81. Ib Qho Kev Xaiv Yam Tsis Khuv Xim

Kuv tus hluas nraug thiab kuv sib ntsib thaum ua hauj lwm nyob txawv teb chaws lawm. Wb ob leeg puav leej ntseeg Tswv Yexus thiab keev mus koom pawg ntseeg ua ke tas li. Wb twb nyob ua ke los tau peb lub xyoos lawm, ces wb thiaj li npaj los sib yuav. Nyob rau lub Kaum Hli Ntuj Xyoo 2000, thaum kuv rov qab mus Teb Chaws Suav mus saib kuv niam, kuv cov neeg zej zog tau ua tim khawv txog Vajtswv Tus Uas Muaj Hwj Chim Loj Kawg Nkaus txoj moo zoo ntawm tiam kawg rau kuv, hais tias Tswv Yexus twb rov qab yug los ua neeg lawm, thiab tau nthuav tawm ntau qhov tseeb los txiav txim thiab ntxuav tib neeg kom dawb huv thiab cawm tib neeg kom dim lub pob caus ntawm txoj kev txhaum kom lawv thiaj li yuav nkag tau mus rau lub nceeg vaj saum ntuj ceeb tsheej. Tom qab ntawd, kuv nyeem ntau cov ntawm Vajtswv Tus Uas Muaj Hwj Chim Loj Kawg Nkaus cov lus, thiab pom tias Vajtswv Tus Uas Muaj Hwj Chim Loj Kawg Nkaus nthuav tawm qhov lus zais tob ntawm Vajtswv txoj kev npaj cawm tib neeg rau-txhiab-xyoo los cawm tib neeg, zaj lus uas nyob sab hauv Vajtswv peb theem hauj lwm, qhov lus zais tob ntawm Vajtswv qhov kev yug los ua neeg, thiab kuj nthuav tawm txog qhov Ntxwgnyoog ua qias vuab tsuab li cas rau tib neeg thiab, qhov Vajtswv ua hauj lwm ib kauj zuj zus li cas los cawm tib neeg, qhov Vajtswv ua tes hauj lwm ntawm txoj kev txiav txim nyob rau tiam kawg li cas los xaus rau tiam ntawd, thiab tiam txuas ntxiv los. Qhov tseebthiab tej lus zais tob no mas yog yam uas kuv yeej tsis tau hnov dua nyob rau hauv kuv txoj kev ntseeg los tau ntau lub xyoos lawm. Tsis muaj ib tug neeg muaj koob nrov npe los sis ib tug neeg zoo twg nthuav tawm tau tej yam no li. Qhov no Tswv Yexus cov lus muaj tiav log lawm, “Kuv tseem muaj ntau yam hais rau nej, tab sis nej ris tsis taus tej ntawd tam sim no. Txawm li cas los xij, thaum Nws, tus Ntsujplig ntawm qhov tseeb, los, Nws yuav coj nej mus rau qhov tseeb: vim Nws tsis hais ntawm Nws Tus Kheej xwb; tab sis yam uas Nws hnov, Nws yuav tsum hais: thiab Nws yuav qhia nej paub txog tej uas yuav los” (Yauhas 16:12–13). Kuv paub tseeb tias Vajtswv Tus Uas Muaj Hwj Chim Loj Kawg Nkaus cov lus mas yog qhov tseeb thiab yog Vajtswv lub suab, thiab tias Vajtswv Tus Uas Muaj Hwj Chim Loj Kawg Nkaus yog tus Tswv Yexus uas rov qab los lawm. Kuv mas zoo siab tshaj, thiab xav qhia qhov xov xwm zoo no rau kuv tus hluas nraug kom sai li sai tau. Nws yuav yog ib qho zoo heev yog wb ob leeg puav leej lees txais Vajtswv Tus Uas Muaj Hwj Chim Loj Kawg Nkaus tes hauj lwm nyob rau tiam kawg thiab thaum kawg thiaj li tau nkag mus rau hauv lub nceeg vaj ua ke. Tab sis tom qab ntawd, kuv nco qab tau tias thaum kuv nyob txawv teb chaws, Xib Fwb Vam keev hais txog txoj kev zam “Qhov Xob Laim Sab Hnub Tuaj.” Nws hais tias peb yuav tsum xyuam xim thaum peb rov qab mus rau Teb Chaws Suav, thiab txhob sib txuas lus dab tsi nrog cov tib neeg tuaj ntawm Qhov Xob Laim Sab Hnub Tuaj li. Nws kuj keev mus ncig qee lub nroog hauv Teb Chaws Suav mus saib cov tswv cuab ntawm pawg ntseeg, hais tias muaj cov ntseeg lwm yam nyob rau hauv Teb Chaws Suav thiab, yog li lawv yuav tsum tau xyuam xim. Kuv tus hluas nraug qhuas Xib Fwb Vam heev thiab mloog li nws hais. Yog kuv qhia ncaj nraim rau nws tias kuv lees txais Vajtswv Tus Uas Muaj Hauj Lwm Loj Kawg Nkaus tes hauj lwm nyob rau tiam kawg lawm, nws puas yuav qhia Xib Fwb Vam ne? Tab sis kuv kuj paub tias kuv tus hluas nraug tos ntsoov tus Tswv Yexus qhov rov qab los thiab, yog li ntawd kuv thiaj li xav qhia nws tiag tiag kom sai npaum li qhov kuv qhia tau. Kuv xav tias yog kuv qhia rau nws kom meej meej, ces nws yuav tsum muaj peev xwm lees txais qhov ntawd.

