3. Thaum Kawg Thiaj Li Pom Kuv Txoj Kev Txawj Ntxias Dag

Tsaib no, kuv tau ywg dej cov ntseeg tshiab nyob rau hauv pawg ntseeg. Thaum lub sij hawm ntawd, kuv yuav tsum tau xaiv qee cov tib neeg uas yuav cob qhia tau thiab siv kuv lub sij hawm thiab lub zog mus txhawb nqa lawm. Qhov ntawd mas nyuaj heev rau kuv. Vim muaj ib qho, uas kuv tsis paub tias xyov yuav cob qhia cov neeg twg kom raws li lawv tej xwm txheej tiag, ces thiaj li txiav txim yam khav theeb hlo tias lawv tsis zoo txaus. Ntxiv rau qhov ntawd, kuv tsis xav siv tag nrho lub zog thiab tiv ib qho kev txom nyem zoo li ntawd. Kuv hnov zoo li qhov ntawd mas nkim zog heev li. Yog li ntawd, kuv yeej tsis cob qhia ib tug los tshiab twg li.

Tab sis yog kuv tsis cob qhia lawv, tej zaum kuv tus thawj saib xyuas yuav hais tias kuv xav kom lawv paub ntau heev dhau lawm ces thiaj li tsis quav ntsej cob qhia lawv, los sis tias kuv mas tsis muaj peev xwm es thiaj li cob qhia tsis tau lawv. Kuv nyob rau qhov xwm txheej uas nyuaj heev, ces thiaj li tsis paub xyov yuav ua li cas li lawm. Kuv xav tias tej zaum kuv yuav tau nug kuv tus thawj saib xyuas thiab cia nws txiav txim siab. Ces yog tom qab ntawd es qhov ntawd tsis mus zoo, ces qhov ntawd thiaj li tsis yog kuv lub luag hauj lwm tag nrho xwb ces kuv thiaj li yuav tsis raug qhuab ntuas yog hais tias kuv txiav txim siab yuam kev. Yog li ntawd thaum kuv sib tham nrog kuv tus thawj saib xyuas, ces kuv thiaj li tsis qhia nws ncaj qha tias kuv tsis yog ib tug txiav txim uas zoo rau tib neeg thiab tsis paub tias xyov yuav ua li cas, tiam sis kuv pheej tas zog hais txog cov los tshiab ntawd tej xwm txheej thiab tej kev cov nyom tias: Tus ub tus no muaj is-taws-nev tsis zoo thiab sib txuas lus nyuaj heev, tus ub tus no mas niam ua hauj lwm khwv heev, thiab tus ub tus no mas niam tsis tham ntau thaum nyob rau tej rooj sib txoos ua ke li…. Ces, ntshai tsam nws yuav hais tias kuv cais tib neeg, kuv zam tsis hais lub ntsiab, hais tias, “Tab sis lawv rau siab tuaj koom tej rooj sib txoos ua ke, thiab rau siab rau lawv txoj kev nrhiav, yog li ntawd kuv thiaj li tas zog cob qhia lawv kom tau zoo tshaj plaws.” Thaum xub thawj kuv xav tias ntshe nws yuav qhia kuv tias yuav ua li cas, hais tias tsis tsim nyog siv dag zog los cob qhia lawv, yog li ntawd thiaj li yog nws txoj kev txiav txim siab ces kuv thiaj li tsis tau ris, los sis yuav tsum tau siv tag nrho lub sij hawm ntawd rau lawv. Tab sis ua rau kuv ceeb tag li thaum nws tsis teb kuv li, tab sis tsuas hais hnya zog tias, “Koj hais dab tsi no? Thaum mloog koj tham mus mus los los zoo li ntawd mas sab dhau lawm. Koj yeej ib txwm hais tawm cov los tshiab tej xwm txheej zoo li no tas li. Koj hais tias lawv muaj qee yam teeb meem, yog li ntawd qhov ntawd zoo li tsis tsim nyog cob qhia lawv, ces tom qab ntawd koj ho hais tias koj yuav ua kom zoo tshaj plaws rau lawv. Kuv qhia tsis tau tias xyov koj xav li cas tiag tiag.” Kuv mas chim siab heev li. Kuv xav tias, “Puas yog nws hais tias kuv tham lus zoo li ib tug nab ne? Tus nab yeej tsis nkag ncaj ncaj, tab sis nws nkhaus vaj nkaus vos tag li xwb. Kuv puas phem npaum li ntawd tiag tiag mas?” Nyob rau lub sij hawm ntawd mas kuv tsis paub kuv tus kheej kiag li, kuv tsuas poob siab nthav tias tsam nws chim rau kuv xwb. Kuv tsis paub tias xav txog qhov ntawd mas tsis yog lawm, tias nws yuav tsis hais li ntawd yam tsis muaj qab hau hlo li, tias qhov ntawd yuav tsum qhia tawm txog nws qhov kev ntsib kev pom nrog kuv tiag. Yuav tsum muaj ib qho uas kuv yuav tsum tau kawm los ntawm nws tej lus qhuab ntuas kuv, vim kuv tsis pom kuv tus kheej txoj kev qias vuab tsuab, yog li ntawd qhov nws taw qhia tej ntawd tawm mas muaj txiaj ntsim rau kuv tshaj. Yog li ntawd kuv txawm qhia nws tias, “Kuv tsis pom tej teeb meem uas koj piav qhia ntawd tiag tiag li, tab sis kuv xav lees txais qhov no thiab tig xav txog kuv tus kheej.”

Tom qab ntawd, kuv pheej xav txog qhov nws hais, ces kuv txawm thov Vajtswv thiab thov kom Vajtswv coj kuv kev los paub kuv tus kheej. Kuv nco tau qee yam nyob hauv phau Vajluskub, tias Vajtswv Yehauvas tau nug Ntxwgnyoog tias: “‘Koj mus qhov twg los?’ Ces Ntxwgnyoog txawm teb Yehauvas, thiab hais tias, Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb” (Yauj 1:7). Tom qab ntawd kuv nyeem qhov Vajtswv txheeb xyuas txog qhov Ntxwgnyoog teb. Vajtswv hais tias, “Yog li ntawd, nej xav li cas thaum nej pom Ntxwgnyoog teb li no? (Peb xav tias Ntxwgnyoog ruam, tiam sis kuj yog ib tug txawj dag ntxias thiab.) Nej puas tuaj yeem qhia yam uas kuv tab tom xav? Txhua zaus uas kuv pom Ntxwgnyoog cov lus no, kuv saib zoo li ntxim ntxub heev, vim Ntxwgnyoog hais lus, thiab tiam sis nws cov lus tsis muaj qhov tseeb kiag li. Ntxwgnyoog puas teb Vajtswv cov lus? Tsis teb, cov lus Ntxwgnyoog hais tsis yog lus teb, cov lus ntawd tsis muaj nqis dab tsi li. Lawv tsis yog ib lo lus teb rau Vajtswv lo lus nug. ‘Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb.’ Koj txoj kev nkag siab ntawm cov lus no yog dab tsi? Lo uas Ntxwgnyoog tuaj qhov twg tuaj? Nej puas tau txais ib lo lus teb rau lo lus nug no li? (Tsis tau.) No yog ‘txoj kev txawj ntse’ ntawm Ntxwgnyoog txoj kev txawj dag—tsis cia ib tus neeg twg paub txog lub ntsiab uas nws hais tiag tiag. Thaum tau hnov cov lus no lawm koj tseem tsis tuaj yeem pom yam nws tau hais, txawm tias nws twb tau teb tas lawm. Tab sis Ntxwgnyoog ntseeg tias nws teb tau zoo tshaj plaws. Yog li koj xav li cas? Ntxim ntxub heev? (Yog lawm.) Tam sim no koj pib xav tias txoj kev teb rau cov lus no ntxim ntxub heev. Ntxwgnyoog cov lus muaj ib tug yam ntxwv phem: Qhov Ntxwgnyoog hais ntawd ua rau koj khawb koj lub taub hau, tsis tuaj yeem paub lub ntsiab ntawm nws cov lus. Qee zaum mas Ntxwgnyoog muaj kev txhawb siab thiaj li txhob txwm hais lus, thiab qee zaum mas yog raug tswj hwm los ntawm nws tus yeeb yam, cov lus zoo li no thooj txhij tshwm thiab tawm ncaj qha hauv Ntxwgnyoog lub qhov ncauj tuaj. Ntxwgnyoog tsis siv sij hawm kom ntev los luj cov lus ntawd li; tiam sis, cia li hais kiag cov lus ntawd yam tsis ua twb zoo xav li. Thaum Vajtswv nug tias Ntxwgnyoog mus qhov twg los, ces Ntxwgnyoog txawm teb ob peb lo lus uas tsis meej xwb. Koj yeej xav tsis thoob, yeej tsis paub xyov Ntxwgnyoog los qhov twg los tiag tiag li. Puas muaj nej leej twg hais lus zoo li no? Txoj kev hais li no yuav hais li cas? (Nws yog cov lus uas ua ob siab thiab tsis muaj lo lus teb meej meej.) Peb yuav siv cov lus zoo li cas los qhia txog txoj kev hais lus zoo li no? Nws yog kev ua kom txawv thiab ua kom to taub yuam kev, tsis yog li ntawd lov? Piv txwv tias ib tug neeg twg tsis xav qhia rau lwm tus paub tias nag hmo lawv ua dab tsi. Koj nug lawv tias: ‘Kuv pom koj nag hmo. Koj tau mus qhov twg?’ Lawv tsis qhia koj ncaj qha tias lawv mus qhov twg. Tiam sis, lawv hais tias: ‘Nag hmo yog hnub dab tsi. Cas yuav sab ua luaj li!’ Lawv puas teb koj lo lus nug? Lawv teb los ma, tiam sis lawv tsis teb li qhov koj xav tau. No yog ‘txoj kev ntse’ nyob hauv tib neeg txoj kev hais lus cuav. Koj yuav tsis tuaj yeem paub tias lawv hais li ntawd yog txhais li cas, thiab tsis paub txog lub ntsiab los sis lub hom phiaj ntawm lawv cov lus. Koj tsis paub yam uas lawv xav zam kom dhau vim tias hauv lawv lub siab lawv muaj lawv zaj—qhov no yog tej yam uas tsis txaus ntseeg. Puas muaj ib tug twg ntawm nej cov ko uas kuj hais lus li no thiab? (Muaj.) Yog li nej lub hom phiaj yog dab tsi? Puas yog qee zaum hais los tiv thaiv koj tus kheej txoj kev nyiam, qee zaum los tuav koj tus kheej txoj kev khav theeb, txoj hauj lwm, thiab tus duab, los tiv thaiv txoj kev zais ntawm koj lub neej ntiag tug xwb? Txawm yuav yog hom phiaj twg los xij, koj tsuas tiv thaiv qhov koj nyiam, thiab nrog rau qhov koj yuav tau txiaj ntsig. Qhov no tsis yog tib neeg tus yeeb yam lov?” (Txoj Lus, Phau 2. Hais Txog Qhov Kev Paub Vajtswv. Vajtswv Tus Kheej, tus Uas Tsuas Yog Tib Tug Xwb IV). Kuv pom los ntawm Vajtswv cov lus los tias Ntxwgnyoog ib txwm zais tej kev txhawb siab thiab tej kev ntxias dag nyob rau hauv nws cov lus, kom npog tau nws tej kev txaj muag, es nws thiaj li zam tsis hais lub ntsiab thiab hais tso dag ua si lawm. Qhov no twv nyuaj, thiab tib neeg tsis paub tias nws tab tom ua dab tsi. Kuv paub tias kuv nyiam hais lus nrog cov nus thiab cov viv ncaus zoo li qhov Ntxwgnyoog hais, tsis hais lub ntsiab thiab ua kom lwm tus tsis meej pem. Zoo li thaum lawv nug kuv tias muaj pes tsawg leej los tshiab nyob rau hauv pawg ntseeg uas kuv saib xyuav es yuav cob qhia tau thiab lawv tej xwm txheej yog dab tsi, kuv teb tau ua ob peb sob lus yooj yooj yim xwb, piav qhia tau lawv tej xwm txheej thiab muaj pes tsawg leej. Tab sis kuv tsis yog teb ncaj nraim xwb. Kuv txawm pib tham txog cov los tshiab tej teeb meem thiab hais txog qee qhov laj thawj kom lwm tus thiaj li tsis xav tias kuv tsis mob siab txog qhov cob qhia cov los tshiab, tab sis tsuas xav tias lawv muaj teeb meem thiab tsis tsim nyog cob qhia. Ces tom qab cia li hle ub hle no tag lawm, kuv hloov kuv lub suab lus thiab tas zog hais tias peb yuav tau cob qhia cov los tshiab thiab kuv yuav tau cob qhia lawv kom zoo tshaj plaws. Kuv tham tau ib nyuag ntus txog qhov lawv muaj teeb meem li cas, ces thiaj li hais tias kuv mam li daws tej ntawd. Qhov ntawd mas yog ib lo lus teb uas tsis ncaj nraim li, thiab zoo nkaus li tus nab ntag uas tsis muaj leej twg paub tias kuv txhais tau li cas. Vajtswv hais tias qhov laj thawj uas Ntxwgnyoog tham lus mus mus los los thiab ib txwm muaj qee yam kev txhawb siab thiab muaj hom phiaj ntawd mas yog tiv thaiv nws tus kheej tej kev ntshaw xwb. Ces kuv txawm nug kuv tus kheej tias dab tsi yog lub hom phiaj uas kuv muaj nyob rau hauv lub siab lub ntsws rau qhov hais lus li ntawd rau cov nus thiab cov viv ncaus. Thaum ua tib zoo xav txog qhov ntawd lawm, ces kuv pom tias kuv ib txwm pib tham txog teej meem tas li kom lwm tus thiaj li tsis xav tias kuv tsis mob siab txog qhov cob qhia tib neeg, tab sis xav tias lawv tsis yog cov neeg cob qhia uas zoo, vim ntau qhov laj thawj. Ces thaum kawg kuv thiaj li hais tias kuv yuav saib xyuas txhua yam, kom lwm tus thiaj li xav tias kuv muaj ib lub nra rau txoj kev cob qhia cov los tshiab thiab muaj tus cwj pwm zoo. Ces lawv thiaj li yuav tsis hais tias kuv mas cais tib neeg thiab tsis txaus siab los tiv kev txom nyem. Kuv mas hais mus mus los los xwb, thiab muaj tej kev txhawb siab tsis zoo uas txhawb qhov ntawd. Thiab kuv mas coj tsis ncaj nraim li, xav kom lwm tus twv seb qhov kuv hais ntawd yog dab tsi xwb thiab txiav txim siab seb cov los ntseeg tshiab ntawd puas yuav cob qhia tau, es kom qhov ntawd thiaj li ua rau kuv zoo txawm yuav muaj dab tsi tshwm sim los xij. Yog ib tug twg taug qab txog qhov uas vim li cas kuv thiaj li tsis cob qhia lawv, ces kuv yeej liam tau rau cov nus thiab cov viv ncaus yam yooj yim heev li, hais tias lawv hais kom kuv txhob cob qhia. Yog cov los tshiab ua tau nce qib, ces txhua tus yuav pom tias kuv haj tseem muaj peev xwm cob qhia tau cov tib neeg zoo li ntawd thiab, ces lawv yuav xav tias kuv muaj peev xwm, thiab kuv zoo. Qhov kuv hais lus mas yog kiag qhov Vajtswv piav qhia txog Ntxwgnyoog cov lus ntag, zoo kiag li tus nab ntag, npog kuv tus kheej tej kev txhawb siab thiab tej hom phiaj huv si, es kom kuv thiaj li yuav ua tiav kuv tus kheej tej hom phiaj yam lwm tus tsis paub txog tias muaj dab tsi tshwm sim. Kuv mas zoo kiag li Ntxwgnyoog ntag, txawj ntxias thiab txawj dag heev. Tsuas zoo ib yam li thaum nug kuv tus thawj saib xyuas txog qhov uas kuv puas tsim nyog cob qhia rau cov los tshiab twg, kuv hais ub hais no, hais txog ntau yam ntawmcov los tshiab tej teeb meem, xav kom nws txiav txim siab es yog cov los tshiab ntawd tsis nce qib, ces qhov ntawd thiaj li tsis yog kuv qhov kev txhaum, tiam sis nws yuav tau ris qhov ntawd. Thaum rov qab xav txog qhov no, kuv mam li paub tias qhov kuv coj tsis ncaj nraim mas zoo li qhov kuv tab tom nug kom tau tswv yim, tab sis qhov tseeb tiag, kuv tab tom ua kom lwm tus txiav txim siab rau kuv, thiab xav zam lub luag hauj lwm. Kuv mas txawj ntxias tshaj. Yog ib tug neeg dog dig nug cov lus nug no, ces yog lawv tsuas xav kawm kom paub cov hauv paus ntsiab lus es kom lawv thiaj li ua txhua yam tau raws li lub hauv paus ntsiab lus thiab cob qhia lwm tus tau zoo dua xwb es kom muaj txiaj ntsim rau pawg ntseeg tes hauj lwm xwb. Tab sis kuv ces xav hle lub luag hauj lwm pov tseg, los tiv thaiv kuv tus kheej tej kev ntshaw, lub koob lub npe thiab lub meej mom xwb. Cas kuv yuav coj nkhaus ua luaj li? Tus thawj saib xyuas hu kuv li ntawd vim hais tias kuv ib txwm raug cob qhia thiab yeej tsis tig xav txog tus kheej li. Qhov ntawd mas qias Vajtswv heev, thiab xeeb txob rau lwm tus tib neeg. Thaum paub li ntawd lawm, kuv thiaj li thov Vajtswv thiab tsa tes cog lus rau Vajtswv tias suav txij thaum ntawd mus rau tom ntej, ces kuv mam li xav tiag tiag txog kuv tej kev txhawb siab thaum hais lus thiab xyaum coj ncaj. Tom qab ntawd, thaum lwm tus nug kuv txog cov ntseeg tshiab, ces tej thaum kuv yeej xav pib hais txog lawv tej teeb meem dua es kom zoo li lawv tsis muaj peev xwm ua tau es kuv thiaj li tsis tau ris. Tab sis thaum kuv paub tias kuv muaj txoj kev txhawb siab tsis yog lawm thiab rov qab txawj dag dua lawm, ces kuv thiaj li ua tib zoo thov Vajtswv, tso kuv tus kheej tseg, thiab tham txog tej ntawd yam ncaj ncees heev thiab raws lub hom phiaj. Tab sis tsuas yog ob peb hnub tom qab ntawd xwb, kuv txawm siv rov qab coj li qub lawm.

