39. Kuv Rau Siab Ntso Rau Txoj Kev No
Ob peb lub xyoos dhau los lawm, kuv raug tub ceev xwm ntes vim tshaj tawm txoj moo zoo. Pawg Tsoom Fwv Koom Tsham phua lub txim rau kuv peb lub xyoos vim “kev teeb tsa thiab kev siv ib lub koom haum fab kev ntseeg cuav los rhuav tshem txoj kev yuam siv txoj kev cai lij choj.” Tom qab kuv tawm txim los lawm, thaum kawg kuv thiaj li xav tias kuv yuav rov qab mus koom tej kev sib txoos ua ke dua thiab rov qab ua kuv tej dej num dua. Kuv tsis xav tias tub ceev xwm yuav saib ntsoov kuv mus ntxiv lawm thiab txwv tsis pub kuv muaj kev ywj pheej. Thaum kuv niam thiab kuv txiv coj kuv mus rau tim tub ceev xwm lub tsev ua hauj lwm mus tso npe nyob rau kuv, tus tub ceev xwm uas saib xyuas kuv txawm hais lus hnyav heev rau kuv tias, “Koj yuav tsum hais qhia rau kuv yog koj xav tawm ntawm ib cheeb tsam no mus, thiab txwv tsis pub koj tawm ntawm lub nroog no mus los sis txwv tsis pub koj tawm mus txawv teb chaws ntev txog tsib lub xyoos. Koj kuj xyaum ua tsis tau raws koj txoj kev ntseeg los sis koom tsis tau tej kev sib txoos ua ke li thiab. Yog kuv paub tias koj tau mus sib txoos ua ke rau fab kev ntseeg lawm, ces kuv yuav coj koj rov qab mus kaw kiag tam sim ntawd. Thiab txhob xav tias koj yuav tawm tau!” Ntshai tsam kuv rov qab raug ntes dua, kuv niam thiab kuv txiv thiaj li hais kom kuv tus niam laus saib ntsoov kuv, kom kuv txhob nyeem Vajtswv cov lus los sis txhob hu rau ib tug nus los sis ib tug viv ncaus twg li. Kuv tus niam laus nrhiav tau ib txoj hauj lwm muag khoom rau kuv, thiab yog kuv rov qab los tsev lig ces nws yuav hu kuv thiab nug tias, “Koj nyob qhov twg? Koj tab tom ua dab tsi?” Muaj ib zaug, thaum kuv tab tom nyeem Vajtswv cov lus nyob hauv kuv lub thev nplem, kuv tus niam laus pom thiab nias kuv tias seb puas yog kuv tab tom nyeem Vajtswv cov lus, thiab haj tseem sim txeeb kuv lub thev nplem mus thiab. Kuv cia li hais tawm nthawv nthav tias kuv tab tom nyeem ib phau ntawv sau xwb, ces nws txawm cia kuv nyob ib leeg lawm. Tom qab ntawd, tsuas yog thaum nws tsaug zog lawm xwb kuv thiaj li mam nkaum hauv daim pam nyeem Vajtswv cov lus.
Muaj ib hnub, kuv tus niam laus pom Vajtswv ib co lus uas kuv tau theej tawm los thiab nug kuv tias, “Koj tseem muaj kev ntseeg thiab mus koom tej kev sib txoos ua ke thiab puas yog?” Kuv teb npau taws ntsuav tias, “Muaj kev ntseeg thiab pes hawm Vajtswv mas yog qhov yog thiab tsim nyog lawm. Tso kuv nawb!” Ces nws txawm maj nroos mus hu rau wb tus niam laus, tus uas npuaj kuv lub ntsej muag kiag thaum nws hla qhov rooj los, nthe kuv tias, “Koj tseem muaj cuab kav ntseeg thiab laiv yom? Txij thaum koj raug ntes mus kaw, Niam yeej tau quaj txhua txhua hnub. Nws lub qhov muag twb yuav luag dig lawm