30. Thaum Tso Lub Meej Mom Tseg, Ces Kuv Dim Plaws Lawm
Nyob rau lub Yim Hli xyoo 2019, kuv tau ua ib txoj hauj lwm ua thawj coj nyob rau hauv pawg ntseeg. Muaj ib zaug, kiag tom qab uas kuv xaus kuv tej lus qhia nyob rau hauv ib lub rooj sib txoos ua ke lawm, ces muaj ib tug viv ncaus txawm hais rau kuv hais tias, “Viv Ncaus Hau Lis, koj tej lus qhia hnub no mas qhia tau zoo tiag tiag li. Mloog tej lus qhia ntawd xwb, twb daws tau kuv qhov teeb meem lawm.” Lwm tus viv ncaus los kuj pom zoo nrog nws thiab. Thaum pom nkawv hwm thiab qhuas lawm, kuv thiaj li zoo siab heev, thiab tswj tsis tau txoj kev khav theeb li xws li tias: “Kuv yuav tsum zoo dua lwm tus nus thiab viv ncaus lawm. Yog tsis li ntawd, vim li cas lawv thiaj li xaiv kuv?” Vim kuv daws tau qee yam teeb meem tiav log nyob rau hauv tej rooj sib txoos ua ke lawm, ces lwm tus thiaj li nyiam nrog kuv, thiab lawv tuaj nrhiav kuv kom qhia thaum lawv muaj teeb meem los sis tej kev nyuaj lawm. Kuv xav tias kuv yeej tsim nyog ua thawj coj lawm. Kuv mloog zoo li kuv tseem ceeb me ntsis lawm thiab muaj hwj chim heev, thiab kuv nyiam qhov uas lwm tus hwm thiab qhuas.
Muaj ib hnub thaum kuv mus rau ntawm cov tub leg num ib lub rooj sib txoos ua ke li ib txwm mus, Viv Ncaus Vwj Zijqeeg hais tias tsis ntev los ntawd nws muaj tus moj yam khav theeb thiab pheej xav ua tus txiav txim siab rau ntawm cov uas nrog nws ua hauj lwm. Nws paub hais tias qhov ua li ntawd tsis yog lawm, tiam sis nws tso tsis tau nws tus kheej tseg li. Nws thov kom peb qhia qee yam los pab nws. Kiag thaum kuv tab tom yuav pib, ces Viv Ncaus Ham Ntsiyis, uas yog peb tus tub leg num qhia txoj moo zoo txawm pib tham, qhia txog qee yam ntawm Vajtswv cov lus uas ntsig txog tus moj yam khav theeb ntawd thiab qee yam ntawm nws tus kheej txoj kev paub. Kuv pom hais tias Zijqeeg ua tib zoo mloog thiab ncaws hau, ua ntsej muag luag ntxhi xwb. Thaum pom li no ua rau kuv meem txom heev, ces kuv thiaj li xav hais tias, “Kuv yog tus thawj coj nyob rau ntawm no, thiab qhov no yuav tsum yog qhov teeb meem uas kuv los daws. Vim li cas koj thiaj li txeeb qhov no ntawm kuv mus lawm? Koj tau ua rau zoo li kuv tsis paub daws qhov teeb meem ntawd li. Tsis muaj hnub kuv yuav cia koj txeeb kuv lub koob lub npe li, yog tsis li ntawd ces txhua tus yuav xav hais tias ua ib tug thawj coj los, kuv twb piv tsis tau ib tug tub leg num li. Kuv yuav tsum tau hloov lub ncauj lus kiag tam sim ntawd.” Yog li ntawd tsis ntev kiag thaum Ntsiyis tsum tsis hais lus lawm, kuv cia li hais kiag tam sim ntawd yam tsis xav seb daws puas tau Zijqeeg qhov teeb meem li hais tias: “Vajtswv txoj kev npaj siab uas tseem ceeb tam sim no ces yog tshaj tawm thiab ua tim khawv rau txoj moo zoo txog lub nceeg vaj, kom tib neeg hnov Nws lub suab coob ntxiv thiab los cuag Nws kom sai li sai tau xwb.” Thaum kuv qhia, kuv pheej saib ntsoov Zijqeeg xwb, thiab tsis zoo siab mus txog ntua thaum kuv pom hais tias nws ua tib zoo mloog kuv hais lawm. Kiag thaum kuv hais tag lawm, Ntsiyis thiaj li hais ntxiv txog qee yam kev qhia txoj moo zoo uas zoo. Qhov nws hais ntawd mas meej heev, thiab kuv pom hais tias Zijqeeg mas ua tib zoo mloog qhov Ntsiyis tab tom hais ntawd heev, thiab ncaws hau tas zog li. Kuv hnov meem txom heev, zoo li qhov ntawd yog ib qho kev txaj muag rau kuv xwb. Kuv thiaj li xav hais tias, “Kuv yog tus thawj coj, es koj yog ib tug tub leg num xwb. Kuv yuav ua kuv tes hauj lwm tiav tau li cas tom qab koj txeeb ua li no lawm? Yog tias txhua tus pib hwm koj lawm, leej twg thiaj li yuav xav txog kuv?” Thaum xav li no lawm, kuv thiaj li txiav Ntsiyis lus yam tawv qhawv, thiab pib qhia kuv tus kheej tej lus qhia. Nws yog ib lub sij hawm uas tsis zoo kiag li. Yav tav su ntawd, Zijqeeg hais tias tsis muaj tib neeg ua txoj hauj lwm saib xyuas, thiab nws tsis paub xyov yuav daws qhov teeb meem ntawd li cas. Ces Ntsiyis txawm pib qhia txog qee qhov kev ua uas tseem ceeb, nrog rau nws tus kheej txoj kev paub thiab. Kiag thaum ntawd kuv rov qab pom Zijqeeg ncaws hau tas li