94. Cov Thawj Coj Yuav Tsum Tsis Txhob Zais Tej Kev Txawj
Nyob rau lub Yim Hli xyoo 2020, kuv raug xaiv los ua ib tug thawj coj thiab tus saib xyuas pawg ntseeg tes hauj lwm ua yeeb yaj duab. Thaum tseem tshiab rau txoj hauj lwm ntawd mas, kuv tsis paub ntau yam txog txoj hauj lwm ntawd tej hauv paus ntsiab lus li, ces thiaj li ntsib qee yam kev nyuaj thaum ua hauj lwm. Yog li ntawd kuv thiaj li pheej nug tus thawj coj pab pawg uas yog Viv Ncaus Zag kom pab tawm tswv yim thiab sab laj. Viv Ncaus Zag paub zoo txog tej hauv paus ntsiab lus thiab tes hauj lwm ntawd. Nws pab tau kuv ntau yam heev. Kuv pom hais tias nws ua ntxaws heev, ua nws tej dej num tiag tiag, thiab paub txog lub luag hauj lwm. Qee zaus, thaum kuv muaj hauj lwm ntau dhau lawm, kuv muab qee yam ntawm kuv tes hauj lwm rau nws ua. Wb ua tau ib pab uas zoo.
Tom qab ntawd, kuv maj mam paub hais tias thaum twg cov nus thiab cov viv ncaus ntsib teeb meem mas, lawv txhua tus puav leej nug Viv Ncaus Zag thiab haj tseem cia li txiav txim siab ncaj qha tom qab ntsib nws tag lawm. Kuv tsis zoo siab rau tej xwm txheej no kiag li. Kuv xav rau kuv tus kheej hais tias: “Yog pheej zoo li no tas li, ces kuv yuav tsis poob kuv txoj hauj lwm ua thawj coj lod? Ua tsis tau li no. Yav tom ntej kuv tus kheej yuav ua txhua yam hauj lwm uas tau muab faib rau kuv ua lawm xwb es txhob hais kom Viv Ncaus Zag pab lawm. Yog tsis li ntawd, ces lwm tus yuav puav leej xav hais tias nws yog ib tug neeg ua hauj lwm uas zoo thiab txawj heev.” Muaj ib zaug, Viv Ncaus Zag pom hais tias muaj ib tug ntawm cov nus ua nws tes hauj lwm tsim yeeb yaj duab nce qib qeeb. Thaum Viv Ncaus Zag tshawb xyuas qhov ntawd, nws tshawb pom hais tias tus nus ntawd tej kev txawj zoo tsis txaus, thiab tus nus ntawd tsis nrhiav tej hauv paus ntsiab lus hauv nws tej dej num, yog li ntawd ces thiaj li pheej yuav tsum tau rov qab tau ua qhov hauj lwm ntawd dua. Viv Ncaus Zag tau kom lwm tus nus uas txawj dua los pab tus nus ntawd. Tom qab ntawd kuv mam li hnov txog qhov no. Viv Ncaus Zag txiav txim siab yog lawm, tiam sis kuv tseem meem txom rau qhov xwm txheej ntawd. Kuv mloog zoo li qhov ntawd yog ib qho tsis hwm kuv thaum txiav txim siab loj tag npaum li no es tsis qhia rau kuv paub li. Puas yog kuv lam yog ib tug thawj coj xwb? Tom qab ntawd, kuv thiaj li nug nws hais tias vim li cas nws thiaj li tsis qhia kuv txog qhov no. Kuv ceeb tag li vim nws hais tias: “Kuv tsis khoom thiab tsis nco qab qhia koj lawm.” Thaum kuv hnov li ntawd, kuv npau taws heev, thiab xav rau kuv tus kheej hais tias: “Koj muaj cai zuj zus thiab txiav txim siab yam tsis tos kuv pom zoo. Koj tsis hwm kuv kiag li! Tsis yog qhov ntawd ua rau zoo li pawg ntseeg tsis cheem tsum kuv lod? Yog pheej zoo li no tas li, cov nus thiab cov viv ncaus yuav xav li cas rau kuv? Tseeb tiag lawv yeej yuav xav hais tias kuv tsis muaj nuj nqis dab tsi li. Yog li ces kuv yuav ua li cas ua tau thawj coj?” Thaum kuv ras dheev txog qhov no, ua rau kuv haj yam ntshai heev tuaj. Muaj dua ib zaug, Viv Ncaus Zag qhia rau kuv hais tias nws twb muab qee yam khoom siv coj los kawm ntawd los tso ua ke thiab npaj hais kom txhua tus tuaj koom kawm qee yam kev txawj ua ke lawm. Kuv meem txom thaum kuv hnov qhov no lawm ces thiaj li xav hais tias: “Qee zaum kuv yog tus uas hais kom koj nco ua qhov hauj lwm no, tiam sis, thaum wb sib tham tag lawm, koj yog tus uas tau mus qhia thiab coj lwm tus kev. Tsis muaj leej twg paub tes hauj lwm uas kuv ua tsis muaj neeg pom li, ces txhua tus yuav tsum xav hais tias koj ris ib lub nra loj dua kuv xwb. Yog zoo li no txuas ntxiv, kuv yuav ua li cas tuav tau kuv txoj hauj lwm ua thawj coj?” Tseeb tiag, kuv paub hais tias qhov ntawd yog Viv Ncaus Zag lub luag hauj lwm los coj cov nus thiab cov viv ncaus txog tej kev kawm thiab kuv paub hais tias cia tes hauj lwm no qeeb tsis tau, yog li ntawd kuv yuav tsum tsis txhob yws txog tes hauj lwm ntawd. Tiam sis tsuas yog kuv tsis xav cia Viv Ncaus Zag ua tes hauj lwm no xwb. Kuv thiaj li xav hais tias: “Viv Ncaus Zag tab tom raus tes rau ntau txoj hauj lwm zuj zus lawm, nrog rau qee yam hauj lwm uas kuv saib xyuas huv si. Lwm tus nyiam mus cuag nws dua thaum lawv muaj teeb meem. Puas yog nws yuav hloov kuv chaw sai sai no?” Thaum xav txog txhua yam no ua rau kuv tsis zoo siab li. Yog li ntawd kuv txawm pib dig tej uas nws ua tsis zoo thiab tej teeb meem hauv nws tes hauj lwm tawm los. Kuv xav qhia rau lwm tus paub hais tias nws tsis txawj ua nws tes hauj lwm thiab tias kuv tseem txawj dua.