nas. Yog koj raug rov qab xa mus rau tid dua, sim xav seb niam yuav ua li cas no mas! Koj tso tus Vajtswv no tseg tsis tau thiab los yuav nws siab ib zaug tsis tau lod?” Thaum hnov nws hais li no ua rau yuav luag uv tsis taus, thiab kua muag ntws sis rau ntawm kuv ntsej muag. Kuv niam yeej hlub kuv heev txij puag thaum kuv tseem yog me nyuam yaus los lawm, thiab tam sim no kuv loj tuaj lawm los kuv tseem ua rau nws txhawj txog kuv thiab. Yog kuv raug ntes dua, nws puas yuav muaj peev xwm tswj taus mas? Ua rau kuv qaug zog me ntsis, yog li kuv thiaj li maj nroos los thov Vajtswv, thov kom Nws tiv thaiv kuv lub siab. Tom qab ntawd, kuv pom qhov no nyob hauv Vajtswv cov lus: “Vajtswv tsim lub ntiaj teb no thiab coj tib neeg, ib tug ciaj sia los uas yog Nws muab txoj sia rau, los rau hauv lub ntiaj teb. Ntxiv ntawd, ces tib neeg mam muaj niam muaj txiv thiab muaj txheeb ze, thiab thiaj tsis nyob ib leeg kho siab khuav lawm. Txij thaum thawj zaug uas tib neeg tsa qhov muag ntsia lub ntiaj teb, nws yeej raug taw los kom muaj sia nyob rau hauv Vajtswv txoj kev tsa. Txoj kev ua pa ntawm txoj sia uas los ntawm Vajtswv los txhawb txhua tus uas ciaj sia kom mus thoob plaws rau txoj kev loj hlob mus txog ntua rau yav laus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Yog lub Hauv Paus ntawm Tib Neeg Txoj Sia). Kuv txhua txoj pa los ntawm Vajtswv los. Nws yog Vajtswv uas yog tus saib xyuas thiab tiv thaiv kuv thaum kuv loj hlob tuaj. Ib tug neeg twg uas ua siab zoo los sis muaj txiaj ntsig rau kuv ces twb yog Vajtswv npaj tseg lawm. Tsev neeg uas yug kuv los rau thiab hom niam thiab txiv uas kuv muaj kuj yog Vajtswv txiav txim siab thiab npaj tseg lawm thiab. Kuv yuav tsum ua tsaug rau Vajtswv thiab pauj Nws txoj kev hlub, tias kuv muaj peev xwm loj hlob tuaj yam tsis muaj xwm txheej li, tias kuv muaj peev xwm ua neej nyob los txog niaj hnub no tau. Yog kuv tsis kam lees txais Vajtswv los sis ntxeev siab rau Nws vim kuv tej kev xav rau kuv tsev neeg, ces qhov ntawd yuav tsis muaj qab hau li. Kuv niam txhawj txog kuv, thiab ua rau nws tsis noj qab nyob zoo. Tag nrho tej no tsis yog vim Pawg Tsoom Fwv Koom Tsham lod? Yog lawv tsis ntes kuv thiab tsim txom kuv, ces kuv niam thiab kuv txiv yeej yuav tsis ntshai li. Pawg Tsoom Fwv Koom Tsham tsim txom kuv thiab ua rau cov neeg kuv hlub mob vim hais tias nws xav kom kuv ntxeev siab rau Vajtswv. Kuv yuav tsis cia kom nws tej kev npaj muaj tiav li! Nyob rau txoj kev xav li no, kuv thiaj li rov muaj kev txiav txim siab dua tias: Txawm kuv tsev neeg yuav tav kev ntau npaum li cas los xij, kuv yuav tsum ntseeg thiab raws Vajtswv qab! Tom qab ntawd, thaum kuv ua hauj lwm, kuv kuj mus koom tej kev sib txoos ua ke thiab qhia txoj moo zoo thiab.
