82. Los ntawm txoj kev tsim txom uas tsis tu ncua li
Muaj ib hnub nyob rau thaum lub Kaum Ob Hlis Ntuj xyoo 2000, kwv yees li thaum 5 teev yav yuav tsaus ntuj ntawd, kuv poj niam thiab kuv tau nrog ib tug kwv tij thiab ib tug muam sib txoos ua ke ces peb cia li hnov ib lub suab “npha npha npha” ntawm qhov rooj. Kuv txawm maj nrawm nroos mus muab peb cov ntawv zais. Ces, rau los sis xya tus tub ceev xwm ntawd tau nkag kiag los rau hauv chav. Lawv muaj ib tug nthe nqho hais tias: “Nej ua dab tsi? Puas yog nej tab tom sib txoos ua ke?” Tom qab nws yuam kom kuv kos npe rau daim ntawv tso cai tshawb fawb lawm, lawv tau tshawb lub tsev, ua rau txhua yam ntxhov quav niab tag li. Lawv nrhiav tau cov phau ntawv uas hais txog Vajtswv txoj lus thiab ob daim kab xev kaw. Tus Thawj Coj Ob uas yog xeem Luv ntawm Pab Saib Xyuas Kev Ruaj Ntseg Txog Kev Nom Kev Tswv tau nqa ob peb npau ntawv uas hais txog Vajtswv txoj lus los rau kuv thiab hais tias: “Qhov no yog qhov pov thawj uas koj raug ntes.” Ces, lawv muab peb tso rau hauv ib lub tsheb. Kuv thov Vajtswv twj ywm hais tias, “Au Vajtswv, Koj tau tso cai kom peb raug ntes hnub no lawm. Txawm tub ceev xwm yuav tsim txom kuv li cas los xij, kuv tsis kam ua Yudas thiab ntxeev siab rau Koj!”
Thaum peb mus txog tub ceev xwm qhov chaw lawm, lawv muab peb cais coj mus nug. Muaj ib tug tub ceev xwm uas yog xeem Ntsees, nug kuv hais tias: “Leej twg muab cov ntawv uas nyob rau hauv koj lub tsev ntawd rau koj? Leej twg ua rau koj hloov kev ntseeg? Leej twg yog koj tus thawj coj?” Kuv tsis hais ib lo lus li, yog li ntawd nws thiaj li hais yam nyaum heev hais tias: “Koj puas yuav hais lus? Yog koj tsis hais lus ces koj yuav tuag ntag hos!” Thaum pom hais tias kuv yuav tsis hais lus, ib tug tub ceev xwm txawm xuas nrig ntaus kuv lub taub hau ob peb teg thiab siv zog xuas ncuav pias rau kuv ob peb teg. Ua rau kuv pom hnub qub ya liab vog thiab kuv lub ntsej muag o phem heev li. Ces tom qab ntawd Nws siv zog tsuj kuv txhais ncej puab ob peb teg. Tus tub ceev xwm Ntsees ntawd muab ib phau ntawv kauv kauv ntau kuv lub ntsej muag, thiab hais nyaum nyaum hais tias: “Tsis txhob nkim sij hawm nrog nws tham li. Cia li muab nws khi thiab cia nws saib yam uas peb ua tau!” Ces, ib tug tub ceev xwm txawm nqa ib txoj hlua los, uas tuab yuam luag li ib tug ntiv tes, thiab muab kuv cov nkaub ncaws sab saud hle, tsuas tseg lub ris ntev hauv qab uas nyias nyias lawm xwb. Lawv tuav kuv ob txhais caj npab thiab muab kuv thawb rau hauv av, muab txoj hlua ntawd coj los rig kuv lub caj dab, kauv dhau kiag kuv lub hauv siab, ces mam li muab kuv ob txhais caj npab khi, siv txoj hlua ntawd muab kuv ob sab tes khi ntxeev tis qaib, thiab muab txoj hluas ntawd coj los chaws rau lub qab hluas uas rig kuv lub caj dab ntawd, ces mam li siv zog rub. Txoj hluas ntawd muab kuv ob lub xub pwg rub los ua ke mas mob heev, thiab txoj hlua me me ntawd zawm rau hauv kuv cov nqaij. Mloog zoo li kuv ob txhais caj npab twb dam tag li lawm, thiab kuv hnov mob tiag tiag li. Lawv muab kuv ob sab ceg nrhab kom txog li 90 disnkis thiab qaib kuv lub tau hau nrog rau kuv lub duav kom khoov txog li 90 disnkis thiab. Ces tsis ntev ntawd, kuv txawm hnov kiv taub hau thiab mloog zoo li kuv ob lub qhov muag yuav tawm ntawm kuv lub taub hau mus li. Kuv lub ntsej muag nrog hws tas li, ua rau hauv pem teb ntub tag li. Kuv sab thiab mob heev, kuv lub cev tshee hnyo, thiab kuv ob txhais ceg sawv tsis tau li lawm. Kuv xav qaws kuv ob txhais ceg los ua ke thiab so ib pliag, tiam sis yog kuv txav me ntsis, ces Ntsees ncaws tom kuv nraub qaum tuaj thiab sam fwm kom kuv tsis txhob nti li. Tiv tsis taus qhov mob ntawd li. Kuv npau taws thiab ntxub lawv heev, thiab kuv xav tias: “Muaj ntau tus neeg ua txhaum kev cai uas koj tsis mus caum. Kuv ntseeg Vajtswv thiab taug txoj kev yog xwb, kuv tsis ua txhaum ib txoj kev cai li, tiam sis koj tsim txom kuv. Nws yog ib qho uas phem tshaj plaws li!” Kuv xav txog Vajtswv cov lus uas hais tias: “Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Thaum kawg kuv pom Tsoom Fwv Koom Tsham Suav lub ntsej muag phem tias zoo li cas lawm. Lawv hais tias “muaj kev ywj pheej txog txoj kev lig kev cai ntseeg” thiab “pej xeem cov tub ceev xwm yog ua hauj lwm rau cov pej xeem,” tiam sis tej ntawd puav leej yog lus dag xwb! Pawg Koom Tsham ntawd tuav txoj kev ua txuj hwm txoj kev ywj pheej ntawm kev ntseeg, tiam sis qhov tseeb, lawv ua phem heev rau cov ntseeg, thiab xav muab peb rhuav tshem kom ploj mus tag nrho xwb. Pawg Koom Tsham ntawd yog tus dab Ntxwgnyoog uas tawm tsam thiab ntxub Vajtswv ntag. Kuv xav rau kuv tus kheej hais tias, “Lawv yim tsim txom kuv, ces kuv yim muaj kev ntseeg kom mus txog thaum kawg kiag xwb!”
