40. Yam Uas Tshwm Sim Los ntawm Txoj Kev Tsis Siv Zog Ua Kuv Tes Dej Num

Nyob rau xyoo 2019, Viv Ncaus Zag thiab kuv raug saib xyuas tes hauj lwm tsim duab kos duab. Thaum kuv xub pib ua tes dej num no, kuv tsis to taub ntau lub hauv paus ntsiab lus, yog li ntawd Viv Ncaus Zag thiaj li ua siab ntev ntev qhia kuv thiab nws tus kheej ua tes hauj lwm ntawd feem ntau xwb. Tom qab ntawd, kuv mam li paub hais tias nws twb tuav tes dej num no tau ob xyoos lawm, thiab twb paub ua hauj lwm lawm, ces txhua yam uas txij li thaum qhia nyob rau hauv tej rooj sib tham mus txog thaum xaus tes hauj lwm ntawd, nws xav tau meej dua kuv. Thaum cov nus thiab cov viv ncaus muaj lus nug, nws yeej ib txwm teb tau zoo. Muab piv rau nws mas, kuv mloog zoo li kuv poob qab deb dhau lawm. Kuv xav hais tias, “Xyov yuav raug kev txom nyem thiab tiv kev txom nyem ntau npaum li cas es thiaj li mam zoo li Viv Ncaus Zag lau? Vim nws paub ntau dua thiab ris ntau lub nra dua, ces kuv thiaj li cia nws ua hauj lwm ntau dua.”

Nyob rau hauv tes hauj lwm cov ntsiab lus, nws hais kom kuv xav seb yuav qhia li cas los daws tej teeb meem tiag tiag, ces kuv cia li xav hais tias, “Qhov ntawd mas muaj teeb meem ntau heev. Qhov tseem ceeb ntawm cov ntsiab lus uas hais txog tej teeb meem uas muaj nyob rau hauv peb tes dej num ntawd mas, kuv yuav tsum tau nrhiav Vajtswv cov lus thiab tej hauv paus ntsiab lus uas dhos rau tej teeb meem ntawd los qhia. Tshwj xeeb yog tej teeb meem loj ntawd mas, kuv tsis tshua paub ntau lawm. Yuav kom daws tau mas, kuv yuav tsum tau nrhiav kom paub ntau heev tso, thiab nrhiav tej lus qhia txog yam uas kuv tsis to taub. Qhov ntawd yuav siv sij hawm thiab dag zog ntau heev. Viv Ncaus Zag paub txoj hauj lwm no, yog li ntawd nws tuaj yeem paub cov ntsiab lus. Kuv mam li cia nws ua qhov ntawd.” Ces tom qab ntawd kuv yeej tsis tshua xav txog tes hauj lwm cov ntsiab lus ntawd ntxiv li lawm. Tom qab ntawd, thaum Viv Ncaus Zag nug seb kuv xav li cas, ces kuv thiaj li hais tias, “Kuv tsis paub txoj hauj lwm ntawd, yog li ntawd koj hais cov tshiab lus ntawd mas ntshe yuav zoo tshaj.” Qee zaus, thaum nws tab tom npaj peb txoj kev kawm, nws nug kuv seb kuv puas xav koom, kom pab tawm tswv yim rau nws thiab pab nws zam kom tsis txhob muaj teeb meem. Kuv xav hais tias, “Viv Ncaus Zag yeej ib txwm yog tus uas leg txoj hauj lwm no, thiab kuv to taub tsawg tshaj nws. Yuav kom koom tau mas, kuv yuav tsum tau xav tso, thiab kawm tej yam uas kuv tsis paub tso. Qhov ntawd mas siv dag zog ntau dhau lawm! Kav liam lau, kuv yuav tsis koom.” Yog li ntawd, kuv thiaj li tsis koom Viv Ncaus Zag.

Tom qab ntawd, peb kawm ib txoj kev kos duab tshiab. Peb muaj ntau qhov kev nyuaj thiab teeb meem, tiam sis nws nrog peb sib tham thiab nrog peb daws tej ntawd. Vim kuv tsis paub txoj hauj lwm ntawd zoo, kuv thiaj li tseem paub tsis meej tom qab hnov nws piav qhia txhua yam ob zaug lawm, thiab kuv xav hais tias, “Kev kawm tej kev txawj tshiab nyob rau hauv txoj hauj lwm no mas sab heev. Kuv tsis xav tias kuv yuav koom zaum no. Txawm li cas los xij, peb twb muaj Viv Ncaus Zag lawm, nws yeej pab tau peb kawm.” Tom qab ntawd, thaum kuv tab tom kawm, kuv tsis ua tib zoo mloog li. Qee zaus kuv tsis hais ib lo lus li; hos muaj qee zaus, kuv mus ua lwm yam lawm. Thaum Viv Ncaus Zag nug kuv tej tswv yim thiab tej kev xav, kuv pheej teb ua dog ua dig hais tias kuv tsis muaj dab tsi li. Thaum kawg, ces kuv pom hais tias kuv tsis ris lub nra ntawm kuv tes dej num lawm zuj zus. Kuv yim xav hais tias kuv zoo tsis txaus, ces kuv yim tso tseg tsis saib teeb meem lawm. Nyob rau lub caij ntawd, txhua hnub mas kuv lub siab yeej qhuav qhawv xwb, thiab kuv xav phem zuj zus tuaj lawm. Kuv xav hais tias kuv tsis muaj peev xwm, thiab tias kuv tsis tsim nyog ua tes dej num ntawd.

Muaj ib hnub, tom qab nrog Viv Ncaus Zag sib tham txog kuv tes hauj lwm tag lawm, nws hais rau kuv hais tias, “Koj twb ua tes dej num no tau li ib ntus rau tam sim no lawm, tiam sis koj hais tias koj tsis paub los sis tsis to taub. Qhov tseeb tiag ces yog koj tsis xav ris ib lub nra los sis siv zog xwb. Qhov laj thawj uas vim li cas kuv thiaj li muaj qee lub tswv yim zoo ntawd mas yog qhov hais tias kuv pheej thov Vajtswv, vam khom rau Vajtswv, thiab nrhiav tej hauv paus ntsiab lus kom to taub txhua yam xwb. Thaum peb tsis to taub tej yam siab lawm, ces peb yuav tsum kawm tej ntawd. Yog tsis li ntawd, ces peb yuav ua li cas ua tau peb tes dej num zoo?” Ces nws txawm qhia kuv txog qhov nws vam khom rau Vajtswv thiab nrhiav kev daws teeb meem li cas thaum ntsib tej kev nyuaj. Tsis muaj hmoo, nyob rau lub sij hawm ntawd kuv tsis ras txog kuv qhov teeb meem kiag li. Tiam sis, kuv xav tias Viv Ncaus Zag los yeej tsis to taub kuv tej kev nyuaj li thiab, yog li ntawd kuv thiaj li tsis khaws nws tej lus qhia rau nruab siab, los sis tom qab ntawd los kuv tsis tig xav txog kuv tus kheej li thiab.