Muaj ib hmo, kuv hu rau nws thiab hais tias, “Wb ob leeg puav leej tos ntsoov rau qhov tus Tswv Yexus rov qab los, yog li koj xav tias tus Tswv Yexus yuav rov qab los li cas?” Tos nco xwb, kiag thaum kuv hais tag, kuv tus hluas nraug txawm hais npau taws ntsuav tias, “Vim li cas nyob nyob es koj cia li nug kuv li no? Vajluskub hais meej meej tias tus Tswv yuav los rau saum ib tauv fuab, yog li yuav muaj qhov tsis ntseeg tau li cas? Koj puas tau tham nrog lwm tus uas tuaj ntawm Qhov Xob Laim Sab Hnub Tuaj rau tim tsev?” Kuv ceeb tag li tias nws teb hnyav heev rau ib nqe lus nug li ntawd xwb. Kuv txawm hais tias, “Wb twb ntseeg tus Tswv los tau ntau xyoo lawm, es wb tsis tau tos ntsoov rau qhov txais tos tus Tswv thiab kom raug coj mus rau hauv lub nceeg vaj saum ntuj ceeb tsheej lod? Ces Tswv Yexus los li cas los? Puas yog lo lus nug no tsis tsim nyog xav txog?” Kuv tus hluas nraug haj tseem npau taws ntxiv thiab hais tias, “Xib Fwb Vam qhia wb pes tsawg zaus lawm tias cov uas tshaj tawm txog qhov Tswv Yexus rov qab los ntawd yog hais cov lus cuav thiab ntxias dag tib neeg xwb? Nws nias qees zaum tas zaum thiab tias wb yuav tsum txhob hu cov tib neeg tuaj ntawm Qhov Xob Laim Nyob Sab Hnub Tuaj lawm. Vim li cas koj tsis mloog? Koj txoj kev ntseeg tus Tswv mas ib txwm khov, tab sis wb nyuam qhuav sib nrug tau ib hlis ntau me ntsis xwb, es koj txawm siv sib txuas lus nrog Qhov Xob Laim Sab Hnub Tuaj lawm! Nco qab ntsoov tias, wb ob leeg puav leej tos ntsoov qhov Tswv Yexus rov qab los, tab sis txawm tias Nws rov qab los los xij, qhov ntawd tsis zoo li Qhov Xob Laim Sab Hnub Tuaj hais, tias Nws yuav rov qab los rau hauv lub cev nqaij daim tawv.” Txawm tias tom qab ntawd kuv hais dab tsi los xij, nws tsis kam mloog li. Thaum kawg, wb cia li khwb xov tooj yam tsis zoo siab hlo li lawm xwb.

Kuv tsis to taub tias vim li cas kuv tus hluas nraug thiaj li ua zoo li ntawd, thiab qhov ntawd ua rau kuv tu siab heev. Nws tsis tos ntsoov rau qhov tus Tswv rov qab los lod? Vim li cas nws thiaj li tawm tsam heev rau qhov kev sib tham txog qhov tus Tswv yuav rov qab los li cas? Hmo ntawd, kuv qau cev pw saum txaj thiab pw tsis tsaug zog li, yog li kuv thiaj li sawv los nyeem Vajtswv txoj lus, uas kuv pom ob peb zaj lus. “Vajtswv tshwm los rau qhov twg, ces qhov tseeb yuav raug muab nthuav tawm rau qhov ntawd, thiab yuav muaj Vajtswv lub suab nyob rau qhov ntawd. Tsuas yog cov neeg uas tuaj yeem lees txais yuav qhov tseeb thiaj tuaj yeem hnov Vajtswv lub suab lus xwb, thiab tsuas yog cov neeg zoo li no xwb thiaj li tsim nyog ua tim khawv pom Vajtswv qhov kev tshwm sim” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Zaj Txuas Tom Kawg 1: Qhov Kev Tshwm Sim ntawm Vajtswv Tau Coj Mus rau hauv ib Tiam Tshiab Lawm). “Khetos ntawm tiam kawg ntawd nqa txoj sia los, thiab nqa txoj kev ntawm qhov tseeb uas ruaj khov thiab kav mus ib txhis ntawd los. Qhov tseeb no yog txoj kev uas tib neeg tau txoj sia, thiab nws yog tib txoj kev uas tib neeg yuav paub Vajtswv thiab tau txais kev pom zoo los ntawm Vajtswv. Yog koj tsis nrhiav txoj kev muaj sia nyob uas Khetos muab thaum tiam kawg ntawd, ces koj yeej yuav tsis tau txais kev pom zoo los ntawm Yexus ib zaug li, thiab yeej yuav tsis muaj hnub tsim nyog tau nkag rau hauv lub rooj vag ntawm vaj loog ceeb tsheej, vim koj yog ib tug moj zeej thiab neeg raug txim ntawm keeb kwm xwb. Cov uas raug tswj los ntawm tej kev cai, los ntawm tej lus, thiab raug keeb kwm tej sawv hlaus khi cia ces yuav tsis tau txoj sia los sis tsis tau txoj kev muaj sia nyob uas tsis paub kawg. Qhov no mas vim yog tag nrho qhov lawv muaj ces tsuas yog tej nyuag dej nro uas lawv tuav rawv tseg los tau ntau txhiab xyoo uas tsis yog cov dej cawm siav uas txhawv ntawm lub zwm txwv los” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Khetos ntawm Tiam Kawg Nkaus Xwb Mas Thiaj Yuav Muab Tau Txoj Kev ntawm Txoj Sia Ntev Dhawv Mus Ib Txhis Rau Tib Neeg). Kuv ua tib zoo xav txog Vajtswv cov lus zaum tas zaum thiab, thiab xav tias cov lus no mas zoo dhau lawm thiab muaj qab hau dhau lawm! Nyob rau tiam kawg, Tswv Yexus rov qab los nthuav tawm qhov tseeb los cawm tib neeg. Tsuas yog cov uas ntshaw qhov tseeb thiab mloog Vajtswv lub suab nkaus xwb thiaj li yuav pom Vajtswv qhov kev tshwm sim thiab txais tos qhov tus Tswv rov qab los. Cov uas tos tus Tswv los rau saum tauv fuab yam tsis paub li tab sis tsis nrhiav qhov tseeb los sis tsis mloog Vajtswv lub suab ces yuav plam lub hwv tsam uas raug qaws mus los ntawm qhov tus Tswv rov los, thiab yeej yuav tsis muaj peev xwm los txais tos qhov tus Tswv rov qab los li. Nyob rau lub sij hawm no, kuv nco qab tau