11. Tej Kev Thim Xav txog Kev Nrhiav Suab Npe thiab Txiaj Ntsim
Nyob rau xyoo no thaum lub Tsib Hlis Ntuj, kuv raug xaiv los ua tus thawj coj ntawm pab pawg thiab saib xyuas tes hauj lwm ywg dej. Kuv zoo siab heev thaum kuv hnov qhov xov xwm ntawd vim hais tias los ntawm kev ywg dej rau kuv cov kwv tij thiab cov muam, ces ua rau kuv tau txais kev qhuab qhia thiab muaj kev ntsib kev pom ntau heev. Yog kuv tuaj yeem daws tau tej teeb meem uas lawv ntsib hauv kev to taub lub neej txoj sia, kuv cov kwv tij thiab cov muam yeej yuav hais tias kuv ua tau zoo thiab yog tus uas to taub qhov tseeb, thiab kuv yuav rais los ua tau ib tug ncej rau hauv Vajtswv lub tsev. Yog li ntawd, kuv siv tag nrho kuv tus kheej los ua kuv tej dej num, nquag plias mus koom tej rooj sib tham mus sib qhia nrog kuv cov kwv tij thiab cov muam, thiab thaum lawv muaj tej kev nyuaj, kuv txawm pib nrhiav Vajtswv txoj lus los pab lawv daws tej kev nyuaj no. Tom qab ntawd ib ntus, kuv cov kwv tij thiab cov muam tuaj cuag kuv tuaj sib qhia seb lawv puas muaj lus nug, ces ua rau kuv zoo siab heev.
Sij hawm dhau mus, thaum muaj tib neeg lees txais Vajtswv tes hauj lwm nyob rau tiam kawg coob ntxiv lawm, ces muaj tib neeg hauv pawg ntseeg maj mam coob zuj zus tuaj. Muaj ib hnub, kuv paub hais tias ib tug thawj coj ntawm pawg ntseeg yuav tuaj ywg dej rau cov los ntseeg tshiab thiab yuav tuaj soj qab saib kuv tes hauj lwm. Yog hais tias cov kwv tij thiab cov muam muaj tej teeb meem uas yuav tau daws, ces lawv kuj nug nws tau thiab. Thaum kuv hnov li no lawm, kuv tsis zoo siab hlo li vim hais tias tus thawj coj no twb ywg dej rau kuv yav dhau los lawm, muaj peev xwm zoo, to taub ntau dua kuv, sib qhia txog Vajtswv txoj lus tau meej tseeb dua, thiab muaj peev xwm daws tej teeb meem ntawm peb cov kwv tij thiab cov muam tau yooj yooj yim. Kuv xav rau kuv tus kheej hais tias, “Tam sim no, nws tab tom yuav tuaj ua kuv tus kwv luag, yog li ntawd cov kwv tij thiab cov muam puas yuav coj lawv tej lus nug tuaj cuag kuv li yav dhau los lawm? Lawv puas yuav muab kuv tso tseg es mus nug kuv tus thawj coj? Leej twg thiaj li yuav hwm kuv nyob rau yav pem suab? Kuv lub meej mom nyob hauv cov kwv tij thiab cov muam lub siab ces ntshe yuav ploj mus.” Thaum xav li no, kuv tsis xav koom tes nrog tus thawj coj ntawd kiag li. Tib lub sij hawm ntawd, kuv muaj kev ntxhov siab. Kuv hais rau kuv tus kheej hais tias, “Kuv tsis tuaj yeem cia qhov no tshwm sim. Kuv yuav tsum tuav kuv lub meej mom nyob hauv cov kwv tij thiab cov muam lub siab kom tau.” Txij thaum ntawd los, thaum kuv hnov hais tias cov kwv tij thiab cov muam muaj tus yam ntxwv tsis zoo los sis muaj tej kev nyuaj, ces kuv maj ntsoos mus sib qhia nrog lawv thiab daws lawv tej teeb meem, ntshai rwg tsam kuv tus thawj coj tuaj ntsib lawv ua ntej lawm. Kuv kuj tau hu rau cov kwv tij thiab cov muam ib tug zuj zus mus nug seb lawv puas tim tsum kev pab, thiab hais rau lawv hais tias yog lawv muaj lus nug los sis tsis meej pem, ces lawv tuaj yeem hu kuv pab. Ua li ntawd, kuv xav tias cov kwv tij thiab cov muam yuav tsis nrhiav tus thawj coj los daws lawv tej teeb meem lawm. Tab sis txhua yam tsis mus raws li kuv tau npaj tseg. Kuv tsis paub meej tseeb ntau yam ntawm tej teeb meem