dua lawm, mas ua rau kuv khib heev. Kuv xav hais tias, “Kuv yog tus thawj coj. Koj xav hais tias kuv tsis paub qhia nws no lod? Ntxim zoo li koj xav hais tias koj muaj peev xwm heev, tiam sis koj tsuas muaj khav theeb xwb.” Kuv npau taws heev rau Ntsiyis, kuv thiaj li xav hais tias kuv yuav tau ua tib zoo tshawb nws tes hauj lwm thiab ua kom nws paub tias nws tsis muaj peev xwm npaum li nws xav, kom nws thiaj li yuav tsis khav theeb ntsuav lawm mas ntshe yuav zoo dua. Thaum xav li no lawm, kuv thiaj li nug nws hais tias, “Ntsiyis, tes hauj lwm tshaj tawm txoj moo zoo ntawm cov pab pawg uas koj saib xyuas ntawd twb tsis tawg paj txi txiv li ne. Puas yog koj tsis tau mob siab ua tes hauj lwm tshaj tawm txoj moo zoo ntawd?” Thaum nug li no lawm, zoo li Ntsiyis txawm txaj muag me ntsis lawm, ces thiaj li hais tias, “Viv Ncaus, kuv tuaj yeem lees txais qhov ko. Tom qab kuv rov qab mus lawm kuv mam li xyuas seb vim li cas thiaj li ua tsis tau zoo, thiab tig xav txog kuv tus kheej.” Kuv teb ceev nrooj rov qab hais tias, “Yog li ces thaum koj rov qab mus txog lawm, koj yuav tsum tau xyuas thiab kho qhov ua yuam kev ntawd kom sai. Ua ib tug tub leg num qhia txoj moo zoo lawm, koj yuav tsum ua tus ntaus thawj hlo. Yog tsis li ntawd, ces cov nus thiab cov viv ncaus yuav ua li cas muaj siab tshaj tawm txoj moo zoo?” Ces Ntsiyis txawm teb ncaw hau yam me ntsis chim. Thaum pom nws pau hau twj ywm, kuv txawm tu siab me ntsis, tiam sis kuv kuj khav ntxhias hais tias: “Tej lus uas koj nyuam qhuav hais tam sim no uas cuag nkaus li kuv piv tsis tau koj ntawd ne zoo li cas xwb? Kiag thaum kuv nug txog koj tes hauj lwm, zoo li koj tsis zoo li lawm. Tam sim no tsis khav ntxhias li lawm puas yog?” Yog li ntawd kuv thiaj li rov qab muaj ntsej muag li qub, rov qab hais lus muaj hwj chim dua thiab npaj ua lwm yam hauj lwm lawm. Thaum ntawd twb tsaus ntuj lawm, ces Zijqeeg thiab kuv muaj lwm yam hauj lwm uas yuav tau sib tham nyob rau yav tsaus ntuj ntawd. Thaum xub thawj mas kuv xav kom Ntsiyis nyob es nrog wb sib tham txog tej yam, tiam sis tom qab ntawd kuv txhawj tsam nws ho txeeb qhov zoo ntawm kuv dua. Qhov ntawd yuav tsis ua rau kuv zoo li tsis muaj peev xwm lod? Kuv thiaj li xav tias kuv yuav cia nws mus tsev. Thaum kuv pom nws ua lub ntsej muag tsis zoo siab tawm mus lawm, kuv txawm mloog zoo li kuv muaj kev txhaum me ntsis thiab xav paub seb nws puas mloog zoo li raug kuv txwv. Tiam sis nyob rau lub sij hawm ntawd kuv cia li xav tias tsis ua cas ces thiaj li tsis xav txog dab tsis ntxiv li lawm. Kuv cia li cia qhov ntawd dhau mus lawm.
Tom qab ob peb hnub dhau mus lawm, kuv hais txog qhov kuv tau coj rau Ntsiyis li cas lawm ntawd rau Viv Ncaus Lis Sixeej, tus uas nrog kuv ua hauj lwm ua ke mloog. Nws txawm qhuab ntuas kuv hais tias, “Qhov no yog ib tug moj yam uas tawm tsam Khetos ntag. Thaum koj, uas yog ib tug thawj coj muab tus neeg uas txawj tshaj koj cais thiab txwv, mas qhov no yog ib qho teeb meem ntawm ib tug yeeb yam uas phem heev. Cov tswv cuab uas txawj tshaj ntawm pawg ntseeg puas yuav tsis nrog koj saib xyuas lawm?” Thaum hnov li no ua rau kuv tag kev cia siab, thiab meem txom heev. Tsuas yog thaum ntawd xwb kuv thiaj li ras dheev txog qhov ua rau muaj qhov teeb meem ntawd. Ces kuv thiaj li rov qab xav txog kuv tej kev sib tham nrog Ntsiyis. Kuv tau siv tej uas nws ua tsis tau zoo los muab nws cais lawm es kom nws thiaj li yuav tsis tau ua kuv ntej. Tsis yog kuv txwv nws lod? Qhov ntawd yog ua kev phem! Kuv yim xav txog kuv tus cwj pwm, ces kuv yim ntshai xwb, ces kuv thiaj li los rau ntawm Vajtswv lub xub ntiag los thov hais tias: “Au Vajtswv! Los ntawm qhov Sixeej qhuab ntuas kuv hnub no, kuv thiaj li rau ras dheev lawm hais tias qhov txwv thiab cais Ntsiyis ntawd yog kuv tab tom nthuav ib tug moj yam uas tawm tsam Kheto tawm ntag. Ib teg hauj lwm uas tseem ceeb zoo li no, yog kuv tsis daws tus moj yam no, ces leej twg thiaj li yuav paub hais tias kuv yuav ua kev phem ntau npaum li cas! Au Vajtswv! Kuv xav hloov pauv—thov coj kuv kev.”