Muaj ib hnub, tus thawj saib xyuas ntawd hais tias ib tug ntseeg tshiab uas kuv tau saib xyuas tab tom koom Viv Ncaus Zag lub rooj sib txoos ua ke, thiab nws nyiam Viv Ncaus Zaj txoj kev qhia. Kuv txawm xav tias tus los tshiab ntawd mas khav theeb, muaj kev xav phem ntau heev, thiab yoog raws sab tsis muaj kev ntseeg lawm. Nws tsis mus koom kuv lub rooj sib txoos ua ke li txhau zaus, thiab qhov saib xyuas nws ntawd mas sab tiag tiag li, yog li ntawd kuv txawm xav tias kuv muaj hauj lwm tsawg zog lawm yog Viv Ncaus Zag saib xyuas tau lawm. Tab sis kuv yuav tsum yog tus uas ywg dej nws, yog li ntawd yog kuv cia li muab nws xa mus rau Viv Ncaus Zag lawm, tej zaum ntshe tus thawj saib xyuas yuav hais tias kuv txawj dag heev, thiab xav muab cov ntseeg tshiab uas saib xyuas nyuaj ntawd thawb tawm mus. Yog tus thawj saib xyuas hais kom xa nws tawm, ces kuv cia li hle kuv tus kheej lub nra ntawd tawm raws li qhov ib txwm ua lawm. Yog li ntawd, kuv txawm nug ib nqe lus ntaus thawj me ntsis txog qhov tus los tshiab ntawd nyiam Viv Ncaus Zag qhov kev qhia. Nws tau lees qhov ntawd lawm. Kuv txawm taug qab mus ceev nrooj, hais tias vim muaj li ntawd lawm, ces tej zaum peb yuav tsum ua raws li qhov nws nyiam. Li cas los xij, nws yeej tsis tuaj koom kuv lub rooj sib txoos ua ke txhua zaus li. Ces kuv txawm nug nws seb nws xav li cas. Kuv tab tom tos kom nws hais tias yuav tsum xa tus nus ntawd mus. Tab sis nws tsis txiav txim siab kiag tam sim ntawd. Tom qab ntawd, kuv hnov tsis kaj siab thiab hnov txhaum me ntsis, xav tias kuv tab tom hais tej lus zais txhawb siab dua lawm thiab. Vim li cas kuv thiaj li pheej muaj tej kev xav uas txaj muag ntshuav no xwb? Vim li cas kuv thiaj li qhia tsis tau kuv tej tswv yim kom meej meej thiab ncaj nraim thiab qhia rau nws ncaj qha tias kuv tsis nyiam tus ntseeg tshiab no li, tias nws mas muaj teeb meem ntau heev lawm thiab kuv xa kom muab nws xa tawm mus?

Tom qab ntawd kuv thiaj li nrhiav cov lus los ntawm Vajtswv los uas hais txog ze ze rau kuv tus yam ntxwv, thiab saib ib daim yeeb yaj duab uas nyeem Vajtswv cov lus. “Ib txhia tib neeg tham lus tsis meej pem kiag li. Tej thaum mas lawv paub pib tab sis tsis paub xaus, tej thaum paub xaus tab sis tsis paub pib li. Koj yeej qhia tsis tau tias lawv hais dab tsi hlo li, tsis muaj ib yam dab tsi uas lawv hais es koj yuav paub li, thiab yog hais tias koj hais kom lawv piav qhia meej meej mas, lawv tsis piav qhia li. Lawv nquag siv lub npe nyob rau hauv lawv tej lus hais. Piv txwv li, lawv hais tawm qee yam, ces hais tias, ‘Tus txiv neej ntawd—ws, nws tab tom xav tias, thiab tom qab ntawd cov nus thiab cov viv ncaus mas tsis hais lus kiag li…’ Lawv yeej ua tau li ntawd ntau teev mus thiab yeej tseem tsis nthuav tawm lawv tus kheej kom meej meej li thiab, hais lus ua dog ua dig, tsis muaj lub ntsiab li, hais txhua yam uas tsis muaj ib qho yuav muab los sib txuas ua ke tau li, ua rau koj tsis ntse zog tuaj tom qab hnov tej lus ntawd lawm—thiab haj yam ua rau yus ntxhov siab xwb. Qhov tseeb tiag, lawv tau nyeem ntau phau ntawv lawm thiab muaj kev kawm zoo—yog li ntawd vim li cas lawv thiaj li tsis muaj peev xwm hais tau ib sob lus kom to taub mas? Qhov no yog ib qho teeb meem ntawm tus moj yam. Tib neeg nkag siab nyuaj heev ces yuav tau rau siab hais ib qho zuj zus. Yeej tsis muaj ib qho kev xav rau qhov lawv hais li, ib txwm muaj lo lus pib tab sis tsis muaj lo lus xaus; tom qab qhib qhov ncauj hais lawm ces tsuas pib hais ua tab ua tauv xwb, thaum kawg lawv ho lees txais lawm thiab. Vim li cas lawv thiaj li lees txais qhov ntawd? Vim hais tias lawv tsis xav kom koj to taub qhov lawv hais ntawd, lawv xav kom koj khwv yees xwb. Yog hais tias lawv qhia koj ncaj nraim lawm, ces koj yuav paub qhov lawv tab tom hais ntawd lawm thiab pom lawv tshab plaws, puas yog mas? Lawv tsis xav tau qhov ntawd. Lawv xav tau dab tsi? Lawv xav kom koj khwv yees rau ntawm koj tus kheej xwb, thiab lawv yeej zoo siab hlo cia koj ntseeg qhov koj khwv yees tias muaj tseeb—nyob rau qhov xwm txheej ntawd, lawv tsis hais txog qhov ntawd, yog li ntawd lawv thiaj li tsis ris ib qho dab tsi li. Tshaj qhov ntawd, qhov lawv tau txais thaum koj qhia lawv tias koj khwv yees tau lawv lub ntsiab lus lawm ntawd yog dab tsi? Qhov koj khwv yees mas yog kiag qhov lawv xav hnov ntag, thiab qhov ntawd qhia rau lawv txog koj tej tswv yim thiab tej kev xav rau ntawm qhov xwm txheej ntawd. Txij thaum ntawd los, lawv tuaj yeem tham lus raws li xav, xaiv yam yuav hais thiab yam yuav tsis hais, thiab yuav hais qhov ntawd li cas, thiab tom qab ntawd ces muab kauj ruam uas yuav mus rau tom ntej ntawd tso rau hauv lawv txoj kev npaj ua. Txhua sob lus xaus mas yeej muaj qhov cuab ntxiab nrog, thaum koj mloog tej lus ntawd, yog hais tias koj pheej nug tej lus nug txuas mus ntxiv, ces koj yuav mag rooj ntxiab ntawd xwb xwb li. Qhov ib txwm tham lus zoo li no puas ua rau lawv dhuav? Qhov no yog lawv tus moj yam—lawv tsis hnov dhuav li. Lawv ib txwm swm tej ntawd lawm. Vim li cas lawv thiaj li xav cuab cov ntxiab no rau koj? Vim hais tias lawv tsis tuaj yeem pom koj tej kev xav meej meek, thiab lawv ntshai tsam koj yuav pom lawv tshab plaws. Nyob rau tib lub sij hawm no lawv tas zog cheem kom koj txhob to taub lawv, tab sis lawv tas