5. Qhov Teeb Meem uas Hais Tsis Tau Lus Kom Ncaj Ncees
Kuv lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg nyob rau xyoo 2017 lawm. Kuv lub sij hawm uas qhia rau cov nus thiab cov viv ncaus ntawd mas zoo siab heev vim kuv tau kawm ntau qhov tseeb ntxiv thiab tau txais qee yam los ntawm txhua lub rooj sib txoos ua ke los. Thaum xub thawj mas txhua yam yog los ntawm txoj kev sib sau ntawv sib tham xwb, qhov ntawd yog, peb sau txhua yam ntawm peb txoj kev sib txuas nyob os lai xwb. Yog li ntawd kuv tsis tau npog ib yam dab tsi li, thiab kuv nquag tham txog kuv txoj kev to taub txog Vajtswv cov lus heev. Cov thawj coj pheej hais tias kuv muaj ib txoj kev to taub zoo heev ces cov nus thiab cov viv ncaus thiaj li hwm kuv. Lawv hais tias lawv nyiam mloog kuv tej lus qhia thiab tias kuv cov lus Askiv mas zoo heev. Kuv zoo siab heev uas tau hnov lawv cov lus qhuas thiab kuv xav tias kuv ua tau zoo lawm. Ces ib tug viv ncaus txawm tawm tswv yim kom peb pib hu tham hauv xov tooj rau tej kev sib txoos ua ke, ces teeb meem txawm pib tshwm tuaj.
Nyob rau hauv thawj lub rooj sib txoos ua ke uas hu sib tham hauv xov tooj ntawd, tom qab peb nyeem Vajtswv cov lus lawm, ces txawm muaj ob peb tug viv ncaus qhia lawv txoj kev to taub txog zaj lus ntawd ua ntej. Kuv ntshai heev ces thiaj li tsis tshua hnov lawv tej lus qhia. Yav dhau los mas puav leej yog sau ntawv sib txuas lus xwb, yog li ntawd kuv thiaj li tsis swm qhov siv lub suab qhia ncaj qha li. Qhov hais lus sib tham mas yog qhov kuv ua tsis tau zoo li. Thaum sau ntawv sib txuas lus mas kuv xaiv tau kuv cov lus thiab sau kom npliag lias. Tiam sis thaum sib tham kiag tam sim ntawd lawm, ces kuv tsis muaj sij hawm txaus los npaj. Txawm kuv muaj qee yam kev to taub txog Vajtswv cov lus los xij, kuv ntshai tias kuv tej lus qhia yuav ntxhov quas niab thiab tsis muaj paus muaj ntsis, tias kuv cov lus Askiv tsis npliag, thiab kuv ntshai tsam cov nus thiab cov viv ncaus tag kev cia siab rau kuv. Kuv nyuaj siab heev rau tej teeb meem no txog ntua thaum lub rooj sib txoos ua ke ntawd xaus li. Kuv txawm ua xyem xyav tias xyov puas tsim nyog kuv qhia los tsis tsim nyog. Yog kuv tsis qhia, ces lwm tus yeej yuav xav hais tias kuv tsis mob siab qhia xwb, thiab cov thawj coj yuav tag kev cia siab rau kuv. Tiam sis yog kuv qhia, ces kuv yuav tsum tau qhib lub paj taub, thiab kuv ntshai yog kuv qhia tsis tau zoo, ces cov nus thiab cov viv ncaus yuav saib tsis taus kuv. Qhov ntawd yuav rhuav kuv tus yam ntxwv zoo rau ntawm lawv. Tej kev xav no ua rau kuv ntshai heev ces kuv thiaj li qhia tsis tau ib yam dab tsi li lawm. Ob tug viv ncaus uas tau hloov kuv los ntseeg ntawd puav leej nyob rau hauv lub rooj sib txoos ua ke ntawd thiab, thiab kuv xav hais tias nkawv yeej yuav tag kev cia siab yog kuv qhia tsis tau zoo. Ces Folam Sib, uas yog ib tug thawj coj, txawm hais rau kuv hais tias, “Viv Ncaus Venelas, koj qhia puas tau? Txhua tus twb qhia lawm. Puas yog koj hnov qab qhia lawm?” Nws lub suab lus ua rau kuv mloog zoo li nws tag kev cia siab lawm. Kuv hnov xeeb txob thiab txaj muag tiag tiag li. Yuav kom zais tau qhov kuv ua tsis tau zoo no thiab tuav tau kuv tus yam ntxwv kom lawv txhob pom mas, kuv yuav tsum tau txiav txim siab hais tias txij thaum ntawd mus kuv yuav sau yam kuv xav qhia ua ntej tuaj sib txoos ua ke, ces tom qab ntawd kuv cia li nyeem qhov nawd tawm thaum nws yog kuv zeeg lawm xwb. Ces kuv thiaj li yuav tsis ntshai heev. Lawv yuav xav hais tias kuv yog ib tug neeg hais lus tau npliag thiab tias kuv tej lus qhia mas raug lub ntsiab heev. Kuv xav hais tias qhov no yog ib lub tswv yim zoo.
