5. Kev Sib Qhia Mas Yuav Tsum Qhib Siab Lug

Nyob rau thaum pib ntawm xyoo 2021 ntawd, kuv tau lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm. Kuv nquag mus koom tej kev sib tham thiab nyeem Vajtswv txoj lus heev, ces tom qab tau ob lub hlis ntau lawm, kuv txawm pib kuv tes dej num ua tus tub leg num uas txhawb siab lawm. Nyob rau lub sij hawm ntawd mas, peb yeej muaj ib lub rooj sib tham rau cov tub leg num txhua txhua hnub so ntawm txhua lub lim tiam los sib tham txog tej teeb meem thiab tej kev nyuaj uas peb ntsib nyob hauv peb tej dej num thiab sib qhia txog qhov peb tau txais, qhov kev qias vuab tsuag twg uas peb muab qhia tshwm lawm, thiab peb xav txog thiab to taub qhov ntawd los ntawm Vajtswv txoj lus li cas. Ua ntej txhua lub rooj sib tham mas, kuv ntshai heev thiab xav ntev heev, vim kuv tsis paub tias yuav hais li cas rau lawv. Kuv txhawj txog qhov tham txog kuv txoj kev qias vuab tsuab thiab tej kev ua tsis tau zoo, vim kuv ntshai tsam lwm tus yuav xav phem rau kuv. Piv txwv li: kuv nyuam qhuav pib txhawb cov los tshiab xwb. Kuv tsis paub ntau yam, thiab kuv tsis muaj kev paub li. Kuv txhawj tias cov los tshiab ntawd yuav tsis nyiam kuv thiab xav tias kuv txhawb tsis tau lawv zoo, yog li kuv thiaj li tsis xav tau tes dej num no ntxiv lawm. Tab sis kuv tsis xav qhib siab lug qhia txog kuv tus yam ntxwv rau ntawm cov tug leg num lub rooj sib tham, vim kuv txhawj tias yog kuv qhib siab lug qhia, ces lawv yuav xav tias kuv tsis muaj peev xwm qhia rau lwm tus. Thiab kuv tsis ua siab ntev rau ib txhia los tshiab, thiab kuv tsis xav hais txog qhov ntawd li, vim kuv txhawj tias yog kuv qhia rau lawv, ces lawv yuav xav tias kuv yog neeg tsis zoo. Tab sis kuv kuj ntxhov siab thiab, vim tias yog kuv tsis hais dab tsi nyob rau ntawm lub rooj sib tham ntawd li, ces lawv yeej yuav xav tias kuv tsis muaj peev xwm npaum lwm tus. Kuv tsis xav ua kom kuv tus kheej txaj muag los sis ua kom lawv thuam kuv. Tom qab xav txog qhov ntawd lawm, ces thaum kawg kuv thiaj li txiav txim siab tias tsuas hais qee yam uas tsis ntsig txog thiab tsis txaj muag heev xwb, xws li tias kuv mas tub nkeeg, uas yog ib qho teeb meem uas tib neeg feem coob yeej muaj. Qhov ua li ntawd, kuv thiaj li yuav tsis poob ntsej muag rau lwm tus.

Yog li, nyob rau ntawm lub rooj sib tham ntawd, tus thawj coj nug txog kuv tej kev paub nyob rau lub sij hawm no, thiab tias kuv paub dab tsi txog kuv tej moj yam qias vuab tsuab, ces kuv thiaj li qhia raws li qhov kuv tau npaj tseg lawm. Thaum kuv qhia tag lawm, ces kuv thiaj li xyu ib pas uas dim pa ntshua lawm, tab sis kuv tsis kaj siab li, vim kuv lub siab txawj xav ntawd pheej cem kuv. Kuv yeej paub tias kuv tsis tau qhia qhov tseeb, thiab tias qhov kuv ua ntawd mas tawm tsam Vajtswv txoj kev npaj siab lawm. Kuv thiaj li xav txog Tswv Yexus cov lus tias, “Cia koj tej kev cev ncauj cev lus kom zoo li, Yog, ces yog; Tsis yog, ces tsis yog: vim dab tsi los xij yog tshaj tej no lawm ces yog qhov phem lawm xwb” (Mathai 5:37). “Kuv hais tseeb rau nej tias, Tswj tsis yog tias nej hloov dua siab tshiab, thiab rais los zoo yam li tej me nyuam yaus, nej yuav nkag tsis tau mus rau lub teb chaws saum ntuj ceeb tsheej kiag li” (Mathai 18:3). Thaum xav txog cov lus no mas, kuv hnov txhaum heev. Tej lus dag yog los ntawm Ntxwgnyoog los, thiab phem heev. Vajtswv hlub cov neeg coj ncaj, thiab tsuas yog cov neeg coj ncaj xwb thiaj li tau nkag mus rau lub tnceeg vaj saum ntuj ceeb tsheej. Cov neeg dag thiab cov neeg lus zoo tab sis siab phem nkag tsis tau mus rau Vajtswv lub nceeg vaj. Vajtswv ntxub cov neeg zoo li ntawd, thiab nyob rau thaum kawg Vajtswv yeej yuav muab lawv rhuav tshem. Thaum kuv paub li no lawm mas, kuv chim heev, thiab kuv ntshai