96. Txoj Kev Coj Ncaj
Nyob rau thaum pib lub xyoo 2021, kuv raug xaiv los ua tus thawj coj ntawm pab pawg uas leg ntau pab pawg tes hauj lwm saib xyuas. Nyob rau lub sij hawm ntawd kuv xav hais tias qhov raug xaiv los ua txoj hauj lwm ntawd txhais tau hais tias kuv muaj qee yam peev xwm thiab muaj cuab kav, tias kuv ua ntej cov nus thiab cov viv ncaus feem coob hauv kuv txoj kev to taub txog qhov tseeb thiab kev to taub lub neej txoj sia lawm. Kuv mloog zoo li kuv yuav tsum tau npaj kuv tus kheej kom muaj qhov tseeb thiab rau siab ua kuv tes dej num kom zoo, kom txhua tus thiaj li pom tias kuv muaj peev xwm ua tau tes hauj lwm ntawd.
Thaum xub thawj kuv tsis paub tes hauj lwm ntawd, yog li ntawd thaum muaj tej yam tshwm sim tuaj uas kuv tsis to taub tag nrho, ces kuv nug tus thawj coj ntawd los sis cov nus thiab cov viv ncaus uas kuv nrog ua hauj lwm ntawd txog tej ntawd. Kuv xav hais tias vim kuv nyuam qhuav ua tes hauj lwm ntawd tshiab tshiab xwb, txhua tus yuav to taub hais tias tseem muaj qee yam uas kuv tsis paub, thiab qhov nrhiav ntxiv ntawd yuav pab tau kuv loj hlob sai dua. Qhov ua li ntawd, ua rau txhua tus nyiam kuv, thiab lawv thiaj li yuav xav hais tias kuv kub siab nrhiav qhov tseeb tiag tiag. Tiam sis, tom qab ntawd, kuv pheej ntsib ntau qhov teeb meem, thiab pheej tsis kam nug li. Thaum ntawd kuv twb ua tes dej num ntawd los tau li ib ntus lawm, yog li ntawd txhua tus yuav xav li cas rau kuv yog kuv pheej nug tas li? Lawv puas yuav xav tias kuv tsis muaj peev xwm zoo, tias kuv twb daws tsis tau tej teeb meem yooj yooj yim, thiab kuv tsis muaj peev xwm ua tes hauj lwm li tus thawj coj pab pawg? Yog li ntawd thaum kuv ntsib lwm yam teeb meem uas kuv tsis tuaj yeem to taub tag nrho, kuv pheej xav tas li txog qhov seb cov lus nug no puas tsim nyog nug, seb nws puas muaj qab hau los nug lawv. Kuv txhawj tsam kuv txoj kev xav ntxim zoo li yooj yooj yim xwb. Hais txog tej teeb meem uas ntxim tsis nyuaj, ces kuv tsis nug li, tiam sis kuv tus kheej sim daws tej teeb meem ntawd. Vim li ntawd, thiaj li muaj teeb meem ntau zuj zus tuaj ntxiv, thiab muaj ntau qhov teeb meem daws tsis tau kom ncav sij hawm. Qhov no ua rau kuv haj yam ntxhov siab heev tias txhua tus yuav tsis xav tias kuv yog ib tug phim ua thawj coj rau pab pawg ntawd. Nyob rau tej kev sib txoos ua ke, tshwj xeeb yog thaum kuv tus thawj coj tuaj nyob ntawd thiab, thaum kuv qhia txog Vajtswv cov lus, kuv pheej txhawj hais tias: “Kuv tej lus qhia puas muaj qab hau? Kuv txoj kev to taub puas meej?” Tom qab kuv txoj kev qhia lawm, kuv soj ntsuam txhua tus tej kev xav, thiab yog qee tus neeg nthuav tawm txog yam kuv tau hais lawm, ces qhov ntawd txhais tau hais tias kuv txoj kev qhia yeej raug lawv siab lawm, tias txoj kev qhia ntawd muaj kev tig ras to taub, thiab qhov ntawd kuj qhia tias kuv muaj ib txoj kev to taub meej txog Vajtswv cov lus thiab ua tau tes hauj lwm ntawd. Tiam sis yog tsis muaj leej twg hais dab tsi thaum kuv qhia tag lawm, mas kuv chim siab heev. Tom qab ntawd ib ntus, kuv txawm pib hnov sab heev rau txoj kev ua kuv tes hauj lwm lawm. Txhua lo lus uas kuv hais thiab txhua txoj kev xav uas kuv nthuav tawm, kuv pheej muab qhov ntawd xav ntau dhau lawm, thiab kuv tsis so li. Kuv xav ua tes dej num ntawd kom zoo, tiam sis kuv pheej ntshai tsam muaj dab tsi tshwm sim, thiab kuv tsis loj hlob los sis kawm tsis tau ib yam dab tsi li.