Muaj ib hnub, thaum tab tom nrog ib tug thawj coj theem siab dua sib tham txog wb txoj hauj lwm, tus thawj cov ntawd pheej hais tias muaj ib txoj hauj lwm ntawm Viv Ncaus Zag cov hauj lwm ua yeeb yaj duab mas nce qib qeeb heev. Qhov no yog qhov kuv xav hnov ntag ces kuv thiaj li teb kiag tam sim ntawd hais tias: “Qhov ko yog lawm. Viv Ncaus Zag muaj ntau qhov hauj lwm uas muab faib rau nws ua, tiam sis nws ua tsis tau tag nrho tej hauj lwm ntawd. Qee cov ntawm nws cov hauj lwm los ua tsis tau zoo li thiab. Kuv xav hais tias qhov zoo tshaj mas tsis txhob muab hauj lwm ntau dhau lawm rau nws. Yuav tsum tsis txhob pub nws muaj cai ntau npaum li no.” Thaum tau hais li no lawm, kuv mloog zoo li txhaum me ntsis lawm: Yog ua li cas kuv thiaj li hais tau tej yam zoo li ntawd? Tej dej num ntawd yog Vajtswv cov lus txib. Kuv hais cuag nkaus li kuv muab tej dej num no faib rau nws ua, cuag nkaus li kuv pub nws muaj cai los ua tej hauj lwm no es tam sim no kuv ho muab qhov muaj cai ntawd tshem tawm mus. Tsis yog kuv ua yuam kev lawm lod? Kuv tsis ntseeg tias kuv hais tau tej yam zoo li ntawd li thiab ntshai heev txog kuv tus kheej. Thiab qee yam ntawm tes hauj lwm ntawd yeej yog ib feem ntawm Viv Ncaus Zag tej dej num, tiam sis kuv ua txhua yam los ua kom nws tsis txhob tau ua tes hauj lwm ntawd thiab pheej nrhiav qhov tsis zoo hauv nws tes hauj lwm tas li xwb. Kuv xav kom txhua tus pom hais tias nws tsis yog ib tug neeg ua hauj lwm zoo thiab qis dua kuv. Cas kuv yuav ntxim ntxub ua luaj li?
Tom qab ntawd, kuv txawm pib nrhiav tej zaj lus ntawm Vajtswv cov lus uas hais raug kuv los daws kuv tus yam ntxwv. Kuv nrhiav pom ib zaj lus uas Vajtswv muab cov tawm tsam Khetos qhia tshwm uas hais raug kuv tus yam ntxwv. Vajtswv hais tias: “Ib qho ntawm tej yam ntxwv uas pom meej meej ntawm lub ntsiab tseeb ntawm ib tug tawm tsam Khetos ces yog qhov hais tias lawv zoo li cov uas yuav raws lawv siab nkaus xwb los tswj kav raws lawv siab nyiam: Lawv tsis mloog leej twg hais li, lawv saib tsis taus txhua leej txhua tus, thiab tsis hais tej uas tib neeg ua tau zoo, los sis qhov tib neeg hais thiab ua, los sis tej kev paub tob thiab tej tswv yim uas cov tib neeg ntawd muaj, lawv yeej tsis cuab pob ntseg mloog li; cuag nkaus li tsis muaj leej twg tsim nyog ua hauj lwm nrog lawv, los sis muaj feem nyob rau hauv txhua yam lawv ua li. Qhov ntawd yog hom moj yam ntawm tus tawm tsam Khetos. Ib txhia neeg hais tias qhov no yog kev coj phem xwb—nws yuav ua cas yog qhov kev coj phem uas muaj nyob txhua txhia qhov chaw mas? Qhov no ces yeej yog tag nrho ib tug moj yam phem; hom moj yam no mas heev tshaj plaws li. Vim li cas Kuv thiaj li hais tias lawv tus moj yam mas heev tshaj plaws li no mas? Cov tawm tsam Khetos xav txog tes hauj lwm ntawm Vajtswv lub tsev, nrog rau tej uas zoo tshaj rau pawg ntseeg, ua lawv tus kheej tug tag nrho, ua yam khoom ntawm lawv ntiag tug uas yuav tsum raug tswj tuav los ntawm lawv, yam tsis muaj ib tug twg los cuam tshuam li. Thiab yog li ntawd ces tib qho uas lawv xav txog thaum ua tes hauj lwm ntawm Vajtswv lub tsev ces tsuas yog qhov uas zoo tshaj rau lawv tus kheej, lawv tus kheej lub koob meej thiab meej mom xwb. Lawv tsis pub leej twg rhuav tshem tej uas muaj txiaj ntsim rau lawv li, thiab lawv haj yam tsis pub tus uas muaj peev xwm thiab muaj cuab kav hais txog nws tej kev paub thiab tej lus tim khawv los rhuav tshem lawv lub meej mom thiab lub koob meej li thiab. … Thaum tib neeg paub qhov txawv ntawm lawv tus kheej los ntawm ib qho hauj lwm me me, los sis thaum tib neeg muaj peev xwm tham txog tej kev paub thiab lus tim khawv tseeb kom muaj txiaj ntsim, txhim kho, thiab txhawb tau cov uas xaiv tseg, thiab txhua tus qhuas heev lawm, ces ua rau cov tawm tsam Khetos lub siab khib thiab ntxub, lawv thiaj li ua txhua yam los cais thiab rhuav tshem cov tib neeg