tias Tswv Yexus hais tias, “Kuv cov yaj yeej hnov Kuv lub suab, thiab Kuv paub lawv, thiab lawv caum raws Kuv qab” (Yauhas 10:27), thiab tau hais lus faj lem nyob rau hauv Qhia Tshwm tias, “Saib nawb, Kuv sawv ntawm qhov rooj, thiab khob: yog tias tus tib neeg twg hnov Kuv lub suab, thiab qhib qhov rooj, Kuv yuav los rau nws, thiab yuav nrog nws noj mov, thiab nws nrog Kuv” (Qhia Tshwm 3:20). Qhov tseeb tiag, yam tseem ceeb tshaj plaws rau txoj kev txais tos qhov tus Tswv rov qab los ntawd ces yog mloog Vajtswv lub suab. Vajtswv cov yaj yeej mloog tau Vajtswv lub suab thiab raws Nws cov hneev taw. Kuv paub tias kuv tus hluas nraug tsis kam nrhiav thiab tshawb xyuas txoj hau kev tseeb vim hais tias nws tsis nyeem Vajtswv Tus Uas Muaj Hwj Chim Loj Kawg Nkaus cov lus. Yog nws yog Vajtswv cov yaj thiab yog ib tug neeg uas ua siab dawb paug nrhiav qhov tseeb, ces kuv tsim nyog qhia ib co ntawm Vajtswv Tus Uas Muaj Hwj Chim Loj Kawg Nkaus cov lus rau nws. Yog nws paub tias Vajtswv Tus Uas Muaj Hwj Chim Loj Kawg Nkaus cov lus yog qhov tseeb thiab yog Vajtswv lub suab, ces nws yuav muaj peev xwm lees txais Vajtswv tes hauj lwm ntawm tiam kawg, thiab wb thiaj li yuav muaj peev xwm caum raws Vajtswv cov hneev taw tau ua ke. Yog li, kuv thiaj li siv ntau hmo los theej ib co ntawm Vajtswv Tus Uas Muaj Hwj Chim Loj Kawg Nkaus cov lus thiab muab tej ntawd xa mus rau nws. Tom qab ntawd, txhua hnub, kuv tos ntsoov nws hu tuaj rau kuv tuaj tshawb xyuas Vajtswv tes hauj lwm nyob rau tiam kawg nrog kuv. Ob peb hnub tom qab ntawd, lub xov tooj hauv tsev txawm nrov, ces kuv zoo siab tshaj. Kuv xav tias yeej yog kuv tus hluas nraug ntag, tab sis ho yog Xib Fwb Vam xwb. Nws hais tias, “Koj tus hluas nraug qhia kuv tias tom qab koj rov qab mus tim koj lub zos lawm, koj ntsib nrog cov tib neeg tuaj ntawm Qhov Xob Laim Sab Hnub Tuaj tuaj. Qhov no puas muaj tseeb?” Kuv thiaj li hais tias, “Kuv tab tom nrhiav thiab tab tom tshawb xyuas. Kuv xav tias qhov Tswv Yexus rov qab yog ib qho tseem ceeb heev thiab yog qee yam uas peb yuav tsum mob siab nrhiav thiab tshawb xyuas.” Xib Fwb Vam txawm hais tias, “Tsis ntev no, kuv yuav tuaj saib koj lub zos tuaj saib seb koj puas tau sib txuas lus nrog qee tus neeg tuaj ntawm Qhov Xob Laim Sab Hnub Tuaj. Kuv yog koj tus xib fwb, yog li kuv yuav tsum tau saib xyuas koj lub neej txoj sia.”

Kuv xav tias xib fwb yuav ua tsis tau li qhov ntawd, vim hais tias wb qhov chaw nyob sib nrug deb heev. Tos nco xwb, tsis ntev ntawd, nws txawm tuaj tiag tiag. Ob peb tus nus thiab viv ncaus thiab kuv xav siv lub fib cim no los ua tim khawv rau Vajtswv Tus Uas Muaj Hwj Chim Loj Kawg Nkaus tes hauj lwm nyob rau tiam kawg, tab sis thaum peb ntsib Xib Fwb Vam lawm, nws nug kuv tias puas yog kuv twb lees txais Qhov Xob Laim Sab Hnub Tuaj lawm, thiab hais khav theeb ntxhias tias, “Kuv twb sib txuas lus nrog Qhov Xob Laim Sab Hnub Tuaj ntau zaus lawm. Qhia ncaj nraim tias, ua ntej kuv tuaj ntsib koj, kuv twb mus tim ib tug muam lub tsev nyob sab qaum teb hnub tuaj lawm. Nws tus nus ntseeg Qhov Xob Laim Sab Hnub Tuaj thiab xav ua tim khawv txog lawv txoj moo zoo rau kuv. Kuv tau kawm kev qhia feem kev ntseeg lawm, kuv paub Vajluskub, thiab kuv twb sib txuas lus nrog ntau cov xib fwb muaj koob nrov npe nyob txawv teb chaws lawm, tiam sis nws tseem xav tias nws muaj peev xwm ntxias dag thiab kov yeej kuv thiab? Tsis muaj qab hau hlo li.” Kuv cov nus thiab cov viv ncaus tas zog yaum nws tias, “Muaj coob tus kwv tij thiab nkauj muam tau tshaj tawm txoj moo zoo rau koj thiab tau ua tim khawv tias tus Tswv Yexus twb rov qab los lawm. Yog koj tawm tsam thiab teem txim yam tsis nrhiav thiab tsis tshawb xyuas li, ces puas yog koj uas lub siab dawb paug txais tos tus Tswv? Tus Tswv Yexus hais tias: ‘Tau koob hmoov ces yog cov pluag ntawm sab ntsujplig: rau qhov lawv li yog lub teb chaws saum ntuj ceeb tsheej’ (Mathai 5:3). Peb nyob rau tiam kawg lawm, tus Tswv twb rov qab los lawm. Thaum peb hnov tib neeg ua tim khawv tias tus Tswv twb rov qab los lawm thiab nthuav tawm ntawm qhov tseeb, peb yuav tsum qhib siab lug nrhiav, kom peb thiaj li hnov tus Tswv lub suab thiab pom Nws qhov kev tshwm sim! Yog peb tsis nrhiav los sis tsis tshawb xyuas, tab sis pheej qi muag nti tsis lees txais yuav thiab tawm tsam xwb, ces qhov ntawd puav leej yog caum raws cov Falixais cov hneev taw tau yooj yim dhau heev lawm. Vajtswv yog ib tug Vajtswv ntse, Nws tej kev xav mas tshaj tib neeg tej kev xav lawm, thiab Vajtswv tes hauj lwm mas yog ib lo lus zais tob uas peb tib neeg tsis tuaj yeem xav txog. Peb xav tham nrog koj seb yuav txais tos qhov Tswv Yexus rov qab los li cas.” Tab sis