85. Tag nrho Txoj Kev Txom Nyem Ntawd Yog Txhawm Rau Dab Tsi?
Tom qab los ua ib tug ntseeg lawm, kuv pom hais tias muaj ntau tus thawj coj thiab cov neeg ua hauj lwm yeej nyiaj taus ntau yam kev txom nyem tiag tiag li. Lawv ua hauj lwm tas mus li, tiv tshav tiv nag ua lawv tes dej num, thiab cov nus thiab cov viv ncaus txhua tus puav leej pom zoo rau lawv thiab qhuas lawv. Kuv khib lawv heev thiab cia siab hais tias kuv tuaj yeem dhau los zoo li lawv: ua ib tug tib neeg uas tuaj yeem raug kev txom nyem thiab tiv kev txom nyem kom lwm tus qhuas. Yog li ntawd, kuv thiaj li kub siab heev rau kuv txoj kev caum ces tom qab ntawd kuv txawm raug xaiv los ua ib tug thawj coj pawg ntseeg lawm. Txhua hnub kuv ua kuv tes dej num khwv heev, ces lwm tus thiaj li qhuas kuv hais tias kuv muaj peev xwm tiv kev txom nyem, thiab lawv hais tias kuv yog ib tug uas caum qhov tseeb. Kuv zoo siab heev txhua zaus uas kuv hnov tej yam zoo li ntawd, thiab mloog zoo li tag nrho txoj kev txom nyem ntawd mas yeej tsim nyog lawm. Tom qab ntawd, tus ciaj ciam ntawm kuv lub luag hauj lwm txawm loj zuj zus tuaj, thiab kuv tes hauj lwm pheej ntau zuj zus tuaj lawm xwb. Kuv pom hais tias ib co viv ncaus uas kuv nrog ua hauj lwm ua ke ntawd yeej tuaj yeem raug kev txom nyem thiab tiv taus kev txom nyem tiag tiag li. Lawv mus pw lig lig tas li thiab thaum nruab hnub mas qee zaus lawv cia li yoo tshaib mus koom tej kev sib txoos ua ke li lawm, tsis muaj sij hawm noj mov li. Kuv hnov cov nus thiab cov viv ncaus ntawd hais tias lawv tab tom ris ib lub nra nyob rau hauv lawv tes dej num thiab tias lawv muaj peev xwm tiv kev txom nyem. Kuv xav hais tias yog cov nus thiab cov viv ncaus ntawd nyiam cov tib neeg zoo li ntawd, ces Vajtswv los kuj yuav tsum nyiam thiab. Yog li ntawd kuv txawm pib ua kuv tes dej num kom lig mus rau yav hmo ntuj. Tiam sis ib ntus tom qab ntawd kuv lub cev tiv tsis taus ntxiv li lawm ces kuv txawm pib tsaug zog thaum dhau ib tag hmo lawm. Tiam sis txhua zaus uas kuv pom lwm cov viv ncaus tseem ua hauj lwm, ces kuv txawm txaj muag mus pw lawm, ntshai tsam lawv yuav hais tias kuv mob siab rau lub cev nqaij daim tawv xwb thiab tias kuv tsis muaj ib lub nra ris nyob rau hauv kuv tes dej num. Yog li ntawd kuv thiaj li ua txuas ntxiv, tiam sis kuv yeej tswj tsis tau kom txhob tsaug zog li, thiab kuv ua tsis tau ntau yam tiav li lawm. Txawm li ntawd los kuv yeej tseem tsis mus pw li thiab. Kuv txhawb kuv tus kheej twj ywm, xav hais tias kuv ua tsis tau raws li kuv lub cev nqaij daim tawv thiab tias kuv cia lwm tus saib tsis taus kuv tsis tau. Qee zaus, vim kuv nyob lig lig, ces thaum kuv yuav tsum tau sawv ntxov ntxov mus koom kev sib txoos ua ke, kuv thiaj li tsaug zog thaum caij kuv lub tsheb kauj vab hluav taws xob mus rau tod, thiab kuj tsaug zog nyob rau hauv qhov kev sib txoos ua ke ntawd thiab. Kuv xav tso dab ntub rau thaum tav su dua, tiam sis kuv ntshai tsam lwm tus yuav hais tias kuv ntshaw kev tau zoo ntawm sab cev nqaij daim tawv xwb. Txhua hnub, kuv yuam kuv tus kheej nyob, thiab tswj kuv tus kheej kom dhau qhov tsaug zog ntawd. Muaj ib hnub, thaum kuv caij kuv lub tsheb kauj vab hluav taws xob mus rau ib lub rooj sib txoos ua ke, vim kuv tsaug zog heev, kuv cia li tsis meej pem thaum taug kev mus li lawm ces thaum kawg kuv thiaj li poob rau hauv ib tug kwj deg, uas ua rau kuv ntshai thiaj li ras dheev tam sid. Thaum cab kuv lub tsheb kauj vab taug kev, kuv pheej xav txog qhov tias qhov no tsis yog ib txoj kev yog lawm. Vim kuv txoj kev soj ntsuam txog kuv tej kev xav no, kuv thiaj li ras dheev hais tias txij li thaum kuv raug xaiv los ua ib tug thawj coj lawm, yam uas kuv xav txog txhua txhua hnub ntawd ces yog txoj kev txom nyem thiab kev rau siab ntso ntawm kuv tus kheej xwb, pheej ntshai tsam tib neeg yuav hais tias kuv mob siab rau lub cev nqaij daim tawv thiab ntshaw kev tau zoo xwb. Qhov ntawd txhais tau hais tias kuv tsis muaj qhov kev ua li qub nyob rau hauv kuv lub neej li, thiab kuv haj tseem tsis so li qub li thiab.