Tsis ntev ntawd, Viv Ncaus Zag raug xa mus saib xyuas lwm tes hauj lwm lawm. Kuv tu siab heev thaum nws ncaim mus lawm, vim muaj hauj lwm ntau dhau lawm, kuv lub siab cia li xav tsis tawm dab tsi li lawm. Kuv thiaj li nug kuv tus kheej hais tias, “Kuv twb tau saib xyuas tes hauj lwm no los tau ib xyoos rau tam sim no lawm, yog li ntawd vim li cas kuv thiaj li tseem tsis muaj peev xwm ua tes hauj lwm no thiab?” Thaum no yog thaum kuv nco tau tej uas Viv Ncaus Zaj tau hais rau kuv lawm. Kuv yeej tsis tau ris ib lub nra nyob rau hauv kuv tes dej num tiag tiag li lod? Kuv thov Vajtswv thov Nws txoj kev coj qhia thaum kuv tig xav txog kuv tus kheej. Tom qab ntawd, kuv nyeem zaj lus no ntawm Vajtswv txoj lus: “Muaj ntau zaus, nej tsis muaj peev xwm teb tau thaum nug txog tej teeb meem hauj lwm. Nej ib txhia ntawm ko tau muaj feem rau tes hauj lwm lawm, tab sis nej yeej tsis nug tias tes hauj lwm mus li cas lawm los sis yeej tsis ua tib zoo xav txog qhov no li. Vim nej muaj peev xwm thiab muaj kev paub los, yog li yam tsawg kawg nej yuav tsum paub qee yam, vim hais tias tag nrho nej sawv daws tau koom hauv tes hauj lwm no lawm. Yog li vim li cas tib neeg feem coob thiaj li tsis hais dab tsi li? Yeej muaj tau tias nej tsis paub xyov yuav hais dab tsi kiag li—tias nej tsis paub seb txhua yam mus tau zoo los sis tsis tau zoo li. Muaj ob qho laj thawj rau qhov no: Qhov laj thawj ib ces yog nej yeej tsis quav ntsej kiag li, thiab yeej tsis tau txhawj txog tej no li, thiab tsuas xav tias tej ntawd yog ib teg hauj lwm uas yuav tau ua kom tiav xwb. Lwm qhov laj thawj ces yog nej tsis leg lub luag hauj lwm thiab tsis txaus siab los saib xyuas txog tej yam no li. Yog koj mob siab tiag tiag, thiab koom tiag tiag, ces koj yuav tsum muaj kev xam pom thiab kev xav txog txhua yam. Qhov tsis muaj kev xav los sis tsis muaj kev xam pom ntawd mas feem ntau yog los ntawm qhov tsis quav ntsej thiab qhov tsis mob siab los, thiab tsis leg lub luag hauj lwm li. Nej tsis nquag plias rau tes hauj lwm uas nej ua, nej tsis tsis leg lub luag hauj lwm li, nej tsis txaus siab tiv kev txom nyem los sis tsis koom li. Nej tsis xav ntsib kev mob siab, thiab nej tsis kam siv ib lub zog loj li; nej tsuas xav ua ib tug uas nyob qab kev tswj fwm xwb, uas tsis txawv ntawm ib tug tsis ntseeg ua hauj lwm rau lawv tus thawj coj li. Hom kev ua ib teg dej num zoo li ntawd mas Vajtswv tsis nyiam thiab qhov ntawd tsis ua rau Nws txaus siab. Tsis tuaj yeem tau txais Nws txoj kev pom zoo li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Coj Ncaj Xwb Mas Yus Thiaj Li Ua Neej Tau Li Ib Tug Tib Neeg Tiag). Vajtswv txoj lus nthuav tawm kiag kuv tus yam ntxwv ntag. Thaum kuv ua hauj lwm thiab nrog Viv Ncaus Zag sib tham, kuv yeej tsis muaj kuv tus kheej tej kev xav los sis tej tswv yim li. Kuv pheej xav hais tias nws yog vim kuv tsis paub txoj hauj lwm los sis tes hauj lwm ntawd zoo xwb. Tsuas yog tom qab nyeem Vajtswv txoj lus lawm xwb kuv thiaj li to taub hais tias nws yog vim kuv txoj kev tsis quav ntsej thiab kev tsis leg hauj lwm xwb. Rov qab xav txog kuv txoj kev sib koom ua hauj lwm nrog Viv Ncaus Zag mas, txhua zaus thaum kuv muaj ib qho teeb meem loj, kuv yeej tsis txhawj xeeb txog qhov teeb meem ntawd li. Kuv siv kuv txoj kev tsis paub txog tes dej num thiab txoj kev tsis to taub zoo txog tej hauv paus ntsiab lus ntawd los ua ib qho kev zam kom dhaum qhov teeb meem ntawd xwb. Thaum sib tham txog tes hauj lwm, kuv tsuas yog ib tug mloog xwb. Kuv yeej tsis ua tib zoo xav txog tes hauj lwm ntawd li. Kuv pheej hais rau ntawm Viv Ncaus Zag lub xub ntiag hais tias kuv tsis to taub, thiab tias nws paub ua hauj lwm dua, tiam sis tej no tsuas yog tej lus dag thiab kev hais ub hais no kom dhau xwb. Kuv lub hom phiaj tiag tiag ces yog kom nws khuv leej thiab to taub, kom nws thiaj li yuav ua hauj lwm ntau dua es kom kuv thiaj li muaj sij hawm nyob dawb. Kuv mas txawj ntxias thiab txawj dag heev! Kuv twb tau saib xyuas tes hauj lwm no los tau ib xyoos, thiab kuv twb muaj ib txoj kev paub zoo lawm, yog li ntawd yog kuv leg lub luag hauj lwm thiab nquag kawm, ces ntshe kuv tus kheej twb muaj qee yam kev xav thaum kuv tham txog tes hauj lwm lawm. Tej zaum kuv haj tseem muaj peev xwm los ua tes hauj lwm ntawd thaum Viv Ncaus Zag raug muab hloov chaw lawm thiab. Kuv ua tsis tau dab tsi li tiam sis lam ua kuv tes dej num kom dhau xwb thiab tsis leg lub luag hauj lwm li, cuag nkaus li kuv tsuas ua hauj lwm kom tau nqi zog, lam siv zog me ntsis kom nyob taus ib hnub dhau ib hnub xwb yog tsis li ntawd ces txhawj xeeb tias kuv yuav ua li cas khiav dim. Kuv yeej tsis xav txog qhov yuav ua txhua yam li cas kom zoo, ua kom zoo tshaj plaws, thiab ua kuv lub luag hauj lwm kom tiav li. Kuv tsuas lam ua kom dhau, tsuas xav seb yuav ua li cas thiaj li zam dhau txoj kev raug txom nyem ntawm sab cev nqaij daim tawv xwb. Kuv yeej tsis xav txog Vajtswv tej kev npaj siab kiag li. Kuv yuav ua li cas hais tau hais tias kuv muaj Vajtswv nyob rau hauv kuv lub siab? Yuav ua li cas Vajtswv es thiaj li tsis ntxub kuv vim kuv tus cwj pwm uas kuv coj rau kuv tes dej num?