Xib Fwb Vam tsis mloog hlo li. Nws hais tias, “Yog nej xav tham txog Qhov Xob Laim Sab Hnub Tuaj rau kuv, ces txhob vam, vim hais tias kuv tsis tham qhov ntawd nrog nej.” Cov nus thiab viv ncaus pom tias nws mas tawm tsam heev thiab tsis muaj lub siab xav nrhiav li, yog li ntawd lawv thiaj li tso tseg tsis tham nrog nws lawm. Nyob rau lub sij hawm no, Xib Fwb Vam txais ib tsab xov tooj thiab hais tias ib txhia ntseeg nyob rau ntawm ib pawg ntseeg hauv sab qaum teb hnub tuaj twb lees txais Qhov Xob Laim Sab Hnub Tuaj lawm, yog li nws xav mus tod mus cheem lawv. Nws txawm hais kom kuv maj nroos yuav ib daim pib dav hlau rau nws. Kuv hais tias, “Xib Fwb Vam, Qhov Xob Laim Sab Hnub Tuaj ua tim khawv tias Tswv Yexus twb rov qab los nthuav tawm qhov tseeb los ua tes hauj lwm ntawm kev txiav txim nyob rau tiam kawg lawm. Koj tsis kam nrhiav, tshawb xyuas, thiab txais tos tus Tswv, thiab tshaj qhov ntawd lawm, koj xav tav kev thiab txwv tib neeg kom txhob nrhiav txoj hau kev tseeb thiab txhob mloog Vajtswv lub suab. Qhov no puas haum raws li tus Tswv txoj kev xav mas?” Ces nws txawm tig ntsia kuv thiab hais tias, “Kuv yuav tsis cia cov neeg tuaj ntawm Qhov Xob Laim Sab Hnub Tuaj tuaj rau hauv pawg ntseeg tuaj nyiag cov yaj. Kuv xav tiv thaiv tus Tswv txoj hau kev.” Thaum saib Xib Fwb Vam qhov kev tshwm sim uas khav theeb ntshuav, kuv tsis ntseeg tias qhov no yog tus xib fwb uas kuv paub li. Kuv twb ntsib nws tau plaub lub xyoos dhau los lawm, thiab rau kuv mas, nws yeej yog ib tug neeg uas txo hwj chim heev uas txhawj cov ntseeg tshaj. Kuv ib txwm xav tias nws yog ib tug xib fwb zoo tshaj thiab ntxim hwm heev, tab sis thaum pom nws tus cwj pwm thiab qhov nws qhia tshwm rau hnub no lawm ces ua rau kuv xav txog tus Tswv Yexus cov lus tias, “Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab phem! Vim nej kaw lub nceeg vaj saum ntuj ceeb tsheej rau tib neeg lawm: vim nej tus kheej yuav tsis tau nkag mus, los sis nej yeej txwv cov uas yuav nkag mus rau hauv tib si” (Mathai 23:13). Xib Fwb Vam tuav raws cov lus tshaj tawm txhua hnub rau tib neeg, qhia rau peb kom saib thiab ceev faj qhov tus Tswv rov qab los, tab sis thaum Tswv Yexus rov qab los tiag tiag lawm, tsis yog nws tsis nrhiav, tsis tshawb xyuas, los sis tsis txais tos tus Tswv xwb, nws teem txim, tau tawm tsam, thiab tas zog ua tej yam tsis zoo los tav kev thiab tab kaum cov ntseeg thaum lawv nrhiav thiab tshawb xyuas. Nyob hauv daim ntawv tshaj tawm txog kev pov thaiv tus Tswv txoj hau kev thiab tiv thaiv pab yaj, nws tseem tswj tib neeg nruj heev. Nws mas zoo thooj kiag li cov neeg Falixais nyob rau lawv tiam ntawd ntag, ib tug tub qhe phem uas xav tiv thaiv tib neeg kom txhob nkag tau mus rau hauv lub nceeg vaj saum ntuj ceeb tsheej.

Thaum xav tias tseem muaj coob tus nus thiab viv ncaus nyob hauv pawg ntseeg uas tsis muaj kev thoob tsib to nrog txog Xib Fwb Vam, cov uas raug nws khi thiab raug ntxias dag, thiab cov uas tsis tau tshawb xyuas Vajtswv tes hauj lwm nyob rau tiam kawg, kuv tau sib txuas lus mus rau cov nus thiab cov viv ncaus uas kuv paub thiab ua tim khawv rau Vajtswv Tus Uas Muaj Hwj Chim Loj Kawg Nkaus tes hauj lwm rau lawv. Thaum Xib Fwb Vam paub lawm, nws thiaj li hu thiab hem kuv tias, “Yog koj nias qees ntseeg Qhov Xob Laim Sab Hnub Tuaj thiab tuaj rau ntawm pawg ntseeg tuaj nyiag cov yaj, ces peb txhua tus yuav tsis lees txais yuav koj, thiab tag nrho cov kwv tij thiab cov nkauj muam uas paub koj yuav tsis txais koj mus ntxiv lawm.” Tom qab ntawd, nws kuj xa tau ntau phau ntawv me me uas txhawb rau qhov sib koom tes txwv Paug Ntseeg ntawm Vajtswv Tus Uas Muaj Hwj Chim Loj Kawg Nkaus tuaj rau kuv thiab, tag nrho cov ntawv no muaj cov lus uas tawm tsam thiab tuam mom Vajtswv. Tom qab qhov no lawm, kuv haj tseem pom tseeb tseeb ntxiv txog Xib Fwb Vam lub ntsej muag tiag lawm. Nws yog tus tav kev thiab cuam tshuam uas tiv thaiv tib neeg kom txhob tshawb xyuas txoj hau kev tseeb. Kuv tsis xav tham rau nws ntxiv lawm, yog li kuv thiaj li tsum tsis teb nws tsab xov tooj. Thaum nws pom tias kuv nias qees ntseeg Vajtswv Tus Uas Muaj Hwj Chim Loj Kawg Nkaus thiab tshaj tawm txoj moo zoo rau cov tib neeg uas nws saib xyuas ntawd lawm, nws thiaj li mus rau tim cov nus thiab cov viv ncaus uas paub kuv tsev uas nyob hauv Hawm Cias, Xees Hais, thiab lwm qhov chaw thiab hais rau lawv kom txhob sib txuas lus rau kuv los sis txhob mloog qhov kuv tshaj tawm lawm. Tom qab mus txawv teb chaws los, nws kaw kuv tsis pub tuaj koom pawg ntseeg lawm. Nws txwv txhua tus kom txhob teb kuv tej xov tooj los sis kom txhob hu kuv, thiab hais rau txhua tus uas hu kuv lawm ces yuav raug ntiab tawm.