Muaj ib hnub kuv txawm nyeem Vajtswv cov lus uas muab cov Falixais nthuav tawm, ces kuv thiaj li muab cov lus no coj los siv rau kuv tus kheej. Vajtswv cov lus hais tias: “Nej puas paub tias ib tug Falixais zoo li cas tiag tiag? Puas muaj ib tug Falixais nyob ib puag ncig ntawm nej? Vim li cas thiaj li hu cov tib neeg no ua ‘cov Falixais’? Yuav piav qhia txog cov Falixais no li cas? Lawv yog cov tib neeg uas hais lus zoo tab sis siab phem, cuav nkaus xwb, thiab txhua yam uas lawv ua yog lam ua txuj ua xwb. Lawv lam ua txuj ua li cas? Lawv ua txuj ua zoo, ua siab zoo, thiab ua qhov zoo. Lawv yeej zoo li no tiag tiag lod? Yeej tsis zoo li no. Qhov uas lawv hais lus zoo tab sis siab phem, txhua yam uas tau ua rau pom meej tseeb thiab nthuav tawm nyob rau hauv lawv ntawd yog cuav xwb; txhua yam ntawd puav leej yog ua txuj—nws tsis yog lawv lub ntsej muag tseeb. Lawv lub ntsej muag tseeb zais nyob rau qhov twg? Lub ntsej muag ntawd zais tob rau hauv lawv lub siab lawm, lwm tus yeej tsis pom li. Txhua yam uas nyob rau sab nraud yog lam ua txuj ua, puav leej yog cuav xwb, tiam sis lawv tsuas dag tau tib neeg xwb; lawv dag tsis tau Vajtswv. Yog tib neeg tsis tshawb nrhiav qhov tseeb, yog lawv tsis xyaum ua raws li Vajtswv cov lus thiab tsis paub Vajtswv cov lus, ces lawv yeej tsis to taub qhov tseeb tiag tiag, yog li ntawd txawm lawv cov lus yuav zoo npaum li cas los xij, cov lus no tsis yog qhov tseeb qhov muaj tiag, tiam sis yog cov lus hais thiab tej kev qhuab qhia xwb. Ib txhia tib neeg tsuas mob siab rau qhov qog lus thiab tej kev qhuab qhia xwb, lawv qog tus uas qhuab qhia tau zoo tshaj plaws, vim li ntawd ob peb xyoos xwb lawv cov lus hais thiab tej kev qhuab qhia mas zoo heev li lawm, thiab ntau tus tib neeg qhuas thiab hwm lawv, uas tom qab ntawd lawv pib zais lawv tus kheej, thiab ua tib zoo saib xyuas qhov lawv hais thiab ua, uas qhia tias lawv tus kheej mas coj txoj kev ntseeg nruj thiab paub sab ntsujplig heev. Lawv siv qhov uas hu ua tej kev xav ntawm sab ntsujplig no los zais lawv tus kheej. Txhua qhov chaw uas lawv mus lawv puav leej tham txog tej no, tej yam uas zoo li muaj tseeb uas haum rau tib neeg tej kev xav phem, tiam sis tsis muaj qhov tseeb qhov muaj tiag ib qho li. Yog li ntawd vim txoj kev tshaj tawm tej no—tej uas mus raws li tib neeg tej kev xav phem thiab tej kev nyiam—es tej ntawd thiaj li dag tau ntau tus tib neeg. Lwm tus tib neeg saib mas zoo li cov tib neeg zoo li no muaj lub siab ncaj ncees thiab txo hwj chim heev, tiam sis tseeb tiag yog cuav xwb; zoo li lawv ua siab ntev, ua siab dav, thiab muaj kev hlub, tiam sis tseeb tiag yog ua txuj xwb; lawv hais tias lawv hlub Vajtswv, tiam sis tseeb tiag yog lam ua txuj hlub xwb. Lwm tus xav hais tias cov tib neeg zoo li no mas dawb huv, tiam sis tseeb tiag yog cuav xwb. Tus tib neeg uas dawb huv tiag tiag ntawd pom nyob rau qhov twg? Tib neeg txoj kev dawb huv puav leej yog cuav xwb. Puav leej yog lam ua txuj ua, thiab ua txuj xwb. Nyob rau sab nraud mas, zoo li lawv ua lub siab ncaj ncees rau Vajtswv, tiam sis tseeb tiag lawv tsuas lam ua rau lwm tus pom xwb. Thaum tsis muaj leej twg saib lawm, lawv tsis ua lub siab ncaj ncees ib qho me me li, thiab txhua yam uas lawv ua yog lam tau lam ua xwb. Lawv lam muab lawv tus kheej fij rau Vajtswv thiab muab lawv tsev neeg thiab tej hauj lwm tso tseg xwb. Tiam sis qhov uas lawv tab tom ua yam zais ntshis ntawd yog dab tsi? Lawv tab tom ua lawv tus kheej txoj lag luam thiab khiav lawv tus kheej txoj hauj lwm nyob rau hauv pawg ntseeg, kom tau txiaj ntsig los ntawm pawg ntseeg thiab nyiag tej khoom fij ntawd yam zais ntshis los ntawm qhov ua txuj ua hauj lwm rau Vajtswv…. Cov tib neeg no yog cov Falixais uas hais lus zoo tab sis siab phem uas nyob rau tiam tshiab” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob). Qhov uas Vajtswv cov lus muab nthuav tawm ntawd mas ua rau kuv nyuaj siab thiab nyuaj heev rau kuv. Kuv coj zoo kiag li cov Falixais ntag. Lawv nyiam siv lawv tus cwj pwm los ua txuj coj zoo rau sab nraud, txhob txwm thov Vajtswv rau ntawm tej ntug kev thiab pheej tshaj tawm Vajtswv cov lus kom tib neeg thiaj li xav hais tias lawv yeej mob siab rau tiag tiag thiab tias