Muaj ib hmos, ob peb tug viv ncaus uas nyob hauv Teb Chaws Suav tau tuav peb lub rooj sib txoos ua ke. Peb sawv daws puav leej siv lus Askiv los sib txuas lus kom yooj yim. Ib co nus thiab viv ncaus mas txaj muag heev vim lawv hais lus Askiv tsis tshua zoo heev, tiam sis lawv tseem muaj peev xwm qhia lawv txoj kev to taub txog Vajtswv cov lus thiab. Thaum txog kuv zeeg mas, kuv qhuag heev rau kuv txoj kev qhia thiab kuv hais lub suab zoo li ruaj siab heev vim kuv twb muab yam uas kuv xav hais ntawd sau cia ua ntej lawm. Kuv yog tus los qhia kawg kiag. Kuv ua twb zoo hais kom zoo tshaj plaws kom lawv thiaj li tsis paub tias yog kuv nyeem xwb. Tom qab ntawd, lawv sawv daws puav leej qhuas kuv tej lus qhia thiab hais tias tej lus qhia ntawd pab tau lawv heev thiab tias kuv cov lus Askiv mas zoo heev li. Kuv zoo siab twj ywm uas hnov lawv qhuas thiab mloog zoo li kuv ntxias tau lawv lawm. Tom qab ntawd kuv txawm raug xaiv los ua ib tug thawj coj pab pawg lawm thiab kuv haj yam mob siab rau yam uas lwm tus xav txog kuv ntxiv. Tiam sis kuv pib hnov txhaum thiab tsis tshua kaj siab li thaum lwm tus qhuas kuv vim kuv tsis pub kom lawv pom tias kuv zoo li cas tiag. Kuv tsis xav tias qhov ua li ntawd mas yog lawm, tiam sis kuv yeej tseem pheej ua tas zog li ntawd. Nyob rau hauv tej rooj sib txoos ua ke mas kuv tsis mloog lwm tus tej lus qhia kiag li vim kuv tas zog sau kuv tus kheej txoj kev to taub xwb. Kuv pheej mob siab rau qhov sau qee yam uas hais tau zoo los ua kom tau raws li kuv txoj kev khav theeb thiab tsom kwm kuv lub koob lub npe xwb. Qhov ntawd yim ua rau kuv kawm tsis tau dab tsi los ntawm tej rooj sib txoos ua ke ntawd thiab tej rooj sib txoos ua ke ntawd tsis muaj qab hau rau kuv li. Kuv paub hais tias qhov ua li no mas tsis zoo, thiab kuv xav hloov, qhia lwm tus txog qhov tseeb, tiam sis kuv tsis muaj cuab kav rhais kauj ruam ntawd. Kuv ntshai tias yog lwm tus paub tias kuv twb sau kuv tej lus qhia ua ntej lawm, ces lawv yuav saib tsis taus kuv thiab tej zaum lawv yuav hais tias kuv mas tsis ncaj ncees kiag li, tias kuv mas dag thiab txawj ntxias heev. Kuv twb xav tsum tsis ua li ntawd ntau zaus lawm vim ua li ntawd tsis muaj txiaj ntsim dab si rau kuv kiag li, thiab qhov ntawd ua rau kuv tsis kaj siab kiag li, tiam sis qhov kev ntxhov siab ntawd tsis muaj ib yam dab tsi los piv tau kuv tus yam ntxwv thiab lwm tus txoj kev qhuas li vim kuv mob siab txog kuv lub ntsej muag thiab lub koob lub npe dua lawm. Tiam sis txhua zaus kuv ua tej no mas, kuv hnov txhaum loj kawg nkaus li. Kuv haj tseem sim ua kom kuv tus kheej ntseeg hais tias kuv tsuas ua li ntawd kom kuv thiaj li qhia tau kuv txoj kev to taub kom meej meej thiab kom yog ntxiv xwb, ces tom qab ntawd lwm tus thiaj li yuav muaj peev xwm to taub yam uas kuv hais ntawd zoo dua tuaj. Kuv pheej hais rau kuv tus kheej hais tias qhov ntawd tsis ua li cas, tiam sis kuv txoj kev tsis kaj siab thiab kev ua txhaum pheej tsim txom kuv. Kuv xav rau kuv tus kheej hais tais, “Yog kuv tso tau kuv txoj kev khav theeb tseg thiab qhia qhov tseeb rau txhua tus, ces kuv yuav muaj peev xwm khiav dim qhov no. Tiam sis kuv ntshai tias yog lawv paub hais tias kuv cov lus Askiv tsis zoo kiag li, ces lawv yuav luag kuv. Ces kuv yuav fim lawv tau li cas?” Kuv cov nyom txog qhov no los ntev lawm, tiam sis kuv tseem qhib tsis tau kuv lub siab tawm li. Thaum tsis paub tias yuav ua dab tsis ntxiv li lawm, ces kuv thiaj li sim xyaum kom kuv txawj hais lus zoo tuaj. Kuv xyaum qhia kuv tus kheej nyob rau hauv tsev, kaw kuv tus kheej cov lus cia ces tom qab ntawd mam li mloog seb nws nrov zoo li cas. Kuv thiaj li xav hais tias, “Yog kuv tsim kho tau kom kuv txawj hais lus li no mas, kuv yuav tsis tau sau kuv tej lus qhia ua ntej mus ntxiv lawm, thiab cia li qhia ncaj qha kiag lawm xwb. Ces tsis tas yuav qhia qhov tseeb rau txhua tus li. Tsuav kuv tseem qhia tau zoo thiab kuv cov lus Askiv npliag lias xwb, ces lawv yeej yuav hwm kuv lawm.” Tiam sis txawm kuv yuav xyaum npaum li cas los xij, kuv yeej ntshai txhua txhua zaus thaum qhia nyob rau hauv tej rooj sib txoos ua ke li, yog li ntawd kuv thiaj li nyeem kuv tej lus qhia li kuv pheej ua los lawm xwb. Kuv tag kev cia siab heev rau kuv tus kheej lawm vim kuv muaj ib tug yam txwv tsis zoo uas cuam tshuam rau kuv tej dej num lawm. Thaum kawg kuv thiaj li raug rho tawm lawm.
Muaj ib zaug nyob rau hauv ib lub rooj sib txoos ua ke, muaj ib tug viv ncaus qhia ib zaj lus ntawm Vajtswv cov lus, cov lus ntawd txhawb kuv heev li, Vajtswv cov lus hais tias: “Yog koj xav kom lwm tus tso siab rau koj, ces ua ntej tshaj plaws koj yuav tsum coj ncaj ncees. Yuav kom ua tau ib tug neeg ncaj ncees, koj yuav tsum xub qhib koj lub siab ua ntej kom txhua tus neeg tuaj yeem saib pom nws, pom txhua yam uas koj tab tom xav, thiab tig ntsia koj lub ntsej muag tiag ib pliag; koj yuav tsum txhob sim ua cuav tsab los sis npog koj tus kheej kom xws li yog neeg zoo. Tsuas yog ua li ntawd nkaus xwb tib neeg thiaj li tso siab rau koj thiab xam tias koj yog neeg ncaj ncees. Qhov no yog lub hauv paus xyaum ua raws, thiab yog yam yuav tsum muaj ua ntej, ntawm kev ua ib tug neeg ncaj ncees. Koj ib txwm ua txuj, ib txwm lom txwm ua kom yog kev dawb huv, kev muaj txiaj