Kwv yees li ib nrab teev tom qab ntawd, mloog zoo li tag nrho kuv lub cev tsis muaj zog thiab kuv lub taub hau thiab ob lub qhov muag o tag li lawm. Kuv ob txhais ceg loog tag thiab kuv tsis hnov kuv ob sab caj npab thiab ob txhais tes li lawm. Kuv cov khaub ncaws ntub tag li lawm. Thaum ntawd yog thaum kuv hnov Ntsees hais tias: “Siv txoj hlua ntawd khi koj tshaj li ib nrab teev tsis tau, yog tsis li ntawd ob txhais caj npab yuav tuag.” Tom qab nws hais li ntawd, lawv txawm daws txoj hlua ntawd lawm. Lub sij hawm uas lawv daws txoj hlua ntawd, kuv ntog kiag rau hauv av, kuv lub cev mob thoob plaws. Ces, ob tug tub ceev xwm txawm rawv nkaus kuv ob txhais tes ib leeg tuaj ib sab muab kuv ob txhais caj npab kiv zoo li lawv kauv ib txoj hlua loj. Kuv ob txhais tes mob heev tom qab lawv muab kiv ob peb zaug lawm. Ntsees nug kuv dua hais tias: “Koj tau cov phau ntawv ntawd qhov twg lod? Koj tus thawj coj yog leej twg? Leej twg ua rau koj hloov kev ntseeg? Qhia kuv tam sim no!” Ces, Luv ua txuj ua siab zoo zoo hais tias: “Cia li qhia peb, nws tsis yog ib qho teeb meem loj. Yog koj qhia peb koj yuav tsis raug kev txom nyem ntxiv lawm.” Kuv xav hais tias: “Xyov kuv puas muag kuv cov kwv tij thiab cov muam!” Npau taws heev uas kuv tsis hais lus, yog li ntawd Ntsees thiaj li hais tias: “Rov qab muab txoj hlua ntawd los khi nws dua thiab saib seb nws yuav tiv taus ntev npaum li cas!” Lawv rov qab muab kuv khi dua. Zaum no lawv muab kuv khi nruj dua li zaum tas los. Txoj hlua ntawd zawm qhov qub chaw dua mas haj yam mob tshaj zaum xub thawj. Hauv kuv lub siab kuv thov Vajtswv tas li, thov kom Nws pub kuv muaj kev ntseeg thiab pab kuv kom kov yeej qhov mob ntawm lub cev nqaij daim tawv. Tom qab ib nrab teev, lawv pom hais tias kuv yuav tsis teb lawv yog li ntawd lawv thiaj li txo txoj hlua ntawd lawm.
Kws yees li thaum 12:30 ib tag hmo ntawd, tub ceev xwm txawm coj kuv mus rau ib lub tsev kaw neeg lawm. Nyob rau hauv lub tsev kaw neeg ntawd, ib hnub kuv tsuas tau noj ob pluag mov xwb, ib pluag twg tsuas muaj ib lub ncuav cub thiab ib qho zaub me me xwb. Cov ncuav cub ntawd lawv muab cov txha pob kws coj los zom ntim rau hauv, cov zaub ntawd ib nrab twb lwj tag lawm, thiab lub qab tais qias neeg heev. Txhua hnub txij thaum rau teev sawv ntxov mus txog rau thaum yim teev tsaus ntuj, kuv yuav tsum tau zaum sib qhaib ceg, tshwj thaum noj mov thiab ib nrab teev thaum sawv ntxov uas kuv tawm tau mus sab nraud xwb. Yog kuv txav me ntsis thaum kuv tab tom zaum ntawd, ces yuav muaj neeg ntaus kuv. Muaj ib kab kiav txhab nyob rau saum kuv ob lub xub pwg vim txoj hlua uas lawv siv tsim txom kuv nyob rau ntawd tub ceev xwm qhov chaw. Cov kua paug daj daj ntawd tau ntws los rau kuv cov khaub ncaws, thiab kuv ob lub caj dab tes los kuj pib los ntshav thiab o liab ploog xiav lus li lawm thiab. Tag nrho cov pob qij txha hauv kuv lub cev mob heev li, thiab tab txawm sawv mus siv chav dej xwb los nyuaj heev. Kuv mloog zoo li nws tsis yog ib qho chaw uas phim rau noob neej nyob li thiab kuv tsis paub xyov thaum twg lub sij hawm tsaus ntuj uas nyob rau hauv tsev loj cuj no mam li dhau mus li. Cov kev xav no tsim txom kuv heev. Thaum kuv tab tom raug mob ntawd, kuv thov Vajtswv tag los thov dua, thov kom Nws coj kuv kev, kom kuv thiaj li to taub Nws lub siab nyiam, muaj zog, thiab tuav kuv tej lus tim khawv kom khov kho. Kuv xav txog Vajtswv cov lus uas hais tias: “Nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Thaum xav txog Vajtswv cov lus ua rau txhawb kuv lub zog heev. Vim Vajtswv tso cai kuv thiaj li raug ib qho xwm txheej zoo li no. Vajtswv siv qhov chaw uas nyuaj ntawd los ua kom kuv txoj kev ntseeg thiab kev hlub zoo tiav log. Nws cia siab hais tias kuv yuav tuav kuv tej lus tim khawv kom khov kho thiab ua kom Ntxwgnyoog poob ntsej muag. Tiam sis yog kuv xav khiav tom qab uas raug kev txom nyem me ntsis xwb no, zaj lus tim khawv ntawd yuav zoo li cas? Tab txawm kuv raug kev txom nyem los ntawm qhov tub ceev xwm tsim txom los xij, qhov ntawd pab kuv pom tseeb tseeb txog Pawg Koom Tsham lub ntsiab tseeb uas phem nyob rau hauv lawv txoj kev tawm tsam Vajtswv kom kuv thiaj li ntxub lawv thiab muab lawv tso tseg kiag hauv kuv nruab siab mus, kom tsis txhob raug lawv dag ntxias ntxiv lawm. Qhov ntawd yog Vajtswv txoj kev cawm kuv dim. Kuv tsis nyuaj siab thaum kuv to taub Vajtswv lub siab nyiam lawm. Kuv cog lus rau kuv tus kheej hais tias: “Txawm kuv yuav raug kev txom nyem npaum li cas los xij, kuv yuav vam khom rau Vajtswv thiab ua tim khawv rau Nws txuas ntxiv”