lawv yeej hlub Vajtswv tiag tiag no. Tiam sis thaum luag tsis pom lawm mas lawv yeej tsis xyaum ua raws li Vajtswv cov lus kiag li. Txhua yam uas lawv ua ntawd tsuas yog ua qhia, kom tau txais kev pom zoo thiab kev qhuas xwb. Kuv los tib yam nkaus thiab. Kuv tsuas mob siab rau tus cwj pwm zoo sab nraud xwb kom cov nus thiab cov viv ncaus thiaj li yuav xav zoo txog kuv xwb. Thaum pom qee tus neeg muaj peev xwm raug kev txom nyem thiab tiv kev txom nyem nyob rau hauv lawv tes dej num thiab tau txais txhua tus txoj kev pom zoo thiab kev qhuas, ces kuv thiaj li siv zog ua kom yog hom tib neeg ntawd. Thaum kuv raug xaiv los ua ib tug thawj coj lawm, kuv pom cov viv ncaus uas kuv nrog ua hauj lwm ua ke ntawd ua hauj lwm kom lig mus rau yav hmo ntuj, ces kuv txawm yuam kuv tus kheej kom nyob lig lig kom kuv thiaj li yuav tsis poob qab. Kuv ua tiag ua txawm kuv yuav tsaug zog npaum li cas los xij. Kuv haj tseem ua tiag tsis tso dab ntub ib pliag li kuv ib txwm tso rau thaum tav su lawm thiab es kom qhia tau kuv tus kheej hais tias yog ib tug neeg uas tiv taus kev txom nyem tiag tiag thiab. Kuv zais kuv tus kheej rau txhua fab li, ua kom cov nus thiab cov viv ncaus thiaj li qhuas vim pom qhov ua zoo. Qhov kev txom nyem thiab kev siv kuv tus kheej li ntawd yog cuav thiab dag nkaus xwb. Kuv tab tom taug cov Falixais txoj kev ntag—yog li ntawd ua li cas Vajtswv thiaj li tsis qias qhov no? Tom qab ntawd, thaum twg uas kuv xav zais kuv tus kheej, kuv nco ntsoov tso kuv tus kheej tseg, tsis ua txuj ua kom lwm tus pom, thiab kuj kho kuv tes hauj lwm thiab muaj sij hawm so, thiab kuv mus pw thaum kuv ua tes hauj lwm rau hnub ntawd tag lawm. Kuv hnov los siav lawm ntau thaum kuv ua li no.
Ib xyoo tom qab ntawd kuv txawm mus txawv teb chaws lawm. Cov nus thiab cov viv ncaus uas kuv nrog ua hauj lwm ntawd yeej tiv taus kev txom nyem nyob rau hauv lawv tej dej num tiag tiag thiab lawv ua hauj lwm lig lig txhua hmo. Qee zaum, kuv xav mus pw kom ntxov thaum kuv ua kuv tes hauj lwm tag lawm, tiam sis kuv ntshai tsam lawv yuav xav hais tias kuv mob siab rau lub cev nqaij daim tawv xwb. Kuv kuj yog ib tug thawj coj thiab, yog li ntawd txhua tus yuav xav li cas rau kuv yog kuv mus pw ntxov dua lwm tus nus thiab viv ncaus lawm? Lawv puas yuav hais tias kuv tiv tsis taus kev txom nyem thiab tsis muaj ib qho kev nyuaj siab rau kuv tes dej num li? Thaum kuv xav li ntawd, ces kuv rov qab pib ua txuj dua lawm thiab nrog lawv nyob lig lig. Tiam sis kuv pib tsaug zog thiab pib ncaws dab ntub tom qab 1 teev kaj ntug lawm. Lawv hais kom kuv mus pw ntxov, tiam sis kuv yuam kuv tus kheej kom ua txuj zoo siab hlo nyob thiab hais tias, “Kuv tsis ua cas, kuv nyob taus kawg. Ib pliag kuv mam li mus pw.” Tiam sis tom qab ntawd kuv rov qab tsis meej pem dua lawm. Tej thaum kuv nyiaj tsis taus kuv txoj kev tsaug zog li lawm, yog li ntawd kuv thiaj li ib kuv lub taub hau rau saum lub rooj kom tuaj dab ntub ib pliag, tiam sis kuv tsis kaj siab rau qhov ua li no li. Kuv txhawj txog qhov lwm tus yuav hais txog kuv, yog li ntawd kuv tus kheej thiaj li maj nroos los rau siab ntso ua hauj lwm dua lawm. Yuav ua kom zoo li kuv ris ib lub nra, ces qee zaus kuv thiaj li txhob txwm xa ib tsab xov mus rau hauv pab pawg thaum twb lig heev lawm kom lwm tus thiaj li yuav paub hais tias kuv nyob lig npaum li cas, tias kuv ua kuv tes dej num lig mus rau yav hmo ntuj. Kuv xav yuav qee yam tshuaj pab vim qee yam teeb meem ntawm kuv lub cev, tiam sis kuv txhawj txog qhov lwm tus yuav hais. Lawv puas yuav xav hais tias kuv saib kuv lub cev nqaij daim tawv muaj nqis? Yog li ntawd, kuv tsis yuav cov tshuaj ntawd. Muaj ib zaug nyob rau hauv ib lub rooj sib txoos ua ke, kuv pom hais tias ib tug viv ncaus muaj ib tug yam ntxwv tsis zoo, thiab pom tias nws cheem tsum kev qhia thiab kev txhawb. Tiam sis vim nws nyob rau lwm lub teb chaws uas nyob rau ib lub sij hawm sib txawv lawm thiab nyob ntawm kuv twb yog ib tag hmo lawm, kuv thiaj li xav hais tias kuv mam li qhia nws rau hnub tom qab. Tiam sis tom qab ntawd kuv xav hais tias qhov kev qhia nws thaum tsaus ntuj ntawd tej zaum