35. Lub Neej nyob Tuaj Tsag

Nyob rau xyoo 2008, Kuv saib xyuas kev thauj pawg ntseeg cov ntawv sau. Qhov no yog ib hom dej num dog dig tshaj plaws nyob rau hauv ib lub teb chaws uas muaj kev ywj pheej rau fab kev ntseeg, tab sis nyob rau hauv Teb Chaws Suav mas, qhov ntawd phom sij heev li. Raws li Pawg Tsoom Fwv Koom Tsham txoj cai lij choj, ib tug neeg twg uas raug ntes vim thauj cov ntawv sau txog fab kev ntseeg ces yuav raug lub txim xya xyoo los sis ntev dua. Vim li no, lwm cov nus thiab cov viv ncaus thiab kuv puav leej ceev faj heev rau hauv peb tes dej num. Tab sis nyob rau hnub tim 26 lub Yim Hli Ntuj, thaum kuv tab tom taug kev, ces cia li muaj ib co tsheb tub ceev xwm los vij kuv nthawv nthav thiab tub ceev xwm muab kuv thawb ntiag mus rau hauv ib lub tsheb. Kuv mas nyuaj siab heev. Kuv xav txog ib tug viv ncaus uas raug ntes tib yam nkaus li no thiab, thiab nws raug kaw ntev txog 10 lub xyoo. Kuv puas yuav raug kaw 10 lub xyoo thiab mas? Yog kuv raug kaw ntev npaum li ntawd tiag tiag, ces kuv yuav ua neej nyob li cas mas? Kuv lub siab nyuaj ntsuav rau qhov kev xav ntawd, ces kuv thiaj li maj nroos los thov Vajtswv tias: “Au Vajtswv! Kuv tsis paub tias tub ceev xwm yuav tsim txom kuv li cas. Thov saib xyuas kuv lau, thiab muab txoj kev ntseeg thiab lub zog rau kuv.” Kuv xav txog cov lus no uas los ntawm Vajtswv los tom qab thov tias: “Koj yuav tsum tsis txhob ntshai qhov no thiab qhov tod; txawm koj yuav ntsib teeb meem thiab kev phom sij ntau npaum li cas los, koj muaj peev xwm nyob ruaj khov rau ntawm Kuv xub ntiag, tsis muaj kev cuam tshuam los ntawm ib qho kev tab kaum li, kom Kuv txoj kev xav raug ua mus kom tsis paub kawg. Qhov no yog koj txoj hauj lwm…. Tam sim no yog lub sij hawm uas Kuv yuav los sim koj lawm: Koj puas kam muab koj lub siab npuab rau Kuv? Koj puas kam caum raws Kuv qab yam muab siab npuab mus kom txog txoj kev kawg? Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Qhov no txhawb kuv txoj kev ntseeg thiab lub zog. Vajtswv yog tus tswj kav tag nrho txhua yam thiab tag nrho lub qab ntuj khwb mas nyob hauv Nws ob txhais tes. Yog li ntawd tsis yog cov tub ceev puav leej nyob hauv Nws ob txhais tes thiab lod? Yog Vajtswv tsis tso cai rau qhov ntawd, ces yeej yuav kov tsis tau kuv ib txhoj plaub li ntag. Vajtswv siv kev caij tsuj thiab kev nyuaj los ua kom kuv txoj kev ntseeg zoo tiav log, yog li ntawd kuv yuav tsum thov Vajtswv thiab vam khom rau Vajtswv, thiab ua tim khawv rau Nws. Txawm tias kuv yuav tau mus nyob txim 10 lub xyoos los xij, kuv txiav txim siab lawm tias kuv yeej yuav tsis muag kuv cov nus thiab cov viv ncaus li, yeej yuav tsis muaj hnub ntxeev siab rau Vajtswv li.

Tub ceev xwm coj kuv mus rau tim ib lub tsev ob tshooj nyob sab nraum nroog lawm. Ib tug tub ceev xwm siab ntshua, hnub nyoog li ib nrab neej ntawd tuav rawv ib poom dej txias ua nws lub ntsej muag txaus ntshai tsawv txawm maj nroos los rau ntawm kuv, npuaj lub rooj thaum nthe tias, “Koj lub npe hu li cas? Koj ua dab tsi rau hauv pawg ntseeg? Koj tau sib txuas lus nrog leej twg lawm? Koj tus thawj coj hauv pawg ntseeg yog leej twg?” Thaum kuv tsis hais ib lo lus li, nws txawm tsa poom dej thiab muab tsoo kuv taub hau, ua rau kuv taub hau nrov ziv. Nws tas zog nug kuv mus ntxiv, siv txhua hom lus phem. Kuv tsuas nyo hau nris thiab thov Vajtswv nkaus xwb teb tsis tau ib los rau nws li. Ces nws txawm muab poom dej ntawd tsoo kuv lub hauv pliaj—kiag tam sim ntawd kuv lub qhov muag cia li plooj plooj lawm thiab kuv hnov zoo li kuv lub khauj khaum taub hau yuav tawg ua ob sab li. Mob taub hau heev ua rau kua muag los. Ces nws txawm nyooj laws tias, “Koj yuav mag tsim txom