92. Tej Kev Xaiv Uas Nyuaj Siab
Nyob rau xyoo 1999, kuv lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm, thiab tsis ntev ntawd kuv raug xaiv los ua tus thawj coj pawg ntseeg lawm. Nyob rau lub Kaum Ob Hlis xyoo 2000, muaj ib hnub thaum tav su, kuv tab tom noj mov nrog kuv ob tug me nyuam ces txawm muaj tsib tug tub ceev xwm tsoo nkag los rau hauv tsev thiab pib dua tej khoom ub khoom no ntxhov quas niab, tshawb qhov txhia chaw yam tsis qhia tias muaj ntaub ntawv tso cai tshawb li. Nyob rau sij hawm ntawd mas, kuv tus tub tsuas muaj rau xyoo xwb, thiab ob tug me nyuam ntawd tuav rawv kuv lub tsho ntshai rwg, nkawv ob txhais tes tshee hnyo. Nyob rau thaum kawg, lawv tshawb pom ib phau Vajluskub thiab ib phau ntawv hais txog kev pe hawm uas kuv sau. Lawv muab kuv rub thiab thawb ntiag, tas zog muab kuv coj mus rau hauv tub ceev xwm lub tsheb. Ob tug me nyuam quaj thiab qw tias, “Niam! Txhob mus!” Thaum sij hawm ntawd, kua muag cia li pib ntws sislos rau ntawm kuv ntsej muag, vim kuv tsis paub tias xyov kuv puas muaj peev xwm rov qab los pom nkawv dua lawm. Kuv mas tu siab tshaj li. Tom qab ntawd, lawv coj kuv nkag mus rau hauv ib chav nug xyuas ntawm Tsoom Fwv Lub Tsev Saib Xyuas Kev Ruaj Ntseg uas lawv muab kuv xauv tes rau ntawm ib lub rooj hlau. Muaj coob tus tib neeg txawm pib ntsia kuv yam tsiv nyaum heev. Tom qab ntawd mas kuv ntshai heev, ces kuv thiaj li thov Vajtswv tsis tseg, thov kom Nws muab txoj kev ntseeg rau kuv. Kuv txawm xav txog Vajtswv cov lus tias: “Tam sim no yog lub sij hawm uas Kuv yuav los sim koj lawm: Koj puas kam muab koj lub siab npuab rau Kuv? Koj puas kam caum raws Kuv qab yam muab siab npuab mus kom txog txoj kev kawg? Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Vajtswv cov lus ua rau kuv muaj kev ntseeg, thiab xav txog qhov Vajtswv txhawb nqa kuv li cas, ces kuv thiaj li tsis ntshai heev lawm. Txawm tub ceev xwm yuav tsiv phem npaum li cas los xij, lawv yeej nyob hauv Vajtswv ob txhais tes. Kuv tsa tes cog lus tias txawm lawv tsim txom kuv li cas los xij, kuv yuav tsis ua ib tug Yudas thiab yuav tsis ntxeev siab rau Vajtswv li. Kuv cog lus rau kuv txoj sia tias yuav ua tim khawv rau Vajtswv!
Muaj ib tug ntawm cov tub ceev xwm ntawd txawm pib nug tias: “Leej twg ua rau koj hloov los ntseeg Vajtswv Tus Uas Muaj Hwj Chim Loj Kawg Nkaus? Leej twg yog koj tus thawj coj? Pawg ntseeg cov nyiaj muab khaws cia rau qhov twg?” Kuv hais tias, “Kuv tsis paub ib yam dab tsi li.” Ces tus thawj coj ntawm Feem Saib Xyuas Kev Ruaj Ntseg Hauv Lub Teb Chaws txawm hais tias, “Hnub no peb nrhiav pom koj lub tsev vim peb twb muaj pov thawj txog koj txoj kev ntseeg lawm. Peb ua tau kom koj raug txim txawm tias koj tsis hais ib lo lus li los xij. Tab sis yog koj qhia peb txog yam uas koj paub, ces peb yuav tso koj mus tsev kiag tam sim no.” Kuv tsis hais ib lo lus li. Ces nws txawm hais tias, “Koj ob tug me nyuam tseem yau heev—yog nkawv tsis muaj niam los saib xyuas nkawv ntshe yuav phem heev li. Yog nkawv cov xib fwb thiab cov phooj ywg kawm ntawv ua ke paub tias nkawv niam nyob hauv tsev kaw neeg lawm, ces ntshe nkawv yuav raug thuam thiab saib tsis taus. Qhov ntawd tsis phom sij heev rau nkawv lub siab lub ntsws lod? Koj tus kheej puas ua tau siab tawv rau qhov ntawd mas? Koj yuav tsis tso koj ob tug me nyuam tseg vim koj txoj kev ntseeg, puas yog mas?” Thaum hnov nws hais li ntawd txawm ua rau xav txog qhov ob tug me nyuam ntshai thaum kuv raug ntes, thiab muaj ib lub sij hawm mas kuv nyuaj siab heev. Txhua yam uas tau tshwm sim hnub no yuav ua rau ob tug