tsam raug Vajtswv tsis lees yuav. Kuv thiaj li thov Vajtswv thiab thov kom Nws coj kuv kev los ua ib tug neeg coj ncaj. Kuv thiaj li txiav txim siab qhia qhov tseeb nyob rau ntawm lub rooj sib tham tom ntej thiab qhib siab lug qhia txog kuv txoj kev qias vuab tsuab lawm. Tab sis thaum lub sij hawm los txog, kuv tseem tsis muaj lub siab tawv los hais qhov ntawd li thiab. Kuv txhawj tias yog kuv tham txog kuv txoj kev qias vuab tsuab thiab qhov ua tsis tau zoo ntawd, ces kuv tej nus thiab tej viv ncaus yuav xav tias kuv qias vuab tsuab tshaj lawv lawm. Kuv mloog zoo li qhov qhia qhov tseeb mas nyuaj heev li. Thaum xav li no, kuv txawm tsis xav mus koom cov rooj sib tham rau cov tub leg num lawm. Tab sis kuv txhawj tsam kuv tej nus thiab tej viv ncaus yuav nug kuv tias vim li cas kuv thiaj li tsis tuaj, ces thaum ntawd kuv yuav tsis paub hais li cas. Kuv yim xav, ces kuv yim muaj kev cov nyom thiab kev nyuaj siab xwb. Kuv tsis paub xyov yuav ua li cas li lawm. Nyob rau ntawm ib lub rooj sib tham, tej nus thiab tej viv ncaus qhia txog lawv tej kev ntsib pom thiab kev paub li niaj zaus qhia, tab sis kuv tsis paub xyov yuav hais li cas hlo li, yog li kuv cia li mloog twj ywm lawm xwb. Kuv txawm tag kev cia siab rau kuv tus kheej, kuv ib txwm npog kuv tus kheej thiab tsis ua raws li qhov tseeb zaum tas zaum thiab. Kuv haj tseem hais tsis tau ib lo lus kom ncaj li thiab. Kuv nyuaj siab heev li, yog li kuv thiaj li thov Vajtswv, thov kom Nws coj kuv kev tawm ntawm tus yam ntxwv no mus.

Tom qab ntawd, kuv thiaj li nyeem zaj lus no ntawm Vajtswv txoj lus tias, “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj sawv hlau khi los sis tsis muaj kev mob siab, thiab koj yuav ua neej nyob rau hauv txoj kev kaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Kuv to taub los ntawm Vajtswv txoj lus los tias peb yuav tsum txhob npog peb tus kheej tej yam ntxwv qias vuab tsuab. Peb yuav tsum coj tej ntawd los rau ntawm Vajtswv xub ntiag thov Vajtswv, xav, ua txhua yam kom to taub, thiab qhib peb lub siab lug los muab peb txoj kev qias vuab tsuab ntawd qhia tshwm rau peb tej nus thiab tej viv ncaus los nrhiav qhov tseeb. Qhov no yuav pab kom peb to taub peb tus kheej zoo tuaj thiab daws tau peb tej kev qias vuab tsuab. Tab sis, yuav kom txuag tau kuv lub ntsej muag thiab lub meej mom, ces kuv thiaj li tsis kam qhib siab lug qhia txog kuv txoj kev qias vuab tsuab thiab tej kev nyuaj, thiab kuv tsis xav los nrog kuv tej nus thiab tej viv ncaus nrhiav qhov tseeb li. Kuv yeej ib txwm kaw kuv lub siab kom txhob muaj leej twg paub tias kuv zoo li cas, tab sis kuv ua lub neej tsaus nti tsis muaj kev kaj siab li. Kuv thiaj li paub tias kuv yuav ua tsis tau li no mus ntxiv lawm, thiab tias kuv yuav tsum xyaum ua raws li Vajtswv txoj lus, qhib siab lug qhia txog kuv tus yam ntxwv rau kuv tej nus thiab tej viv ncaus, thiab nrhiav lawv txoj kev pab. Kiag tom qab lub rooj sib tham ntawd xaus lawm, txawm muaj ib tug viv ncaus los cuag kuv los tham txog nws txoj kev paub uas tsis ntev los no. Kuv thiaj li xav tias qhov no yog ib lub hwv tsam los qhib siab lug qhia rau nws lawm, tab sis kuv tseem txaj muag tsim tsawv, vim kuv tsis paub tias nws yuav xav li cas rau kuv. Kuv txhawj tsam nws yuav hais tias kuv yog ib tug neeg coj tsis ncaj kiag li. Yog li, kuv thiaj li thov Vajtswv tias, “Vajtswv, kuv tsis xav npog kuv tus kheej mus ntxiv lawm. Kuv tsis xav zais kuv txoj kev xav tiag mus ntxiv lawm. Kuv dhuav heev lawm. Vajtswv, kuv xav ua ib tug neeg coj ncaj, yog li thov coj kuv kev os.” Tom qab kuv thov Vajtswv lawm, ces kuv qhia txhua yam uas kuv tsis muaj cuab kav qhib siab lug qhia rau hauv lub rooj sib tham ntawd rau kuv tus viv ncaus. Tom qab kuv tham tag lawm, mas