Nyob rau lub Ob Hlis Ntuj xyoo 2017, kuv tab tom npaj txhij yuav mus ua hauj lwm ces muaj ib tag kis kuv tau txais ib tsab xov tooj. Ib tug txiv neej muaj npe hu ua Tsheej, uas yog tus thawj coj tuaj ntawm Pawg Tsoom Fwv thiab Pawg Saib Xyuas Txoj Cai tuaj, txawm hais rau kuv tias: “Ob hnub tom ntej no tuaj kos npe rau ib daim ntawv cog lus tias koj yuav tsis ntseeg Vajtswv. Tag nrho lwm cov ntseeg hauv zos uas raug ntes thiab raug tso tawm lawm twb kos npe tag lawm, tsuas tshuav koj lawm xwb.” Thaum hnov li no ua rau kuv npau taw heev. Kuv txoj kev ntseeg tsuas ua rau kuv mus koom tej kev sib txoos ua ke thiab nyeem Vajtswv cov lus xwb, tab sis lawv muab kuv coj mus kaw vim qhov no, tsim txom kuv, thiab tas zog yuam muab kuv ntxuav hlwb xwb. Tam sim no uas kuv twb tawm lawm, los lawv pheej tseem soj kuv qab mus ntxiv thiab, tas zog yuam kom kuv kos npe rau daim ntawv tso kuv txoj kev ntseg. Lawv yuav ua txhua yam kom kuv ntxeev siabb rau Vajtswv. Lawv mas ntxim ntxub thiab phem tshaj! Kuv yuav tsis cia ua kom tiav Ntxwgnyoog lub tswv yim dag. Tab sis tom qab ntawd kuv xav tias, “Yog kuv qhia nws tias kuv yuav tsis kos npe, Pawg Tsoom Fwv thiab Pawg Saib Xyuas Txoj Cai puas yuav xa kuv rov qab mus kaw? Kuv tsis xav rov qab mus nyob txim thiab ua lub neej tsis zoo li tib neeg.” Thaum xav txog qhov no, kuv hais rau nws tias: “Ob hnub tom ntej no kuv muaj hauj lwm ntau thiab kuv tsis muaj sij hawm. Ob peb hnub tom ntej kuv mam li tuaj nawb.” Ua rau kuv ceeb, tag kis sawv ntxov ntawd, Yawg Hlob Tsheej xa ib kab ntawv tuaj rau kuv hais tias: “Koj daim ntawv is saws las kho mob los txog lawm. Cia li tuaj nqa hnub no.” Kuv thiaj li xav rau kuv tus kheej tias: “Kuv yeej tsis tau thov ib daim ntawd is saws las kho mob dua li. Qhov no puas yog Ntxwgnyoog ib lub tswv yim ntxias dag ne?” Kuv xav txog qee yam ntawm qhov Vajtswv hais tias: “Nej yuav tsum txhob tsaug zog thiab tos ntsoov txhua lub sij hawm, thiab nej yuav tsum thov Vajtswv ntawm Kuv lub xub ntiag kom ntau tshaj no. Koj yuav tsum paub txog Ntxwgnyoog cov phiaj xwm uas tshaj lij thiab ntau txoj hau kev dag ntxias, paub txog cov ntsujplig, paub txog tib neeg, thiab muaj cuab kav paub txhua hom tib neeg, cov xwm txheej, thiab ntau yam” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 17). Vajtswv cov lus qhia rau kuv kom nco tias Ntxwgnyoog muaj kev ntxias dag ntau heev. Los ntawm qhov hais tias tag nrho cov ntseeg hauv zos uas raug ntes thiab tom qab ntawd raug tso tawm lawm ntawd twb tau kos npe lawm, tshuav kuv lawm xwb, Yawg Hlob Tsheej tas zog siv tswv yim ntxias dag kuv kom mus xwb. Vim lub tswv yim ntxias dag ntawd siv tsis tau lawm, nws thiaj li siv daim ntawv is saws las kho mob los ntxias. Nws mas txawj ntxias dag tshaj. Thaum xav tag nrho qhov no lawm, kuv thiaj li txiav txim siab tsis mus.
Ces tag kis sawv ntxov ntawd, kuv txiv txawm maj nroos tuaj tim kuv qhov chaw ua hauj lwm. Nws txawm maj nroos qhia kuv tias, “Nag hmo, Yawg Hlob Tsheej hu tuaj kom kuv mus tim nws qhov chaw ua hauj lwm rau thaum sawv ntxov. Nws qhia kuv tias lub nroog tab tom ua ib qho kev tshuaj ntsuam xyuas tshwj xeeb seb koj puas tseem xyaum ua raws koj txoj kev ntseeg los sis tsis xyaum ua raws lawm. Yog koj kos npe rau daim ntawv lees tias koj tsis ua lawm, ces koj thiaj li yuav ua neej tau xws li lwm tus, thiab yuav tsis muaj leej twg soj qab los sis nrhiav koj lawm. Tab sis yog koj tsis kos npe, ces koj yuav raug xa mus kaw thiaj li yuav hloov