ntawd. Thiab, txawm yuav zoo li cas los xij lawv yeej tsis cia cov tib neeg zoo li no los ua ib qho hauj lwm, kom thaiv tau cov tib neeg no tsis txhob rhuav tshem lawv lub meej mom. … Cov tawm tsam Khetos xav hauv lawv tus kheej hais tias, ‘Yeej tsis muaj hnub uas kuv yuav ua siab ntev rau qhov no li. Koj xav muaj ib txoj hauj lwm nyob rau hauv kuv txoj kev tswj fwm, los nrog kuv sib tw. Qhov ntawd yeej tsis muaj hnub kiag li, tsis tas yuav xav txog. Koj muaj peev xwm dua kuv, txawj hais lus dua kuv, kawm ntawv siab dua kuv, thiab nrov dua kuv. Koj xav kom kuv nrog koj ua hauj lwm lod? Kuv yuav ua li cas yog koj txeeb kuv lub koob lub npe lawm?’ Lawv puas xav txog tej uas muaj txiaj ntsim rau Vajtswv lub tsev? Tsis xav. Lawv xav txog dab tsi xwb? Lawv tsuas xav tias yuav tuav lawv tus kheej lub meej mom li cas xwb. Txawm lawv paub hais tias lawv tus kheej tsis muaj peev xwm ua tes hauj lwm tiag tiag los xij, lawv tsis cob qhia los sis txhawb cov tib neeg muaj peev xwm uas caum qhov tseeb li; cov tib neeg uas lawv txhawb ces yog cov tib neeg uas qhuas lawv, cov tib neeg uas nyiam pe hawm lwm tus, cov uas qhuas thiab cav lawv hauv cov tib neeg ntawd lub siab, cov tib neeg uas koom tes tau yooj yim, cov uas tsis muaj kev to taub txog qhov tseeb thiab tsis muaj peev xwm paub qhov txawv xwb” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). Yav tas los, kuv ib txwm xav hais tias zaj lus no yog muab cov tawm tsam Khetos qhia tshwm xwb tsis raug kuv no, tiam sis tom qab ntawd kuv ras dheev hais tias kuv tus moj yam tawm tsam Khetos mas phem heev li lawm. Thaum xub thawj mas, kuv xav hais tias Viv Ncaus Zag mob siab leg hauj lwm thiab siv zog ua hauj lwm heev, ces kuv thiaj li zoo siab muab qee yam ntawm kuv tes hauj lwm rau nws ua, tiam sis thaum kuv ras dhees hais tias lwm tus qhuas nws, mus cuag nws thaum lawv muaj lus nug, thiab nws cia li ua qee yam hauj lwm ua ntej yam tsis tau qhia kuv li, ces kuv cia li txhawj tsam nws rhuav kuv lub koob lub npe thiab xav tias nws yog ib qho kev phom sim rau kuv lub meej mom, yog li ntawd kuv thiaj li tsis pub nws koom tes rau ntau qhov hauj lwm ntxiv lawm, nrog rau cov hauj lwm uas yeej yog ib feem ntawm nws tej dej num huv si. Kuv txhawj tias yog nws ua tau zoo, ces cov nus thiab cov viv ncaus yuav haj yam qhuas nws ntxiv thiab yuav zoo li kuv phem dua yog muab sib piv. Kuv haj tseem dag tus thawj coj theem siab dua kom nws tsis txhob muab hauj lwm rau Viv Ncaus Zag ua ntxiv lawm thiab. Thaum tig xav txog tej cwj pwm no mas, kuv pom hais tias kuv yeej tsis muaj kev ua neej tiag tiag li thiab muab lwm tus cais tawm kom txuag tau kuv tus kheej lub meej mom xwb. Cov tawm tsam Khetos saib lub hwj chim muaj nqis tshaj txhua yam huv si thiab yeej tsis xav txog tes hauj lwm los sis pawg ntseeg tej kev ntshaw li. Txawm lawv yuav ua tes hauj lwm dab tsi los xij, lawv tsuas quav ntsej txog lawv tus kheej lub meej mom xwb thiab thaum muaj ib tug twg txawj tshaj lawv thiab phom sij rau lawv lub meej mom, mas lawv ua txhua yam li lawv ua tau los txwv thiab cais tus tib neeg ntawd thiab tsis pub tus tib neeg ntawd ua qhov hauj lwm tseem ceeb nyob rau hauv tes dej num uas tus tib neeg ntawd saib xyuas li. Kuv tus cwj pwm puas txawv ntawm tus tawm tsam Khetos ntawd li? Kuv ua zoo li pawg ntseeg tes hauj lwm yog kuv li ntiag tug. Thaum xav tias seb yuav muab tes dej num twg faib leej twg ua thiab seb yuav muab hauj lwm ntau npaum li cas rau lawv ua, mas kuv yeej ib txwm txhawj txog seb lawv puas tsim ib qho kev puas tsuaj rau kuv lub meej mom thiab lub koob lub npe xwb. Kuv tsis xav ib qho me me tias qhov no yuav cuam tshuam rau pawg ntseeg tes hauj lwm li cas li. Kuv haj tseem txwv thiab muab tib neeg cais tawm kom thaiv tau kuv tus kheej lub meej mom, thiab qhov muab kuv tus moj yam tawm tsam Khetos nthuav tawm thiab. Kuv mas phem tiag tiag li!