yog tias koj tsis hais lus, thiab yog koj tsis hais lus tom qab ntawd thiab, ces txhob xav tias yuav tawm tau los es tseem muaj txoj sia!” Kuv ntshai heev li. Kuv xav tias yog nws ntaus kuv li ntawd mus ntxiv, ces txawm tsis ua rau kuv lub khauj khaum taub hau tawg ua ob sab los, kuv yeej paub tseeb tias yuav raug mob xwb xwb li. Kuv txawm xav tias tsam kuv raug ntaus tuag ne. Kuv thiaj li thov Vajtswv ceev nrooj thov kom Nws tiv thaiv, thiab kuv txiav txim siab tias txawm yuav ntaus kuv li cas los xij, kuv yeej yuav tsis ntxeev siab rau Vajtswv li, yeej tsis muaj hnub ua ib tug Yudas li. Kiag tam sim ntawd ces nws lub xov tooj ntawm tes txawm nrov, thiab tom qab txais xov tooj lawm ces nws txawm tawm mus lawm. Lwm tus tub ceev xwm muab ib lub hnab los npog kuv taub hau, siv hlua khi ceev npawv rau, thiab tom qab ntawd muab kuv luag mus rau hauv ib chav uas tsis muaj dab tsi li. Muab hnab npog li ntawd ua rau kuv hnov kub thiab vaum. Kuv tsis paub tias yuav ntev npaum li cas ua ntej lawv yuav coj kuv mus rau sau theem tsev ob. Ib tug thawj coj fab Saib Xyuas Kev Ruaj Ntseg Hauv Xeev lub xeem hu ua Koo tom hniav nkawv hem kuv tias: “Peb yuav rau txim rau koj 10 lub xyoos vim rau qhov ntseeg Vajtswv Tus Uas Muaj Hwj Chim Loj Kawg Nkaus. Qhia txhua yam uas koj paub rau peb kiag tam sim no, los sis tsis yog li ces yeej tsis muaj leej twg yuav pab tau koj li!” Nws kuj hais tias nws mam ua kom kuv qhov chaw ua hauj lwm ncua kuv cov nqi dag zog thiab. Vim tias kuv tsis hais lus, nws thiaj li hais kom lwm tus mus tshawb tej ntaub ntawv teev tseg txog qhov kev ntes kuv yav tag los. Qhov ntawd ua rau xeeb txob tshaj, vim hais tias kuv twb raug ntes nyob rau xyoo 2003 lawm vim qhov tshaj tawm txoj moo zoo, thiab raug kaw ntev txog tsib lub hlis. Yog lawv nrhiav pom kuv daim ntawv teev tseg, ntshe kuv yuav raug lub txim hnyav dua xwb xwb li. Thaum kawg lawv nrhiav tsis tau ib yam dab tsi li—kuv thiaj li paub tias qhov ntawd yog Vajtswv txoj kev tiv thaiv. Kuv ua Nws tsaug ntsiag to.

Tom qab dhau ib tag hmo lawm ces tub ceev xwm thiaj li coj kuv mus kaw rau ntawm ib lub tsev, uas ib tug tub ceev xwm zov tsev kaw neeg txawm hais kom ob peb tug neeg raug txim los hle kuv tej ris tsho cia liab qab ploog, hais kom kuv ncab tes ncaj ncaj, tom qab ntawd kom zaum khwj ywb peb zaug. Lawv kuj muab tag nrho kuv cov ris tsho pov rau sab nraum chav kaw neeg, thiab thaum kuv pom lawv haj tseem muab tag nrho kuv tej ris luv hnav tuaj sab hauv pov tseg thiab, ces kuv thiaj li maj nroos rub tej ntawd rov qab thiab muab hnav dua. Qhov zaum khwj ywb thiab sawv liab qab ploog, tig ntsia plaub lub koob yees duab nyob tim phab ntsa, ua rau kuv txaj muag tshaj plaws li. Tag kis sawv ntxov tom qab txhua tus neeg raug txim sawv tag lawm, qhov kuv ua tau ces rub daim pua txaj los npog kuv lub cev xwb. Ces txawm muaj ib tug neeg raug txim pov ris tsho los rau kuv thiab ntxhi tias, “Kav tsij hnav, tsuag tsuag.” Lwm tus qiv ris rau kuv. Kuv paub tias Vajtswv npaj qhov no tseg lawm—kuv mas zoo siab tshaj. Tom qab tag kis sawv ntxov ntawd, ib tug tub ceev xwm zov tsev kaw neeg thiaj li pov kuv cov ris tsho rov qab los rau hauv chav kaw neeg, tab tsis thaum kuv saib cov ris tsho ntawd, kuv pom tias tej swb thiab tej khawm ntawm kuv lub ris thiab lwm cov ris tsho raug muab txiav tawm tag lawm, yog li kuv thiaj li siv ib sab tes tuav kuv lub ris thiab ib sab tuav ntawm xub ntiag, ces taug kev khoov vos. Thaum pom kuv zoo li ntawd, lwm cov neeg raug txim luag kuv thiab txib kuv ua txhua yam, thiab ib txhia lom txwm hle kuv lub ris thiab hais txhua hom lus luam thuam. Thov Vajtswv thiaj li ua rau kuv nyob dhau hnub ntawd xwb.