Muaj ib hnub, kuv tau txais ib tsab ntawv tuaj ntawm kuv tus hluas nraug tuaj hais tias, “Xib Fwb Vam hais tias nyob rau ntawm pawg ntseeg uas koj ntseeg Qhov Xob Laim Sab Hnub Tuaj ntawd, ces koj raug ntxias dag lawm. Suav txij no mus ces wb tsis yog kwv tij thiab nkauj muam lawm, thiab kev sib raug zoo ntawm wb ces tsis muaj lawm. Kuv yuav tsis teb koj tej xov tooj hu tuaj los sis tsis sau ntawv rau koj ntxiv lawm. Yog koj xav rov qab los, txhua tus yuav txais tos koj, thiab wb txoj kev sib raug zoo tseem yuav muaj mus ntxiv tau, tab sis yog koj nias qees ntseeg Vajtswv Tus Uas Muaj Hwj Chim Loj Kawg Nkaus, ces wb kawg sib tso.” Tom qab nyeem tsab ntawv no lawm, kuv tu siab heev, yog li kuv thiaj li hu nws, tab sis nws haistxias zias tias, “Kuv tsis khoom. Tam sim no kuv tsis muaj sij hawm los tham txog qhov no.” Kuv nug nws tias, “Qhov no puas yog qhov wb sib tso tiag tiag mas?” Nws txawm hais tias, “Yog koj tso qhov ntseeg Qhov Xob Laim Sab Hnub Tuaj ntawd tseg, ces wb txoj kev sib raug zoo tam sim no thiaj li mus tau. Kuv mam li thov kuv tus phauj pab koj tawm mus txawv teb chaws. Nws tab tom ua lag luam rau ntawm no, yog li koj los nyob ntawm no tau. Wb thiaj li yuav muaj kev zoo siab heev rau yav tom ntej. Tab sis yog koj nias qees ntseeg Vajtswv Tus Uas Muaj Hwj Chim Loj Kawg Nkaus, ces wb kawg sib tso. Koj yuav tau siv sij hawm xav txog qhov no.” Qhov ntawd mas phem tshaj uas pom kuv tus hluas nraug tsis muaj siab muaj ntsws li no. Yav dhau los, wb nyob ua ke tau zoo siab heev, thiab nws saib xyuas kuv zoo. Kuv tsis xav tias nws yuav mob siab heev rau tus xib fwb ntawd. Tsuas yog kuv ntseeg Vajtswv Tus Uas Muaj Hwj Chim Loj Kawg Nkaus xwb, es nws txawm txiav kev nkauj kev nraug nrog kuv, tsis quav ntsej txog wb txoj kev sib raug zoo los tau ntau lub xyoos li lawm. Kuv tsev neeg paub tias kuv muaj qhov tsis sib haum xeeb nrog kuv tus hluas nraug, thiab lawv puav leej hais kom kuv rov xav dua, hais tias, “Koj tus hluas nraug muaj hauj lwm zoo thiab yog tsev neeg zoo. Yog neb sib tso lawm, xyov yav tom ntej koj puas yuav ntsib ib tug neeg zoo li no lawm. Koj twb laus zog lawm, thiab nws tsis yooj yim mus nrhiav ib tug hluas nraug. Yog koj tsis pib ib yim neej, koj lub neej yav tom ntej yuav zoo li cas?” Kuv tus hluas nraug tsev neeg kuj hu xov tooj tuaj thiab hais kom kuv txhob ntseeg Vajtswv Tus Uas Muaj Hwj Chim Loj Kawg Nkaus thiab, hais tias, “Nej ob leeg twb tsis hluas lawm. Txog sij hawm xav txog kev sib yuav lawm. Qhov ntawd puas yog ib qho zoo yog neb ob leeg ntseeg Tswv Yexus? Neb yuav zoo siab heev thaum neb sib yuav lawm. Vim li cas pheej nias qees ntseeg Vajtswv Tus Uas Muaj Hwj Chim Loj Kawg Nkaus xwb?” Thaum ntsib kev nias los ntawm ob tsev neeg, kuv tsis paub tias yuav txiav txim siab li cas. Yog kuv xaiv qhov rov qab mus tim kuv pawg ntseeg qub thiab yuav kuv tus hluas nraug, ces nws yuav pab tau tej khoom teej tug zoo ntawm lub neej txoj sia rau kuv, thiab wb kuj tuaj yeem mus ua neej nyob txawv teb chaws tau. Qhov ntawd yog yam uas coob tus tib neeg npau suav txog, tab sis kuv kuj yuav plam Vajtswv txoj kev cawm dim nyob rau tiam kawg vim qhov ntawd thiab, uas kuv yuav khuv xim mus tag kuv sim neej! Nyob rau tiam kawg, Vajtswv los yug ua neeg rau zaum ob los nthuav tawm qhov tseeb, cawm tib neeg thiab ntxuav tib neeg kom dawb huv du lug, thiab tsim ib pawg ntawm cov muaj yeej. Qhov no yog lub fib cim tib zaug hauv lub neej txoj sia xwb, thiab kuv yuav tsis yeem cia kuv tus kheej plam! Tab sis yog kuv xaiv caum Vajtswv Tus Uas Muaj Hwj Chim Loj Kawg Nkaus qab, yuav muaj dab tsi tshwm sim rau kuv txoj kev sib yuav? Kuv twb muaj hnub nyoog sib yuav tau lawm, thiab kev sib yuav yog ib qho tseem ceeb tshaj rau hauv lub neej. Nob rau lub caij ntawd, kuv noj tsis taus los sis pw tsis tsaug zog zoo, thiab kuv raug tsim txom heev. Thaum kuv pom coob tus tib neeg uas hnub nyoog li kuv sib yuav thiab muaj cuab muaj yimlawm tab sis kuv tseem nyob ib leeg, kuv nyuaj siab heev, thiab kuv tsis paub xyov yuav xaiv li cas. Kuv thiaj li thov Vajtswv txog qhov teeb meem no zaum tas zaum thiab, thov kom Vajtswv coj kuv kev thiab ua kom kuv paub tias yuav xaiv txoj kev tom hau ntej li cas. Thaum kuv cov nus thiab cov viv ncaus paub kuv qhov xwm txheej lawm, lawv puav leej pab thiab sib qhia nrog kuv, tab sis kuv tseem tso tsis tau kuv tus hluas nraug tseg li. Kuv npau taws tias nws tso kuv tseg. Nws haj tseem tsis tham nrog kuv li thiab. Nws txawm tsiv nyaum thiab tsis quav ntsej li lawm. Thaum xib fwb hais tias kuv raug ntxias dag lawm, ces kuv tus hluas nraug cia li ntseeg tag nrho li ntawd lawm. Thaum xib fwb thov kom nws txhob lees txais yuav kuv, nws thiaj li tso kuv tseg, cia li tsis xav txog wb txoj kev sib raug zoo hauv ob peb lub xyoos dhau los lawm. Kuv yim xav txog qhov ntawd, ces kuv yim ntxov siab.

Muaj ib hmo, kuv nti tig mus tig los rau saum txaj. Kuv pw tsis tsaug zog, yog li kuv thiaj li sawv thiab mloog ib zaj nkauj ntawm Vajtswv txoj lus tias, “Tib Neeg Yuav Tsum Nrhiav los Ua ib Lub Neej Uas Muaj Nuj Nqis”:

1  Tib neeg yuav tsum nrhiav kev ua lub neej kom muaj nuj nqis, thiab yuav tsum tsis txhob txaus siab rau tej xwm txheej tam sim no. Yuav ua lub neej kom zoo li Petus tus yam ntxwv, lawv yuav tsum muaj kev paub thiab kev ntsib kev pom li Petus. Tib neeg yuav tsum nrhiav tej yam uas siab dua thiab tob dua. Lawv yuav tsum nrhiav ib txoj kev hlub uas tob tshaj thiab dawb huv tshaj rau Vajtswv, thiab ib lub neej uas muaj nqis thiab muaj qab hau. Qhov no xwb thiaj li yog lub neej; tsuas yog thaum ntawd xwb mas tib neeg thiaj li yuav zoo ib yam li Petus.