Kuv tau los pom zaj lus no: “Yog lawv pom ib tug neeg twg zoo dua lawv, ces lawv cheem cov neeg ntawd, pib hais lus xaiv txog cov neeg ntawd, los sis siv qee yam tsis zoo kom lwm tus txhob muab lawv saib siab, thiab kom tsis muaj ib tug twg zoo dua ib tug twg li, ces qhov no thiaj li yog tus moj yam qias vuab tsuab ntawm txoj kev khav theeb thiab kev qhuas tias yus tus kheej coj ncaj, nrog rau txoj kev coj tsis ncaj, kev dag, thiab kev txawj ntxias dag, thiab cov neeg no yuav nres rau ntawm qhov ua tsis tau raws li lawv cov hom phiaj. Lawv ua neej nyob zoo li qhov no xwb los tseem xav tias lawv mas zoo thiab tias lawv yog cov neeg zoo. Txawm li cas los xij, lawv puas muaj lub siab ntshai Vajtswv? Ua ntej tshaj plaws, yog yuav tham txog qhov kev xav ntawm cov yeeb yam ntawm tej xwm tsheej no, ces tseem tsis yog cov neeg uas coj li no ua li lawv siab nyiam xwb lod? Lawv puas xav txog tej kev ntshaw ntawm Vajtswv tsev neeg? Lawv tsuas xav txog lawv tus kheej tej kev xav nkaus xwb thiab lawv tsuas xav ua kom tau lawv tus kheej tej hom phiaj nkaus xwb, yam hais tsis txog qhov raug puas tsuaj los ntawm Vajtswv tsev neeg txoj hauj lwm li. Tsis yog cov tib neeg zoo li no thiaj li khav theeb thiab qhuas tias yus tus kheej yog xwb, lawv kuj xav rau yus tus kheej xwb thiab ntxim ntxub kawg li thiab; lawv mas tsis xav txog Vajtswv lub siab nyiam kiag li, thiab cov neeg zoo li no, tsis muaj qhov tsis ntseeg li, yeej tsis muaj lub siab ntshai Vajtswv li. Vim li ntawd lawv thiaj li ua yam twg los xij uas lawv xav ua thiab lom txwm ua, tsis muaj ib qho kev xav txog qhov kev liam, tsis muaj ib qho kev poob siab, tsis muaj ib qho kev nkag siab los sis kev txhawj, thiab tsis xav txog lub txim li. Qhov no yog qhov uas lawv keev ua, thiab qhov uas lawv ib txwm coj ua tas li. Lub txim uas cov neeg zoo li no raug yog dab tsi? Lawv yuav raug teeb meem puas yog? Muab nws hais kom yooj yooj yim, ces cov neeg zoo li no mas xam khib heev thiab muaj ib qho kev ntshaw loj heev rau tus kheej lub suab npe thiab lub meej mom; lawv mas txawj dag thiab txawj ntxias dag tshaj plaws. Muab nws hais kom hnyav zog, qhov teeb meem tseem ceeb ces yog qhov tias cov neeg zoo li no lub siab mas tsis muaj kev ntshai Vajtswv ib qho me me kiag li. Lawv tsis ntshai Vajtswv, lawv ntseeg lawv tus kheej tias yog qhov tseem ceeb tshaj plaws, thiab lawv xam txhua kis ntawm lawv tus kheej tias yog qhov siab dua Vajtswv thiab siab dua qhov tseeb. Hauv lawv lub siab, Vajtswv yog tus uas muaj nqis tsawg tshaj plaws thaum hais txog thiab tsis tseem ceeb tshaj plaws, thiab Vajtswv tsis muaj ib lub meej mom nyob hauv lawv lub siab hlo li. Cov uas tsis muaj lub chaw rau Vajtswv nyob hauv lawv lub siab, thiab cov uas tsis hwm Vajtswv, puas tau txais kev paub zoo txog qhov tseeb? (Tsis tau.) Yog li, thaum lawv nquag tawm ncig mus ncig los ua si lom zem ua rau lawv tus kheej khwv heev thiab siv lub dag zog ntau heev, lawv tab tom ua dab tsi? Cov neeg ntawd tseem hais tias lawv tau muab txhua yam tso tseg coj los siv rau Vajtswv thiab tau raug kev txom nyem loj kawg nkaus, tab sis qhov tseeb ces, qhov kev xav, lub hauv paus ntsiab lus, thiab lub hom phiaj ntawm tag nrho lawv tej kev ua ces yog ua kom lawv tus kheej tau txais txiaj ntsim xwb; lawv tsuas yog npaj tiv thaiv lawv tus kheej tej kev ntshaw xwb. Nej puas hais los sis tsis hais tias hom neeg no yog neeg phem? Hom neeg twg uas twb ntseeg Vajtswv los tau ntau lub xyoo lawm, tiam sis tseem tsis muaj kev ntshai Vajtswv li? Cov tib neeg uas khav theeb. Thiab dab tsi yog yam uas tsis muaj kev ntshai Vajtswv