ntsim, kev zoo thiab lom txwm coj tej qauv zoo tshaj. Koj tsis cia tib neeg pom koj txoj kev lwj liam thiab koj tej kev ua tsis tau. Koj muab ib tug duab cuav rau tib neeg kom lawv ntseeg tias koj yog neeg coj ncaj, zoo tshaj, qhuas yus tus kheej-tias muab kev fij tuag nti, tsis xaiv ntsej muag, thiab tsis qia dub. Qhov no tsis yog kev ntxias dag thiab kev cuav lod? Txhob muab coj los xyaum ua ib qho cuav, thiab txhob muab koj tus kheej npog; dua ntawd, qhib koj tus kheej thiab koj lub siab rau lwm tus pom. Yog koj tuaj yeem qhib koj lub siab rau lwm tus pom, thiab qhib tag nrho koj tej kev xav thiab tej kev npaj ua—tag nrho ntawm sab zoo thiab sab phem—ces koj tseem tsis yog neeg ncaj ncees los? Yog koj tuaj yeem qhib koj tus kheej lub siab rau lwm tus pom, ces Vajtswv, los ib yam nkaus, yuav pom koj thiab hais tias, ‘Koj twb qhib koj tus kheej lub siab rau lwm tus pom lawm, thiab yog li koj yeej yog tus coj ncaj ncees los rau ntawm Kuv xub ntiag lawm, tau ib yam nkaus.’ Yog koj tsuas qhib koj tus kheej lub siab rau Vajtswv nkaus xwb thaum lwm tus tib neeg tsis pom, thiab ib txwm ua txuj ua kom yog tus zoo tshaj thiab muaj txiaj ntsim los sis ntxim zoo li yog tus coj ncaj ncees thiab tsis qia dub thaum nyob rau hauv lawv txoj kev sib koom, ces Vajtswv yuav xav thiab hais dab tsi? Nws yuav hais tias, ‘Koj yog tus neeg txawj dag tiag tiag; koj yog tus neeg hais lus zoo siab nkhaus thiab siab nqaim tiag tiag li; thiab koj tsis yog ib tug neeg ncaj ncees li.’ Yog li Vajtswv yuav txiav txim rau koj. Yog koj xav ua ib tug neeg ncaj ncees, ces txawm koj yuav nyob rau ntawm Vajtswv los sis lwm tus tib neeg lub xub ntiag thaum twg los xij, koj yuav tsum muaj peev xwm muaj ib lub siab uas dawb paug thiab qhib lug txog yam uas koj tuaj yeem qhia tau kom pom tseeb, thiab txog tej lus hauv koj lub siab. Qhov no puas ua tau yooj yim? Nws cheem tsum ib lub caij nyoog ntawm lub sij hawm ntawm kev xyaum ua nrog rau qhov nquag thov Vajtswv. Nej yuav tsum xyaum hais lus kom yooj yim thiab qhib siab lug tawm hauv lub tuaj rau hauv txhua yam. Nrog rau hom kev xyaum no, nej thiaj li nce qib tau. Yog nej ntsib ib qho kev nyuaj loj, nej yuav tsum thov Vajtswv thiab nrhiav qhov tseeb; nej yuav tau ua rog rau hauv nej lub siab thiab kov kom yeej cev nqaij daim tawv, kom mus txog thaum nej muab qhov tseeb coj los xyaum ua. Kev cob qhia koj tus kheej zoo li ntawd, ib qho me ntsis zuj zus, koj lub siab yuav maj mam qhib zuj zus, thiab koj mam li qhib siab ntau zuj zus, thiab yam koj hais thiab ua yuav ua tau los yuav sib txawv dua yav dhau los. Koj tej kev dag thiab coj tsis ncaj yuav muaj tsawg dua, ces koj thiaj li yuav muaj peev xwm los nyob tau ntawm Vajtswv xub ntiag. Tom qab ntawd koj thiaj li yuav ua tau ib tug neeg coj ncaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees). Vim Vajtswv txoj lus es kuv thiaj li pom hais tias Vajtswv nyiam cov tib neeg coj ncaj, thiab Nws tsis nyiam kev ntxias dag los sis kev coj tsis ncaj. Txawm qhov ntawd yog qee yam uas zoo los sis phem los xij, peb yuav tsum tau qhia peb lub siab tawm nyob rau hauv tej lus qhia, txhob hais lus dag, thiab txhob muaj kev ntxias dag nyob rau hauv peb lub siab li. Peb yuav tsum tsis txhob ua txuj ua yam uas peb tsis yog nyob rau ntawm lwm tus lub xub ntiag, thiab peb yuav tsum tsis txhob npog peb tus kheej. Qhov ntawd thiaj li yog coj ncaj. Kuv hnov txhaum loj heev li thaum kuv nyeem Vajtswv cov lus no vim kuv tsis yog ib tug neeg coj ncaj. Kuv xav qhia tawm rau txhua tus heev, xav tso kuv txoj kev khav theeb thiab lub koob lub npe tseg, tiam sis tab txawm kuv twb sim tso tseg ob peb zaug lawm los xij, kuv yeej tsis muaj peev xwm tso tseg tau qhov no li. Kuv ntshaw kom muaj ntsej muag heev. Kuv raug kuv tus kheej txoj kev khav theeb muab kaw tseg lawm. Kuv pom tias kuv mas qias vuab tsuab heev. Kuv hnov txhaum loj heev thiab ntxhov siab thiab. Kuv thiaj li xav rau kuv tus kheej hais tias: “Vim li cas kuv thiaj li pheej ua txuj, ua kom tib neeg nyiam kuv qhov tsis zoo xwb? Vim li cas kuv thiaj li xyaum ua tsis tau raws li qhov tseeb thiab txhob dag lawm? Puas yog kuv txoj kev ntseeg Vajtswv tsis muaj qab hau dab tsi li? Puas yog txhua lub rooj sib txoos ua ke thiab txhua yam uas caum qhov tseeb ntawd tsis muaj qab hau dab tsi li?” Kuv mloog zoo li kuv khiav tsis dim tej kev khi ntawm kuv tus kheej txoj kev khav theeb li. Kuv xav tawm ntawm peb pab pawg mus es mus siv qee lub sij hawm los kho kuv tus kheej kom muaj tus yam ntxwv zoo, thiab thaum kuv kho tau kuv tus yam ntxwv lawm, ces kuv yeej tuaj yeem rov qab los koom tej rooj sib txoos ua ke ntawd thiab tseg tsis ua tej ntawd lawm. Yog li ntawd kuv thiaj li tau tawm ntawm pab pawg mus thiab tseg tsis siv kuv tus as khauj lawm, xav nyob ib leeg thiab tig xav txog kuv tus kheej xwb. Kuv chim siab thiab ntxhov siab heev tau ib ntus, thiab kho siab thiab. Kuv tag kev cia siab rau kuv tus kheej heev li. Kuv twb yog ib tug ntseeg los tau ob xyoos lawm, tiam sis kuv tseem muaj teeb meem txog qhov coj ncaj thiab tso tsis tau kuv txoj kev khav theeb tseg li. Kuv txhawj txog lwm tus txoj kev xav txog kuv heev li. Qhov xav hauv nruab siab txog lwm tus tej kev xav tom qab paub qhov tseeb ntawd lawm mas ua rau kuv txaj muag heev.