Muaj ib hnub, muaj ib tug neeg tuaj ntawm Pab Saib Xyuas Kev Ruaj Ntseg Txog Kev Nom Kev Tswv tuaj nug kuv ces kuv txawm ntshai me ntsis. Kuv tsis paub xyov lawv yuav siv hom kev tsim txom twg los tsim txom kuv. Kuv thov Vajtswv twj ywm thiab thov kom Nws tiv thaiv kuv lub siab. Thaum nyob rau hauv chav nug, Tus Thawj Coj Luv hais yam tsis kub siab hais tias: “Cia li qhia qhov tseeb los, thaum koj qhia peb lawm ces koj cia li mus tsev xwb. Peb twb mus tom koj lub tsev lawm. Koj cov me nyuam tseem yau heev—tu siab heev uas tsis muaj leej twg saib xyuas lawv. Cia li qhia peb xwb.” Thaum hnov nws hais txog kuv cov me nyuam mas ua rau kuv xav nyuaj heev li. Kuv xav hais tias: “Kuv poj niam thiab kuv wb ob leeg puav leej raug Pawg Koom Tsham ntes lawm, thiab tam sim no los haj tseem muaj kev cuam tshuam rau wb cov me nyuam lawm thiab. Lawv yuav ua li cas yog tsis muaj leej twg saib xyuas lawv thaum tseem muaj hnub nyoog yau zoo li no?” Thaum ntawd yog thaum kuv xav txog Vajtswv cov lus uas hais tias: “Nyob rau txhua lub sij hawm, Kuv cov neeg yuav tsum ceev faj tej tswv yim ntxias dag ntawm Ntxwgnyoog, zov lub rooj vag ntawm Kuv lub tsev rau Kuv; … ces koj zam dhau tsis txhob poob mus rau Ntxwgnyoog rooj ntxiab, uas thaum ntawd ces lig dhau heev lawm rau tej kev tu siab khuv xim” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 3). Kuv ras dheev hais tias qhov no yog Ntxwgnyoog lub tswv yim dag xwb. Tub ceev xwm tab tom siv kuv tej kev xav los ntxias kuv kom ntxeev siab rau Vajtswv xwb. Kuv ntseeg tsis tau qhov ntawd. Ces kuv xav txog Vajtswv cov lus uas hais tias: “Ntawm txhua yam uas tshwm sim nyob rau hauv qab ntuj khwb, tsis muaj ib yam dab tsi li uas Kuv yuav tsis tau ua tus hais lo lus kawg rau li. Puas muaj ib yam dab tsi uas tsis nyob rau hauv Kuv ob txhais tes li?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 1). Vajtswv kav tag nrho txhua yam, thiab kuv cov me nyuam puav leej nyob rau hauv Nws ob txhais tes. Kuv txaus siab hlo muab kuv cov me nyuam cob rau Vajtswv, thiab txawm tub ceev xwm yuav siv tej tswv yim dag dab tsi los dag kuv los xij, kuv yuav ua tim khawv thiab yeej yuav tsis dhau los ua ib tug Yudas li! Luv pheej nug kuv txog pawg ntseeg thiab thaum kuv tsis teb, ces Ntsees xuas nrig ntaus thiab ncaws kuv, nthe nqho thaum nws ntaus kuv hais tias: “Tsis hais lus ces kuv yuav muab koj ntaus kom tuag ntag!” Kuv lub taub hau kiv pis lees vim qhov ntaus ntawd. Ntsees ntaus kuv li ib pliag uas nws ua tsis taus pa li lawm, ces nws txawm hais phem heev hais tias: “Koj xav tias koj yuav tsis ua li cas no lod yog koj tsis hais lus? Koj tseem muaj sij hawm nyob rau hauv tsev loj cuj! Peb muaj peb tej hauv kev los saib xyuas koj.” Thaum nws hais lus, nws yuam ntiag muab kuv lub tsho tiv hno, nkawm khau, thiab thom khwm hle tag li. Nws qaws kuv ob lub ceg ris kom pom kuv ob sab plab hlaub, ces muab kuv cab mus rau ib lub tsheb loj uas nyob rau sab nraum chav nug ntawd, ces muab kuv ob txhais tes xauv rau ntawm tus tes qhov rooj tsheb ntawd. Lub qhov rooj ntawd siab heev, kuv ob txhais tes dhau kuv lub taub hau lawm thaum muab xauv rau saum tus tes qhov rooj ntawd. Hauv av muaj daus siab dua ko taw. Ntsees tshem cov daus uas nyob ib puag ncig ntawm qhov chaw uas kuv sawv ntawd tawm mus li 1 txhais npab, tseg ib co dej khov uas nyias nyias saum npoo av lawm xwb. Nws kom kuv peg taw liab sawv rau saum cov dej khov ntawd, thiab hais yam nyaum heev hais tias: “Yog koj tsis hais lus, koj lub cev ib nrab yuav tuag. Koj yuav yog ib tug neeg tuag tes tuag taw mus tag koj sim neej li!” Ces nws txawm mus rau sab hauv lawm.