yuav ua rau kuv zoo li ris ib lub nra rau cov nus thiab cov viv ncaus txoj kev to taub lub neej txoj sia. Yog li ntawd kuv thiaj li hu nws thiab twb txog ntua li 2 teev kaj ntug lawm los yeej qhia tsis tag li. Nws hais rau kuv hais tias, “Ntawm qhov chaw koj nyob twb lig heev li lawm, koj yuav tsum tau mus pw. Qhov pheej ua hauj lwm hnyav txog tsheej tag hmo li no mas tsis zoo rau koj li kev noj qab haus huv.” Kuv zoo siab heev uas hnov qhov ntawd. Txawm kuv meem txom sab cev nqaij daim tawv los xij, qhov ntawd tsis yog tsis muaj qab hau dab tsi vim qhov ntawd twb ua rau nws xav hais tias kuv ris ib lub nra thiab paub leg lub luag hauj lwm lawm. Tom qab ntawd kuv txawm pib muaj txhua yam teeb meem ntawm kev noj qab nyob zoo me ntsis lawm, ces tus kws kho mob qhia kuv hais tias nws yog vim pw tsis txaus. Kuv tsis quav ntsej qhov ntawd thiab pheej tas zog ua li qub. Zaum no, ib tug thawj coj siab zog hais rau kuv tas li hais tias, “Koj tsis txhob pw lig dhau. Txawm koj pw ntxov sawv ntxov los yeej yuav tsis ua rau tes hauj lwm qeeb.” Kuv xav rau kuv tus kheej hais tias yog kuv mus pw ntxov lawm, ces lwm tus yuav xav hais tias kuv uas yog ib tug thawj coj tiv tsis taus kev txom nyem ntau npaum li lwm tus, txawm yog qhov twg los, lawv puas tseem yuav hwm kuv lawm? Kuv tsis khaws tus thawj coj ntawd cov lus rau nruab siab. Muaj ib tug viv ncaus pom hais tias kuv tsis xis neej ces txawm hais tias, “Koj yuav tsum muaj ntau yam heev nyob rau hauv koj lub siab lawm xwb. Qhov muaj ntau yam teeb meem uas yuav tau daws txhua lub sij hawm thiab txhua yam kev ntxhov siab ntawd yuav cuam tshuam koj txoj kev noj qab nyob tsis zoo. Yog cov thawj coj lawm, nej muaj ntau yam kev txhawj xeeb heev.” Kuv zoo siab heev rau kuv tus kheej thaum nws hais li ntawd. Kuv xav hais tias qhov kev txom nyem uas kuv tiv, qhov kev txom nyem uas kuv nyiaj ntawd yeej tsim nyog lwm tus qhuas lawm. Zoo li no txog ntua thaum kuv nyeem ib zaj lus ntawm Vajtswv cov lus uas ua rau kuv muaj qee yam kev to taub txog txoj kev yuam kev uas kuv taug ntawd. Vajtswv cov lus hais tias: “Cov tawm tsam khetos tsis nyiam qhov tseeb kiag li, lawv tsis lees txais qhov tseeb kiag li—uas qhia tshwm pom tau meej txog ib qho muaj tseeb tias: Cov tawm tsam khetos yeej tsis ua raws li qhov tseeb tej hauv paus ntsiab lus li, lawv yeej tsis xyaum ua raws li qhov tseeb li—uas yog qhov qhia tshwm pom meej tseeb tshaj plaws txog ib tug tawm tsam khetos. Dhau ntawm lub koob lub npe thiab lub meej mom lawm, thiab qhov tau txais koob hmoov thiab nqi zog lawm, ces lwm yam uas lawv nrhiav mas yog kev xyiv fab rau cev nqaij daim tawv thiab tej txiaj ntsim ntawm lub meej mom; thiab vim muaj li no, es lawv thiaj cia li tsim kom muaj kev tab kaum thiab kev cuam tshuam. Tej yam uas muaj tseeb no qhia tias yam lawv nrhiav, thiab lawv tus cwj pwm thiab qhov qhia tshwm pom tau meej ntawd tsis yog yam Vajtswv hlub. Thiab tej yam no mas tsis yog tej kev ua thiab tus cwj pwm ntawm cov tib neeg uas nrhiav qhov tseeb. Piv txwv li, qee cov tawm tsam khetos uas zoo li Povlauj ntawd mas muaj kev txiav txim siab los tiv kev txom nyem thaum lawv ua lawv tes dej num, lawv tuaj yeem nyob thawm hmo thiab tsis noj dab tsi li thaum ua lawv tes hauj lwm, lawv tswj tau lawv tus kheej lub cev, tuaj yeem kov yeej kev mob nkeeg thiab kev xeeb txob. Thiab lawv lub hom phiaj rau qhov ua tag nrho tej no yog dab tsi? Lub hom phiaj ntawd yog los qhia rau txhua tus tias lawv muaj peev xwm muab lawv tus kheej tso tseg—muab tau yus tus kheej tso tseg—thaum hais txog Vajtswv cov lus txib; tias rau lawv mas, tsuas yog tes dej num xwb. Lawv ua tag nrho li no rau ntawm lwm tus tib neeg hau ntej. Thaum muaj tib neeg nyob puag ncig mas, lawv tsis so li thaum lawv tsim nyog so, haj tseem lom txwm ua kom lawv lub sij hawm ua hauj lwm ntawd ntev ntxiv thiab, sawv ntxov ntxov thiab mus pw lig lig. Cov tawm tsam khetos lawv khwv ua haujlwm txij thaum sawv ntxov mus txog tsaus ntuj li no, ces qhov ua tau zoo ntawm txoj haujlwm thiab qhov txiaj ntsim ntawm kev ua lawv tes dej num ntawd zoo li cas? Tej yam no mas mus dhau ntawm