Tom qab ntawd, kuv nyeem lwm zaj lus ntawm Vajtswv txoj lus: “Tswv Yexus hais ib zaug lawm tias, ‘Rau qhov leej twg los xij uas muaj lawm, tseem yuav muab ntxiv rau nws, thiab nws yuav muaj ntau nplua mias: tab sis leej twg los xij uas tsis muaj, yam uas nws muaj ntawd haj tseem yuav raug muab tshem tawm ntawm nws mus thiab’ (Mathai 13:12). Lub ntsiab lus ntawm cov lus no yog dab tsi? Lub ntsiab lus ntawm cov lus no ces txhais tias yog koj tsis ua los sis koj tus kheej tsis mob siab ua koj tus kheej tes dej num los sis txoj hauj lwm, ces Vajtswv yuav muab yam uas yog koj li tshem tawm mus. Lub ntsiab lus ntawm qhov ‘muab tshem tawm mus’ yog dab tsi? Qhov ntawd yuav ua rau tib neeg xav li cas? Qhov ntawd txhais tau tias koj tsis muaj lub peev xwm thiab kev txawj ntse los mus ua tau, thiab koj tsis xav dab tsi li, thiab tsuas zoo li ib tug tsis ntseeg xwb. Vim li ntawd Vajtswv thiaj li yuav tsum muab txhua yam tshem tawm mus. Yog hais tias, nyob rau hauv koj tes dej num, koj tsis quav ntsej, thiab tsis tiv kev txom nyem, thiab koj tsis ua lub siab dawb paug, ces Vajtswv yuav muab yam uas koj muaj tshem tawm mus, Nws yuav muab txoj cai ua koj tes dej num ntawd rov qab, Nws yuav tsismuab txoj cai no rau koj lawm. Vim hais tias Vajtswv twb muab kev txawj ntse thiab lub peev xwm rau koj lawm, tab sis koj tsis ua koj tes dej num kom raug zoo, tsis muab koj tus kheej fij rau Vajtswv, los sis tsis tiv kev txom nyem, thiab koj tsis muab koj lub siab tso rau qhov ntawd li, tsis yog Vajtswv tsis foom koob hmoov rau koj xwb, Nws kuj yuav muab yam uas koj muaj lawm ntawd tshem tawm mus thiab. Vajtswv muab khoom pub rau tib neeg, muab tej txuj ci tshwj xeeb nrog rau txoj kev tshaj lij thiab kev ntse rau lawv lawm. Tib neeg tsim nyog siv tej no li cas? Koj yuav tsum siv koj lub siab thiab siv txhua yam uas koj paub, txhua yam uas koj to taub, thiab txhua yam uas koj tuaj yeem ua tau rau koj tes dej num. Qhov ua li ntawd, mas koj thiaj li yuav tau txais koob hmoov. Qhov tau txais koob hmoov los ntawm Vajtswv yog txhais tau li cas? Qhov no ua rau tib neeg xav li cas? Tias lawv raug Vajtswv qhia thiab coj kev lawm, thiab tias lawv muaj ib txoj kev thaum lawv ua lawv tes dej num. Rau lwm tus tib neeg mas tej zaum yuav zoo li tias koj lub peev xwm thiab txhua yam uas koj tau kawm mas pab tsis tau kom ua txhua yam tiav—tab sis yog Vajtswv ua hauj lwm thiab qhia koj, ces tsis yog koj tsuas muaj peev xwm to taub thiab ua txhua yam tau xwb, tab sis kuj ua tej ntawd tau zoo thiab. Ces thaum kawg, koj yuav xav rau koj tus kheej tias, ‘Kuv tsis keev muaj txuj ci li ntawd, tab sis tam sim no muaj ntau yam zoo nyob rau hauv kuv lub siab lub ntsws lawm tej ntawd puav leej zoo tag nrho. Kuv yeej tsis keev kawm tej ntawd li, tab sis tam sim no kuv to taub tag nrho tej ntawd lawm. Kuv cia li rais los txawj ntse tau li cas? Ua li cas tam sim no kuv ua tau ntau yam ua luaj?’ Koj yuav tsis muaj peev xwm piav qhia tau qhov ntawd li. Qhov no yog Vajtswv txoj kev qhuab qhia thiab koob hmoov; qhov no yog qhov Vajtswv foom koob hmoov rau tib neeg li cas. Yog thaum nej ua nej tes dej num los sis ua nej tes hauj lwm, es tsis hnov qhov no, ces Vajtswv tsis tau foom koob hmoov rau nej” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Coj Ncaj Xwb Mas Yus Thiaj Li Ua Neej Tau Li Ib Tug Tib Neeg Tiag). Tom qab ua tib zoo xav txog Vajtswv txoj lus lawm, kuv thiaj li to taub hais tias Vajtswv foom koob hmoov rau cov tib neeg coj ncaj thiab cov uas ua siab dawb siab zoo rau Nws. Ib tug tib neeg yim nquag tsim kho lawv tes dej num, ces Vajntsujplig yim coj lawv kev, thiab lawv yim ua tau lawv tes dej num zoo xwb. Tiam sis yog koj ua koj tes dej num los ntawm txoj kev ntxias dag, tsis nquag, thiab tsis tiv kev txom nyem, ces koj yeej yuav tsis nce qib los sis tsis tau txiaj ntsim los ntawm koj tes dej num li, thiab tej zaum koj haj tseem yuav plam yam uas koj tuaj yeem ua tau thiab. Nyob rau lub sij hawm no, kuv nco tau ib qho kev paub uas Viv Ncaus Zag qhia rau kuv. Thaum xub thawj mas nws tsis to taub tes hauj lwm ntawd pes tsawg, tiam sis nws pheej coj nws tej kev nyuaj ntawd mus rau Vajtswv, thov Vajtswv, nrhiav, thiab ua tib zoo xav, thiab nrog lwm tus kawm txog tej ntawd, ces, tos nco xwb, Vajntsujplig cia li qhia nws, thiab cia li muaj tej tswv yim tshiab tas li lawm. Nws thiaj li ua tau nce qib tas li thiab ua tau nws tes dej num zoo ntxiv lawm. Txawm li cas los xij, kuv yeej tseem ua li qub, tsis nrhiav kev ua kom nce qib li, pheej nyob dawb, thiab yeej tsis xav raug kev txom nyem los sis tiv kev txom nyem li. Vim li ntawd, kuv thiaj li ua tsis tau qhov kuv xav ua kom zoo tshaj plaws li. Ib yam li Vajtswv cov lus hais tias, “Leej twg los xij uas tsis muaj, yam uas nws muaj ntawd haj tseem yuav raug muab tshem tawm ntawm nws mus thiab” (Mathai 13:12). Vajtswv ntxub kuv tus cwj pwm uas tsis mob siab ua thiab tsis leg kuv tes dej num. Kuv ras dheev hais tias yog kuv tsis lees txim hloov dua siab tshiab, ces Vajtswv yuav tsis txais yuav kuv thiab tsis nyiam kuv kiag li, thiab thaum kawg ces kuv yuav plam kuv tes dej num tag nrho. Thaum xav txog qhov no, kuv ntshai, yog li ntawd kuv thiaj li thov kiag Vajtswv tam sid los nrhiav Nws txoj kev coj qhia kom nrhiav tau ib txoj hau kev los xyaum ua raws thiab hais tias kuv xav lees txim hloov dua siab tshiab.