Kuv los rau ntawm Vajtswv lub xub ntiag los thov thiab nrhiav, thiab nyeem ib zaj lus ntawm Nws cov lus: “Tib neeg tus kheej yog cov raug tsim tawm los xwb. Cov raug tsim tawm los ntawd puas muaj peev xwm ua tau qhov hwj huaj uas loj tsis muaj chaw kawg? Lawv puas muaj peev xwm ua tau kom zoo tiav log thiab tsis muaj chaw thuam li? Lawv puas muaj peev xwm ua tau zoo rau txhua yam, to taub txhua yam, pom txhua yam, thiab muaj peev xwm ua txhua yam? Lawv tsis muaj peev xwm ua tau. Txawm li cas los xij, nyob rau hauv tib neeg, yeej muaj tej moj yam qias vuab tsuab, thiab muaj ib qho kev qaug zog heev: Kiag thaum lawv kawm tau ib qho txuj ci los sis ib qho kev txawj ua twg, ces tib neeg txawm xav tias lawv muaj peev xwm lawm, tias lawv yog cov neeg muaj meej mom thiab muaj nqis lawm, thiab tias lawv yog cov txawj ua lawm. Txawm lawv yuav tshwj xeeb npaum li cas los xij, lawv sawv daws puav leej xav sau lawv tus kheej los ua li tub neeg nrov koob nrov npe los sis tshwj xeeb, los muab lawv tus kheej tig mus kom zoo li cov neeg ua yeeb yaj kiab, thiab ua kom tib neeg xav tias lawv zoo tiav log thiab tsis muaj chaw thuam li, tsis muaj ib qho uas yuav tsuas li; raws li qhov lwm tus pom mas, lawv xav kom los ua tus nrov koob nrov npe, muaj hwj chim, los sis ib cov neeg zoo, thiab lawv xav kom muaj zog tshaj, mauj peev xwm ua txhua yam, es tsis muaj ib yam dab tsi uas lawv ua tsis tau li. Lawv xav tias yog lawv nrhiav lwm tus qhov kev pab, ces lawv yuav zoo li tus tsis muaj peev xwm, qaug zog, thiab phem dua, thiab tias tib neeg yuav saib tsis taus lawv. Vim qhov laj thawj no, lawv thiaj li xav txav mus tom hau ntej tas li xwb. Thaum hais kom ua ib yam dab tsi mas, ib txhia tib neeg hais tias lawv paub ua lawm, tiam sis tseeb tiag lawv tsis paub ua. Tom qab ntawd, lawv mam li tshawb thiab muab qhov ntawd coj los xyaum seb yuav ua li cas twj ywm, tiam sis tom qab muab qhov ntawd kawm tau ntau hnub lawm los, lawv tseem tsis to taub tias yuav ua li cas li thiab. Thaum nug tias lawv ua li cas rau qhov ntawd, lawv hais tias, ‘Sai sai, sai sai lawm!’ Tiam sis nyob hauv lawv lub siab mas, lawv xav hais tias, ‘Kuv tseem tsis tau paub ua, kuv tsis muaj tswv yim, kuv tsis paub xyov yuav ua li cas! Kuv yuav tsum txhob cia luag paub tias kuv tsis paub ua, kuv yuav tsum ua txuj paub ua txuas ntxiv, kuv cia tib neeg pom tej uas kuv ua tsis tau zoo thiab qhov tsis paub dab tsi tsis tau, kuv cia lawv saib tsis taus kuv tsis tau!’ Qhov teeb meem no yog dab tsi? Qhov no yog ib txoj kev nyob rau hauv lub ntuj tawg uas ua txhua yam los txuag lawv lub ntsej muag xwb. Hom moj yam no dab tsi? Cov tib neeg zoo li no txoj kev khav theeb tsis muaj qhov kawg li, lawv tsis muaj peev xwm ua dab tsi li lawm. Lawv tsis xav kom zoo li lwm tus, lawv tsis xav ua cov tib neeg dog dig, cov tib neeg uas zoo li sawv daws, tiam sis lawv xav ua cov tshaj lij tshaj plaws, cov zoo tshaj plaws, los sis cov txawj ntse. Qhov no yog ib qho teeb meem loj heev! Hais txog tej kev zoo, tej uas ua tsis tau zoo, txoj kev tsis paub dab tsi, kev ruam, thiab tsis muaj kev to taub txog txoj kev ua neej ntawd mas, lawv yuav muab npog tag nrho, thiab tsis cia lwm tus tib neeg pom li, ces tom qab ntawd tas zog muab lawv tus kheej zais xwb. … Cov tib neeg zoo li no tsis yog xav yam tsis tseem ceeb lod? Tsis yog lawv ua npau suav xwb lod? Lawv tsis paub tias lawv tus kheej yog leej twg, thiab lawv tsis paub tias yuav ua neej li ib txwm ua li cas. Lawv yeej tsis tau ua zoo li cov tib neeg uas siv tau ib zaug li. Yog koj ua npau suav nruab hnub, lam ua kom dhau xwb es tsis ua ib yam dab tsi tiag tiag li, pheej ua raws li koj tus kheej txoj kev xav hauv nruab siab xwb, ces qhov no yog teeb meem. Txoj kev hauv lub neej uas koj xaiv ntawd tsis yog lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsib Tug Yam Ntxwv Uas Yuav Tsum Muaj Thiaj Li Taug Tau Txoj Kev Yog Mus Rau Txoj Kev Ntseeg Vajtswv). Qhov ua tib zoo xav txog qhov no ua rau kuv to taub me ntsis txog kuv tus yam ntxwv lawm. Kuv tau xav txog kuv tus kheej ntau dhau lawm, xav hais tias qhov raug xaiv los ua tus thawj coj pab pawg ntawd mas txhais tau hais tias kuv muaj ib lub peev xwm zoo thiab muaj cuab kav ua tau hauj