Tom qab ntawd, kuv txawm nyeem qhov no nyob rau hauv Vajtswv txoj lus: “Cov tawm tsam Khetos xav txog tes hauj lwm ntawm Vajtswv lub tsev, nrog rau tej uas zoo tshaj rau pawg ntseeg, ua lawv tus kheej tug tag nrho, ua yam khoom ntawm lawv ntiag tug uas yuav tsum raug tswj tuav los ntawm lawv, yam tsis muaj ib tug twg los cuam tshuam li. Thiab yog li ntawd ces tib qho uas lawv xav txog thaum ua tes hauj lwm ntawm Vajtswv lub tsev ces tsuas yog qhov uas zoo tshaj rau lawv tus kheej, lawv tus kheej lub koob meej thiab meej mom xwb. Lawv tsis pub leej twg rhuav tshem tej uas muaj txiaj ntsim rau lawv li, thiab lawv haj yam tsis pub tus uas muaj peev xwm thiab muaj cuab kav hais txog nws tej kev paub thiab tej lus tim khawv los rhuav tshem lawv lub meej mom thiab lub koob meej li thiab. Yog li ntawd, lawv thiaj li ua txhua yam los rhuav tshem thiab muab cov uas muaj peev xwm tham txog tej kev paub thiab tej lus tim khawv, nrog rau cov uas tuaj yeem qhia txog qhov tseeb thiab pab cov neeg Vajtswv xaiv ntawd cais tawm, thiab lawv rau siab ntso ua txhua yam los muab cov tib neeg ntawd cais tawm ntawm txhua tus, ua kom cov tib neeg ntawd lub npe puas, thiab rhuav tshem cov tib neeg ntawd. Tsuas yog thaum ntawd xwb cov tawm tsam Khetos thiaj li yuav kaj siab. Yog cov tib neeg no yeej tsis qaug zog, thiab muaj peev xwm ua lawv tes dej num, hais lawv tej lus tim khawv, thiab txhawb lwm tus txuas ntxiv, ces cov tawm tsam Khetos yuav tig mus rau qhov kawg ntawm lawv uas yog nrhiav tej uas cov tib neeg ntawd ua txhaum, teem txim rau cov tib neeg ntawd, liam cov tib neeg ntawd, tsim tej lus dag los ua kom txhua yam nyuaj rau cov tib neeg ntawd, kom txog ntua thaum cov tib neeg ntawd raug ntiab tawm ntawm pawg ntseeg mus lawm. Tsuas yog thaum ntawd xwb cov tawm tsam Khetos thiaj li yuav tau so. Qhov no yog qhov uas lim hiam thiab siab phem tshaj plaws ntawm cov tawm tsam Khetos. Qhov uas ua rau lawv ntshai thiab ntxhov siab tshaj plaws mas yog cov tib neeg uas caum qhov tseeb thiab muaj tej kev paub thiab lus tim khawv tseeb, vim cov tib neeg uas muaj tej kev paub thiab lus tim khawv ntawd yog cov uas cov neeg Vajtswv xaiv lawm pom zoo thiab txhawb tshaj plaws, uas tsis yog cov pheej hais txog kev qhuab qhia xwb. Cov tawm tsam Khetos tsis muaj tej kev paub thiab lus tim khawv tseeb, thiab lawv tsis muaj peev xwm xyaum ua raws li qhov tseeb; qhov uas lawv ua tau zoo tshaj plaws, ces yog qhov lawv muaj peev xwm ua ob peb yam num zoo kom tib neeg nyiam xwb. Tiam sis txawm lawv yuav ua tau tej num zoo ntau npaum li cas los sis lawv yuav hais tau ntau yam zoo nrov nroog qeb npaum li cas los xij, tej no yeej tseem piv tsis tau tej uas muaj txiaj ntsim thiab tej uas muaj nuj nqis uas ib zaj lus tim khawv hais txog txoj kev paub uas zoo coj los rau tib neeg li. Tsis muaj dab tsi yuav hloov tau tej txiaj ntsim ntawm cov neeg uas muaj peev xwm hais txog tej kev paub thiab lus tim khawv los pab cuam thiab ywg dej rau cov neeg Vajtswv xaiv li. Yog li ntawd, thaum cov tawm tsam Khetos pom ib tug neeg hais txog tej kev paub thiab lus tim khawv, mas lawv ntsia yam npau taws heev. Lawv lub siab kub lug npau taws heev, kev ntxub ntxaug tshwm plaws tuaj, thiab lawv nthe nqho yam npau taws heev kom tus hais lus ntawd kaw qhov ncauj thiab tsis pub tus tib neeg ntawd hais ntxiv li lawm. Yog tus tib neeg ntawd hais txuas ntxiv, ces yuav ua rau cov tawm tsam Khetos ntawd lub koob lub npe puas tsuaj tag nrho, thiab yuav ua rau txhua tus pom lawv lub ntsej muag dag tuag tag nrho, yog li ntawd cov tawm tsam Khetos thiaj li nrhiav ib txoj kev los cuam tshuam tus tib neeg uas hais lus tim khawv ntawd thiab rhuav tshem lawv. Cov tawm tsam Khetos tsuas cia lawv tus kheej cov lus thiab txoj kev qhuab qhia dag ntxias tib neeg xwb, thiab lawv yeej tsis cia cov neeg Vajtswv xaiv los hais txog lawv tej kev paub thiab lus tim khawv, uas qhia tias cov tawm tsam Khetos ntxub thiab ntshai hom tib neeg twg tshaj plaws kom Vajtswv tau koob meej li. Thaum tib