me nyuam nyuaj siab thiab raug ob tug me nyuam loj heev! Yog kuv raug kaw lawm, leej twg yuav saib xyuas nkawv? Tshwj xeeb yog kuv tus tub, tus uas ib txwm nyiam muaj mob tas li, yog tsis muaj kuv saib xyuas nws lawm nws yuav nyob li cas? Yog nkawv raug ntxub ntxaug thiab raug thuam luag los ntawm cov xib fwb thiab cov phooj ywg kawm ntawv ua ke, nkawv puas muaj peev xwm tswj tau qhov ntawd? Thaum xav txog tej no mas ua rau kuv kua muag ntws tsis paub tu ces kuv txawm maj nroos los thov Vajtswv tias: “Vajtswv! Kuv txhawj txog kuv ob tug me nyuam thiab kuv hnov zoo li yog ib qho kev puas tsuaj. Thov tiv thaiv kuv lub siab kom kuv thiaj li ua tau siab tus, vam khom tau rau Koj, thiab ua tau tim khawv.” Tom qab kuv thov Vajtswv tag lawm, kuv xav txog Vajtswv cov lus no: “Txawm tias qhov tseeb tiag koj yeej nyob ntawm Kuv xub ntiag no, ua tej yam rau Kuv, qhov tseeb tiag koj tseem tab tom xav txog koj tus poj niam, cov me nyuam, thiab cov niam cov txiv nyob rau tom tsev. Tag nrho tej no puas yog koj tej khoom ntiag tug? Vim li cas koj tsis muab lawv tso rau hauv Kuv ob txhais tes? Koj tseem tsis muaj kev ntseeg txaus rau Kuv los? Los sis qhov ntawd puas yog koj ntshai ib tsam Kuv yuav npaj ua tej yam tsis tsim nyog rau koj? Vim li cas koj thiaj txhawj tas li txog koj tsev neeg ntawm koj cev nqaij daim tawv? Koj ib txwm ua rau cov neeg koj hlub! Kuv puas muaj ib thaj chaw nyob rau hauv koj lub siab?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 59). Vajtswv cov lus ua rau kuv lub siab kaj nrig tuaj kiag tam sid. Vajtswv yog tus Tswv Tsim, thiab Nws tswj fwm thiab tswj kav tag nrho txhua tus txoj hmoo. Muaj dab tsi tshwm sim rau kuv ob tug me nyuam rau yav pem suab los yeej nyob hauv Vajtswv ob txhais tes lawm, thiab kuv txoj kev txhawj yeej tsis muaj qab hau dab tsi li. Kuv yuav tsum tau muaj kev ntseeg Vajtswv, thiab muab nkawv tso rau Nws ob txhais tes. Thaum xav li no lawm, kuv siab thiaj li tus lawm, thiab tsis txhawj txog nkawv heev lawm. Kuv paub tias tub ceev xwm tab tom siv ob tug me nyuam ntawd los hem kuv kom ntxeev siab rau pawg ntseeg ntag. Lawv yog cov uas muab kuv ntes yam tsis raug cai, tau rhuav tshem kuv tsev neeg lub neej uas ib txwm muaj, thiab tam sis no lawv txawm hais tias nws yog kuv txoj kev ntseeg uas tau tiv thaiv kuv kom txhob tau los saib xyuas kuv ob tug me nyuam. Qhov no tsis yog muab qhov muaj tseeb ntxeev, thiab muab sab dub tig los rau sab dawb lod? Thaum qhov ntawd tshwm sim rau kuv, kuv txawm cem rov qab rau lawv tias, “Puas yog vim kuv txoj kev ntseeg, los sis yog vim nej cov niag neeg tau muab kuv kaw rau ntawm no? Cov ntseeg Vajtswv yeej nyeem Vajtswv txoj lus thiab nrhiav ua neeg zoo, lawv tsis tau ua ib yam dab tsi txhaum cai li. Vim li cas nej thiaj li ntes cov ntseeg tas li mas?” Lawv luag zom zaws nrov nrootws thaum kuv hais li ntawd, thiab muaj ib tug tub ceev xwm txawm hais tias, “Koj mas ruaj tshaj li. Yog txhua tus ntseeg Vajtswv lawm, leej twg thiaj li yuav mloog Pawg Tsoom Fwv Koom Tsham Suav? Ces Pawg Koom Tsham yuav coj leej twg? Yog li peb thiaj li tsis cia koj ntseeg, thiab yog koj ntseeg, ces koj yuav raug ntes!” Kuv mas npau taws tshaj, thiab qhov ntawd qhia rau kuv txog qee yam uas Vajtswv hais tias: “Nyob rau ib lub meem xeeb coj tsaus ntuj nti li lub no, uas cov dab mas siab phem thiab lim hiam heev, yuav ua cas es tus vaj ntxwv ntawm cov dab, tus uas tua neeg yam tsis ntsais muag li, yuav zam tau cia kom muaj ib tug Vajtswv uas txaus hlub, siab zoo, thiab dawb huv ntawd nyob? Nws yuav ua cas npuaj teg thiab qw txais tos qhov kev los txog ntawm Vajtswv? Cov niag qhev no! Lawv pauj kev zoo siab nrog kev ntxub, lawv twb pib saib Vajtswv li yog ib tug yeeb ncuab los ntev lawm, lawv tsim txom Vajtswv, lawv yog cov niag mab qus phem tshaj plaws li, lawv yeej tsis muaj ib qho kev saib taus Vajtswv me me hlo li, lawv huab noj huab haus thiab ua tub sab tub nyiag, lawv plam tag nrho tej kev txawj xav, lawv tawm tsam tag nrho txhua yam kev txawj xav, thiab lawv ntxias cov neeg dawb huv mus rau txoj kev ruam. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Los ntawm Vajtswv cov lus, kuv thiaj li pom mus rau puag hauv Pawg Tsoom Fwv Koom Tsham lub ntsiab tseeb. Lawv muaj tus yeeb yam tsis zoo thiab txawv ntawm Ntuj Ceeb Tsheej lawm. Vajtswv yog tus uas tsim txhua yam, tsim haiv neeg no, thiab Vajtswv yog tus uas saib xyuas thiab yug txhua tus tib neeg ntiaj teb. Kev pe hawm Vajtswv yog Ntuj Ceeb Tsheej tsa thiab raug lees paub los ntawm lub ntiaj teb lawm, tab sis Pawg Khoom Tsham tsis cia tib neeg ntseeg thiab raws Vajtswv qab, lawv txhawb txoj kev tsis ntseeg tias muaj Vajtswv thiab kev ntseeg tsiaj los dag tib neeg. Lawv haj tseem hais yam tsis paub txaj muag li hais tias “yeej tsis muaj Vajtswv nyob rau hauv lub ntiaj teb no hlo li” thiab tias “tib neeg txoj kev zoo siab los ntawm Pawg Koom Tsham los tag nrho.” Lawv xav kom tib neeg ua tsaug ntau rau lawv tshaj, kom mloog lawv hais thiab mloog lawv lus. Tsoom Fwv Koom Tsham Suav mas phem thiab ntxim ntxub tshaj plaws! Nyob rau hauv tiam kawg, Vajtswv tus kheej los rau hauv lub ntiaj teb los cawm tib neeg, los nthuav tawm ntau plhom lo lus. Qhov uas Tsoom Fwv Koom Tsham Suav ntshai tshaj plaws mas yog qhov tias tib neeg yuav nyeem Vajtswv txoj lus thiab to taub qhov tseeb, thiab tias lawv yuav paub Pawg Khoom Tsham thiab, tsis nyob hauv nws qab kev tswj fwm mus ntxiv lawm, yuav tig los cuag Vajtswv. Vim li ntawd Tsoom Fwv Koom Tsham Suav thiaj li ua txhua yam raws li qhov lawv ua tau los ntes cov neeg Khixatia, vam tias yuav cheem kom tau Vajtswv tes hauj lwm thiab tswj kom tau lawv lub hom phiaj tswj tib neeg mus ib txhis. Thaum kuv tus kheej raug lawv txoj kev tsim txom lawm, kuv pom lawv lub ntsiab tseeb uas phem ntawm txoj kev ntxub qhov tseeb thiab yog Vajtswv tus yeeb ncuab, thiab ntxub pawg dab phem uas tawm tsam Vajtswv ntawd tawm puag hauv kuv nruab tuaj. Kuv txiav txim siab los raws Vajtswv thiab ua tim khawv rau Vajtswv khov kho lawm txawm tias kuv yuav raug kev txom nyem ntau npaum li cas los xij.
Tom qab ntawd, kuv tus txiv tuaj them nyiaj tso kuv tawm. Hnub uas tso kuv tawm ntawd, ib tug tub ceev xwm hais tias, “Raws li koj tus cwj pwm tam sim no mas koj yeej yuav rov mus ntseeg ntxiv xwb xwb li. Peb yuav saib ntsoov koj, thiab peb yuav rov coj koj tuaj rau ntawm no rau thaum peb pom koj mus sib txoos ua ke los sis qhia txoj moo zoo!” Yog li ntawd yuav kom kuv ntseeg tau mus ntxiv thiab ua tau kuv tes dej num li qhov ib txwm ua, ces kuv yuav tsum tau tshais chaw ntau lwm. Kuv tus txiv yog tus lwm thawj tswj hauv nroog rau thaum lub sij hawm ntawd ces nws thiaj li plam lub hwv tsam nce qib lawm txij thaum kuv raug ntes los vim kuv txoj kev ntseeg. Tom qab ntawd nyob rau lub Plaub Hlis xyoo 2007, muaj ib hmo nws los tsev thiab hais tias, “Muaj ib txhia tub rog yuav raug nce qib nyob rau hauv nroog sai sai no. Vim koj txoj kev ntseeg, es kuv thiaj li tsis dhau qhov kev tshuaj xyuas ob peb zaug dhau los rau thaum kuv muaj lub hwv tsam. Kuv tau qhia rau kuv tus thawj coj lawm tias kuv xav muaj feem mus koom ua hauj lwm tim tshav puam rau zaum