Kuv nyeem zaj lus no ntawm Vajtswj txoj lus: “Nej tsim nyog to taub tej dej num li cas? Yog tej yam uas tus Tswv Tsim—Vajtswv—muab rau ib tug twg ua; qhov no yog qhov tib neeg tej dej num los li cas los. Cov lus txib uas Vajtswv muab rau koj ntawd yog koj tes dej num, thiab tes dej num ntawd yeej zoo li ntawd thiab yeej ncaj ncees tias koj ua koj tes dej num raws li Vajtswv hais lawm. Yog yeej meej rau koj lawm hais tias tes dej num no yog Vajtswv cov lus txib, thiab tes dej num ntawd yog Vajtswv txoj kev hlub thiab Vajtswv tej koob hmoov uas muab rau koj lawm ntag, no ces koj yuav muaj peev xwm lees txais koj tes dej num los ntawm ib lub siab uas hlub Vajtswv, thiab koj yuav muaj peev xwm ua tib zoo xav txog Vajtswv tej kev npaj siab rau thaum koj ua koj tes dej num, thiab koj yuav muaj peev xwm kov yeej txhua yam kev nyuaj kom Vajtswv txaus siab. Cov uas muab lawv tus kheej fij rau Vajtswv tiag tiag ntawd yeej tsis muaj hnub yuav tsis kam lees txais Vajtswv cov lus txib li; lawv tsis muaj hnub yuav tsis kam lees txais ib teg dej num li. Txawm Vajtswv muab tes dej num dab tsi tso rau koj los xij, txawm yuav muaj kev nyuaj dab tsi los xij, koj yuav tsum lees txais qhov ntawd. Qhov no yog txoj kev xyaum ua, uas xyaum ua raws li qhov tseeb thiab muab tag nrho koj lub siab ncaj ncees hauv txhua yam rau kom Vajtswv txaus siab. Qhov uas tsi ntsees rau ntawm no yog dab tsi? Yog hais txog cov lus uas nyob ‘hauv txhua yam.’ ‘Txhua yam’ tsis tau txhais tias yog tej yam uas koj nyiam los sis ua tau zoo, haj yam tsis yog tej yam uas koj paub. Tej zaum tej ntawd yuav yog tej yam uas koj tsis paub ua, tej yam uas koj yuav tsum tau kawm, tej yam uas ua nyuaj, los sis tej yam uas koj yuav tsum tau tiv kev txom nyem. Txawm li cas los xij, txawm tej ntawd yuav yog dab tsi los xij li, tsuav yog Vajtswv muab tso rau koj lawm xwb, ces koj yuav tsum lees txais ntawm Nws los. Koj yuav tsum lees txais thiab ua tes dej num ntawd kom zoo, muab kom tag nrho koj lub siab ncaj ncees es ua kom tau zoo raws li Vajtsv tej kev npaj siab. Qhov nov yog txoj kev xyaum ua” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Tom qab ua tib zoo xav txog Vajtswv cov lus no lawm, txhawb tau kuv heev. Kuv tes dej num yog kuv lub luag hauj lwm thiab lo lus cog tseg, ces tsis hais txog qhov seb kuv puas txawj ua txoj hauj lwm ntawd, los sis seb txoj hauj lwm ntawd puas yooj yim los sis nyuaj li, txoj hauj lwm ntawd yeej yog los ntawm Vajtswv los, yog li ntawd kuv yuav tsum tau leg, thiab ua kom ncaj ncees li kuv ua tau. Tsuas yog thaum kuv ua kom zoo tshaj plaws thiab ua kuv lub luag hauj lwm tiav lawm xwb kuv thiaj li yuav tau txais Vajtswv tej koob hmoov. Kuv xav txog txhua lub sij hawm uas kuv tsa tes cog lus rau ntawm Vajtswv lub xub ntiag hais tias kuv yuav ua siab ncaj ncees ua kuv tej dej num los pauj Nws txoj kev hlub rov qab. Tam sim no uas tes dej num ntawd mas me ntsis cov nyom thiab nyuaj, thiab kuv yuav tsum tau raug kev txom nyem thiab tiv kev txom nyem, yog li ntawd kuv thiaj li lam ua kom dhau thiab ua txhua yam kom zam dhau tes dej num ntawd xwb. Thaum ras dheev txog qhov no lawm, kuv mloog zoo li kuv tshuav Vajtswv nqi thiab tsis tsim nyog xyiv fab rau Nws txoj kev hlub li. Kuv ua tsis tau li ntawd txuas ntxiv lawm. Kuv yuav tsum tau xyaum ua raws li Vajtswv txoj lus, ua kuv tej dej num yam siab dawb paug, thiab ua kuv tej luag hauj lwm kom tiav kom tsis txhob muaj kev tu siab nyob rau yav tom ntej.