neeg paub qhov txawv ntawm lawv tus kheej los ntawm ib qho hauj lwm me me, los sis thaum tib neeg muaj peev xwm tham txog tej kev paub thiab lus tim khawv tseeb kom muaj txiaj ntsim, txhim kho, thiab txhawb tau cov uas xaiv tseg, thiab txhua tus qhuas heev lawm, ces ua rau cov tawm tsam Khetos lub siab khib thiab ntxub, lawv thiaj li ua txhua yam los cais thiab rhuav tshem cov tib neeg ntawd. Thiab, txawm yuav zoo li cas los xij lawv yeej tsis cia cov tib neeg zoo li no los ua ib qho hauj lwm, kom thaiv tau cov tib neeg no tsis txhob rhuav tshem lawv lub meej mom. Cov tib neeg uas muaj qhov muaj tiag ntawm qhov tseeb ua rau pom thiab qhia txog cov tawm tsam Khetos txoj kev txom nyem, kev nyuaj siab, kev dab tuag, thiab kev phem thaum cov tib neeg ntawd nyob ntawm cov tawm tsam Khetos ib sab, yog li ntawd thaum tus tawm tsam Khetos xaiv ib tug neeg los nrog nws ua hauj lwm ua ke los sis tus neeg nrog ua hauj lwm ua ke, lawv yeej tsis xaiv tus uas muaj qhov muaj tiag ntawm qhov tseeb, lawv yeej tsis xaiv cov tib neeg uas tuaj yeem hais txog tej kev paub thiab lus tim khawv, thiab lawv yeej tsis xaiv cov tib neeg coj ncaj los sis cov tib neeg uas muaj peev xwm xyaum ua raws li qhov tseeb li. Cov tib neeg no yog cov uas cov tawm tsam Khetos khib thiab ntxub tshaj plaws, thiab lawv yog ib tug pos uas nyob rau hauv cov tawm tsam Khetos ntawd lub siab” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). Kuv pom los ntawm Vajtswv cov lus los hais tias lub cim tseem ceeb ntawm ib tug moj yam uas tawm tsam Khetos ntawd mas yog qhov saib lub hwj chim yam li yog lawv txoj sia kiag ntag, pheej xav ua tus tswj lawv tes dej num, thiab xav ua tus saib xyuas. Kiag thaum uas muaj ib tug neeg twg ua tau tshaj lawv, ua phom sij rau lawv lub meej mom los sis lub hwj chim, mas lawv muab tus tib neeg ntawd cais thiab txwv, mus txog ntua rau qhov uas ua rau pawg ntseeg tes hauj lwm puas tsuaj yam tsis ncaj ncees li thiab. Thaum tig xav txog kuv tus kheej txij li thaum ua txoj hauj lwm ua thawj coj ntawd los, kuv tsis tau mob siab txog yam uas yog kuv lub luag hauj lwm nyob rau hauv kuv tes dej num thiab qhov kuv yuav tsum ua hauj lwm kom muaj qab hau li cas li, tiam sis tsuas mob siab txog txoj kev qhuas uas kuv lub meej mom coj los rau kuv xwb. Yuav kom tiv thaiv tau kuv lub meej mom mas, kuv yuav tsum tsis txhob cia leej twg ua tau tshaj kuv li. Ntsiyis tej lus qhia txog qhov tseeb ntawd daws tau Zijqeeg qhov teeb meem lawm. Qhov ntawd qhia tau hais tias nws ris ib lub nra, thiab qhov ntawd yog ib qho zoo lawm, tiam sis kuv tsis zoo siab tias daws tau Zijqeeg tus yam ntxwv lawm. Tiam sis, kuv ntshai tsam Ntsiyis yuav zoo dua kuv, thiab txhawj tias lwm tus lub siab yuav tsis muaj kuv lawm, tias lawv yuav tsis hwm kuv ntxiv lawm. Kuv thiaj li txhob txwm hloov lub ncauj lus kom Ntsiyis thiaj li tsis muaj ib lub hwv tsam los hais lus. Thaum kuv pom lwm tus qhuas nws los ntawm nws tej lus qhia, mas kuv txhob txwm ua kom txhua yam nyuaj rau nws los ntawm qhov nug nws txog nws tes hauj lwm. Kuv ua kom nws txaj muag thiab yuav tsis tso qhov ua kom nws txaj muab ntawd tseg mus txog ntua thaum uas lwm tus tsis hwm nws ntxiv lawm. Yuav kom kuv txoj hauj lwm kav ntev, mas kuv yuav tsum siv lub tswv yim phem uas ntxim ntxub no los txwv thiab cais tus tib neeg uas muaj peev xwm qhia txog qhov tseeb. Kuv tus yeeb yam mas phem tiag tiag li! Kuv tsis tau nthuav tus tawm tsam Khetos tus moj yam tawm lod? Kuv xav txog ib tug tawm tsam Khetos uas pawg ntseeg nyuam qhuav tau muab ntiab tawm ob peb hnub dhau los no lawm. Nws pheej txwv thiab cais cov nus thiab cov viv ncaus uas nthuav tej kev xav txawv tawm, los sis cov uas zoo dua nws, tsis ua tib zoo xav txog pawg ntseeg tes hauj lwm li. Thaum kawg nws thiaj li raug muab ntiab tawm lawm vim txoj kev ua txhua yam kev phem. Tag nrho tej uas kuv tau ua rau Ntsiyis lawm ntawd, qhov sib txawv ntawm kuv thiab tus tawm tsam Khetos ntawd yog dab tsi? Kuv tab tom taug tus tawm tsam Khetos txoj kev ntag.