kuv kaj siab heev li. Tus viv ncaus ntawd thiaj li qhia txog nws txoj kev to taub rau kuv, thiab xa ib zaj lus ntawm Vajtswv cov lus tuaj rau kuv, “Tus yeeb yam tseem ceeb ntawm ib tug neeg txawj dag ces yog qhov tias lawv yeej tsis qhib lawv lub siab los qhia rau ib tug twg li, thiab lawv tsis hais tawm hauv lawv lub siab los txawm tias hais rau lawv tus phooj ywg zoo tshaj plaws los xij. Lawv mas txawj zais kawg li. Tseeb tiag, ib tug neeg zoo li ntawd tsis tas yuav yog neeg laus, los sis twb tau pom lub ntiaj teb ntau heev lawm, thiab tej zaum tsuas paub me ntsis xwb, tiam sis lawv mas txawj zais kawg li. Cov muaj hnub nyoog li lawv mas dag heev. Qhov no tsis yog ib tug neeg txawj dag los hauv nruab thiab los lod? Lawv zais lawv tus kheej zoo heev es thiaj li tsis muaj leej twg tuaj yeem pom lawv tshab. Txawm lawv hais pes tsawg lo lus los xij, yeej qhia tau nyuaj heev tias lo twg yog tiag thiab lo twg yog cuav, thiab tsis muaj leej twg paub tias thaum twg lawv qhia qhov tseeb los sis thaum twg lawv dag li Ntxiv ntawd, lawv muaj txuj ci tshwj xeeb txog kev ua cuav thiab kev ntxias dag. Lawv nquag zais qhov tseeb kom ua rau tib neeg nkag siab yuam kev, kom txhua tus neeg pom lawv tus yeeb yam cuav xwb. Lawv zais lawv tus kheej kom zoo li yog ib tug neeg uas ntxim hwm, zoo, coj ncaj, thiab dawb huv, yog tus neeg uas leej twg los nyiam thiab txaus siab rau, ces nyob thaum kawg, txhua tus thiaj li pe hawm lawv thiab saib taus lawv. Txawm tias koj yuav nyob nrog ib tug neeg zoo li ntawd ntev npaum li cas los xij, koj yeej tsis paub qhov lawv xav li. Lawv tej kev xam pom thiab tej cwj pwm coj rau txhua tus tib neeg, tej xwm txheej, thiab txhua yam ntawd mas yeej zais nyob rau hauv lawv lub siab lawm. Lawv yeej tsis qhia tej no rau ib tug twg li. Lawv haj tseem tsis qhia txog tej no rau lawv tus neeg uas ntseeg siab tshaj plaws thiab. Txawm thaum lawv thov Vajtswv los, tej zaum lawv twb tsis ntseeg qhov muaj nyob rau hauv lawv lub siab los sis qhov tseeb txog lawv thiab. Tsis yog li ntawd xwb, lawv tas zog zais lawv tus kheej kom zoo li yog ib tug neeg uas muaj kev ua neeg zoo, tus uas muaj kev ntseeg thiab mob siab nrhiav qhov tseeb heev. Tsis muaj leej twg tuaj yeem pom hom moj yam uas lawv muaj thiab lawv yog hom neeg twg li” (Txoj Lus, Phau 4. Kev Nthuav Tawm Cov Tawm Tsam Khetos. Yam Kaum Tsib: Lawv Tsis Ntseeg Qhov Muaj Vajtswv, thiab Lawv Tsis Kam Lees Khetos lub Ntsiab Tseeb (Ntu Ib)). Vim Vajtswv txoj lus, kuv thiaj li paub tias cov neeg txawj dag tsis hais lus tawm hauv lub siab los rau lwm tus, thiab lawv tsis qhib siab lug qhia txog lawv tus yam ntxwv tiag rau lwm tus. Tab sis, lawv nquag zais thiab npog lawv tus kheej heev. Kuv thiaj li pom tias kuv ces zoo kiag li qhov Vajtswv nthuav tawm ntawd ntag. Txij thaum los ua ib tug tub leg num txhawb siab los, kuv pom tias kuv muaj ntau qhov tsis zoo, thiab tias kuv kuj qhia ntau tus moj yam qias vuab tsuab tshwm heev li thiab, thiab kuv tsis muaj kev hlub thiab tsis ua siab ntev rau cov los tshiab. Kuv yuav tsum tau qhib siab lug thiab nrog kuv tej nus thiab tej viv ncaus nrhiav kev los daws tej teeb meem no. Tab sis kuv txhawj tias yog kuv qhia qhov tseeb, ces lawv yuav thuam kuv thiab paub tias kuv tsis zoo, yog li kuv thiaj li tsis xav qhia kuv tus yam ntxwv tiag rau lawv. Kuv zam tej uas tseem ceeb es qhia tej uas tsis tseem ceeb, los sis tej teeb meem uas kuv xav tias coob leej muaj rau lawv xwb. Kuv ua li no los npog kuv qhov phem thiab kuv tej kev xav hauv siab. Yuav ua kom lwm tus xav zoo rau kuv, ces kuv thiaj li npog kuv tus kheej thiab qhia txoj kev xav cuav xwb. Kuv dag ntxias kuv tej nus thiab tej viv ncaus lawm. Kuv mas txawj dag thiab ncauj lus zoo tab sis siab phem heev li!