zog ua kom lawv to taub koj. Lawv xav ntxuav koj tej kev xam pom, tej tswv yim, thiab tej kev xav tawm ntawm koj mus. Yog hais tias lawv ua tau, ces lawv rooj ntxiab txhais lawm. Ib txhia tib neeg pheej nquag hais ‘hwv’ thiab ‘hav’; lawv tsis hais kiag lub ntsiab. Ho lwm tus pheej hais ‘xws li’ thiab ‘zoo li…,’ los npog qhov lawv tab tom xav tiag tiag, uas siv qhov no hloov rau qhov lawv xav hais tiag tiag. Muaj ntau lo lus, ntau lo lus ua, thiab cov lus pab ua muaj nyob rau hauv txhua sob lus uas siv tsis tau li. Yog hais tias koj kaw lawv cov lus mas, koj yuav pom tias yeej tsis muaj ib lo lus ntawm cov lus ntawd nthuav tawm txog lawv tej kev xav los sis tej cwj pwm rau ntawm qhov xwm txheej ntawd li. Tag nrho lawv cov lus mas yeej muaj cov lus cuab ntxiab, cov kev sim, thiab cov kev sim siab nyob rau hauv. Tus moj yam no yog dab tsi? (Phem.) Phem heev li. Puas muaj feem ntsig txog rau qhov tsis ncaj? Cov ntxiab, cov kev sim, thiab cov kev sim siab uas lawv tsim mas hu ua kev tsis ncaj. Qhov no keev yog tus yeeb yam ntawm cov tib neeg uas muaj lub ntsiab tseeb phem ntawm cov tawm tsam Khetos. Tus yeeb yam no keev qhia tshwm meej tau li cas? Lawv hais tawm tej xov xwm zoo tab sis tsis hais tej phem, lawv tsuas hais tshwj xeeb rau yam txaus siab xwb, lawv ua xyem xyav, lawv zais ntsis lawv lub ntsiab tseeb, lawv tham lus tsis meej pem, lawv tham lus tsis meej tseeb, thiab lawv cov lus mas muaj tej lus sim puv npo xwb. Tag nrho txhua yam no yog cov ntxiab, thiab tag nrho tej lus ntawd puav leej muaj lub ntsiab tsis ncaj” (Txoj Lus, Phau 4. Kev Nthuav Tawm Cov Tawm Tsam Khetos. Yam Xya: Lawv Yog Neeg Phem, Lim Hiam, thiab Txawj Dag (Ntu Ob)).

Vajtswv qhia peb tias cov tawm tsam Khetos mas yeej tsis hais lus ncaj nraim li, thiab lawv cov lus mas muab hlob thiab ua rau lwm tus tsis meej pem, tias lawv ib txwm sim cov dej, tas zog cuab ntxiab rau lwm tus kom tau raws li lawv tus kheej cov hom phiaj, yam tsis leg lawv tus kheej lub luag hauj lwm li. Tsuas zoo ib yam li qhov Ntxwgnyoog hais rau Evas tias yog nws noj lub txiv ntoo ntawd los nws yeej tsis tuag. Ntxwgnyoog cov lus mas muaj kev sim thiab kev sim siab puv npo, yeej tsis nthuav tawm nws cov hom phiaj ncaj nraim li, tab sis ua rau lwm tus mus ua txhaum yam tsis muaj kev ris li. Zoo ib yam li Vajtswv tau hais lawm tias: “Niaj hnub no, txhua tus yeej muaj Ntxwgnyoog tus moj yam nyob rau hauv lawv lawm, tag nrho cov tib neeg puav leej muaj Ntxwgnyoog cov kuab lom nyob rau hauv lawv uas sim Vajtswv siab thiab dag ntxias tib neeg. Tej thaum, thaum tib neeg hais lus, lawv hais kiag Ntxwgnyoog lub suab ntag, nrog rau txoj kev xav ntawm kev sim siab thiab kev ntxias dag. Tej kev xav thiab tej tswv yim uas tib neeg muaj ntawd muaj Ntxwgnyoog tej kuab lom puv npo; lawv tus yeeb yam mas yog kiag Ntxwgnyoog tus ntag—thiab tej thaum kev ntsais muag los sis kev taw tes xwb los kuj yog tus yeeb yam ntawm kev sim siab thiab kev ntxias dag thiab” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Kuv ces zoo tib yam nkaus thiab, ib txwm hais lus mus mus los los, soj thiab sim siab nrog kuv tus kheej tej kev txhawb siab uas phem. Thaum tus thawj saib xyuas hais tias tus ntseeg tshiab, tus uas kuv muaj qee lub tswv yim hais txog ntawd, twb mus rau lwm lub rooj sib txoos ua ke lawm, kuv tsis xav siv kuv lub sij hawm thiab lub zog txhawb nqa nws, thiab xav siv lub hwv tsam ntawd los tshem nws tawm xwb. Tab sis kuv tsis xav kom tus thawj saib xyuas paub tias kuv tau cais thiab tsis lees txais yuav nws lawm. Yuav kom tuav tau kuv tus yam ntxwv uas ris lub luag hauj lwm thiab hlub cov los tshiab, ces kuv thiaj li tau hais yam ntse ntsuav rau nws tias peb yuav tsum xav txog nws tej kev xav thiab ua raws li qhov nws xav tau, tas zog ua kom nws hais tias yuav yuav tsum muab tus nus ntawd xa mus rau cov rooj sib txoos ua ke ntawd es kuv thiaj li ua tau kuv tus kheej tej hom phiaj. Qhov kuv hais lus ntawd mas yog qhov Vajtswv piav qhia tias: “Yog hais tias koj kaw lawv cov lus mas, koj yuav pom tias yeej tsis muaj ib lo lus ntawm cov lus ntawd nthuav tawm txog lawv tej kev xav los sis tej cwj pwm rau ntawm qhov xwm txheej ntawd li. Tag nrho lawv cov lus mas yeej muaj cov lus cuab ntxiab, cov kev sim, thiab cov kev sim siab nyob rau hauv. Tus moj yam no yog dab tsi? (Phem.) Phem heev li” (Txoj Lus, Phau 4. Kev Nthuav Tawm Cov Tawm Tsam Khetos. Yam Xya: Lawv Yog Neeg Phem, Lim Hiam, thiab Txawj Dag (Ntu Ob)). Yeej tsis muaj ib lo lus ncaj ncees tawm hauv kuv lub qhov ncauj los nyob rau tej xwm txheej ntawd li, tab sis tag nrho tej uas dag ntawd puav leej tawm ncaj qha hauv los. Kuv pom tias kuv yeej muaj ib tug yeeb yam phem heev li. Kuv nyiam zam tsis hais lub ntsiab li, tsis cia tib neeg pom kuv lub ntsej muag tseeb li. Kuv xav tias nws yuav yog ib qho ruam kawg uas hais qee yam ncaj nraim, ces ntshe kuv haj yam yuav tsim muaj ntau yam phem xwb, thiab tsuas yog cov ruam xwb thiaj li ua li ntawd. Kuv nkag siab yuam kev qhov ntxias dag rau qhov tsab ntse, thiab xav tias kuv muaj txuj ci, muaj kev txawj ntse, thiab ib txwm mus ua ntej ib kauj ruam lawm, kom ua li no es kuv tus kheej tej kev ntshaw thiaj li tsis puas tsuaj. Kuv muab qhov txawj dag los ua kuv tus kheej lub hauv paus ntsiab lus rau lub neej txoj sia, thiab