Lub caij ntuj no ntawd txias heev li. Nyob rau sab nraud mas nws nyob li ntawm 5 uas qis dua ntxaiv lawm. Kuv hnov txias ti nkaus txha thaum muab kuv xauv rau ntawd lawm thiab qhov chaw uas kuv sawv ntawd yog qhov chaw uas raug cua heev. Kuv lub cev maj mam tsis hnov dab tsi li lawm. Kuv tas zog thov Vajtswv hauv kuv lub siab hais tias: “Vajtswv, kuv thov muab tag nrho kuv tus kheej tso rau hauv Koj ob txhais tes. Thov pub txoj kev ntseeg thiab lub zog rau kuv thiab lub siab uas yuav tiv kom dhau txoj kev txom nyem no.” Tom qab kuv thov Vajtswv lawm, kuv hu ib zaj nkauj uas hais txog Vajtswv cov lus twj ywm hais tias. “Koj Yuav Tsum Muab Txhua Yam Tso Pov Tseg txhawm rau Qhov Tseeb”:
1 Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. …
2 Koj yuav tsum nrhiav tag nrho tej uas zoo nkauj thiab zoo, thiab koj yuav tsum nrhiav ib txoj kev hauv lub neej uas muaj qab hau dua. Yog koj ua lub neej qias vuab tsuab, thiab tsis nrhiav ib qho hom phiaj li, tsis yog koj nkim koj lub neej los? Koj yuav tau dab tsi los ntawm ib lub neej zoo li ntawd? Koj yuav tsum muab tag nrho tej kev kaj siab ntawm cev nqaij daim tawv tso pov tseg es kom tau ib qho tseeb, thiab yuav tsum tsis txhob muab tag nrho qhov tseeb cuam pov tseg es kom tau ib qho kev kaj siab me me nkaus xwb. Cov neeg zoo li no ces yeej tsis muaj kev ncaj ncees thiab lub meej mom li; qhov uas muaj lawv nyob ntawd ces tsis muaj nuj nqis dab tsi li!
—Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim
Kuv hnov txhawb zog lawm. Kuv swb tsis tau rau Ntxwgnyoog. Tab txawm yog kuv khov tuag rau hnub ntawd li lawm los xij, kuv yuav ua tim khawv rau Vajtswv! Kwv yees li ib nrab teev tom qab ntawd, muaj ib tug neeg zov lub tsev kaw neeg ntawd txawm los dhau qhov ntawd thiab pom kuv raug xauv tes rau ntawm lub qhov rooj tsheb. Thaum nws taug kev mus rau chav nug, nws qw nrov nrov hais tias: “Nej nug tib neeg zoo li no tsis tau. Peb ua tsis tau kom ib tug neeg twg lub cev ib nrab tuag!” Tsis ntev tom qab tus neeg zov ntawd nkag mus rau hauv lawm, ces Ntsees thiab lwm tus neeg txawm tawm tuaj muab kuv cab rov qab mus rau sab hauv lawm. Thaum no, kuv ob txhais tes thiab ob txhais ko taw twb tsis hnov dab tsi li lawm, kuv lub qhov ncauj loog tag vim no, thiab kuv lub siab tshee hna lawm xwb. Kuv zaum hauv pem teb tau tshaj li ib teev tawm ua ntej kuv maj mam pib rov qab sov tuaj. Luv pom kuv mob mas nws zoo siab heev hais tias: “Koj phem tshaj tub sab lawm thiab—yam tsawg kawg lawv muaj kev txawj. Nej cov tib neeg raug kev txom nyem heev tsuas yog los ntseeg Vajtswv xwb, nws yeej tsis tsim nyog li. Koj yeej tseem yuav raug txim txawm yog koj tsis hais lus los xij.” Thaum hnov li ntawd ua rau kuv npau taws heev. Cov tub ceev xwm no tig qhov tseeb los ua qhov cuav. Lawv xav hais tias tub sab txoj kev ua txhaum kev cai ntawd yog ib txoj kev txawj tiam sis saib peb cov ntseeg uas taug txoj kev yog zoo li cov neeg ua txhaum kev cai, zoo li lawv cov yeeb ncuab uas txawj tuag uas yuav tsum tau raug tsim txom kom phem tshaj plaws xwb! Thaum saib lawv cov ntsej muag uas ntxim ntxub ntawd mas, kuv foom tsis zoo rau lawv hauv kuv lub siab. Thaum kawg, lawv pom hais tias kuv yuav tsis hais lus, yog li ntawd lawv thiaj li rov qab muab kuv xa los rau hauv chav lawm.