tau. Mloog kuv hais—tso koj txoj kev ntseeg tseg thiab cia li mus kos koj lub npe kiag xwb!” Ua rau kuv npau taws thiab dhuav tsis xav hnov qhov no li. Kuv thiaj li hais rau kuv txiv tias, “Txiv, koj yeej paub tias kev ntseeg Vajtswv thiaj li yog txoj kev uas yog sav. Yog li kuv yuav ua li cas tso tau kuv txoj kev ntseeg tseg vim ntshai kev tsim txom xwb? Tam sim no tej kev puas tsuaj loj zuj zus tuaj lawm. Vajtswv Tus Uas Muaj Hwj Chim Loj Kawg Nkaus, tus Cawm Seej, nthuav tawm qhov tseeb los cawm tib neeg kom dim txoj kev txhaum thiab dim tej kev puas tsuaj. Qhov no tsuas yog peb tib lub hwv tsam los txais kev cawm dim xwb. Kev tsis ntseeg, ces peb kawg piam sij rau hauv qhov kev puas tsuaj xwb xwb li. Pawg Tsoom Fwv Koom Tsham ntes thiab tsim txom cov ntseeg yam vwm ntsuav, yuam kom lawv ntxeev siab rau Vajtswv, kom lawv thiaj li yuav kawg raug rau txim hauv dab tuag teb ua ke nrog nws xwb. Qhov kos kuv lub npe ntawd ces txhais tias ntxeev siab rau Vajtswv ntag thiab kuv yuav raug rhuav tshem nyob rau thaum kawg! Kuv tsis kos npe tsis tau rau qhov ntawd!” Kuv txiv, ntshai thiab nyuaj siab ntsuav, hais rau kuv tias, “Yog koj tsis kos npe, ces tub ceev xwm yuav muab koj coj mus kaw dua. Koj puas xav ntsib kev txom nyem rau tod dua lawm tiag tiag mas? Txawm tias koj tsis xav txog koj tus kheej los xij, xav txog koj tus niam hluas. Pawg Tsoom Fwv Koom Tsham tsi ntsees rau ib tug ntseeg tsev neeg tag nrho. Saib koj tus niam laus mas. Nws kawm tiav ua xib fwb qhia ntawv los ntawm lub tsev kawm qib siab lawm, tab sis nws tsis dhau tsoom fwv qhov kev tshuaj xyuas li vim koj txoj kev ntseeg xwb thiab tsis nrhiav tau ib txoj hauj lwm tseem ceeb rau ntawm tsev kawm ntawv theem pib li. Koj tus niam hluas los tab tom kawm yuav tiav tsev kawm qib siab los ua xib fwb qhia ntawv rau xyoo no thiab tab tom yuav nrhiav hauj lwm ua, thiab yog koj tsis kos npe, nws yuav tsis dhau tsoom fwv qhov kev tshuaj xyuas thiab yeej yuav nrhiav tsis tau ib txoj hauj lwm zoo li os. Tsis yog koj yuav rhuav tshem nws lub neej yav tom ntej thiab lod? Cia li mloog kuv hais, cia li tom hniav qawv kos npe rau xwb mas. Koj ntseeg tsis tau zais ntshis lod? Vim li cas yuav tawv ncauj ua luaj li?” Thaum saib rau kuv txiv lub ntsej muag ntshaus ntsho, kua muag teev yees hauv nws ob lub qhov muag, nyuaj siab heev uas muaj kwj tshwm rau ntawm nws lub qhov ncauj, kuv cia li hnov nyuaj siab thiab cov nyom heev tias: “Yog kuv kos npe, ces kuv yuav ntxeev siab rau Vajtswv, thiab kuv yuav raug siav npe tias yog niag tsiaj nyaum; kuv yuav raug Ntxwgnyoog ntes du lug, thiab poob kuv lub hwj tsam rau kev cawm dim. Tab sis yog kuv tsis kos npe, ces kuv tus niam laus yuav tsis dhau tsoom fwv qhov kev tshuaj xyuas thiab yuav cuam tshuam rau nws lub neej yav tom ntej. Tag nrho kuv tsev neeg yuav ntxub kuv mus tag kuv lub neej txoj sia. Thiab yog tub ceev xwm coj kuv rov qab mus kaw thiab tsim txom kuv yuav zoo li cas yog kuv tsis kos npe? Yog lawv ntaus kuv tuag ne yuav zoo li cas?” Thaum xav txog tag nrho tej ntawd mas mob kuv npaum nkaus li rab riam chob kuv hauv siab ntag. Kuv tsis paub tias yuav txiav txim siab li cas. Kuv thiaj li hais rau kuv txiv tias, “Cia kuv xav txog qhov ntawd tso.” Tom qab nws mus lawm, kuv thiaj li thov Vajtswv nrog kuv tej kua muag ntws sis tias: “Vajtswv, kuv lub siab mas qaug zog tag lawm, thov muab txoj kev ntseeg thiab lub zog rau kuv, thiab coj kuv kev los tuav kuv tej lus ua tim khawv kom khov kho.”