lwm. Thaum kuv pom kuv tus kheej li ntawd lawm, kuv txawm pib mob siab txog qhov uas txhua tus xav txog kuv, thiab kuv xav ua pov thawj qhia tias kuv ua tau txoj hauj lwm sai li sai tau. Yog li ntawd, thaum muaj teeb meem thiab kev nyuaj tuaj nyob rau hauv kuv tes dej num, kuv cia li muab tsis tau tej teeb meem ntawd coj los hais tawm li, thiab pheej txhawj tsam tib neeg yuav pom tias kuv zoo li cas, yuav hais tias kuv tsis muaj peev xwm thiab ua tsis tau txoj hauj lwm ntawd. Ces kuv txawm pib ua txuj, tsis hais dab tsi li thaum muaj teeb meem tuaj thiab kuv daws kuv lawm xwb. Qhov ntawd ua rau saib xyuas tsis tau ntau qhov teeb meem hauv kuv tes dej num, uas ua rau peb tes hauj lwm nres thiab cuam tshuam rau kuv tus kheej tus yam ntxwv. Kuv txoj kev xav thiaj li pom tsis tseeb, thiab pib paub tsis meej txog txhua yam uas kuv to taub yav dhau los lawm. Kuv haj tseem pheej ua xyem xyav txog kuv tej lus qhia nyob rau hauv tej rooj sib txoos ua ke thiab, ntshai tsam txhua tus yuav saib tsis taus kuv yog qhov ntawd tsis zoo. Kuv mloog zoo li ua sab twg los tsis zoo li lawm. Kuv mam li ras dheev hais tias tag nrho tej no puav leej yog kuv txoj kev ua txhaum xwb. Kuv khav theeb heev thiab tsis muaj qab hau li, thiab daws tsis tau kuv tus kheej tej tsis zoo thiab tej ua tsis tau zoo kom zoo li. Kuv pheej ua txuj kom lwm tus thiaj li yuav hwm kuv xwb. Tseeb tiag, tes dej num ntawd yog ib lub hwv tsam uas Vajtswv lub tsev muab rau kuv los cob qhia kuv tus kheej xwb, tiam sis kuv cia li ua tes dej num ntawd yam li kuv to taub qhov tseeb los sis ua tau txoj hauj lwm ntawd zoo. Kuv nyuam qhuav muaj peev xwm me ntsis los txais qhov tseeb xwb, tiam sis muaj ntau yam uas kuv tsis to taub thiab tsis muaj kev paub txog kuv tus kheej li. Yeej tsis muaj ib yam dab tsi tshwj xeeb txog kuv hlo li, tiam sis kuv muab kuv tus kheej saib tseem ceeb heev, ua txuj ua tus muaj vaj huam siab, ua tus uas to taub qhov tseeb. Kuv muab kuv tus kheej ntaus nqi siab dhau lawm! Kuv yuav tsum txo hwj chim thiab ua kuv tes dej num, nug lwm tus thaum kuv tsis to taub qee yam xwb, es thiaj li yog tib txoj kev xyaum ua uas zoo li muaj tiag thiab muaj qab hau.
Kuv nyeem ib zaj lus ntawm Vajtswv cov lus uas qhia qee yam kev coj ua uas muaj qab hau. Vajtswv hais tias, “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj saw hlau khi los sis tsis muaj kev mob siab, thiab koj yuav ua neej nyob rau hauv txoj kev kaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Qhov ua tib zoo xav txog qhov no pab kuv ras dheev hais tias yuav kom tau so thiab tsis ntxhov siab nyob rau hauv kuv tes dej num mas, thawj kauj ruam yog los xyaum qhib siab txog tej uas kuv ua tsis tau zoo thiab tsis txhob ua txuj lawm. Kuv yuav tsum xyaum ua raws qhov tseeb thiab ua ib tug neeg coj ncaj. Kuv tsuas yog ib tug neeg qias vuab tsuab uas tsis tshua to taub qhov tseeb xwb, yog li ntawd thiaj li muaj ntau qhov teeb meem uas kuv tsis tuaj yeem to taub tag nrho. Qhov ntawd tsuas yog yam dog dig xwb. Tsis tas yuav ua txuj thiab npog ib yam dab tsi txhawm rau kuv tus kheej tus yam ntxwv li. Yog kuv muaj lus nug kuv yuav tsum tso kuv txoj kev khav theeb tseg, thiab qhib siab lug nrhiav txoj kev coj qhia thiab qhia txog tej lus nug ntawd; qhov no xwb thiaj li yog tib txoj kev los so nyob rau hauv kuv tes dej num. Qhov ras dheev no ua rau kuv lub siab kaj thiab kuv pib mob siab rau txoj kev xyaum ua li no lawm. Thaum kuv tsis ruaj siab txog qee yam, kuv cia li nug kiag txog qhov ntawd, thiab thaum kuv qhia kuv txoj kev xav, kuv hais yam kuv xav tiag tiag thiab tsuas qhia txog yam kuv paub xwb. Thaum kuv xyaum ua li no, kuv thiaj li maj mam pib to taub qee yam uas kuv yeej tsis tau to taub dua los li, thiab kuv muaj peev xwm tshawb pom thiab kho tau tej uas yuam kev nyob rau hauv kuv tes dej num lawm. Kuv kuj muaj kev to taub zoo dua txog tej uas kuv ua tsis tau zoo lawm thiab. Thaum kawg kuv mam li ras dheev hais tias qhov kuv zoo li ntawd yog ib yam zoo, tias qhov ntawd pab kom to taub tej hauv paus ntsiab lus ntawm qhov tseeb thiab tshawb pom kuv tus kheej tej kev ua tsis zoo. Thaum no kuv hnov muaj kev thaj yeeb dua, thiab tom qab ntawd kuv muaj peev xwm ua kuv tes dej num li qub lawm.