tus ciaj ciam ntawm qhov lawv xav lawm. Lawv tsuas tas zog ua li no rau ntawm lwm tus hau ntej xwb, kom lwm tus tib neeg pom tias lawv txom nyem, thiab kom pom qhov lawv fij li cas rau Vajtswv yam tsis xav txog lawv tus kheej ib qho li. Hais txog qhov seb tes dej num uas lawv ua thiab tes hauj lwm uas lawv tab tom ua ntawd puas mus raws li qhov tseeb tej hauv paus ntsiab lus ntawd mas, lawv tsis xav txog qhov no kiag li. Qhov lawv xav txog ces yog qhov seb txhua tus puas pom lawv txoj kev coj sab nrauv zoo, seb txhua tus puas paub txog tus cwj pwm zoo ntawd, seb lawv puas tso tau ib qho kev cim siab zoo rau txhua tus, thiab seb qho kev cim siab zoo ntawd puas ua rau muaj kev qhuas thiab kev pom zoo rau lawv, seb cov tib neeg no puas tsa ntiv tes xoo tuaj tom lawv nrob qaum thiab qhuas lawv hais tias, ‘Lawv thev taus kev nyuaj heev, lawv lub siab thev taus thiab uv taus tshwj xeeb ntawd mas tshaj peb txhua tus lawm. Qhov no yog ib tug uas nrhiav qhov tseeb, tus uas muaj peev xwm txom nyem thiab thev taus ib lub nra hnyav, lawv yog ib tug ncej tse nyob hauv pawg ntseeg.’ Thaum hnov li no mas cov tawm tsam khetos txaus siab heev. Nyob rau hauv lawv lub siab lawv xav tias, ‘Kuv mas ntse tshaj uas ua txuj kom zoo li ntawd, kuv mas ua qhov no tau zoo heev! Kuv paub tias txhua tus tsuas saib rau sab nrauv xwb, thiab lawv nyiam tus cwj pwm zoo li no. Kuv paub tias yog kuv ua zoo li no lawm, tib neeg yuav pom zoo, yuav ua rau lawv tsa ntiv tes xoo rau kuv, yuav ua rau lawv hwm kuv puag hauv lawv nruab siab tuaj, ua rau lawv pom nyob rau hauv ib txoj kev kaj tshiab, thiab tias tsis muaj leej twg yuav saib tsis taus kuv ntxiv lawm. Thiab yog hais tias muaj ib hnub los txog thaum tus nyob saud pom tias kuv tsis ua tes hauj lwm tiag es muab kuv tso mus, ces ntshe yeej yuav muaj ntau tus tib neeg uas txhawb nqa kuv, uas yuav quaj rau kuv, thiab nqua hu kom kuv nyob mus ntxiv, thiab hais lus sawv kuv cev xwb xwb li.’ Lawv xyiv fab twj ywm rau lawv txoj kev coj cuav uas zais ntshis ntawd—thiab qhov kev xyiv fab no kuj tsis yog nthuav tus yeeb yam lub ntsiab tseeb ntawm ib tug tawm tsam khetos tawm thiab lod? Thiab qhov no yog lub ntsiab tseeb dab tsi? (Kev lim hiam.) Qhov ntawd yog lawm—qhov no yog lub ntsiab tseeb ntawm txoj kev lim hiam” (Txoj Lus, Phau 4. Kev Nthuav Tawm Cov Tawm Tsam Khetos. Yam Cuaj: (Ntu Kaum)). Vajtswv muab tus tawm tsam Khetos tus yeeb yam qhia tshwm yam li yog txoj kev phem heev. Lawv yuav siv txhua lub tswv yim dag los ua txuj ua kom lawv lub hom phiaj uas tswj lwm tus thiab kom lwm tus qhuas ntawd tiav. Piv txwv li, lawv txhob txwm laug lawv lub sij hawm ua hauj lwm kom ntev, nyob lig lig thiab sawv ntxov ntxov kom thiaj li zoo li lawv mob siab rau Vajtswv. Lawv siv zog ua lawv tej dej num txij thaum kaj ntug mus txog rau thaum tsaus ntuj, lawv tsis noj tsis pw, thiab lawv tsis quav ntsej tej kev cheem tsum ntawm sab cev nqaij daim tawv li, kom tib neeg thiaj li qhuas thiab hwm lawv. Thaum kawg lawv coj tib neeg los rau ntawm lawv tus kheej lub xub ntiag xwb. Vajtswv ntxub thiab teem txim rau tus cwj pwm zoo li no. Kuv tsis kaj siab li, meem txom heev li thaum kuv muab kuv tus kheej ntsuas rau Vajtswv cov lus. Kuv coj zoo kiag li ib tug tawm tsam Khetos ntag. Yuav kom lwm tus pom hais tias kuv tuaj yeem tiv kev txom nyem, tsis ua raws li kuv lub cev nqaij daim tawv thiab mob siab rau kuv tes hauj lwm, thiab yuav kom lawv qhuas kuv tias yog ib tug thawj coj zoo mas, kuv yuav tsum ua txhua yam los qhia txog kuv lub sij hawm ua hauj lwm, lub sij hawm so, nrog rau txhua yam uas kuv noj huv si. Kuv tsis so thaum kuv tsim nyog so, thiab kuv txhob txwm nyob lig lig tab txawm nws tsis tsim nyog rau kuv tes dej num los xij li. Kuv pheej ua li no tas li tab txawm thaum kuv noj tsis qab nyob tsis zoo lawm los xij. Kuv ntshai heev tsam lwm tus yuav hais tias kuv txhawj txog lub cev nqaij daim tawv dhau lawm thiab xav tsis zoo rau kuv. Vim li ntawd, kuv thiaj li tsis tau yuav cov khoom noj ntxiv kuab uas kuv cheem tsum ntawd. Kuv tsa tau kuv tus kheej los ntawm txoj kev ua zoo nyob rau saum daim tawv yam txawj