no, ces nws txawm hais tias nws mam qhia kuv rau tsuav yog koj tso koj txoj kev ntseeg tseg lawm.” Nws kuj qhia kuv tias, “Koj tsuas tim tsum tso txoj kev ntseeg tseg kom wb muaj ib lub neej zoo, thiab wb tuaj yeem muab ib lub tsev ruaj khov rau wb ob tug me nyuam. Yog koj nias qees rau koj txoj kev ntseeg mus ntxiv, ces yuav tsum tau sib nrauj. Kuv tsis xav kom raug cab los rau qhov no mus ntxiv lawm. Ua tib zoo xav!” Thaum hnov nws hais tag nrho li no lawm mas ua rau kuv mob siab heev. Yog wb sib nrauj, ces yuav ua rau wb cov me nyuam mob siab tshaj plaws li! Nws yeej ib txwm zoo rau kuv tas li, thiab wb ob tug me nyuam yeej mloog lus. Nws muaj ib txoj hauj lwm, kuv muaj lag luam, thiab wb muaj ib lub neej zoo siab heev. Tsoom fwv Suav txoj kev tsim txom ua rau wb tsev neeg tawg tag li. Thaum xav txog qhov no mas, kuv hnov mob, npaum nkaus li kuv lub siab dua rhe lawm. Ces kuv thiaj li thov Vajtswv tias: “Vajtswv, kuv tso tsis tau Koj tseg, tab sis kuv tso tsis tau kuv tus txiv thiab kuv ob tug me nyuam tseg thiab. Kuv tsis paub tias xyov yuav ua li cas li lawm. Thov qhia kuv, kom kuv thiaj li tuaj yeem to taub Koj txoj kev xav:” Ces, kuv txawm xav txog Vajtswv txoj lus tias: “Nws yeej tsis muaj kev sib txheeb ntawm ib tug txiv uas ntseeg thiab ib tug poj niam uas tsis ntseeg, thiab nws yeej tsis muaj kev sib txheeb ntawm cov me nyuam uas ntseeg thiab cov niam txiv uas tsis ntseeg; ob hom neeg no mas yeej dhos tsis sib haum li. Ua ntej yuav nkag mus so, yus tseem muaj tej txheeb ze raws cev nqaij daim tawv, tab sis thaum nkag mus so lawm, ces yus tsis muaj tej txheeb ze raws cev nqaij daim tawv li hais txog lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke). Kuv ua tib zoo xav txog Vajtswv cov lus thiab to taub tias cov neeg muaj kev ntseeg thiab cov neeg tsis muaj kev ntseeg mas yog ob hom neeg uas muaj lub ntsiab tseeb sib txawv. Lawv tej kev xam pom rau lub neej thiab yam muaj nqis mas sib txawv. Kuv nyob rau lub neej ntawm txoj kev ntseeg uas yog lawm, ntawd yog kev caum raws qhov tseeb. Kuv tus txiv nyob rau txoj kev ua hauj lwm rau nom tswv, uas yog ib txoj kev nce qib mus rau theem siab thiab khwv nyiaj. Yuav kom ua hauj lwm nce tau qib, nws thiaj li tsis quav ntsej txog qhov wb sib yuav los tau pes tsawg xyoo lawm thiab wb ob tug me nyuam tej kev xav li, tiam sis xaiv qhov sib nrauj. Qhov ntawd vim hais tias nyob hauv nws lub siab mas, nws lub meej mom thiab yav pem suab mas tseem ceeb rau nws dua kuv thiab ob tug me nyuam lawm. Txawm nws hais tias nws xav ua kom ob tug me nyuam ntawd muaj tsev nyob ruaj khov thiab muaj ib lub neej zoo los xij, qhov ntawd puav leej yog ib qho kev xav uas yuam kev xwb. Yav dhau los mas nws coj zoo rau kuv, vim kuv tsis muaj ib qho kev cuam tshuam txog nws tus kheej tej kev ntshaw li. Tam sim no kuv txoj kev ntseeg thiab qhov kev ntes kuv tau cuam tshuam nws txoj kev ua hauj lwm rau nom tswv thiab kev khwv nyiaj kom tau ntau lawm, yog li nws thiaj li xav sib nrauj. Thaum kuv xav txog qhov ntawd mas ntxim tu siab kawg li. Kuv pom tias tsis muaj txoj kev hlub tiag los ntawm tib neeg li, tsuas txawj dag thiab ntaim noj ntaim haus xwb. Kuv tus txiv paub zoo heev tias Pawg Koom Tsham yog ib pawg neeg phem, tab sis kuv tus txiv pheej tuaj nws tog, hais kom kuv tso kuv txoj kev ntseeg tseg, haj tseem nias qees yuav nrauj kuv thiab. Wb muaj kev xam pom sib txawv thiab taug txoj kev sib txawv, thiab wb yuav tsis muaj kev zoo siab li txawm yog wb nyob ua ke los xij. Thaum kuv paub li no lawm, ces kuv thiaj li paub qhov uas kuv yuav tsum tau ua.