Tsis ntev tom qab ntawd, cov pab pawg uas kuv saib xyuas ntawd mas ua tau zoo heev nyob rau hauv pawg ntseeg lub neej, ces cov nus thiab cov viv ncaus xav tuaj qhia kuv txog lawv tej teeb meem. Tiam sis tos nco xwb, kuv twb pib mob siab rau yam uas tib neeg xav txog kuv dua lawm thiab. Muaj ib zaug nyob rau ntawm cov neeg ua hauj lwm ua ke ib lub rooj sib tham, kuv tus thawj coj muab qee yam teeb meem uas tau tshwm sim nyob rau ntawm peb pawg ntseeg coj los hais tawm, thiab nug peb seb peb xav li cas. Kuv thiaj li xav hais tias, “Muaj coob tus nus thiab viv ncaus nyob rau ntawm no, es yog kuv hais tau qee qhov kev paub tob uas tshwj xeeb tawm los, ntshe qhov ntawd yuav qhia tias kuv muaj peev xwm npaum li cas.” Tiam sis tom qab xav tau ntev ntev thiab ua tib zoo xav lawm, los kuv tseem tsis nkag siab txog tej teeb meem ntawd li thiab. Kiag thaum ntawd, kuv tus thawj coj nug kuv seb kuv xav li cas. Kuv txawm hais lus daig duj dheev ntev ntev, ces cia li qhia ib yam uas pom tsis meej li xwb. Tsis ntev tom qab ntawd, muaj ob tug viv ncaus txawm qhia nkawv txoj kev xav, thiab nkawv cov lus qhia txawv kuv cov. Yam nkawv hais ntawd mas muaj laj thawj zoo heev, thiab tus thawj coj ntawd pom zoo nrog nkawv. Kuv chim siab kiag tam sim ntawd, xav hais tias tsis yog kuv tsuas ua tsis tau kom saib zoo li kuv tus kheej zoo xwb, tiam sis kuv haj tseem ua rau kuv tus kheej txaj muag thiab. Kuv tus thawj coj yuav xav li cas rau kuv? Ntshe nws yuav xav hais tias kuv tsis muaj ib qho kev paub tob txog tej yam yooj yooj yim zoo li no, tias kuv tsis tau loj hlob kiag li no pob? Ob peb hnub tom qab ntawd, muaj qee qhov teeb meem tshwm tuaj nyob rau hauv txhua txhua pab pawg uas kuv saib xyuas. Kuv tsis to taub tej teeb meem ntawd, yog li ntawd kuv yuav tsum tau nrhiav kev pab kiag tam sim ntawd. Tiam sis tom qab ntawd kuv xav hais tias, yog kuv nug tag nrho cov lus nug ntawd, qhov ntawd yuav tsis zoo li kuv tsis muaj peev xwm ua kuv tes hauj lwm lod? Qhov ntawd yuav tsis ua rau tus yam ntxwv zoo uas kuv tau tsim lawm puas tsuaj lod? Tiam sis, kuv paub hais tias tej teeb meem uas daws tsis tau ntawd yuav thaiv peb tes hauj lwm, yog li ntawd kuv thiaj li tawm ib lub tswv yim uas muab sib faib xws li: Kuv yuav muab kuv cov lus nug faib coj mus nug tus ub tus no, kom thiaj li yuav daws tau tej teeb meem ntawd tiam sis ho saib zoo li kuv tsis nug ntau thiab tsis paub ib yam dab tsi li. Thaum kuv ua txuj li no, kuv tus yam ntxwv phem zuj zus. Kuv txoj kev xav pom tsis tseeb zuj zus thiab kuv pib muaj teeb meem txog ntau tsav ntau yam. Ces kuv mam li rov tig xav thiaj li pom hais tias qhov uas kuv tsis muaj kev paub tob txog tej yam uas kuv paub yav dhau los ntawd, yuav tsum yog muaj ib qho teeb meem txog kuv tus yam ntxwv lawm xwb. Yog li ntawd kuv thiaj li los rau ntawm Vajtswv lub xub ntiag los thov Vajtswv hais tias, “Vajtswv, kuv muaj teeb meem tiag tiag li lawm, tiam sis kuv tsis muaj cuab kav coj ncaj thiab qhia tawm txog tej uas kuv ua tsis tau zoo. Kuv pheej xav ua qhov loj xwb. Vim li cas thaum kuv tsis to taub qee yam kuv yuav nug nyuaj ua luaj li? Nws cuag nkaus li kuv ob daim di ncauj raug muab nplaum lawm. Kev ua kuv tes dej num li no mas sab heev. Thov coj kuv kev kom paub kuv txoj kev qias vuab tsuab thiab kom hloov pauv.”