Yog li ntawd, kuv thiaj li pib tshawb xyuas thiab paub txog tes hauj lwm uas kuv twb paub tsis meej ib zaug lawm, thiab kuv tsis sim zam kom dhau tej teeb meem nyuaj ntawd ntxiv lawm. Tiam sis, kuv tham thiab qhia tej teeb meem ntawd rau kuv cov nus thiab cov viv ncaus thiab thov kom lawv qhia kuv thaum kuv tsis to taub. Ces thaum kawg, kuv thiaj li pib paub txhua yam ntxaws ntxaws, thiab muaj peev xwm los daws tau teeb meem thaum lwm tus muaj tej kev nyuaj lawm. Thaum kuv hais lub ntsiab ntawm peb tes hauj lwm, thaum xub thawj mas kuv tsis muaj tswv yim li thiab xav zam kom dhau xwb, tiam sis kuv nco tau qhov uas kuv tau nyeem nyob rau hauv Vajtswv txoj lus lawm, yog li ntawd kuv thiaj li nco ntsoov tawm tsam kuv lub cev nqaij daim tawv, xav txog tej teeb meem nyob rau hauv peb tes dej num, thiab ua hauj lwm los nrhiav tej hauv paus ntsiab lus thiab tshawb nrhiav kom paub. Tom qab xyaum ua raws li ntawd tau ib ntus lawm, kuv thiaj li paub tseeb tseeb txog Vajtswv txoj koob hmoov thiab kev coj qhia lawm. Kuv pib paub txhua yam uas kuv tsis to taub los sis kuv paub tsis meej lawm, thiab kuv tej ntsiab lus ntawm tes hauj lwm ntawd thiaj li ua tau qee yam zoo lawm. Kuv cov nus thiab cov viv ncaus xyaum ua raws li cov ntsiab lus uas kuv tau hais ntawd, thiab kuj nce qib lawm thiab.

Kuv xav hais tias tus cwj pwm uas kuv coj rau kuv tes dej num ntawd tau hloov pauv me ntsis lawm, tiam sis thaum muaj ib qho xwm txheej xws li ntawd los raug rau kuv, ces kuv poob mus rau kuv txoj kev qub dua lawm.

Nyob rau lub Cuaj Hlis Ntuj xyoo 2021, vim yog tej kev cheem tsum hauj lwm, kuv thiaj li tau koom nrog Viv Ncaus Lis mus saib xyuas cov los tshiab. Kuv xav hais tias tes dej num no yuav tsis muaj teeb meem txog sab thev nos los ntsis, yog li ntawd nws yuav tsis mob taub hau ua luaj twg, tiam sis kiag thaum kuv pib ua tes dej num no lawm, ces kuv mam li paub hais tias txoj kev saib xyuas cov los tshiab kom zoo ntawd mas tsis yooj yim. Tsis yog kuv yuav tsum tau hais lus Askiv xwb, kuv yuav tsum tau qhia txog qhov tseeb los daws lawv tej kev xav phem thiab kev paub tsis meej kom sai thiab. Kuv pom hais tias Viv Ncaus Lis mas txawj ntse heev txog txhua kis ntawm tes hauj lwm ntawd. Nws nrhiav tau qhov tseeb uas dhos qhov teeb meem ntawd los daws cov los tshiab tej teeb meem, tiam sis kuv ua tsis tau li ntawd kiag li. Kuv pheej qhia tsis tau qhov tseeb kom meej los sis daws tsis tau lawv tej teeb meem li. Yuav kom mus txog Viv Ncaus Lis qib mas, kuv yuav tsum tau siv sij hawm ntev heev kawm thiab npaj kuv tus kheej thiaj li tiv taus ib txoj kev txom nyem uas tseem ceeb. Kuv xav hais tias, “Kav liam lau, tam sim no Viv Ncaus Lis twb yog tus kuv koom ua hauj lwm nrog lawm, yog li ntawd kuv tsis tas yuav txhawj txog qhov ntawd li lawm.” Thaum xav li no, kuv cia li tsis mob siab nrhiav qhov tseeb li lawm, thiab tom qab tej rooj sib tham lawm, kuv tsis kub siab nug cov los tshiab txog lawv tej teeb meem li lawm. Muaj ib hnub, kuv txawm tig xav hais tias kuv twb ua tes dej num no los tau ob lub hlis lawm, tiam sis kuv ib leeg yeej tseem saib xyuas tsis tau ib tug los tshiab li. Kuv pheej xav hais tias kuv tsis to taub, tiam sis kuv tsis tau siv zog los tiv ib txoj kev txom nyem. Kuv thiaj li tsuas nug kuv tus kheej hais tias, “Vim li cas es kiag thaum kuv ntsib ib teg dej num uas kuv tsis txawj ua lawm, ces kuv cia li siv qhov hais tias tsis paub xyov yuav ua li cas los zam kom dhau los lam ua tes dej num ntawd kom dhau xwb, thiab tsis xav tiv ib txoj kev txom nyem li?” Kuv coj kuv tus yam ntxwv thiab kuv txoj kev paub tsis meej los rau ntawm Vajtswv lub xub ntiag thiab thov Vajtswv.

Muaj ib hnub, thaum kuv tab tom pe hawm, kuv thiaj li pom ob zaj lus ntawm Vajtswv txoj lus: “Thaum ua ib teg dej num mas, tib neeg pheej xaiv tes hauj lwm sib sib xwb, tes hauj lwm uas tsis sab, thiab tes uas yuav tsis tau tiv tshav tiv nag rau sab nraud. Qhov no yog qhov xaiv cov hauj lwm yooj yim thiab zam tej hauj lwm nyuaj, thiab nws yog ib qho qhia tshwm meej txog txoj kev ntshaw kom lub cev nqaij daim tawv kaj siab. Tshuav dab tsi ntxiv thiab? (Ib txwm yws thaum lawv tes dej num nyuaj me ntsis, sab me ntsis, thaum nws muaj feem ntsig txog qhov yuav tau tiv kev txom nyem.) (Xav ntsoov rau tej khoom noj thiab khaub ncaws hnav, thiab tej kev tau zoo ntawm cev nqaij daim tawv.) Tej no puav leej yog tej kev qhia tshwm meej txog txoj kev ntshaw kom lub cev nqaij daim tawv kaj siab. Thaum ib tug neeg zoo li ntawd pom tias yog ib txoj hauj lwm nyuaj heev los sis phom sij lawm, ces lawv txawm muab txoj hauj lwm ntawd pov rau lwm tus neeg; lawv tus kheej tsuas ua tes hauj lwm uas yooj yooj yim xwb, thiab lawv hle ub hle no, hais tias lawv mas niam tsis muaj peev xwm zoo txaus, hais tias lawv tsis muaj peev xwm ua hauj lwm, ces thiaj li ua tsis tau tes dej num no—qhov tseeb tiag ces, vim lawv ntshaw kom lub cev nqaij daim ntawv