tsis quav ntsej txog txhua yam zoo uas Vajtswv qhia rau peb txog qhov ua neeg coj ncaj thiab hais lus thiab ua ncaj ncees lawm. Kuv hnov zoo li kuv yog tus tsis zoo lawm. Kuv mas ntse dhau lawm thiab pom txhua yam txawv tag, pom tej kev cai phem rau lub neej txoj sia li yog kuv tus kheej cov qauv, yeej ib txwm coj tsis ncaj thiab npaj txhij zog los dag thiab ua li ub li no. Qhov paub li no lawm ua rau kuv me ntsis ntshai, thaum pom tias kuv txawj dag thiab phem npaum li cas lawm. Kuv pom tias Ntxwgnyoog tau ua rau kuv qias vuab tsuab tiag tiag lawm thiab kuv tsis muaj ib qho zoo nkaus li tib neeg lawm. Muaj ib zaug, kuv nco tau qhov nyiam lub hnab nqa ntawm tes heev uas kuv tus phauj yuav ntawd. Kuv tsis xav siv tag nrho tej nyiaj ntawd los yuav lub hnab no thiab kuv txaj muag los thov lub hnab ntawd, yog li ntawd kuv ua txuj hais tej lus qab qab zib tias, “Saib lub hnab no uas koj twb tsis siv li lawm, cas yuav nkim ua luaj li! Koj twb muaj cov hnab uas yog hom ntawd lawm, vim li cas koj thiaj li yuav lub no?” Kuv hais lub suab lus no nrog kuv tus phauj es kom nws xav tias kuv txhawj thiab tsis xav kom nws nkim nws tej nyiaj, tab sis qhov kuv hais tiag tiag ces yog qhov tias nws tus kheej yeej tsis siv lub hnab ntawd, yog li ntawd nws tsuas nkim nyiaj pov tseg rau lub hnab no xwb. Nws teb tias, “Kuv yuav lub hnab no vim hais tias nws zoo thiab muag txo nqi lawm. Kuv nyiam cov hnab hom ntawd, tab sis koj yuav tau lub hnav no mas.” Tsuas tham ob peb lo lus li ntawd xwb, ces kuv txawm ua tau kom nws muab lub hnab ntawd rau kuv lawm. Kuv mas yeej ib txwm zoo li ntawd. Kuv tsis hais ncaj nraim txog qhov kuv xav tau, tab sis ua tau kom lwm tus paub txog qhov ntawd, ces thiaj li muab qhov ntawd rau kuv. Thaum tig saib rov qab rau txhua yam ntawd, kuv yeej tsis paub tias ua li cas kuv yuav txawj dag ua luaj li. Kuv xav rub lub sij hawm rov qab heev es tsis txhob hais tej yam tsis zoo li ntawd lawm. Nyob rau theem ntawd kuv thiaj li paub tias qhov cov tawm tsam Khetos hais thiab ua thiab lawv tus moj yam phem, mas yog kiag li qhov Vajtswv piav qhia ntag, kuv muaj ntau yam kev ntshaw. Kuv twb ua li ntawd los tau npaum li no lub xyoos lawm. Tej thaum yog tsis xav txog qhov ntawd tiag tiag, ces txawm tshwm sim tej lus txawj dag los ntawm kuv qhov ncauj los ntag. Kuv muaj cov tawm tsam Khetos tus moj yam phem tiag tiag li lawm. Qhov ntawd mas phom sij heev yog kuv tsis daws kom tau thiab hloov kom tau.

Kuv nyeem lwm zaj lus ntawm Vajtswv cov lus. “Tias Vajtswv hais rau tib neeg kom ua neeg ncaj ncees ua pov thawj qhia tias Nws tsis nyiam cov neeg dag ntxias kiag li tiag tiag, thiab tias Nws tsis nyiam cov neeg txawj dag. Qhov Vajtswv tsis nyiam cov tib neeg txawj dag ntawd yog ib qho kev tsis nyiam lawv txoj kev ua txhua yam, lawv tus moj yam, lawv tej kev txhawb siab, thiab lawv tej tswv yim dag; Vajtswv tsis nyiam tag nrho tej no huv si li. Yog hais tias cov tib neeg txawj dag no muaj peev xwm lees txais qhov tseeb, paub lawv tus moj yam txawj dag, thiab txaus siab hlo lees txais Vajtswv txoj kev cawm dim, ces lawv thiaj li yuav muaj kev cia siab tias yuav raug cawm dim, vim rau qhov Vajtswv yeej saib txhua tus tib neeg sib txig sib luag, thiab qhov tseeb yeej saib txhua tus tib neeg sib txig sib luag. Thiab yog li ntawd, yog hais tias peb xav los ua cov uas Vajtswv hlub, ces thawj yam uas peb yuav tsum tau ua ces yog hloov cov hauv paus ntsiab lus ntawm peb tus kheej xwb: Peb txhob ua neej nyob raws li Ntxwgnyoog cov tswv yim mus ntxiv lawm, peb tsis tuaj yeem dag thiab txawj dag mus ntxiv lawm, peb yuav tsum muab tag nrho tej kev dag tso tseg thiab los coj ncaj, ces ua li no mas thiaj li yuav hloov tau qhov Vajtswv xav rau peb. Yav dhau los, tib neeg ib txwm vam khom rau tej kev dag, kev ua txuj, thiab kev ntxias dag los nyob nrog tib neeg ua ke, thiab siv tej tswv yim phem los ua lub hauv paus, ua lub neej txoj sia, thiab ua lub hauv paus keeb cag rau lawv tus kheej. Qhov no mas yog qee yam uas Vajtswv ntxub. Nyob rau ntawm cov tsis ntseeg mas, yog hais tias koj hais lus ncaj nraim, qhia qhov tseeb, thiab ua ib tug neeg coj ncaj, ces koj yuav raug thuam, raug txiav txim, thiab raug tsis kam lees txais yuav, yog li ntawd koj thiaj li ua raws tej kev yoog raws li lub ntiaj teb, ua neej nyob nrog tej tswv yim phem, ua kev dag ntau zuj zus tuaj, thiab txawj dag ntau zuj zus tuaj. Koj kuj xyaum siv tej tswv yim ntxias dag los ua kom tau koj tej hom phiaj thiab tiv thaiv koj tus kheej. Koj thiaj li vam meej ntau zuj zus nyob rau hauv Ntxwgnyoog lub ntiaj teb lawm, ces vim li ntawd, koj thiaj li tog tob zuj zus mus rau hauv txoj kev txhaum mus txog ntua theem uas koj daws tsis tau koj tus kheej tawm lawm. Txhua yam uas nyob hauv Vajtswv lub tsev mas txawm kiag lawm. Koj yim dag thiab siv tswv yim dag, ces cov neeg Vajtswv xaiv yim dhuav koj thiab tsis kam lees txais yuav koj. Yog hais tias koj tsis kam lees txim hloov dua siab tshiab li thiab tseem tuav rawv tej tswv yim phem thiab qhov laj thawj phem, thiab sib tuav tswv yim los zais koj tus kheej thiab ntxias dag, ces koj yuav raug nthuav tawm thiab tshem tawm xwb xwb li. Qhov no vim hais tias Vajtswv ntxub cov tib neeg txawj dag, tsuas yog cov tib neeg coj ncaj thiaj li nyob tau rau hauv Vajtswv lub