Yam uas kuv ua tau nyob rau lub sij hawm ntawd ces yog nyeem Vajtswv cov lus xwb. Muaj ib hnub kuv txawm pom zaj lus no: “Kev caum qhov tseeb yog yam tseem ceeb tshaj plaws, thiab kev xyaum ua raws qhov kev caum qhov tseeb ntawd ces yeej yooj yim heev tiag. Koj yuav tsum pib los ntawm kev ua ib tug neeg ncaj ncees thiab hais lus tseeb, thiab qhib koj lub siab. Yog hais tias muaj qee yam uas koj txaj muag hais rau koj cov kwv tij thiab cov nkauj muam dhau lawm, ces koj yuav tsum txhos caug ntua thiab qhia qhov ntawd rau Vajtswv los ntawm lo lus thov. Koj tsim nyog hais dab tsi rau Vajtswv? Qhia yam uas nyob hauv koj lub siab rau Vajtswv; tsis txhob hais tej lus dag ntsuav uas tsis muaj qab hau los sis sim dag ntxias Nws. Pib los ntawm kev ua neeg ncaj ncees. Yog hais tias koj tau qaug zog lawm, ces hais tias koj tau qaug zog lawm; yog hias tias koj tau ua phem lawm, ces hais tias koj tau ua phem lawm; yog hais tias koj tau dag ntxias lawm, ces hais tias koj tau dag ntxias lawm; yog hais tias koj tau muaj tej kev xav phem thiab lim hiam lawm, ces cia li qhia Vajtswv txog tej ntawd. Yog hais tias koj yeej ib txwm sib tw kom tau hauj lwm xwb, los qhia qhov no rau Nws ib yam nkaus thiab. Cia Vajtswv qhuab ntuas koj; cia Nws npaj ib cheeb tsam puag ncig rau koj. Cia Vajtswv pab koj hla kom dhau txhua yam ntawm koj tej kev nyuaj thiab daws txhua yam ntawm koj tej teeb meem. Koj yuav tsum qhib koj lub siab; tsis txhob kaw. Tab txawm hais tias koj muab Nws kaw rau sab nraud los xij, Nws yeej tseem tuaj yeem pom tau rau hauv koj. Txawm li cas los xij, yog hais tias koj qhib siab lug rau Nws, koj tuaj yeem tau txais qhov tseeb. Yog li ntawd koj yuav xaiv txoj kev twg? Pib los ntawm kev ua neeg ncaj ncees, thiab los ntawm txhua yam no tsis txhob yog lam ua txuj xwb. Peb twb tau sib qhia qhov tseeb txog kev ua neeg ncaj ncees los tau ntau lub xyoo lawm, tiam sis niaj hnub no tseem muaj ntau tus tib neeg uas yeej tseem tsis quav ntsej, cov uas hais lus thiab tsuas ua raws li lawv tus kheej tej kev npaj siab, tej kev ntshaw, thiab tej hom phiaj xwb, thiab cov uas yeej tsis lees txim hloov dua siab tshiab li. Qhov no puas yog tus cwj pwm ntawm cov tib neeg ncaj ncees? (Tsis yog.) Vim li cas Vajtswv thiaj li hais kom tib neeg coj ncaj ncees? Nws puas yog ua kom tswj tau lawv yooj yim dua? (Tsis yog.) Kev ua neeg ncaj ncees yog qhov pib ntawm kev zoo li ib txwm muaj, ntawm qhov uas Vajtswv hlub, ntawm kev tau txais qhov tseeb; thiab nws kuj yog txoj kev qhia uas tseem ceeb tshaj plaws ntawm kev muaj kev ua neej thiab kev zoo nkaus li ib tug tib neeg tiag tiag thiab. Yog li ntawd, tus tib neeg uas yeej tsis tau coj ncaj ncees, los sis xav ua neeg ncaj ncees li, ces yog tus uas tsis to taub qhov tseeb, los sis tau txais qhov tseeb li. Yog hais tias koj tsis ntseeg Kuv, mus saib rau koj tus kheej, los sis mus kom ntsib kom pom qhov no rau koj tus kheej. Koj lub siab tsuas qhib tau yog hais tias koj xyaum ua raws li kev coj ncaj nkaus xwb, thiab tsuas yog thaum koj lub siab qhib lawm xwb mas qhov tseeb thiaj li yuav nkag tau los rau hauv koj thiab, dhau ntawd, koj thiaj li tuaj yeem to taub thiab tau txais qhov tseeb ntawd. Yog hais tias koj lub siab pheej kaw nti tas li xwb, thiab koj yeej tsis hais lus tseeb rau leej twg li, thiab koj pheej hais tsis raug qhov teeb meem thiab hais tsis tau li, ces yam uas yuav tshwm sim los ntawm koj txoj kev zam txhua yam ntawd yog dab tsi? Thaum kawg koj yuav rhuav tshem koj tus kheej, thiab koj yuav tsis muaj peev xwm nkag siab los sis tau txais ib qho tseeb hlo li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob). Zaj lus no qhia rau kuv pom hais tias kev to taub qhov tseeb mas tseem ceeb tshaj txhua yam, tshaj kuv lub ntsej muag thiab kuv txoj kev khav theeb lawm. Yuav kom tau txais qhov tseeb mas, kuv yuav tsum tau pib coj ncaj. Ib yog ib, thiab ob yog ob xwb—tsis txhob ua txuj los sis coj tsis ncaj ntxiv lawm. Twb tau ib ntus lawm, los kuv pheej ua txuj, dag ntxias lwm tus. Kuv sau yam kuv xav qhia kom lawv thiaj li yuav xav hais tias kuv muaj ib txoj kev to taub zoo thiab kuv hais lus Askiv zoo, ces lawv thiaj li yuav qhuas kuv thiab hwm kuv tas li. Txawm kuv muaj kev txhaum thiab ntxhov siab kawg nkaus los xij, kuv tsis muaj cuab kav qhia tawm rau cov nus thiab cov viv ncaus li. Kuv tsis xav kom lawv pom tej kev uas kuv ua tsis tau zoo es saib tsis taus kuv, hais tias kuv yog ib tug neeg dag. Kuv haj tseem yeem tawm ntawm peb pab pawg mus dua li qhov qhia qhov tseeb rau lawv thiab. Kuv mas phem kawg li. Kuv ras dheev hais tias qhov nyuaj siab heev ntawd ces yog qhov kev rhuav tshem uas Ntxwgnyoog tab tom ua rau kuv thiab tias qhov ua neej li no mas yog tuav kuv txoj kev to taub lub neej txoj sia cia xwb. Qhov ntawd haj tseem yuav ua rau kuv puas tsuaj tau thiab. Kuv yuav tsum muaj cuab kav qhia lwm tus txog yam uas nyob rau hauv kuv lub siab tiag tiag kom kuv thiaj li xyaum ua tau qee yam kev coj ncaj. Txawm qhov qhia qhov tseeb ntawd yuav meem txom npaum li cas los xij, kuv paub hais tias kuv yuav tsum tau khiav ntawm txoj kev ua txhua yam uas yuam kev no mus. Vajtswv nyiam cov tib neeg coj ncaj thiab qias cov tib neeg phem. Yog kuv pheej ua txuj tas li, hais lus cuav rau lwm tus thiab tsis coj kom ncaj ncaj, ces kuv yuav ua neej nyob rau hauv txoj kev tsaus ntuj thiab kuv yeej yuav tsis tau txais Vajntsujplig tes hauj lwm li. Kuv yeej yuav tsis tau txais qhov tseeb li. Kuv yuav tsum tau muab kuv tus kheej nthuav tawm kom dav fo rau Vajtswv es Nws thiaj li yuav pab tau kuv daws txoj kev dag uas nyob rau hauv kuv no. Yog li ntawd kuv thiaj li thov Vajtswv, thov kom Vajtswv coj kuv kev los xyaum ua raws li qhov tseeb thiab ua ib tug neeg coj ncaj.