kaj siab xwb. … Kuj muaj thaum tib neeg pheej yws txog tej kev nyuaj thaum ua lawv tes dej num, thaum lawv tsis xav siv zog, thaum lawv so, tham pem, los sis nyob xwb thiab koom kev lom zem kiag thaum lawv muaj sij hawm so me ntsis thiab. Thiab thaum ua tes hauj lwm ntawd es tes hauj lwm ntawd ua rau txoj kev ua neej ntawm lawv lub neej puas tag mas, lawv tsis zoo siab thiab tsis txaus siab rau tes hauj lwm ntawd li. Lawv hais ub hais no thiab yws, thiab lawv lam tau lam ua lawv tes dej num lawm xwb. Qhov no yog txoj kev ntshaw tej kev tau zoo ntawm sab cev nqaij daim tawv, tsis yog lod? … Cov tib neeg uas ua raws li tej kev tau zoo ntawm sab cev nqaij daim tawv ntawd puas tsim nyog ua ib teg dej num? Kiag thaum ib tug tib neeg twg hais txog qhov ua lawv tes dej num, los sis tham txog qhov tiv kev txom nyem thiab raug kev txom nyem ntawd mas, lawv co lawv lub taub hau tas li xwb. Lawv muaj teeb meem ntau dhau lawm, lawv yws tas li, thiab lawv xav phem nkaus xwb. Cov tib neeg uas zoo li no mas tsis muaj nuj nqis, lawv tsis tsim nyog ua lawv tes dej num, thiab tsim nyog muab tshem tawm mus” (Txoj Lus, Phau 5. Tej Luag Hauj Lwm ntawm Cov Thawj Coj thiab Cov Neeg Ua Hauj Lwm). “Ib txhia thawj coj cuav mas muaj peev xwm me ntsis, tab sis lawv tsis ua tes hauj lwm uas muaj tiag li, thiab lawv nyiam kev tau zoo ntawm sab cev nqaij daim tawv xwb. Cov tib neeg uas nyiam kev tau zoo ntawm sab cev nqaij daim tawv ntawd mas yeej tsis txawv tej npua hlo li. Npua mas tsuas pw thiab noj xwb. Lawv tsis ua dab tsi li. Txawm li cas los xij, tom qab pub rau cov npua ntawd noj tau ib xyoo lawm, thaum tag nrho ib tsev neeg noj noj cov npua ntawd tej nqaij rau thaum lub xyoo xaus, ces tej zaum lawv yuav hais tias lawv twb ua tes dej num lawm. Yog ib tug thawj coj cuav twg pheej coj zoo li ib tug npua xwb, es ib hnub twg noj thiab haus peb pluag kom rog thiab muaj zog, tab sis lawv tsis ua tes hauj lwm uas muaj tiag li thiab yog ib tug neeg uas nkim zog xwb, ces qhov pheej tseem yuav lawv ntawd puas muaj txiaj ntsim mas? Nws puas muaj ib qho txiaj ntsim dab tsi li mas? Lawv tsuas ua tau ib tug neeg lwj liam xwb thiab yuav tsum raug muab tshem tawm. Qhov tiag tiag ces, yug ib tug npua mas tseem zoo dua li qhov pheej tseem yuav ib tug thawj coj cuav. Tej zaum cov thawj coj cuav yuav tau lub npe ‘thawj coj,’ tej zaum lawv yuav tau tuav tes dej num no, tau noj zoo ib hnub twg peb pluag mov, xyiv fab rau Vajtswv txoj hmoov hlub ntau heev, rog kheej lam thiab zoo los ntawm qhov tau noj mus txog rau thaum lub xyoo xaus—tab sis tes hauj lwm mus zoo li cas lawm? Saib rau txhua yam uas ua tiav nyob rau hauv koj tes hauj lwm rau xyoo no: Koj ua puas tau ib yam dab tsi rau ntawm tes hauj lwm hauv lub xyoo no? Tes hauj lwm uas muaj tiag uas koj ua ntawd yog dab tsi? Vajtswv lub tsev tsis hais kom koj ua txhua txoj hauj lwm kom zoo tiav log, tab sis koj yuav tsum ua tes hauj lwm tseem ceeb kom zoo—piv txwv li, tes hauj lwm ntawm kev tshaj tawm txoj moo zoo, los sis tes hauj lwm ua yeeb yaj kiab, tes hauj lwm leg tej ntaub ntawv, thiab ntau yam zoo li no. Tag nrho tej no yuav tsum tawg paj txi txiv. Nyob rau tej xwm txheej no, yuav tsum ua tau tes hauj lwm feem ntau thiab ua tiav ntau yam tom qab peb mus rau tsib lub hlis lawm; yog ua tsis tiav dab tsi tom qab ib lub xyoo lawm, ces qhov no yog ib qho teeb meem loj lawm. Nyob rau hauv koj lub luag hauj lwm, tes hauj lwm twg ua tau tawg paj txi txiv tshaj? Tes hauj lwm twg uas koj tau tiv kev txom nyem thiab txom nyem tshaj nyob rau hauv lub xyoo ntawd? Muab qhov ua tau coj los qhia thiab tig xav seb koj ua puas tau ib qho tiav uas muaj nqis suav txij thaum lub xyoo uas koj xyiv fab rau Vajtswv txoj hmoov hlub los; koj yuav tsum muaj ib qho kev to taub kom meej txog qhov nov nyob rau hauv koj lub siab. Koj tab tom ua dab tsi thaum koj noj mov hauv Vajtswv lub tsev thiab xyiv fab hlo rau Vajtswv txoj hmoov hlub rau txhua lub sij hawm no? Koj puas ua tau ib yam dab tsi tiav li? Yog koj ua tsis tiav ib yam dab tsi li, ces koj tsuas lam ua kom dhau xwb; koj yog ib tug thawj coj cuav tiag tiag li” (Txoj Lus, Phau 5. Tej Luag Hauj Lwm ntawm Cov Thawj Coj thiab Cov Neeg Ua Hauj Lwm). Thaum kuv xav txog Vajtswv cov lus no, kuv mloog zoo li cov lus no nkaug kiag kuv lub siab. Tsuas yog thaum ntawd xwb kuv thiaj li to taub hais tias kuv pheej thim rov qab thaum muaj kev nyuaj nyob rau hauv kuv tes dej num thiab siv qhov tsis to taub los sis tsis paub tias yuav tiv thaiv li cas, vim kuv nkees heev thiab ua kom tau raws li qhov kev tau zoo ntawm sab cev nqaij daim tawv ntau dhau lawm. Nyob rau yav dhau los, thaum kuv yog ib tug saib xyuas nrog Viv Ncaus Zag, kuv yeej ib txwm xaiv tej hauj lwm dog dig thiab yooj yim rau kuv tus kheej ua xwb thiab muab txhua yam uas kuv tsis txawj ua los sis cheem tsum kev ua tib zoo xav rau nws ua. Nyob rau hauv txoj kev nrog Viv Ncaus Lis saib xyuas cov