uas lawv tau nug kuv thiab tsis paub tias yuav daws tej teeb meem ntawd li cas, tab sis kuv tsis xav nug tus thawj coj. Kuv xav hais tias, “Yog kuv nug tus thawj coj, nws puas yuav xav hais tias kuv tsis to taub qhov tseeb thiab tias kuv daws tej teeb meem tsis tau? Tshaj qhov ntawd, yog kuv cia tus thawj coj los daws cov kwv tij thiab cov muam tej teeb meem, ces lawv puas xav hais tias kuv tsis muaj peev xwm thiab pab tsis tau lawv? Kuv tsis xav qhia tshwm rau lawv hais tias kuv pab tsis tau lawv. Kuv xav kom txhua tus paub hais tias kuv muaj kev txawj ua tau tes dej num no, kom lawv thiaj li yuav nug kuv tas li thaum lawv muaj lus nug. Tab sis yuav nyuaj rau kuv los pab kuv cov kwv tij thiab cov muam rau ntawm kuv tus kheej. Muaj qee yam uas kuv tsis tau ntsib tau pom thiab tsis paub tias yuav sib qhia li cas nrog lawv los nrhiav ib txoj kev daws, thiab tej thaum ua rau kuv siv ntau hnub los nrhiav feem xyuam ntawm Vajtswv txoj lus los daws lawv tej teeb meem, thiab thaum lwm cov kwv tij thiab cov muam muaj lus nug tuaj cuag kuv, ces kuv tsis muaj sij hawm los ntsib lawv. Ua li no mus dhau ib lub hlis, thiab vim kuv pab tsis tau kuv cov kwv tij thiab cov muam kom ncav sij hawm, ces thiaj li tseem daws tsis tau lawv tej teeb meemthiab lawv thiaj li muaj tus yam ntxwv tsis zoo txuas ntxiv. Kuv to taub meej tseeb tias yog kuv qhia tus thawj coj txog tej teeb meem uas kuv tsis to taub no, ces ntshe wb twb nrhiav tau qhov tseeb los sib pab lawv lawm, thiab ntshe twb daws tau txhua tus tej teeb meem sai heev. Tab sis kuv tsis ua li ntawd, vim kuv tsuas xav tuav kuv tus duab nyob rau hauv lawv lub siab xwb. Kuv hnov zoo li kuv ua txhaum me ntsis, uas yeej paub hais tias yog kuv ua li no mus ntxiv, ces kuv yuav thaiv txoj kev to taub lub neej txoj sia ntawm kuv cov kwv tij thiab cov muam xwb xwb
Muaj ib hnub, kuv pom ib nqe lus ntawm Vajtswv txoj lus, thiab tsuas yog thaum ntawd xwb kuv thiaj li muaj kev to taub qee qhov txog kuv tus cwj pwm uas coj tsis yog rau kuv tej dej num. “Cov dej num yog cov hauj lwm uas Vajtswv tau muab tso rau tib neeg; tej ntawd yog cov txoj num rau tib neeg ua kom tiav hlo. Txawm li cas los xij, ib teg dej num yeej tsis yog koj tus kheej lub lag luam uas koj tus kheej tswj, los sis nws tsis yog ua kom koj nyob siab dua lwm tus. Ib txhia tib neeg siv lawv tej dej num los ua lub cib fim los mus koom nrog lawv tus kheej txoj kev tswj thiab tsim tej pab pawg me me; ib txhia siv los mus ua kom tau zoo raws li lawv tej kev ntshaw; ib txhia siv los mus txhaws rau cov chaw qhuav qhawv uas lawv muaj nyob rau hauv siab; thiab ib txhia siv los mus ua kom tau zoo raws li lawv txoj xav uas ntseeg-mus rau-txoj-hmoov, xav tias tsuav yog lawv ua tiav lawv tej dej num xwb, ces lawv yuav muaj ib feem koom nyob rau hauv Vajtswv lub tsev thiab nyob rau hauv txoj hau kev kawg uas zoo kawg nkaus uas Vajtswv tau npaj rau tib neeg lawm. Cov cwj pwm uas hais txog tes dej num zoo li no mas tsis yog lawm; cov cwj pwm no mas qias neeg rau Vajtswv thiab yuav tsum raug muab daws kom sai” (“Kev Ua Tes Dej Num Kom Txaus Yog Dab Tsi?” nyob hauv Tej Kev Sib Tham ntawm Khetos ntawm Tiam Kawg). Kev nyeem Vajtswv txoj lus, kuv to taub tias peb tej dej num yog ib co lus txib uas