Tom qab ntawd, kuv tus viv ncaus ntawd thiaj li xa lwm zaj lus ntawm Vajtswv cov lus tuaj rau kuv tias, “Tseeb tiag, txhua tus tib neeg puav leej paub tias vim li cas lawv thiaj li dag. Vim txhawm rau lawv tus kheej qhov txiaj ntsim thiab kev khav theeb khav txiv thiab lub meej mom, lawv thiaj li ua txhua yam los nrog lwm tus sib tw thiab lawv tus kheej ua txuj yog yam uas lawv tsis yog. Txawm li cas los xij, thaum kawg lawv tej lus dag ntawd raug lwm tus muab nthuav tawm thiab muab qhia tshwm, ces lawv kawg poob ntsej muag, nrog rau lawv lub koob meej thiab tus cwj pwm xwb. Qhov no puav leej yog los ntawm tej lus dag uas ntau dhau lawm. Koj tau dag ntau dhau lawm. Txhua lo lus uas koj hais mas tsis zoo thiab tsis hais tiag tiag, thiab tsis muaj ib lo uas suav tau hais tias muaj tseeb los sis tiag tiag li. Tab txawm koj tsis xav tias koj poob ntsej muag thaum koj hais tej lus dag ntawd los xij, hauv nruab siab, koj txaj muag heev. Koj lub siab uas txawj xav ntawd cem koj, thiab koj xav tsis zoo rau koj tus kheej, xav hais tias, ‘Vim li cas kuv thiaj li ua ib lub neej uas tu siab ua luaj li no? Qhov hais qhov tseeb ntawd nyuaj heev lod? Kuv yuav tsum dag txhawm rau kuv txoj kev khav theeb lod? Vim li cas kuv lub neej yuav qaug zog ua luaj?’ Koj tsis tas yuav ua ib lub neej qaug zog. Yog koj xyaum ua tau ib tug tib neeg coj ncaj, mas koj yuav ua tau ib lub neej uas kaj siab, ywj siab, thiab ywj pheej. Txawm li cas los xij, koj xaiv los txhawb koj txoj kev khav theeb khav txiv los ntawm qhov hais tej lus dag ntawd lawm. Yog li ntawd, koj ua ib lub neej uas dhuav thiab nyuaj siab heev, uas yog koj ua rau koj tus kheej mob hlwb xwb. Tej zaum yus yuav txaus siab los ntawm qhov hais tej lus dag ntawd, tiam sis qhov kev txaus siab ntawd yog dab tsi? Qhov ntawd tsuas yog ib qho qhuav qhawv xwb, thiab tsis muaj nqis kiag li. Kev hais lus dag txhais hais tias muab yus tus cwj pwm thiab lub koob meej muag tawm ntag. Txoj kev hais lus dag ntawd muab yus lub koob meej thiab yus tus cwj pwm tshem tawm mus; txoj kev hais lus dag ntawd ua rau Vajtswv tsis txaus siab, thiab Nws ntxub txoj kev hais lus dag ntawd. Qhov no puas tsim nyog? Tsis tsim nyog! … Yog koj yog tus uas nyiam qhov tseeb, mas koj yuav nyiaj ntau yam kev txom nyem kom tau xyaum ua qhov tseeb. Tab txawm yog qhov nyiaj kev txom nyem ntawd yog txhais hais tias muab koj lub koob lub npe, lub meej mom tso tseg, thiab nyiaj txoj kev txob thuam thiab kev rhuav tshej muag los ntawm lwm tus los xij, koj yuav tsis xav li cas—tsuav koj tau xyaum ua qhov tseeb thiab ua rau Vajtswv txaus siab xwb ces txaus lawm. Cov uas nyiam qhov tseeb yeej xaiv los xyaum ua qhov tseeb thiab coj ncaj. Qhov no yog txoj kev yog thiab Vajtswv foom koob hmoov rau txoj kev no. Yog ib tug tib neeg twg tsis nyiam qhov tseeb no, lawv xaiv dab tsi? Lawv xaiv los siv tej lus dag los txhawb lawv lub koob lub npe, lub meej mom, lub koob meej, thiab tus cwj pwm. Lawv yeem ua tus neeg txawj dag, kom Vajtswv ntxub thiab tsis kam txais yuav. Cov tib neeg zoo li no mas tsis kam txais yuav qhov tseeb thiab tsis kam txais yuav Vajtswv. Lawv xaiv lawv tus kheej lub koob lub npe thiab lub meej mom xwb; lawv xav dag. Lawv tsis quav ntsej txog qhov seb Vajtswv puas txaus siab los sis seb Nws puas yuav cawm lawv li. Vajtswv puas tseem yuav cawm cov tib neeg zoo li no? Yeej tsis cawm li, vim lawv xaiv txoj kev tsis yog lawm. Tsuas yog dag thiab ntxias xwb mas lawv thiaj li nyob taus; yog lawv hais tej lus dag thiab npog tej lus dag ntawd thiab xav nyuaj heev los tiv thaiv lawv tus kheej txhua hnub ces lawv tsuas tau lub neej lwj siab xwb. Yog koj xav hais tias tej lus dag txhawb tau lub koob lub npe, lub meej mom, thiab txoj kev khav theeb khav txiv uas koj ntshaw ntawd, ces koj yuam kev hlo li lawm. Tseeb tiag, qhov hais tej lus dag ntawd, tsis yog koj tsuas tuav tsis tau