Tag kis sawv ntxov rau hnub tom qab ntawd wb thiaj li mus rau tim Lub Tsev Ua Hauj Lwm Saib Xyuas Pej Xeem mus ua wb tej ntaub ntawv sib nrauj, thiab thaum mus txog tog kev nws hais tias, “Koj paub, kuv tsis xav nrauj tab sis tsis muaj lwm txoj kev xaiv lawm. Saib xyuas koj tus kheej kom zoo nawb.” Thaum hnov nws hais li no ua rau kuv kua muag poob nthav. Kuv xav txog tag nrho txoj kev nyuaj thiab kev thuam los ntawm lwm tus uas kuv yuav raug tom qab sib nrauj lawm, mas kuv mob siab tshaj li. Kuv maj nroos los thov Vajtswv, thov kom Nws tiv thaiv kuv lub siab. Kuv xav txog Vajtswv cov lus tias: “Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. Koj yuav tsum tsis txhob muab qhov tseeb cuam pov tseg es tsuav kom tau lub neej thaj yeeb lug nrog tsev neeg xwb, thiab koj yuav tsum tsis txhob poob koj lub meej mom kom mus tag ib sim neej thiab txoj kev ncaj ncees rau tej qho kev zoo siab ib nyuag pliag xwb. Koj yuav tsum nrhiav tag nrho tej uas zoo nkauj thiab zoo, thiab koj yuav tsum nrhiav ib txoj kev hauv lub neej uas muaj qab hau dua. Yog koj ua lub neej qias vuab tsuab, thiab tsis nrhiav ib qho hom phiaj li, tsis yog koj nkim koj lub neej los? Koj yuav tau dab tsi los ntawm ib lub neej zoo li ntawd? Koj yuav tsum muab tag nrho tej kev kaj siab ntawm cev nqaij daim tawv tso pov tseg es kom tau ib qho tseeb, thiab yuav tsum tsis txhob muab tag nrho qhov tseeb cuam pov tseg es kom tau ib qho kev kaj siab me me nkaus xwb. Cov neeg zoo li no ces yeej tsis muaj kev ncaj ncees thiab lub meej mom li; qhov uas muaj lawv nyob ntawd ces tsis muaj nuj nqis dab tsi li!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Kuv pom los ntawm Vajtswv cov lus los tias txawm ib tug tib neeg twg yuav ua lub neej nyob rau hauv cev nqaij daim tawv zoo npaum li cas los xij, txawm muaj lwm tus khib thiab qhuas lawv pes tsawg leej los xij, yeej tsis muaj txiaj ntsim dab tsi li. Tsuas yog caum raws qhov tseeb thiab ua tes dej num ntawm ib tug uas raug tsim tawm los xwb mas thiaj li tau txais Vajtswv txoj kev pom zoo. Tsuas yog qhov no xwb mas thiaj li yog ib lub neej muaj kev ncaj ncees thiab muaj meej mom, thiab yog lub neej muaj txiaj ntsim thiab muaj nqis tshaj plaws. Thaum xav txog qhov no mas kaj siab lawm ntau heev, ces kuv thiaj li lis tej ntaub ntawv sib nrauj ntawd yam tsis ua xyem xyav li lawm.
Nyob rau lub Tsib Hlis xyoo 2011 thaum tseem nyob hauv ib lub rooj sib txoos ua ke, kuv rov qab raug ntes dua. Lawv yog tib pab tub ceev xwm qub hauv kaum lub xyoo dhau los lawm. Lawv pom kuv daim Yuaj thiab hu kuv lub npe tawm, hais tias, “Kaum xyoo dhau los no peb tuaj tim koj tsev ntau zaus heev lawm los yeej tsis pom koj li ces tam sim no peb ua tau zoo heev lawm. Zaum no peb yuav tsis cia koj dim lawm!” Thaum lawv hais lus ntawd, lawv xauv kuv tes thiab muab kuv tso rau hauv tub ceev xwm lub tsheb. Thaum nyob hauv tsheb mas kuv xav txog peb cov viv ncaus uas raug ntes yav dhau los lawm thiab raug tub ceev xwm tsim txom phem heev tau ib lub hlis nkaus. Muaj ib tug ntawm lawv cov ntawd sab npab lauj piam mus tag ib sim li lawm vim hais tias nws raug ncua ntev heev lawm. Thaum xav txog qhov ntawd mas ua rau kuv lub siab dhia pig poog. Kuv ntshai tsam kuv raug ntaus mus txog qhov tsis taus los sis tuag. Ces kuv thiaj li maj nroos thov Vajtswv nyob rau hauv kuv lub siab tias: “Vajtswv! Thov tiv thaiv kuv thiab coj kuv kev kom mus dhau qhov xwm txheej no. Txawm yog kuv raug ntaus tuag los xij kuv yeej yuav tsis ua ib tug Yudas li.” Kuv xav txog Vajtswv cov lus tom qab kuv thov Vajtswv tag lawm tias: “Koj paub tias txhua yam ntawm tej huab cua ib puag ncig uas nyob ib puag ncig koj muaj nyob ntawd los ntawm Kuv qhov kev pom zoo xwb, txhua yam raug npaj ntseg los ntawm Kuv. Pom meej thiab txaus Kuv lub siab nyob rau hauv tej huab cua ib puag ncig uas Kuv tau muab rau koj lawm. Tsis txhob ntshai, Vajtswv Tus Uas Muaj Hwj Chim Loj Kawg Nkaus yuav nyob nrog nraim koj xwb xwb li; Nws sawv tom qab ntawm nej thiab Nws yog nej daim hlau tiv thaiv” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 26). Qhov ntawd muaj tseeb. Kuv txoj sia thiab txoj kev tuag mas nyob rau hauv Vajtswv ob txhais tes tag nrho lawm, thiab lawv yeej muab tsis tau kuv txoj sia ntawm kuv mus yog tias Vajtswv tsis tso cai. Kuv xav txog qhov Yauj mus dhau nws tej kev sim siab. Vajtswv yuav tsis cia Ntxwgnyoog rhuav tshem Yauj txoj sia thiab Ntxwgnyoog tawm tsam tsis tau qhov Vajtswv hais. Qhov no ua rau kuv muaj kev kaj siab thiab ua rau kuv muaj kev ntseeg mus ntsib yam uas nyob rau yav tom ntej.