Vajtswv muab rau peb, thiab tsis yog ua rau peb tus kheej, thiab tias peb yuav tsum txhob khav theeb peb tej dej num thiab ua kom lwm tus qhuas peb, thiab peb txhob siv kev ua tiav tej dej num los ua lub fib cim nrhiav lub koob lub npe thiab lub meej mom los ua kom lwm tus raws peb qab. Peb yuav tsum saib peb tej dej num yam li ib lo lus cog tseg thiab ua tej dej num ntawd raws li qhov Vajtswv cheem tsum. Tab sis tus cwj pwm uas kuv coj rau kuv tes dej num zoo li cas? Kuv ua kuv tes dej num los caum suab npe thiab txiaj ntsim, thiab los ua kom tau raws li kuv tej kev ntshaw. Kuv xav kom kuv cov kwv tij thiab cov muam qhuas thiab pe hawm kuv. Kuv tsis muaj lub siab dawb paug rau lawv, thiab kuv yeej tsis xav pab lawv, tab sis kuv xav kom kuv lawv hais txog qhov zoo ntawm kuv, kom thaum lawv tham txog kuv, ces lawv thiaj li hais tias kuv mas coj zoo thiab siab zoo heev. Kuv siv kuv tes dej num los caum suab npe, txiaj ntsim, thiab lub meej mom, kom kuv muaj ib qho chaw nyob rau hauv tib neeg lub siab, es lawv thiaj li yuav coj lawv tej teeb meem tuaj cuag kuv thiab muab Vajtswv tso tseg. Kuv tab tom ua lag luam rau yus tus kheej. Qhov no yog thaum kuv paub tias kuv tus cwj pwm coj rau tes dej num tsis yog lawm. Txawm yog kuv yuav pab cov kwv tij thiab cov muam los xij, kuv txoj kev xav tsis ua kuv tes dej num kom zoo, uas yeej yuav ua tsis tau zoo raws Vajtswv li.
Tom qab ntawd, kuv pom ib nqe lus uas Vajtswv qhia tshwm txog cov tawm tsam Khetos, thiab nqe lus ntawd haum kuv tus yam ntxwv heev. “Txawm tias yuav nyob rau kis twg, lawv tab tom ua lawv tes dej num nyob rau qhov twg los xij, tus tawm tsam Khetos yuav ua txhua yam thiab nthuav tawm tias lawv mas tsis qaug zog, tias lawv ib txwm muaj zog, muaj cuab kav heev, tsis muaj yam tsis zoo li. Lawv yeej tsis nthuav tawm lawv txoj kev xam pom tseeb los sis tus cwj pwm tseeb rau Vajtswv li. Nyob rau hauv qhov tob ntawm lawv lub siab, lawv puas ntseeg tiag tiag tias tsis muaj ib yam dab tsi uas lawv yuav tsis tuaj yeem ua tau? Lawv puas ntseeg tiag tiag tias lawv tsis muaj txoj kev qaug zog, kev xav phem, los sis tej kev qhia txog txoj kev qias vuab tsuab? Yeej tsis ntseeg li. Lawv txawj ua yeeb yam tau zoo, txawj zais tau zoo heev. Lawv nyiam khav rau tib neeg txog lawv sab zoo thiab sab ntxim hwm; lawv tsis xav kom tib neeg pom lawv sab uas qaug zog thiab sab tsaus ntuj. Lawv lub hom phiaj mas pom tau tseeb heev: Qhov ntawd yog los ua kom tau ntsej muag ntawm lwm tus, los tiv thaiv lub chaw uas lawv muaj nyob rau hauv cov tib neeg no lub siab. Lawv xav hais tias yog lawv qhib siab lug rau ntawm lwm tus xub ntiag txog lawv tus kheej txoj kev xav tsis zoo thiab txoj kev qaug zog, yog hais tias lawv nthuav tawm lawv sab uas ntxeev siab thiab qias vuab tsuab, ces qhov no yuav yog ib qho kev puas tsuaj uas loj heev rau lawv lub meej mom thiab lub koob lub npe—yuav muaj teeb meem ntau dua qhov uas tsim nyog. Yog li ntawd, lawv yeem ceev lawv txoj kev qaug zog thiab txoj kev ntxeev siab kom nruj heev rau lawv tus kheej. Thiab yog hais tias muaj ib hnub los txog thaum txhua tus pom lawv sab uas qaug zog thiab sab ntxeev siab lawm, lawv yuav tsum ua yeeb yam txuas ntxiv mus; lawv xav hais tias yog lawv lees tias muaj ib tug