tsev xwb, ces thaum kawg thiaj li tsis lees txais yuav cov tib neeg txawj dag thiab yuav raug ntiab tawm. Tag nrho tej no mas Vajtswv yeej npaj tseg ua ntej lawm. Tsuas yog cov tib neeg coj ncaj thiaj li muaj ib feem nyob rau hauv lub nceeg vaj saum ntuj ceeb tsheej xwb, yog li ntawd yog hais tias koj tsis xyaum ua ib tug neeg coj ncaj, thiab yog hais tias koj tsis muaj kev ntsib kev pom thiab tsis xyaum ua raws li txoj xub ke ntawm qhov kev nrhiav qhov tseeb, yog hais tias koj tsis muab koj tus kheej txoj kev phem qhia tshwm, thiab tsis muab koj lub ntsej muag tseeb qhia tawm li, ces koj yeej yuav tsis muaj peev xwm tau txais Vajntsujplig tes hauj lwm thiab yeej tsis tau txais Vajtswv txoj kev pom zoo li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees). Vajtswv cov lus qhia kuv tias Nws nyiam cov neeg coj ncaj thiab dhuav cov uas txawj ntxias dag ntawd. Tsuas yog cov neeg coj ncaj thiaj li tau txais Nws txoj kev cawm dim xwb, ho cov uas txawj ntxias dag ces yuav raug qhia tshwm thiab raug tshem tawm. Kuv txoj kev ntseeg los tau npaum li no lub xyoo, kuv tau pom tias cov uas raug ncaws tawm hauv pawg ntseeg mus lawm ntawd, ib txhia mas yeej ib txwm lam ua kom dhau xwb thiab coj tsis ncaj rau lawv tej dej num li, thiab ib txhia mas yeej ib txwm dag tas li kom tuav tau lawv lub npe thiab lub meej mom, yeej ib txwm qhuas thiab ua tim khawv rau lawv tus kheej xwb. Lawv coj nkhaus thiab txawj dag kom ua tau lawv tus kheej tej hom phiaj tiav, thiab ib txhia tib neeg ces yuav raug lawv coj mus ib ntus. Tab sis Vajtswv pom txhua yam, yog li ntawd Nws thiaj li teeb tsa tej xwm txheej los muab lawv qhia tshwm. Thaum kuv tab tom cob qhia thiab saib xyuas cov ntseeg tshiab, kuv yuav nrhiav txhua hom kev hle ub hle no los ntxias dag thiab thiab dag, los npog kuv txoj kev qias vuab tsuab thiab tej kev txhaum, thiab kuv yeej tsis nhiav kev hloov pauv li, uas yim ua rau muaj kev ua txhaum ntau zuj zus tuaj xwb. Ces thaum kawg qhov ntawd thiaj li ua rau kuv raug Vajtswv muab tshem tawm. Thiab thaum saib rau ntawm cov nus thiab cov viv ncaus uas coj yooj yim thiab coj ncaj ntawd, ces muaj ntau yam uas lawv tsis to taub nyob rau hauv lawv tej dej num, thiab lawv muaj kev saib xyuas, tab sis lawv tsis ua si es muab lawv tus kheej tshem tawm ntawm lub luag hauj lwm los tiv thaiv lawv lub meej mom los sis xav txog qhov txhua yamyuav cuam tshuam rau lawv tus kheej tej kev ntshaw li cas. Lawv xav tias yuav kawm qhov tseeb thiab cov hauv paus ntsiab lus li cas thiaj li ua tau lawv tej dej num zoo, ces vim li ntawd lawv thiaj li tau txais Vajtswv txoj kev qhuab qhia thiab kev coj qhia. Tej zaum lawv yuav muaj peev xwm pes nrab, haj tseem tsis paub me ntsis thiab, los sis muaj teeb meem nyob rau hauv lawv tes dej num, tab sis Vajtswv tseem yuav coj lawv kev thiab pab lawv maj mam kawm kom paub cov hauv paus ntsiab lus ntawm qhov tseeb, kom tau ntsib tau pom Vajtswv txoj kev coj, thiab loj hlob rau hauv lub neej ib hnub dhau ib hnub. Ces kuv thiaj li paub tias kev coj ncaj thiab cov neeg pom kuv meej meej ntawd mas tsis yog ib qho phem li. Tej zaum thaum lub sij hawm ntawd yuav txaj muag me ntsis, tab sis kuv xav zoo txog qhov ntawd, thiab Vajtswv nyiam qhov ntawd. Tshaj qhov ntawd, cov nus thiab cov viv ncaus yeej tsis muaj qhov saib tsis taus kuv li thaum kuv qhib siab lug tham txog kuv tej teeb meem tiag tiag lawm. Lawv pab ua tej ntawd rau kuv thiab coj kuv los to taub cov hauv paus ntsiab lus, thiab hom kev xyaum ua li ntawd tsis rhuav tshem ib qho dab tsi nyob hauv kuv tes dej num li. Vajtswv txoj moo zoo ntawm lub nceeg vaj mas tam sis no tab tom nthuav mus dav sai heev, thiab peb cheem tsum tau cov ntseeg tshiab ntau leej los tshaj tawm txoj moo zoo nrog peb. Kuv thiaj li rau siab ntso cob qhia txhua tus ntseeg tshiab, yog li ntawd tsis yog kuv tab tom ua hauj lwm zoo li Ntxwgnyoog tus qhev, uas cuam tshuam thiab tab kaum pawg ntseeg tes hauj lwm lod? Kuv twb tawm tsam Vajtswv lawm! Vajtswv hais tias, “Koj yim dag thiab siv tswv yim dag, ces cov neeg Vajtswv xaiv yim dhuav koj thiab tsis kam lees txais yuav koj. … Thaum kawg thiaj li tsis lees txais yuav cov tib neeg txawj dag thiab yuav raug ntiab tawm. Tag nrho tej no mas Vajtswv yeej npaj tseg ua ntej lawm. Tsuas yog cov tib neeg coj ncaj thiaj li muaj ib feem nyob rau hauv lub nceeg vaj saum ntuj ceeb tsheej xwb.” Vajtswv cov lus mas meej heev lawm. Txawm yus xaiv txoj kev twg los xij, tus neeg uas lawv nrhiav mas ntsig txog ncaj nraim rau qhov lawv nrhiav tau los, uas yog lawv txoj hmoo. Vajtswv npaj txhua yam xwm txheej no, loj thiab me, tab sis kuv pom tshab tej ntawd tau plooj plooj xwb yog tsis nrhiav qhov tseeb los sis tig xav txog yus tus kheej, cia kuv tus yeeb yam phem nyob mus li no, ces kuv haj tseem yuav tsis to taub lub hauv paus ntawm qhov tseeb ntawm qhov ua ib tug neeg coj ncaj li, los sis yuav hloov tsis tau ib qho dab tsi nyob rau hauv kuv lub neej tej moj yam li. Kuv tseem yog ib tug neeg txawj dag uas yog Ntxwgnyoog tug. Kuv yuav ua li cas raug cawm li cas li ntawd mas? Kev ua ib tug neeg coj ncaj mas thiaj li yog tib txoj kev taug uas yog xwb.

Tom qab ntawd kuv pheej nrhiav qhov tseeb txog qhov no, thiab pom meej tseeb ntxiv txog txoj kev rais los ua ib tug neeg coj ncaj lawm.