Tom qab ntawd, thaum kawg kuv tau qhia tawm thiab qhia rau peb tus thawj coj uas yog Viv Ncaus Khaunis. Kuv qhia rau nws hais tias vim li cas kuv thiaj li tau tawm ntawm peb pab pawg mus thiab kaw kuv tus as khauj lawm. Tom qab hnov kuv hais lawm, Viv Ncaus Khaunis thiaj li hais tias, “Kuv yeej tsis tau saib tsis taus koj txog qhov ntawd li as, thiab kuv ua tsaug ntau ntau rau koj txoj kev coj ncaj.” Kuv kaj siab lawm ntau uas tau qhia tawm thiab qhia rau nws. Kuv paub tseeb tseeb hais tias qhov coj ncaj ntawd mas zoo npaum li cas, vim qhov xyaum ua raws li qhov tseeb ntawd ua rau kuv dim plaws ntawm kuv tej kev ntxhov siab tag nrho huv si lawm. Viv Ncaus Khaunis kuj tau muab qee yam tswv yim qhia rau kuv thiab, hais tias thaum kuv qhia kuv txoj kev to taub txog Vajtswv cov lus ntawd, kuv tsis tas yuav hais kom ntaug lees los sis qhia ib hom tswv yim uas siab siab li. Tsuav qhov ntawd tawm hauv nruab lub siab tuaj xwb ces yeej txaus lawm, vim qhov ntawd yog qhov kuv xav thiab paub lawm. Kuv ua raws li nws qhia thiab npaj txhij yuav muab qhov ntawd coj los xyaum ua raws li ntawd lawm.
Tom qab ntawd, lwm tus viv ncaus tau xa ib zaj lus ntawm Vajtswv cov lus tuaj rau kuv uas qhia tau zoo heev. Vajtswv cov lus hais tias: “Tsis hais tias tshawb nrhiav qhov tseeb hos, tib neeg feem coob tseem ho muaj lawv tus kheej tej txheej txheem. Lawv tus kheej tej kev ntshaw, lub ntsej muag, thiab qhov chaw los sis qhov chiv meem lawv tuav uas lwm tus tib neeg pom mas yog qhov tseem ceeb tshaj rau lawv. Tej no thiaj li yog tej uas lawv nyiam nkaus xwb. Lawv tuav rawv txhawm rau lub neej txoj sia. Thiab qhov Vajtswv xam pom thiab saib lawv zoo li cas ntawd yog qhov tseem ceeb thib ob xwb; vim rau qhov lub sij hawm no, lawv tsis quav ntsej qhov ntawd; vim rau qhov lub sij hawm no, lawv tsuas xav txog qhov seb lawv puas yog tus thawj coj ntawm pab pawg, seb lwm tus tib neeg puas hwm lawv thiab mloog yam lawv hais xwb. Tej no yog tej tseem ceeb tshaj plaws rau lawv. Thaum lawv nyob rau hauv ib pab pawg lawm, yuav luag txhua tus tib neeg yeej nrhiav hom chiv meem no, tej hom cib fim no. Thaum lawv muaj peev xwm siab heev lawm, ces lawv yeej xav ua tus muaj hwj chim siab tshaj plaws xwb xwb li; yog hais tias lawv muaj ib nrab peev xwm xwb, los lawv yeej tseem xav tuav ib txoj hauj lwm uas siab dua li lwm tus tib neeg uas muaj ib nrab peev xwm rau hauv pab pawg ntawd thiab; thiab yog hais tias lawv tuav ib txoj hauj lwm qis nyob rau hauv pab pawg ntawd, uas muaj ib nrab peev xwm thiab muaj cuab kav ib nrab xwb los, lawv kuj xav kom lwm tus hwm lawv ib yam nkaus thiab, lawv tsis xav kom lwm tus saib tsis taus lawv. Cov tib neeg no lub ntsej muag thiab lub meej mom yog qhov lawv yuav tsum ua kom tau: Lawv yuav tsum tuav rawv tej no. Lawv muaj tsis tau txoj kev ncaj ncees, thiab tsis muaj qhov Vajtswv pom zoo los sis lees txais yuav li, tiam sis nyob rau hauv ib pab pawg mas, lawv yeej tsis plam lub hwv tsam los txeeb kom tau ntsej muag, meej mom, thiab kom lwm tus qhuas li—uas yog Ntxwgnyoog tus moj yam. Tib neeg feem coob tsis muaj kev paub txog qhov no. Nws yog lawv txoj kev ntseeg tias lawv yuav tsum tuav rawv rau lub ntsej muag qub qub no kom mus txog thaum kawg kiag xwb. Lawv tsis paub tias tsuas yog thaum tej yam uas tsis muaj qab hau thiab ntiav ntiav no raug muab pov tseg thiab muab tso tseg tag nrho lawm xwb mas lawv thiaj li yuav dhau los ua tau tus neeg uas muaj kev txiav txim siab. Cov tib neeg uas tsim meej mom rau lawv lub neej txoj sia, plam lawv lub neej txoj sia. Lawv tsis paub tias dab tsi yog qhov phom sij. Yog li ntawd, thaum lawv ua, lawv thiaj li pheej tshwj qee yam cia, lawv pheej ua txhua yam los tiv thaiv lawv tus kheej lub ntsej muag thiab lub meej mom, lawv muab tej no ua ntej, tsuas yog hais lus raws li lawv tus kheej tej kev nkag siab, rau lawv tus kheej txoj kev tiv thaiv cuav xwb. Txhua yam lawv ua yog ua rau lawv tus kheej xwb. Lawv maj nrawm nroos mus rau txhua yam uas ci ntsa iab, ua kom txhua tus paub tias lawv yog ib feem ntawm qhov ntawd thiab. Tseeb tiag qhov ntawd yeej tsis muaj ib yam dab tsi cuam tshuam rau lawv li, tiam sis lawv yeej tsis xav ua tus tuaj tom qab, lawv ib txwm ntshai tsam lwm tus tib neeg saib tsis taus lawv, lawv ib txwm ntshai tsam lwm tus tib neeg hais tias lawv tsis muaj dab tsi, tias lawv tsis muaj peev xwm ua ib yam dab tsi, tias lawv tsis muaj kev txawj li. Tsis yog txhua yam no puav leej raug coj los ntawm lawv tus moj yam phem lod? Thaum koj muaj peev xwm tso txhua yam no tseg lawm, koj yuav tau so ntau dua thiab muaj kev ywj pheej rau hauv nruab siab; koj yuav taug tau txoj kev mus ua neeg ncaj ncees. Tiam sis rau coob leej ntau tus mas, qhov no tsis yooj yim ua kom tau tiav hlo li. Thaum lub koob yees duab tshwm plaws los mas, lawv sib txeeb mus rau pem hauv ntej xwb; lawv nyiam kom muaj lawv lub ntsej muag nyob rau hauv lub koob yees duab ntawd, yim yees ntau ces yim zoo xwb; lawv ntshai tsam yees tsis txaus xwb, thiab yuav them txhua tus nqi kom tau yees li. Yog li ntawd txhua yam no tsis yog raug coj los ntawm lawv tus moj yam phem lod? (Yog mas.) Tej no yog lawv tus moj yam phem ntag. Yog li ntawd lawv yees koj lawm—zoo li cas xwb? Tib neeg muab koj saib siab—yog li zoo li cas? Lawv pe hawm koj—yog li zoo li cas? Tej no puas muaj ib yam ua tau pov thawj qhia tias koj muaj qhov tseeb? Tej no tsis muaj ib yam muaj nuj nqis hlo li. Thaum twg koj tuaj yeem kov yeej tej no—thaum