moj yam qias vuab tsuab, los ua ib tug tib neeg dog dig, tus neeg uas me me thiab tsis tseem ceeb, ces lawv yuav plam lawv lub chaw hauv tib neeg lub siab, thiab yuav ua tsis tiav tiag tiag li. Thiab yog li ntawd, txawm yuav muaj dab tsi tshwm sim los xij, lawv tsis tuaj yeem cia li qhib siab lug qhia rau tib neeg; txawm yuav muaj dab tsi tshwm sim los xij, lawv tsis tuaj yeem muab lawv lub hwj chim thiab lub meej mom rau lwm tus li; tiam sis, lawv tas zog ua txhua yam raws li qhov lawv tuaj yeem ua tau los sib tw, thiab yeej yuav tsis tso tseg li” (“Lawv Tsuas Ua Lawv Tes Dej Num los Cais Lawv Tus Kheej Kom Txawv Ntawm Lwm Tus thiab Yug Lawv Tus Kheej Tej Kev Ntshaw thiab Tej Hom Phiaj Xwb; Lawv Yeej Ib Txwm Tsis Xav Txog Tej Kev Ntshaw ntawm Vajtswv Lub Tsev Li, thiab Haj Tseem Muab Tej Kev Ntshaw Ntawd Muag Tawm Pauv Lub Yeeb Koob rau Lawv Tus Kheej thiab (Ntu Kaum)” nyob hauv Qhov Kev Nthuav Tawm Cov Tawm Tsam Khetos). Kuv tau to taub tom qab nyeem nqe lus no ntawm Vajtswv txoj lus tag lawm uas cov tawm tsam Khetos nyiam lub meej mom. Nyiam tuav lawv tus duab zoo nyob rau hauv lwm tus tib neeg lub siab, lawv yeej tsis qhia tib neeg txog lawv tej kev nyuaj li, vim ntshai tsam txhua tus yuav pom tej uas lawv ua tsis tau zoo. Txawm thaum lawv ntsib tej kev nyuaj nyob rau hauv lawv tej dej num los xij, lawv ua txuj, kom lwm tus pom lawv yog lub hwj huaj uas loj tsis muaj chaw kawg thiab yog tus uas to taub qhov tseeb. Qhov no yog kuv tus yam ntxwv. Pom meej tseeb tias kuv muaj tej teeb meem ntau uas kuv daws tsis tau, tab sis kuv tsis thov ib tug twg pab li thiab kuv ib txwm npog kuv tus kheej vim kuv xav tsim ib tug duab zoo ntawm kuv tus kheej nyob rau hauv tib neeg lub siab los ua kom kuv cov kwv tij thiab cov muam xav hais tias kuv tsis muaj qhov ua tsis tau zoo los sis qhov tsis muaj txaus, thiab tias kuv yuav pab lawv daws tag nrho lawv tej teeb meem tau. Yuav kom tuav tau kuv qib hauj lwm thiab tus duab nyob rau hauv lawv lub siab, ces kuv thiaj li npog kuv tus kheej, siv sij hawm ntau heev los nrhiav yam nyob rau hauv Vajtswv txoj lus ntau dua qhov nrhiav los ntawm tus thawj coj los. Qhov tshwm sim ces yog kuv tav kev rau kuv cov kwv tij thiab cov muam txoj kev to taub lub neej txoj sia. Kuv pom hais tias kuv tus moj yam qias vuab tsuab mas loj heev lawm, thiab tias kuv yog ib tug neeg hais lus zoo tab sis siab phem. Kuv xav tias, nyob rau thaum pib ntawm tiam Ntseeg Yusdas, saib rau sab nraud mas cov neeg Falixais txo hwj chim thiab uv heev. Lawv nquag thov Vajtswv ntawm tej kev sib tshuam los sis piav qhia Vajluskub rau lwm tus. Lawv muaj ib tug duab zoo nyob rau hauv tib neeg lub siab lawm, tab sis qhov muaj tseeb, ces nyob sab hauv nruab siab mas, lawv yog cov hais lus zoo tab sis siab phem, khav theeb, phem, lawv tsis muaj kev mloog lus los sis tsis ntshai Vajtswv li, thiab txhua yam uas lawv ua los yeej tsis ua raws li Vajtswv txoj lus li. Tiam sis, lawv siv tus cwj pwm zoo los dag ntxias tib neeg thiab tsim tej kev haub ntxias los ua kom lwm tus qhuas thiab pe hawm lawv. Kuv pom hais tias kuv mas yog kiag tus neeg hais lus zoo tab sis siab phem ib yam li cov neeg Falixais ntag thiab kuv tab tom taug cov tawm tsam Khetos txoj kev uas tawm tsam Vajtswv.