Hmo ntawd, kuv ob txhais ko taw khaus khaus thiab mob, thiab pib tawm hlwv lawm. Thaum tag kig sawv ntxov tom qab ntawd kuv ob txhais ko taw tawm ntshav hlwv, zoo li kuv raug dej kub hlab lawm xwb. Tawm ib lub tag ib lub tuaj, cov loj mas loj npaum li lub nkaub qe hos cov me mas loj npaum li tus ntiv tes. Kuv mus tsis taus kev kiag li, thiab kuv xav khawb kuv ob txhais ko taw xwb, tiam sis kuv ua tsis tau li ntawd. Thaum cov hlwv ntshav ntawd tawg, cov hlwv ntshav ntawd cia li nplaum rau kuv nkawm thom khwm lawm xwb. Kuv ob sab plab hlaub loog tag nrho thiab khaus khaus. Kuv cia li mob thiab kuv lub ntsej muag liab ploog xwb. Txog hnub peb, kuv ob txhais ko taw txawm kis tau kab mob thiab kuv ob txhais ko taw o loj heev cov khau uas loj tshaj plaws twb tsis txaus kuv rau li lawm. Kuv ob sab plab hlaub o loj tshaj qub ob npaug, thiab kuv ob lub pob lauj taws dub thiab xiav lus lawm xwb. Lawv ntshai tsam lawv tau thaj tsob kuv, yog li ntawd cov neeg zov thiaj li muab kuv xa mus rau tom tsev kho mob lawm. Tus kws kho mob hais tias kuv lub pob lauj taws sab xis kis tau kab mob thiab mob loj dhau lawm, thiab tias kuv yuav tsum tau raug phais. Nyob rau hauv chav phais ntawd, kuv hnov tus kws kho mob hais rau lwm tus neeg ua hauj lwm uas nyob rau ntawd hais tias: “Ob peb hnub dhau los no peb muaj ib tug neeg raug txim zoo li no thiab. Nws txhais ceg kuj kis tau kab mob tib yam nkaus li no thiab, ces nws thiaj li tuag vim mob pob txha.” Ua rau kuv ntshai thaum hnov tus kws kho mob hais li ntawd. Kuv ob txhais ko taw kis tau mob lawm thiab kuv twb mus tsis taus kev li. Kuv puas yuav mob pob txha thiab? Yog kuv mob, ces kuv kawg tuag los sis tuag tes tuag taw xwb. Ces kuv yuav ua li cas? Kuv tseem hluas heev thiab tag nrho kuv tsev neeg puav leej vam khom rau kuv xwb. Kuv yim xav cev kuv yim txom nyem siab ntsws, ces tom qab ntawd kuv nco txog ib zaj nkauj uas hais txog Vajtswv cov lus uas hais tias “Yuav Ua Kom Zoo Tiav Log Tau Li Cas”: “Thaum koj ntsib kev tsim txom, koj yuav tsum muaj peev xwm tso kev txhawj xeeb ntawm sab cev nqaij tawv tseg thiab tsis txhob yws tawm tsam Vajtswv. Thaum Vajtswv zais Nws Tus Kheej ntawm koj lawm, koj yuav tsum muaj peev xwm muaj kev ntseeg raws Nws qab, kom tuav tau koj txoj kev hlub yav dhau los tsis pub kom nws poob los sis ploj mus. Tsis hais Vajtswv yuav ua dab tsi los xij, koj yuav tsum zwm rau Nws tus qauv thiab npaj foom phem rau koj tus kheej sab nqaij tawv zoo dua li uas yws tawm tsam Nws. Thaum koj raug kev sim siab, koj yuav tsum ua rau Vajtswv zoo siab, txawm hais tias koj yuav quaj los kua muag iab los sis tsis txaus siab rau qee yam hom phiaj uas koj nyiam. Tsuas yog qhov no xwb thiaj li yog kev hlub thiab kev ntseeg tseeb tiag” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Vajtswv cov lus ua rau kuv muaj kev ntseeg thiab lub zog. Thaum ntsib kev txom nyem, Vajtswv xav kom kuv muaj kev ntseeg thiab ua siab ntev kom kuv thiaj li tuav tau kuv tej lus tim khawv kom khov kho. Rov qab xav txog ob peb zaug dhau los uas kuv raug tsim txom ntawd, kuv xav hais tias kuv muaj ntseeg heev. Thaum kuv pom hais tias kuv raug mob hnyav heev los ntawm qhov no no ntawd, ces kuv txawm pib txhawj txog kuv lub neej txoj sia thiab kuv lub neej yav tom ntej. Kuv ntshai tsam tuag, thiab tsam kuv ob txhais ceg tsis ua hauj lwm lawm. Kuv lub siab me tiag tiag li. Kuv tsis muaj txoj kev ntseeg tseeb los sis zwm rau Vajtswv kiag li. Thaum xav txog tej no, kuv thov Vajtswv hais tias: “Au Vajtswv! Kuv tsis xav xav txog kuv tus kheej ntxiv lawm. Kuv yuav ua raws li Koj tej kev coj kev qhia thiab tej kev npaj, thiab tab txawm yog kuv tuag los xij, kuv yeej tseem yuav ua tim khawv thiab ua kom Koj txaus siab.” Thaum nyob hauv tsev kho mob, tub ceev xwm muab kuv xauv tes rau ntawm txaj txhua lub sij hawm li. Lawv tsuas yog tso kuv thaum mus siv chav dej thiab noj mov xwb. Muaj ib hnub thaum kuv mus siv chav dej, muaj ob tug poj niam uas mob txawm los dhau mus thiab nug tias kuv ua txhaum dab tsi. Ntsees hais tias, “Nws yog ib tug mos poj niam!” Ob tug poj niam ntawd ntsia kuv yam saib tsis taus kuv li. Kuv chim heev. Tub ceev xwm yeej ib txwm ntxeev qhov tseeb thiab hais tej lus dag!
Tom qab ob peb lub lim tiam ces kuv ob txhais ceg uas o ntawd txawm nqig lawm, tiam sis kuv yeej tseem ceg pauv thaum kuv mus kev. Cov neeg zov ntawd txawm coj kuv rov qab los rau hauv lub tsev kaw neeg lawm. Muaj ib hnub, muaj peb tug tub ceev xwm tau los nug kuv. Thaum pom kuv tseem Dai Dej, nkawv hais nyaum nyaum hais tias: “Cia li muab rho tawm! Nej ua zoo rau nws dhau lawm, tseem Dai Dej rau nws thiab. Nej cia nws muaj txoj sia nyob xwb ces twb zoo txaus lawm!” Kuv npau taws heev, kuv xav hauv kuv tus kheej hais tias: “Cov ntsej muag dab ntawd, muab kuv lub cev rau dej khov tuag tag ib nrab es tseem hais tias lawv ua zoo dhau lawm thiab. Lawv mas yeej siab phem thiab tsis muaj kev hlub tshua kiag kiag li!”