Thaum tav su nyob rau hnub peb, tub ceev xwm tuaj coj kuv rov qab los nug dua. Lawv coj kuv mus rau hauv ib chav tsaus tsaus tsis muaj dab tsi li, uas kuv pom ib txoj hlua hlau siv tsim txom dai rau tim phab ntsa, thiab muaj tej tee ntshav tsuas thoob plaws ib puag ncig ntawm txoj hlua hlau ntawd. Nws txaus poob siab thiab txaus ntshai heev. Lawv muab kuv xauv tes ntxeev tis qaib, ces Yawg Hlob Yaj nrog rau Pawg Saib Xyuas Kev Ruaj Ntseg Hauv Lub Teb Chaws thiab ob peb tug tub ceev xwm txawm los vij kuv, saib kuv nruj npaum nkaus li cov hma uas tshaib tshaib plab. Yawg Hlob Yaj tau muab ob peb daim duab ntawm lwm cov viv ncaus rau kuv saib seb puas paub thiab nws nug kuv tias muab pawg ntseeg cov nyiaj khaw cia rau qhov twg lawm. Nws kuj hem kuv nyaum kawg tias, “Cia li hais lus! Yog koj tsis hais lus, ces peb yuav ntaus koj kom tuag!” Kuv xav tias txawm lawv ua li ntawd los xij, kuv yeej tseem tsis yog ib tug Yudas. Ib tug tub ceev xwm rog rog txawm hais tias, “Koj hais lus hnub no mas zoo dua! Yog koj tsis hais, kuv qhia rau koj tias, kuv lub nrig no nyiam nqaij kawg. Kuv kawm sib ntaus rau tim tsev kawm tub ceev xwm tau plaub lub xyoos thiab kuv tau kawm cob qhia tshwj xeeb txog kev ‘yuj rab rauj loj.’ Rab rauj no tho ib lub qho tshwj xeeb rau saum koj xwb pwg, thiab tho tib teg xwb, ces koj tej pob txha thiab tag nrho tej khoom hauv nruab nrog cev yuav puas ntsoog tag. Yog siv kuv lub nrig lawm, ces yeej tsis muaj ib tug neeg twg uas yuav tsis kam lees txim.” Nws yim ua tsiv ua nyaum zuj zus thaum nws hais lus. Tom qab ntawd Yawg Hlob Yaj txawm muab ib tsab ntawv saum toj sau ntawv liab tawm hauv nws lub hnab los, muab yoj mus los rau ntawm kuv ntsej muag thiab hais tias, “Qhov no yog ib tsab ntawv ceev zoo sau los ntawm Pawg Saib Xyuas Hauv Qhov Loj uas paub zoo txog Pawg Ntseeg ntawm Vajtswv Tus Uas Muaj Hwj Chim Loj Kawg Nkaus. Thaum peb ntes tau nej cov neeg peb yuav muab nej coj mus rau ntawm lub qhov rooj tuag, tsis muaj ib tug twg yuav txhawj tsam nej tuag li! Tom qab peb ntaus nej tuag lawm, peb tsuas thauj nej lub cev mus rau pem roob xwb ces yeej tsis muaj ib tug twg paub txog qhov no li. Peb muaj txhua hom cuab yeej tsim txom los tswj xyuas cov ntseeg zoo li nej. Muaj ib hom hlua hlau nplawm uas koj muab tsau tau rau hauv dej txias khov, thiab txhua zaus uas koj nplawm ib tug neeg twg ces lub cev nqaij daim tawv tshuav rho tawm los xwb. Tus neeg ntawd kawg pob txha tawm xwb.” Thaum hnov tag nrho tej uas txaus ntshai no lawm ua rau kuv lub siab ntshai rwg, thiab qhov nyob rawv hauv kuv lub siab ces yog qhov tias yog lawv siv tej cuab yeej tsim txom rau kuv, ces qhov ntawd muaj feem yuav tua kuv tau. Thiab yog lawv coj kuv lub cev mus pov pem roob ces kuv yuav mag tej dev qus noj xwb. Ntshe yuav yog ib qho xwm txheej zoo li ntawd ntag! Txaus ntshai kawg, kuv thiaj li maj nroos thov Vajtswv tias, “Vajtswv, kuv ntshai heev tsam tub ceev xwm siv tej cuab yeej no tsim txom kuv. Kuv txoj kev ntseeg tsis tau ruaj khov txaus—thov tiv thaiv kuv thiab muab txoj kev ntseeg thiab lub zog rau kuv es txawm lawv yuav ua li cas rau kuv los xij, txawm tias kuv yuav tsum muab kuv txoj sia rau qhov ntawd los xij, kuv tuaj yeem ua tim khawv tau.” Thaum pom tias kuv tseem tsis hais lus li, Yawg Hlob Yaj thiaj li tsa hlo nws txhais tes rau saum kuv taub hau thiab npuaj kuv kaum tawm zaus los sis ntau lwm, rau sab laug thiab sab xis. Kuv sawv tsis taus. Kuv qis qhov muag thiab kua muag ntws sis rau ntawm kuv ntsej muag. Muaj ib tug sawv ntawm kuv sab laug uas hais tias nws yuav xua “rab rauj loj” ntaus kuv lub xwb pwg kom tag nrho nws lub zog. Tib pliag xwb, hnov zoo li tag nrho kuv tej pob txha dam tag lawm, thiab nws ke suav ke ntaus kuv mus ntxiv. Tus tub ceev xwm nyob ntawm kuv sab xis ncaws kuv hauv caug sab xis ces ua rau kuv vau rau hauv plag tsev. Nkawv nthe kom kuv sawv los. Vim tseem xauv kuv ob txhais tes ntxeev tis qaib, kuv thiaj li sawv nyuaj, thiab ua rau mob. Nkawv rov ncaws kuv ntog dua. Tus tub ceev xwm siv “rab rauj loj” ntaus kuv lub xwb pwg zaum tas zaum thiab, puav leej xav paub tias, “Leej twg yog cov uas koj tau sib txuas lus nrog? Pawg ntseeg tej nyiaj nyob qhov twg? Qhia kuv tam sim no, los sis tsis li ces koj kawg tuag!” Vim npau taws, kuv thiaj li nug lawv tias, “Kuv ua txhaum txoj kev cai twg, es nej thiaj li ntaus kuv li no? Tsis yog txoj kev cai lij choj hais tias peb muaj kev ntseeg tau ywj pheej lod?” Yawg hlob txawm hais nyaum ntsuav tias, “Txaus lawm! Yog koj tsis xav tuag rau ntawm no, ces hais lus mas! Pawg ntseeg tej nyiaj nyob qhov twg? Qhov peb xav tau ces yog cov nyiaj xwb. Peb yuav ntaus kom koj tuag rau hnub no yog koj tsis qhia peb!” Thaum hais li no nws thiaj li ntaus kuv taub hau zaum tas zaum thiab, txhua nrig mas hnyav zuj zus. Kuv raug lawv ncaws, raug xuas nrig ntaus vau rau hauv plag tsev zaum tas zaum tuaj, thiab zaum tas zaum thiab kom sawv los. Kuv tsis paub tias lawv ntaus kuv ntev npaum li cas. Kuv tsuas hnov nrov ziv rau ntawm kuv taub hau thiab pob ntseg, thiab ua rau kuv rua tsis taus qhov muag lawm, thiab hnov zoo li tej ntawd yuav tawg tawm los ntawm kuv taub hau. Kuv lub ntsej muag mas o heev ua rau loog tag thiab muaj ntshav tawm los ntawm kuv tej kaum ncauj. Hnov zoo li kuv lub siab cia li yuav tawm ntawm kuv hauv siab los, thiab hnov kuv tej pob txha xwb pwg ntsoog tag. Kuv ntog rau hauv plag tsev txav tsis tau li lawm thiab mob thoob plaws kuv lub cev, cuag nkaus li nws piam sij ua tej daim du lug. Kuv thiaj li thov Vajtswv rau Nws txoj kev tiv thaiv tsis tseg, thiab tsuas xav ntsoov tib yam rau hauv kuv lub siab xwb tias: Txawm kuv tuag lawm los xij, kuv yuav tsis ua ib tug Yudas li!