Tom qab ntawd, kuv nyeem Vajtswv cov lus no: “Txawm koj yuav ua dab tsi, txawm nws yuav tseem ceeb thiab tsis tseem ceeb los xij, yuav tsum muaj tib neeg nyob ntawd pab koj, taw qhia koj, tawm tswv yim, thiab pab koj ua txhua yam. Ua li no, koj thiaj li yuav ua txhua yam yog dua, yuav tsis tshua ua yuam kev, thiab koj yuav tsis tshua mus yuam kev—uas puav leej yog mus rau qhov zoo. Qhov ua dej num rau Vajtswv yam tshwj xeeb ntawd yog ib qho tseem ceeb heev, thiab qhov tsis daws koj tus moj yam qias vuab tsuab ntawd tuaj yeem ua rau koj muaj kev phom sij! Thaum tib neeg muaj tus moj yam phem lawm, lawv tuaj yeem ntxeev siab rau Vajtswv thiab tawm tsam Vajtswv lub sij hawm twg thiab qhov chaw twg los tau. Cov tib neeg uas ua neej raws li tus moj yam phem, tuaj yeem tsis lees paub, tawm tsam, thiab ntxeev siab rau Vajtswv lub sij hawm twg los tau. Cov tawm tsam Khetos ruam, lawv tsis paub txog qhov no li, lawv xav hais tias, ‘Kuv twb muaj teeb meem txaus lawm kuv thiaj li tau kuv tus kheej lub hwj chim, vim li cas kuv thiaj li yuav muab lub hwj chim ntawd faib rau lwm tus? Qhov muab lub hwj chim ntawd rau lwm tus txhais tau hais tias kuv yuav tsis muaj dab tsi rau kuv tus kheej lawm, tsis yog lod? Kuv yuav ua li cas qhia tau kuv tej kev txawj thiab tej peev xwm yog tsis muaj lub hwj chim?’ Lawv tsis paub tias qhov uas Vajtswv tau muab rau tib neeg ua ntawd tsis yog lub hwj chim los sis lub meej mom, tiam sis yog ib teg dej num. Lawv tsuas lees txais lub hwj chim thiab lub meej mom xwb, lawv muab lawv tej dej num tso tseg lawm, thiab lawv tsis ua hauj lwm kom muaj qab hau. Tiam sis, lawv caum lub koob meej thiab lub meej mom thiab xyiv fab rau tej txiaj ntsim ntawm lub meej mom lawm. Qhov ua txhua yam li no mas phom sij heev—qhov no yog tawm tsam Vajtswv ntag! Txhua tus uas caum lub koob meej thiab lub meej mom dua li ua tib zoo ua lawv tes dej num kom zoo mas yog siv kev phom sij thiab txoj sia los caum xwb. Cov uas siv qhov phom sij thiab lawv txoj sia tuaj yeem ua rau lawv tus kheej puas tsuaj lub sij hawm twg los tau. Niaj hnub no, qhov ua ib tug thawj coj los sis ib tug neeg ua hauj lwm ntawd, yog koj tab tom ua dej num rau Vajtswv ntag, uas tsis yog ib qho yooj yim lawm. Koj tsis yog ua tej yam rau qee tus neeg, thiab haj yam tsis yog ua hauj lwm los them nqi thiab yuav zaub mov noj; tiam sis yog koj ua koj tes dej num uas nyob rau hauv pawg ntseeg ntag. Yog li ntawd hais txog qhov Vajtswv muab tes dej num no cob rau koj ua ntawd, qhov tseem ceeb ntawm txoj kev ua tes dej num no yog dab tsi? Vajtswv cia siab hais tias koj yuav ua koj tes dej num, seb koj ua puas zoo los tsis zoo; thaum kawg, yuav tsum tau cia siab rau Vajtswv, yuav tsum ua kom tau txiaj ntsig. Qhov koj tau lees txais ntawd yog Vajtswv cov lus txib, yog ib lub luag hauj lwm uas dawb huv, yog li ntawd txawm lub luag hauj lwm ntawd yuav tseem ceeb los sis me npaum li cas los xij, nws yog ib txoj hauj lwm tseem ceeb heev. Nws tseem ceeb npaum li cas? Nws cuam tshuam ncaj qha rau koj lub neej yav tom ntej thiab txoj hmoo, txog ntua qhov kawg ntawm koj; yog koj ua phem thiab tawm tsam Vajswv, ces koj yuav raug teem txim thiab raug rau txim ntag. Txhua yam koj ua thaum koj ua koj tes dej num ntawd Vajtswv twb muab teev tseg lawm, thiab Vajtswv Nws muaj Nws tus kheej tej hauv paus ntsiab lus thiab tej qauv rau qhov tau qhab nia thiab ntsuaj xyuas ntawd; Vajtswv txiav txim rau qhov kawg ntawm koj raws li txhua yam uas koj tau nthuav tawm thaum koj ua koj tes dej num” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). Kuv kawm paub los ntawm Vajtswv cov lus los hais tias qhov ua ib tug thawj coj los sis ua ib tug neeg ua hauj lwm ntawd mas yog ib teg hauj lwm tseem ceeb uas ua dog ua dig tsis tau. Koj khav theeb