Nyob rau hauv chav nug ntawd, ib tug tub ceev xwm hais tias: “Tam sim no koj rooj plaub nyob rau hauv peb Pab Tub Ceev Xwm Ntawm Cov Neeg Raug Txim Pawg Me ob txhais tes lawm. Tej zaum Pab Saib Xyuas Kev Ruaj Ntseg Txog Kev Nom Kev Tswv yuav tsis muaj peev xwm saib xyuas koj, tiam sis peb yeej muaj peb tej hauv kev tas li!” Thaum pom nkawv ob lub ntsej muag phem, txaus ntshai mas ua rau kuv ntshai thiab kuv pib tawm hws kiag. Kuv tau hnov hais tias Pab Tub Ceev Xwm Ntawm Cov Neeg Raug Txim Pawg Me ntawd yog cov saib xyuas tej plaub loj. Lawv mas siab phem thiab lim hiam heev nyob rau hauv lawv tej kev tsim txom. Kuv tsis paub xyov lawv yuav tsim txom kuv li cas li. Kuv puas yuav muaj peev xwm tiv taus qhov ntawd? Kuv txawm maj nroos thov Vajtswv kom pub kuv muaj kev ntseeg thiab txoj kev txiav txim siab los tiv qhov kev txom nyem no. Ces tus tub ceev xwm ntawd hais tias: “Tab txawm cov neeg uas tawv tshaj plaws los peb yeej ua tau rau lawv lees txim rau ntawm no tas li. Pab Tub Ceev Xwm Ntawm Cov Neeg Raug Txim Pawg Me ntawd yog tsim los rau txim rau tib neeg nkaus xwb. Peb tsis quav ntsej tias nej cov uas ntseeg Vajtswv Tus Uas Muaj Hwj Chim Loj Kawg Nkaus ntawd yuav ciaj los yuav tuag li, yog li ntawd cia li qhia qhov tseeb los tsuag tsuag xwb!” Kuv hais tias: “Kuv tsis muaj dab tsi yuav hais.” Nws npau taws heev, nws thiaj li siv ib sab tes siv zog xuas ncuav pias rau kuv lub ntsej muag ces tom qab ntawd siv lwm sab thiab. Ua rau kuv tsis meej pem li lawm. Ua rau kuv tsis meej pem li lawm. Tib qho uas kuv hnov ces yog kuv lub ntsej muag mob heev thiab ntshav tawm ntawm kuv ceg kaum ncauj los xwb, thiab kuv lub qhov ncauj thiab kuv lub ntsej muag o heev tuaj lawm. Thaum pom hais tias lawv txhua tus phem npaum li cas thiab lawv siab phem npaum li cas lawm, ua rau kuv txhawj heev hais tias: “Yog zoo li no mus ntxiv, lawv puas yuav ntaus kuv kom mus txog qhov uas tuag tes tuag taw, los sis tuag kiag? Yog kuv tiv tsis taus qhov kev tsim txom ntawd es cia li qhia tawm, ces kuv yuav yog ib tug Yudas ntag.” Kuv thiaj li maj nroos los rau ntawm Vajtswv lub xub ntiag thiab thov Vajtswv. Tom qab kuv thov Vajtswv tag lawm, kuv xav txog ib sob lus ntawm Vajtswv cov lus uas hais tias: “Kev ntseeg zoo li ib ya cav tuam ua tus choj: Cov uas tuav rawv txoj sia yuav hla nyuaj heev, tiam sis cov neeg uas npaj txhij fij lawv tus kheej tuaj yeem hla dhau mus, ruaj siab rau txhais ko taw thiab tsis txhawj” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 6). Vajtswv cov lus ua rau kuv muaj kev ntseeg thiab kuv txiav txim siab hais tias: “Txawm hnub no lawv yuav ntaus kuv phem npaum li cas los xij, kuv yuav tsis dhau los ua ib tug Yudas li!” Lawv xuas ncuav pias rau kuv lub ntsej muag thiab siv zog ncaws kuv ob peb teg ntxiv. Ces, lawv rov qab muab txoj hlua los khi kuv dua li zaum tas los. Tiam sis zaum no haj yam phem tshaj. Lawv muab kuv ntxeev tis qaib thiab siv zog rub txoj hlua ntawd. Mloog zoo li kuv ob txhais caj npab yuav dam li thiab mob tshaj plaws. Ib nrab teev tom qab ntawd, kuv ob txhais tes doog dub nciab thiab xiav lus lawm xwb, yog li ntawd lawv thiaj li daws kuv thaum lawv pom hais tias kuv sab heev li lawm. Tom qab rov qab ib nrab ib teev dua, thaum pom hais tias kuv ob lub caj dab tes zoo me ntsis lawm, lawv rov qab muab txoj hlua ntawd los khi kuv dua zaum ob. Zaum no lawv nqa ib tug pa txhuam tsev los. Lawv muab tus pa ntawd coj los ntxig rau txoj hlua uas rig los xaus ntawm kuv lub caj qub thiab muab kiv ob ntxees kom txoj hlua ntawd haj yam zawm kuv ob txhais caj npab thiab xub pwg. Ib tug tub ceev xwm mas zaum rawv ntawm ib lub rooj thiab tuav tus pa txhuam tsev nyob tom kuv nraub qaum, siv zog nias xwb. Kuv ob txhais caj npab mob yam tiv tsis taus li thiab mloog zoo li kuv ob txhais caj npab yuav dam li. Thaum nws nias tus pa txhuam tsev ntawd, nws tas zog nug kuv hais tias: “Nej muaj pes tsawg leej? Leej twg yog nej tus thawj coj?” Thaum lawv pom hais tias kuv yuav tsis teb, ces lawv txawm nqa peb lub hwj npias los thiab muab cov hwj npias ntawd ntsaws rau hauv qab kuv ob txhais caj npab. Nws mloog zoo li muab kuv ob txhais caj npab rub mas mob tshaj plaws li uas kuv yuav