kiag li? Dua ntawm tej tsiaj lawm, ces nws yog cov neeg lim hiam, cov tawm tsam Khetos, cov niag dab phem, thiab Ntxwgnyoog. Lawv tseem muaj plhus los cam nrog Vajtswv thiab; lawv yeej tsis ntshai Vajtswv hlo li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsib Tug Yam Ntxwv Uas Yuav Tsum Muaj Thiaj Li Taug Tau Txoj Kev Yog Mus Rau Txoj Kev Ntseeg Vajtswv). Thaum nyeem Vajtswv cov lus, kuv mloog cuag nkaus li Nws nyob kiag ntawd txiav txim rau kuv ntag. Yeej tsis muaj teeb meem loj nyob rau ntawm tes hauj lwm uas Viv Ncaus Zag saib xyuas ntawd li, tiam sis vim nws tsim ib qho kev phom sij rau kuv lub meej mom, kuv thiaj li nrhiav ib txoj kev los txwv nws, nrhiav cib fim los muab nws thuam rau ntawm tus thawj coj theem siab dua ntawd lub xub ntiag, cia siab hais tias yuav dag tau nws kom txhob muab hauj lwm ntau rau Viv Ncaus Zag ua kom Viv Ncaus Zag thiaj li yuav hloov tsis tau kuv qhov chaw. Kuv txwv thiab rau txim rau lwm tus kom thiaj li tuav tau kuv tus kheej lub meej mom ruaj. Kuv puas muaj ib qho kev ntshai Vajtswv nyob rau hauv kuv lub siab li? Kuv ua neej nyob raws li cov kuab lom phem xws li “Nyias pab nyias tus kheej xwb, leej twg lawv qab ces raug tsov tom xwb,” “Tsuas muaj ib yam txiv neej nkaus xwb,” “Nyob rau hauv tag nrho lub qab ntuj khwb, Kuv thiaj yog tus hwj chim loj tshaj plaws xwb.” Kuv mas twm xeeb thiab khav theeb heev li. Kuv xav txog Tsoom Fwv Koom Tsham Suav uas siv hwj chim thiab coj tsis ncaj, uas txwv thiab cais txhua tus uas tsim ib qho kev phom sij rau lawv txoj hauj lwm. Kuv tsis zoo ib yam nkaus li ntawd lod? Kuv txwv txhua tus nus thiab viv ncaus uas txawj thiab ua tau lawv tes hauj lwm zoo. Kuv sim los tsim tsa kuv lub hwj chim rau hauv pawg ntseeg thiab ua kom cov nus thiab cov viv ncaus qhuas kuv thiab kom muaj kuv nyob rau hauv lawv lub siab nkaus xwb. Kuv tab tom taug tus tawm tsam Khetos txoj kev ntag! Kuv xav txog cov tawm tsam Khetos ntawd uas siv txhua txoj kev los rau txim thiab hais lus nkaug tib neeg kom tuav tau lawv lub meej mom, saib cov uas phom sij rau lawv lub meej mom ntawd zoo li cov pos uas chob lawv lub cev nqaij daim tawv, iab liam cov tib neeg ntawd yam yuam kev ntsuav, rau txim rau cov tib neeg ntawd, thiab yeej tsis tso tseg kom txog ntua thaum cov tib neeg ntawd raug ntiab tawm mus lawm. Tom qab ua txhua yam kev phem lawm, thaum kawg cov tawm tsam Khetos ntawd raug muab ntiab tawm ntawm Vajtswv lub tsev mus lawm. Yog kuv pheej ua li ntawd txuas ntxiv thiab tsis los lees txim hloov dua siab tshiab, ces thaum kawg kuv yuav tsis ntsib tib txoj hmoo xwb lod? Vajtswv twb qhia txog qhov yuav cov tawm tsam Khetos ntawd li cas, thiab yuav zam tus tawm tsam Khetos ntawd txoj kev li cas lawm. Vajtswv twb qhia meej heev txog kis no ntawm qhov tseeb lawm, kom peb thiaj li yuav muaj kev thoob tsib to nrog txog cov tawm tsam Khetos ntawd, tig xav txog peb tus kheej tus cwj pwm uas zoo li tus tawm tsam Khetos, thiab caum qhov tseeb, lees txim hloov dua siab tshiab thiab hloov pauv. Tiam sis kuv tsis mob siab rau txoj kev daws kuv tus kheej tus moj yam uas tawm tsam Khetos nyob rau hauv kuv tes hauj lwm, tsis xav tias qhov los ua kuv tej dej num kom tiav thiab tiv thaiv pawg ntseeg tes hauj lwm ntawd mas zoo npaum li cas li. Tiam sis, kuv txeeb kom tau lub meej mom, saib kuv tes dej num zoo li kuv tus kheej txoj kev lag luam, zoo li ib txoj kev uas los tsom kwm kom tau lub meej mom thiab kom tau kuv cov nus thiab cov viv ncaus lo lus qhuas, thiab xav tau tag nrho lub hwj chim hauv kuv tes dej num xwb. Kuv tej kev ntshaw muab kuv rub mus lawm.