Vajtswv cov lus hais tias, “Thaum tib neeg muaj kev dag, muaj tej kev xav dab tsi tshwm sim los ntawm qhov no los? Thiab lub hom phiaj yog dab tsi? Yog tsis muaj kev zam, tsuav kom tau txais lub meej mom thiab lub ntsej lub muag xwb; hauv lub ntsiab lus, ces txhawm rau lawv tus kheej tej kev ntshaw xwb. Thiab muaj dab tsi nyob rau ntawm lub hauv paus keeb cag ntawm txoj kev nrhia tej kev ntshaw ntawd? Nws yog tias tib neeg pom lawv tus kheej tej kev ntshaw tseem ceeb dua lwm yam lawm. Lawv muaj kev dag kom tau txais txiaj ntsig rau lawv tus kheej xwb, thiab lawv tej moj yam txawj dag thiaj li raug nthuav tawm raws li qhov no. Tsim nyog daws qhov teeb meem no li cas? … Lawv yuav tsum lees txais qhov tseeb. Tsuas yog thaum tib neeg to taub qhov tseeb lawm xwb mas lawv thiaj li tuaj yeem pom tshab lub ntsiab tseeb ntawm lawv tus kheej tej kev ntshaw; tsuas yog thaum ntawd xwb mas lawv thiaj li tuaj yeem xyaum zam, tso tseg, thiab muaj peev xwm thev taus txoj kev mob siab ntawm txoj kev tso yam uas lawv hlub tshaj plaws ntawd tseg. Thiab thaum koj tuaj yeem ua li ntawd lawm, thiab tuaj yeem tso koj tus kheej tej kev ntshawtseg lawm, ces koj yuav hnov kaj siab lug zuj zus thiab hnov thaj yeeb lug ntau zuj zus nyob rau hauv koj lub siab, ces qhov ua li ntawd koj thiaj li yuav muaj yeej lub cev nqaij daim tawv. Yog hais tias koj tuav rawv koj tej kev ntshaw thiab yeej tsis kam lees txais qhov tseeb ib qho me me li—yog hais tias, nyob hauv koj lub siab, koj hais tias, ‘Qhov nrhiav kuv tus kheej tej kev ntshaw thiab kev tsis kam lees ntsib ib qho kev puas tsuaj ntawd muaj dab tsi txhaum? Vajtswv yeej tsis tau rau txim rau kuv, thiab qhov tib neeg tuaj yeem ua rau kuv ntawd yog dab tsi?’—ces tsis muaj leej twg yuav ua tau ib yam dab tsi rau koj li. Tab sis yog hais tias qhov no yog koj txoj kev ntseeg Vajtswv lawm, ces thaum kawg koj yuav muab tsis tau qhov tseeb thiab txoj sia, uas yuav yog ib qho kev plam uas loj tshaj plaws rau koj: Koj yuav tsis raug cawm kom dim. Puas muaj ib qho kev tu siab uas loj tshaj no lawm? Qhov no yog yam tshwm sim thaum kawg los ntawm kev nrhiav koj tus kheej tej kev ntshaw. Yog hais tias tib neeg tsuas nrhiav lub meej mom thiab lub ntsej lub muag xwb—yog hais tias lawv tsuas nrhiav lawv tus kheej tej kev ntshaw xwb—ces lawv yeej yuav muab tsis tau qhov tseeb thiab txoj sia li, ces thaum kawg lawv yuav yog tus uas ntsib kev puas tsuaj. Vajtswv cawm cov uas nrhiav qhov tseeb. Yog hais tias koj tsis kam lees txais qhov tseeb, thiab yog hais tias tsis muaj peev xwm tig xav txog thiab tsis paub koj tus kheej tus moj yam qias vuab tsuab, ces koj yuav lees txim hloov dua siab tshiab tiag tiag tsis tau, thiab yuav tsis muaj hnub to taub lub neej txoj sia li. Kev lees txais qhov tseeb thiab kev paub koj tus kheej mas yog txoj kev taug mus rau txoj kev loj hlob ntawm koj lub neej thiab mus rau txoj kev cawm dim, qhov ntawd yog lub hwv tsam rau koj los rau ntawm Vajtswv xub ntiag los lees txais Vajtswv txoj kev tshawb xyuas thiab los lees txais Vajtswv txoj kev txiav txim thiab kev rau txim ces thiaj li tau txais txoj sia thiab qhov tseeb. Yog hais tias koj tso txoj kev nrhiav qhov tseeb tseg txhawm rau txoj kev nrhiav lub meej mom thiab lub ntsej lub muag thiab koj tus kheej tej kev ntshaw lawm, ces qhov no npaum nkaus li tso lub fib cim los txais Vajtswv txoj kev txiav txim thiab kev rau txim thiab tau txais kev cawm dim ntawd tseg lawm ntag. Koj xaiv lub meej mom thiab lub ntsej lub muag thiab koj tus kheej tej kev ntshaw, tab sis qhov koj muab tso tseg mas yog qhov tseeb, thiab qhov koj plam mas yog txoj sia, thiab lub hwv tsam raug cawm dim. Ua puas muaj lub ntsiab tshaj no lawm? Yog hais tias koj xaiv koj tus kheej tej kev ntshaw thiab tso qhov tseeb tseg, puas yog koj ruam lawm mas? Hais ncaj nraim tau tias, qhov no yog ib qho kev plam uas loj tshaj rau ib qho txiaj ntsim me me lawm. Lub ntsej lub muag, lub meej mom, nyiaj txiag, thiab kev ntshaw mas puav leej nyob tau ib ntus xwb, tej ntawd puav leej nyob tau hnub puav xwb, tsuas yog qhov tseeb thiab txoj sia mas thiaj li nyob mus ib txhis thiab hloov tsis tau. Yog hais tias tib neeg daws tau lawv tus moj yam qias vuab tsuab uas cuam tshuam rau lawv txoj kev nrhiav lub meej mom thiab lub ntsej lub muag lawm, ces lawv thiaj li muaj kev cia siab tias yuav tau txais kev cawm dim. Tshaj ntawd ntxiv, qhov tseeb uas tib neeg tau txais yog yam uas nyob mus ib txhis; Ntxwgnyoog tsis tuaj yeem txeeb tau qhov tseeb no ntawm lawv mus, los sis yeej tsis muaj leej twg txeeb tau li. Koj tau tso yam uas muaj txiaj ntsig rau koj tseg lawm tiam sis yam koj yuav tau txais yog qhov tseeb thiab kev cawm dim; yam no yog koj tug. Koj tau txais tej no rau koj tus kheej. Yog tib neeg xaiv xyaum ua raws li qhov tseeb, ces txawm tias lawv tau poob lawv tej kev ntshaw lawm los xij, lawv yeej muab tau Vajtswv txoj kev cawm dim thiab txoj sia mus tag ib txhis. Cov tib neeg no yog cov ntse tshaj plaws. Yog tib neeg tau txais txiaj ntsig rau tus nqi ntawm qhov tseeb, ces yam uas lawv poob yog txoj sia thiab Vajtswv txoj kev cawm dim; cov tib neeg no yog cov ruam tshaj plaws. Hos yam uas thaum kawg ib tug neeg yuav xaiv—tej kev ntshaw los sis qhov tseeb—qhov no nthuav tawm txog ib tug neeg ntau dua lwm tus” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Kev Paub Yus Tus Moj Yam Yog Lub Hauv Paus ntawm Kev Hloov Nws).

“Feem ntau mas yeej muaj kev txhawb tib neeg tej lus dag tas li, tab sis ib txhia lus dag mas tsis muaj kev txhawb siab, thiab tsis yog txhob txwm npaj, tab sis yeej ib txwm xeeb txawm muaj los. Tej lus dag zoo li ntawd mas daws tau yooj yim; tej lus dag uas muaj ib qho kev txhawb siab mas thiaj li daws tsis yooj yim, vim hais tias qhov kev txhawb siab ntawd yog los ntawm yus tus yeeb yam los thiab sawv cev rau Ntxwgnyoog lub tswv yim dag, thiab yog qee yam uas tib neeg txhob txwm xaiv ntag. Thiab yog hais tias ib tug twg tsis nyiam qhov tseeb, ces lawv yuav tso tsis tau lub cev nqaij daim ntawv tseg, yog li ntawd lawv yuav tsum thov Vajtswv thiab vam khom rau Nws, thiab nrhiav qhov tseeb los mus daws qhov teeb meem ntawd. Tab sis yuav daws tsis tau txoj kev dag kom tiav kiag ib zaug; yeej muaj tej thaum rov qab dag, haj yam rov qab dag ntau. Qhov no yog ib qho xwm txheej uas yeej ib txwm muaj. Tsuav yog koj daws ib qho zuj zus thiab ib lo lus dag uas koj hais, thiab soj xyuas qhov ntawd mus, ces yuav muaj hnub uas koj daws tau tej ntawd tau tag nrho lawm. Kev daws txoj kev dag mas yog ib npluav rog ntev heev: thaum muaj ib lo lus dag tawm los, tig xav txog koj tus kheej, tom qab ntawd ces thov Vajtswv; thaum muaj lwm lo lus dag tawm los, rov qab tig xav thiab thov Vajtswv dua. Koj