Tom qab ntawd kuv nyeem ob peb zaj lus ntawm Vajtswv cov lus uas muab kuv tus yam ntxwv qhia tshwm tau zoo heev. Vajtswv Tus Uas Muaj Hwj Chim Loj Kawg Nkaus hais tias, “Cov tib neeg qias vuab tsuab mas txawj zais lawv tus kheej heev. Txawm lawv yuav ua dab tsi los sis lawv yuav nthuav qhov kev qias vuab tsuab dab tsi tawm los xij, lawv yuav tsum tau zais lawv tus kheej tas li xwb. Yog muaj ib yam dab tsi yuam kev los sis lawv ua ib yam dab tsi yuam kev lawm, mas lawv xav muab liam rau lwm tus xwb. Lawv xav tau qhov zoo rau lawv tus kheej, hos muab qhov tsis zoo liam rau lwm tus. Qhov kev zais uas zoo li no nyob rau hauv lub neej tiag tiag ntawd tsis muaj ntau lod? Muaj ntau heev. Kev ua yuam kev los sis kev zais yus tus kheej: ob qho no qhov twg muaj feem ntsig txog rau tus moj yam? Kev zais yog ib qho teeb meem ntawm tus moj yam, qhov kev zais ntawd muaj feem xyuam rau tus moj yam khav theeb, kev phem, thiab kev dag; Vajtswv tsis nyiam qhov kev zais ntawd kiag li. … Yog koj tsis ua txuj los sis tsis hle koj tus kheej li ub li no, yog koj lees tej uas koj ua yuam kev, ces txhua tus yuav hais tias koj coj ncaj thiab ntse. Yog li ntawd dab tsi ua rau koj ntse? Txhua tus puav leej ua yuam kev. Txhua tus puav leej muaj tej uas ua yuam kev thiab tej uas ua tsis tau zoo. Thiab tseeb tiag lawm, txhua tus puav leej muaj tib tug moj yam qias vuab tsuab xwb. Txhob xav hais tias koj tus kheej zoo tshaj, zoo tshaj plaws, thiab siab zoo tshaj lwm tus; yeej tsis yog li ntawd. Thaum koj paub tib neeg tej moj yam qias vuab tsuab thiab lub ntsiab tseeb thiab lub ntsej muag tseeb ntawm lawv txoj kev qias vuab tsuab lawm, koj yuav tsis ua txhua yam los npog tej uas koj tus kheej ua yuam kev, thiab koj yuav tsis hais qhov lwm tus tib neeg ua yuam kev ntawd los tawm tsam lawv lawm—koj yuav muaj peev xwm daws tau ob qho no yam yog heev. Tsuas yog thaum ntawd xwb koj thiaj li yuav paub tseeb thiab tsis ua tej yam ruam ruam, uas yuav ua rau koj ntse. Cov uas tsis ntse yog cov tib neeg ruam, thiab lawv pheej tham txog tej uas lawv ua yuam kev me me xwb tiam sis lawv ua zais ntshis kom tib neeg txhob paub. Qhov no pom tau hais tias qias neeg heev. Tseeb tiag, yam uas koj tab tom ua ntawd lwm tus tib neeg twb pom tseeb kiag tam sim ntawd lawm, tiam sis koj yeej tseem ua yam tsis paub txaj muag li. Nyob li ntawm lwm tus mas, koj yog ib tug tib neeg ruam xwb. Qhov no tsis yog ruam lod? Yog tshaj plaws. Cov tib neeg ruam tsis muaj ib lub tswv yim li. Txawm lawv yuav hnov tej lus qhuab qhia ntau npaum li cas los, lawv tseem tsis to taub qhov tseeb los sis tsis pom ib yam dab tsi tias nws zoo li cas tiag tiag. Lawv pheej qhuas tias lawv tus kheej coj ncaj xwb, lawv xav hais tias lawv txawv lwm tus thiab txaus hwm dua; qhov no yog kev khav theeb thiab kev qhuas tias lawv tus kheej coj ncaj, qhov no yog kev ruam. Cov tib neeg ruam tsis muaj kev to taub txog sab ntsujplig, puas yog? Qhov uas koj ruam thiab tsis ntse ntawd yog qhov uas koj tsis muaj kev to taub txog sab ntsujplig, thiab tsis to taub qhov tseeb yam yooj yooj yim. Qhov no yog qhov muaj tseeb txog qhov xwm txheej ntawd” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Cov Hauv Paus Ntsiab Lus Uas Yus Yuav Tsum Muab Los Cob Qhia Yus Txoj Kev Coj). “Thaum tib neeg pheej ua txuj, pheej npog lawv tus kheej, pheej ua zoo li zoo tshaj lwm tus kom lwm tus thiaj li qhuas lawv, thiab tsis pom tej uas lawv ua yuam kev los sis tej uas ua tsis tau zoo, thaum lawv pheej ua txhua yam los qhia sab uas zoo tshaj plaws ntawm lawv rau tib neeg ntawd, qhov ntawd yog hom moj yam dab tsi? Qhov no yog kev khav theeb, kev dag, hais lus zoo tab sis siab phem, yog Ntxwgnyoog tus moj yam, yog ib yam uas lim hiam. Saib cov tib neeg uas phem seb ma: Txawm lawv yuav sib tawm tsam, sib cav sib ceg, los sis sib tua nyob rau hauv qhov tsaus ntuj los xij, lawv tsis pub leej twg muab lawv qhia tawm los sis qhia tshwm li. Lawv ntshai tsam tib neeg yuav pom lawv lub ntsej muag dab, yog li ntawd lawv thiaj li ua txhua yam li lawv ua tau los npog lub ntsej muag dab ntawd. Nyob rau ntawm tshav puam mas, lawv ua kom zoo tshaj plaws los npog lawv tus kheej, lawv hais tias lawv hlub tib neeg npaum li cas, tias tib neeg zoo, muaj koob meej thiab