twg koj tsis quav ntsej tej no, thiab tsis xav tias tej no tseem ceeb ntxiv lawm, thaum twg lub ntsej muag, kev khav theeb, lub meej mom, yam uas lwm tus tib neeg xav txog koj ntawd tsis tswj koj tej kev xav thiab tus cwj pwm, thiab haj yam tsis tswj qhov koj ua koj tes dej num ntxiv lawm—ces koj txoj kev ua koj tes dej num yuav ua tau zoo dua qub, thiab dawb huv dua qub” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vajtswv muab qhov tib neeg saib lawv lub ntsej muag thiab lub meej mom muaj nqis dua li lawv lub neej txoj sia ntawd nthuav tawm, thiab thawj yam uas lawv xav txog thaum ntsib qee yam ces yog lawv lub koob lub npe, kev khav theeb, thiab txoj hauj lwm xwb, tsis yog Vajtswv lub siab nyiam hlo li. Vajtswv tsis xav kom peb ua txuj, thiab Nws tsis xav kom peb muab peb lub koob lub npe tso ua ntej los sis caum peb lub meej mom nyob rau ntawm tib neeg. Tej no tsis yog tej uas pab peb kom tau txais Vajtswv qhov kev pom zoo, thiab tej ntawd ua tsis tau kom peb hloov peb tus moj yam los sis cawm tsis tau kom peb dim. Lub npe thiab lub meej mom yog tej tswv yim uas Ntxwgnyoog siv los ua kom peb qias vuab tsuab thiab khi peb xwb, thiab qhov caum tej no ua rau peb tsis tau dab tsi thiab phem zuj zus tuaj xwb. Ua li ntawd ces thaum kawg peb yuav plam Vajtswv txoj kev cawm dim. Vajtswv tsis nyiam cov tib neeg phem thiab Nws tsis xav kom tib neeg ua kom lwm tus qhuas los sis hwm. Nws xav kom peb tso peb lub koob lub npe thiab lub meej mom tseg, es los caum qhov tseeb thiab ua cov tib neeg coj ncaj xwb. Tsis hais nyob rau ntawm Vajtswv lub xub ntiag los sis nyob rau ntawm lwm tus lub xub ntiag li, peb ua tsis tau cov tib neeg txawj dag los sis tsis ncaj ncees. Kuv pheej qhib los sis qhia tsis tau kuv tej teeb meem tawm rau lwm tus li vim kuv txhawj txog kuv lub ntsej muag thiab kev khav theeb dhau lawm. Qhov tuav rawv kuv tus moj yam phem ruaj ruaj ntawd ua rau kuv tsis muaj peev xwm los xyaum ua raws qhov tseeb. Kuv txoj kev ntshaw kom muaj ntsej muag thiab lub meej mom mas muaj zog dhau lawm.
Tom qab ntawd kuv txawm nyeem lwm zaj lus ntawm Vajtswv cov lus: “Koj puas yuav hais tias kev siv tej kev nyiam los sis kev khav theeb los sis kev dag tib neeg nrog rau tej kev dag ntxias me me ntawd yog ib txoj kev zoo taug, uas txawm hais tias tus tib neeg uas ua tej kev no yuav saib zoo li tau txais txiaj ntsim ntau npaum li cas thiab txaus siab npaum li cas los xij? Qhov ntawd puas yog ib txoj kev caum qhov tseeb? Qhov ntawd puas yog ib txoj kev uas coj tau kev cawm dim los rau yus? Yeej coj tsis tau hlo li. Tej tswv yim thiab tej kev dag no, txawm hais tias tej ntawd yuav ua tau zoo npaum li cas los xij, yeej dag tsis tau Vajtswv, thiab thaum kawg tej ntawd puav leej raug Vajtswv teem txim thiab tsis nyiam kiag li, vim hais tias yam uas zais tom qab tej cwj pwm zoo li no mas yog yus tus kheej txoj kev ntshaw thiab ib hom yam ntxwv thiab lub ntsiab tseeb uas xav muab yus tus kheej los tawm tsam Nws. Nyob hauv nruab siab mas, Vajtswv yeej yuav tsis lees paub ib tug tib neeg zoo li no li ib tug uas ua tiav lawv tes dej num li, thiab yuav hais tias lawv yog ib tug neeg ua phem. Vajtswv lo lus xaus thaum qhuab ntuas cov ua phem ntawd yog dab tsi? ‘Cia li khiav ntawm Kuv mus, nej cov uas ua hauj lwm lim hiam!’ Thaum Vajtwv hais tias, ‘Cia li khiav ntawm Kuv mus,’ cov tib neeg zoo li ntawd xav mus rau qhov twg? Nws tab tom muab lawv cob rau Ntxwgnyoog, coj mus rau ntawm tej chaw uas Ntxwgnyoog nyob. Lub txim thaum kawg rau lawv yog dab tsi? Lawv raug cov ntsuj plig phem tsim txom tuag kiag, uas hais tau tias lawv mag Ntxwgnyoog nqos lawm. Vajtswv tsis xav tau hom neeg no mus ntxiv lawm. Tsis xav tau lawv txhais hais tias Nws yuav tsis cawm lawv lawm. Yog hais tias koj tsis yog ib tug ntawm Vajtswv pab yaj, ces haj yam tsis yog ib tug ntawm cov raws Nws qab li, ces koj tsis nyob rau hauv cov uas Nws yuav cawm. Qhov no yog qhov hais txog ib tug tib neeg uas zoo li no” (Txoj Lus, Phau 4. Kev Nthuav Tawm Cov Tawm Tsam Khetos. Yam Ib: Lawv Npaj Ntxias Kom Tau Tib Neeg). Vim Vajtswv cov lus es kuv thiaj li pom hais tias tib neeg mas ntsej muag ncaj siab nkhaus thiab ntxias dag lwm tus tib neeg lub siab. Txawm lwm tus hwm lawv thiab lawv tau raws li lawv tej hom phiaj thiab tej kev ntshaw los xij, thaum kawg lawv tau dab tsi? Ua li no kom lawv thiaj li dag tau tib neeg mus li ib ntus no, tiam sis lawv dag tsis tau Vajtswv. Nyob rau thaum kawg lawv yuav raug Vajtswv tsis lees paub thiab raug ntiab tawm mus. Vim Vajtswv dawb huv, Nws thiaj li ntxub cov uas tsis caum qhov tseeb thiab zais lawv tus kheej tej kev npaj siab, cov uas xav muaj ib qho chaw nyob rau hauv lwm tus lub siab. Nws saib lawv zoo li cov neeg ua phem thiab Nws tsis lees paub tej dej num uas lawv ua. Kuv xav txog kuv tus cwj pwm ces kuv mam li paub hais tias kuv tau taug txoj kev uas tawm tsam Vajtswv lawm, vim tag nrho kuv tej kev xav thiab tej kev ua mas puav leej yog kom lwm tus qhuas thiab hwm nkaus xwb. Yog kuv pheej taug txoj kev no mus ntxiv, ces thaum kawg kuv kawg raug puas tsuaj xwb. Thaum xav li no kuv thiaj li ntshai heev, kuv ntshai tias Vajtswv yuav tso kuv tseg, kuv ntshai tias Vajtswv yuav muab kuv cob rau Ntxwgnyoog, thiab kuv ntshai tias kuv yuav tsis tau Vajtswv txoj kev cawm dim. Kuv yeej xav hloov tiag tiag li thiab khiav kom dim plaws tus yam ntxwv ntawd, los ua kuv tus kheej tiag tiag, thiab tsis txhob dag los sis txawj ntxias mus ntxiv li lawm.