Tom qab ntawd, tus thawj coj ntawm Lub Chaw Saib Xyuas Kev Ruaj Ntseg Hauv Lub Teb Chaws tau nug kuv. Nws hais tias, “Qhov no yog ib qho loj, yog ib kis tseem ceeb tshaj rau peb lub nroog tam sim no. Koj raug ntes kaum lub xyoo dhau los lawm, thiab nyob rau xyoo 2009 ntawd muaj ib tug hais tawm tias koj tau tshaj tawm txoj moo zoo. Yeej npaj ntes koj ntau zaus lawm los ntes tsis tau xwb. Zaum no, peb ntes koj rau ntawm lub chaw tuaj sib txoos ua ke, yog li txawm koj tsis hais ib lo lus dab tsi li los xij, peb tseem yuav rau txim rau koj ntev txog xya mus txog kaum xyoo. Thaum koj raug kaw lawm, ces tsev kawm ntawv qib siab yuav tsis lees txais koj ob tug me nyuam lawm ces nkawv yeej yuav ua hauj lwm rau tsoom fwv tsis tau li. Thiab txhua tus yuav ntxub ntxaug nkawv vim hais tias nkawv muaj ib leej niam uas zoo li koj. Koj yuav raug liam vim rhuav tshem nkawv lub neej yav tom ntej. Nkawv yuav ntxub koj mus tag nkawv lub neej! Txawm tias koj tsis xav txog koj tus kheej los xij, xav txog koj ob tug me nyuam lub neej yav tom ntej. Yog koj koom tes nrog peb, qhia seb leej twg yog tus thawj coj siab dua koj, thiab muab pawg ntseeg cov nyiaj rau peb, ces peb mam li tso koj mus.” Thaum hnov nws hais li ntawd lawm ua rau kuv qias tshaj plaws li. Nws yog Pawg Koom Tsham uas tsis tso kev tsim xom cov neeg Khixatia tseg li—lawv haj tseem siv kuv ob tug me nyuam lub neej yav tom ntej los hem kuv thiab, thiab yuam kom kuv hloov siab rau pawg ntseeg thiab ntxeev siab rau Vajtswv, ces hais tias qhov ntawd yog kuv txoj kev ntseeg rhuav tshem nkawv tej kev cia siab rau yav tom ntej.
Hnub ntawd mas lawv nug kuv tas li mus txog ntua 2 teev sawv ntxov. Thaum lawv pom tias kuv tsis hais lus li, ces thiaj li xa kuv mus rau tim tsev kaw neeg. Ib tug tub ceev xwm hais tias, “Zaum no koj yuav raug phua lub txim thiab tau nyob txim xwb lau!” Chav kaw neeg ntawd mas tsaus ntuj nti thiab noo zaw xwb. Kuv tus mob pob qij txha rau tes taws thiab kab mob plawv pheej mob zuj zus tuaj, thiab mob rau ntawm txhua txhua lub pob qij txha. Txhua hmo kuv raug zov ntev li ob teev, thiab tom qab sawv ntsug ib pliag kuv lub plawv dhia tshee hnyo thiab ceev ceev kuv hauv siab. Txaus ntshai kawg. Kuv xav txog qhov tus tub ceev xwm hais tias kuv yuav tau nyob txim ntev txog xya mus txog kaum xyoo, ces kuv txawm pib xam tias xya xyoo muaj pes tsawg hnub, thiab kaum xyoo muaj pes tsawg hnub. Qhov ntawd ntshe yuav muaj ntau txhiab hnub thiab hmo. Kuv yuav thev taus li cas? Kuv puas yuav tawm ntawm no mus nyob sab nrauv tau? Thaum xav li no, ces kuv teev tsis taus kuv lub kua muag ntws los thiab kuv hnov tsau ntuj nti rau hauv kuv lub siab lawm. Kuv paub tias kuv nyob rau tus yam ntxwv uas tsis yog lawm, yog li kuv thiaj li thov Vajtswv ceev nrooj, thov kom Vajtswv tiv thaiv kuv lub siab thiab muab txoj kev ntseeg rau kuv kom thev taus tej xwm txheej no. Ces kuv txawm nco tau Vajtswv cov lus: “Nyob rau hauv lub ntiaj teb uas loj dav heev no, leej twg tus kheej kiag ho raug Kuv muab ntsuam xyuas lawm? Leej twg tus kheej kiag tau hnov tej lus ntawm Kuv tus Ntsujplig lawm? Muaj neeg coob heev uas tsuab thiab nrhiav nyob rau hauv txoj kev tsaus ntuj; muaj coob heev thov nyob rau lub sij hawm muaj kev txom nyem; muaj coob heev, tshaib nqhis thiab no, saib yam cia siab lug; thiab muaj coob heev uas raug Ntxwgnyoog cuab khi; tab sis muaj coob heev uas tsis paub yuav tig rau sab twg, muaj coob heev uas ntxeev siab rau Kuv nyob rau thaum lawv muaj kev zoo siab, muaj coob