dag heev, uas yog raug kev txom nyem thiab tiv kev txom nyem, ua kom lwm tus xav hais tias kuv caum qhov tseeb, tias kuv nquag thiab mob siab rau kuv tes dej num, thiab tias kuv yog ib tug thawj coj zoo, ua kom lawv hwm kuv. Kuv lub zog thiab tej kev siv nyiaj txiag puav leej yog cuav thiab dag nkaus xwb. Txhua yam ntawd puav leej yog ua kom saib zoo li kuv tus kheej zoo thiab dag lwm tus los ntawm tus yam ntxwv cuav xwb. Kuv taug ib tug tawm tsam Khetos txoj kev lawm. Kuv tsis xav ua txhua yam zoo li no ntxiv lawm, yog li ntawd kuv thiaj li thov Vajtswv, npaj txhij los lees txim hloov dua siab tshiab rau Vajtswv thiab hloov pauv kuv tus yam ntxwv uas tsis yog lawm.
Tom qab ntawd, kuv tig xav txog hais tias vim li cas kuv thiaj li mob siab rau qhov kev nyiaj txoj kev txom nyem ntawd ua luaj li. Kuv ras dheev hais tias kuv zais ib txoj kev xav uas yuam kev lawm. Kuv ib txwm xav hais tias qhov muaj peev xwm raug kev txom nyem thiab tiv kev txom nyem, thiab ua yam zoo nyob rau saum daim tawv ntawd yog kev xyaum ua raws li qhov tseeb thiab kev ua rau Vajtswv txaus siab, tias Vajtswv yuav pom zoo rau qhov no. Tiam sis kuv pom los qhov Vajtswv cov lus muab qhia tshwm ntawd hais tias hom kev xav zoo li no mas tsis muaj qab hau kiag li. Vajtswv cov lus hais tias: “Tib neeg tej kev coj zoo sab nrauv sawv cev rau dab tsi? Lawv sawv cev rau lub cev nqaij daim tawv. Thiab tej kev ua sab nrauv, txawm yog cov uas zoo tshaj plaws los, yeej tsis sawv cev rau txoj sia; lawv tsuas qhia tau txog koj tus kheej tus yam ntxwv xwb. Tib neeg tej kev ua sab nrauv yeej ua tsis tau kom tau raws li Vajtswv tej kev npaj siab. … Yog koj tej kev ua ib txwm yog rau sab nrauv xwb, ces qhov ntawd qhia tau tias koj yog tus neeg uas siab ploj las thiab tsuas muaj qhov pom sab nrauv xwb. Cov neeg uas tsuas muaj tej kev coj zoo sab nrauv xwb tiam sis tsis muaj qhov muaj tiag, lawv yog neeg zoo li cas? Lawv yog cov Falixais uas ua txuj ua neeg ncaj ncees, thiab yog cov neeg tseem ceeb ntawm kev ntseeg! Yog nej tsis muab nej tej kev ua sab nrauv tso tseg, thiab hloov pauv tsis tau, ces nej txoj kev ua txuj ua neeg ncaj ncees yuav muaj ntau zuj zus tuaj. Nej txoj kev ua txuj ua neeg ncaj ncees ntau npaum twg, nej haj yam yuav tawm tsam Vajtswv ntau npaum ntawd. Thaum kawg, cov neeg zoo li ntawd yeej yuav raug muab pov tseg!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Hauv Txoj Kev Ntseeg, Yus Yuav Tsum Tsom Ntsoov rau Qhov Tseeb—Qhov Koom Tes Nrog Txoj Kev Lig Kev Cai Ntseeg Mas Tsis Yog Txoj Kev Ntseeg). “Tam sim no, muaj ib txhia neeg uas ua hauj lwm thaum kaj ntug mus txog ntua thaum tsaus ntuj thiab tsis nco qab noj mov los sis tsis nco pw thaum lawv ua lawv tes dej num, lawv muaj peev xwm tswj lub cev nqaij daim tawv, ntxeev siab tawm tsam txoj kev txom nyem ntawm sab cev nqaij daim tawv, haj tseem mus ua hauj lwm thaum lawv muaj mob thiab. Txawm lawv muaj tej yam zoo no thiab yog cov neeg zoo thiab cov neeg ncaj ncees los, tseem muaj tej yam nyob hauv lawv lub siab uas lawv muab tso tseg tsis tau xws li: lub koob meej, qhov txiaj ntsim, lub meej mom, thiab txoj kev khav txiv. Yog lawv yeej tsis muab tej yam no tso tseg li, lawv puas yog cov neeg uas caum qhov tseeb? Yeej pom lo lus teb tseeb lawm. Qhov nyuaj tshaj plaws ntawm txoj kev ntseeg Vajtswv mas yog qhov ua kom tau ib qho hloov ntawm tus moj yam. Tej zaum koj yuav nyob tsis yuav txij nkawm mus tag koj sim neej, los sis yeej tsis noj cov zaub mov zoo los sis hnav khaub ncaws zoo li; ib txhia neeg haj tseem hais tias, ‘Yeej tsis ua li cas yog kuv txom nyem mus tag kuv sim neej, los sis yog kuv kho siab mus tag kuv sim neej, kuv yeej thev taus—muaj Vajtswv nyob ntawm kuv ib sab lawm, ces tej no yeej tsis muaj dab tsi li.’ Yooj yim kov yeej thiab daws tau hom kev mob siab thiab kev txom nyem ntawm sab cev nqaij daim tawv no. Yam uas tsis yooj yim kov yeej yog dab tsi? Yog tib neeg tus moj yam qias vuab tsuab. Tus moj yam qias vuab tsuab ntawd mas kho tsis tau los ntawm txoj kev uas lam tswj yus tus kheej xwb. Tib neeg yeej thev taus txoj kev txom nyem ntawm sab cev nqaij daim tawv kom thiaj li ua tau lawv tej dej num zoo, kom ua tau zoo raws li Vajtswv tej kev npaj siab, thiab kom nkag tau mus rau hauv lub nceeg vaj nyob rau yav tom ntej—tiam sis qhov muaj peev xwm tiv kev txom nyem thiab them tus nqi ntawd puas txhais tau tias lawv tus moj yam tau hloov lawm? Tsis txhais li ntawd. Yuav kom ntsuas tau seb puas muaj ib qho kev hloov nyob rau hauv ib tug neeg twg tus moj yam mas, yuav tsum txhob saib tias lawv thev taus kev txom nyem npaum li cas los sis seb lawv ua tus cwj pwm zoo npaum li cas nyob rau sab nraud xwb. Tib txoj kev uas yuav ntsuas tau kom yog seb ib tug neeg tus moj yam puas tau hloov ntawd ces yog saib rau tej hom phiaj, tej kev txhawb siab, thiab tej kev npaj siab uas txhawb lawv tej kev ua, tej hauv paus ntsiab lus uas lawv coj lawv tus kheej thiab daws teeb meem, thiab lawv tus cwj pwm uas coj rau qhov tseeb xwb” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tus Cwj Pwm Zoo Tsis Tau Txhais Hais Tias Yus Tus Moj Yam Twb Hloov Pauv Lawm). Kuv pom los ntawm Vajtswv cov lus los hais tias qhov muaj peev xwm raug kev txom nyem thiab tiv kev txom nyem ntawd mas tsis npaum li qhov Vajtswv pom zoo rau li. Nyob rau Tiam Hmoov Hlub, Povlauj muaj peev xwm tiv kev txom nyem nyob rau saum daim tawv heev. Nws tshaj tawm txoj moo zoo, thiab tsis ntxeev siab rau tus Tswv thaum nws raug kaw rau hauv tsev laj cuj. Nws tus cwj pwm ntxim txaus qhuas heev. Tiam sis tag nrho nws txoj kev raug kev txom nyem thiab kev siv nyiaj txiag puav leej yog los nrog Vajtswv sib khom xwb. Nws xav muab nws txoj kev raug kev txom nyem ntawd los pauv ib lub kaus mom vaj ntxwv thiab txoj koob hmoov ntawm Vajtswv lub nceeg vaj. Nws tej num zoo tsis tau txhais hais tias nws twb hloov pauv tau tus moj yam lawm. Tiam sis, vim tej num zoo uas nyob rau saum daim tawv no, nws thiaj li pheej khav teeb thiab ua tim khawv rau nws tus kheej, thiab nws khav theeb heev zuj zus. Nws haj tseem ua tim khawv hais tias qhov nws ua neej nyob ntawd yog nyob rau Khetos, yog li ntawd thaum kawg nws thiaj li raug Vajtswv teem txim thiab rau txim. Thaum tig xav txog kuv tus kheej, kuv pom hais tias kuv tsuas xav txog qhov coj kom zoo los zais kuv tus kheej thiab ua kom tib neeg hwm kuv xwb, tiam sis kuv tsis mob siab rau qhov xyaum ua raws li qhov tseeb los sis qhov daws kuv tus moj yam qias vuab tsuab li. Vim li ntawd, kuv thiaj li ua ntsej muag ncaj siab nkhaus tuaj lawm thiab tsis hloov pauv kuv tus moj yam ntawm lub neej txoj sia kiag li. Yog kuv caum li ntawd txuas ntxiv, ces kuv yeej yuav tsis tau txais ib qho tseeb kiag li. Kuv kawg raug muab tshem tawm zoo li Povlauj xwb. Thaum xav txog qhov no, kuv xav hloov pauv kuv txoj kev xav uas tsis yog mus rau txoj kev caum uas yog.
Tom qab ntawd, kuv nyeem zaj lus no ntawm Vajtswv cov lus: “Vajtswv muab lub cev ntawm sab cev nqaij daim tawv rau tib neeg, thiab txoj hauj lwm uas ib txwm muaj ntawm lub cev no ces yog qhov hais tias lub cev no tuaj yeem nyob zoo thaum tib neeg nyob rau hauv ib tug ciaj ciam; txawm li cas los xij, yog tib neeg hla dhau tus ciaj ciam no lawm los sis ua txhaum tej kev cai ntuj tsim lawm, ces yuav muaj teeb meem rau lawv lub cev thiab lawv yuav muaj mob. Tsis txhob ua txhaum tej kev cai uas Vajtswv tau teeb tseg rau tib neeg lawm. Yog koj ua txhaum, ces koj tsis hwm Vajtswv thiab koj yog neeg ruam thiab tsis paub dab tsi li. Yog koj ua txhaum tej kev cai no thiab ua dog ua dig, ces Vajtswv yuav tsis tiv thaiv koj, thiab Nws yuav tsis thaj tsob koj. Vajtswv ntxub tus cwj pwm zoo li no. … Thaum hais txog qhov ua koj tes dej num, qhov zoo tshaj plaws mas yog ua raws li lub sij hawm ua hauj lwm thiab so li ib txwm so. Yog qee zaus es koj tes dej num muaj ntau tuaj, koj yuav tsum tiv kev txom nyem ntawm sab cev nqaij daim tawv me ntsis es ua kom dhau mus. Tab sis qhov no yuav tsis kav ntev mus; lub sij hawm ntev dhau lawm ces yuav ua rau muaj qhov sab yooj yim thiab cuam tshuam qhov ua tau zoo ntawm qhov ua koj tes dej num ntawd. Thaum lub sij hawm zoo li no, yuav tsum tau so. Lub hom phiaj ntawm txoj kev so yog dab tsi? Nws yog los saib xyuas koj