luag hnov qab. Kuv tsuas yog thov Vajtswv tas li thiab thov kom Nws pub lub zog rau kuv lawm xwb. Ces ob tug tub ceev xwm txawm ib leeg los sawv ib sab ntawm kuv, rub kuv lub tsho rau saud, ces tom qab ntawd muab ib lub taub dej uas twb muab qhib lawm coj los siv zog kos kuv ob sab tav. Nws mob tiag tiag li kuv thiaj li tau qw. Ib tug tub ceev xwm nthe nqho rau kuv hais tias: “Koj mob los sav, yog li ntawd vim li cas koj thiaj li tsis thov koj tus Vajtswv los cawm koj, hav? Yog mob koj dhau lawm ces cia li hais lus xwb!” Nkawv yeej siv zog kos kuv ob sab tav mus mus los los kom txog thaum nkawv ua rau daim tawv nqaij to li. Nws yog ib qho uas txom nyem tshaj plaws. Ces lawv txawm siv zog nias kuv lub taub hau thiab hais yam npau taws heev hais tias: “Yog qhov no tsis ua hauj lwm, ces cia peb coj nws mus rau ib qho chaw uas tsis muaj neeg pom es mam li muab nws ntaus kom tuag. Yog ib tug tub sab mas zoo dua li yog ib tug uas ntseeg Vajtswv. Raug kev txom nyem me ntsis yeej tsim nyog lawm yog koj tau me ntsis nyiaj!” Ces, ib tug tub ceev xwm hais tias: “Cia li hais lus, qhov kev raug txom nyem no tsis tsim nyog li. Yog koj hais lus ces txhua yam tag li ntawd lawm.” Kuv mloog zoo li kuv lub cev tsuas tiv taus li no lawm xwb, ces kuv txawm xav hais tias: “Yog kuv cia li qhia lawv qee yam uas tsis tseem ceeb ne puas ua cas? Tej zaum kuv yuav raug kev txom nyem tsawg me ntsis.” Tiam sis tom qab ntawd kuv ras dheev hais tias yog kuv hais qee yam lawm, ces kuv yog ib tug Yudas uas ntxeev siab rau Vajtswv ntag. Kuv yuav hais tsis tau ib yam dab tsi li. Kuv tas zog thov Vajtswv hais tias: “Au Vajtswv! Kuv yeej tiv tsis taus li lawm tiag tiag. Thov pub lub zog rau kuv thiab tiv thaiv kuv kom kuv thiaj li tuav tau kuv tej lus tim khawv khov kho txuas ntxiv.” Tom qab kuv thov Vajtswv tag lawm, kuv txawm xav txog Vajtswv cov lus uas hais tias: “Nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Vajtswv cov lus ua rau kuv rov qab muaj zog tuaj. Kuv hnov Nws txoj kev nrog nraim ntawm kuv ib sab tas li li. Txawm kuv yuav raug kev txom nyem npaum li cas los xij, kuv yuav tso siab rau Vajtswv thiab tiv kom dhau qhov kev txom nyem ntawd. Kuv thov Nws hais tias: “Vajtswv, Koj paub hais tias kuv tiv taus ntau npaum li cas. Txawm lawv yuav tsim txom kuv li cas los xij, kuv yuav tsis ntxeev siab rau Koj. Yog kuv yeej tiv tsis taus ib qho mob ntxiv li lawm, ces kuv yeem tuag zoo dua li ua ib tug Yudas.”
Tom qab zaum ob lawm, kuv zaum ua tib pawg rau hauv av lawm xwb. Kuv yuav luag tiv thaiv thaum ib tug tub ceev xwm rub kuv lub ntsej tsho ra kuv sawv thiab muab kuv thawb teem rau tim phab ntsa. Nws siv zog tuav kuv lub caj dab thiab hais nyaum heev hais tias: “Kuv yuav zawm koj lub roj pas kom koj tuag hnub no ntag!” Ua rau kuv ua tsis taus pa li, kuv thiaj li siv tag nrho kuv lub zog los thawb nws ntawm kuv mus. Nws txawm thaub qab kiag thiab zoo li ceeb tag li. Kuv kuj xav tsis thoob li thiab. Tom qab tsim txom tau ib lub hlis, kuv tsis muaj zog li lawm. Hnub ntawd kuv twb raug qee yam kev tsim txom thiab kuv twb tsis muaj ib lub zog li lawm. Kuv yeej xav tsis txog li tias kuv tseem muaj peev xwm thawb tau nws tawm thiab. Kuv paub hais tias qhov ntawd yog Vajtswv pab kuv thiab pub lub zog rau kuv. Lawv pheej tsim txom kuv mus txog ntua thaum ib teev tav su dua. Cov tub ceev xwm uas saib xyuas cov neeg ua txhaum kev cai ntawd muaj ib tug hais yam npau taws heev hais tias: “Koj mas tawv ncauj tiag tiag. Peb mam li ua txuas ntxiv rau tag kig thiab peb yuav saib seb koj yuav tiv taus ntev npaum li cas. Yog koj tsis hais lus, peb yuav nug koj txhua hnub kom txog thaum koj hais lus!” Thaum hmo ntuj kuv pw ntawm kuv lub txaj, ib ce ntsuab tag nrho li. Cov tawv nqaij ntawm kuv ob sab tav puav leej to tag li thiab mob heev thaum ua pa. Kuv ob txhais caj npab mob dhau lawm kuv cia li hle tsis tau kuv lub tsho li lawm. Kuv tsa kuv lub ntsej ntso thiab pom hais tias cov qhov txhab saum kuv ob lub xub pwg uas twb zoo lawm rov qab mob tuaj lawm. Kuv ob lub caj dab tes muaj ntshav los ntawm qhov txoj hlua zawm. Txawm yuav phem npaum li cas los xij, cov ntsej muag dab ntawd yuav ua txhua yam los yuam kuv kom ntxeev