los sis tawv ncauj tsis tau. Qhov ntawd cheem tsum kev hwm Vajtswv thiab kev koom tes nrog lwm tus nus thiab viv ncaus kom sib haum xeeb. Koj yuav tsum nrhiav qhov tseeb kom ntau ntxiv thiab mloog lwm tus tej lus qhia kom thiaj li yuav tsis taug tau txoj kev yuam kev. Vajtswv pub nyias muaj nyias peev xwm thiab nyias muaj nyias tus kheej txoj kev to taub. Ib tug tib neeg xwb mas muaj kev paub tsawg tsawg thiab tsuas pom txhua yam los ntawm tib txoj kev xav xwb. Yuav kom ua tau peb tes dej num zoo mas txhua tus yuav tsum koom tes, thiab peb ib leeg yuav tsum kho ib leeg qhov ua tsis tau zoo. Ntsiyis qhia qee qhov kev ua uas zoo kom xyaum ua zoo los ntxiv rau qhov kuv qhia tsis tau zoo ntawd. Qhov ntawd yog ib qho zoo! Tiam sis kuv lub meej mom tseem ceeb tshaj txhua yam rau kuv lawm, yog li ntawd kuv thiaj li tsuas xav khav theeb thiab ua kom lwm tus hwm kuv, thiab pe hawm kuv xwb. Thaum pom Ntsiyis qhia zoo lawm, ces ua rau kuv tsis tau ntsej muag lawm, kuv thiaj li cais nws thiab txwv nws. Tsis yog kuv ua neej raws li Ntxwgnyoog cov kuab lom xws li “Nyob rau hauv tag nrho lub qab ntuj khwb, Kuv thiaj yog tus hwj chim loj tshaj plaws xwb” thiab “Tsuas muaj ib yam txiv neej nkaus xwb” lod? Kuv tsis quav ntsej tias seb peb tej kev sib txoos ua ke ntawd puav tawg paj txi txiv los sis seb cov nus thiab cov viv ncaus nrhiav puas tau kev daws lawv tus yam ntxwv li. Kuv haj tseem tsis xav li tias seb Ntsiyis puas mloog zoo li kuv txwv nws los sis puas mob nws siab li thiab. Kuv muaj tib lub siab uas caum txoj kev txaus siab ntawm kuv tus kheej tej hom phiaj thiab tej kev ntshaw xwb. Cas kuv yuav ntxim ntxub ua luaj! Kuv ua pawg ntseeg ib tug thawj coj tiam sis coj tsis tau cov nus thiab cov viv ncaus los rau ntawm Vajtswv lub xub ntiag li. Kuv tsis pab kom lwm tus muaj kev paub txog Vajtswv, tiam sis kuv xav tswj lawv rau hauv kuv lub xib teg, ua kom lawv hwm kuv thiab nyob puag ncig kuv xwb. Qhov ntawd yog tawm tsam Vajtswv, tab tom taug tus tawm tsam Khetos txoj kev ntag! Yog kuv tsis lees txim hloov dua siab tshiab, ces kuv yeej yuav ua txhaum rau Vajtswv tus moj yam thiab raug muab ntiab tawm xwb xwb li.
Rov qab xav txog qhov kuv coj li cas rau Ntsiyis lawm, mas kuv pom hais tias kuv tus moj yam phem npaum li cas, kuv tsis muaj kev ua neej npaum li cas. Kuv dhuav, thiab ntxub kuv tus kheej heev. Kuv xav nrhiav ib txoj kev xyaum ua los daws kuv tus moj yam phem kom sai li sai tau. Ces tom qab ntawd kuv txawm saib ib daim yeeb yaj duab uas nyeem txog Vajtswv cov lus. Vajtswv Tus Uas Muaj Hwj Chim Loj Kawg Nkaus hais tias: “Muaj ib lub hauv paus ntsiab lusrau Vajtswv tej kev ua. Nws tiv thaiv tib neeg, xav txog lawv, Nws hlub lawv, thiab xav kom lawv tau qhov zoo tshaj plaws xwb; qhov no yog lub hauv paus thiab thawj txoj kev npaj siab uas txhawb txhua yam uas Vajtswv ua. Nyob rau tib lub sij hawm ntawd, Ntxwgnyoog khav txog nws tus kheej, nws yuam txhua yam rau tib neeg, ces tom qab ntawd ua kom lawv pe hawm nws, tib neeg raug nws ntxias thiab saib tsis taus, ces lawv txawm maj mam dhau los ua cov dab uas ciaj sia nyob lawm. Thaum koj tau txais kev cawm dim lawm, ces koj yuav dim Ntxwgnyoog txoj kev haub ntxias lawm, yog li ntawd qhov no yuav tsis yog qhov kawg ntawm koj. Ntxwgnyoog tsis xav kom tib neeg tau qhov zoo tshaj plaws, nws tsis quav ntsej tias lawv ciaj los tuag, nws tsuas xav txog nws tus kheej, xav txog nws tus kheej qhov tshaj thawj thiab txoj kev txaus siab xwb, nws tsis muaj kev hlub los sis kev khuv leej li, haj yam tsis muaj lub siab ntev los sis lub siab dav li. Tsuas yog Vajtswv xwb thiaj li muaj tej no. Vajtswv tau ua ntau yam hauj lwm heev rau tib neeg lawm—tiam sis Nws puas tau hais txog tej ntawd, Nws puas txeev piav qhia txog Nws tus kheej, los tiv thaiv