Tom qab kuv thov Vajtswv lawm, kuv nyeem ib zaj lus ntawm Vajtswv cov lus tias. “Thaum tib neeg tseem tsis tau raug cawm dim, lawv lub neej keev raug cuam tshuam tas li nrog, thiab raug tswj kav los ntawm, Ntxwgnyoog. Muab ua lwm lo lus hais, cov tib neeg uas tsis tau raug cawm dim yog cov neeg raug txim rau Ntxwgnyoog, lawv tsis muaj kev ywj pheej, lawv tsis tau raug tso los ntawm Ntxwgnyoog, lawv tsis tsim nyog los sis tsis muaj cai pe hawm Vajtswv, thiab lawv raug Ntxwgnyoog caum raws ti ti thiab tawm tsam phom sij kawg li. Cov tib neeg zoo li no tsis muaj kev zoo siab uas yuav hais txog li, lawv tsis muaj cai rau ib qho kev muaj nyob uas ib txwm yuav hais txog, thiab tshaj qhov no lawm lawv tsis muaj meej mom yuav hais txog. Tsuas yog koj sawv tiv thiab ua tsov rog nrog Ntxwgnyoog nkaus xwb, siv koj txoj kev ntseeg Vajtswv thiab kev mloog hais, thiab kev hwm Vajtswv los ua tej cuab yeej los ua tsov rog ciaj thiab tuag nrog Ntxwgnyoog, tej ntawd thiaj ua rau koj kov yeej Ntxwgnyoog puv npo thiab ua rau nws pos tw nthoob thiab kom ntshai thaum twg nws pom koj, kom nws tso nws tej kev tawm tsam thiab tej kev iab liam rau koj tseg kom tag nrho—tsuas yog thaum ntawd nkaus xwb koj thiaj li raug cawm dim thiab rais los muaj kev ywj pheej tau. Yog koj yeej txiav txim siab tawg ntawm Ntxwgnyoog mus du lug lawm, tiam sis tsis npaj txhij kom muaj tej cuab yeej uas yuav pab ua rau koj kom kov yeej Ntxwgnyoog, ces koj tseem yuav nyob rau qhov phom sij. Thaum lub sij hawm dhau mus, thaum koj raug Ntxwgnyoog tsim txom hnyav uas koj tsis muaj ib lub zog seem li lawm, tiam sis koj tseem tsis tuaj yeem hais lus tim khawv tau, koj tus kheej tseem tsis tau khiav dim Ntxwgnyoog tej kev iab liam thiab kev tawm tsam koj kom tiav hlo, ces koj yuav muaj kev cia siab me ntsis ntawm txoj kev cawm dim lawm xwb. Thaum kawg, thaum tshaj tawm Vajtswv txoj dej num rau thaum xaus, koj tseem yuav nyob hauv Ntxwgnyoog lub xib teg, tsis tuaj yeem tso koj tus kheej kom dim, thiab yog li koj yeej yuav tsis muaj hwv tsam los sis kev cia siab li. Qhov tshwm sim tau los ces yog cov tib neeg zoo li no yuav poob du lug mus rau hauv Ntxwgnyoog txoj kev kaw” (Txoj Lus, Phau 2. Hais Txog Qhov Kev Paub Vajtswv. Vajtswv Tes Hauj Lwm, Vajtswv Tus Moj Yam, thiab Vajtswv Tus Kheej II). Thaum xav txog Vajtswv cov lus, kuv thiaj li paub tias Pawg Tsoom Fwv Koom Tsham txoj kev tsim txom thiab kuv tsev neeg txoj kev cuam tshuam mas yog tej kev sim siab thiab kev tawm tsam los ntawm Ntxwgnyoog los. Kuv xav txog thaum Yauj raug Ntxwgnyoog sim siab. Txhua yam uas yog nws li ntiag tug raug nyiag ntawm nws mus lawm thiab nws haj tseem poob tag nrho nws cov me nyuam lawm thiab. Nws lub cev muaj mob hlwv thoob plaws, nws tus poj niam kiag los yeej tawm tsam nws thiab hais kom nws tso Vajtswv tseg thiab tuag mus, tab sis Yauj yeej tsis yws txog Vajtswv li los sis tsis lees Nws li. Yauj haj tseem qhuas Nws, hais tias: “Yehauvas muab, thiab Yehauvas tau muab tshem mus lawm; thov kom Yehauvas lub npe raug qhuas” (Yauj 1:21). Yauj kov yeej Ntxwgnyoog tej kev sim siab los ntawm nws txoj kev ntseeg thiab kev hwm Vajtswv. Qhov ua tim khawv rau Vajtswv nrov phas ntawd, nws kov yeej thiab ua rau Ntxwgnyoog txaj muag. Tom qab tso kuv tawm hauv tsev laj cuj los lawm, Pawg Tsoom Fwv Koom Tsham tas zog siv kuv tsev neeg los yuam kom kuv kos npe rau daim ntawv tso kuv txoj kev ntseeg tseg. Nws yog kev sim siab thiab kev tawm tsam los ntawm Ntxwgnyoog. Ntxwgnyoog tab tom siv kuv txoj kev hlub rau kuv tsev neeg thiab txhawj xeeb rau kuv tus niam laus lub neej yav tom ntej kom kuv ntxeev siab rau Vajtswv. Yog kuv tiv thaiv kuv tsev neeg thiab tej kev ntshaw ntawm lub cev nqaij daim tawv los ntawm kev ntxeev siab rau Vajtswv, ces kuv yuav tsis raug Ntxwgnyoog ntes lod? Kuv paub tias kuv yuav tsis poob rau Ntxwgnyoog lub tswv yim ntxias dag, tab sis yuav tsum ua raws li Yauj tus qauv, ua tim khawv rau Vajtswv thiab ua kom Ntxwgnyoog txaj muag.