yim thov Vajtswv, ces koj yim ntxub koj tus moj yam qias vuab tsuab, thiab koj yim xav xyaum ua raws qhov tseeb thiab yim xav ua neej nyob raws li qhov tseeb. Thiab yog li ntawd, koj yuav muaj lub zog los muab tej lus dag ntawd tso pov tseg. … Qhov no yog qhov yus yuav tsum tau ntsib thiaj li ua tau ib tug tib neeg coj ncaj. Ua li no es koj tej lus dag thiaj li mam muaj tsawg zuj zus. Hnub noj koj dag kaum yam, tag kis tej zaum koj yuav dag cuaj yam, neeg kis koj yuav dag yim yam, tom qab ntawd koj yuav hais ob yam los sis peb yam lawm xwb. Ces koj yuav hais qhov tseeb ntau zuj zus tuaj lawm. Coj ncaj es koj thiaj li yuav txav los ze zog rau Vajtswv txoj kev xav, Nws tej kev cheem tsum, thiab Nws cov qauv ntau ntxiv—ces qhov ntawd yuav zoo npaum li cas! Yuav kom xyaum tau txoj kev coj ncaj mas, koj yuav tsum muaj ib txoj kev taug, thiab koj yuav tsum muaj ib lub hom phiaj. Xub daws qhov teeb meem ntawm kev hais lus dag tso. Koj yuav tsum paub lub ntsiab tseeb uas txhawb koj txoj kev hais tej lus dag no. Koj yuav tsum saib seb yam kev txhawb siab twg ua rau koj hais tej lus dag no, vim li cas koj thiaj li muaj tej kev txhawb siab zoo li ntawd, thiab lub ntsiab tseeb ntawm tej lus dag ntawd yog dab tsi. Thaum koj paub tag nrho tej teeb meem no meej meej lawm, ces koj mam li pom tshab plaws qhov teeb meem ntawm txoj kev dag, thiab thaum muaj tej yam tshwm sim rau koj, ces koj thiaj li yuav muaj cov hauv paus ntsiab lus los xyaum ua raws. Yog hais tias koj xyaum ua raws li ntawd thiab muaj kev ntsib kev pom zoo li ntawd mus, ces yeej yuav muaj txiaj ntsim xwb xwb li. Ces muaj ib hnub koj yuav hais tias: ‘Kev coj ncaj mas yooj yim xwb. Kev txawj dag mas dhuav tshaj! Kuv tsis xav ua ib tug neeg txawj dag mus ntxiv lawm, tsis xav xav txog qhov yuav dag thiab qhov yuav npog kuv tej lus dag li cas mus tas li lawm. Qhov ntawd zoo ib yam li ib tug neeg uas muaj mob puas siab puas ntsws, hais lus rov qab rov quav—qhov ntawd yog ib tug neeg uas tsis tsim nyog muab hu ua ‘tib neeg’ lawm! Hom neej ntawd mas dhuav tshaj, thiab kuv tsis xav ua neej li ntawd mus ntxiv lawm!’ Nyob rau lub sij hawm no, koj mam li muaj kev cia siab txog qhov yuav coj ncaj tiag tiag, thiab qhov ntawd thiaj li ua pov thawj qhia tau tias koj pib ua tau nce qib rau kev coj ncaj lawm. Qhov no yog ib qho ua tau nce qib. Qhov tseeb tiag, tej zaum yuav muaj nej ib txhia ntawm ko uas, thaum nej pib xyaum ua raws, yuav poob siab tom qab hais cov lus ncaj ncees thiab qhib siab lug muab nej tus kheej qhia tawm lawm. Nej lub ntsej muag yuav liab, nej yuav txaj muag, thiab nej yuav ntshai lwm tus luag. Ces, yuav ua li cas? Koj tseem yuav tsum tau thov Vajtswv thiab thov kom Nws muab lub zog rau koj. Hais tias, ‘Au Vajtswv, kuv xav ua ib tug neeg coj ncaj, tab sis kuv ntshai tsam tib neeg luag kuv thaum kuv hais cov lus tseeb. Kuv thov kom Koj tso kuv tawm ntawm txoj sawv hlauntawm kuv tus moj yam phem; cia kuv ua neej raws li Koj cov lus es kom thiaj li yuav tau txais kev ywj pheej thiab thaj yeeb.’ Thaum koj thov Vajtswv li no lawm, thiaj li yuav ua rau koj lub siab kaj nrig ntxiv tuaj, ces koj mam li hais rau kuv tus kheej tias: ‘Qhov muab qhov no coj los xyaum ua raws mas yog qhov zoo. Niaj hnub no kuv muab qhov tseeb coj los xyaum ua raws lawm. Thaum kawg, kuv thiaj li ua tau ib tug neeg coj ncaj rau ib zaug lawm.’ Thiab thaum koj thov Vajtswv zoo li no, Vajtswv yuav qhia koj. Nws yuav ua hauj lwm nyob rauv hauv koj lub siab, thiab Nws yuav txhawb koj, ua kom koj txaus siab rau qhov ua tau ib tug neeg coj ncaj. Qhov no yog qhov yuav tsum muab qhov tseeb coj los xyaum ua raws li cas. Nyob rau thaum nyuam qhuav xub pib mas koj tsis muaj kev taug li, tab sis los ntawm txoj kev nrhiav qhov tseeb es koj thiaj li nrhiav pom ib txoj kev taug. Thaum tib neeg pib nrhiav qhov tseeb, lawv tsis tas yuav tsum muaj kev ntseeg li. Qhov tsis muaj ib txoj kev taug ntawd mas nyuaj rau tib neeg, tab sis thaum lawv to taub qhov tseeb thiab muaj ib txoj kev taug los mus xyaum ua raws lawm, ces lawv lub siab thiaj li nrhiav pom txoj kev xyiv fab. Yog hais tias lawv xyaum ua tau raws li qhov tseeb thiab ua haum raws li lub hauv paus ntsiab lus lawm, ces lawv lub siab yuav nrhiav pom kev nplij siab, thiab lawv yuav tau txais kev kaj siab thiab kev ywj pheej” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Lub Hauv Paus Kev Xyaum Ua Raws Yooj Yim Tshaj Plaws ntawm Kev Ua ib Tug Neeg Ncaj Ncees).

Tom qab nyeem Vajtswv cov lus lawm, kuv thiaj li pom tau tias yuav kom coj ncaj tau, mas qhov xub thawj thiab qhov ua ntej tshaj plaws ces peb yuav tsum tso yus tus kheej tej kev ntshaw tseg. Qhov ntawd mas tseem ceeb tshaj. Lub hom phiaj txhawb txoj kev dag ntawd mas yog los tiv thaiv koj tus kheej tej kev ntshaw thiab ua kom tau raws li koj lub hom phiaj, thiab thaum tib neeg nrhiav yam ntawd, raug tswj los ntawm lawv tus moj yam phem lawm, ces lawv yuav dag thiab ntxias dag. Yog li ntawd qhov tseem ceeb ces tso yus tus kheej tej kev ntshaw tseg, uas yog qhov yuav daws tau txoj kev txawj dag tau yooj yim dua. Thiab, qhov tseem ceeb ces yuav tau tig xav txog yus tus kheej tas li, thiab ua tib zoo xyaum hais qhov tseeb thiab coj ncaj, es cia Vajtswv tshuaj xyuas peb txhua lo lus thiab txhua qhov kev ua. Thaum peb xav ntxias dag rau hauv qhov peb hais los sis ua, ces peb yuav tsum nug peb tus kheej seb qhov peb tas zog ua kom tau ntawd yog dab tsi, thiab yog qhov ntawd yog qee yam txawj dag los sis yog qee yam hais tawm txog kev phem tus kheej xwb, ces peb yuav tsum tau thov Vajtswv thiab hloov pauv rov qab kiag tam siv, xyaum qhib siab lug hais tawm rau lwm tus, los nthuav tawm peb tej kev xav, peb tej kev xam pom, txoj kev qias vuab tsuab thiab tej kev txhaum, thiab nrhiav qhov tseeb los daws tej ntawd. Qhov ntawd thiaj li yuav maj mam hloov tau txoj kev txawj ntxias dag, tus moj yam phem xwb. Tom qab ntawd, kuv thiaj li qhib siab lug hais tawm rau kuv tus thawj saib xyuas txog kuv tej kev xav rau cov los tshiab, lees qhov txhaum uas kuv to taub rau ntawm tej kev txhawb siab, thiab thov txim rau nws. Ua rau kuv ceeb tag tias nws yeej tsis muaj qhov saib tsis taus kuv li, thiab dhua ntawd txawm sib tham txog qee yam teeb meem nyob rau hauv peb tej dej num nrog kuv thiab. Tom qab ua li ntawd lawm kuv zoo siab heev. Kuv tso txoj kev zais ntsis tseg lawm, thiab kaj siab heev lawm. Kuv tsis dim tag nrho ntawm kuv txoj kev txawj ntxias dag, tus moj yam phem, tab sis kuv muaj txoj kev ntseeg thiab lub siab los ua ib tug neeg coj ncaj uas coj kev xyiv fab los rau Vajtswv, los mob siab txog qhov kev coj ncaj thiab lees txais Vajtswv qhov kev tshawb xyuas kom meej nyob rau txhua yam uas kuv ua rau hau kuv lub neej txoj sia.