Nws tus kheej li? Tsis tau li. Txawm tib neeg yuav muab Vajtswv tshab txhais yuam kev npaum li cas los xij, Nws yeej tsis piav qhia ib yam dab tsi ntxiv li lawm; … Vajtswv txo hwj chim thiab zais ntsis, hos Ntxwgnyoog khav txog nws tus kheej. Puas muaj qhov sib txawv? Muab kev khav piv rau kev txo hwj chim thiab kev zais ntsis: qhov twg yog qhov zoo? (Kev txo hwj chim thiab kev zais ntsis.) Piav qhia puas tau tias Ntxwgnyoog txo hwj chim? (Tsis tau.) Vim li cas? Txiav txim los ntawm nws tus yeeb yam phem thiab lub ntsiab tseeb mas, pom tias nws yog ib qho khoom seem uas tsis muaj nuj nqis li; qhov Ntxwgnyoog tsis khav txog nws tus kheej mas ntshe yuav yog ib qho uas txawv tshaj plaws li. Yuav ua li cas hais tau tias Ntxwgnyoog ‘txo hwj chim’? ‘Kev txo hwj chim’ ntawd yog hais txog Vajtswv xwb. Qhov Vajtswv yog leej twg tiag tiag, Vajtswv lub ntsiab tseeb, thiab Vajtswv tus moj yam mas siab thiab tsim nyog hwm heev, tiam sis Nws yeej tsis khav li. Vajtswv txo hwj chim thiab zais ntsis, Nws tsis cia tib neeg pom yam uas Nws twb ua tag lawm, tiam sis thaum Nws ua hauj lwm yam tsis muaj leej twg paub zoo li no, mas pab tau, txhawb tau, thiab coj tau noob neej kev yam tsis tu ncua li—thiab txhua yam no puav leej yog Vajtswv npaj tseg lawm. Puas yog vim txoj kev zais ntsis thiab kev txo hwj chim es Vajtswv thiaj li tsis qhia txog tej no, thiab tsis hais txog tej no li? Vajtswv yeej txo hwj chim tiag tiag vim Nws muaj peev xwm ua tej no tiam sis yeej tsis hais txog los sis qhia txog tej no, tsis muab tej no tham rau tib neeg li. Koj muaj tus cai dab tsi los hais txog kev txo hwj chim vim koj twb tsis muaj peev xwm ua tej zoo li no? Koj twb tsis ua tej ntawd ib qho li, tiam sis hos pheej ua kom tau ntsej muag vim tej ntawd—qhov no hu ua tsis paub txaj muag li” (Txoj Lus, Phau 4. Kev Nthuav Tawm Cov Tawm Tsam Khetos. Yam Xya: Lawv Yog Neeg Phem, Lim Hiam, thiab Txawj Dag (Ntu Ob)). Vajtswv cov lus zaj no qhia kuv tias Vajtswv txo hwj chim thiab nkaum npaum li cas. Vajtswv yog tus Tswv Tsim, yeej ua Nws tes hauj lwm tas li, coj tib neeg ntiaj teb kev thiab muab txhua yam uas peb cheem tsum kom muaj txoj sia nyob rau peb, tiam sis Nws Tus Kheej yeej tsis khav theeb li. Nws tsuas nthuav qhov tseeb tawm twj ywm, thiab ua hauj lwm los cawm tib neeg ntiaj teb xwb. Vajtswv lub ntsiab tseeb mas ntxim hlub heev, thiab zoo heev! Nyob li ntawm kuv mas, kuv tus kheej xav khav theeb rau txhua txhia qhov chaw uas kuv mus xwb. Thaum kuv tau ua txoj hauj lwm ua thawj coj lawm, ces kuv txawm muab kuv tus kheej tso rau saum qhov chaw siab uas kuv tsis kam nqis saud los li lawm. Thaum kuv tus viv ncaus qhia txog tej kev xyaum ua uas zoo, kuv tsis qhib siab lug nrhiav qhov tseeb li. Kuv yuav tsis cia leej twg yeej kuv li. Kuv khav theeb heev! Kuv yog ib tug thawj coj, tiam sis kuv tsis cob qhia los sis qhuas cov uas caum qhov tseeb li, tiam sis kuv cais thiab txwv lawv xwb. Kuv tsuas xav seb yuav tiv thaiv kuv tus kheej lub meej mom, ua kom lwm tus hwm kuv thiab muab kuv saib tseem ceeb li cas xwb. Kuv yeej tsis paub txaj muag li, thiab muaj tus cwj pwm uas ntxim ntxub heev! Kuv thiaj li maj nroos los thov rau ntawm Vajtswv lub xub ntiag hais tias: “Au Vajtswv! Kuv tus moj yam uas tawm tsam Khetos mas phem heev dhau lawm. Kuv xav lees txim hloov dua siab tshiab rau Koj, kom tau rov qab los nyob kuv qhov chaw qub thiab ua kuv tes dej num kom muaj qab hau.” Ces kuv txawm mus ntsib txhua pab pawg, mus qhia txhua tus txog Ntsiyis tej kev tshaj tawm txoj moo zoo. Tom qab qhov ntawd, kuv thiaj li muab kuv txoj kev qias vuab tsuab uas nrog nws sib txeeb lub meej mom, nrog rau kuv tus moj yam uas tawm tsam Khetos ntawd qhia tawm thiab nthuav tawm. Qhov xyaum ua li no ua rau kuv zoo siab thiab kaj siab heev li.