Tiam sis thaum txog lub sij hawm los xyaum ua tiag tiag lawm, kuv tsis kam ua raws li txoj kev xav uas muab kuv txoj kev qias vuab tsuab thiab tej kev ua tsis tau zoo ntawd qhia tawm rau cov nus thiab cov viv ncaus li. Ces kuv txawm pom lwm zaj lus ntawm Vajtswv cov lus uas txhawb kuv lub zog. Vajtswv cov lus hais tias: “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev ua txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj sawv hlau khi los sis tsis muaj kev mob siab, thiab koj yuav ua neej nyob rau hauv txoj kev kaj. Kev xyaum kom paub los qhib siab lug hais tawm thaum koj qhia ntawd yog thawj kauj ruam los to taub lub txog lub neej txoj sia. Txuas ntxiv, koj yuav tsum xyaum kom paub txheeb xyuas koj tej kev xav thiab tej kev ua kom pom txog qhov tsis yog thiab qhov Vajtswv tsis nyiam, thiab koj yuav tsum tau muab tej ntawd thim rov qab tam sim ntawd thiab kho kom lawv zoo. Lub hom phiaj ntawm kev txhim kho tej ntawd kom zoo yog dab tsi? Nws yog kev lees yuav thiab lees paub qhov tseeb, hos muab tej uas nyob rau hauv koj uas yog Ntxwgnyoog tug ntawd tshem tawm mus es muab qhov tseeb los hloov tej ntawd chaw. Yav tas los, koj ua txhua yam mus raws li koj tus moj yam txawj dag uas yog dag thiab txawj dag xwb; koj xav tias koj ua tsis tau dab tsi li yog tsis dag. Tam sis no uas koj to taub qhov tseeb, thiab ntxub Ntxwgnyoog tej kev ua txhua yam lawm, ces koj thiaj li tsis ua li ntawd mus ntxiv lawm, koj ua nrog txoj kev xav ncaj ncees, kev dawb huv, thiab kev mloog hais. Yog hais tias koj tsis npog ib yam dab tsi, yog hais tias koj tsis ua kom pom meej, ib txoj kev ua txuj, los sis npog txhua yam, yog hais tias koj muab koj tus kheej nthuav tawm tag nrho rau cov kwv tij thiab cov nkauj muam, tsis zais koj tej tswv yim thiab tej kev xav hauv nruab siab, tiam sis ho cia rau lwm tus pom koj tus cwj pwm ncaj ncees, ces qhov tseeb yuav maj mam nrhau cag nyob rau hauv koj, nws yuav tawg paj thiab txi txiv, nws yuav muaj txiaj ntsim, ib qho zuj zus. Yog hais tias koj lub siab ncaj ncees zuj zus, thiab tig mus rau Vajtswv zuj zus, thiab yog hais tias koj paub tiv thaiv tej kev ntshaw ntawm Vajtswv lub tuam tsev thaum koj ua koj tes dej num, thiab koj nyuaj siab thaum koj tiv thaiv tsis tau tej kev ntshaw no, ces qhov no ua pov thawj qhia hais tias qhov tseeb twb tau tshwm sim nyob rau hauv koj, thiab twb tau dhau los ua koj lub neej txoj sia lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vim Vajtswv txoj lus es kuv thiaj li to taub hais tias Vajtswv cov lus yeej hloov tau tib neeg tiag tiag. Thaum peb xyaum qhia tawm txog peb txoj kev qias vuab tsuab tiag tiag thiab nrhiav qhov tseeb lawm, ces peb tej tswv yim uas yuam kev thiab tus moj yam uas qias vuab tsuab ntawd tuaj yam maj mam hloov zuj zus. Vajtswv muab kuv txoj kev xav uas tsis yog ntawd qhia tshwm thiab muab kuv txoj kev caum lub npe thiab lub meej mom uas yuam kev ntawd nthuav tawm, ces tom qab ntawd siv Nws cov lus los coj kuv kev kom thiaj li nrhiav tau txoj kev xyaum ua raws uas yog. Kuv yuav tsum tau ua thawj kauj ruam uas yog los qhia tawm rau lwm tus, tso txoj kev xav txog kuv lub npe thiab lub ntsej muag tseg, tso txoj kev ua tus neeg phem, tus neeg txawj dag, thiab tus neeg tsis ncaj ncees tseg. Kuv yuav tsum tau xyaum ua raws li Vajtswv cov lus thiab cia cov lus ntawd coj kuv kev.