Tom qab ntawd, kuv tau nyeem ib nqe lus ntawm Vajtswv txoj lus. “Lub ntsiab tseeb ntawm tus cwj pwm ntawm cov tawm tsam Khetos ces yog siv ntau yam cuab yeej thiab ntau txoj kab ke los ua kom tau lawv lub hom phiaj tiav kom muaj meej mom, kom ntxias tau tib neeg los nrog lawv thiab ua kom cov neeg ntawd caum thiab hwm lawv. Tej zaum yeej yuav muaj tiag hais tias nyob tob hauv lawv lub siab ces lawv yeej tsis yog txhob txwm sib tw txeeb tib neeg nrog Vajtswv, tab sis ib yam mas yeej muaj tseeb tiag tias: Txawm yog thaum lawv tsis nrog Vajtswv sib txeeb tib neeg, los lawv yeej tseem xav muaj meej mom thiab hwj chim nrog rau tib neeg. Txawm hais tias yuav muaj ib hnub uas lawv ras hais tias lawv tau nrog Vajtswv sib txeeb meej mom, thiab lawv yeej tau cheem lawv tus kheej lawm, los lawv yeej tseem siv lwm txoj hau kev los sib txeeb lub meej mom rau hauv pawg ntseeg, kev ntseeg tias lawv yuav tau txais kev ncaj ncees los ntawm kev kov yeej txoj kev pom zoo thiab kev txaus siab ntawm lwm tus. Muab hais kom luv luv, ces txawm hais tias txhua yam uas cov tawm tsam Khetos ua mas yeej zoo nkaus li yog ib qho kev ua lawv tes dej num yam siab dawb paug, thiab zoo li lawv yeej yog cov caum Vajtswv qab, los lawv txoj kev siab hlob kom tau tswj tib neeg—thiab kom tau meej mom thiab hwj chim ntawm lawv—yeej yuav tsis hloov hlo li. Tsis hais Vajtswv yuav hais dab tsi los sis ua dab tsi li, thiab tsis hais Nws yuav kom tib neeg ua dab tsi li, lawv yeej tsis ua qhov uas lawv tsim nyog ua li los sis ua kom lawv tes dej num tiav hlo kom dhos daws li Nws tej lus thiab tej kev cheem tsum li, los sis lawv yeej tsis tso tseg lawv tej kev nrhiav caum lub hwj chim thiab lub meej mom vim yog qhov kev to taub Nws tej lus hais thiab qhov tseeb; thoob plaws, ces lawv txoj kev siab hlob ces nqos tag nrho lawv, tswj thiab qhia lawv tus cwj pwm thiab tej kev xav, thiab txiav txim rau txoj kev uas lawv taug. Qhov no yog qhov kev piv txwv uas zoo tshaj plaws rau ib tug tawm tsam Khetos. Qhov uas muaj hais kom meej meej nyob rau ntawm no yog dab tsi? Ib txhia neeg nug hais tias, ‘Cov tawm tsam Khetos tsis yog cov uas sib tw nrog Vajtswv kom txeeb tau tib neeg, thiab cov uas tsis lees paub Nws lod?’ Tej zaum lawv kuj yuav lees paub Vajtswv, tej zaum lawv kuj lees paub thiab ntseeg tiag tiag hais tias muaj Nws, thiab lawv kuj yuav txaus siab caum Nws qab thiab caum nrhiav qhov tseeb thiab, tab sis muaj ib qho uas yeej tsis hloov hlo li: Lawv yeej tsis tso tseg lawv lub siab hlob uas nrhiav hwj chim thiab meej mom li, los sis lawv yeej tsis tso tseg lawv txoj kev caum nrhiav tej ntawd vim yog tej thaj chaw lawv nyob ntawd los sis vim yog Vajtswv tus yam ntxwv rau lawv ntawd li. Tej no ces yog tej yam ntxwv ntawm cov tawm tsam Khetos” (“Lawv Dag, Ntxias, Hem, thiab Tswj Tib Neeg” nyob hauv Qhov Kev Nthuav Tawm Cov Tawm Tsam Khetos). Vajtswv hais tias cov tawm Khetos caum suab npe thiab lub meej mom, los ua kom tib neeg raws lawv qab thiab ua tiav lawv txoj kev ntshaw ntawm kev tswj thiab kav tib neeg. Lawv nrog Vajtswv sib tw los kav tib neeg. Qhov no yog kiag txoj kev ntawm kev tawm tsam Vajtswv uas kuv tab tom taug ntag. Kuv ntseeg Vajtswv thiab xav hlub Nws, thiab kuv kuj