siab rau Vajtswv thiab muab kuv cov kwv tij thiab cov muam muag tawm li. Lawv xav muab kuv tua lawm xwb. Lawv yog ib pab laib uas ntxub qhov tseeb, thiab yog cov ntsej muag dab uas ntxub Vajtswv! Kuv xav txog qhov tub ceev xwm hais tias tag kis lawv mam li nug kuv txuas ntxiv dua ces txawm ua rau kuv tais caus thiab ntshai hais tias: “Tag kis qhov kev tsim txom ntawd puas haj yam yuav phem tshaj thiab? Lawv puas yuav tsim txom kuv kom tuag? Cov tub ceev xwm phem no yuav tsis so kom txog thaum kuv qhia pawg ntseeg rau lawv li. Tiam sis yog kuv hais lus, ces kuv yuav yog ib tug Yudas uas ntxeev siab rau Vajtswv, thiab yog kuv tsis hais lus, ces ntxim zoo li kuv yuav raug tsim txom kom tuag li.” Kuv nyuaj siab heev li, yog li ntawd kuv thiaj li thov Vajtswv tag los thov dua hais tias: “Au Vajtswv, kuv lub siab me heev, kuv tus kheej nkaus xwb yeej tiv tsis tau qhov kev tsim txom no, tiam sis kuv tsis xav ua ib tug Yudas uas ntxeev siab rau Koj. Thov pab kuv thiab coj kuv kev.” Tom qab thov Vajtswv tag lawm, kuv xav txog Vajtswv cov lus uas hais tias: “Rau cov uas yeej tsis muaj lub siab ncaj ib qho me me rau Kuv rau lub sij hawm muaj kev txom nyem loj no hlo li, Kuv yuav tsis ua siab hlub tshua ntxiv lawm, rau qhov Kuv txoj kev hlub tshua no tsuas rub tau ntev npaum li no xwb. Ntxiv ntawd mus, Kuv yeej tsis muaj kev nyiam ib qho hlo li rau cov uas tau ntxeev siab ib zaug rau Kuv lawm, Kuv haj yam tsis nyiam ua ke nrog cov uas tau muab lawv cov phooj ywg txoj kev ntshaw muag tawm. Qhov no yog Kuv tus moj yam, tsis hais tus neeg ntawd yuav yog leej twg los xij. Kuv yuav tsum tau qhia qhov no rau nej: Tus uas tau tsoo Kuv lub siab kom tawg lawm ces yuav tsis tau txais kev zam ntxim los ntawm Kuv ua zaum thib ob lawm, thiab tus uas tau ua siab ncaj rau Kuv ces yuav tau nyob hauv Kuv lub siab mus ib txhis” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Npaj Txoj Kev Ua Zoo Kom Txaus Nkaus rau Koj Txoj Hau Kev Kawg). Kuv xav txog cov lus ntawd tas li li. Kuv paub hais tias Vajtswv tus moj yam mas ncaj ncees thiab tsis zam txoj kev ua txhaum li. Yog kuv ntxeev siab rau Vajtswv thiab muab kuv cov kwv tij thiab cov muam muag tawm kom tsis txhob raug kev txom nyem, ces yog kuv ua txhaum rau Vajtswv tus moj yam lawm thiab thaum kawg kuv yuav raug rau txim. Kuv xav txog qhov kev ntsib kev pom no tag nrho. Yog hais tias tsis yog vim Vajtswv cov lus coj kuv kev, ces ntshe kuv twb tsis muaj peev xwm tiv dhau tub ceev xwm txoj kev tsim txom uas phem heev no. Qhov uas kuv tseem muaj txoj sia nyob ntawd yog vim Vajtswv txoj kev tiv thaiv xwb. Qhov kuv ciaj thiab tuag ntawd yog nyob rau hauv Vajtswv ob txhais tes. Yog Vajtswv tsis tso cai, ces Ntxwgnyoog yeej txo tsis tau kuv txoj sia li. Thaum xav li ntawd lawm, kuv thiaj li tau txiav txim siab muab tag nrho txhua yam ntawm kuv coj los ua tim khawv rau Vajtswv. Ua rau kuv xav tsis thoob li, thaum kuv muaj lub siab tawv tos ntsib qhov kev nug tom ntej ntawd, lawv cia li tsis rov qab los li lawm. Tau ib lub hlis tom qab ntawd, Luv qhia rau kuv hais tias: “Koj rooj plaub tag lawm. Peb muab sij hawm ib xyoos rau koj. Koj tsev neeg tau muab ib co nyiaj tuaj nias rooj lawm. Thaum koj mus txog tsev lawm, koj yuav tsum tau nyob twj ywm li ib xyoos. Thaum peb hu koj, koj yuav tsum tuaj raws li lub sij hawm.”
Tom qab kuv tawm los lawm, yuav kom tsis txhob raug tub ceev xwm soj mas, kuv yuav tsum tau tawm hauv tsev mus ua kuv tes dej num kom tiav nyob rau lwm qhov chaw. Qhov Tsoom Fwv Koom Tsham Suav ntes thiab tsim txom ntawd ua rau kuv pom tseeb tseeb txog lub ntsiab tseeb phem ntawm lawv txoj kev ntxub thiab kev tawm tsam Vajtswv lawm. Kuv ntxub lawv tiag tiag li. Kuv kuj hnov Vajtswv txoj kev hlub thiab kev cawm kuv dim tiag tiag li thiab. Thaum kuv yuav luag tsis muaj peev xwm tiv txoj kev raug tsim txom ntawd ib qho ntxiv li lawm, Vajtswv nrog nraim kuv, saib xyuas kuv thiab tiv thaiv kuv, thiab siv Nws cov lus los coj kuv kev thiab pub kuv muaj kev ntseeg thiab lub zog kom kuv thiaj li kov yeej cov dab phem ntawd txoj kev lim hiam thiab muaj txoj kev txiav txim siab los muab kuv txoj sia rau Vajtswv thiab ua tim khawv rau Nws. Ua tsaug rau Vajtswv!