Thaum pom tias kuv tsis hais ib lo lus li, yawg hlob thiaj li tas zog haub ntxias tias: “Peb tab tom nug koj cov lus nug no, tab sis qhov tseeb, peb twb paub cov lus teb lawm. Peb tsuas txheeb xyuas xwb. Lwm tus twb muab koj muag tawm lawm, yog li cia li lees txais qhov lwm tus liam puas tsim nyog mas? Muaj hnub nyoog li koj no xwb, vim li cas koj yuav tiv kom dhau tag nrho txoj kev txom nyem no? Puas muaj ib qho tim tsum tiag tiag mas? Qhov ntawd tsuas yog qee yam kev ntseeg xwb puas yog? Qhia qhov koj paub rau peb ces peb yuav tso koj mus kiag xwb. Qhov ntawd yuav pab ua rau koj dim ntawm txoj kev txom nyem.” Tom qab ntawd lawv hais qee yam lus thuam mom. Thaum hnov lawv tej lus qias neeg thiab pom lawv lub ntsej muag phem ntawd ua rau kuv npau taws heev. Yuav kom ntes tau ntau tus nus thiab viv ncaus thiab txeeb tau Vajtswv tej khoom fij, ces lawv thiaj li hloov tej tswv yim los dag kuv. Lawv mas txaus ntshai thiab phem tshaj! Txawm tias lwm tus tau muab kuv muag tawm lawm los sis tsis tau muag los xij, kuv tseem sawv khov kho, thiab yeej yuav tsis ntxeev siab rau Vajtswv los sis lwm cov nus thiab viv ncaus hlo li. Tom qab ntawd, yawg hlob siv kuv tus ntxhais los hem kuv. Lam ua txuj luag nyav tig los saib kuv, nws hais tias, “Tsis yog koj tus ntxhais nyob hauv Pej Ceeb lod? Peb yuav ntes nws thiab tsim txom nws rau ntawm koj xub ntiag ntag hos. Yog koj tsis hais lus, ces peb yuav muab neb coj mus kaw rau hauv tsev kaw neeg txiv neej thiab cia cov txiv neej ntawd tsim txom kom neb tuag mus. Kuv tsuas dig ntiv tes xwb ces yeej ua tau li ntawd lawm, thiab kuv ua li kuv hais.” Kuv paub tias Pawg Tsoom Fwv Koom Tsham mas ua dab tsi los yeej ua tau, thiab kuv tsis ntshai tsam raug ntaus tuag, tab sis kuv tiv tsis taus qhov yuav muab kuv tus ntxhais thiab kuv coj mus pov rau hauv tsev kaw neeg uas yog kaw txiv neej xwb. Ntshe kuv yeem cia ntaus kom tuag zoo dua qhov yuav raug ua puas li ntawd. Qhov no yog ib qho kev xav txaus ntshai tiag tiag li rau kuv, yog li kuv thiaj li maj nroos thov Vajtswv tias, “Vajtswv, thov saib xyuas kuv lub siab, thiab txawm tias lawv yuav tsim txom kuv li cas los sis ua rau kuv txaj muag li cas los xij, kuv yeej ua tsis tau ib tug Yudas li.” Tom qab kuv lo lus thov lawm, kuv xav txog qhov Daniyee raug pov mus rau hauv lub qhov tsov ntxhuav. Tsov ntxhuav tsis noj Daniyee vim hais tias Vajtswv tsis tso cai cia lawv ua kom nws raug mob. Kuv yuav tsum tau muaj kev ntseeg Vajtswv. Cov tub ceev xwm phem ntawd los yeej nyob hauv Vajtswv ob txhais tes thiab, yog li lawv ua tsis tau dab tsi rau kuv li yog Vajtswv tsis tso cai cia ua li ntawd. Vim kuv tseem tsis hais lus li thiab, ib tug ntawm cov tub ceev xwm thiaj li nthe npau taws ntsuav rau kuv tias, “Peb yuav ntaus koj kom tuag rau hnub no yog koj tsis hais lus!” Thaum hais li no lawm, nws thaub qab ob peb ruam, ua qhov muag qauj les xua tib nrig ncaj qha los rau kuv, thiab tib nrig rau ntawm kuv hauv siab kiag. Kuv khoov ntshis rau hauv piam teb thiab ua tsis taus pa ib pliag. Hnov zoo li tag nrho kuv ib ce sab hauv thiab tej pob txha mas ntsoog tag nrho lawm, thiab hnov zoo li kuv lub siab raug ciaj rub tawm lawm. Kuv tsis muaj cuab kav sib zog ua pa vim tias mob mob. Kuv lub taub hau nyob hauv plag tsev thiab kuv tawm fws thoob plaws. Kuv xav quaj tawm tab sis kuv quaj tsis tau—nws hnov zoo li muaj dab tsi daig kuv caj pas lawm. Kuv xav quaj, tab sis kua muag tsis los. Nyob rau lub sij hawm ntawd, kuv hnov zoo li txoj kev tuag ntshe yuav zoo dua ntawd. Kuv qaug zog tag, hnov zoo li kuv lub cev twb mus txog qhov kuv tiv tsis taus lawm, thiab xav rau kuv tus kheej tias yog lawv pheej tseem ntaus kuv zoo li ntawd mus ntxiv, ces ntshe cia li tuag mus zoo dua li nyob mus ntxiv. Tom qab ntawd lawv tsum tsis nug thiab tsis tsim txom kuv lawm, ces kuv thiaj li dim plaws lawm. Kuv xav tias yuav qhia qee yam me me rau lawv no, tab sis tom qab ntawd kuv paub tias yog kuv muab tej ntawd qhia rau lawv li ib yag tes, ces lawv xav tau ib mais, thiab haj tseem yuav pib nug nyaum ntsuav rau kuv ntxiv