koj txoj kev khav theeb khav txiv, thiab koj lub koob meej thiab tus cwj pwm xwb, tshaj ntawd ntxiv, koj tseem plam lub cib fim uas los xyaum ua qhov tseeb thiab ua tus neeg coj ncaj lawm thiab. Tab txawm yog koj tiv thaiv tau koj lub koob lub npe, lub meej mom, txoj kev khav theeb khav txiv nyob rau lub sij hawm ntawd los xij, koj tau muab qhov tseeb tso tseg thiab ntxeev siab rau Vajtswv lawm. Qhov no txhais tau hais tias koj plam lub hwv tsam uas Nws los cawm koj thiab ua kom koj zoo tiav log lawm, uas yog qhov kev plam loj tshaj plaws thiab yog ib qho uas khuv xim mus tag sim neej. Cov uas txawj dag yeej yuav tsis to taub qhov no li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog ib tug Neeg Coj Ncaj Xwb Mas Thiaj Li Ua Neej Tau Zoo LiTib Neeg Tiag). Tom qab nyeem Vajtswv txoj lus lawm, kuv xav txog kuv tus kheej. Yuav kom txuag tau kuv lub ntsej muag thiab lub meej mom thiab txhob raug lwm tus thuam, ces ua ntej txhua lub rooj sib tham, kuv siv kuv lub hlwb los xav tias yuav qhia rau hauv rooj sib tham li cas. Yog tias kuv qhib siab lug qhia txog kuv tus yam ntxwv tiag, ces kuv ntshai kuv tej nus thiab tej viv ncaus yuav xav phem rau kuv. Tab sis yog tias kuv tsis hais dab tsi li, ces kuv kuj txhawj tsam kuv tej nus thiab tej viv ncaus yuav xav tias kuv phem thiab thuam kuv, thaum tag kev cia siab lawm, ces kuv xav khiav kom dim qhov xwm txheej no lawm xwb. Kuv pom tias yuav kom txuag tau kuv lub ntsej muag thiab lub meej mom, ces kuv siv kuv lub hlwb heev thiab ua rau kuv tus kheej nyuaj siab heev, tab sis kuv yeej tseem tsis xav los qhib siab lug qhia, ua ib tug neeg coj ncaj, thiab qhia rau kuv tej nus thiab tej viv ncaus txog kuv tus yam ntxwv tiag thiab tej kev nyuaj li. Kuv mas txawj dag heev! Txawm tias kuv tuav tau kuv tus yam ntxwv rau hauv tib neeg lub siab ib ntus los xij, Kuv poob kuv lub koob meej, kuv lub hwv tsam los ua ib tug neeg coj ncaj, thiab kuv lub hwv tsam los nrhiav qhov tseeb lawm. Kuv dhuav txhua lub rooj sib tham heev, thiab tsis kaj siab hlo li. Kuv ua kuv txoj kev qias vuab tsuab qhev du lug. Tej nus thiab tej viv ncaus npaj noj thiab haus Vajtswv txoj lus rau ntawm tej rooj sib ntsib, thiab qhia txog lawv txoj kev ntsib pom thiab kev paub txog Vajtswv txoj lus. Yog tias peb muaj tej teeb meem los sis tej kev nyuaj, peb ib leeg thiaj li pab tau ib leeg thiab ib leeg kawm tau los ntawm ib leeg tej kev zoo. Ua li no, mas thiaj li tau txais Vajntsujplig tes hauj lwm thiab to taub qhov tseeb yooj yim dua. Tab sis nyob rau ntawm tej rooj sib tham mas, kuv ib txwm xav qhov yuav qhia li cas kom txhob raug thuam, kom tib neeg thiaj li yuav xav zoo rau kuv. Kuv txhua txoj kev xav mas xav rau qhov no xwb. Qhov ua lub neej li no mas nyuaj thiab sab heev li.

Tom qab ntawd, ces kuv thiaj li nyeem lwm zaj lus ntawm Vajtswv txoj lus tias, “Nej puas muaj peev xwm qhib siab lug hais tawm thiab hais qhov muaj tiag nyob hauv nej lub siab thaum qhia rau lwm tus? Yog hais tias ib tug neeg twg ib txwm hais qhov muaj tiag nyob hauv lawv lub siab tas li, yog lawv hais lus ncaj ncees, yog hais tias lawv ua lub siab dawb paug, thiab tsis lam tau lam ua thaum ua lawv tes dej num kiag li, thiab yog hais tias lawv tuaj yeem xyaum ua raws qhov tseeb li qhov lawv to taub, ces tus neeg no thiaj li muaj kev cia siab txog kev tau txais qhov tseeb. Yog hais tias ib tug neeg twg ib txwm npog lawv tus kheej thiab zais lawv lub siab kom tsis muaj leej twg pom tej ntawd meej tseeb, yog hais tias lawv ua cuav tsab los mus ntxias dag lwm tus, ces lawv yuav poob rau txoj kev phom sij loj heev, lawv yuav ntsib teeb meem loj heev, yuav ua rau lawv tau txais qhov tseeb nyuaj heev. Nej tuaj yeem pom los ntawm ib tug neeg twg lub neej txoj sia txhua hnub thiab pom lawv tej lus thiab tej kev ua tias lawv tej kev xav yog dab tsi. Yog hais tias tus neeg no ib txwm ua txuj, ib