Tom qab ntawd kuv nyeem lwm zaj lus ntawm Vajtswv cov lus: “Txawm tias Ntxwgnyoog yuav muaj ‘hwj chim’ loj npaum li cas los xij, txawm tias nws yuav siab tawv thiab siab hlob npaum li cas los xij, txawm tias nws rab peev xwm tsim kev puas tsuaj yuav loj npaum li cas los xij, txawm tias nws tej tswv yim uas nws ua lwj liam thiab dag tib neeg yuav dav npaum li cas los xij, txawm tias txoj kev ntse yuav yog kev ntxias dag thiab txawj dag los hawv tib neeg npaum li cas los xij, txawm tias yuav hloov pauv tau li cas los xij, nws yeej tsis muaj peev xwm tsim yam muaj sia tau, yeej tsis muaj peev xwm tsim tej cai los sis tej kev cai tswj kav rau tag nrho txhua yam, thiab yeej tsis muaj peev xwm tswj kav thiab tswj ib yam khoom twg li, txawm tias yuav yog yam muaj sia los sis tsis muaj sia. Nyob hauv tag nrho lub qab ntuj khwb thiab lub ntuj, yeej tsis muaj ib tug tib neeg twg los sis ib yam khoom twg uas yug los ntawm nws los, los sis tshwm sim vim los ntawm nws; tsis muaj ib tug tib neeg twg los sis ib yam khoom twg uas raug tswj kav los ntawm nws, los sis nws yog tus tswj. Qhov txawv, nws tsis yog yuav tsum nyob hauv qab Vajtswv txoj kev tswj fwm xwb, tiam sis, dhau qhov no lawm, yuav tsum ua raws Vajtswv txhua cov lus txib thiab cov kev cai. Yog tsis muaj Vajtswv kev tso cai, nws yeej nyuaj heev rau Ntxwgnyoog los tuav tau ib tee dej los sis ib lub xuab zeb nyob rau ntawm daim av no; yog tsis muaj Vajtswv kev tso cai, Ntxwgnyoog yeej tsis tuaj yeem tshem tau tej ntsaum tawm mus ntawm daim av, cia tib neeg ntiaj teb nkaus xwb, cov uas Vajtswv tau tsim los. Hauv Vajtswv ob lub qhov muag, Ntxwgnyoog tseem qis dua tej paj li lij saum roob, tej noog uas ya saum nruab ntug, tej ntses nyob hauv dej hiav txwv, thiab tej kas nyob hauv lub ntiaj teb. Nws tes dej num nyob rau ntawm tag nrho txhua yam yog yuav tsum tiam tag nrho rau txhua yam, thiab ua txoj dej num rau tib neeg ntiaj teb, thiab tiam Vajtswv txoj dej num thiab Nws txoj kev npaj cawm tib neeg. Txawm tias nws tus yeeb yam siab phem lim hiam yuav zoo li cas los xij, thiab nws lub ntsiab tseem ceeb uas phem yuav zoo li cas los xij, tib yam uas nws tuaj yeem ua tau yog yuav tsum ua raws nraim li nws lub luag hauj lwm: kev tiam Vajtswv, thiab kev hu nkauj zoo mloog rau Vajtswv. Yam zoo li no yog lub tseem ntsiab thiab lub chaw ntawm Ntxwgnyoog. Nws lub ntsiab tseem ceeb tsis muaj feem xyuam sib txuas nrog txoj sia, tsis muaj feem xyuam sib txuas nrog lub hwj chim, tsis muaj feem xyuam sib txuas nrog txoj kev muaj cai; nws yog Vajtswv ib yam