2  Vim txhua tus uas xav hlub Vajtswv ntawd, mas yeej tsis muaj qhov tseeb uas yuav nrhiav tsis tau li thiab tsis muaj kev ncaj ncees vim yog lawv sawv tsis tau khov kho li. Koj yuav ua koj lub neej li cas? Koj yuav hlub Vajtswv li cas, thiab siv txoj kev hlub no los ua kom tau zoo raws li Nws tej kev npaj siab? Yeej tsis muaj ib yam dab tsi hauv koj lub neej uas yuav loj tshaj li. Tshaj txhua yam, mas koj yuav tsum muaj kev ntshaw qhov zoo thiab kev ua siab ntev, thiab yuav tsum tsis txhob zoo li cov niag uas tsis muaj txha nrab qaum, cov niag uas tsis khov kiag li. Koj yuav tsum kawm kom ntsib kom pom ib lub neej uas muaj nuj nqis thiab kom ntsib kom pom qhov tseeb uas muaj nuj nqis thiab tsis txhob cia koj tus kheej ua dog ua dig rau txoj kev ntawd. Tos nco xwb, koj lub neej twb yuav dhau ntawm koj mus lawm; tom qab ntawd, koj puas tseem yuav muaj dua ib lub cib fim hlub Vajtswv ntxiv lawm? Tib neeg puas tseem hlub tau Vajtswv tom qab lawv tuag lawm mas? Koj yuav tsum muaj txoj kev ntshaw qhov zoo thiab muaj kev txawj xav tib yam nkaus li Petus; koj lub neej mas yuav tsum muaj nuj nqis, thiab koj yuav tsum tsis txhob ua si nrog koj tus kheej. Ua ib tug tib neeg, thiab ua ib tug neeg uas caum nrhiav Vajtswv, koj yuav tsum muaj cuab kav ua twb zoo xav hais tias yuav ua lub neej li cas, koj yuav muab koj tus kheej cob fim rau Vajtswv li cas, koj yuav muaj ib txoj kev ntseeg Vajtswv kom muaj qab hau li cas, thiab koj yuav, vim koj hlub Vajtswv, hlub Nws rau ib txoj kev kom dawb huv tshaj, zoo nkauj tshaj, thiab zoo tshaj tau li cas.

—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim

Kuv mloog zaj nkauj no zaum tas zaum thiab. Los ntawm zaj nkauj no, kuv pom tias Petus caum los mus hlub thiab ua kom tau zoo raws Vajtswv tag nrho nws lub neej, thiab ua ib lub neej muaj txiaj ntsig thiab tsim nyog, ces ua rau kuv zoo siab heev. Tswv Yexus cov lus thiab tes hauj lwm, Petus thiaj li paub tias Tswv Yexus yog Khetos, yog Leej Tub ntawm tus Vajtswv uas muaj txoj sia nyob. Nws tshaj tawm thiab ua hauj lwm rau Tswv Yexus thiab raug cov neeg Yudais tsim txom, tab sis Petus tseem caum Nws qab yam tsis ua ywj fab ywj fwj li. Niaj hnub no, Vajtswv tus kheej tau los yug ua neeg nyob rau ntawm peb los nthuav tawm cov lus ua hauj lwm thiab cawm tib neeg. Kuv tau nyeem Vajtswv cov lus, tau hnov Vajtswv lub suab, ces thiaj li txiav txim siab tias Vajtswv Tus Uas Muaj Hwj Chim Loj Kawg Nkaus yog qhov tus Tswv Yexus rov qab los zaum ob. Tab sis thaum txog lub sij hawm los xaiv ntawm Vajtswv Tus Uas Muaj Hwj Chim Loj Kawg Nkaus thiab kuv txoj kev sib yuav, kuv txawm txiav txim siab tsis tau. Kuv tsis xav plam txoj kev sib yuav no thiab lub hwv tsam mus ua neej zoo nyob txawv teb chaws nrog kuv tus hluas nraug. Kuv pom tias txawm kuv ntseeg tus Tswv los tau ntau lub xyoos lawm los xij, qhov kuv caum tsis yog qhov tseeb thiab tsis yog lub neej los ntawm Vjtswv los, thiab kuv tsis caum txoj kev hlub Vajtswv, ua raws li Vajtswv, thiab ua lub neej kom muaj txiaj ntsig thiab lub neej tsim nyog. Qhov kuv caum mas yog lub neej lom zem rau tej khoom siv thiab ua kom lub cev zoo xwb. Kuv ua tib zoo xav txog Vajtswv cov lus tias, “Tib neeg puas tseem hlub tau Vajtswv tom qab lawv tuag lawm mas?” Kuv nug kuv tus kheej tias, “Yog kuv tsis siv kuv lub sij hawm nyob hauv ntiaj teb los caum txoj kev hlub Vajtswv, ua raws li Vajtswv, thiab ua lub neej kom muaj txiaj ntsig thiab lub neej tsim nyog, ces txawm kuv tau sib yuav thiab tau cev nqaij daim tawv zoo raws li qhov kuv xav tau los xij, lub ntsiab yog dab tsi mas? Qhov Vajtswv los rau hauv tiam kawg los cawm tib neeg tag nrho ntawd yog lub fib cim uas muaj tib zaug hauv lub neej xwb. Yog kuv plam qhov ntawd lawm, kuv yuav khuv xim mus tag ib txhis! Yog kuv plam lub hwv tsam ntawm txoj kev cawm dim uas muab los ntawm Vajtswv tes hauj lwm nyob rau tiam kawg kom tau xyiv fab rau lub neej yooj yim, ces qhov ntawd tsis yog ruam lod? Yog kuv tso txoj hau kev tseeb tseg thiab xaiv txoj kev sib yuav, kuv puas tau lub neej zoo siab tiag tiag raws li qhov kuv xav tau?” Kuv txawm xav txog ib tug viv ncaus uas kuv tau hu rau nws yav dhau los. Nws thiab nws tus txiv sib yuav los ntawm qhov kev pab ntawm Xib Fwb Vam. Tom qab nkawv sib yuav lawm, nkawv mus ua hauj lwm rau tim ib lub nroog loj thiab yuav ib lub tsev. Nkawv muaj khoom vaj khoom tsev zoo heev, thiab ua rau kuv khib nkawv kawg. Tab sis thaum kuv mus saib nws, nws qhia kuv tias txawm nws thiab nws tus txiv nkawv ob leej ntseeg Tswv Yexus thiab muaj khoom vaj khoom tsev hauv lub neej zoo los xij, nkawv nyob ua ke tau yam tsis muaj kev zoo siab li. Nkawv keev sib cav sib ceg