paub tias Vajtswv muaj hwj chim kav tag nrho txhua yam thiab nyob siab tshaj txhua yam. Nws yog tus Tswv Tsim, thiab peb yuav tsum pe hawm Nws. Tab sis nyob rau hauv kev ua kuv tej dej num ces kuv ib txwm xav ua kom tib neeg qhuas thiab pe hawm kuv kom muaj ib qho chaw rau kuv tus kheej muaj nyob rau hauv tib neeg lub siab. Thaum tib neeg pe hawm kuv, ces lawv tsis muaj ib qho chaw rau Vajtswv nyob rau hauv lawv lub siab, thiab thaum lawv muaj teeb meem, twb tsim nyog lawv thov Vajtswv thiab vam khom rau Vajtswv, los lawv tseem tuaj cuag kuv xwb. Kuv coj cov tib neeg los rau ntawm kuv tus kheej xub ntiag, thiab kuv tab tom taug txoj kev ntawm cov tawm tsam Khetos ntag! Kuv xav txog cov xib fwb thiab cov txwj laug uas nyob hauv txoj kev ntseeg sab yeeb ceeb, thiab txawm lawv tshaj tawm txoj moo zoo, txhab txhais Vajluskub, thov Vajtswv rau tib neeg, foom koob hmoov, thiab ua qee yam dej num zoo li cas los xij, lawv lub hom phiaj ua li no mas puav leej yog ua kom tuav tau lawv lub meej mom thiab ua kom cov ntseeg hwm lawv thiab raws lawv qab ces kom thaum twg los xij uas cov ntseeg muaj lus nug, lawv yuav mus cuag cov xib fwb thiab lees txais cov lus qhia. Txawm thaum lawv hnov txog qhov tus Tswv rov qab los thiab xav nrhiav thiab nug xyuas txoj hau kev tseeb los xij, lawv nrhiav raws li lawv cov xib fwb pom zoo. Qhov no tsis yog ua rau tib neeg saib cov xib fwb ntawd yog li Vajtswv lod? Cov xib fwb thiab cov thawj coj no tswj hwm tib neeg khov heev, lawv tab meeg ua yeeb ncuab rau Vajtswv, thiab rais los ua cov tawm tsam Khetos uas ntseeg Vajtswv tiam sis tawm tsam Nws rau thaum tib lub sij hawm ntawd thiab. Kuv los ib yam nkaus. Kuv xav kom kuv cov kwv tij thiab cov muam qhuas kuv, thiab muab tag nrho lawv tej teeb meem tuaj cuag kuv es txhob tuaj cuag tus thawj coj. Qhov tseeb tiag, kuv nyuam qhuav ntseeg tau tsis ntev thiab muaj kev ntsib kev pom me ntsis xwb. Kuv tsis muaj kev nkag siab los daws tau kuv cov kwv tij thiab cov muam tej yam ntxwv thiab tej teeb meem. Kuv pab tsis tau zoo rau lawv kiag li, tab sis kuv tseem tsis nrhiav tus thawj coj thiab tsis txaus siab koom tes nrog nws thiab, kuv tsuas xav kom cov kwv tij thiab cov muam txhawb kuv xwb. Kuv mas khav theeb heev thiab tsis muaj qab hau kiag li! Yav dhau los kuv tsuas xav tias cov thawj coj qib siab xwb thiaj li yuav yog cov taug cov tawm tsam Khetos txoj kev thiab rais los ua cov tawm tsam Khetos, thiab tias yog tus thawj coj ntawm pab pawg, yog tsis muaj lub meej mom siab, ces kuv yuav tsis taug txoj kev ntawd. Tab sis tam sim no kuv paub tias qhov kev xav no yuam kev lawm. Yog tsis muaj kev txiav txim thiab kev nthuav tawm ntawm Vajtswv txoj lus, ces kuv yeej yuav tsis paub tias kuv tab tom taug tus tawm tsam Khetos txoj kev lawm, thiab ntshe kuv twb ua lub neej nrog tus moj yam qias vuab tsuab thiab yim ua phem lawm, ces ntshe Vajtswv twb tsis kam txais yuav thiab raug tshem tawm lawm. Kuv ua Vajtswv tsaug rau txoj kev qhuab qhia thiab coj kuv kev los paub qhov no, thiab cog lus tias yuav tsum tau lees txim hloov dua siab tshiab, yuav tsis caum suab npe, txiaj ntsim, thiab lub meej mom ntxiv lawm, thiab ua kuv tes dej num kom tau raws li Vajtswv tej kev cheem tsum.