thiab. Tsis tau: Txawm tias yuav zoo li cas los xij, kuv muab cov nus thiab cov viv ncaus muag tawm tsis tau thiab tsis cia lawv ntsib hom kev tsim txom ntawd. Kuv thiaj li thov Vajtswv txoj kev tiv thaiv ntsiag tos. Kiag tam sim ntawd kuv thiaj li nkag siab meej meej txog qee yam ntawm Vajtswv cov lus tias: “Rau cov uas yeej tsis muaj lub siab ncaj ib qho me me rau Kuv rau lub sij hawm muaj kev txom nyem loj no hlo li, Kuv yuav tsis ua siab hlub tshua ntxiv lawm, rau qhov Kuv txoj kev hlub tshua no tsuas rub tau ntev npaum li no xwb. Ntxiv ntawd mus, Kuv yeej tsis muaj kev nyiam ib qho hlo li rau cov uas tau ntxeev siab ib zaug rau Kuv lawm, Kuv haj yam tsis nyiam ua ke nrog cov uas tau muab lawv cov phooj ywg txoj kev ntshaw muag tawm. Qhov no yog Kuv tus moj yam, tsis hais tus neeg ntawd yuav yog leej twg los xij” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Npaj Txoj Kev Ua Zoo Kom Txaus Nkaus rau Koj Txoj Hau Kev Kawg). Vajtswv cov lus hais kom kuv nco rau lub sij hawm uas yog tias Nws tus moj yam ncaj ncees yuav zam tsis tau rau tib neeg qhov kev txhaum. Vajtswv tsis nyiam, Nws ntxub cov uas ntxeev siab rau Nws, thiab tias hom neeg ntawd yuav raug rau txim rau lub cev thiab tus ntsuj mus ib txhis. Los ntawm kuv txoj kev ntseeg tau ntau xyoo, kuv tau xyiv fab hlo rau Vajtswv txoj kev hlub thiab kev txhawb ntawm Nws cov lus, thiab tam sim no qhov ntawd yog lub sij hawm rau kuv los ua tim khawv rau Vajtswv lawm. Kev ntxeev siab rau Nws tsis yog kuv txoj kev tsis txawj xav es kom kuv thiaj li tuav rawv tau rau lub neej ntshaw luag tug xwb lod? Kuv mas tsis tsim nyog ua tib neeg li! Yog li ntawd kuv thiaj li cog lus tias txawm yuav yog kuv txoj kev tuag los xij, kuv yuav tsis rais los ua ib tug Yudas li. Kuv yuav tsis ntxeev siab rau Vajtswv, tab sis yuav hais lus tim khawv xwb xwb li!

Kiag thaum ntawd tus yawg hlob uas txaus ntshai ntawd txawm ncaws kuv thiab nthe tias, “Sawv los! Koj txhob ua txuj tuag ov, niag ntsej muag!” Tab sis kuv yeej tsis muaj lub zog txhawb kuv tus kheej sawv tau li lawm. Ob peb tug tub ceev xwm txawm tuav kuv sawv. Kuv tsis meej pem li, kuv lub siab khoob lug thiab kuv lub taub hau kiv pes lees; kuv lub hauv siab mob heev kuv ntshai tsam ua tsis tau pa, thiab kuv pom txhua qhov chaw ua ob qho lawm. Lawv tseem tas zog nug kuv thiab. Ua rau kuv npau taws heev ces kuv thiaj li siv tag nrho kuv lub zog hais tias, “Ces kuv yuav tuag! Cia li ntaus kuv kom tuag kiag mus las mas!” Ua rau lawv yoob tag, txhua tus tig ntsia kuv twj ywm. Kuv paub tias Vajtswv muab lub zog thiab kev muaj cuab kav rau kuv lawm, ces kuv thiaj li ua Nws tsaug nyob hauv kuv lub siab. Thaum chiv thawj mas lawv yeej npaj pauv hloov tej kev tsim txom los nug kuv, tab sis tom qab 5 teev yav tsaus ntuj, ces Feem Saib Xyuas Kev Ruaj Ntseg Hauv Xeev hu xov tooj tuaj qhia rau lawv kom lawv hais qhia txog qhov nug tau los ntawm lawv, yog li lawv thiaj li tso tseg tsis nug lawm. Ib rau tim phab ntsa, kuv zaum ib ce tuag tag rau hauv piam teb, quaj hu yam nco txiaj ntsig heev rau Vajtswv. Nws yog Vajtswv txoj kev pov hwm kuv uas tso cai cia kuv peem kom dhau, tsis li ntawd ces yog muaj kuv lub cev xwb, kuv kawg tuag ua ntej los ntev lawm. Tom qab ntawd, cov tub ceev xwm ntawd thiaj li tawm mus lawm, tsuas tshuav tus uas muaj “rab rauj loj” lawm xwb. Nws saib kuv thiab hais tias, “Niam ntxawm, kuv yeej tsis tau ntaus ib tug poj niam ua ntej los li. Koj yog thawj tug, thiab tsis muaj ib tug txiv neej loj, muaj zog zis yuav thev taus kuv lub nrig txog 30 zaus li. Koj puas paub tias kuv ntaus koj pes tsawg teg lawm? Twb tshaj 30 zaus lawm. Kuv yeej tsis xav tias ib tug poj niam hnub nyoog li koj yuav muaj peev xwm thev taus qhov ntawd li, thiab koj yeej tsis hais ib lo lus txog qhov peb xav paub li. Kuv ua hauj lwm nrog tub ceev xwm fab kev ua txhaum cai los tau kaum tawm lub xyoos lawm, thiab kuv yeej tsis tau nug ib kis zoo li koj no li.” Thaum kuv hnov li ntawd, kuv thiaj li ua tau Vajtswv tsaug lawm. Qhov tsis raug ntaus kom tuag yog Vajtswv txoj kev tiv thaiv tag nrho.