me ntsis txog tej teeb meem hauv vaj hauv tsev, tej thaum yeej hnyav kawg ua rau nkawv ib tug tsis xav tham rau tib tug li. Tom qab ntawd nws tus txiv xaiv mus ua hauj lwm rau lwm lub nroog lawm, cia nws nyob ib leeg rau tim tsev nrog nws ob tug me nyuam muaj ob xyoo, thiab ua rau nws lub neej txom nyem thiab kho siab zim. Kuv xav txog nws qhov kev ntsib kev pom, thiab tom qab ntawd xav txog ib txhia txij nkawm uas nyob ib ncig ntawm kuv, uas keev sib ceg thiab ib tug hawv ib tug txog kev sib nrauj. Thaum saib rau ntawm qhov muaj tseeb no, kuv pom meej meej ntxiv tias thaum wb ntseeg thiab caum raws tus Tswv qab, wb tsuas raug txhim dim los ntawm Tswv Yexus xwb. Wb tej kev txhaum raug zam lawm, tab sis tseem daws tsis tau tau lub hauv paus cag ntawm wb txoj kev txhaum thiab wb tseem khiav tsis dim txoj kev txhaum txoj kev khi thiab kev tswj hwm. Tib neeg sib txuas lus ib tug rau tib tug raws li lawv tus moj yam qias vuab tsuab, thiab tsis muaj kev hlub tiag, yog li txawm peb yuav ntsib yuav pom kev xyiv fab rau lub cev nqaij daim tawv ntau npaum li cas los xij, peb lub neej tseem khoob lug thiab mob kub lug. Thaum xav li no, kuv paub tias kuv yuav tsum tau xuam xim heev rau tej kev xaiv uas kuv ntsib tam sim no. Kuv thiaj li thov Vajtswv zaum tas zaum thiab, thov kom Vajtswv coj kuv kev thiab qhia kuv kom kuv thiaj li xaiv tau qhov uas yog raws li Nws txoj kev xav.

Tom qab ntawd, kuv nyeem ib zaj lus ntawm Vajtswv Tus Uas Muaj Hwj Chim Loj Kawg Nkaus cov lus ces thiaj li to taub Vajtswv txoj kev xav lawm. Vajtswv Tus Uas Muaj Hwj Chim Loj Kawg Nkaus hais tias: “Niaj hnub no, cov uas nrhiav thiab cov tsis nrhiav mas yog ob hom neeg uas sib txawv deb heev li, lawv txoj hau kev kawg mas kuj sib txawv deb heev thiab. Cov uas nrhiav kev paub txog qhov tseeb thiab xyaum ua raws qhov tseeb ces yog cov uas Vajtswv yuav coj kev cawm dim los rau. Cov uas tsis paub txoj kev tseeb yog cov niag dab phem thiab cov yeeb ncuab; lawv yog tej xeeb leej xeeb ntxwv ntawm tus thawj tub txib qaum ntuj thiab yuav yog daim phiaj rau kev rhuav pov tseg. Txawm yog kiag cov uas ntseeg ib tug Vajtswv uas pom tsis meej ntawd nruj nruj—lawv tseem tsis yog cov niag dab phem thiab los? Cov neeg uas yeej muaj lub siab zoo tab sis tsis lees txais txoj kev tseeb ces yog cov niag dab phem xwb; lawv lub ntsiab tseem ceeb yog ib lub uas tawm tsam Vajtswv. Cov uas tsis lees txais txoj kev tseeb ces yog cov uas tawm tsam Vajtswv, thiab txawm hais tias cov neeg ntawd yuav ntsib kev txom nyem ntau yam, los lawv yeej tseem yuav raug rhuav tshem. … Leej twg los xij uas tsis ntseeg tus Vajtswv uas yug los ua neeg ces yog cov phem thiab, tshaj qhov ntawd, yuav taug rhuav tshem. Cov uas muaj kev ntseeg tab sis tsis xyaum ua raws qhov tseeb, cov uas tsis ntseeg tus Vajtswv uas yug los ua neeg, thiab cov uas tsis ntseeg ib qho hlo li hais tias muaj Vajtswv ces kuj yuav raug ua daim phiaj ntawm kev rhuav pov tseg thiab. Tag nrho cov uas yuav pub cia nyob ces yog cov neeg uas tau raug kev txom nyem ntawm kev lim tib neeg kom dawb huv thiab sawv khov kho; cov no yog cov neeg uas yeej tiv taus kev sim siab lawm tiag. Leej twg los xij uas tsis lees paub Vajtswv ces yog ib tug yeeb ncuab; qhov ntawd yog, leej twg los xij uas tsis lees paub tus Vajtswv uas yug los ua neeg—tsis hais tias lawv yuav yoog raws Vajtswv los tsis yoog raws li—ces yog ib tug tawm tsam Khetos! Ntxwgnyoog yog leej twg, cov niag dab phem yog leej twg, thiab leej twg yog Vajtswv cov yeeb ncuab yog hais tias tsis yog cov neeg tawm tsam uas tsis ntseeg Vajtswv? Lawv tsis yog cov neeg uas tsis mloog Vajtswv lus lod?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke). Vim Vajtswv cov lus, kuv thiaj li to taub tias qhov Vajtswv ua nyob rau tiam kawg ntawd yog tes hauj lwm ntawm kev sib faib raws li txhua hom ntawm tej hauj lwm ntawd. ​Nws nthuav tawm qhov tseeb thiab ua tes hauj lwm txiav txim dhau los ntawm cev nqaij daim tawv yug los ua neeg, faib cais cov txhauv tawm ntawm cov pob kws thiab cov ntseeg tiag tawm ntawm cov ntseeg cuav, uas hais tau tias, cov uas caum raws qhov tseeb thiab cov uas tsis caum. Cov uas hais tias ntseeg Vajtswv ntawm lub ncauj hais xwb tab sis tsis nrhiav qhov tseeb los sis tsis tos Vajtswv qhov kev tshwm sim, cov tsis ntseeg uas tsuas nrhiav txoj hmoov hlub thiab thov ncuav ci noj kom lawv plab tsau xwb, thiab cov tawm tsam Khetos uas ntxub qhov tseeb thiab tawm tsam Vajtswv—tag nrho cov tib neeg zoo li no yuav raug muab nthuav tawm, thiab thaum kawg lawv yuav raug tshem tawm thiab raug rau txim. Txawm tias saib sab nrauv mas kuv tus hluas nraug zoo li muaj kev ua neeg zoo, coj ncaj thiab ntseeg