Tom qab ntawd, kuv tau nyeem lwm nqe lus ntawm Vajtswv cov lus. “Yam Vajtswv cheem tsum ntawm tib neeg tsis yog rab peev xwm ua kom tiav ib theem ntawm tej hauj lwm los sis tiav hlo ib txoj dej num loj, thiab Nws tsis xav kom lawv nqis tes ua ib txoj dej num loj. Yam uas Vajtswv xav tau yog kom tib neeg muaj peev xwm ua txhua yam uas lawv tuaj yeem ua tau yam qhib siab lug, thiab muaj sia nyob raws li Nws cov lus. Vajtswv tsis xav kom koj yog ib tug zoo los sis ntxim hwm, los sis Nws tsis xav kom koj coj tej txuj ci tshwj xeeb los, los sis Nws tsis xav pom tej yam txawv txawv nyob rau hauv koj. Nws tsis xav tau tej yam zoo li no. Txhua yam uas Vajtswv xav tau ces yog xav kom koj mloog Nws cov lus thiab, thaum koj tau hnov tej lus ntawd lawm, muab tej lus ntawd coj los rau hauv lub siab thiab ua tib zoo mloog tej lus ntawd thaum koj xyaum ua yam qhib-siab-lug, kom Vajtswv cov lus thiaj li dhau los ua yam uas koj ua neej, thiab dhau los ua koj txoj sia. Yog li, Vajtswv thiaj li txaus siab hlo. Koj nrhiav kev zoo, kev ua neeg zoo, thiab kev muaj meej mom tas li; koj nrhiav kev qhuas tas li. Vajtswv yuav xav li cas thaum Nws pom qhov no? Nws tsis nyiam tej ntawd kiag li, thiab tsis xav tig ntsia tej ntawd li. Koj yim caum raws tej yam xws li kev zoo; kev ua neeg zoo; thiab kev ua kom tau zoo tshaj lwm tus, kom luag paub yus coob, kom zoo tshaj, thiab kom tsim nqi, ces Vajtswv yim ntxub thaum ntsib koj. Yog hais tias koj tsis thim xav txog koj tus kheej thiab tsis lees txim hloov dua siab tshiab, ces Vajtswv yuav ntxub koj thiab tso koj tseg. Nco ntsoov txhob ua tus uas Vajtswv pom tias ntxim dhuav; ua ib tug neeg uas Vajtswv hlub. Yog li ntawd, yus yuav ua li cas thiaj li tau txais Vajtswv txoj kev hlub? Ua los ntawm kev tau txais qhov tseeb uas muaj qab hau tiag, los ntawm kev sawv rau qhov chaw uas yog ib tug tib neeg raug tsim tawm los, los ntawm kev vam khom khov kho rau Vajtswv txoj lus ua ib tug tib neeg ncaj ncees thiab ua yus tej dej num, thiab los ntawm kev ua neej zoo li ib tug tib neeg tiag. Li no xwb ces txaus lawm. Nco ntsoov txhob tuav txoj kev ntshaw los sis tej kev npau suav uas tsis muaj qab hau, txhob nrhiav suab npe, tshaj thawj, thiab meej mom los sis kom zoo tshaj lwm tus. Tshaj qhov ntawd, txhob sim ua ib tug tib neeg muaj loj tshaj plaws los sis ib tug neeg zoo tshaj tib neeg, uas zoo dua lwm tus tib neeg thiab ua kom lwm tus pe hawm yus. Qhov ntawd yog txoj kev ntshaw ntawm kev ua neeg qias vuab tsuab, thiab nws yog Ntxwgnyoog txoj kev; Vajtswv tsis cawm cov tib neeg uas raug tsim tawm los zoo li no. Yog hais tias ib txhia tib neeg tseem caum suab npe, tshaj thawj, thiab meej mom thiab tsis kam lees txim hloov dua siab tshiab, ces yuav tsis muaj kev cawm tau lawv, thiab tsuas muaj ib qho yuav tshwm sim rau lawv xwb: raug tshem tawm. Niaj hnub no, yog hais tias nej ceev nrooj tig rov qab los thiab xyaum txoj kev lees txim hloov dua siab tshiab, ces tseem muaj sij hawm; tiam sis thaum hnub ntawd los txog thiab Vajtswv tes hauj lwm xaus lawm, thiab tej kev puas tsuaj los, cov uas caum suab npe, tshaj thawj, thiab meej mom thiab tsis kam lees txim hloov dua siab tshiab yuav raug rhuav tshem tag nrho. Nej txhua tus yuav tsum paub meej txog seb hom tib neeg twg es Vajtswv tes hauj lwm thiaj li cawm, thiab lub ntsiab lus ntawm Nws txoj kev cawm tib neeg dim yog dab tsi; qhov ntawd yog kom tib neeg los rau ntawm Vajtswv lub xub ntiag los mloog Vajtswv cov lus, los coj thiab ua neej raws li Vajtswv hais thiab txib, tsis yog los coj thiab ua neej raws li yus tus kheej tej kev npaj siab los sis Ntxwgnyoog lub tswv yim. Yog hais tias koj tsis lees txais yuav Vajtswv cov lus, thiab tseem ua neej raws li Ntxwgnyoog tej tswv yim, thiab raws li Ntxwgnyoog tus moj yam, thiab tsis