Tom qab 7 teev tsaus ntuj hmo ntawd, lawv coj kuv rov qab mus rau tim lub tsev kaw neeg thiab ceeb toom rau kuv tias, “Thaum koj rov qab mus rau tid lawm koj yuav tsum tsis txhob qhia ib tug twg li tias peb tau ntaus koj lawm nawb. Yog koj qhia, ces lwm zaus peb nug koj haj tseem yuav phem dua no.” Thaum tseem tab tom hais lus, lawv muab ib txoj phuam los so tej plua av lo ntawm kuv lub ris tawm, kho kuv tej ris tsho thiab plaub hau kom ncaj, thiab tom qab ntawd ces siv ib daim phuam ntub dej los so kuv ntsej muag kom huv si. Tom qab coj kuv rov qab los rau hauv chav kaw neeg lawm, lawv dag rau cov neeg zov, hais tias kuv tsis xis nyob vim kuv muaj kab mob plawv huam tuaj. Kuv mas npau taws tshaj. Lawv mas ntxim ntxub tiag tiag thiab tsis paub txaj muag li! Thaum rov qab los rau hauv chav kaw neeg lawm kuv pw rau ntawm kuv lub chaw, txav tsis tau li lawm. Kuv tej tawv taub hau mas muag tag kuv tsis muaj cuab kav tuav qhov ntawd li thiab kuv sab pob ntseg laug cia li tsis hnov dab tsi li lawm. Kuv lub qhov ncauj o rua yuav luag tsis taus thiab kuv sab plhu doog thiab ntsuab tag. Tag nrho kuv lub cev mas doog ntshav tag, thoob plaws rau kuv ob sab ceg, thiab yeej muaj cov cim nrig ntaus siav rau ntawm kuv hauv siab. Kuv sab xwb pwg laug txav lawm, yog li kuv yuav tsum siv kuv sab tes xis pab. Tom qab ntawd tau ua ib qho kev tshuaj xyuas mas pom tias muaj ntau tus pob txha hauv kuv hauv siab dam lawm thiab kuj ua rau kuv tus pob txha qaj qaum tsis ncaj lawm thiab. Kuv ntshai pw ncaj ncaj thiab tshwj xeeb yog sawv los zaum; ua pa loj ces ua rau kuv lub plawv thiab lub hauv siab mob cuag li ib daim iav chob. Maj mam ua pa ces thiaj li txo tau tus mob me ntsis. Thaum tus kws kho mob rau cov neeg raug txim pom kuv muaj tus mob ntawd, nws thiaj li hais rau cov neeg raug txim ntawd kom tshuaj xyuas kuv lub qhov ntswg ib zaug rau ob teev twg rau yav hmo ntuj, saib seb kuv puas tseem ua pa. Thaum cov tub ceev xwm zov tsev kaw neeg tuaj ua hauj lwm txhua tag kis sawv ntxov, lawv xub xub nug tias kuv puas tau tuag los sis tsis tau. Kuv tsis noj los sis tsis haus dej los tau ob hnub lawm thiab txhua tus neeg nyob hauv chav kaw neeg xav tias tsis muaj hnub kuv yuav ciaj sia lawm. Kuv hnov cov neeg raug txim hais lus ntsiag to tau ob peb hmo lawm. Muaj ib tug ntawm lawv cov ntawd txawm hais tias, “Lawv yeej tsis kho nws li lawm los sis haj tseem tsis hais qhia rau nws tsev neeg li thiab. Kuv xav mas nws nyob ntawm no tos tuag lawm xwb lau.” Lwm tus hais tias, “Tus tub ceev xwm zov tsev kaw neeg hais tias cov neeg tua neeg, cov neeg ua hlawv vaj tse ub no, cov niam ntiav txiv ntiav mas puav leej them nyiaj lawv thiaj li raug tso tawm, qhov ntawd tsuas yog cov ntseeg Vajtswv Tus Uas Muaj Hwj Chim Loj Kawg Nkaus xwb es lawv txawm tawm tsis tau li thiab. Nw tsuas muaj txoj sia nyob li ob peb hnub lawm xwb.” Nws yog ib qho phem heev thaum hnov lawv hais tej yam zoo li ntawd. “Puas yog kuv cia li yuav tuag rau ntawm no li no tiag tiag mas? Kuv tseem tsis tau pom Vajtswv hnub uas muaj yeeb koob li thiab. Yog kuv tuag rau hauv lub chaw no lawm, cov nus thiab cov viv ncaus yuav tsis paub, thiab kuv tus ntxhais los yuav tsis paub ib yam nkaus thiab.” Qhov xav txog kuv tus ntxhais ntawd ua rau kuv tu siab, thiab kuv teev tsis tau lub kua muag li. Nyob rau ntawm lub qhov rooj tuag, kuv tsis muaj ib tse neeg, ib tug nus thiab viv ncaus nyob ntawm kuv ib sab li. Yim ua rau kuv mob ntxiv thaum kuv xav txog qhov ntawd, thiab qhov kuv ua tau ces yog thov Vajtswv xwb. Tom qab ntawd, kuv hnov ob tug neeg raug txim ntawd hais tias, “Yog nws tuag rau ntawm no tiag tiag ne yuav zoo li cas?” Lwm tus thiaj li teb tias, “Muab daim pam pua txaj uas qias neeg tshaj thiab nthuag tshaj ntawd kauv nws, ces coj nws mus faus rau hauv ib lub qhov.” Thaum hnov li no ua rau kuv lub siab qaug zog tag. Ua rau kuv lub cev tiv tsis taus tej ntawd mus ntxiv lawm, nrog