siab tau, thiab saib xyuas kuv zoo, kiag thaum kuv qhia rau nws tias Vajtswv twb rov qab los yug ua neeg zaum ob lawm, ces tsis yog nws tsis kam lees nrhiav qhov tseeb nkaus xwb, nws kuj qi muag nti ua raws xib fwb qab los cuam tshuam thiab tav kuv kev kom txhob lees txais Vajtswv tes hauj lwm ntawm tiam kawg, ua mus txog qhov uas hem wb txoj kev sib yuav los yuam kom kuv tso txoj hau kev tseeb tseg. Txawm tias nws ntseeg Tswv Yexus los xij, nws tsuas tuav Tswv Yexus lub npe xwb. Nws tsis kam lees txais qhov tseeb uas raug muab nthuav tawm los ntawm tus Tswv uas rov qab los lawm, thiab nws tawm tsam thiab teem txim rau Vajtswv Tus Uas Muaj Hwj Chim Loj Kawg Nkaus. Kuv pom tias nws lub ntsiab tseeb mas yog ntxub qhov tseeb thiab tawm tsam Vajtswv, tias nws yog tus tsis ntseeg uas raug Vajtswv txoj lus muab nthuav tawm, thiab tias nws tsis yog tus neeg uas ntseeg Vajtswv, nyiam qhov tseeb, thiab kam lees txais qhov tseeb tiag tiag. Thaum ntsib qhov tseeb lawm, nws tus yeeb yam phem ntawm txoj kev tawm tsam Vajtswv ntawd thiaj li raug muab qhia tshwm du lug lawm. Nws tsis to taub Vajtswv lub suab thiab tsis yog Vajtswv cov yaj. Yog kuv xaiv mus yuav ib tug neeg zoo li no, kuv yuav tsis tau txais koob hmoov los ntawm Vajtswv, thiab wb qhov kev sib yuav yuav tsis muaj kev zoo siab. Vim Vajtswv cov lus, kuv thiaj li to taub Vajtswv txoj kev xav. Kuv kaj siab lawm, thiab kuv paub qhov yuav xaiv lawm. Tom qab ntawd, kuv hu xov tooj rau kuv tus hluas nraug thiab hais tias, “Kuv txiav txim siab tau lawm. Kuv xaiv mus caum raws Vajtswv Tus Uas Muaj Hwj Chim Loj Kawg Nkaus qab mus ntxiv lawm. Yog koj xav sib tso, ces kuv hwm qhov koj xaiv. Wb nyias mus nyias.” Ntxoov siab heev, nws thiaj li hais tias, “Koj rov qab xav dua puas tau? Wb puav leej tsis hluas lawm, thiab txoj kev sib yuav yog yam tseem ceeb tshaj plaws hauv lub neej. Yog koj tso wb txoj kev sib yuav tseg, tom qab ntawd koj yuav khuv xim.” Kuv tuaj yeem pom meej meej nws lub ntsiab tseeb ntawm txoj kev ntxub qhov tseeb thiab tawm tsam Vajtswv, yog li txawm tias nws hais li cas los xij, kuv yuav tsis hloov siab lawm. Kuv thiaj li hais tias, “Vajtswv Tus Uas Muaj Hwj Chim Loj Kawg Nkaus cov lus taw txoj kev hauv lub neej rau kuv, thiab kuv txiav txim siab taug txoj kev no lawm. Yeej tsis hloov kuv qhov kev txiav txim siab li lawm.” Tom qab kuv tham tag, kuv khwb xov tooj, ces ua rau kuv hnov kaj siab lug thiab dim pa ntshuas.

Nws yog kev coj qhia ntawm Vajtswv cov lus uas cia kuv los paub seb yuav xaiv txoj kev twg nyob hauv lub neej, thiab kuj cia kuv los pom tag nrho cov ntsej muag tiag ntawm cov uas hais lus zoo tab sis siab phem ntawm cov xib fwb thiab cov txwj laug lawm. Lawv quaj kom peb yuav tsum saib tos ntsoov qhov tus tswv rov qab los, tab sis thaum Vajtswv tshwm sim rau hauv lub cev nqaij daim tawv los ua hauj lwm nyob rau tiam kawg mas, lawv tsis nrhiav thiab tsis tshawb xyuas li. Tiam sis, lawv tseem teem txim thiab tawm tsam yam tsiv nyaum heev, thiab tas zog ua txhua yam los tiv thaiv cov ntseeg kom txhob tshawb xyuas txoj hau kev tseeb thiab ua kom cov ntseeg nyob hauv lawv qab kev tswj fwm mus ntxiv, thiab yuam kom cov ntseeg caum raws lawv qab los tawm tsam thiab teem txim rau qhov Vajtswv rov qab los. Lawv yog tus phem thiab cov tawm tsam Khetos cov tub qhe uas raug Vajtsw tes hauj lwm nyob rau tiam kawg muab nthuav tawm, thiab lawv yog cov niag dab phem uas nqos tib neeg cov ntsuj! Vim hais tias kuv tus hluas nraug pe hawm tus xib fwb ntawd heev dhau lawm, nws thiaj li tsis nrhiav qhov tseeb hlo li, nws caum raws tus xib fwb ntawd qab los teem txim thiab tawm tsam Vajtswv tes hauj lwm nyob rau tiam kawg, ces nws thiaj li rais los ua ib tug neeg uas ntseeg Vajtswv tiam sis tawm tsam Vajtswv. Kuv ua tsaug ntau ntau rau Vajtswv vim cawm kuv dim, cia kuv los paub cov xib fwb thiab cov txwj laug, tsis kam txais yuav lawv, thiab thiaj li tsis raug lawv ntxias dag ntxiv lawm. Qhov uas kuv tuaj yeem hnov Vajtswv lub suab thiab txais tos qhov tus Tswv rov qab los ntawd yog Vajtswv txoj kev hlub tshua uas loj tshaj thiab zoo tshaj rau kuv. Kuv ua Vajtswv tsaug tawm hauv kuv nruab lub siab tuaj, thiab txiav txim siab los caum raws Vajtswv Tus Uas Muaj Hwj Chim Loj Kawg Nkaus qab kom mus txog thaum kawg lawm. Tom qab ntawd, kuv ua kuv tes dej num rau hauv pawg ntseeg, tshaj tawm txoj moo zoo thiab muab kuv tej peev xwm zoo tshaj plaws fij rau Vajtswv. Kuv ua tsaug rau Vajtswv Tus Uas Muaj Hwj Chim Loj Kawg Nkaus cov lus vim coj kuv kev los txiav txim siab qhov uas yog thiab coj kuv los txog rau niaj hnub nim no. Txhua lub yeeb koob muab rau Vajtswv Tus Uas Muaj Hwj Chim Loj Kawg Nkaus!