Muaj ib zaug thaum tab tom pe hawm, kuv txawm pom ob zaj lus ntawm Vajtswv txoj lus uas pab tau kuv heev. Vajtswv cov lus hais tias: “Ua ib tug thawj coj los sis ib tug neeg ua hauj lwm, yog koj pheej xav hais tias koj tus kheej siab dua lwm tus, thiab saib koj tes dej num zoo li ib tug nom tswv, pheej qhia txog koj txoj hauj lwm raws li koj lub siab nyiam, pheej muaj koj tus kheej tej kev npaj, pheej xav txog thiab xyiv fab rau koj tus kheej lub koob meej thiab lub meej mom, pheej ua raws li koj tus kheej txoj hauj lwm, thiab pheej nrhiav kom tau lub meej mom siab dua, los saib xyuas thiab tswj tib neeg kom coob ntxiv, thiab nthuav koj lub hwj chim kom dav xwb, ces qhov no yog teeb meem. Qhov saib ib teg dej num tseem ceeb yam li ib lub hwv tsam uas xyiv fab rau koj txoj hauj lwm cuag nkaus li koj yog ib tug nom tswv ntawd mas phom sij heev. Yog koj pheej ua li no, tsis xav ua hauj lwm nrog lwm tus, tsis xav txo koj lub hwj chim thiab tsis xav muab lub hwj chim ntawd faib rau lwm tus, tsis xav kom lwm tus muaj lub hwj chim loj dua, xav kom nrov tshaj lwm tus, yog koj tsuas xav kom koj tus kheej thiaj li muaj lub hwj chim ntawd xwb, ces koj yog ib tug tawm tsam Khetos ntag. Tiam sis yog feem ntau koj nrhiav qhov tseeb, muab sab cev nqaij daim tawv tso tseg, muab koj tus kheej tej kev muaj siab thiab tej kev npaj tso tseg, es koj tus kheej muaj peev xwm los ua hauj lwm nrog lwm tus, qhib koj lub siab los nrog lwm tus sab laj thiab nrhiav, nquag mloog lwm tus tej tswv yim thiab tej lus qhia, thiab lees txais tej tswv yim uas yog thiab mus raws li qhov tseeb, txawm qhov ntawd yuav los ntawm leej twg los los xij, ces yog koj tab tom xyaum ua yam ntse ntsuav thiab yog lawm, thiab koj muaj peev xwm zam txoj kev uas tsis yog, uas yog ib txoj kev tiv thaiv koj lawm” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). “Txawm koj yuav ua dab tsi, txawm nws yuav tseem ceeb thiab tsis tseem ceeb los xij, yuav tsum muaj tib neeg nyob ntawd pab koj, taw qhia koj, tawm tswv yim, thiab pab koj ua txhua yam. Ua li no, koj thiaj li yuav ua txhua yam yog dua, yuav tsis tshua ua yuam kev, thiab koj yuav tsis tshua mus yuam kev—uas puav leej yog mus rau qhov zoo. Qhov ua dej num rau Vajtswv yam tshwj xeeb ntawd yog ib qho tseem ceeb heev, thiab qhov tsis daws koj tus moj yam qias vuab tsuab ntawd tuaj yeem ua rau koj muaj kev phom sij! Thaum tib neeg muaj tus moj yam phem lawm, lawv tuaj yeem ntxeev siab rau Vajtswv thiab tawm tsam Vajtswv lub sij hawm twg thiab qhov chaw twg los tau. Cov tib neeg uas ua neej raws li tus moj yam phem, tuaj yeem tsis lees paub, tawm tsam, thiab ntxeev siab rau Vajtswv lub sij hawm twg los tau. Cov tawm tsam Khetos ruam, lawv tsis paub txog qhov no li, lawv xav hais tias, ‘Kuv twb muaj teeb meem txaus lawm kuv thiaj li tau kuv tus kheej lub hwj chim, vim li cas kuv thiaj li yuav muab lub hwj chim ntawd faib rau lwm tus? Qhov muab lub hwj chim ntawd rau lwm tus txhais tau hais tias kuv yuav tsis muaj dab tsi rau kuv tus kheej lawm, tsis yog lod? Kuv yuav ua li cas qhia tau kuv tej kev txawj thiab tej peev xwm yog tsis muaj lub hwj chim?’ Lawv tsis paub tias qhov uas Vajtswv tau muab rau tib neeg ua ntawd tsis yog lub hwj chim los sis lub meej mom, tiam sis yog ib teg dej num. Lawv tsuas lees txais lub hwj chim thiab lub meej mom xwb, lawv muab lawv tej dej num tso tseg lawm, thiab lawv tsis ua hauj lwm kom muaj qab hau. Tiam sis, lawv caum lub koob meej thiab lub meej mom thiab xyiv fab rau tej txiaj ntsim ntawm lub meej mom lawm. Qhov ua txhua yam li no mas phom sij heev—qhov no yog tawm tsam Vajtswv ntag! Txhua tus uas caum lub koob meej thiab lub meej mom dua li ua tib zoo ua lawv tes dej num kom zoo mas yog siv kev phom sij thiab txoj sia los caum xwb. Cov uas siv qhov phom sij thiab lawv txoj sia tuaj yeem ua rau lawv tus kheej puas tsuaj lub sij hawm twg los tau. Niaj hnub no, qhov ua ib tug thawj coj los sis ib tug neeg ua hauj lwm ntawd, yog koj tab tom ua dej num rau Vajtswv ntag, uas tsis yog ib qho yooj yim lawm. Koj