rau txoj kev xav uas tu siab tshaj thiab tag kev cia siab tshaj rau qhov ntawd lawm, haj tseem ua rau kuv mob plawv ntxiv tuaj xwb—Kuv xav tias kev tuag yuav zoo dua qhov ntawd lawm. Kuv tsis paub tias yuav hais dab tsi rau Vajtswv, yog li kuv tsuas maj nroos thov Vajtswv tias, “Vajtswv, cawm kuv lau! Thov pab kuv os! Muab txoj kev ntseeg thiab lub zog rau kuv kom kuv thiaj li kov yeej qhov no. Au Vajtswv, kuv tsis paub tias yuav muaj dab tsi tshwm sim tom qab qhov no lawm, tab sis kuv paub tias kuv txoj sia thiab txoj kev tuag yog nyob hauv koj ob txhais tes lawm.” Kiag thaum ntawd, txawm muaj ib nqe lus los ntawm Vajtswv cov lus los tshwm tuaj rau hauv kuv lub siab tias: “Nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Kuv raug txhawb zoo heev li, thiab hnov zoo li Vajtswv Tus Kheej nyob ntawm kuv ib sab, nplij kuv siab thiab txhawb kuv. Kuv kuj xav txog tag nrho cov neeg dawb huv los ntawm txhua tiam uas raug kev txom nyem vim tshaj tawm Vajtswv txoj moo zoo, thiab niaj hnub nim no kiag, los yeej tseem muaj coob tus nus thiab viv ncaus yeem muab lawv txoj sia los tshaj tawm Vajtswv lub nceeg vaj txoj moo zoo. Lawv txoj kev tuag muaj txiaj ntsig thiab muaj nuj nqis, thiab Vajtswv yeej nco ntsoov lawv cia. Kuv raug ntes vim kev ntseeg Vajtswv thiab ua kuv tes dej num. Txawm tias kuv raug tsim txom tuag kiag los xij, qhov ntawd yuav yog txhawm rau txoj kev ncaj ncees thiab yuav yog ib lub yeeb koob. Txawm tias kuv muaj txoj sia nyob los sis tuag rau hnub ntawd los xij, kuv yuav ua tim khawv rau Vajtswv, thiab txawm tias kuv tuag lawm los xij, kuv txoj sia yuav tsis tag dawb. Qhov kev xav no ua rau kuv hnov kaj siab heev, thiab tsis kho siab zim los sis tag kev cia siab mus ntxiv lawm. Kuv hais lwm cov lus thov tias: “Vajtswv, tus duab ntawm txoj kev tuag tshwm sim rau ntawm kuv xub ntiag. Yog tias qhov ntawd tshwm sim los, kuv twb npaj txhij zwm rau Koj txoj kev cai thiab tej kev npaj tseg lawm. Yog kuv ua lub neej dhau qhov no lawm, ces kuv tseem yuav ua tes dej num ntawm ib tug raug tsim tawm los kom Koj txaus siab. Kuv yuav muab tag nrho kuv tus kheej cob rau Koj thiab fij kom mus txog thaum kawg.” Kuv tau txais ib qho kev kaj siab lug tom qab qhov lus thov ntawd. Kuv thiaj li tsis raug tej kev xav tuag tswj mus ntxiv lawm thiab ua rau kuv tus mob ntaug lawm thiab. Kuv mus dhau hnub ib li ntawd, ces hnub ob, thiab tom qab ntawd yog hnub peb…. Kuv tseem tsis tau tuag! Kuv paub ti nkaus kuv tej pob txha tias qhov no yog Vajtswv txoj hmoov hlub thiab kev tiv thaiv tag nrho.

Cov neeg tuaj ntawm Feem Saib Xyaus Kev Ruaj Ntseg Hauv Lub Teb Chaw tuaj tau los nug kuv ntxiv tom qab peb hnub ntawd lawm. Kuv hnov tus tub ceev xwm saib xyuas tsev kaw neeg hu kuv lub npe ua ntej qhib lub qhov rooj ntawm chav kaw neeg. Thaum ntawd kuv tus mob mas tsis zoo kiag li, thiab kiag thaum lwm cov neeg raug txim hnov li ntawd lawm, lawv puav leej pib qw zom zaws, sawv thiab qw hais tej lus zoo li, “Nws nyob rau qhov xwm txheej no, es nej tseem yuav nug nws ntxiv thiab lod? Nej mas phem tiag tiag li nawb. Coj nws mus nug thaum nws tseem raug ntaus zoo li qhov xwm txheej no lod?” Muaj cov neeg laus 60 leej nyob tod, thiab ntau dua li ib nrab ntawm lawv cov ntawd hais lus sawv kuv cev yam npau taws ntsuav. Ces ua rau chav kaw neeg ntawd ntxhov quas niab. Thaum pom li no lawm, ces tub ceev xwm thiaj li txiav txim siab tsis nug kuv lawm. Kuv zoo siab mus txog rau qhov kua muag ntws, ua tsaug ntau ntau rau Vajtswv txoj kev tiv thaiv. Tom qab ntawd tus thawj coj ntawm cov neeg raug txim tseem hais tias, “Kuv twb tuaj nyob rau ntawm no tau ob lub xyoos lawm thiab kuv yeej tsis tau pom dua ib yam zoo li ntawd li.” Kuv paub tias Vajtswv tab tom ua hauj lwm txhawb rau tej ntawd los saib xyuas kuv, npaj rau cov tib neeg, tej xwm txheej, thiab tej yam los pab kuv thiab ua rau kuv zam dhau qhov kev tawm tsam ntawd. Kuv ua tsaug rau Vajtswv!