Hnub ib thaum sawv ntxov ntawd, kuv mus koom rooj sib txoos ua ke li txhua zaus thiab hais rau kuv tus kheej hais tias kuv yuav tsum tau ua tiag tiag. Kuv thiaj li thov Vajtswv hais tias, “Vajtswv, zaum no kuv xav los xyaum ua raws qhov tseeb lawm, kom khiav dim Ntxwgnyoog tej saw hlau khi thiab nthuav kuv txoj kev ntsej muag ncaj siab nkhaus thiab kev dag ntxias tawm. Tab txawm yog lawv saib tsis taus kuv los xij, kuv tsuas xav los ua ib tug neeg coj ncaj kom Koj txaus siab xwb. Thov pab kuv kom kuv thiaj li qhia tau tawm thiab coj ncaj.” Kuv hnov kaj siab lawm ntau tom qab thov Vajtswv li no lawm. Nyob rau lub sij hawm uas peb tab tom sib txoos ua ke ntawd, kuv ua twb zoo xav txog Vajtswv cov lus thiab rau siab ntso mloog lwm tus tej lus qhia txog lawv txoj kev paub thiab kev to taub, thiab kuv tsis siv lub sij hawm ntawd los sau kuv tus kheej tej lus qhia, thiab kuv tsis xav txog hom lus qhia twg uas txhua tus thiaj li nyiam lawm. Thaum kuv ua li ntawd, kuv tau txais kev qhuab qhia tshiab los ntawm lwm tus tej lus qhia txog lawv tej kev paub. Thaum kuv yuav qhia, txawm kuv me ntsis ntshai los xij, kuv tsis xav txog qhov kuv tej lus qhia yuav zoo li cas los sis hais npliag lias li cas li, thiab kuv tsis xav li cas rau yam uas lawv yuav hais tom qab lawv paub lawm. Kuv tham txog ib zaj lus ntawm Vajtswv cov lus uas txhawb kuv heev li: “Kev coj ncaj txhais tias muab nej lub siab rau Vajtswv, ua siab tseeb tiag tiag rau Vajtswv rau hauv txhua yam, qhib siab hlo rau Nws rau hauv txhua yam, tsis txhob zais tej uas muaj tseeb, tsis txhob sim dag cov nyob siab saud thiab cov nyob hauv qab koj, thiab tsis txhob ua tej yam uas ntxim li haum Vajtswv siab xwb. Muab hais kom luv luv ces, kev coj ncaj yog ua kom dawb huv rau txhua yam hauv nej tej kev ua thiab cov lus, thiab tsis txhob dag Vajtswv los sis dag tib neeg li. … Yog koj muaj ntau qhov lus zais uas koj tsis xav qhia, yog koj tsis nyiam nthuav tag nrho koj tej lus zais ntawd tawm—koj tej kev nyuaj siab—rau lwm tus pom es kom nrhiav tau txoj kev kaj, ces Kuv hais tias koj yog ib tug uas yuav tsis tau txais kev cawm dim yooj yim, thiab ib tug uas yuav tawm tsis tau ntawm txoj kev tsaus ntuj yooj yim kiag li” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Peb Qhov Lus Ceeb Toom). Kuv muab zaj lus ntawm Vajtswv cov lus no coj los piv rau kuv tus kheej txoj kev paub, muab kuv lub ntsej muag tiag tiag nthuav tawm rau kuv cov nus thiab cov viv ncaus. Kuv qhia rau lawv hais tias, “Txog tav no, kuv tau ua txuj ntau heev lawm, ua txuj hais lus Askiv npliag lias. Qhov tseeb ces yog qhov tias kuv twb muab txhua yam ntawm kuv tej lus qhia ntawd sau cia ua ntej lawm thiab haj tseem muab kaw coj los xyaum kom thiaj li hais tau zoo thiab, kom nej sawv daws thiaj li xav hais tias kuv qhia tau zoo heev. Qhov ntawd tsuas yog ua kom nej qhuas, thiab hwm kuv xwb. Kuv tau dag nej lawm. …” Kuv xav hais tias ntshe lawv yuav tag kev cia siab rau kuv no, tiam sis tsis yog li ntawd, lawv qhia kuv hais tias kuv tsis tas yuav txhawj txog qhov tsam qhia tsis zoo. Vajtswv xav kom peb ua tiag tiag xwb, txhob lam hais lus kom zoo mloog xwb es tsis muaj qab hau. Yog kuv tsis qhia tawm hauv nruab siab tuaj, thiab qhov ntawd tsuas yog txoj kev qhuab qhia uas ncaj ncaj xwb, ces qhov ntawd zoo tus dab tsi? Qhov no txhawb kuv heev li. Lawv tsis tau saib tsis taus kuv hlo li, thiab lawv ib txhia hais tias lawv to taub qhov uas kuv hais, thiab tias kuv txoj kev paub ntawd pab tau lawv lawm. Qhov no yog ib qho zoo uas ua rau kuv ceeb tag li. Tom qab qhia tawm rau txhua tus txog kuv txoj kev qias vuab tsuab lawm, ces kuv kaj siab lawm. Ntxwgnyoog siv txoj kev khav theeb thiab lub koob lub npe los khi kuv thiab tsis pub kuv xyaum ua raws qhov tseeb li, tiam sis thaum kuv kawm paub kuv tus kheej los ntawm Vajtswv cov lus, xyaum ua ib tug neeg coj ncaj thiab qhia tawm yam ncaj ncees lawm, ces kuv paub tias kuv rhais ib kauj ruam los ze zog rau ntawm Vajtswv lawm thiab tshem tej kev tsis tshua ntseeg thiab tej kev cuam tshuam ntawm kuv thiab kuv cov nus thiab cov viv ncaus no tawm mus lawm. Tau ntev lawm, kuv tau xaiv los zais kuv tus kheej kom ua tau zoo raws kuv txoj kev khav theeb thiab ua rau lwm tus qhuas xwb, tiam sis qhov ntawd tsis yog qhov Vajtswv xav tau. Tseeb tiag, kuv ua rau Vajtswv mob siab los ntev heev lawm. Tiam sis Vajtswv pheej zam txim thiab ua siab ntev, tos ntsoov kuv tig rov qab los. Kuv ua tsaug ntau ntau rau Vajtswv txoj kev hlub.
Txoj kev paub no qhia rau kuv txog qhov tseem ceeb tshaj plaws ntawm txoj kev caum qhov tseeb. Tib txoj kev uas yuav khiav kom dim tej saw hlau khi ntawm ib tug moj yam phem ces yog ua ib tug neeg coj ncaj thiab xyaum ua raws li qhov tseeb nkaus xwb. Tib txoj kev uas kom tau txais txoj kev zoo siab thiab kev thaj yeeb tiag tiag ces yog xyaum ua raws li qhov tseeb nkaus xwb. Kuv txeev yog ib tug neeg txawj dag heev, ntsej muag ncaj siab nkhaus, tiam sis tam sim no kuv txiav txim siab los xyaum ua raws li qhov tseeb thiab coj ncaj lawm. Qhov no yog qhov uas tseem ceeb tshaj plaws rau kuv. Yam uas kuv xav tau ces yog kom Vajtswv coj kuv kev tas li kom kuv thiaj li muab tau qhov tseeb coj los xyaum ua raws mus ntxiv xwb.