yog npaum li cas. Qhov no yog Ntxwgnyoog tus yam ntxwv. Qhov uas tseem ceeb tshaj plaws ntawm Ntxwgnyoog tus yam ntxwv ces yog kev siv tswv yim dag thiab kev dag ntxias xwb. Yog li ntawd lub hom phiaj ntawm qhov kev siv tswv yim dag thiab kev dag ntxias no yog dab tsi? Yog los dag tib neeg, los cheem lawv kom txhob pom nws lub ntsiab tseeb thiab nws tus yam ntxwv tiag tiag, thiab kom tau raws li lub hom phiaj uas yog kom nws txoj cai nyob ntev mus ntxiv xwb. Tej zaum cov tib neeg dog dig yuav tsis muaj lub hwj chim thiab lub meej mom zoo li no, tiam sis lawv los kuj xav ua kom lwm tus nyiam lawv, thiab kom tib neeg hwm lawv, thiab txhawb lawv rau lub meej mom siab nyob rau hauv tib neeg lub siab thiab. Qhov no yog ib tug moj yam qias vuab tsuab, thiab yog tib neeg tsis to taub qhov tseeb, ces lawv yuav tsis muaj peev xwm paub qhov no. Tej moj yam qias vuab tsuab mas yog yam uas paub nyuaj tshaj plaws txhua yam huv si: Qhov paub tej uas koj tus kheej ua yuam kev thiab tej uas ua tsis tau zoo ntawd mas yooj yim, tiam sis qhov paub koj tus kheej tus moj yam qias vuab tsuab mas tsis yooj yim. Cov tib neeg uas tsis paub lawv tus kheej yeej tsis tham txog lawv tus yam ntxwv uas qias vuab tsuab li—lawv pheej xav hais tias lawv tsis ua li cas li. Yog li ntawd tos nco xwb, lawv twb pib muaj plhus hais tias: ‘Txij thaum kuv ntseeg los, kuv tau raug kev tsim txom ntau heev thiab raug kev txom nyem ntau heev lawm. Nej puas paub tias kuv kov yeej txhua yam ntawd li cas?’ Qhov no puas yog ib tug moj yam khav theeb? Qhov uas ua rau lawv muaj siab muab lawv tus kheej qhia tawm li no yog dab tsi? (Yog kom tib neeg qhuas lawv.) Qhov uas ua rau lawv muaj siab ua kom tib neeg qhuas lawv ntawd yog dab tsi? (Yog kom tau koob meej nyob rau hauv cov tib neeg zoo li no lub siab.) Thaum koj tau koob meej nyob rau hauv lwm tus lub siab lawm, ces thaum lawv nrog koj ua ke, lawv muab koj saib rau lub sam xeeb, thiab tshwj xeeb yog paub cai thaum lawv nrog koj tham. Lawv cia siab rau koj tas li, lawv cia koj mus ua ntej txog txhua yam tas li, lawv zam kev rau koj, thiab qhuas koj thiab mloog koj lus. Hais txog txhua yam mas, lawv tuaj nrhiav koj thiab cia koj txiav txim siab xwb. Yog li ntawd koj thiaj li muaj kev xyiv fab los ntawm qhov no—koj mloog zoo li koj muaj zog dua thiab zoo dua lwm tus. Txhua tus puav leej nyiam qhov no. Qhov no yog qhov uas hnov zoo li muaj lub meej mom nyob rau hauv qee tus neeg lub siab; tib neeg xav tau qhov no. Vim li no tib neeg thiaj li sib tw kom tau lub meej mom, thiab txhua tus puav leej xav kom tau lub meej mom nyob rau hauv lwm tus lub siab, kom lwm tus hwm thiab pe hawm. Yog lawv tsis tau txoj kev xyiv fab zoo li no los ntawm lub meej mom, ces lawv yuav tsis tshawb nrhiav lub meej mom ntawd” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Cov Hauv Paus Ntsiab Lus Uas Yus Yuav Tsum Muab Los Cob Qhia Yus Txoj Kev Coj). Qhov xav txog Vajtswv cov lus ua rau kuv pom tau hais tias nyob rau ntawm txoj kev dag thiab kev ua yuam kev ntawd mas, txoj kev dag yog qhov hnyav dua ntawm ob qho ntawd. Tsis muaj leej twg zoo tiav log li, yog li ntawd qhov ntsib teeb meem thiab ua yuam kev nyob rau hauv koj tes dej num ntawd yeej ib txwm muaj. Tiam sis yam uas txhawb txoj kev dag ntawd yog tus moj yam phem ntawm kev khav theeb, kev ntxias dag, thiab kev phem. Qhov kev pheej zais koj tej kev ua tsis tau kom zoo tiav log thiab tej kev ua tsis tau zoo, es tsuas cia tib neeg pom koj qhov zoo xwb kom lawv thiaj li yuav hwm koj thiab qhuas koj ntawd mas Vajtswv haj yam tsis nyiam kiag li. Ib tug neeg ntse tiag tiag ntawd tuaj yeem kho tau tej uas lawv ua tsis tau zoo, npaj lawv tus kheej kom muaj qhov tseeb, thiab ua kom muaj yam lawv tsis muaj. Ua li ntawd lawv thiaj li loj hlob taus. Tiam sis cov tib neeg ruam, tsis paub ib yam dab tsi uas tsis muaj kev paub txog lawv tus kheej yeej tsis kam lees tej uas lawv tus kheej ua tsis tau zoo, thiab lawv haj tseem ua txuj thiab, uas txhais tau hais tias qee qhov teeb meem yeej daws tsis tau li, thiab lawv yeej tsis loj hlob nyob rau hauv lub neej txoj sia li. Qhov rov qab tig xav txog kuv tus cwj pwm ntawd ua rau kuv ras dheev hais tias kuv yog ib tug ntawm cov neeg ruam khav theeb uas raug Vajtswv