los tshiab ntawd, kuv yeej tseem tsis xav txhawj, raug kev txom nyem los sis tiv ib txoj kev txom nyem twg li. Kuv tig xav txog qhov vim li cas es kuv thiaj li coj zoo li ntawd lawm, ces mam li paub hais tias qhov laj thawj tseem ceeb mas yog qhov tias kuv raug tej tswv yim phem tswj kav lawm. Tej yam zoo li “Txhua tus tib neeg tsis ua txhawm rau tus kheej ces tus dab phem yuav muab tus tom qab kawg” thiab “Tswj hnub ua rau kev zoo siab, rau lub neej txoj sia kom luv” ntawd tau tuaj cag tob rau hauv kuv lub siab lawm. Kuv ib txwm xav hais tias tib neeg yuav tsum tau ua neej nyob txhawm rau lawv tus kheej, thiab thaum peb muaj kev tau zoo ntawm sab cev nqaij daim tawv thiab tsis txhawj lawm, ces peb ua neej li peb tsim nyog ua lawm. Thaum kuv los rau hauv pawg ntseeg los ua kuv tes dej num ntawd, kuv tseem muaj qhov kev xav no, thiab thaum muaj tej kev nyuaj los sis tej yam uas kuv tsis txawj ua, thaum kuv yuav tsum tau raug kev txom nyem los sis tiv ib txoj kev txom nyem, kuv thim rov qab zoo li ib tug neeg tais caus thiab kuv txoj kev tau zoo ntawm sab cev nqaij daim tawv tso ua ntej xwb. Npua tsis muaj ib txoj kev xav los sis ua ib yam dab tsi li. Npua tsuas paub noj, haus thiab pw xwb. Kuv zoo ib yam nkaus li ntawd ntag, tsuas txhawj txog kuv txoj kev tau zoo ntawm sab cev nqaij daim tawv xwb. Kuv ua ib lub neej phem heev! Nyob rau yav dhau los ua ib tug thawj saib xyuas, thiab tam sim no saib xyuas, Vajtswv tau txhawb kuv ntau heev, tiam sis kuv tsis sim ua kom nce qib, los sis xav txog kuv tej luag hauj lwm thiab tej dej num kiag li. Kuv tsis leg pawg ntseeg tes hauj lwm thiab kuv cov nus thiab cov viv ncaus lub neej txoj sia li. Kuv tsis muaj lub siab txawj xav ib qho me me li! Kuv yeej tsis xav raug kev txom nyem los sis tiv ib txoj kev txom nyem kiag li, tiam sis pheej siv qhov hais tias tsis to taub los sis tsis paub kom tau kev khuv leej los ua kom lwm tus xav hais tias kuv lees paub kuv qhov tsis zoo, kom lawv thiaj li pom kuv yam li ib tug neeg paub tab thiab coj ncaj xwb. Qhov tseeb ces yog qhov hais tias kuv siv tej lus no los npog kuv txoj kev tub nkeeg thiab kev tsis leg lub luag hauj lwm xwb. Kuv mas txawj ntxias dag thiab txawj dag heev es kuv thiaj li dag tag nrho kuv cov nus thiab cov viv ncaus. Txawm kuv dag tau lawv li ib ntus los xij, Vajtswv yeej pom txhua yam, thiab Vajtswv ncaj ncees. Kuv mas txawj dag heev, yog li ntawd ua li cas Vajtswv thiaj li tsis ntxub kuv? Twb yog vim li no es kuv thiaj li tsis pom Vajtswv tej koob hmoov los sis txoj kev coj qhia hauv kuv tej dej num nyob rau lub sij hawm ntawd li. Thaum teeb meem pheej ua rau koj paub tsis meej thiab tsis pom koj nce qib li, ces tej no yog tej cim ntawm kev phom sij!

Tom qab ntawd, kuv nyeem lwm zaj lus ntawm Vajtswv txoj lus. Vajtswv Tus Uas Muaj Hwj Chim Loj Kawg Nkaus hais tias, “Tom qab lees txais yam uas Vajtswv tau muab tso rau nws lawm, ces Nau-a thiaj li tau npaj nqis tes ua thiab tsim ua lub nkoj raws li Vajtswv hais tias yog ib yam tseem ceeb tshaj plaws nyob rau hauv nws lub neej, yam tsis muaj kev tso pluav ib pliag me me li. Ntau hnub dhau mus, ntau xyoo dhau mus, hnub tas hnub tuaj, xyoo tas xyoo tuaj. Vajtswv tsis qhuab qhia Nau-a los sis txhawb nws, tab sis thoob plaws lub sij hawm ntawd, Nau-a rau siab ntso ua txoj hauj lwm uas Vajtswv muab tso rau nws ua lawm xwb. Txhua lo lus thiab kab lus uas Vajtswv tau hais tawm ntawd tau muab cog rau hauv Nau-a lub siab lawm zoo ib yam nkaus li cov lus uas txua rau ntawm lub pob zeb ntag. Yam tsis xav txog tej kev hloov pauv nyob rau hauv lub ntiaj teb sab nraud, txog kev luam thuam ntawm cov neeg nyob ib puag ncig nws, txog tej kev txom nyem, los sis txog tej kev nyuaj uas nws ntsib li, nws tau ua lub siab ntev, thoob plaws, rau hauv yam uas Vajtswv tau muab tso rau nws lawm, yeej tsis poob siab los sis tsis tso tseg li. Vajtswv cov lus raug muab cog rau hauv Nau-a lub siab lawm, thiab Nau-a tau nqis tes ua tej ntawd rau hauv nws lub neej txhua hnub. Nau-a npaj txhua yam khoom siv rau kev tsim ua lub nkoj, ces tus qauv thiab tej yeeb yam ntawm lub nkoj uas Vajtswv tau txib kom ua ntawd thiaj li raug ua tib zoo tsim ib qho zuj zus los ntawm Nau-a rab rauj thiab tus txaug. Nrog huab nrog cua thiab dej nag, thiab txawm tib neeg yuav luam thuam los sis hais tsis zoo rau nws los xij, Nau-a yeej ua lub neej mus raws li qhov no, xyoo tas xyoo tuaj. Vajtswv yeej saib ntsoov Nau-a txhua txoj kev yam tsis hais ib lo lus rau nws li, thiab Nau-a yeej ua rau Nws zoo siab. Txawm li cas los xij, Nau-a yeej tsis paub thiab xav tsis txog qhov no li; suav thaum pib mus txog thaum ua tiav lawm, nws tsim lub nkoj, thiab tsim txhua yam muaj sia, ua raws nraim li Vajtswv cov lus yam tsis muaj qhov ua ywj fab ywj fwv li. Nyob rau hauv Nau-a lub siab mas,Vajtswv cov lus yog cov lus qhia siab tshaj plaws uas nws tsim nyog ua raws thiab nqis tes ua, thiab cov lus ntawd