lub cev kom koj thiaj ua tau koj tes dej num zoo dua. Txawm li cas los xij, koj tsis yog sab ntawm sab cev nqaij daim tawv tab sis koj pheej nrhiav cib fim los ua kom dhau mus xwb, tsis quav ntsej koj tes dej num li txawm muaj dej num ntau tuaj los xij li, qhov no yog tsis muaj kev ua siab ncaj ncees. Ntxiv rau qhov ua siab ncaj ncees ntawd, ua tib zoo ua tes dej num uas Vajtswv tau muab tso rau koj lawm, koj kuj yuav tsum tsis txhob ua kom koj lub cev sab thiab. Koj yuav tsum nkag siab lub hauv paus ntsiab lus no. Txawm koj ua tes dej num twg los xij li, thaum koj sawv thaum yav sawv ntxov ntawd, koj yuav tsum muaj kev pe hawm ntawm sab ntsuj plig—qhov ntawd yog, nyeem Vajtswv tej lus, thov Vajtswv, los sis kawm ib zaj nkauj qhuas Vajtswv. Tom qab ntawd koj mam pib ua tau koj tes dej num los ntawm koj lub siab uas puv npo. Ua li ntawd thiaj li yuav yooj yim rau koj coj Vajtswv tej lus los rau hauv koj lub neej tiag tiag, thiab ua koj tes dej num raws li qhov tseeb tej hauv paus ntsiab lus. Tsuas yog qhov no xwb thiaj li yog paub txog Vajtswv tes hauj lwm tiag tiag. Tej no yog tej kev kho uas koj yuav tsum tau ua” (Vajtswv Kev Sib Qhia Los). Qhov nyeem Vajtswv cov lus mas qhia tau kom kuv paub qhov tseeb heev. Vajtswv kom peb ua neej raws li tej kev cai uas Nws twb tau npaj tseg ua ntej lawm, los ua neej thiab so kom yog, thiab los ua peb tes dej num raws li lub hauv paus no. Thaum peb tes hauj lwm cheem tsum kom raug qee yam kev txom nyem thiab kom peb tiv kev txom nyem, peb yuav tsum tso txoj kev ntshaw ntawm lub cev tseg, ua kom zoo tshaj plaws kom tes hauj lwm ntawd tiav. Thaum peb tes hauj lwm tsis cheem tsum kom peb nyob lig, ces peb yuav tsum ua hauj lwm thiab pw kom raws sij hawm thiaj li muaj ib tug yam ntxwv zoo. Ua li no, peb thiaj li ua tau peb tes dej num zoo. Kuv xav txog qhov no los ntawm phau Vajluskub: “Koj yuav tsum hlub tus Tswv uas yog koj tus Vajtswv kom kawg koj lub siab, thiab kom kawg koj txoj sia, thiab kom kawg koj lub tswv yim. Nov yog thawj nqe thiab nqe kev cai uas tseem ceeb” (Mathai 22:37–38). Vajtswv cia siab hais tias peb yuav ua tau raws li Nws lub siab nyiam nyob rau hauv peb tes dej num, muaj ib lub nra tiag tiag, thiab ua peb tes dej num yam tag siab nrho. Ua li no Vajtswv thiaj li pom zoo. Thaum xav txog txoj kev uas Vajtswv tau taw qhia rau peb lawm, kuv pom hais tias kuv ruam npaum li cas. Vajtswv cov lus hais tau meej heev, tiam sis kuv yeej tsis muab cov lus ntawd coj los xyaum ua raws li. Kuv ib txwm ua raws li kuv tej kev xav phem thiab tej kev xav hauv nruab siab xwb, thiab tiv kev txom nyem uas tsis muaj qab hau kiag li. Kuv ras dheev hais tias kuv pheej mob siab rau txoj kev ua tej num zoo nyob rau saum daim tawv tsis tau lawm, thiab tias kuv yuav tsum lees txais Vajtswv txoj kev tshawb xyuas kom meej, ua txhua yam nyob rau ntawm Vajtswv lub xub ntiag yam tsis xav txog qhov tib neeg yuav xav li cas li, thiab rau siab ntso ua kuv tes dej num xwb. Qhov no yog qhov kuv yuav tsum tau ua.
Tom qab ntawd, nyob rau hauv tej kev sib txoos ua ke kuv nthuav tawm txog qhov kuv tau mus yuam kev thiab kuv txoj kev xav yuam kev li cas kom cov nus thiab cov viv ncaus thiaj li paub. Kuv rov qab mob siab rau txoj kev xyaum ua raws li Vajtswv cov lus, thiab muab siab rau qhov kuv tuaj yeem ris ib lub nra nyob rau hauv kuv tes hauj lwm li cas thiab qhov kuv tuaj yeem ua kuv tes dej num raws li tej hauv paus ntsiab lus li cas, thiab kuv tsis mob siab rau txoj kev raug kev txom nyem nyob rau saum daim tawv kom lwm tus qhuas tas li ntxiv lawm. Sij hawm dhau mus, kuv tsis txhawj txog qhov lwm tus yuav pom kuv zoo li cas, thiab kuv tsis xav txog qhov lam ua txuj rau lwm tus pom lawm. Kuv kaj siab lawm ntau heev lawm. Los ntawm qhov kev ntsib kev pom no kuv tau kawm paub hais tias tsuas yog Vajtswv cov lus xwb thiaj li yog txoj kev thiab yog tus qauv rau txoj kev coj thiab kev ua, thiab tias qhov xyaum ua raws li Vajtswv cov lus ntawd yog ib txoj kev los siav thiab kaj siab heev. Tsis tas yuav pheej ua txuj li lawm. Qhov ua neej zoo li no tsis sab los sis tsis mob lawm. Ua Vajtswv tsaug!