heev uas tsis nco txiaj nco ntsig, thiab muaj coob heev uas ua lub siab ncaj rau Ntxwgnyoog tej tswv yim ntxias dag. Leej twg ntawm nej uas yog Yauj? Leej twg yog Petus? Vim li cas Kuv pheej ho hais txog Yauj tas li? Vim li cas Kuv pheej hais txog Petus ntau zaus ua luaj li? Nej puas tau ua kom paub tseeb hais tias Kuv tej kev cia siab rau nej yog dab tsi? Nej yuav tsum siv sij hawm ntau zog los ua twb zoo xav txog tej yam no” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 8). Tom qab ua tib zoo xav txog Vajtswv cov lus lawm, kuv thiaj li to taub tias Vajtswv pom zoo rau Yauj thiab Petus lawm vim hais tias nkawv ntseeg thiab zwm rau tiag tiag. Yauj tiv dhau tej kev sim siab, poob nws tej nyiaj txiag thiab nws cov me nyuam, thiab sawv hlwv thoob plaws nws ib ce, tiam sis nws tseem muaj peev xwm qhuas Vajtswv lub npe, thiab hais tias “Yehauvas pub, thiab Yehauvas tau muab coj mus lawm; thov qhuas Yehauvas lub npe” (Yauj 1:21), uas ua rau Ntxwgnyoog txaj muag. Thiab Petus raug ntsia rau saum tus ntoo khaub lig rov quav rau Vajtswv, mloog lus mus txog ntua thaum tag sim neej, ua tim khawv nrov ntxhe ntws. Ho ntawm kuv ces, kuv tau xyiv fab hlo rau txoj kev saib xyuas thiab txoj kev txhawb los ntawm Vajtswv cov lus ntau heev, tab sis kiag thaum kuv ntsib ib qho kev txom nyem me me xwb ces kuv cia li khiav tiaj lias lawm. Kuv txoj kev ntseeg nyob qhov twg? Kuv txoj kev mloog lus nyob qhov twg? Kuv nyob deb ntawm qhov Vajtswv cheem tsum. Kuv tuav rawv kuv txoj sia ntau heev, ces kuv yuav hais lus tim khawv rau Vajtswv tau li cas? Los txog qhov no kuv hnov tu siab thiab hnov txhaum ntau heev ces thiaj li thov Vajtswv tias: “Vajtswv! Kuv npaj txhij muab kuv tus kheej tso rau hauv Koj ob txhais tes lawm. Txawm kuv yuav nyob txim pes tsawg xyoo los sis kuv yuav ntsib kev txom nyem ntau npaum li cas los xij, kuv xav ua tim khawv rau Koj thiab ua kom Ntxwgnyoog txaj muag.” Ua rau kuv ceeb tag li, tom qab kuv muab txhua yam fij tag thiab npaj txhij los ua tim khawv lawm, ces kuv thiaj li dim pa ntshuas lawm. Tom qab ntawd kuv paub tias kuv tus txiv nram ntej, ntshai tsam qhov kuv nyob txim yuav cuam tshuam rau wb ob tug me nyuam qhov mus kawm ntawv rau qib siab, ces thiaj li muab nyiaj xiab lwm tus neeg kom tso kuv tawm.
Kuv tus txiv nram ntej tsav tsheb tuaj tim tsev kaw neeg tuaj ntsib kuv rau hnub tso kuv tawm. Nws pom tias kuv txawv npaum li cas lawm tom qab yuag lawm ntau, thiab nug kuv tias, “Tom qab ib lub hlis xwb koj yuag heev li lawm, yog tseem nyob ntau lub xyoo thiab es koj puas nyob tau. Zaum no koj tso txoj kev ntseeg tseg tau lawm, puas yog?” Thaum kuv tsis teb, ces nws pheej nias qee kuv tias: “Koj yuav tso txoj kev ntseeg tseg tau lawm pod?” Kuv teb nws ntsiag to tias, “Kuv tseem yuav ntseeg mus ntxiv! Qhov muaj kev ntseeg ntawd yog raug npaj tseg los saum Ntuj Ceeb Tsheej thiab raug lees paub rau hauv lub ntiaj teb lawm, ces kuv yuav ntseeg tsuav yog kuv tseem muaj txoj sia nyob.” Thaum hnov kuv hais li no, nws ntaus lub kauj tsheb npau taws hlo, ua pa xyu thiab co hau nto, ces hais npau taws ntsuav tawm los tias, “Kuv mam muab qhov ntawd cob rau koj tus Vajtswv! Pawg Koom Tsham tas zog ua txhua yam kom kov yeej tib neeg lub siab, tab sis nws yeej ua tsis tau li, tiam sis nej cov ntseeg nias qees ntseeg yam tsis tas kom tau txais ib qho khoom dab tsi li thiab txawm tom qab ntawd mag ntes ntau zaus los xij. Koj tus Vajtswv yog qee yam tiag tiag!” Kuv ua Vajtswv tsaug rau txoj kev coj kuv kev los ua tim khawv.