yog lub hom phiaj thiab txoj xub kev uas nws yuav caum mus tag nws sim neej. Yog li ntawd, txawm Vajtswv hais dab tsi rau nws los xij, txawm Vajtswv hais kom nws ua dab tsi los xij, txib nws ua dab tsi los xij, Nau-a yeej lees txais tej ntawd tag nrho, thiab muab tej ntawd khaws tseg rau hauv lub siab; nws xam tias tej ntawd yog yam tseem ceeb tshaj plaws nyob rau hauv nws lub neej, thiab ua mus raws li ntawd. Tsis yog nws yuav tsis hnov qab xwb, tsis yog nws tsuas khaws tej ntawd tseg rau hauv nws lub siabxwb, tab sis kuj xav txog tej ntawd nyob rau hauv lub neej txhua hnub thiab, lees txais thiab nqis tes ua Vajtswv cov lus txib nrog nws lub neej. Thiab qhov pua lub nkoj ib qho zuj zus li no, ces thiaj li tsim lub nkoj tiav lawm. Txhua qhov kev ua ntawm Nau-a, txhua hnub mas nws mob siab ntso ua raws li Vajtswv cov lus thiab cov lus txib. Zoo li tias Nau-a tsis tau ua ib yam tseem ceeb tshaj plaws, ib tes hauj lwm tseem ceeb, tab sis raws li qhov Vajtswvpom, ces txhua qhov kev ua ntawm Nau-a, tab txawm txhua yam uas nws tpheej tas zog ua kom tiav raws li txhua kauj ruam uas nws ua los xij, txhua tes hauj lwm uas siv tes ua—tej ntawd puav leej muaj nqis, thiab tsim nyog nco ntsoov, thiab tsim nyog rau tib neeg qog raws lawm. Nau-a tuav rawv yam uas Vajtswv tau muab tso rau nws lawm. Nws yeej ntseeg tias Vajtswv txhua lo lus hais mas yeej muaj tseeb tiag; nws yeej tsis ua xyem xyav rau qhov no li. Thiab vim li no, thaum kawg thiaj li tsim tau lub nkoj tiav lawm, ces txhua yam muaj sia uas raug tsim tawm los ntawd thiaj li mus nyob tau hauv lub nkoj lawm” (Txoj Lus, Phau 4. Kev Nthuav Tawm Cov Tawm Tsam Khetos. Lub Ntsiab Tseeb Ob: Nau-a thiab Anplahas Mloog Vajtswv Cov Lus thiab Mloog Nws Lus Li Cas (Ntu Ib)). Thaum kuv xav txog Vajtswv cov lus, kuv zoo siab heev. Nau-a ua raws li Vajtswv hais thiab xav txog Vajtswv. Thaum Vajtswv hais kom Nau-a txua lub nkoj, Nau-a saib Nws cov lus txib muaj nqis thiab ua raws li Nws tej kev cheem tsum. Thaum xub thawj mas nws tsis paub tias yuav txua lub nkoj ntawd li cas, thiab qhov txuas lub nkoj ntawd mas nyuaj heev. Nyob rau xhua txhua theem, nws yuav tsum tau raug kev txom nyem thiab tiv ib txoj kev txom nyem, tiam sis Nau-a ua siab ncaj ncees rau Vajtswv cov lus txib. Yuav kom ua tau Vajtswv cov lus txib tiav mas, nws yuav tsum raug kev txom nyem, tiv kev txom nyem, thiab xuas ntsia thawv ntsia lub nkoj ntawd ib tug zuj zus. Nau-a tiv tau 120 xyoo ces thaum kawg tiav raws li Vajtswv cov lus txib lawm. Txawm Nau-a raug kev txom nyem heev thaum txua lub nkoj ntawd thiab tsis tau zoo kiag li ntawm sab cev nqaij daim tawv los xij, Nau-a yeej ua raws li Vajtswv cov lus txib, ua kom Nws txaus siab, es Nws thiaj li pom zoo. Nau-a lub neej yog ib lub neej uas muaj nqis heev! Muab piv rau Nau-a mas, kuv pom hais tias kuv tsis muaj kev ua neej kiag li. Kuv tsis saib kuv tes dej num kom muaj nqis, kuv tsis ua siab ncaj ncees. Kuv tub nkeeg thiab txawj dag, kuv tsuas yog ua raws li qhov kev tau zoo ntawm sab cev nqaij daim tawv xwb, thiab tsis txaus siab raug kev txom nyem kiag li. Tsis tsim nyog muab kuv hu ua ib tug tib neeg li. Kuv mas ntxim ntxub tiag tiag li! Yog kuv pheej ua li no txuas ntxiv mus es tsis hloov pauv, ces nyob rau thaum kawg kuv yuav plam kuv tes dej num, uas kuv yuav tu siab mus tag kuv ib sim neej.

Ntau hnub tom qab ntawd, kuv npaj kuv lub sij hawm, thiab npaj kuv tus kheej txhua hnub kom muaj qhov tseeb hais txog kev saib xyuas cov los tshiab. Muaj ib hnub nyob rau hauv ib lub rooj sib tham, cov nus thiab cov viv ncaus hais txog ib qho teeb meem hauv tes hauj lwm saib xyuas, ces thaum kuv hnov qee yam uas kuv tsis to taub, kuv xav zam kom dhau qhov ntawd. Kuv xav txog qhov cia lawv tus kheej daws qhov teeb meem ntawd. Tiam sis zaum no, kuv paub hais tias kuv xav ua dog ua dig kom dhau thiab tsis leg lub luag hauj lwm. Kuv xav txog Nau-a tus cwj pwm thiab leg cov lus txib nws ntawd tiag tiag li, ces tom qab ntawd kuv nco ntsoov kho kuv tus yam ntxwv uas tsis yog lawm. Kuv ua tib zoo mloog seb lawv qhia txog qhov tseeb los daws qhov teeb meem ntawd li cas, ces thaum lawv xaus lus lawm, kuv mam muab kuv tej tswv yim rau lawv. Kuv ceeb tag li thaum lawv hais tias kuv tej tswv yim ntawd mas zoo. Thaum kuv nrog Viv Ncaus Lis saib xyuas cov los tshiab, kuv xyaum daws cov los tshiab ntawd tej kev nyuaj uas muaj tseeb, thiab yog muaj tej teeb meem uas kuv daws tsis tau, ces kuv thov kom nws pab kiag tam sim ntawd. Ib ntus tom qab ntawd, kuv thiaj li saib xyuas tau cov los tshiab ntawd yam tsis tos leej twg li lawm thiab. Txawm kuv tseem muaj ntau qhov ua tsis tau zoo thiab qhov tsis zoo los, kuv yeej mloog tau hais tias kuv tus kheej loj hlob thiab nce qib tuaj lawm, thiab kuv kaj siab tuaj lawm ntau. Qhov kev to taub thiab tej txiaj ntsim uas kuv tau txais ntawd puav leej yog qhov txiaj ntsim ntawm Vajtswv cov lus xwb. Ua Vajtswv tsaug!