Tau ib pliag xwb, kuv txawm hnov mob thoob plaws ib ce ua rau kuv pw tsis tsaug zog rau yav hmo ntuj li, yog li kuv txawm xav txog Vajtswv cov lus. Thaum kuv xav txog ib zaj nkauj hais txog Petus txoj kev thov Vajtswv thaum nws nyob rau theem uas tsis muaj zog tshaj plaws li lawm: “Au Vajtswv! Tsis hais lub sij hawm twg los sis qhov chaw twg li, Koj yeej paub hais tias kuv yeej nco ntsoov Koj. Tsis hais lub sij hawm twg los sis qhov chaw twg li, Koj yeej paub hais tias kuv xav hlub Koj, tab sis kuv lub meej mom me dhau heev lawm, kuv qaug zog dhau heev lawm thiab tsis muaj ib qho hwj chim li, kuv txoj kev hlub koj mas tsawg dhau heev lawm, thiab kuv txoj kev siab ncaj rau Koj mas me dhau heev lawm. Muab piv rau Koj txoj kev hlub, kuv ces tsis tsim nyog ua neej nyob li. Kuv tsuas xav kom kuv lub neej tsis txhob nkim pov tseg dawb dawb xwb, thiab kom kuv tsis yog pauj kom tau Koj txoj kev hlub nkaus xwb, tab sis, tshaj qhov ntawd, ces kuv muab tau tag nrho txhua yam kuv muaj cob fim rau Koj. Yog hais tias kuv ua tau haum Koj siab, ces raws li ib tug uas raug tsim tawm los, kuv yuav muaj kev kaj siab, thiab yuav tsis thov dab tsi ntxiv lawm. Txawm hais tias kuv qaug zog thiab tsis muaj hwj chim tam sim no, los kuv yuav tsis nov qab Koj tej kev cob qhia, thiab kuv yuav tsis nov qab Koj txoj kev hlub” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Zaj nkauj ntawd ua rau kuv zoo siab tshaj. Thoob plaws txoj kev ntsib kev pom ntawm qhov raug tsim txom yam tsis muaj kev hlub tshua kiag ntawd, thaum twg kuv thov Vajtswv thiab vam khom rau Vajtswv thaum kuv hnov qaug zog thiab mob, Nws yeej qhia thiab coj kuv kev los ntawm Nws cov lus thiab qhib ib txoj kev rau kuv. Vajtswv nyob ntawm kuv ib sab, saib ntsoov thiab tiv thai kuv. Thaum tau ntsib tau pom qhov xwm txheej zoo li ntawd lawm ua rau kuv pom Vajtswv txoj kev muaj hwj chim los kawg nkaus thiab txoj kev cai, thiab tom qab ntawd kuv txoj kev ntseeg Vajtswv thiaj li loj hlob tuaj. Kuv kuj pom tus zaj loj liab ploog lub ntsiab phem ntawm kev tawm tsam Vajtswv thiab kev rhuav tshem tib neeg tseeb tseeb—kuv tsis kam lees txais yuav thiab tso tej ntawd tseg tsis muaj rau hauv lub siab lawm, thiab tig kuv lub siab los cuag Vajtswv. Vajtswv cawm kuv los ntawm Ntxwgnyoog lub zog rau hauv qhov muaj qab hau zoo li ntawd. Ua tsaug ntau ntau rau Vajtswv, kuv hais lus thov tias txawm kuv yuav muaj sia nyob los sis tuag los xij, kuv yeej npaj txhij los muab tag nrho kuv txoj sia rau Nws thiab lees txais qhov uas Nws tau npaj tseg lawm. Txawm tias qhov ntawd yog kuv txoj kev tuag los xij, kuv yuav caum Vajtswv qab kom mus txog thaum kawg kiag! Txij thaum ntawd mus rau yav tom ntej, kuv hnov hauv kuv lub siab tias kuv yeej ua tau yam tsis muaj ib yam dab tsi thaiv kev li—qhov kuv ua tsis tau ces yog ncaim ntawm Vajtswv mus. Thaum kuv xav txog Vajtswv cov lus, kuv hnov tau tias kuv lub siab nyob ze zog rau ntawm Nws lawm. Nyob hauv Vajtswv txoj kev saib xyuas thiab kev tiv thaiv, qhov o o ib ncig rau ntawm kuv qhov raug mob ntawd zoo sai heev, kuv lub plawv tsis tshua mob lawm thaum kuv ua pa, thiab tom qab ib lim tiam lawm ces kuv muaj peev xwm tuav phab ntsa txheem kuv tus kheej taug kev mus los tau lawm. Txhua tus nyob hauv tsev laj cuj mas ceeb tag li, hais tias, “Saib ntawd mas, nws yuav tsum ntseeg tus tseem Vajtswv!” Kuv puav leej paub tias tag nrho qhov ntawd yog vim Vajtswv lub hwj chim loj xwb, thiab tias Nws tau coj kuv rov qab los ntawm txoj kev tuag los thiab muab txoj sia rau kuv zaum ob. Kuv ua tsaug tiag tiag rau Vajtswv txoj kev cawm dim rau kuv!

Tom qab plaub lub hlis uas raug kaw rau ntawm lub tsev kaw neeg lawm, Pawg Tsoom Fwv Koom Tsham thiaj li phua lub txim rau kuv rov qab los kawm dua ib lub xyoos ntxiv vim siv lub zog tab kaum rau txoj cai. Thaum tso kuv tawm lawm, tub ceev xwm tau ceeb toom kuv tias, “Yog koj raug ntes vim ua tej hauj lwm fab kev ntseeg ntxiv, ces koj yuav raug ib lub txim hnyav.” Tab sis kuv tsis raug lawv ntes ntxiv lawm. Kuv thov Vajtswv rau hauv kuv lub siab tias, “Txawm kuv yuav ntsib kev caij tsuj los sis kev nyuaj ntau npaum li cas tom qab qhov no lawm los xij, kuv yuav caum Koj qab mus ib txhis li!”