txwm yuav li nws lub siab xav xwb, ces tus neeg no tsis yog ib tug uas kam lees txais qhov tseeb, thiab lawv yuav raug nthuav tawm thiab raug ntiab tawm sai sai no los sis tsis ntev no. … Cov tib neeg uas yeej tsis qhib lawv lub siab, cov uas ib txwm zais thiab npog txhua yam, cov uas ua txuj hais tias lawv mas ntxim hwm, cov uas xav kom tib neeg hwm lawv, cov uas tsis pub lwm tus paub txog lawv kom tag, cov uas xav kom tib neeg hwm lawv—cov tib neeg no tsis yog ruam lod? Cov tib neeg no mas yog cov ruam tshaj plaws! Qhov ntawd yog vim hais tias qhov tseeb txog tib neeg yuav tsum raug muab qhia tshwm sai sai no los sis tsis ntev no. Lawv yuav taug txoj kev twg nyob rau hauv lawv txoj kev coj zoo li no? Qhov nov yog Falixais txoj kev. Cov hais lus zoo tab sis siab phem puas muaj kev phom sij los sis tsis muaj? Cov no yog cov tib neeg uas Vajtswv ntxub tshaj plaws, yog li ntawd koj puas xav tias lawv phom sij los tsis phom? Tag nrho cov neeg uas yog Falixais puav leej taug txoj kev puas ntsoog xwb!” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Muab Yus Lub Siab rau Vajtswv, Es Yus Thiaj Li Tuaj Yeem Tau Txais Qhov Tseeb). Vim Vajtswv cov lus kuv thiaj li to taub tias Vajtswv xav kom peb ua neeg coj ncaj, tham lus kom yooj yim thiab qhib siab lug, txhob dag los sis dag ntxias, thiab txawm tias peb qhia tshwm txoj kev qias vuab tsuab los xij, peb yeej qhib tau siab lug qhia thiab tham txog txoj kev qias vuab tsuab ntawd, kom lwm tus thiaj li pom txog peb tej kev xav tiag. Los ntawm qhov xyaum ua raws qhov tseeb li no, ces peb thiaj li yuav tsis sab, thiab peb thiaj li taug tau txoj kev cawm dim. Tab sis rau cov neeg uas ib txwm npog lawv tus kheej, zais, tsis qhia, thiab tsis pub lwm tus pom lawv tus yam ntxwv li, ces lawv taug txoj kev yuam kev lawm, tsuas ua ncauj lus zoo tab sis siab phem heev zuj zus xwb, thiab yeej daws tsis tau lawv tej moj yam qias vuab tsuab li. Qhov no yog txoj kev mus rau dab teb lawm. Kuv xav txog cov Falixais ob txhiab xyoo dhau los lawm ntawd. Sab nraud mas lawv ntseeg heev, thiab lawv niaj hnub piav qhia nqe Vajluskub rau lwm tus nyob hauv cov tsev sab laj. Lawv kuj txhob txwm sawv ntawm tej kev sib tshuam es thov Vajtswv kom tib neeg xav tias lawv hlub Vajtswv. Tab sis lawv tsis hwm Vajtswv hlo li, tsis muab Vajtswv saib kom tseem ceeb tshaj txhua yam, los sis tsis ua raws li Vajtswv cov lus txib li. Thaum Tswv Yexus tshwm los ua hauj lwm, lawv yeej paub meej meej tias Nws cov lus muaj qhov muaj cai thiab muaj hwj chim, thiab los ntawm Vajtswv los, tab sis yuav kom tuav tau lawv lub meej mom thiab nyiaj txiag, ces lawv thiaj li tawm tsam thiab teem txim rau Vajtswv tes hauj lwm yam vwm ntsuav thiab thaum kawg muab Tswv Yexus ntsia rau saum tus ntoo khaub lig lawm. Kuv thiaj li pom tias cov Falixais mas ntseeg tus duab xwb, tab sis lub ntsiab tseeb mas txawj dag thiab txawj ntxais heev. Lawv mas txawj npog thiab txawj dag heev. Txhua yam uas lawv ua mas yog los ntxias dag thiab tswj tib neeg, thiab ntxias tib neeg ntawm lawv txoj kev hwm thiab kev pe hawm. Txoj kev lawv taug yog ib txoj kev tawm tsam Vajtswv. Nyob rau thaum kawg, lawv ua txhaum rau Vajtswv tus moj yam ces thiaj li raug Vajtswv foom phem thiab rau txim rau lawm. Kuv thiaj li xav txog kuv tus kheej lawm. Yuav kom muaj tus yam ntxwv zoo nyob rau hauv lwm tus lub siab, thiab yuav kom tuav tau kuv tus yam ntxwv thiab lub meej mom, ces kuv thiaj li npog kuv txoj kev qias vuab tsuab thiab tsuas tham txog tus cwj pwm uas lwm tus nquag tham xwb. Qhov no tsis yog tsuas tiv thaiv kuv tus yam ntxwv xwb, nws kuj tseem ua rau tib neeg xav tias kuv qhib siab lub qhia thiab no. Tsis yog kuv tsuas txawj dag li cov Falixais xwb lod? Kuv ntshai heev thaum kuv paub li no lawm. Kuv yuav ua tsis tau li no ntxiv lawm. Kuv yuav tsum tau ua ib tug neeg coj ncaj raws li Vajtswv tej kev cheem tsum.