tsis yog ua tej yam rau qee tus neeg, thiab haj yam tsis yog ua hauj lwm los them nqi thiab yuav zaub mov noj; tiam sis yog koj ua koj tes dej num uas nyob rau hauv pawg ntseeg ntag. Yog li ntawd hais txog qhov Vajtswv muab tes dej num no cob rau koj ua ntawd, qhov tseem ceeb ntawm txoj kev ua tes dej num no yog dab tsi? Vajtswv cia siab hais tias koj yuav ua koj tes dej num, seb koj ua puas zoo los tsis zoo; thaum kawg, yuav tsum tau cia siab rau Vajtswv, yuav tsum ua kom tau txiaj ntsig. Qhov koj tau lees txais ntawd yog Vajtswv cov lus txib, yog ib lub luag hauj lwm uas dawb huv, yog li ntawd txawm lub luag hauj lwm ntawd yuav tseem ceeb los sis me npaum li cas los xij, nws yog ib txoj hauj lwm tseem ceeb heev. Nws tseem ceeb npaum li cas? Nws cuam tshuam ncaj qha rau koj lub neej yav tom ntej thiab txoj hmoo, txog ntua qhov kawg ntawm koj; yog koj ua phem thiab tawm tsam Vajswv, ces koj yuav raug teem txim thiab raug rau txim ntag. Txhua yam koj ua thaum koj ua koj tes dej num ntawd Vajtswv twb muab teev tseg lawm, thiab Vajtswv Nws muaj Nws tus kheej tej hauv paus ntsiab lus thiab tej qauv rau qhov tau qhab nia thiab ntsuaj xyuas ntawd; Vajtswv txiav txim rau qhov kawg ntawm koj raws li txhua yam uas koj tau nthuav tawm thaum koj ua koj tes dej num” (Txoj Lus, Phau 4. Kev Nthuav Tawm Cov Tawm Tsam Khetos. Yam Yim: Lawv Yuav Ua Kom Lwm Tus Mloog Lawv Lus Nkaus Xwb, Tsis Yog Qhov Tseeb los sis Vajtswv li (Ntu Ib)). Yav dhau los, kuv pom kuv txoj hauj lwm uas ua ib tug thawj coj ntawd yam li yog ib lub cim meej mom. Tsuas yog tom qab nyeem Vajtswv cov lus lawm xwb kuv thiaj li ras dheev hais tias kuv tes dej num yog ib co lus txib uas Vajtswv txib kom kuv ua. Nws yog ib lub luag hauj lwm thiab tsis muaj dab tsi cuam tshuam rau lub meej mom thiab lub hwj chim li. Qhov ua yus tes dej num nyob rau hauv pawg ntseeg ntawd, tsis muaj qhov txawv ntawm lub meej mom siab los sis qis li. Txhua tus nyias ua nyias lub luag hauj lwm kom tiav nyob rau hauv nyias tus kheej txoj hauj lwm. Tom qab tau los ua ib tug thawj coj lawm, kuv muaj ntau lub cib fim los xyaum ua, thiab kuv maj mam kawm paub tias yuav ua raws li tej hauv paus ntsiab lus kom to taub qee qhov tseeb li cas. Vajtswv kuj muab cov nus thiab cov viv ncaus txawj lawm uas to taub tej hauv paus ntsiab lus ntawd faib los nrog kuv ua hauj lwm kom kuv thiaj li ua tau kuv tej dej num kom zoo tshaj plaws, thiab ua pawg ntseeg tes hauj lwm kom zoo thiab. Tiam sis kuv tsis caum qhov tseeb los sis ua hauj lwm nrog lwm tus kom sib haum xeeb li. Tiam sis, kuv saib lub meej mom muaj nqis thiab haj tseem txwv thiab cais lwm tus kom ceev tau kuv lub meej mom thiab, ua rau kuv cov nus thiab cov viv ncaus tsis muaj hwv tsam los xyaum ua li lawm. Tsis yog kuv tsuas rhuav tshem kuv cov nus thiab cov viv ncaus xwb, tiam sis kuj cuam tshuam rau pawg ntseeg tes hauj lwm thiab. Saib tag nrho kuv tus cwj pwm mas, kuv yeej tsis tsim nyog ua ib tug thawj coj kiag li. Kuv tsis xav taug txoj kev uas yuam kev no ntxiv lawm. Kuv tsuas xav los ua kuv tej luag hauj lwm, los ua kuv tej dej num kom tiav yam ncaj ncees thiab muaj qab hau lawm xwb. Tom qab ntawd, kuv txawm pib siv kuv tus kheej los ua kuv tes dej num kom ntau dua lawm thiab thaum kuv pom lwm tus mus cuag Viv Ncaus Zag thaum muaj lus nug, kuv tsis tshua xav phem ntxiv lawm, thiab tsis txhawj tsam lawv yuav hwm nws es tsis hwm kuv lawm. Kuv tsuas xav tias yuav ua hauj lwm nrog Viv Ncaus Zag li cas los ua wb tej dej num kom tiav zoo tshaj plaws lawm xwb. Thaum kuv pom hais tias Viv Ncaus Zag muaj teeb meem nyob rau hauv nws tes hauj lwm lawm, kuv nrog nws sib tham thiab pab nws kom rov qab los taug tau txoj kev yog. Thaum muaj tej qho hauj lwm nce qib qeeb, mas kuv nrog nws sib tham seb yuav ua li cas kom ua tau zoo tuaj. Yog kuv tsis muaj kev paub tob los sis tsis paub tias yuav daws qhov teeb meem ntawd li cas, ces kuv kuj yuav nug nws kom qhia kuv thiab. Sij hawm dhau mus, wb pib ua tau hauj lwm ua ke zoo zuj zus thiab kuv zoo siab thiab kaj siab heev lawm.