Ob peb hnub tom qab rov los txog tsev lawm, kuv tus tub rov qab tim tsev kawm ntawv los thiab hais tu nrho rau kuv tias, “Niam, hnub no koj yuav tsum tau xaiv. Yog koj xav kom kuv yog koj tus tub mus ntxiv, ces koj yuav tsum tso koj txoj kev ntseeg tseg. Yog koj tuav koj txoj kev ntseeg, ces kuv yuav tawm hauv tsev mus thiab koj yeej yuav tsis pom kuv ntxiv li lawm.” Kuv yoob tag li. Kuv tus tub yeej ib txwm ncawg kuv thiab yav dhau los mas nws yeej tsis tawm tsam kuv txoj kev ntseeg li. Vim li cas hnub no nws thiaj li hais li no? Qhov ntawd ua rau mob siab tshaj, thiab kuv xav tias txoj kev ntseeg no mas muaj kev txom nyem, thiab muaj qhov zoo thiab qhov phem puv npo tiag tiag. Txhua kauj ruam yeej muaj kev xaiv. Kuv xav tias qhov no yog ib qho kev txiav txim siab uas nyuaj heev, yog li kuv thiaj li thov Vajtswv thiab thov kom Nws coj kuv kev los to taub Nws txoj kev xav. Tom qab kuv thov Vajtswv tag lawm, ces kuv txawm xav txog ib zaj lus ntawm Vajtswv cov lus tias: “Nyob rau txhua kauj ruam ntawm tes dej num uas Vajtswv ua rau tib neeg ntawd mas, zoo li sab nraud tshwm muaj kev sib tshuam mus los ntawm tib neeg, cuag nkaus li yog yug ntawm tib neeg tej kev npaj los sis los ntawm tib neeg txoj kev cuam tshuam los. Tab sis nyob rau tom qab, txhua kauj ruam ntawm tes dej num, thiab txhua yam uas tshwm sim, yog ib lo lus twv los ntawm Ntxwgnyoog rau ntawm Vajtswv xub ntiag, thiab cheem tsum tib neeg tuav lawv tej lus tim khawv khov kho rau Vajtswv. Muab thaum Yauj raug sim coj los ua piv txwv: Nyob rau tom qab, Ntxwgnyoog nrog Vajtswv sib twv, thiab yam uas muaj tshwm sim rau Yauj yog tej kev ua ntawm tib neeg thiab kev cuam tshuam ntawm tib neeg. Nyob rau tom qab txhua kauj ruam ntawm tes dej num uas Vajtswv ua rau hauv nej yog Ntxwgnyoog lo lus twv nrog Vajtswv—nyob rau tom qab nws yog ib ntsug rog” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Txoj Kev Hlub Vajtswv Xwb Thiaj Yog Txoj Kev Ntseeg Vajtswv Tiag). Vajtswv cov lus pab kom kuv to taub tias, txawm ntxim zoo li kuv tus tub thov kom kuv xaiv los xij, qhov tseeb tiag nws yog Ntxwgnyoog txoj kev sim siab thiab kev tawm tsam kuv, kom pom tias kuv yuav xaiv kuv tus tub, los sis kuv yuav xaiv Vajtswv xwb. Kuv yuav tsum ua tim khawv los ua kom Ntxwgnyoog txaj muag. Thaum xav txog qhov no, ces kuv thiaj li hais rau kuv tus tub tias, “Kuv ncaim tsis tau ntawm Vajtswv mus. Qhov xaiv muab Vajtswv tso tseg ntawd yuav zoo li qhov koj txiav txim siab muab kuv tso tseg hnub no ntag. Qhov ntawd yuav tsis tsim nyog thiab yuav ua rau Vajtswv tag kev cia siab. Kuv yuav raws Vajtswv qab tas li. Ntawd yog kuv txoj kev xaiv!” Thaum hnov kuv hais li no lawm, ces nws tawm mus kua muag txia txev lawm. Thaum lub sij hawm ntawd kuv chim siab ib yam nkaus thiab, tab sis kuv paub tias kuv xaiv yog lawm!
Thaj tsam li ib nrab teev tom qab ntawd, nws rov qab los hais rau kuv tias, “Niam, kuv yuav kev lawm. Kuv yuav tsum txhob yuam kom koj xaiv li ntawd. Kuv txiv hais tias yog koj raug txhom dua ntxiv, ces koj yeej yuav tawm tsis tau li lawm. Kuv ntshai tsam koj raug txhom, yog li kuv xav siv lub tswv yim ntawd los ua kom koj tso koj txoj kev ntseeg tseg.” Thaum hnov nws piav qhia li no ua rau kuv qias tus dab phem uas yog Pawg Koom Tsham uas tawm tsam Vajtswv. Vim kuv tsuas ntseeg Vajtswv xwb, es Pawg Koom Tsham txawm ntes thiab tsim txom kuv lawm, ua rau kuv tsev neeg tawg tag thiab rub kuv tus txiv thiab ob tug me nyuam nkag los txuam nrog. Nws yim tsim txom kuv, ces kuv yim yuav tso nws tseg, thiab ua siab tawv raws Vajtswv qab!