muab qhia tshwm lawm ntag. Thaum kuv pib tau txais qee qhov txiaj ntsim nyob rau hauv kuv tes dej num lawm, kuv mloog zoo li kuv yeej tsis phem kiag li, thiab tias kuv ua tau kuv tes dej num uas yog tus thawj coj ntawm pab pawg. Thiab, kuv kuj muaj peev xwm los daws tau teeb meem thiab. Vim li no, es kuv thiaj li txhawb thiab xav ntau yam heev txog kuv tus kheej. Yog li ntawd, thaum kuv ntsib tej yam uas kuv tsis paub xyov yuav ua li cas, ces kuv txawm ceev faj thiab txiav txim siab tsis tau, txhawj tsam kuv hais tau yam yuam kev thiab ua rau kuv tus yam ntxwv zoo puas tsuaj. Ces kuv txiav txim siab los nthuav tawm txog ob peb qho kev xav thiab nug ob peb lo lus nug. Tab txawm thaum kuv nrhiav kev pab los xij, kuv yeej xaiv cov lus nug uas nyuaj tshaj, kom qhia tau kuv lub peev xwm, tsis xav kom txhua tus pom tej uas kuv ua tsis tau zoo li. Kuv haj tseem siv hlwb, muab cov lus nug ntawd faib coj mus nug tib neeg kom lawv thiaj li yuav tsis pom tias kuv zoo li cas thiab. Kuv mas khav theeb thiab txawj ntxias tiag tiag, thiab tsis muaj kev paub txog kuv tus kheej kiag li. Kuv ua txuj ua ntau yam kom tib neeg thiaj li yuav hwm kuv. Kuv yog ib tug neeg ruam, ntxim ntxub rau Vajtswv, thiab qias lwm tus tib neeg heev li. Kuv zais kuv tej kev tsis zoo los tiv thaiv kuv lub npe thiab lub meej mom, ua rau muaj teeb meem nyob rau hauv kuv tes dej num uas daws tsis tau li. Kuv tab tom muab tes hauj lwm ntawm Vajtswv lub tsev tuav cia xwb. Kuv xav li cas? Kuv mas ntxim ntxub thiab phem heev. Kuv tuav tau kuv txoj hauj lwm rau ib lub sij hawm luv luv los ntawm txoj kev ua txuj xwb, tiam sis Vajtswv soj ntsuam txhua yam, thiab tsis ntev tom qab ntawd kuv yuav raug Vajtswv muab qhia tshwm thiab muab tshem tawm mus vim txoj kev dag Nws thiab vim txoj kev ua rau pawg ntseeg tes hauj lwm qeeb. Qhov ntawd qhia rau kuv tias cov tawm tsam Khetos saib lub meej mom muaj nqis heev thiab haj tseem tsis txuag tej kev ntshaw ntawm Vajtswv lub tsev txhawm rau lawv tus kheej lub meej mom li thiab. Qhov sib txawv ntawm kuv tus moj yam thiab tej kev xav txog kev caum, thiab tus tawm tsam Khetos cov yog dab tsi? Lub meej mom puas muaj txiaj ntsim rau kuv kiag li? Nws ua rau kuv tsis kam los lees paub los sis daws kuv tej kev tsis zoo li, thiab kuv plam kuv qhov laj thawj lawm. Kuv tsis xav nrhiav thaum kuv ntsib teeb meem, tiam sis ho ua txuj thiab txawj ntxias zuj zus tuaj lawm. Vim li ntawd kuv ces kawg taug tus tawm tsam Khetos txoj kev, thiab raug Vajtswv ntxub thiab muab tshem tawm mus xwb. Qhov ntawd yuav rhuav tshem tes hauj lwm ntawm Vajtswv lub tsev thiab ua rau kuv puas tsuaj. Thaum ntawd kuv mam li ras dheev hais tias qhov taug txoj kev ntawd mas phom sij npaum li cas. Nws yog ib qho kev ceeb toom tias kuv ua tsis tau kuv tes dej num li ntawd mus ntxiv lawm.
Kuv nyeem ntau txog Vajtswv cov lus uas muaj ib txoj kev xyaum ua, thiab qhov ntawd haj yam ua rau kuv muaj kev thaj yeeb tshaj thiab. Vajtswv hais tias, “Ib txhia tib neeg mas pawg ntseeg muab nce qib thiab cob qhia, tau txais hwv tsam zoo los xyaum ua. Qhov no yog qee yam uas zoo. Tuaj yeem hais tau hais tias Vajtswv txhawb thiab hlub lawv. Yog li ntawd, lawv yuav tsum ua lawv tes dej num li cas? Thawj lub hauv paus ntsiab lus uas lawv yuav tsum tau ua yog kom to taub qhov tseeb thaum lawv tsis to taub qhov tseeb, lawv yuav tsum nrhiav qhov tseeb, thiab yog lawv yeej tseem tsis to taub tom qab lawv tus kheej tshawb nrhiav lawm, lawv tuaj yeem nrhiav qee tus neeg uas to taub qhov tseeb los qhia thiab pab lawv, uas yuav ua rau daws tau qhov teeb meem ntawd sai dua thiab ncav sij hawm dua. Yog koj tus kheej tsuas mob siab rau qhov siv sij hawm nyeem Vajtswv cov lus kom ntau ntxiv, thiab mob siab rau qhov siv sij hawm xav txog cov lus no kom ntau ntxiv, kom to taub qhov tseeb thiab daws tau teeb meem xwb, ces qhov no qeeb dhau lawm; raws li luag hais tias, ‘Maj mam daws yuav pab tsis tau yam uas xav tau sai.’ Yog thaum hais txog qhov tseeb, koj xav kom nce qib sai, ces koj yuav tsum xyaum seb yuav koom tes nrog lwm tus kom sib haum xeeb li cas, thiab nug kom ntau thiab tshawb nrhiav kom ntau ntxiv. Tsuas yog thaum ntawd xwb koj lub neej txoj sia thiaj li yuav loj hlob sai, thiab koj thiaj li yuav muaj peev xwm daws tau teeb meem tam sim ntawd, yam tsis ncua sij hawm li. Vim tias koj nyuam qhuav tau nce qib thiab tseem nyob rau hauv qhov kev sim ua xwb, thiab tsis to taub qhov tseeb los sis muaj qhov tseeb qhov muaj tiag—vim tias koj tseem tsis muaj lub siab no—tsis txhob xav tias qhov koj tau nce qib ntawd txhais hais tias koj muaj qhov tseeb qhov muaj tiag lawm; tsis yog li no. Nws tsuas yog vim koj muaj ib txoj kev paub leg tes hauj lwm thiab muaj lub peev xwm ua ib tug thawj coj xwb koj thiaj li tau nce qib thiab muaj neeg cob qhia. Koj yuav tsum muaj qhov laj thawj li no” (Txoj Lus, Phau 5. Tej Luag Hauj Lwm ntawm Cov Thawj Coj thiab Cov Neeg Ua Hauj Lwm. Tej Luag Hauj Lwm ntawm Cov Thawj Coj thiab Cov Neeg Ua Hauj Lwm (5)). Kuv ua tib zoo xav txog qhov no thiab pom hais tias Vajtswv lub tsev txhawb thiab cob qhia tib neeg uas yog muab ib lub cib fim rau lawv los xyaum ua raws. Tsis tas li ntawd xwb qhov ntawd txhais tau hais tias lawv to taub qhov tseeb, daws tau txhua qhov teeb meem, los sis phim rau Vajtswv siv. Thoob plaws lawv txoj kev xyaum ua raws ntawd lawv yuav ntsib txhua yam teeb meem tiag tiag, thiab yog lawv pheej nrhiav tas li thiab sib qhia, ces lawv yuav maj mam pib to taub ntau kis sib txawv txog tej hauv paus ntsiab lus. Thaum no, lawv mam li muaj peev xwm daws teeb meem thiab ua tau lawv tes dej num zoo. Kuv paub tias kuv yuav tsum tau ua tib zoo daws kuv qhov tsis zoo thiab paub tias kuv yog leej twg, nrhiav qhov tseeb ntxiv, tham thiab qhia rau lwm tus ntxiv thaum muaj teeb meem tshwm tuaj, thiab ua txhua yam los daws qhov ntawd. Ces, tab txawm muaj ib hnub es pom tseeb tias kuv lub peev xwm yeej zoo tsis txaus tiag, tias kuv ua tsis tau tes dej num no, los yam tsawg kawg kuv lub siab thiaj li yuav pom tseeb. Kuv hnov ntaug lawm ntau thaum kuv xav li ntawd lawm. Kuv ua txuj tsis tau ntxiv mus lawm, tiam sis kuv yuav tsum tau coj ncaj thiab daws kuv qhov tsis zoo thiab tej uas ua tsis tau zoo ncaj qha xwb.
Nyob rau hauv peb pab pawg txoj kev sib tham tom qab ntawd, kuv qhia kuv tus kheej tej kev xav yam tsis zais lus li. Kuv me ntsis ua xyem xyav nyob rau thaum xub thawj, txhawj tsam kuv hais yuam kev ces ua rau zoo li kuv muaj ib txoj kev to taub ntiav ntiav thiab tsis muaj peev xwm. Tshwj xeeb yog thaum muaj tej teeb meem uas kuv to taub tsis tag, ces tej kev xav uas kuv qhia tsis meej, thiab tom qab kuv tham lus tag lawm kuv pib hnyav siab, xav paub seb txhua tus puas yuav pom tias kuv zoo li cas. Tiam sis tom qab ntawd kuv hais rau kuv tus kheej kom nco tias qhov no yeej yog kuv qib tiag tiag, thiab txawm lawv saib tsis taus kuv los tsis ua cas. Qhov uas tseem ceeb ces yog ua ib tug neeg coj ncaj nyob rau ntawm Vajtswv lub xub ntiag xwb, thiab nws yog kuv tes dej num uas los nthuav kuv tej kev xav tawm thiab koom nrog tej kev sib tham. Qhov ntawd xwb thiaj li yog tib txoj kev uas nyob kaj siab lug. Tom qab ntawd thaum kuv muaj lus nug nyob rau hauv kuv tes dej num, kuv tau tawm mus nug lwm tus tej kev xav. Twb tau ib ntus lawm los txhua zaus kuv yeej tseem txhawj tsam lawv saib tsis taus kuv, tiam sis thaum kuv paub tias kev zais tej uas kuv ua tsis tau zoo los tiv thaiv kuv txoj kev khav theeb ntawd yuav ua rau tes hauj lwm ntawm Vajtswv lub tsev puas tsuaj, kuv tau siv zog tig tawm ntawm qhov kev ntshaw ntawd thiab nrhiav kev pab. Thaum kuv ua li ntawd lawm, kuv txawm pib to taub tej yam uas kuv tsis to taub yav dhau los, thiab kuv hnov muaj kev thaj yeeb nyab xeeb dua. Qee zaus kuv cov nus thiab cov viv ncaus muaj ib txoj kev to taub uas yog dua kuv, ces kuv txawm pib xav paub seb txhua tus puas xav hais tias kuv tsis zoo. Tiam sis kuv pom tau hais tias qhov saib txhua yam li ntawd yog ib txoj kev tsis zoo. Kuv yuav tsum tau kawm los ntawm tej uas lwm tus ua tau zoo los pab txhawb rau tej uas kuv ua tsis tau zoo. Qhov ntawd tsis yog ib qho phaj tshab lod? Thaum kuv xav txog qhov ntawd li ntawd kuv tsis chim siab lawm, thiab sij hawm dhau mus kuv pib hnov muaj kev ywj pheej zuj zus lawm. Kuv ua tsaug ntau ntau rau Vajtswv txoj kev coj qhia uas cia kuv paub tias kev coj ncaj muaj kev ywj pheej npaum li cas, thiab tam sim no kuv muaj kev ntseeg ntxiv los muab Vajtswv cov lus coj los xyaum ua raws lawm.