Tom qab ntawd, thaum kuv pom hais tias kuv tus kheej nyiam nrog lwm tus sib txeeb lub meej mom lawm, ces kuv txawm txhob txwm xyaum ua raws li qhov tseeb lawm. Muaj ib hnub kuv nrog ob peb tug thawj coj pab pawg nyob rau hauv ib lub rooj sib txoos ua ke, thiab Viv Ncaus Yaj Kuab, uas yog tus neeg zoo, zoo li thaum pib mas muaj zog thiab nquag teb lwm tus tej lus nug heev. Nws yog tus neeg tseem ceeb nyob rau tag nrho lub sij hawm ntawd. Muaj ib qho thaum peb tab tom tham txog qhov yuav muab tej rooj sib txoos ua ke rau cov ntseeg tshiab ntawd faib li cas, ces Yaj Kuab txawm tawm ib lub tswv yim txawv kiag thaum kuv tham tag nrho. Tab txawm kuv paub tias nws hais yog lawm los xij, thaum kuv pom tag nrho cov nus thiab cov viv ncaus pom zoo nrog nws thiab tias txhua tus puav leej tig mus saib nws lawm, ces kuv mloog zoo li kuv twb poob ntsej muag lawm. Kuv thiaj li xav hais tias, “Yaj Kuab twb yog tus neeg tseem ceeb lawm, hos kuv ua tus txhawb xwb. Kuv yog tus thawj coj, tiam sis tsis yog kuv tsuas zoo li ib tug neeg uas txhawb xwb lod?” Kiag thaum qhov no tshwm sim rau kuv, kuv ras dheev hais tias kuv tab tom txeeb lub meej mom dua, tawm tsam kom tau ua tus neeg tseem ceeb dua lawm. Kuv thov Vajtswv twj ywm hais tias kuv txaus siab hlo muab kuv tus kheej tso tseg thiab nrog Yaj Kuab ua hauj lwm kom zoo, thiab tias kuv cheem tsum Nws txoj kev coj kev los hloov pauv kuv tus yam ntxwv uas tsis yog lawm. Kuv txawm nco txog ib zaj lus ntawm Vajtswv txoj lus: “Koj yuav tsum muab lub npe ua thawj coj tso tseg, tso lub meej mom uas qias vuab tsuab tseg, saib koj tus kheej yam li ib tug neeg dog dig xwb, nyob tib qib li lwm tus, thiab muaj tus cwj pwm uas mob siab leg koj tes dej num. Yog koj pheej saib koj tes dej num yam li ib lub npe nom tswv thiab lub meej mom, los sis yam li ib txoj kev muaj yeej, thiab xav hauv nruab siab hais tias lwm tus nyob ntawd ua dej num rau koj txoj hauj lwm xwb, ces qhov no yog qhov teeb meem, thiab Vajtswv yuav ntxub thiab qias koj. Yog koj ntseeg hais tias koj muaj vaj huam sib luag li lwm tus, koj tsuas tau tej lus txib thiab lub luag hauj lwm los ntawm Vajtswv me ntsis xwb, yog koj tuaj yeem xyaum muab koj tus kheej tso kom sib txig sib luag li lwm tus, thiab haj tseem tuaj yeem txo hwj chim los nug seb lwm tus tib neeg xav li cas, thiab yog koj tuaj yeem ua tib zoo mloog qhov lawv hais ntawd yam mob siab rau tiag tiag, ces koj yuav ua hauj lwm nrog lwm tus yam muaj kev sib haum xeeb” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). Vajtswv cov lus zaj no ua rau kuv muaj ib txoj hauv kev xyaum ua raws lawm. Pawg ntseeg tau muab lub hwv tsam rau kuv los ua ib tug thawj coj lawm, tsis yog muab lub meej mom rau kuv xwb, tiam sis yog los pab kuv ua hauj lwm nrog rau txhua tus kom sib haum xeeb los ua tes dej num ntawd kom zoo. Kuv pheej txhawj txog kuv lub koob lub npe thiab lub meej mom, los sis nrog lwm tus sib txeeb lub npe tsis tau lawm. Yaj Kuab cov lus hais yog lawm, yog li ntawd kuv yuav tsum lees txais cov lus ntawd. Qhov ntawd thiaj li yuav zoo rau pawg ntseeg tes hauj lwm. Thaum nws hais tag lawm, kuv txawm nthuav tawm txog kuv txoj kev pom zoo thiab qhia lwm tus nus thiab viv ncaus kom ua raws li nws tej lus hais. Kuv tsis nrog nws sib tw nyob rau hauv kuv lub siab ntxiv lawm. Nyob rau hauv lub rooj sib txoos ua ke ntawd, txhua tus qhib siab lug qhia txog lawv tus kheej tej kev xav thiab lub rooj sib txoos ua ke ntawd yog ib lub rooj sib tham uas zoo heev. Kuv zoo siab heev uas tau pom qhov no, thiab ua tsaug ntau ntau rau Vajtswv txoj kev coj qhia. Kuv thiaj li paub hais tias kev koom tes nrog lwm tus kom zoo, yam tsis muaj qhov tswj los ntawm tej kev txwv ntawm lub meej mom, mas muaj kev kaj siab heev.
Nws yog los ntawm qhov kev paub no es kuv thiaj li pom tias kuv tau cais thiab txwv tib neeg los txhawb kuv lub meej mom li cas lawm. Kuv pom tias kuv tau ua neej raws li tus moj yam phem, muaj peev xwm ua kev phem thiab tawm tsam Vajtswv txhua lub sij hawm li cas lawm. Qhov tsis caum qhov tseeb mas phom sij heev! Vajtswv cov lus uas nthuav tawm, thiab qhia tshwm txog tej uas muaj tseeb ntawd ua rau kuv pom tseeb tseeb hais tias kuv taug tau txoj kev tsis yog thiab pab kuv los hloov pauv me ntsis lawm. Kuv kuj paub tseeb tseeb hais tias, tsuav peb caum qhov tseeb kom tag siab nrho thiab ua hauj lwm los daws peb tus moj yam uas qias vuab tsuab xwb, ces Vajtswv yeej yuav coj kev. Ua Vajtswv Tus Uas Muaj Hwj Chim Loj Kawg Nkaus tsaug!