Tom qab ntawd, kuv tus viv ncaus ntawd thiaj li xa lwm zaj lus ntawm Vajtswv txoj lus tuaj rau kuv. “Tam sim no muaj ntau tus tib neeg uas mob siab rau txoj kev caum qhov tseeb thiab muaj peev xwm nrhiav qhov tseeb thaum muaj tej yam los raug rau lawv lawm. Yog koj xav los daws tej kev muaj siab uas yuam kev thiab tej yam ntxwv tsis zoo nyob rau hauv koj ntawd mas koj yuav tsum nrhiav qhov tseeb los kho tej ntawd. Qhov pib, koj yuav tsum kawm kom koj tus kheej paub qhia raws li Vajtswv cov lus. Tseeb, koj yuav tsum xaiv mus qhia rau tus neeg txais uas yog—yam tsawg kawg, koj yuav tsum xaiv tus uas nyiam qhov tseeb thiab lees txais qhov tseeb, tus uas muaj txoj kev ua neej zoo heev, uas coj ncaj thiab ncaj ncees heev. Yog koj xaiv tau tus uas to taub qhov tseeb, tus uas nws tej lus qhia pab tau koj thiab mas haj yam zoo. Qhov nrhiav hom tib neeg zoo li no es koj tus kheej mus qhia rau thiab daws koj tej kev nyuaj mas yuav zoo heev. Yog koj xaiv tus neeg tsis yog, tus uas tsis nyiam qhov tseeb, tiam sis tsuas muaj ib qho peev xwm los sis kev txawj xwb, ces lawv yuav thuam thiab ntxub koj, thiab lawv yuav txo koj. Qhov no yuav tsis muaj txiaj ntsim rau koj. Ib qho mas, qhov muab yus tus kheej qhia tawm thiab nthuav tawm no yog qhov uas yus yuav tsum ua thaum hais txog qhov los nyob rau ntawm Vajtswv lub xub ntiag thiab qhov thov Nws ntawd; nws kuj yog qhov uas yus yuav tsum qhia txog qhov tseeb rau lwm tus thiab. Tsis txhob khaws txhua yam cia, es xav hais tias, ‘Kuv muaj tej kev txhawb siab thiab tej kev nyuaj. Kuv tus xeeb ceem tsis zoo—tus xeeb ceem ntawd mas phem. Kuv yuav tsis qhia leej twg. Kuv cia li muab tus xeeb ceem ntawd tuav cia xwb.’ Yog koj pheej muab txhua yam tuav cia es tsis kho tej ntawd li, ces koj haj yam yuav xav phem, thiab koj tus yam ntxwv haj yam yuav phem ntxiv xwb. Koj yuav tsis kam thov Vajtswv lawm. Qhov no yog ib qho uas thim rov qab nyuaj. Thiab yog li ntawd, txawm hais tias koj tus yam ntxwv yuav zoo li cas los xij, tsis hais txawm koj xav phem, los sis muaj kev nyuaj siab, tsis hais koj tus kheej tej kev txhawb siab los sis kev npaj, txawm hais tias koj tau los paub los sis ras txog los ntawm kev tshuaj saib kom meej los xij, koj yuav tsum xyaum qhib thiab qhia siab, thiab thaum koj qhib siab, ces tus Vajntsujplig yuav ua hauj lwm. Yog li tus Vajntsujplig yuav ua hauj lwm li cas? Nws qhia koj thiab qhia kom koj paub qhov tseeb thiab cia koj pom qhov teeb meem loj, Nws ua rau koj paub txog tus cag thiab lub ntsiab tseeb ntawm qhov teeb meem ntawd, tom qab ntawd ua kom koj to taub qhov tseeb thiab Nws tej kev npaj siab ib qho me ntsis zuj zus, thiab cia koj pom txoj kev xyaum ua raws li qhov tseeb thiab to taub qhov tseeb qhov muaj tiag. Thaum ib tug neeg tuaj yeem qhia yam qhib siab lug lawm, ces qhov no txhais tau tias lawv muaj ib tug cwj pwm coj ncaj rau qhov tseeb lawm. Txawm hais tias ib tug neeg coj ncaj los tsis ncaj los yeej yog ntsuas los ntawm lawv tus cwj pwm mus rau qhov tseeb” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Tom qab kuv nyeem Vajtswv txoj lus lawm, ces kuv tus viv ncaus ntawd thiaj li qhia tias: “Yog tias peb xav daws peb tej yam ntxwv txhaum, ces peb yuav tsum tau ua neeg coj ncaj thiab qhib peb lub siab lug qhia rau lwm tus. Yog tias peb pheej npog, tsis qhia, thiab tsis kam qhib siab lug qhia, ces peb yeej yuav raug cuab rau hauv peb tej yam ntxwv txhaum, plam Vajtswv txoj kev coj qhia, thiab poob mus rau hauv qhov tsaus nti. Piv txwv li, yog tias ib tug neeg mob, ces lawv yuav mus nrhiav ib tug kws kho mob los sis nug tus neeg uas muaj kev paub lawm. Ua li ntawd, ces lawv thiaj li to taub lawv tus mob, tau txais cov tshuaj yog, thiab tswj tau tus mob ncav sij hawm. Tab sis ib txhia neeg mas, txawm paub lawv tus mob los xij, xav tias nws tsis tseem ceeb, thiab tsis xav tham txog lawv tus mob li. Nyob rau thaum kawg, vim kho tsis ncav sij hawm, ces tus mob thiaj li loj tuaj, los sis haj tseem ua rau tag txoj siab tau thiab. Yog tias peb