawd tau cuam tshuam tob heev rau kuv. Kuv yim nyeem, ces kuv yim paub tias cov lus ntawd yog qhov tseeb, tias cov lus ntawd tsis yog los ntawm ib tug xib fwb los los sis ib tug tub kawm txog sab kev ntseeg los. Vajtswv Tus Uas Muaj Hwj Chim Loj Kawg Nkaus cov lus yug kuv tus ntsuj uas nqhis nqhis, ces kuv rov xav txog tus tib neeg laus uas muag ntawv xov xwm ntawd. Nws pheej hais kom kuv mus tso npe yuav ntawv xov xwm, twb yog vim li ntawd thaum kawg kuv thiaj li tau hnov Vajtswv lub suab lawm. Ces kuv paub tias qhov ntawd yog Vajtswv tej kev ua zoo kawg nkaus uas ua rau muaj qhov ntawd. Kuv ua Vajtswv tsaug tiag tiag. Kuv hnov zoo li kuv tau txais koob hmoov ntau heev tias kuv muaj peev xwm hnov Vajtswv lub suab thiab ua pov thawj rau Nws qhov kev tshwm sim rau hauv kuv lub neej. Qhov no yog Vajtswv txoj kev hlub tshua thiab txoj hmoov hlub uas muaj nplua mias, thiab tshaj ntawd ntxiv yog, Nws txoj kev cawm rau kuv. Ua tsaug rau Vajtswv Tus Uas Muaj Hwj Chim Loj Kawg Nkaus!