Kuv kuj xav txog zaj lus no ntawm Vajtswv cov lus: “Ua ib tug thawj coj pawg ntseeg mas koj tsis lam kawm kom paub siv qhov tseeb los daws teeb meem xwb, koj kuj yuav tau kawm kom paub thiab cob cov tib neeg muaj peev xwm thiab, cov uas koj yuav tsum txhob khib los sis txhob caij tsuj. Qhov xyaum ua li no mas thiaj li muaj txiaj ntsim rau pawg ntseeg tes hauj lwm. Yog koj cob qhia tau ob peb tug neeg nrhiav qhov tseeb los koom tes nrog koj es ua txhua tes hauj lwm tau zoo, thiab nyob rau thaum kawg, nej txhua tus muaj cov lus tim khawv uas hais txog txoj kev ntsib kev pom, ces koj thiaj li yog ib tug thawj coj los sis ib tug neeg ua hauj lwm uas tsim nyog. Yog hais tias koj muaj peev xwm saib xyuas txhua yam mus raws li cov hauv paus ntsiab lus, ces koj thiaj li ua raws li koj lub siab uas ncaj ncees. Muaj ib txhia mas pheej ntshai tias tsam lwm tus zoo dua lawv los sis siab dua lawv, tias tsam lwm tus yuav raug qhuas ho lawv ces raug saib tsis taus, ces qhov no thiaj li ua rau lawv tawm tsam thiab tsis xam txog lwm tus. Qhov no tsis yog ib kis ntawm txoj kev xam khib ntawm cov tib neeg muaj peev xwm lod? Qhov ntawd tsis yog twm xeeb thiab ntxim ntxub lod? Hom moj yam no yog dab tsi? Nws yog tus moj yam uas siab phem! Cov uas tsuas xav txog lawv tus kheej tej kev ntshaw xwb, cov uas tsuas ua tau zoo raws lawv tus kheej tej kev ntshaw nkaus xwb, es tsis xav txog lwm tus los sis ua tib zoo xav txog tej kev ntshaw ntawm Vajtswv lub tsev li, es muaj ib tug moj yam phem, ces Vajtswv tsis muaj kev hlub rau lawv li. Yog koj yeej muaj peev xwm tiag tiag txog qhov ua tib zoo xav txog Vajtswv tej kev npaj siab, ces koj yuav muaj peev xwm coj ncaj ncees rau lwm tus tib neeg thiab. Yog koj qhuas ib tug neeg zoo thiab cia lawv muaj kev cob qhia thiab ua tau ib teg dej num, es ntxiv ib tug neeg uas muaj peev xwm rau hauv Vajtswv lub tsev, ces qhov ntawd tsis yog yuav ua rau koj tes hauj lwm yooj yim dua lod? Ces koj yuav tsis ua lub siab ncaj ncees rau koj tes dej num lod? Qhov ntawd yog ib qho kev ua zoo rau ntawm Vajtswv lub xub ntiag; qhov ntawd yog kev txawj xav thiab lub ntsiab uas cov ua thawj coj yuav tsum muaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tshem Yus Tus Moj Yam Qias Vuab Tsuab Tawm Xwb Thiaj Li Tau Txais Kev Ywj Pheej thiab Kev Dim). Vim Vajtswv cov lus, kuv thiaj li paub hais tias kev cob qhia cov neeg txawj mas yog tus thawj coj lub luag hauj lwm thiab yog qhov cheem tsum ntawm pawg ntseeg tes hauj lwm. Qhov kev paub no pab tau kuv ras dheev hais tias tes hauj lwm no muaj nuj nqis npaum li cas tiag tiag. Ib qho mas yog qhov kev paub no muaj txiaj ntsim rau tag nrho pawg ntseeg tes hauj lwm, cia ntau tus tib neeg los muab lawv tej kev txawj los siv ua lawv tej dej num kom tiav, thiab kom haj yam tsim kho pawg ntseeg tes hauj lwm zoo mus ntxiv. Lwm qhov mas yog qhov kev paub ntawd kuj ua rau cov nus thiab cov viv ncaus xyaum ua ntxiv, uas muaj txiaj ntsim rau lawv txoj kev to taub lub neej txoj sia thiab. Tej no puav leej yog tej num zoo thiab Vajtswv thiaj li yuav nco txiaj ntsim. Thaum tig xav rov qab mas, Viv Ncaus Zag twb tau pab kuv heev lawm. Nws pab kuv to taub qee lub hauv paus ntsiab lus thiab ua tau qee yam nce qib thiab wb tes hauj lwm mus tau zoo lawm ntau. Kuv pom hais tias qhov ua raws li Vajtswv tej lus txib thiab xyaum kom paub los ua hauj lwm nrog lwm tus los ua tej dej num kom tiav ntawd mas tseem ceeb npaum li cas. Tsuas yog ua li no xwb peb thiaj li yuav ua tau pawg ntseeg tes hauj lwm thiab ua peb tej dej num kom tiav zoo.
Los ntawm qhov kev paub no, kuv thiaj li to taub qee yam txog kuv tus moj yam phem thiab tej kev xam pom uas tsis tsim nyog, thiab muaj peev xwm muab kuv txoj kev ntshaw lub npe thiab lub meej mom tso tseg es los ua kuv tes dej num kom tiav lawm. Nov yog Vajtswv txoj kev cawm dim rau kuv. Ua tsaug rau Vajtswv!