xav daws peb tej yam ntxwv txhaum thiab tej kev nyuaj, ces peb yuav tsum tau qhia yam qhib siab lug thiab ua neeg coj ncaj. Qhov no thiaj li yog txoj kev xyaum ua raws uas yog.” Los ntawm tus viv ncaus ntawd txoj kev qhia txog Vajtswv txoj lus, kuv thiaj li to taub tias qhov ua ib tug neeg coj ncaj thiab qhib siab lug qhia txog peb tus kheej mas tseem ceeb heev. Kuv tsis tau ntseeg Vajtswv los ntev lawm thiab tsis to taub qhov tseeb li. Txawm kuv lees tias kuv qhia tshwm tus moj yam qias vuab tsuab los xij, kuv yuav daws tsis tau qhov ntawd. Kuv yuav tsum xyaum ua ib tug neeg coj ncaj, qhib siab lub qhia kuv tus yam ntxwv, thiab nrhiav qhov tseeb. Tsuas yog ua li no xwb kuv thiaj li yuav tau txais Vajtswv txoj kev coj qhia, thiab nws kuj yuav pab daws tau kuv tus moj yam qias vuab tsuab thiab. Kuv nyuam qhuav pib txhawb rau cov los tshiab xwb, yog li yeej tsis txawv yog tias kuv tsis to taub ntau yam. Thaum kuv tsis to taub, ces kuv yuav tsum qhib siab lub los nrog kuv tej nus thiab tej viv ncaus nrhiav. Ua li ntawd, kuv thiaj li paub tej hauv paus ntsiab lus zoo txog kuv tes dej num ib qho zuj zus thiab thiaj li ua tau kuv tes dej num zoo. Tom qab ntawd, kuv thiaj li qhib siab lug qhia rau kuv tus viv ncaus ntawd txog kuv tus yam ntxwv nyob rau lub sij hawm no thiab kuv tej kev nyuaj hauv kuv tes dej num. Nws tsis yog tsuas tsis thuam kuv xwb, nws tseem xa Vajtswv txoj lus tuaj rau kuv thiab qhia txog nws txoj kev paub tuaj pab kuv thiab. Vim muaj nws txoj kev pab, es kuv thiaj li muaj qee txoj kev paub txog kuv tus yam ntxwv thiab txoj kev qias vuab tsuab uas kuv qhia tshwm lawm, thiab kuv thiaj li muaj kev zoo siab thiab kaj siab heev li lawm. Tom qab ntawd, ces kuv thiaj li nco ntsoov xyaum ua ib tug neeg coj ncaj thiab qhib siab lug qhia txog kuv tus yam ntxwv lawm.

Muaj ib hmos, ces kuv tau tuav ib lub rooj sib tham rau ib pawg. Tus thawj coj npaj ib tug thawj coj pab pawg tuaj nrog kuv ua tus tuav. Tus viv ncaus no to taub qhov tseeb zoo tshaj kuv. Nyob rau lub rooj sib tham, nws qhia thiab daws lwm tus tej teeb meem tau zoo heev, ces kuv thiaj li khib me ntsis. Kuv xhawj txog qhov lwm tus yuav xav li cas rau kuv. Lawv puas yuav xav tias kuv tsis piv nws? Tom qab lub rooj sib tham ntawd lawm, ces tus thawj coj thiaj li nug seb kuv puas muaj kev xav dab tsi los qhia. Kuv paub tias kuv yuav tsum ua ib tug neeg coj ncaj, qhib siab lug qhia txog kuv txoj kev qias vuab tsuab rau tus viv ncaus ntawd, thiab nrhiav kev los daws. Yog li, kuv thiaj li qhia rau kuv tus viv ntawd txog qhov kuv qhia tshwm hauv kuv lub siab. Ces nws txawm xa tau Vajtswv txoj lus tuaj rau kuv thiab qhia txog nws txoj kev paub rau kuv. Kuv mam paub tias kuv khib kuv tus viv ncaus ntawd Vim kuv saib lub meej mom muaj nqi, muaj ib tug moj yam khav theeb, thiab xav kom lwm tus hwm. Kuv kuj paub tias yuav kom tso tau kuv txoj kev khib tseg, mas kuv yuav tsum tau thov Vajtswv ntxiv, xav txog pawg ntseeg tes hauj lwm thiab kuv tes dej num, thiab muab pawg ntseeg tej kev ntshaw tso ua ntej. Qhov no thiaj li mus raws li Vajtswv txoj kev npaj siab. Ua ke ntawd, kuv kuj yuav tsum tau daws kuv tus kheej tej kev ua tsis tau zoo thiab tej kev yuam kev kom tsim nyog thiab thiab kawm ntxiv los ntawm lwm tus tej kev zoo los hloov kuv tej kev ua tsis tau zoo. Ua li ntawd, kuv thiaj li to taub qhov tseeb ntxiv. Kuv zoo siab heev uas paub li no. Kuv yeej paub tias thaum kuv qhib siab lug qhia rau kuv tej nus thiab tej viv ncaus, tsis yog lawv tsis thuam kuv xwb, lawv puav leej tseem pab kuv ntau heev thiab.

Tom qab paub qhov ntawd lawm, ces kuv paub tias qhov ua ib tug neeg coj ncaj ntawd mas nws tseem ceeb heev li. Tsuas yog qhov ua ib tug neeg coj ncaj thiab qhib siab lug xwb mas peb thiaj li yuav tau txais Vajntsujplig tes hauj lwm thiab to taub qhov tseeb. Kuv kuj pom tias qhov ua ib tug neeg coj ncaj mas thiaj li yuav tso tau peb dim thiab muaj kev ywj pheej, thiab cia peb ua lub neej nyob kom zoo li tib neeg xwb. Ua tsaug rau Vajtswv!