khoom ua si, tsuas yog ib lub tshuab tiam Vajtswv xwb!” (Txoj Lus, Phau 2. Hais Txog Qhov Kev Paub Vajtswv. Vajtswv Tus Kheej, tus Uas Tsuas Yog Tib Tug Xwb I). Thaum nyeem qhov no ua rau kuv paub txog Vajtswv lub hwj chim thiab lub hwj chim kav. Txawm tias Ntxwgnyoog tsiv nyaum npaum li cas los xij, nws tsuas yog ib yam khoom siv nyob hauv Vajtswv txhais tes xwb, ib yam cuab yeej siv ua dej num rau Nws. Kuv rov qab xav txog mus rau qhov kuv raug ntes thiab tsim txom kuv los ntawm Pawg Tsoom Fwv Koom Tsham ob txhais tes. Thaum kuv lub cev nqaij daim tawv qaug zog lawm, Vajtswv cov lus txhawb kuv txoj kev ntseeg thiab coj kuv mus dhau txhua zaus thiab txhua txoj kev nyuaj. Tom qab kuv raug tso tawm hauv tsev laj cuj los lawm, Pawg Tsoom Fwv Koom Tsham tseem soj kuv thiab kuv tsev neeg qab mus ntxiv, lawv ntxias dag kuv, tas zog soj kuv qab thiab thaiv kuv txoj kev ntseeg mus ntxiv thiab. Tab sis dhau los ntawm txoj kev qhia ntawm Vajtswv cov lus, kuv thiaj li los to taub qee qhov tseeb, muaj yeej rau kev sim siab zaum tas zaum thiab, ces thiaj li ua rau kuv txoj kev txiav txim siab ua raws Vajtswv ruaj khov lawm. Los ntawm txhua yam ntawd, kuv pom tias Ntxwgnyoog tsuas yog ib qho cuab yeej siv rau Vajtswv los ua kom Nws cov neeg zoo tiav log xwb. Tsis muaj ib yam dab tsi rau kuv ntshai li. Vajtswv tswj kav txhua yam—Nws saib xyuas txhua tus txoj hmoo. Kuv txoj sia thiab txoj kev tuag yog nyob rau hauv Vajtswv ob txhais tes. Txawm tias kuv tus niam laus yuav nrhiav tau los sis tsis tau ib txoj hauj lwm los xij, nws yuav muaj lub neej rau yav tom ntej zoo li cas los xij—tej no yog puav leej yog Vajtswv npaj tseg lawm. Pawg Tsoom Fwv Koom Tsham twb tswj tsis tau lawv tus kheej txoj hmoo, yog li ntawd lawv yuav tswj tau kuv txoj sia thiab txoj kev tuag, thiab kuv tus niam laus lub neej yav tom ntej tau li cas? Txawm tias yog muaj ib hnub twg kuv rov raug ntes thiab raug tsim txom dua los ntawm tub ceev xwm, los qhov ntawd yuav yog vim Vajtswv cia kom muaj tshwm sim xwb. Kuv yuav tsum tau vam khom rau Vajtswv thiab ua tim khawv. Yog kuv hlub kuv txoj sia, txhawj txog tej kev ntshaw ntawm kuv tsev neeg, thiab kos npe rau daim ntawv ntxeev siab rau Vajtswv, ces qhov ntawd yuav yog ib qho kev txaj muag. Txawm tias kuv muaj txoj sia nyob los xij, los kuv tsuas yog lub cev uas taug kev tau xwb. Muaj kev xav li ntawd, kuv tus kheej thiaj li nyiag tawm tsam zais ntsis rau tej kev sim siab thiab tawm tsam los ntawm Ntxwgnyoog, thiab hais kuv tej lus tim khawv khov kho thiab ua kom Ntxwgnyoog txaj muag!