kam los lees txim hloov dua siab tshiab, ces koj tsis yog hom tib neeg uas Vajtswv cawm dim. Thaum koj raws Vajtswv qab, ces yeej yog Vajtswv xaiv koj ib yam nkaus thiab—yog li ntawd lub ntsiab lus ntawm qhov Vajtswv xaiv koj ntawd yog dab tsi? Nws yog hloov koj mus ua tus neeg uas tso siab rau Vajtswv, tus uas raws Vajtswv qab tiag tiag, tus uas tso tau txhua yam tseg rau Vajtswv, thiab tus uas muaj peev xwm raws Vajtswv txoj kev, tus uas muab Ntxwgnyoog lub tswv yim tso tseg, tus uas muab lawv tus moj yam phem tso tseg, thiab tsis ua neej raws li tus moj yam qias vuab tsuab. Yog hais tias koj raws Vajtswv qab thiab ua ib teg dej num nyob rau hauv Vajtswv lub tuam tsev, tiam sis txhua yam ua rau koj tus kheej tawm tsam Vajtswv, thiab nyob rau hauv txhua yam es tsis coj los sis ua neej raws li Nws cov lus no, Vajtswv puas pom zoo rau koj? Yeej tsis pom zoo li! Vim li cas Kuv thiaj li txhais li no? Tseeb tiag kev ua ib teg dej num mas yeej tsis nyuaj li, los sis yog mob siab rau ua lawm ces yeej tsis nyuaj li, thiab ua kom mus txog ib tug qauv uas lees txais yuav tau. Koj tsis tas yuav fij koj lub neej txoj sia los sis ua ib yam dab tsi uas muaj teeb meem li, koj tsuas yog yuav tsum tau ua raws li Vajtswv cov lus thiab tej kev cob qhia kom ncaj ncees thiab ruaj khov, yam tsis tau ntxiv koj tus kheej tej tswv yim los sis ua raws li koj tus kheej txoj kev ua hauj lwm, kom taug tau txoj hau kev yog xwb. Yog hais tias tib neeg ua tau qhov no, lawv yeej yuav muaj ib lub ntsej muag zoo, lawv muaj txoj kev mloog Vajtswv lus tseeb, thiab tau dhau los ua ib tug neeg ncaj ncees, uas yog qhov zoo nkaus li ib tug tib neeg tiag tiag” (“Kev Ua Tes Dej Num Kom Tau Puv Npo Uas Tsim Nyog Cheem Tsum Kev Sib Koom Tes Zoo” nyob hauv Tej Kev Sib Tham ntawm Khetos ntawm Tiam Kawg). Vajtswv cov lus ua rau kuv to taub Nws txoj kev xav. Niaj hnub no, Vajtswv tau nthuav ntau lo lus tawm los cawm tib neeg lawm cia siab hais tias peb yuav mloog Nws cov lus, siv peb tus kheej yam li cov neeg uas raug tsim tawm los, ua peb tej dej num raws li Nws tej kev cheem tsum, tshem peb tej moj yam qias vuab tsuab tawm mus, ces thiaj li raug cawm. Nyob rau hauv peb tej dej num peb yuav tsum txhob ua rau yus tus kheej xwb kom tuav tau peb lub koob lub npe thiab lub meej mom. Tiam sis, peb yuav tsum tso tej kev txhawb siab uas zais ntsis tawm, nquag plias caum raws qhov tseeb thiab ua peb tej dej num kom tiav raws li yog tus raug tsim tawm los es Vajtswv thiaj li txaus siab. Ua tsaug rau txoj kev coj kev ntawm Vajtswv txoj lus, kuv nrhiav tau txoj kev xyaum ua raws lawm.
Ntau hnub tom qab ntawd, muaj ib tug muam tau qhia kuv txog nws tej kev nyuaj thiab hais tias nws tim tsum kev pab. Kuv tsis muaj kev paub txog fab no li thiab kuv tsis paub tias yuav daws li cas. Kuv paub tias kuv tsis tuaj yeem coj tau li qhov kuv ib txwm ua los lawm thiab tsis kam koom tes nrog kuv tus thawj coj los ua pov thawj rau kuv lub peev xwm, yog li ntawd kuv thiaj li nug kuv tus thawj coj txog qhov teeb meem no. Kuv hais tias, “Kuv daws tsis tau qhov teeb meem no. Koj puas kam pab kuv?” Tus thawj coj txawm nrhiav tau nqe lus uas haum raws li Vajtswv txoj lus thiab xa cov nqe lus ntawd tuaj rau kuv, ces wb ob leeg thiaj li daws tau tus muam ntawd qhov teeb meem lawm. Tom qab ntawd, thaum twg los xij uas kuv muaj ib qho teeb meem, kuv mus cuag kuv tus thawj coj thiab koom tes nrog nws, thiab tsis ua txhua yam ib leeg li kuv keev ua dhau los lawm. Kuv tus cwj pwm txawv dua yav dhau los lawm. Kuv tsis xav txog qhov lawv yuav hwm los sis tsis hwm kuv mus ntxiv lawm. Tiam sis, kuv xav txog qhov yuav daws tej teeb meem rau kuv cov kwv tij thiab cov muam li cas kom tau zoo dua lawm xwb. Kev xyaum ua raws li no ua rau kuv kaj siab heev. Ua Vajtswv tsaug!