Hmo ntawd tom qab kuv los txog tsev lawm, kuv tus niam laus nthe kuv tias: “Pawg Tsoom Fwv thiab Pawg Saib Xyuas Txoj Cai twb muab peb hnub rau koj lawm. Tag kis yog hnub kawg. Koj puas mus kos npe rau daim ntawv ntawd los sis tsis mus? Niam thiab Txiv laus lawm, nkawv txhawj txog koj tas li. Nkawv noj tsis taus los sis pw tsis tsaug zog los tau peb lub xyoos thaum koj nyob hauv tsev laj cuj. Tam sim no koj twb tawm los lawm, tab sis nkawv tseem ntxhov siab ntsuav. Koj yuav cia li cia nkawv zoo li no lod? Koj puas muaj lub siab txawj xav thiab mas? Qhov kos daim ntawv ntawd yuav tua koj lod?” Kuv paub tias qhov no yog Ntxwgnyoog txoj kev tawm tsam kuv los ntawm kuv tsev neeg dua lawm. Kuv txawm xav txog Vajtswv cov lus tias: “Koj yuav tsum muaj Kuv lub siab tawv nyob rau hauv koj, thiab koj yuav tsum muaj cov hauv paus ntsiab lus thaum los ntsib nrog cov neeg txheeb ze uas tsis ntseeg. Rau Kuv tus txiaj ntsig, txawm li cas los, koj kuj yuav tsum tsis txhob yeem swb rau tej hwj chim tsaus ntuj. Vam khom rau Kuv lub tswv yim los taug txoj kev zoo tiav log; tsis txhob cia Ntxwgnyoog tej kev koom siab twg los tswj. Siv tag nrho koj tej dag zog los tso koj lub siab rau ntawm Kuv lub xub ntiag, thiab Kuv yuav nplij koj thiab coj kev thaj yeeb nyab xeeb thiab kev zoo siab los rau koj. Tsis txhob sib zog los ua ib txoj hau kev twg nyob rau ntawm lwm tus neeg lub xub ntiag; qhov ua rau Kuv txaus siab tsis muaj nqis thiab tseem ceeb dua lod? Hauv kev ua tau zoo raws Kuv, koj yuav tsis tau txais kev thaj yeeb nyab xeeb thiab kev zoo siab mus ib txhiab ib txhis lod?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Vajtswv cov lus pub lub zog rau kuv. Ntseeg Vajtswv mas yog txoj kev uas yog lawm, thiab kuv yuav tsum tuav kuv txoj kev ntseeg Nws thiab ua raws Nws txawm yuav muaj dab tsi los xij. Pawg Tsoom Fwv Koom Tsham dag thiab nias kuv tsev neeg los thaiv kev kuv txoj kev ntseeg. Qhov no yim qhia tawm kom kuv paub meej tseeb ntxiv txog Pawg Tsoom Fwv Koom Tsham lub ntsiab tseeb phem ntawm kev ntxub qhov tseeb thiab kev ua yeeb ncuab rau Vajtswv. Kuv ntxub thiab tsis lees txais tej ntawd rau hauv kuv lub siab. Vajtswv kuj tau sim kuv siab hauv tej xwm txheej no lawm thiab, saib seb kuv puas muaj kev ntseeg Nws thiab puas fij rau nws tiag. Txawm tias tsis muaj ib qho kev to taub los sis pab txhawb nqa los ntawm kuv tsev neeg los xij, kuv yuav tsum ua tim khawv thiab ua kom Ntxwgnyoog txaj muag xwb xwb li. Thaum xav li no, kuv thiaj li qhia kuv tus niam laus tias: “Niam thiab Txiv noj tsis taus los sis pw tsis tsaug zog zoo, thiab txhawj tas li, tag nrho tej no tsis yog kev txhaum ntawm Pawg Koom Tsham lod? Kev ntseeg Vajtswv, kev ua ib tug neeg zoo, thiab taug txoj kev uas yog mas yeej yog thiab tsim nyog lawm. Tab sis tsis yog Pawg Koom Tsham tsuas ntes kuv nkaus xwb, lawv kuj coj tag nrho peb tsev neeg mus rau qhov ntawd thiab, ua rau peb tsis muaj kev tawm. Pawg Koom Tsham yog tus ua txhaum!” Nyob rau lub sij hawm ntawd, kuv tus niam laus hu xov tooj los xav paub seb yuav teb li cas: “Koj puas mus kos npe rau tag kis los tsis mus nas? Koj tsuas muaj ob qho kev xaiv xwb. Tsis hais qhov kos npe rau daim ntawv cog lus tias koj yuav tsis ntseeg Vajtswv lawm thiab qhov mus ua hauj lwm, khwv nyiaj, thiab ua ib lub neej zoo, los sis koj tsis kos npe thiab tos coj mus kaw!” Kuv txawm teb khov kho tias: “Txawm tias kuv yuav rov qab mus nyob txim los xij, kuv yuav tsis kos npe rau daim ntawv ntawd!” Ces nws khwb nkaus xov tooj npau taws ntsuav rau kuv, thiab kuv lwm tus niam laus los cia li tsis quav ntsej kuv lawm thiab.
Tom qab ntawd, kuv tawm mus ua kuv tej dej num txawv nroog lawm. Thaum twg los xij uas kuv rov qab xav txog tag nrho txoj kev ntsib kev pom ntawd, kuv lub siab ruaj khov tas li. Kuv xav tias nws yog qhov kev xaiv zoo tshaj plaws uas kuv ib txwm ua dhau los, thiab kuv yeej yuav tsis khuv xim qhov ntawd li.
